1. Muloñadi mpinji jikwawu chitunateli kutiyila woma?

 WEJIMA wetu twatiyaña woma mpinji jikwawu. Hela chochu, kudiza Bayibolu kunatukwashi kuleka kutiya afu woma, andemoni niyuma yikamwekena antu kumbidi. Ilaña tuchidi kushakama mumpinji munenzali “yuma yakutiyisha woma,” yidi neyi njita, wubanji ninyisoñu. (Luka 21:11) Hadaha tunateli cheñi kuchiina antu, kushilahu nijinfulumendi jatukabishaña indi kwiji antu amuchisaka chetu adimbululaña kudifukula kwalala. Amakwawu akamenaña nawu hiyakutwesha kuumika kukala kunateli kumonawu chayinu mpinji hela kwakamonawu kumbidiku.

2. Lumbululenu kukala kwamweniyi Davidi hadiñayi muGati.

² Davidi watiyileña woma mpinji jikwawu. Chakutalilahu, hampinji yamukumpishileñawu nikukeña kumujaha kudi Mwanta Sawulu, Davidi watemukilili kumusumba waGati wawaFilisitinu. Hashimbwili wanyi, Mwanta Akishi wakuGati, watiyili nawu Davidi wadiña chilobu wañovu embileñawu mukamina nawu natapi “makumi amakombakaji” awaFilisitinu. Davidi watiyili “woma nankashi.” (1 Sam. 21:10-12) Wakameneni chuma chikumwilawu kudi Akishi. Davidi wemikili ñahi mushindu woma watiyileñayi?

3. Kwesekeja Nesamu 56:1-3, 11, Davidi wemikili ñahi mushindu woma?

³ Mwisamu 56, Davidi washimuna chatiyileñayi hampinji yadiñayi muGati. Idi isamu dashimuna woma watiyiliyi Davidi, ilaña  damwekesha cheñi hatooka chemikiliyi mushindu iwu woma. Chatiyayi woma, Davidi wamukuhweleleleña Yehova. (Tañenu Isamu 56:1-3, 11.) Mukumukuhwelela Nzambi mwafumini yuma yayiwahi. Nawukwashu waYehova, Davidi wakasili kafuta kakwila chuma chamukwashili nankashi: Wadibalumwini kwikala neyi chizaluki! Chatela Akishi amujahi Davidi wamuhañili, dichi Davidi watemukili.—1 Sam. 21:13–22:1.

4. Chumanyi chinateli kutukwasha kumukuhwelela chikupu Yehova? Shimunenu chakutalilahu.

⁴ Ninetu tunateli kwimika mushindu woma neyi tumukuhwelelaña Yehova. Hanu dinu twamukuhwelelaña ñahi chikupu Yehova, sweje-e neyi tunatiyi woma? Talenu ichi chakutalilahu. Neyi ayileja nawu kudi chikatu cheneni chimukweti, hadaha hakusambila mukutiya woma. Hela chochu, mukuleka kutiya woma neyi mumukuhwelela ndotolu. Hadaha wokahu dehi ayeji adiña nachikatu neyi chimukweti. Nateli kuyitiyilila nakanañachima, nakuyikwasha kukuhwelela nenu neluki chimunakutiya. Nawa hadaha nateli kuyileja njila yakuukilamu chikatu chimukweti yakwashahu dehi antu amakwawu. Munjila yoyimu, twamukuhwelelaña chikupu Yehova neyi tutoñojoka hayuma yelayi dehi, yinakwilayi chayinu mpinji niyakatwililayi kumbindi. Dicheliliyi niDavidi. Chitukuhanjekaña hamazu indi onenewa amakwawu ekala Mwisamu 56, ninenu toñojokenu chimunateli kumukuhwelela chikupu Yehova kulonda mwimikeña mushindu woma.

YUMANYI YELAYI DEHI YEHOVA?

5. Davidi watoñojokeleña hayumanyi hakwila emiki mushindu woma? (Isamu 56:12, 13)

⁵ Hela chakwila wumi waDavidi wadiña muwubanji, watwalekelihu kutoñojoka hayuma yayiwahi yelayi dehi Yehova. (Tañenu Isamu 56:12, 13.) Dichuma chelileñayi Davidi muchihandilu chindi chejima. Chakutalilahu, mpinji jikwawu watoñojokeleña chikupu hayuma yaleñayi Yehova, nawa chumichi chamwanukishileña hañovu jaYehova jabadika nichayakamenañayi antu. (Mas. 65:6-9) Cheñi Davidi watoñojokeleña chikupu hayuma yelililiyi Yehova antu amakwawu. (Mas. 31:19; 37:25, 26) Sweje-e dinu, watoñojokeleña chikupu hayuma yamwilililiwu dehi kudi Yehova halwindi. Yehova wamukwashili nikumukiña Davidi kufuma tuhu  kuwukeki. (Mas. 22:9, 10) Chakadi nikujina, kutoñojoka muniyi njila kwamukwashili Davidi kumukuhwelela chikupu Yehova!

6. Neyi tunatiyi woma, yumanyi yikutukwasha kumukuhwelela Yehova?

⁶ Neyi mutiya woma, dihulenu nenu, ‘Yumanyi yelayi dehi Yehova?’ Toñojokenu hayuma yaleñayi. Chakutalilahu, neyi ‘tushinshika chiwahi’ hachakamenañayi Yehova atuda ninkenu, yuma yabuliliyi kuleña muchifwanisha chindi nawa yabulaña kudifukula kudi yena, tukukuhwelela chikupu netu wukutwakamenaña ninetu. (Mat. 6:25-32) Toñojokenu cheñi hayuma yayililayi dehi Yehova akakudifukula indi. Hadaha munateli kudiza hadi muntu ashimunawu muBayibolu wamwekesheli chikuhwelelu chikupu, indi kwiji munateli kutaña nsañu yayuma yamwekeni yakambuña aYehova wamakonu. a Kubombelahu, toñojokenu hachayakamenahu dehi Yehova. Wayikokeli ñahi nakuyileta muchalala? (Yow. 6:44) Wakulaña ñahi kulomba kwenu? (1 Yow. 5:14) Mulambu waMwanindi akeñayi wunakuyikwasha ñahi hefuku-hefuku?—Efwe. 1:7; Heb. 4:14-16.

7. Chuma chamumwekeneni kaprofwetu Danyeli chamukwashili ñahi muhela Vanessa kwimika mushindu woma watiyileñayi?

⁷ Vanessa, b muhela wakuHaiti, wamweni yuma yamutiyishili woma. Iyala wumu mwiluña mwashakamañayi wamutemesheleleña foni nimameseji hefuku-hefuku nakumukanjikija nindi akaami nindi. Muhela Vanessa wakaanini chakadi nikuhita mumbadi. Ilaña iwu iyala wazuwili nawa wamuchiinishili nindi wukumwila chuma chatama. Iwu muhela wahosheli nindi, “Natiyili woma.” Chumanyi chamukwashili muhela Vanessa kwimika mushindu woma? Hakwila adikiñi welilihu yuma yimu. Mukulumpi muchipompelu wamukolesheli nindi ayi nakudimona nawakawuswa. Ilaña watoñojokeli cheñi hadi Yehova chakiñiliyi ambuñindi akunyima. Muhela Vanessa wahosheli nindi, “Muntu watachi inatoñojokelihu wadiña kaprofwetu Danyeli. Amunatilili mwiyeñu dawanyitupa afwili nzala hela chakwila hadiñahu namuloñaku. Hela chochu, Yehova wamwakameneni. Dichi nashili kukala kwejima mumakasa aYehova. Nkumininaku, nalekeli kutiya woma.”—Dan. 6:12-22.

YUMANYI YINAKWILAYI YEHOVA CHAYINU MPINJI?

8. Chumanyi chakuhweleleliyi Davidi? (Isamu 56:8)

⁸ Hela chakwila wumi waDavidi wadiña muwubanji chikupu hampinji yadiñayi muGati, hafwili mutentu muloña wawomaku. Ilaña washili muchima hayuma yamwililileñawu kudi Yehova hayina mpinji. Davidi welukili nindi Yehova wamulombweleña nikumukiña nawa welukili chatiyileñayi. (Tañenu Isamu 56:8.) Davidi wadiña cheñi nawamabwambu jindi, chidi neyi aYonatani naKapristu Muneni Ahimeleki, amukolesheleña nikumukwasha chikupu. (1 Sam. 20:41, 42; 21:6, 8, 9) Nawa hela chakwila akeñeleña kumujaha kudi Mwanta Sawulu, Davidi watemukili. Wakuhweleleli nindi Yehova welukili chikupu kukala kwahitileñamu nichatiyileñayi muloña waniku kukala.

9. Yumanyi yamonañayi Yehova hadi muntu-himuntu?

⁹ Neyi munakuhita mukukala kunakuyitiyisha woma, anukenu nenu Yehova nakumoni oku kukala nawa neluki chimunakutiya. Chakutalilahu, Yehova hamweni hohu chayikabishileñawu aIsarela muEjipituku, ilaña wamweni ‘nimakabi iyahitileñamu.’ (Kwid. 3:7) Davidi wembili nindi Yehova wamweni “makabi” ‘niyihuñu’ yahitileñamu. (Mas. 31:7) Nawa nihampinji yakabakeneña antu jaNzambi, hela chakwila akabakeneña muloña wakufuukula kwawu kwatama, “chamukatileña  kumuchima.” (Isa. 63:9) Neyi munakutiya woma, Yehova neluki chimunakutiya nawa nakufwila chikupu kuyikwasha kulonda mwimiki mushindu woma.

10. Yumanyi yinayileteshi mukuhweleli nenu Yehova wayakamenaña nawa nenu wukuyikwashaña kuumika kukala kwejima kumunateli kumona?

¹⁰ Hela chochu, munateli kujinoka neyi chakwila Yehova nakuyikwasha hampinji yimunakumona kukala kunakuyitiyisha woma. Dichi mulombenu ayikwashi kulonda mumoni chinakuyikwashayi. (2 Anya. 6:15-17) Kuhiñahu toñojokenu hachumichi: Kudihu mpanji hela ñakwilu yahaniniwu hakupompa yinayikoleshi? Kudihu mukanda, vidiyo indi kwiji kamina kadimena kanayikoleshi? Kudihu mukwenu mukakudifukula wayilejahu dehi mazu akukolesha hela nsona? Tunateli kutachika kudiwula kulema kwakukeña kwatumwekeshelañawu amanakwetu mukaayi kejima niyakuda yakuspiritu yitwatambwilaña. Ilaña iyi hiyawaana yalema nankashi yatwinkañayi Yehova. (Isa. 65:13; Maku 10:29, 30) Yamwekeshaña hatooka nawu watwakamenaña. (Isa. 49:14-16) Yamwekeshaña cheñi hatooka nawu yena watelela enu kumukuhwelela.

11. Yumanyi yamukwashili muhela Aida kwimika mushindu woma watiyileñayi?

¹¹ Muhela Aida, washakamaña kuSenegal, wamweni chamukwashileñawu kudi Yehova hampinji yamweniyi kukala. Chineli diyi wadiña mwana wawedi, anvwali jindi akuhweleleli nawu diyi wukukeñaña mali akudikwashamu nachu yomweni niwena. Ilaña chelili muhela Aida apeleshiku chihandilu chindi kulonda atachiki wupayiniya, watachikili kwikala namali antesha. Haniyi mpinji chisaka chindi chamuheleli nawa chamusupishileña. Wahosheli nindi, “Natachikili kwakama nami nukutweshaña wanyi kukwasha anvwali jami nawa antu ejima akunhela. Nawa namwinkelimu Yehova nyiloña hakwiteja kukala kunamweneña kuswejelaku.” Kufumahu watiyilili kumpanji yahaniniwu hakupompa. “Nhoshi watwanukishili nindi Yehova weluka yuma yejima yaleteshaña twakameña hela kutiya woma. Nawukwashu wawakulumpi niamanakwetu amakwawu, natachikili kumona chovu-chovu nami Yehova wankeña. Neyi inakulomba kudi Yehova, natachikili kukuhwelela chikupu nami wukunkwasha nawa nekalili mukuwunda kwakweni hakumona chakwileñayi  kulomba kwami.” Mukuhita kwampinji, muhela Aida wawanini mudimu wamukwashili kwikala namali amukwashili kutwalekahu kuzata wupayiniya nikukwasha anvwali jindi. Wahosheli nindi, “Nadizi kumukuhwelela chikupu Yehova. Ichi neyi nilomba, woma winnakutiya washikenaña hohu kujimañana.”

YUMANYI YAKELAYI YEHOVA KUMBIDI?

12. Kwesekeja Nesamu 56:9, chumanyi chakuhweleleliyi Davidi?

¹² Tañenu Isamu 56:9. Iyi vasi yinamwekeshi chuma chikwawu chamukwashili Davidi kwimika mushindu woma. Hela chakwila wumi windi wachidiña muwubanji, watoñojokeleña chikupu hachuma chakamwililawu kudi Yehova. Davidi welukili nindi Yehova wakamupulwisha mumpinji yatelela. Kafwampi, Yehova washimwini nindi Davidi diyi wakekala mwanta waIsarela wakasinsahu. (1 Sam. 16:1, 13) Chuma chejima chakaniniyi Yehova, Davidi wachimweneña neyi kwiji chinashikijewi dehi.

13. Twatela kukuhwelela netu Yehova wakeladi?

¹³ Chumanyi chayishiikayi Yehova kuyilila? Hitwatela kukuhwelela netu wukutukiñaña kukukala kwejima kutukumonañaku. c Hela chochu, kukala kudi kwejima kutunateli kumona muniyi nshakaminu yamakonu, Yehova wakakufumishahu kwejima mukaayi kakaha kanakwinza. (Isa. 25:7-9) Nleñi yetu wudi nañovu chikupu yakusañula afu, kutuuka yikatu nikufumishahu ejima atudimbululaña.—1 Yow. 4:4.

14. Yumanyi yitwatela kutoñojokahu chikupu?

¹⁴ Neyi mutiya woma, toñojokenu chikupu hayuma yakelayi Yehova kumbidi. Toñojokenu chimwakatiya neyi Satana anamukisañani, neyi antu atama anayifumishihu nakusinsishahu antu aloña nawa neyi kubula kuwanina kunatachiki kumana chovu-chovu ifuku niifuku. Chimwenu chamwekesheliwu muprogiramu yakupompa kweluña kwamu 2014, chamwekesheli chitunateli kutoñojoka chikupu hayuma yitwachiñejaña. Tata yawantu wahanjekeleña nachisaka chindi hamazu ekala ha 2 Timotewu 3:1-5 chiyadi kuyisoneka munjila yambuka neyi chakwila awa mazu ahosheleña hayuma chiyakekala muParadisa. Wahosheli nindi: “Mwituña dadiha mwakekala muzañalu. Antu akekala akeña akwawu, akeña yuma yakuspiritu, adizoza, akakudifukula kudi Nzambi, ovwahilaña anvwali, asakililaña, ashinshika, akeña yisaka yawu, ovwaha muchima, abulaña kutuñula akwawu, adihemba, abula kuzuwa, akeña yayiwahi, abulaña kutwamba, atiyililaña, akeña Nzambi bayi kuditiyisha aweni kuwahaku, amwakama Nzambi chikupu nawa dikundi nawantu amuchidiwu.” Komana mwahanjekaña nachisaka chenu hela akwenu akakwitiya chakekala yuma mukaayi kakaha?

15. Hela chakwila muhela Tanja watiyileña woma, chumanyi chamukwashili kwimika mushindu woma?

¹⁵ Muhela Tanja, washakamaña kuKabeta kakuChimunswa kaMacedonia, wemikili mushindu woma kuhitili mukutoñojoka chikupu hayuma yayiwahi yakumbidi. Anvwali jindi amukaanishileña chikupu kudiza Bayibolu. Wahosheli nindi: “Yuma yimu yinatiyileña woma nami yikamwekana, yamwekeni. Mpinji yejima chinafuma nakupompa, amama añeteleña. Anvwali jami anchiinishileña nawu neyi nikala Chinsahu chaYehova akunjaha.” Nkumininaku, muhela Tanja amuhañili hetala. Welili ñahi? Wahosheli nindi: “Natoñojokeleña hamuzañalu wunakekala nawu haya nyaaka muloña wakufuukulahu kutwaleka kwikala washinshika. Natoñojokeleña cheñi hachakanfwetayi Yehova mukaayi kakaha chuma chejima chinnateli kujimbesha mukanu kaayi katama nichitwakabulaña kwanuka yuma yejima yatama.” Muhela Tanja watwalekelihu kwikala washinshika. Nawa nawukwashu waYehova, wawanini kwakushakama. Ichi muhela Tanja wasumbuka kudi manakwetu washinshika  nawa anakukalakela hamu namuzañalu mumudimu wampinji yejima.

MUKUHWELELENU YEHOVA CHIKUPU CHAYINU MPINJI

16. Chumanyi chakatukwasha kutwalekahu kwikala ahamuka neyi yuma yashimunawu muwuprofwetu wasonekawu haLuka 21:26-28 yinatachiki kumwekana?

¹⁶ Mumpinji yalukadi lwasweja antu amavulu “akahwidijela muloña wawoma.” Ilaña antu jaNzambi akatwalekahu kwikala akola nawa ahamuka. (Tañenu Luka 21:26-28.) Muloñadi chitwakabulila kutiya woma? Muloña twakekala adiza dehi kumukuhwelela Yehova. Muhela Tanja ashimunawu hakusambila wahosheli nindi yuma yamumwekeneni kunyima yinakumukwasha kuumika kukala kwejima kunakumonayi. Wahosheli nindi: “Nenzi nakwiluka nami Yehova nateli kutukwasha kuumika kukala kudi kwejima nikutukiswila. Mpinji yikwawu chinateli kumwekana neyi antu amakwawu akweti ñovu hayuma yejima, ilaña walala wudi wakwila nawu Yehova wukweti ñovu kuyibadika. Nawa hela chakwila kukala kukutoha chamuchidinyi, kwakamana.”

17. Nsona yetu yachaaka cha 2024 yikatukwasha ñahi? (Talenu mwevulu wudi hakava.)

¹⁷ Kudi yuma yayivulu yatutiyishaña woma makonu. Ilaña kufwana Davidi, hitwatela kwiteja woma kutuyuulaku. Mazu adi munsona yetu yachaaka cha 2024 himazu alombeliyi Davidi kudi Yehova nindi: “Neyi natiyi woma, nakuhwelelaña mudi eyi.” (Mas. 56:3) Talenu chahosheliyi muntu wumu wadiza chikupu Bayibolu kutalisha haniyi vasi nindi Davidi “hatwalekelihu kutoñojoka hayuma yamutiyishileña woma hela hakukala kwamweneñayiku, ilaña washindameneni hadi Chamwinu chindi wakamwamwina.” Mutukweji tunakwinza, toñojokenuña hamazu adi munsona yetu yachaaka, sweje-e neyi munakumona kukala kunakuyitiyisha woma. Ikalenuña nampinji yakutoñojoka hayuma yelayi dehi Yehova kunyima, yinakwilayi chayinu mpinji niyakelayi kumbindi. Chikufumamu, kufwana Davidi munateli kuhosha nenu: “Mudi Nzambi dimunakuhwelela; hinnakutiya womaku.”—Mas. 56:4.