1. Ki kitsoz kapav fer nou gagn per?

 TOU dimounn gagn per! Me gras-a nou letid Labib, nou nepli per bann mor, bann demon, ek seki kapav arive dan lavenir. Selman, nou pe viv enn lepok kot ena boukou “kitsoz ki fer bien per,” kouma par exanp bann lager, bann krim, ek bann maladi. (Lik 21:11) Kitfwa nou per osi bann gouvernman ki opoz ar nou, ouswa bann manb nou fami ki pa kontan laverite. Ena sertin ki per tansion zot pa reisi andir enn difikilte ki zot pe gagne aster-la, ouswa enn difikilte ki zot pou gagne dan lavenir.

2. Ki ti ariv David kan li ti pe res dan lavil Gat?

² Ena fwa David osi ti per. Par exanp, kan Lerwa Sail ti pe rod touy li, David ti sove ek li ti al res dan enn lavil Filistin ki ti apel Gat. Lerwa Gat, Akis, ti aprann ki David ti sa gerye ki ti touy plizir milye Filistin-la. Akoz sa, David “ti gagn bien per.” (1 Sam. 21:​10-12) Li ti trakase parski Akis ti kapav fer seki li anvi ar li. Kouma David ti sirmont so laper?

3. Dapre Psom 56:​1-3, 11, kouma David ti reisi sirmont so laper?

³ Psom 56 montre seki David ti resanti kan li ti dan lavil Gat. Dan sa psom-la, David explike kifer li ti per, me li osi explike kouma li ti reisi sirmont so laper. Kan li ti per, David ti met so konfians dan Zeova. (Lir Psom 56:​1-3, 11.) Ek David ti ena rezon pou fer sa. Avek led Zeova, David ti fer enn kitsoz bien drol. Li ti pas pou enn fou, ek sa ti marse parski Akis ti nepli anvi touy David. Okontrer, li ti anvi ki David al lwin ar li, ek gras-a sa, David ti reisi gagn lavi sov.—1 Sam. 21:13–22:1.

4. Kouma nou kapav ogmant nou konfians dan Zeova? Donn enn lexanp.

 ⁴ Kan nou gagn per, nou osi nou kapav res kalm ek azir avek sazes kan nou fer Zeova konfians. Me kouma nou kapav ogmant nou konfians an Zeova sirtou kan nou gagn per? Anou pran enn lexanp. Si to’nn aprann ki to’nn gagn enn maladi, o-koumansman to kapav per. Selman, si to ena konfians dan to dokter, sa kapav diminie to laper. To dokter kitfwa inn tret plizir pasian ki ti ena sa maladi-la, li ekout twa kan to explik li kifer to per, ek to trouve ki li vremem gagn to traka. Anplis, kitfwa li’nn donn twa enn tretman ki’nn marse lor lezot. Dan mem fason, nou ogmant nou konfians an Zeova kan nou reflesi lor seki Li’nn deza fer, lor seki Li pe fer aster-la, ek lor seki Li pou fer pou nou dan lavenir. Se seki David ti fer. Anou get sertin verse dan Psom 56, ek kan nou pe fer sa, reflesi kouma twa osi to kapav ogmant to konfians dan Zeova ek sirmont to bann laper.

SEKI ZEOVA INN FER DAN LEPASE

5. Lor ki kitsoz David ti reflesi pou li sirmont so bann laper? (Psom 56:​12, 13)

⁵ Kan David so lavi ti an danze, li ti reflesi lor seki Zeova ti deza fer pou li. (Lir Psom 56:​12, 13.) David ti touletan fer sa. Par exanp, souvan li ti reflesi lor bann kitsoz ki Zeova ti kree, ek sa ti rapel li ki Zeova Li bien pwisan ek ki Li vremem kontan bann dimounn. (Ps. 65:​6-9) Li ti osi reflesi lor seki Zeova ti fer pou lezot. (Ps. 31:19; 37:​25, 26) Me li ti sirtou reflesi lor seki Zeova ti fer pou li personelman. Li ti mazine kouma Zeova ti ed li ek protez li depi ki li ti-baba. (Ps. 22:​9, 10) Kan David ti reflesi lor tousala, sirman sa ti ogmant so konfians an Zeova!

6. Kan nou gagn per, ki kitsoz pou ed nou pou ena konfians an Zeova?

⁶ Kan to gagn per, demann tomem: ‘Ki Zeova inn fer pou mwa?’ Apre sa, reflesi lor bann kitsoz ki Li’nn kree. Par exanp, “get bien” kouma Zeova pran swin bann zwazo ek bann fler, mem si Li pa’nn kree  zot dan so resanblans ek ki zot pa ador Li. Si Zeova pran zot swin, eski Li pa pou plis pran twa swin? Kan to reflesi lor la, sa pou fer twa ena plis konfians an Li. (Mat. 6:​25-32) Reflesi osi lor seki Zeova inn fer pou so bann serviter. To kapav etidie lexanp enn personaz Biblik ki ti ena enn gran lafwa dan Zeova, ouswa to kapav lir biografi enn serviter Zeova dan nou lepok. a Anplis, reflesi osi lor tou seki Zeova inn fer pou twa. Li’nn atir twa dan laverite. (Zan 6:44) Li’nn reponn to bann lapriyer. (1 Zan 5:14) Ek toulezour to pe gagn bann bienfe gras-a sakrifis so Garson.—Efe. 1:7; Ebre 4:​14-16.

7. Kouma lexanp profet Daniel inn ed Vanessa pou sirmont so laper?

⁷ Vanessa, b enn ser ki res Ayiti, ti viv enn sitiasion ki ti fer li bien per. Enn zom ti pe sonn li ek ti pe avoy li bann mesaz toulezour. Li ti pe met presion lor Vanessa pou ki li sorti avek li. Me Vanessa ti refize. Selman, zom-la ti vinn agresif, ek li ti mem menas Vanessa. Vanessa dir: “Mo ti bien per.” Kouma Vanessa inn sirmont so laper? Li’nn fer tou seki li kapav pou protez limem. Par exanp, enn ansien ti ed li pou al donn enn depozision lapolis. Vanessa ti osi reflesi kouma Zeova ti protez So bann serviter dan lepase. Vanessa dir: “Premie dimounn ki mo’nn mazine se profet Daniel. Bann-la ti zet li dan enn lakav lion mem si li ti inosan, me Zeova ti protez li. Mo ti met tou dan lame Zeova, ek apre sa mo ti nepli per.”—Dan. 6:​12-22.

SEKI ZEOVA PE FER ASTER-LA

8. Ki kitsoz David ti kone? (Psom 56:8)

⁸ Mem si David ti an danze dan lavil Gat, li pa ti les so laper dominn li. Olie sa, li ti reflesi lor seki Zeova ti pe fer pou li aster-la. Li ti trouve kouma Zeova ti pe gid li ek protez li, ek li ti kone ki Zeova konpran so santiman. (Lir Psom 56:8.) David ti osi ena bann kamarad ki ti soutenir li ek ed li, kouma par exanp Zonatan ek Gran Pret Aimelek. (1 Sam. 20:​41, 42; 21:​6, 8, 9) Ek mem si Lerwa Sail ti pe rod li pou touy li, David ti ankor vivan. Tousala ti ed David pou konpran ki Zeova ti konn so sitiasion, ek Li ti kone osi kouma tousala ti pe afekte li.

9. Ki kitsoz Zeova kone?

⁹ Kan to pe viv enn sitiasion ki fer twa per, rapel ki Zeova konn to sitiasion, ek Li kone osi seki to resanti. Par exanp, Zeova pa ti zis trouve kouma bann Ezipsien ti pe maltret bann Izraelit, me Li ti osi resanti “douler ki zot [ti] pe siporte.” (Ex. 3:7) Dan enn sante, David ti dir ki Zeova trouv so ‘soufrans ek traka ki ti pe kraz li.’ (Ps. 31:7) Kan bann Izraelit ti pe soufer akoz bann move desizion ki zot ti pran, ‘Zeova osi ti soufer’ ansam avek zot. (Iza. 63:9) Kan to gagn per, Zeova konpran seki to resanti ek Li bien anvi ed twa pou sirmont to bann laper.

10. Kifer nou kapav sir ki Zeova trouv nou ek ki Li pou ed nou kan nou pe viv bann sitiasion difisil?

¹⁰ Kan to pe viv enn sitiasion difisil, kitfwa to pa trouve kouma Zeova pe soutenir  twa. Ki to kapav fer? Priye Li ek demann Li pou ed twa pou trouve kouma Li pe soutenir twa. (2 Ler. 6:​15-17) Apre sa, demann tomem: ‘Eski ena enn diskour ouswa enn repons dan renion ki’nn redonn mwa lafors? Eski ena enn piblikasion, enn video, ouswa enn sante ki’nn ankouraz mwa? Eski enn kikenn inn dir mwa enn kitsoz ouswa inn partaz enn verse Labib ar mwa ki’nn ankouraz mwa?’ Parfwa, li kapav arive ki nou bliye kouma lamour nou bann frer ek ser, ek bann lankourazman ki nou gagne dan Labib, kapav ed nou. Selman, se bann kado extraordiner ki Zeova inn donn nou. (Iza. 65:13; Mark 10:​29, 30) Sa montre ki Li gagn nou traka. (Iza. 49:​14-16) Ek sa montre osi ki nou kapav fer Li konfians.

11. Ki kitsoz ti ed Aida pou sirmont so laper?

¹¹ Aida, ki res Senegal, ti trouve kouma Zeova ti soutenir li kan li ti gagne enn difikilte. Limem pli gran zanfan dan so fami, akoz sa so bann paran ti atann ki li travay ek ki li pran zot swin. Me apre ki li ti sinplifie so lavi pou fer pionie, Aida ti gagn bann problem finans. So fami ti bien ankoler ar li ek ti kritik li. Aida dir: “Mo ti per tansion mo pa reisi ed mo bann paran ek ki tou dimounn rezet mwa. Kan mo sitiasion ti vinn pli pir, mo ti mem met tor lor Zeova.” Me apre ki Aida ti ekout enn diskour dan renion, li ti dir: “Frer-la ti rapel nou ki Zeova kone ki kitsoz fer nou trakase ouswa per. Bann ansien ek lezot frer ek ser ti donn mwa bann bon konsey, ek tigit-tigit mo ti rekoumans trouve ki Zeova bien kontan mwa. Apre sa, kan mo ti priye Zeova, mo ti ena plis konfians ki Li ti pou ed mwa. Ek kan mo ti trouve kouma Li ti reponn mo lapriyer, mo ti santi mwa anpe.” Avek letan, Aida ti reisi gagn enn travay ki ti ed li pou kontign so servis ek pou pran swin so bann paran. Li dir: “Mo’nn aprann pou fer Zeova foul konfians. Aster-la, kan mo priye Li, bien souvan mo laper disparet net.”

 SEKI ZEOVA POU FER DAN LAVENIR

12. Dapre Psom 56:​9, ki kitsoz David ti sir?

¹² Lir Psom 56:9. Sa verse-la koz lor enn lot kitsoz ki ti ed David pou sirmont so laper: Mem si so lavi ti an danze, li ti reflesi lor bann kitsoz ki Zeova ti pou fer pou li dan lavenir. David ti kone ki Zeova ti pou sov li dan moman ki bizin. Kifer? Parski Zeova ti dir David ki li ti pou vinn prosin lerwa lor Izrael. (1 Sam. 16:​1, 13) David ti sir ki Zeova ti pou tini So promes.

13. Ki kitsoz nou sir Zeova pou fer?

¹³ Ki kitsoz Zeova inn promet nou? Fode pa nou panse ki Li pou tir tou nou bann problem. c Selman, ninport ki problem nou ena azordi, Zeova pou fer li disparet dan lemond nouvo. (Iza. 25:​7-9) Nou Kreater Li bien pwisan ek Li ena pouvwar pou resisit bann mor, pou geri bann maladi, ek pou detrir tou nou bann lennmi.—1 Zan 4:4.

14. Lor ki kitsoz nou kapav reflesi?

¹⁴ Kan to per, reflesi lor seki Zeova pou fer dan lavenir. Reflesi seki to pou resanti kan Satan pou nepli existe, kan bann bon dimounn pou ranplas bann move dimounn, ek kan tigit par tigit, to pou vinn parfe. Dan Lasanble Rezional 2014, ti ena enn demonstrasion ki ti explike kouma nou kapav reflesi lor nou lesperans. Dan sa demonstrasion-la, enn papa explik so fami kouma 2 Timote 3:​1-5 ti pou bien diferan si sa bann verse-la ti pe koz lor lavi dan Paradi. Li ti dir zot: “Dan lemond nouvo, nou pou ena enn zoli lavi, parski bann dimounn pou kontan sakenn zot kamarad, zot pou kontan bann kitsoz spiritiel, zot pou ena modesti ek limilite, zot pou loue Bondie ek obeir zot paran, zot pou rekonesan ek fidel, zot pou kontan zot fami, zot pou dakor ant zotmem, zot pou koz an bien lor lezot, zot pou kontrol zotmem, zot pou ena douser ek pou kontan seki bon, zot pou bann dimounn ki kapav fer konfians, zot pa pou teti ek orgeye, zot pou kontan Bondie plito ki bann plezir, zot pou vremem atase ar Bondie; res pros ar sa kalite dimounn-la.” Kan to koz ar to fami ouswa ar to bann frer ek ser, eski souvan to koz lor kouma nou lavi pou ete dan lemond nouvo?

15. Mem si Tanja ti gagn per, ki kitsoz ti ed li pou sirmont so laper?

¹⁵ Anou get lexanp enn ser ki apel Tanja, ki res dan Lenor Masedwann. Kan li ti koumans etidie Labib, so bann paran pa ti kontan ditou. Selman, li ti reisi res fidel anver Zeova parski li ti reflesi lor seki Zeova ti pou fer dan lavenir. Tanja dir: “Bann kitsoz ki mo ti per pou arive, samem ti arive! Mo mama ti bat mwa apre sak renion. Mo bann paran ti menas pou touy mwa si mo ti vinn enn Temwin Zeova.” Finalman, Tanja so bann paran ti met li deor dan lakaz. Kouma li ti reazir? Li dir: “Mo ti reflesi ki, si mo res fidel anver Zeova, mo pou ere pou touletan. Mo ti mazine osi kouma Zeova ti pou rekonpans mwa dan lemond nouvo, pou tou bann kitsoz ki mo’nn perdi dan sa lemond-la, ek osi kouma mo ti pou bliye tou bann move kitsoz ki’nn ariv mwa.” Tanja inn res fidel anver Zeova, ek avek led Zeova li’nn reisi gagn enn plas pou reste. Azordi, Tanja inn marye  ar enn frer ki fidel, zot ere, ek zot pe servi Zeova aplintan.

OGMANT TO KONFIANS AN ZEOVA DEPI ASTER-LA MEM

16. Ki kitsoz pou ed nou pou ena kouraz kan bann levennman ki ena dan Lik 21:​26-28 pou realize?

¹⁶ Pandan gran soufrans, boukou dimounn ‘pou tom sek akoz zot per.’ Me bann serviter Zeova pou tini ferm ek zot pou ena kouraz. (Lir Lik 21:​26-28.) Kifer nou pa pou per? Parski nou’nn aprann pou fer Zeova konfians. Tanja dir ki, seki li’nn viv inn ed li pou fer fas ar bann lezot sitiasion difisil. Li dir: “Mo’nn aprann ki Zeova kapav ed nou pou andir ninport ki sitiasion ek ki Li beni nou. Parfwa, nou kapav ena linpresion ki se lezot ki ena kontrol. Selman, Zeova Li pli for ki zot, ek ninport ki difikilte nou kapav gagne, sa pou arete enn zour!”

17. Kouma nou text pou lane 2024 pou ed nou? (Get zimaz lor kouvertir.)

¹⁷ Azordi, ena boukou kitsoz ki kapav fer nou per. Me parey kouma David, fode pa nou les nou laper dominn nou. Nou text pou lane 2024, se enn lapriyer ki David ti fer Zeova. Li ti dir: “Kan mo gagn per, mo met mo konfians dan twa.” (Ps. 56:3) Konsernan sa verse-la, enn exper lor Labib dir: “David pa ti kontign pans lor bann kitsoz ki ti fer li per, ouswa lor so bann problem. Olie sa, li ti kont lor sa Kikenn ki ti kapav sov li la.” Dan bann semenn ek bann mwa ki pe vini, reflesi lor nou text pou lane, sirtou si ena kitsoz ki pe fer twa per. Pran letan pou reflesi lor seki Zeova inn deza fer, lor seki Li pe fer aster-la, ek lor seki Li pou fer dan lavenir. Lerla, parey kouma David, to pou kapav dir: “Dan Bondie mo finn met mo konfians, mo pa pou per.”—Ps. 56:4.