1. Dahaka dainai nega haida na baita garimu?

 ITA iboudai na nega haida ta garimu. Momokani, Baibul ta stadilaia neganai ta diba, mase taudia, demoni bona vairai negai bae vara ḡaudia daidiai basita gari. To iseda nega ai, “hahegari ḡaudia” heḡereḡere, tuari, taravatu utu karadia, bona gorere na e varamu. (Luka 21:11) Dia una mo, tomadiho momokani dainai taunimanima, gavamani bona ruma bese taudia ese e hahisidamu neganai ita na ta garimu. A haida na e warimu badina e laloamu idia na dia heḡereḡere hari eiava vairai bae vara hekwakwanaidia bae haheaukalai.

2. Gata ai David ena noho be ede bamona?

² David danu e gari. Heḡereḡere, King Saulo ese e tahua loava baine alaia neganai, ia na e heau, Filistia hanuana Gata ela. Bena Gata edia king, Akisi na gabeai e kamonai David na tuari tauna goadana ta, guna ane ai momo ese e hanamoa eto, ia ese Filistia taudia “gerebu gerebu e aladia.” David na una e diba neganai “Akisi, Gata pavapavana, garina e gari.” (1 Sam. 21:​10-12) Akisi ese ia enai baine karaia ḡauna dainai e lalohekwarahi. To dahaka ese David e durua?

3. Salamo 56:​1-3, 11 ai, David e gari neganai dahaka e kara?

³ Salamo 56 ai, David ese ena hemami e herevalaia. Una na ia Gata ai e nohova negana. Una karoa ai, David ese e hahedinaraia ḡoevaḡoeva ia be dahaka dainai e gari, bona dahaka ese e durua basine gari. David e gariva negadiai, ia na Iehova e abidadama heniava. (Salamo 56:​1-3, 11 ba duahidia.) Ia na badi namodia momo daidiai unu e kara tomava. Iehova ena  heduru dainai David na plen namona ta e laloa. Ia na sibona kava tauna ai e hahelao, bona una plen na e ḡaukara. Una dainai Akisi na se ura David baine alaia, to e lulua. Unu amo David na e heau mauri.—1 Sam. 21:13–22:1.

4. Eda abidadama Iehova enai be ede baita hagoadaia toma? Haheitalai ta ba gwauraia.

⁴ Ita danu, basita garimu bona kara maorona na baita karaia dibamu, bema Iehova baita abidadama heniamu. To, ta garimu negadiai, eda abidadama Iehova enai be ede baita hagoadaia toma? Mani ina haheitalai a laloa. Bema oi na dokta ese be hamaoromumu oi na mai emu gorere, reana matamanai bo garimu. To emu dokta bo trastiamu neganai basio garimu. Guna ia ese oiemu gorere heḡereḡerena taudia na e durudia. Ia na oiemu hereva be hakala heni namonamomu, bona be hahedinaraiamu oi na e lalomu badamu. Bena emu gorere ihanamona muramurana ta be gwauraiamu badina una muramura ese haida na e durudia. Una heḡereḡerena, Iehova enai eda abidadama baita hagoadaia totona, namona na Iehova ese guna ita daidai e kara ḡaudia, hari e karamu ḡaudia, bona vairai be karamu ḡaudia baita lalodia. David na unu e kara toma. Salamo 56 ai e tore herevadia haida baita herevalaimu neganai, basita gari to eda abidadama Iehova enai baita hagoadaia daladia baita lalo.

GUNA IEHOVA BE DAHAKA E KARA?

5. Ena be David na e gari to dahaka e lalodia dobu? (Salamo 56:​12, 13)

⁵ David na Iehova ese guna e kara ḡaudia e lalodia dobu, ena be dibana ia na ihamasena taudia ese e tahuava. (Salamo 56:​12, 13 ba duahidia.) Bona David na ena mauri ibounai lalonai unu e kara toma. Heḡereḡere, nega haida ia na Iehova ese e havara ḡaudia e lalodia dobuva, unu ese ia na e hahelaloataova Iehova na siahu idoinai Diravana bona taunimanima na e lalokau henidiamu. (Sal. 65:​6-9) Danu, David na Iehova ese haida daidiai e kara ḡaudia e lalodia dobu. (Sal. 31:19; 37:​25, 26) Dia una mo, to Iehova ese ia dainai e kara ḡaudia danu e lalodia dobu. Ia na maraḡina vaitani Iehova ese e durua bona e  gimaia. (Sal. 22:​9, 10) Unu ḡau idauidau ilalodia dobu karana ese ena abidadama Iehova enai na e hagoadaia.

6. Ta lalohekwarahimu negadiai, dahaka ese baine duruda Iehova baita abidadama henia?

⁶ O garimu eiava o lalohekwarahimu negadiai, sibomu ba henanadai, ‘Guna Iehova be dahaka e kara?’ Ia ese e havara ḡaudia ba haerodia. Heḡereḡere, manu bona flaoaflaoa, ena be Iehova asie tohotohoamu eiava asie toma henia dihomu, to Iehova ese e naridiamu, una dainai ta abidadamamu Iehova ese ita danu be naridamu. (Mat. 6:​25-32) Danu, Iehova ese ia e tomadiho henia taudia daidiai e kara ḡaudia ba lalo. Heḡereḡere, abidadama tauna o hahinena ta sivaraina Baibul ai ba stadilaia, eiava hari ina negai Iehova e hesiai heniamu tauna ta ena ekspiriens ba duahia. a Iehova ese oi daimuai e kara ḡaudia danu ba lalodia dobu. Oi be ede e durumu toma unu amo ia o dibaia? (Ioa. 6:44) Oiemu ḡuriḡuri be ede e haerelai toma? (1 Ioa. 5:14) Ia Natuna lalokauna ena boubou ḡauna dainai dina ta ta ai oi be ede e durumu tomamu?—Efe. 1:7; Heb. 4:​14-16.

7. Edena dala ai peroveta tauna Daniel sivaraina ese Vanesa e durua basine gari?

⁷ Haiti ai e nohomu taihuna ta, Vanesa, b na enai e vara ḡauna ta dainai e gari. Ena gabu ai e nohomu tauna ta ese dina iboudiai e rini heniava bona mesij e siai heniava. E doriava raruosi bae mahuta hebou. Vanesa ese ena ura na se abia dae. Una tau na e badu dikadika dainai, Vanesa ihagarina herevadia e gwaurai. Vanesa na e gwa: “Lau na na gari dikadika.” To dahaka e kara? Ia sibona baine hegima totona ḡau haida e kara. Elda ta ese e durua pulisi baine itadia. Danu, ia na guna Iehova ese ena hesiai taudia e gimadia dalana e laloa. Vanesa na e gwa: “Lau ese na laloa tauna ginigunana na, peroveta tauna Daniel. Ia na laion edia guri ai e tahoa dobi, ena be asi ena kerere. To, Iehova ese ia na e naria. Iehova na noia baine durugu, bona e vara ḡauna na ia imana ai na rakatania. Una murinai lau na da asina gariva.”—Dan. 6:​12-22.

HARI IEHOVA BE DAHAKA E KARAMU?

8. David e diba momokani ḡauna be dahaka? (Salamo 56:8)

⁸ Gata ai, David na bema hamasea diba. To, ia na e hagariava ḡaudia na se lalodia momova. Ia na una nega ai, Iehova ese ia dainai e kara ḡaudia e lalo. David na e mamia, Iehova ese ia na e hakauava bona e gimaiava. Bona Iehova ese iena hemami na e lalopararalaia. (Salamo 56:8 duahia.) Danu, David na turana namodia heḡereḡere Ionatan bona Hahelaḡa Tauna Ahimelek ese e hagoadaia bona e durua. (1 Sam. 20:​41, 42; 21:​6, 8, 9) Bona ena be David na King Saulo ese e urava baine hamasea, to ia na e heau mauri. David na e diba momokani ia e davariva hekwakwanaidia bona ena hemami na Iehova ese e lalopararalai.

9. Iehova be dahaka e itamu bona e lalopararalaimu?

⁹ Hekwakwanai ta dainai o garimu neganai, Iehova ese una na e itaiamu bona una hekwakwanai dainai o abiamu hemamina na e lalopararalaiamu. Heḡereḡere, Iehova na Aigupto taudia ese Israel taudia e kara auka henidia karana e itaia bona idia ese e abia hisihisina danu e lalopararalaia. (Eso. 3:7) David na ena ane ai e gwa, Iehova ese iena “hishisi” na e ita bona ena “lalometau” na e lalopararalai. (Sal. 31:​7, NWT) Bona Dirava ena taunimanima na edia kerere daidiai e abi hisihisidia na  “ia ese e hisihisilai.” (Isa. 63:9) Una dainai, bema oi na o garimu, Iehova ese emu hemami na e lalopararalaiamu bona ia na e ura dikadikamu oi baine durumu basio gari.

10. Dahaka dainai o diba momokanimu Iehova ese oi na e lalomu badamu bona be durumumu?

¹⁰ Bema oi na hekwakwanai badana ta lalonai bona o garimu, reana Iehova ese oi e durumumu dalana na so itaiamu. Una dainai ia ba noia una ba lalopararalaia totona. (2 Han. 6:​15-17) Bena ba lalo: Kongrigeisin heboudia ai ta ena tok eiava haere ese e hagoadagu, a? Eiava pablikeisin, vidio, bona orijinol anena ta amo lalogada na davari, a? Ta ese hahegoada herevana eiava siri ta amo e durugu, a? Nega haida tadikaka edia lalokau karana eiava ta abimu lauma anianidia na basita lalodia badamu. To, unu na Iehova ena amo e maimu harihari ḡaudia namo hereadia. (Isa. 65:13; Mar. 10:​29, 30) Unu daidiai, ta abia daemu Iehova ese ita na e laloda badamu. (Isa. 49:​14-16) Bona ia na baita abidadama henia diba.

11. Ena be Aida na e gari, to ia be dahaka ese e durua?

¹¹ Senegal ai e nohomu taihu ta, Aida, na ena hekwakwanai lalonai Iehova ese e durua dalana e itaia. Ia na roboa dainai tamana bona sinana na e ura ia na baine ḡaukara, unu amo ia sibona bona idia baine naridia. To Aida na baine painia totona ḡau haida e haidau neganai, iena moni na dia bada dainai ena famili ese e badu henia bona e gwau henia. Aida na e gwa: “Lau na tamagu bona sinagu basina durudia diba bona taunimanima iboudiai ese bae dadaraigu garina na gari. Bona Iehova danu na badu henia badina egu hekwakwanai na se koudia to e momo herea.” Gabeai, hebou ta ai, Aida na tok ta e kamonaia. Una tok ai, tadikaka na e gwa, “Iehova na ita ta abimu hisihisidia na mai dibana. Elda bona haida edia heduru amo taina ruana na laloparara, Iehova ese lau na e lalokau henigumu. Lau ese Iehova na ḡuriḡuri henia baine durugu basina gari. Bena egu ḡuriḡuri haeredia na ita neganai, lalogu na e maino.” Gabeai, Aida na moni ḡaukarana ta e davaria, bona una ese ena painia ḡaukara, tamana sinana, bona ma haida na e durudia. Ia na e gwa, “Na abia daemu mai lalogu idoinai ida Iehova baina abidadama henia. Bona hari na ḡuriḡurimu muridiai, asina garimu.”

 NEGA VAIRAI IEHOVA BE DAHAKA BE KARAMU?

12. Salamo 56:9 ena hereva heḡereḡerena, David be dahaka mai dibana?

¹² Salamo 56:9 ba duahia. David e gari neganai ia na una siri ena hereva heḡereḡerena e kara. Ena be ia na bae hamasea diba, to Iehova ese gabeai ia dainai baine kara ḡaudia e lalodia dobu dainai se gari. David na mai dibana, Iehova ese ia na nega maorona ai baine hamauria. Iehova na e gwa King Saulo murinai Israel baine lohiaia tauna na David. (1 Sam. 16:​1, 13) Una dainai David enai, una gwauhamata na vaitani vada e ḡuḡuru na heto.

13. Ta diba momokanimu Iehova be dahaka be karamu?

¹³ Iehova na e gwauhamata oi daimuai dahaka baine kara? Dibada, ia ese hekwakwanai iboudiai na basine laodia ahumu. c To baita helalotao, ta davarimu hekwakwanaidia na tanobada matamatana ai Iehova ese be haorediamu. (Isa. 25:​7-9) Ḡau iboudiai e Havara Tauna ena goada na heḡereḡere, mase taudia baine hatoredia isi, eda gorere bona hisihisi baine hanamodia, bona e daḡedaḡe henidamu taudia iboudiai baine haoredia.—1 Ioa. 4:4.

14. Baita laloa dobu ḡauna be dahaka?

¹⁴ O garimu neganai, Iehova ese vairai baine kara ḡaudia ba lalodia dobu. Una nega ai Satana na lasi, kara maoromaoro taudia mo nonoho, bona taunimanima na dina ta ta ai be ḡoevadae be laomu dainai, bo abiamu hemamina mani a laloa. Laḡani 2014 rijinol hebouna ai, haheitalai ta amo e hahedinaraia edana dala ai vaira nega helarona baita laloa dobu. Una haheitalai ai, tama ta na ena famili ida paradaiso ai bae vara ḡaudia e herevalai neganai, ia ese 2 Timoteo 3:​1-5 na ini e duahia toma: “Tanobada matamatana ai nega namodia do bae vara. Badina taunimanima na bae helalokau-heheni, hereva momokani bae ura henia, bae lalomanada, bae manau, Dirava bae imodaia, tamadia sinadia bae kamonai henidia, tenkiu karana bae hahedinaraia, Iehova bae badinaia, ruma bese taudia bae lalokau henidia, bae lalo tamona, nega iboudiai taunimanima edia kara namodia bae herevalai, sibodia bae hebiagu, basie badu, kara namo bae ura henia, bae heabidadama heheni, ma haida edia namo bae lalo guna, basie hekokoroku, Dirava bae lalokau henia to lebulebu karadia basie ura heni, Dirava bae badinaia momokani. Taunimanima unu bamodia ba bamodia.” Emu famili eiava tadikaka taihu ida o herevaherevamu neganai, tanobada matamata maurina o herevalaiamu, a?

15. Ena be Tanja na e gari, to dahaka ese e durua baine haheauka?

¹⁵ North Macedonia ai, taihu ta ladana Tanja, na nega vairai bae vara hahenamodia e lalodia dobu dainai se gari. Ia Baibul e stadilaia neganai, tamana bona sinana ese e daḡedaḡe henia. Tanja na e gwa: “Lau ese na lalo bae vara ḡaudia haida na e vara momokani. Hebou muridiai na louva ruma neganai sinagu ese e dadabaguva. Tamagu bona sinagu ese e hagariguva e gwauva, bema lau na Iehova ena Witnes ta ai bainala idia ese lau na bae alagu.” Gabeai, Tanja na ruma amo e lulua. Ia be dahaka e kara? Ia na e gwa: “Lau na Dirava ibadinana dainai hanaihanai baina abia moalena na laloa. Danu na lalo, ina nega ai baina haboio ḡaudia haida na Iehova ese tanobada matamatana ai baine henigu lou. Bona e varamu ḡau dikadia danu basina lalodia loumu.” Oibe, Tanja ese Iehova na e badinaia, bona iena heduru dainai ia na noho gabuna ta e davaria. Hari, Tanja na adavana ida fultaim hesiai ḡaukarana e moalelaiamu.

 HARI EMU ABIDADAMA IEHOVA ENAI BA HAGOADAIA

16. Luka 21:​26-28 be ḡuḡurumu neganai basita garimu badina be dahaka?

¹⁶ Hisihisi badana lalonai taunimanima na “kudoudia bae hetaha.” To, Dirava ena taunimanima na be gini goadamu bona basie garimu. (Luka 21:​26-28 ba duahidia.) Dahaka dainai ita na basita garimu? Badina Iehova iabidadama henina karana na vada ta manadalaia. Tanja, ataiai tame herevalaia taihuna na e hahedinaraia, ia enai e vara ḡaudia ese ia na e duruamu hari e davarimu hekwakwanai aukadia baine haheaukalai. Ia na e gwau: “Na diba momokani, Iehova ena heduru amo hekwakwanai na baita haheaukalai diba bona baine hanamoda. Nega haida itaitana na e varamu ḡaudia na haida ese e biagumu, to Iehova ena goada ese idia edia goada e hereaiamu. Bona ena be hekwakwanai na bada to be oremu.”

17. Ina laḡani ena siri badana ese ita be ede be duruda tomamu? (Rau 1 laulauna ba itaia.)

¹⁷ Hari, ita na ḡau momo daidiai baita gari dibamu. To David heḡereḡerena, gari karana ese iseda mauri na basine biagua. Laḡani 2024 ena siri badana na David ena ḡuriḡuri herevana, Iehova e hamaoroa eto: “Lau na garimu negadia ai na oi mo na abidadama henimumu.” (Sal. 56:3) Baibul e herevalaia bukana ta ese una siri na ini e herevalaia toma: “David na ia e hagariava ḡaudia bona ena hekwakwanai na se lalodia momo. To ia na Ihamaurina Tauna enai e heabidadama.” Ina laḡani ai bema oi na hekwakwanai badadia daidiai bo garimu, ina laḡani ena siri badana ba laloa. Namona na nega bavato, Iehova ese guna e kara ḡaudia, hari e karamu ḡaudia, bona vairai be karamu ḡaudia ba lalodia. Bena David heḡereḡerena, oi na bo gwau dibamu: “Dirava mo na abidadama heniamu, asi egu gari”—Sal. 56:4.