1. ¿Tiquʼn at maj jaku qo tzaj xobʼ?

 QKYAQILX in qo tzaj xobʼ junjun maj. Ax tok, o tzʼel qnikʼ tiʼj toj Tyol Dios qa mintiʼ tuʼn qtzaj xobʼ kye kyimni, kye demonio nix tiʼjju kbʼajel toj ambʼil tzul. Noqtzun tuʼnju, in qo anqʼin toj jun ambʼil jatumel «tzul sekʼpubʼl» kyuʼn qʼoj, tuʼn bʼiybʼil ex kyuʼn yabʼil (Luc. 21:11). Ax ikx jaku qo tzaj xobʼ kye gobierno, kye toj qja moqa kye xjal in nel kyikʼun axix tok okslabʼil. Ex ateʼ junjun in che tzaj xobʼ tuʼnju in kubʼ kyximen qa mlay che ex kywitz problem in che ok weʼ twitz jaʼlo moqa toj ambʼil tzul.

2. ¿Tiʼ bʼaj tej tpon David toj tnam Gat?

² Qo ximen tiʼj David, jun kyxol qe tmajen Jehová tzaj xobʼ. Tej tajtoq Saúl tuʼn tkubʼ tbʼyoʼn, xi oq David kyxol filisteo toj tnam Gat. Tej tok tbʼiʼn Akís aju rey te Gat qa jun tbʼanel soldad David ex qa otoq kubʼ tbʼyoʼn «laj mil» soldad, «tzaj t-xobʼil» David (1 Sam. 21:​10-12). Nya oʼkxju, ax ikx kubʼ t-ximen qa jaku tzʼok tbʼinchaʼn rey nya bʼaʼn tiʼj. ¿Tiʼtzun bʼant tuʼn tuʼn miʼn ttzaj xobʼ?

3. Ik tzeʼn in tzaj tqʼamaʼn Salmo 56:1 a 3 ex 11, ¿tiʼ bʼant tuʼn David tuʼn miʼn ttzaj xobʼ?

³ Tqʼama David toj Salmo 56 tiʼ kubʼ tnaʼn tej akux attoq toj tnam Gat. Toj Salmo lu, tqʼama tiquʼn tzaj xobʼ ex onin tiʼj tej tok qeʼ tkʼuʼj tiʼj Jehová (kjawil uʼjit Salmo 56:​1-3, 11). Tbʼanel tej tok qeʼ tkʼuʼj David tiʼj Jehová. Tuʼn  tonbʼil Jehová ok tqʼon tibʼ David te lok ex tbʼanel ela. Toj ambʼil lu, ya mintiʼ kubʼ t-ximen Akís tuʼn tkubʼ tbʼyoʼn David, sino oʼkx tajtoq tuʼn tex oq David. Ajbʼen ambʼil lu tuʼn David tuʼn tklet (1 Sam. 21:13-22:1).

4. ¿Tzeʼn jaku chʼiy qʼuqbʼil qkʼuʼj tiʼj Jehová? Qʼamantza jun techel.

⁴ Ax ikx qe, jaku tzʼonin qiʼj tuʼn miʼn qtzaj xobʼ qa ma tzʼok qeʼ qkʼuʼj tiʼj Jehová. ¿Pero tzeʼn jaku tzʼok qeʼ qkʼuʼj tiʼj Jehová aj qtzaj xobʼ? Qqʼonku jun techel. Aj ttzaj qʼamaʼn qe qa at jun yabʼil qiʼj. Tnejel jakulo qo tzaj xobʼ. Pero qa ojtzqiʼnxix jun doctor quʼn, jaku chewix qanmi. ¿Tiquʼn? Tuʼnju olo tzʼok tqʼanin junjuntl xjal tukʼil ax yabʼil ik tzeʼn at qiʼj. Bʼalo in qo ok tbʼiʼn ex in neʼl tnikʼ tiʼjju in xi qqʼamaʼn te. Ex jakulo tzaj tqʼamaʼn qe qa tzul tqʼoʼn jun qʼanbʼil aju o tzʼonin kyiʼj nim xjal. Chʼixmi axju in bʼaj tukʼil Jehová, mas jaku chʼiy qʼuqbʼil qkʼuʼj tiʼj qa ma qo ximen tiʼjju ya o bʼant tuʼn, tiʼjju in bʼant tuʼn ex tiʼjju kbʼantel tuʼn. Atzun jlu bʼant tuʼn David ik tzeʼn in tzaj tqʼamaʼn Salmo 56. Akux in qo xnaqʼtzan kyiʼj junjun versículo toj Salmo lu qo ximen kyiʼj. ¿Tzeʼn jaku chʼiy qʼuqbʼil qkʼuʼj tiʼj Jehová ex tuʼn miʼn qtzaj xobʼ?

¿TIʼ BʼANT TUʼN JEHOVÁ TOJ AMBʼIL OJTXE?

5. ¿Alqiʼj ximen David tej ttzaj xobʼ? (Salmo 56:​12, 13).

⁵ Maske ok weʼ David twitz ambʼil kwest, ximen kyiʼj qe tbʼanel tiʼchaq otoq bʼant tuʼn Jehová (kjawil uʼjit Salmo 56:​12, 13). Nim maj bʼant jlu tuʼn David. Jun techel, at maj ximen tiʼj tbʼinchbʼen Jehová ex tzaj tnaʼn te qa at tipumal Jehová ex qa taj tuʼn tonin kyiʼj xjal (Sal. 65:​6-9). Ax ikx ximen tiʼjju otoq bʼant tuʼn Jehová kyiʼj txqantl (Sal. 31:19; 37:​25, 26). Pero mas ximen David tiʼjju otoq bʼant tuʼn Jehová tiʼj. Onin tiʼj ex otoq tzʼok t-xqʼuqin atxix tej neʼẍ (Sal. 22:​9, 10). Tej t-ximen David tiʼj tkyaqil jlu, onin tiʼj tuʼn tok qeʼ tkʼuʼj tiʼj Jehová tuʼn tkyaqil tanmi.

6. ¿Tiʼ jaku tzʼonin qiʼj tuʼn tok qeʼ qkʼuʼj tiʼj Jehová aj qtzaj xobʼ?

 ⁶ Jaku kubʼ t-xjelina jlu aj ttzaj xobʼa: «¿Tiʼ bʼant tuʼn Jehová ojtxe?». Tbʼanel qa ma ximana kyiʼj tbʼinchbʼen. Jun techel, mintiʼ o kubʼ tbʼinchaʼn Jehová qe pájaro ex qe bʼech ik tzeʼn qeʼ, pero in xqʼuqin kyiʼj. Tuʼn jlu, in nok qeʼ qkʼuʼj tiʼj qa ax ikx kxqʼuqil qiʼj (Mat. 6:​25-32). Ax ikx, jaku ximana tiʼjju bʼant tuʼn Jehová kyiʼj tmajen. Bʼalo jaku ximana kyiʼj tmajen ten qʼuqbʼil kykʼuʼj toj ambʼil ojtxe moqa kyiʼj tmajen toj ambʼil jaʼlo. a Nya oʼkxju, ax ikx jaku ximana tiʼj tzeʼn o xqʼuqin tiʼja. ¿Tzeʼn o tzʼonin tiʼja tej tok tojtzqiʼna axix tok? (Juan 6:44). ¿Tzeʼn o tzaj ttzaqʼweʼn qe tnaʼj Diosa? (1 Juan 5:14). ¿Tiʼ tbʼanel in tzaj tkʼamoʼna tkyaqil qʼij tuʼnju xi tqʼoʼn Jehová tkʼwal te chojbʼil? (Efes. 1:7; Heb. 4:​14-16).

7. ¿Tzeʼn onin tiʼj Vanessa aju bʼaj tiʼj profeta Daniel?

⁷ Ok weʼ jun ermana te Haití, aju Vanessa tbʼi twitz jun ambʼil jatumel tzaj xobʼ. b Attoq jun xjal in nanqʼin jatumel najli ermana. In xitoq tllamarin xjal lu te ermana, in xitoq t-samaʼn mensaje te tkyaqil qʼij ex in xitoq tqʼamaʼn te tuʼn tok te tnovia. Xi tqʼamaʼn ermana te qa miʼn. Tuʼn jlu, tzaj mas tqʼoj xjal ex tajtoq tuʼn tok tbʼinchaʼn nya bʼaʼn tiʼj ermana. ¿Tiʼ onin tiʼj Vanessa tuʼn miʼn ttzaj xobʼ? Xi tbʼinchaʼn junjun tiʼchaq tuʼn tok t-xqʼuqin tibʼ ex onin jun ansyan tiʼj tuʼn tyolin kyukʼil aj kawil. Ax ikx, tzaj tnaʼn tzeʼn xqʼuqin Jehová kyiʼj tmajen toj ambʼil ojtxe. Tqʼama Vanessa jlu: «A profeta Daniel tnejel xjal tzaj nnaʼne. Mintiʼ jun nya bʼaʼn otoq bʼant tuʼn ex kux xoʼn kyxol león, pero kolin Jehová tiʼj. Xi nqʼamaʼne te Jehová qa otoq bʼant tkyaqil wuʼne ex waje tuʼn tonin wiʼje. Tej tbʼant jlu wuʼne, ya mintiʼ in tzaj xobʼe» (Dan. 6:​12-22).

¿TIʼ IN NBʼANT TUʼN JEHOVÁ TOJ AMBʼIL JAʼLO?

8. ¿Tiʼ ok qeʼ tkʼuʼj David tiʼj? (Salmo 56:8).

⁸ Maske jakutoq tzaj nya bʼaʼn tiʼj David toj tnam Gat, mintiʼ xi tqʼoʼn ambʼil tuʼn ttzaj xobʼ. Sino atz ok tqʼoʼn twiʼ tiʼj tzeʼn onin Jehová tiʼj toj ambʼil aju. El tnikʼ tiʼj qa in tzajtoq tyekʼin Jehová tbʼe, qa in xqʼuqin tiʼj ex qa in nel tnikʼ tiʼjju kubʼ tnaʼn (kjawil uʼjit Salmo 56:8). Ax ikx onin Jonatán ex pal Ahimélec tiʼj David ex xi kyqʼuqbʼaʼn tkʼuʼj (1 Sam. 20:​41, 42; 21:​6, 8, 9). Axpe ikx, tajtoq rey Saúl tuʼn tkubʼ tbʼyoʼn David, pero klet. Qʼuqlitoq tkʼuʼj David tiʼj qa ojtzqiʼnxix tuʼn Jehová tiʼ bʼaj tiʼj ex tiʼ kubʼ tnaʼn.

9. ¿Tiʼ in nok tqʼoʼn Jehová twitz tiʼj teyle junjun qe?

⁹ Qa in nok weʼya twitz jun ambʼil kwest ex in tzaj xobʼa, naʼntza qa nya oʼkx in nok tqʼoʼn Jehová twitz tiʼjju in bʼaj tiʼja, sino ax ikx in nel tnikʼ tiʼjju in kubʼ tnaʼna. Jun techel, tej ateʼtoq Israel te majen toj tnam Egipto, el tnikʼ Jehová tiʼjju yajbʼil kye ex qa «in che kʼixbʼisanjtz» (Éx. 3:7). Toj jun bʼitz tqʼama David qa otoq tzʼok tqʼoʼn Jehová twitz tiʼj tbʼis ex tiʼj «kʼixkʼoj» tzaj tiʼj (Sal. 31:7). Ax ikx, tej ttzaj nya bʼaʼn kyiʼj tmajen Jehová tuʼnju mintiʼ jaw kyjoʼn aju mas tbʼanel, «ax ikx te o yajlanjtz» toj ambʼil lu (Is. 63:9). In chewix qanmi tuʼnju in neʼl tnikʼ Jehová qiʼj ex taj tuʼn tonin qiʼj tuʼn miʼn qtzaj xobʼ.

10. ¿Tiquʼn in nok qeʼ tkʼuʼja tiʼj qa in ximen Jehová tiʼja ex qa kukx kʼonil tiʼja?

 ¹⁰ Qa in qo ok weʼ twitz jun ambʼil kwest ex in qo tzaj xobʼ tuʼn, bʼalo mlay tzʼok qqʼoʼn qwitz tiʼj tzeʼn in nonin Jehová qiʼj. ¿Tiʼtzun jaku bʼant quʼn? Jaku txi qqanin te Jehová tuʼn tel qnikʼ tiʼjju in bʼant tuʼn qiʼj (2 Rey. 6:​15-17). Yajxitl, jaku kubʼ qxjelin jlu: «¿Ope tzʼonin jun chikʼbʼabʼil moqa jun comentario wiʼje toj chmabʼil? ¿Ope tzaj qʼuqbʼan nkʼuʼje tuʼn jun xnaqʼtzbʼil, tuʼn jun video moqa tuʼn jun bʼitz? ¿Ope tzaj qʼuqbʼan nkʼuʼje tuʼn jun erman tukʼil jun texto moqa kyukʼil tyol?». At maj jurat jaku tzikʼ tnaʼl quʼn qa jun oyaj tuʼn Jehová qe xnaqʼtzbʼil in tzaj qkʼamoʼn ex aju kykʼujlabʼil erman in kubʼ kyyekʼin qiʼj (Is. 65:13; Mar. 10:​29, 30). Kyuʼn qe oyaj lu, in nel qnikʼ tiʼj qa in ximen Jehová qiʼj ex qa oʼkx tiʼj jaku tzʼok qeʼ qkʼuʼj (Is. 49:​14-16).

11. ¿Tiʼ onin tiʼj Aida tuʼn miʼn ttzaj xobʼ?

¹¹ Ok weʼ jun ermana te Senegal twitz jun nya bʼaʼn, aju Aida tbʼi. Ok tqʼoʼn twitz tiʼj tzeʼn onin Jehová tiʼj. Tuʼnju a Aida tnejel kʼwalbʼaj, kubʼ t-ximen tman tuʼn tkambʼet nim pwaq tuʼn tuʼntzun tten aju at tajbʼen te ex kye. Noqtzun tuʼnj, kubʼ t-ximen Aida tuʼn tok te precursora ex mintiʼ ten nim tpwaq. Tuʼn jlu, tzaj kyqʼoj toj tja ex e yolin nya bʼaʼn tiʼj. Tqʼama Aida tiʼ kubʼ tnaʼn: «In tzaj xobʼe tej tkubʼ nximane qa mlaytoq bʼant tuʼn wonine kyiʼj nmane ex qa jaku chin el ikʼune kyuʼn txqantl. Axpe ikx kubʼ nximane qa tuʼn Jehová otoq tzaj nya bʼaʼn wiʼje». Pero toj jun qʼij, ok tbʼiʼn jun chikʼbʼabʼil ex onin tiʼj. Tqʼamatl jlu: «Tqʼama ermano qa ojtzqiʼn tuʼn Jehová tiquʼn in tzaj qbʼis. Ax ikx kyqʼama ansyan ex junjuntl erman junjun tiʼ weye tuʼn ttzaj naʼne qa kʼujlaʼn qine tuʼn Jehová ex chebʼe chebʼe onin wiʼje tuʼn tkubʼ nnaʼne bʼaʼn. Tej nnaʼne Dios, ok qeʼ nkʼuʼje tiʼj qa mas kʼonil Jehová wiʼje». Tej tikʼ ambʼil, kanet jun taqʼun Aida, nya okx onin tiʼj tuʼn tok te precursora ax ikx onin tiʼj tman ex kyiʼj junjun xjal. Tqʼamatl jlu: «In nok qeʼ nkʼuʼje tiʼj Jehová tukʼil tkyaqil wanmiye ex mintiʼ in chin tzaj xobʼe aj nnaʼne Dios te».

 ¿TIʼ KBʼANTEL TUʼN JEHOVÁ TOJ AMBʼIL TZUL?

12. Ik tzeʼn in tzaj tqʼamaʼn Salmo 56:​9, ¿tiʼ qʼuqlitoq tkʼuʼj David tiʼj?

¹² (Kjawil uʼjit Salmo 56:9). In tzaj qʼamaʼn toj versículo lu juntl tiʼ bʼant tuʼn David tuʼn miʼn ttzaj xobʼ maske jakutoq kubʼ bʼyoʼn. Ximen tiʼjju kbʼanteltoq tuʼn Jehová tiʼj yajxitl. Ojtzqintoq tuʼn qa jaku klet tuʼn Jehová toj ambʼil mas tbʼanel. Axpe ikx, otoq tqʼama Jehová qa a David tuʼn tok te rey toj tnam Israel (1 Sam. 16:​1, 13). Ex ojtzqintoq tuʼn David qa kjapunel aju otoq tzaj ttziyen Jehová te.

13. ¿Tiʼ kbʼantel tuʼn Jehová toj ambʼil tzul?

¹³ ¿Tiʼ o tzaj ttziyen Dios qe? Mintiʼ kyaj ttziyen Jehová qa mlayx tzaj nya bʼaʼn qiʼj toj ambʼil jaʼlo. c Noq tiʼxku qo okel weʼ twitz, o tzaj ttziyen Jehová qa kʼelel tiʼn tkyaqil nya bʼaʼn toj akʼaj twitz Txʼotxʼ (Is. 25:​7-9). Ex qʼuql qkʼuʼj tiʼj qa at nim tipumal tuʼn kyjaw anqʼin kyimni tuʼn, tuʼn qkubʼ tqʼanin ex tuʼn tkubʼ tnajsaʼn qe aj qʼoj qiʼj (1 Juan 4:4).

14. ¿Alqiʼj bʼaʼn tuʼn qximen?

¹⁴ Aj ttzaj xobʼa, ximana tiʼjju kbʼantel tuʼn Jehová toj ambʼil tzul. Ximana tiʼj tzeʼn kʼokel qanqʼibʼil aj tpon ambʼil jatumel ya otoq kubʼ najsaʼn Satanás ex kykyaqil xjal nya bʼaʼn, aj kyten tbʼanel xjal ex aj qok te tzʼaqli chebʼe chebʼe. Toj asamblea te oxe qʼij te 2014, etz qʼoʼn jun yekʼbʼil ex jaku tzʼonin qiʼj tuʼn qximen tiʼj qʼuqbʼil qkʼuʼj in qo ayon tiʼj. Toj yekʼbʼil lu, yolin jun ermano tukʼil tfamilia tiʼjju jaku tzaj qʼamaʼn toj 2 Timoteo 3:1 a 5 noqwit atz in yolin tiʼj qanqʼibʼil toj ambʼil tzul: «Toj akʼaj twitz Txʼotxʼ, tzul tqʼijlalil te tzalajbʼil. Kʼokel kykʼujlan kyibʼ xjal, kʼokel kykʼujlaʼn axix tok, nya yasul qe, kbʼel kyin kyibʼ, kjawil kynimsaʼn Dios, che nimel kʼwal te kyman, kxel kyqʼoʼn chjonte, che tel tzʼaqli, kʼokel kykʼujlaʼn qe toj kyja, kjel bʼant tiʼj jun kyyol, che yolil bʼaʼn kyiʼj txqantl, kbʼantel kyjakʼunte kyibʼ, che okel te mans, kʼokel kykʼujlaʼn aju bʼaʼn, kʼokel qeʼ kykʼuʼj txqantl kyiʼj, bʼaʼn che ximen, mlay jaw kyniman kyibʼ, kʼokel kykʼujlaʼn Dios ex nya qe achbʼil, ax tok che ajbʼel te Dios. Miʼn tzʼel tpan tibʼa kyiʼj». ¿Naqʼli qoʼ tuʼn qyolin kyukʼil toj qja moqa kyukʼil erman tiʼj tzeʼn kʼokel qanqʼibʼil toj akʼaj twitz Txʼotxʼ?

15. ¿Tiʼ onin tiʼj Tanja tuʼn miʼn ttzaj xobʼ?

¹⁵ Mintiʼ tzaj xobʼ jun ermana Tanja tbʼi, in nanqʼin atz Macedonia del Norte tuʼnju ximen kyiʼj tpromesa Jehová. Tzaj tqʼamaʼn qa tzaj kyqʼoj tman tej t-xi tzyet tuʼn t-xnaqʼtzan tiʼj Biblia: «Ok bʼinchaʼn wiʼje aju in chin xobʼtoqe tiʼj. In nok bʼyoʼne tuʼn ntxuʼye tkyaqil maj tej nmeltzʼaje toj chmabʼil. Ex tzaj tqʼamaʼn junx tukʼil nmane qa chin kbʼel bʼyoʼne kyuʼn qa ma chin oke te testigo de Jehová». Tej tbʼet ambʼil, etz lajoʼn Tanja toj tja. ¿Tiʼtzun bʼant tuʼn? Tqʼamatl jlu: «In nok tene ximel tiʼj qa kukx chin ktzalajele te jumajx qa ma chin tene tzʼaqli twitz Jehová. Ax ikx kubʼ nximane qa jaku txi nnajsaʼne junjun tiʼ toj ambʼil jaʼlo, pero toj akʼaj twitz Txʼotxʼ tzul tqʼoʼn Jehová nim kʼiwlabʼil weye ex kʼonil wiʼje tuʼn tikʼ tnaʼl wuʼne tkyaqil nya bʼaʼn otoq tzʼok bʼinchaʼn wiʼje». Tuʼnju ten Tanja tzʼaqli twitz Jehová, onin tiʼj tuʼn tkanet jun lugar jatumel tuʼn tanqʼin. O kubʼ mojeʼ Tanja ex junx  tukʼil tchmil in che tzalaj aj kyajbʼen toj tkyaqil ambʼil.

QCHʼIYSAM QʼUQBʼIL QKʼUʼJ TIʼJ JEHOVÁ JAʼLO

16. ¿Tiʼ kʼonil qiʼj tuʼn miʼn qtzaj xobʼ aj tjapun kywi yol tkuʼx toj Lucas 21:26 a 28?

¹⁶ Aj ttzaj nimxix yajbʼil, chʼixmi kykyaqil «xjal ktzajel yumin tuj kywitz tuʼn xobʼajil», atzun qe tmajen Jehová kukx che tel tzʼaqli twitz ex mlay che tzaj xobʼ (kjawil uʼjit Lucas 21:​26-28). ¿Tiquʼn mlay qo tzaj xobʼ? Tuʼnju otoq qo naqʼet tuʼn tok qeʼ qkʼuʼj tiʼj Jehová. In tzaj tqʼamaʼn Tanja qa aju bʼaj tiʼj toj ambʼil ojtxe, in nonin tiʼj tuʼn tex kywitz junjuntl nya bʼaʼn jaʼlo. Tqʼama: «O tzʼel nnikʼe tiʼj qa jaku tzʼonin Jehová qiʼj toj tkyaqil ambʼil ex qo ktzajel tkʼiwlaʼn. At maj jaku kubʼ qximen qa mlayx qo ex kywitz problem in che tzaj kyuʼn xjal, pero nya ikju, tuʼnju at mas tipumal Jehová. Maske kwest jun prueba, kpol ambʼil tuʼn qex twitz».

17. ¿Tzeʼn kʼonil texto te abʼqʼi 2024 tiʼja? (Qʼonka twitza tiʼj foto tok tiʼj revista).

¹⁷ At nim nya bʼaʼn toj ambʼil jaʼlo. Pero ik tzeʼn te David, miʼn t-xi qqʼoʼn ambʼil tuʼn qtzaj xobʼ. Toj texto te 2024, tqʼama David qe yol lu te Jehová: «Qa ma tzaj nxobʼile, nnoʼk qeʼ nkʼuʼje tiʼja» (Sal. 56:3). Toj jun uʼj in yolin tiʼj Biblia in tzaj qʼamaʼn jlu tiʼj texto lu: «Mintiʼ ok tqʼoʼn David twiʼ kyiʼj tiʼchaq tzaj xobʼ tuʼn nix kyiʼj problem, sino oʼkx ok qeʼ tkʼuʼj tiʼjju jaku tzʼonin tiʼj». Kukx ximana tiʼj texto te abʼqʼi lu kyoj qeju xjaw che ul ex mas aj tok weʼya kywitz nya bʼaʼn. Paʼmila ambʼil tuʼn t-ximana tiʼjju o bʼant tuʼn Jehová, tiʼjju in bʼant tuʼn ex tiʼjju kbʼantel tuʼn. Iktzun tten, jaku txi tqʼamaʼna qe yol lu ik tzeʼn te David: «Qʼuql nkʼuʼje tiʼj Dios ex mintiʼ in chin xobʼe» (Sal. 56:4).