1. Citthuni cinniiriha woova?

 ATTHU otheene unawaaphwanyaka woova ikwaha cikiina. Khweeliini, usoma Ibiiblya uhonikavihera uhiya woova citthu cikiina, toko ukhwa, ukhwiri ni woova citthu cinhala ukhumelela wahoolo. Masi hi ninkhala ukati ucanryaaya citthu cowoopiha cinene. Toko ikhotto, uthanyanaciya ni iretta. (Luka 21:11) Ciicammo, unaaniphwanyaka uwoova aapinaatamu, toko ahooleli ookuvernu awula amuciihu uhinaacivela unoona ninswalelaka Nluku. Atthu enci ankhala niiwasiwaasi yuupuwelaka wiira khanhala ukhitiri uvilela masakha anaakhumelela awula citthu cinhala uwiirannyeela wahoolo.

2. Isiyani yaamwiirannyenle Davidi ukati waaryaawe u Gate?

² Davidi ciicammo ankhala oovaka. Wootakihera, uwakati mwene Sawuli waamoomolanihilyaawe wiira amwiive, Davidi aholakela utthawela isittatti yo Filistiya, u Gate. Mwene ncoko wo Gate eehaniya Akis aheewa wiira Davidi aari nakhotto okuru ni aheepeliya icipo weeriyaka wiira ahowiiva afilisteu “imiliyau cene.” Ukati Davidi waacuwenlyaawe iyo itthwiiyo, uyo ahoova cinene. (1 Sam. 21:10-12) Davidi ahokhala niiwasiwaasi oopuwelaka isiyani Akis yaahalaawe umpanka. Isiyani Davidi yaapankilyaawe wiira amalihe woova wawe?

3. Toko cinhimyaaya Isaalimu 56:1-3, 11, isiyani Davidi yaapankilyaawe wiira amalihe woova wawe?

³ Nhina Isaalimu 56, Davidi naahimya mananna ciicoonaawe ukati waaryaawe u Gate. Nhina iyo Isaalimwiiyo Davidi hoonihera wiira aanawoona, masi ciicammo ahoonihera itthu yaapankilyaawe wiira ahiye woova. Ukati waakhalaawe oovaka, Davidi ahonkhuluvela Yehova. (Nsome Isaalimu 56:1-3, 11. a) Ni Davidi khaakhanle oonyoonyaciya. Niiparakha ca Yehova, Davidi yahomphwanya ankhili yahaawehereraawe: uyo aheekhaliha nanvahuwa! Phimaana,  Akis uhiya upheela umwiiva Davidi, uyo aapheela wiira ule nanvahuwoole akhume isittattyaawe. Ala manannaala, Davidi ahokhitiri utthawa.—1 Sam. 21:13–22:1.

4. Manannani ninhaleehu ulipihaca unkhuluvela wihu Yehova? Ntakihere.

⁴ Hiivano ciicammo pooti umaliha woova wihu nankhuluvelaka Yehova. Masi isiyani ninlamuliyeehu upanka wiira nilipihace unkhuluvela wihu Yehova, venci-venci uwakati ninoopopihaciyeehu awula ninooveehu? Muupuwele nna ntakiheronna: Nyuuva nnawoonelela wiira nhaana iretta. Nyuuva mwanhala woova, masi pooti uvukula woova winyu mwarwaaka umuulumana meetiku ookhuluvelya. Uyo pooti ukhalaka wiira hotoko waatafiti atthu yaarina iyo iretteeyo. Uyo naahala wuuviriyanani saana ni nnaahala woona wiira uyo naacuwela itthu inwiirani. Uyo ciicammo atthunaka naahala wuuvahani mirette caavonihile atthu akiina yaarina iyo iretteeyo. Mananna mamocaaru, hi ninaalipihaca unkhuluvela wihu Yehova neemelaka nuupuwelaka citthu cotheene pankilyaawe, ni citthu cimpankaawe nenna co, citthu cinhalaawe unipankela wahoolo. Iyo phi itthu Davidi yaapankilyaawe. Nasomaka vale moolumo a Davidi nhina Isaalimu 56, muupuwele manannani nyuuva nnohaleenyu ulipihaca unkhuluvela winyu Yehova ni umaliha woova winyu.

ISIYANI YEHOVA IPANKILYAAWE?

5. Wiira amalihe woova wawe, citthuni Davidi cuupuwenlyaawe? (Isaalimu 56:12, 13)

⁵ Hataa ukhalaka wiira aapheela wiiviya, Davidi anweheeha citthu Yehova caapankilyaawe. (Nsome Isaalimu 56:12, 13. b) Iyo phi itthu Davidi yoopuwelaawe ukati wotheene. Ikwaha cikiina, uyo aanaweemela ni wuupuwela citthu Yehova cumpilyaawe. Iyo itthwiiyo yahonkavihera wuupuwela wiira Yehova khanle nakuru ni nawaafenta apinaatamu otheene. (Isaa. 65:6-9) Davidi ciicammo aanoopuwela citthu Yehova caapankenlyaawe atthu akhwaawe. (Isaa. 31:19; 37:25, 26) Venci-venci, Davidi aanawuupuwela citthu Yehova campankenlyaawe uyova. Yehova ahonkhikicera ni ahonkavihera Davidi ukhuma nenne nokhalayi, aaryaawe mmiravo. (Isaa. 22:9, 10) Woohaanyihacera, wuupuwela citthu cotheenennyo wahomwiiriha Davidi ulipihaca cinene unkhuluvela wawe Yehova!

6. Ukati nyuuva munkhaleenyu moovaka, isiyani inhala wuukaviherani unkhuluvela Yehova?

 ⁶ Mwakhalaka owoova, mwiikohe co: ‘Isiyani Yehova ipankilyaawe?’ Muupuwele citthu cumpilyaawe. Wootakihera, nweheehe saana mananna Yehova cinaawaceraawe asinuni ni ifoloore. Unookhalaru wiira Nluku khumpile nnyo citthunnyo eelattaaniheraka ni khacinonswalela, uyo naawacera. Khweeliini, Yehova naaniwacera uvikana mananna cinwaceraawe nnyo citthunnyo. Wuupuwela iyo inanneeyo unawuncerera unkhuluvela wihu Yehova. (Mat. 6:25-32) Muupuwele ciicammo citthu Yehova caapankenlyaawe aswalyaawe. Nyuuva pooti usoma matakihero o mbiiblyani a ntthu aarina waamini woolipa, awula nyuuva pooti usoma ihantisi co Masaahiti a Yehova o mahukwaala. c Uhiya commo, muupuwele ciicammo mananna Yehova noowaceraaweni. Isiyani uyo yuupankenlyaaweni wiira ncuwele ikhweeli? Manannani uyo aakhunlyaawe ulompa winyu? (1 Jo. 5:14) Citthuni comaana nyuuva nnooneleleenyu muukumini winyu nlattu Yehova woonivaha mwaamwanawe wiira anoopole?—Efesu 1:7; Mabere. 4:14-16.

7. Ihantisi ya Daniele yaakavihenre cani anuunu Vanessa umaliha woova waya?

⁷ Arokorihu amoca ankhala u Haiti aneehaniya Vanessa d yahaana marikariko owoopiha. Nlopwana mmoca aanaalikarela ni anwantikhela imensagem mahuku otheene aakhanyererihaka wiira aarupane. Masi ayo yahomwiirela uyo nlopwanooyo wiira khayaalamuliya upanka iyo itthwiiyo. Vano uyo nlopwanooyo ahoviruwa ni ahancera uwoopopihaca. Anuunu Vanessa aheera wiira yahoova cinene. Isiyani ayo yaapankilyaaya wiira akhitiri umaliha woova waya? Ayo yahopanka itthu wiira akhitiri wiikhikicera. Humu mmoca ahaakavihera uwuulumana ahooleli o ule ncokoole. Uhiya commo, ayo ciicammo yahoopuwela mananna Yehova caakhikiceraawe aswalyaawe okhalayi. Anuunu Vanessa aheera: “Ntakihero noopacera noopuwenlyaaka naari na Daniele. Uyo aari nlopwana ooreera nrima, masi waanookhalaru commo, uyo ahaanana masakha oorika cinene. Uyo ahovonyeriya munlittini waari akharamu. Waanookhalaru commo, Yehova ahonwacera Daniele. Mi kahonlepela Yehova wiira akikavihere waanana masakha yaarinaaka. Umaliha waka ulompa, mi akoovile-tho.”—Dan. 6:12-22.

ISIYANI YEHOVA IMPANKAAWE MAHUKWEEHWAALA?

8. Isiyani Davidi yaakupalyaawe? (Isaalimu 56:8)

⁸ Hataa ukhalaka wiira Davidi ahoova cinene ukati waaryaawe u Gate, uyo khaahiyerenre woova wawe wiira unttheme. Uhiya commo, uyo ahoopuwela itthu Yehova yampankelyaawe ule uwakatyuule. Davidi ahoona wiira Yehova aananhoolela, aanankhikicera ni aanaacuwela itthu yaamwiira. (Nsome Isaalimu 56:8. e) Davidi ciicammo ahaana asipatthannyaawe yanhala unkavihera, toko Jonatã ni nankuttho muulupale Aimeleki, ankavihenre ukati waasankilyaawe. (1 Sam. 20:41, 42; 21:6, 8, 9) Hataa ukhalaka wiira aanaalupatthiya ni mwene Sawuli, Davidi ahokhitiri utthawa ni woopola ukumyaawe. Davidi aanaakhuluvela wiira Yehova aanaacuwela marikariko yaananaawe ni mananna ayo marikarikwaayo yancukulihaaya.

9. Isiyani Yehova incuwelaawe nhina khula ntthu?

⁹ Yookhumelelakani masakha anwiirihani woova, muupuwele wiira Yehova nawoona saana marikariko anaananeenyu ni naacuwela mananna aneecooneenyu. Wootakihera, ukati asarayeli waaryaaya u Egito, uhiya paahi woona masakha oorika yaakhumelenle, Yehova ancuwela sana-saana itthu ayoova yaakhumelela. (Nkw. 3:7) Nincipo  nawe, Davidi aheera wiira Yehova ahoona masakha yaarinaawe ni uriipiya nrima wawe. (Isaa. 31:7) Ni uwakati apoovu a Nluku yaahuvaaya nlattu o citthu coohinamaana caalakelaaya upanka, Yehova ciicammo wahonriipa nrima. (Isai. 63:9) Nyuuva moovaka, nhiliyale wiira Yehova naacuwela itthu nyuuva inwiirani ni uyo naapheela wuukaviherani umaliha nwo woovanwo.

10. Nlattuni nyuuva nnolamuliyeenyu ukupali wiira Yehova naacuwela itthu inoopuweleenyu ni ciicammo naahala wuukaviherani uvilela masakheenyu?

¹⁰ Nyuuva atthunaka nhopaca wiikoha manannani Yehova cinhalaawe wuukaviherani yookhumelelakani masakha. Nnoonela cani unlompa uyoova munlepelaka wiira ookavihereni woona mananna cinookaviheraaweni? (2 Mam. 6:15-17) Muupuwele ila itthwiila: Nhopaca wiiwa mwaha awula ikomentaariyu wankutthaanoni yoolipihaleni? Nhopaca usoma ilivuru, woona ividiyu awula wiiwelela ncipo nuulipihaleni? Awula ntthu hopaca uwooniherani iveerusu yo mbiiblyani yoolipihaleni? Atthunaka uwakati nkiina hi ninaaliyala mananna mayamunna cinnifentaaya ni mananna Ibiiblya cinnilipihaaya. Masi nnyo cikhanle iparakha comaana Yehova cinnivahaawe. (Isai. 65:13; Mark. 10:29, 30) Nnyo cikhanle citthu cinnikupaliha wiira Yehova nawaawacera apinaatamu. (Isai. 49:14-16) Ni ciicammo cikhanle citthu cinnikupaliha wiira Yehova unamphwanela hiivano unkhuluvela.

11. Isiyani yaakavihenre anuunu Aida umaliha woova waya?

¹¹ Anuunwiihu amoca ankhala u Senegal aneehaniya Aida yahoona mananna Yehova caakaviheraawe waanana marikariko. Ukhala wiira ayo yaari mwaana oopacera uyariya, yaawehereriya wiira aphwanyeke nsurukhu mwinci wiira yiikavihereke mwaaneennyaaya ni ciicammo asithumwanaya. Masi uwakati waarukunusilyaaya makhalelwaaya wiira apacere nteko weepiyoneeru owiicaaverya, anuunwiihu Aida yahancera ukhalana nsurukhu vakaani. Amucyaaya yahokhala oonyoonyiya ni yahopacera utarawaciya. Ayo ahohimya yiiraka: “Miiva kahopacera woova wiira akaahala ukhitiri-tho waakavihera miyapaapaaka ni koova wuulumiya pusya naatthu otheene. Miiva kahancera umoothererya Yehova citthu caakikhumelela.” Masi vano, anuunu Aida yaheewa mwaha wankutthaanoni. Ayo aneera: “Munna aapanka mwahooyo ahoopusera wiira hataa nikhalanaka makhwattani wanrimani, Yehova naacuwela otheene. Vakaani-vakaani, kikaviheriyaka nimahumu o wanlokoni ni nimayamunna akiina, kahopacera wiicoona ratta  ni kahoturuwela woona wiira khweeliini Yehova aanaakifenta. Kahancera unlompa Yehova kikhuluvelaka ni koonaka wiira Yehova aanawaakhula ulompa waka, mi kaneecoona ukhala ninnema.” Nuuwakatyaaya, anuunu Aida yahophwanya nteko ni ciicammo khayaahiile ukhala piyoneera owiicaaverya ni waakavihera asithumwanaya. Ayo anaamalihera yeeraka: “Mi kiheetthuca unkhuluvela Yehova ninrimaaka wotheene. Vano kanlompaka, woovanwo unaakimwaryaaca.”

ISIYANI-THO YEHOVA INHALAAWE UPANKA?

12. Toko cinhimyaaya Isaalimu 56:9, tipani Davidi ankhuluvelaawe?

¹² Isaalimu 56:9. f Ila iveeruswiila inawoonihera-tho itthu yankavihenre Davidi uwakati uyo woovaawe. Hataa ukhalaka wiira cahonkhumelela citthu cowoopiha, uyo aanoopuwela citthu Yehova nanlelo caahalaawe umpankela. Davidi ancuwela wiira Yehova anhala umoopola waphiyaka ukatyaawe. Kontha Yehova aheera wiira Davidi phaahala ukhala mwene o Isarayeli akhumaka Sawuli. (1 Sam. 16:1, 13) Davidi ancuwela wiira citthu cotheene Yehova nokhuluvelihaawe cinkhala khampa ciheerannya.

13. Isiyani inlamuliyeehu ukhuluvela?

¹³ Isiyani Yehova yuukhuluvelihilyaaweni wuupankelani? Hi khaninweherera wiira Yehova anikhikicere wiira ahiniphwanye hataa masakha. g Unookhalaru commo, hataa yaniphwanyaka masakhani ila ituninyeela, pooti wankhuluveleehu wiira Yehova naahala umaliha upeephoni. (Isai. 25:7-9) Nikhuluveleke wiira Mpattusiihu haana ikuru yoowunweleliha atthu akhwile, uvoniha iretta ni waamalamaliha awananiihu otheene.—1 Jo. 4:4.

14. Isiyani ninlamuliyeehu wuupuwela?

¹⁴ Wakhalaka wiira nnawoova, muupuwele itthu Yehova inhalaawe upanka wahoolo. Muupuwele mananna cinhaleenyu ukhala amalamalihiyaka Sotwani, atthu oohinamaana, yahalaka paahi atthu ooreera nrima ni narwaaka ukhala atthu oohipahuwa. Nthoonyero nimoca no wakonkereesuni yo 2014 nahoonihera mananna ninlamuliyeehu wuupuwela niweherero nihu. Nhina nno nthoonyeronno, amuci yaanawuupuwela mananna cinhalaaya ukhala upeephoni. Ayo yahoopuwela mananna makhalelo oopeephoni cinhalaaya uvirikana niitthu inhimyaaya 2 Timotiyu 3:1-5. Yaacaka ipeephoni, nnyo iveerusunnyo caahala wiira co: “Masi ucuwele wiira upeephoni unhala ukhala ukati atthu otheene unhalaaya utteeliya nrima cinene. Kontha apinaatamu anhala ukhala oofentana, owaacivela citthu ca Nluku, oohiicuunuwiha, owiiyeviha, onttitthimiha Nluku, oowiiwelela asithumwanaya, oosukhuru, ookhuluvelya, owaafenta amucyaaya, owiiwanannya, oowuuluma saana akhunanaya, owiivaraca, owaataana, owaacivela citthu comaana, ooreera nrima, owiiwa uhimeriya, oohiithenca, oohoolelihera unfenta Nluku, kahi citthu caya. Ala atthwaala nwaatanane.” Nyuuva nnawoopaka mwaha nkhayi naamuciinyu, nimayamunna ni wuuluma mananna ukumiihu cinhalaaya ukhala upeephoni?

15. Isiyani yaakavihenre anuunu Tânia umaliha woova waya?

¹⁵ Anuunwiihu amoca o Macedónia aneehaniya Tânia yahotthema woova waya, nlattu wo wuupuwela iparakha cinweherereehu coohoolo. Asithumwanaya yaapheela wiira ayova ahisome Ibiiblya ni yahaalupattha venci. Ayo aneera: “Citthu cikhwaawe koovaka cinene caheerannya. Khula ikwaha kaaturuwaaka umikutthaanoni, amaama yankaatta. Apaapa ni amaama yahokiirela wiira yanhala ukiiva kakhalaka Saahiti a Yehova.” Wiimaleloni, anuunwiihu Tânia yahoomoliya wapuwani. Vano yaapankileni? Ayo aheera: “Mi kahoopuwela cinene utteeliya woohimala waahalaaka ukhalana kanvaresesaka Nluku. Mi ciicammo kahoopuwela mananna Yehova caahalaawe ukitthuvela upeephoni nlattu wo khula itthu yaahalaaka  waamini uleva nhina ila ituninyeela ni kaanawuupuwela wiira upeephoni khaninhala wuupuwela-tho masakha otheenenyaayo.” Anuunwiihu Tânia khahiile unvaresesa Yehova ni uyo haakavihera uphwanya nipuro nookhala. Ilelo, anuunu Tânia ahotheliya nimunna ookhuluvelya ni, nkhayi naawannyaya, anvara nteko wo wiivahereriya ukati wotheene.

NLIPIHACE UNKHULUVELA WINYU YEHOVA NENNA CO

16. Isiyani inhala unikavihera ulipa nrima noonaka yiirannyaaka moolumo ari nhina Luka 21:26-28?

¹⁶ Ukati wo masakha moolupale atthu enci anaahala woova cinene. Masi apoovu a Nluku anhala ukhala oohoova ni oolipanrima. (Nsome Luka 21:26-28. h) Kontha isiyani anhalaaya uhoova? Kontha niheetthuca mananna onkhuluvela Yehova. Anuunwiihu Tânia aheera wiira itthu yaawiirannyenle yahaakavihera waanana masakha makhwaawe oorika cinene. Ayo aheera: “Mi kiheetthuca wiira khaavo masankiho anhala umwiiriha Yehova woocyeela unikavihera ni unicaaliha. Pooti ukhalaka wiira atthu akiina ahaana ikuru, masi khweeliini ayo arina ikuru kontha Yehova nawaahiya yakhalanaka nnyo ikurunnyo. Ni hataa masakha aniphwanyile yakhalaka moolupale cinene, Yehova naahala umaliha.”

17. Iveerusu yo mwaakha wo 2024 inhala unikavihera cani? (Nwehe ilatarato yo wakaapani.)

¹⁷ Mahukwaala, cihaavo citthu cinci cinnoopopiha. Masi khampa Davidi, khanimpheela uhiyerera woova wihu unitthemaka. Iveerusu yo mwaakha wo 2024, ukhanle ulompa wa Davidi, wenryaawe co: “Ukati unkhalaaka owoova, kinookhuluvelani nyuuva.” (Isaa. 56:3) Ilivuru imoca intaphulela iveerusu co mbiiblyani yinre co yaacaka iyo iveeruswiiyo: “Davidi khaakhala oopuwelaka citthu caamoopopiha ni khaatepa wuupuwela masankihwaawe. Uhiya commo, uyo aamuupuwela Ule aahala umoopola.” Muupuwele iveerusu yo mwaakha myeeri cinwaayo, venci-venci wakhalaka wiira anawuukhumelelani masankiho anookhalihani owoova. Nkumihe ukati wiira muupuwele citthu Yehova cipankilyaawe khalayi, cimpankaawe ileelo ni cinhalaawe upanka wahoolo. Ni toko Davidi, nyuuva nnaahala wiira co: “Mi kinankhuluvela Nluku; khiivo inoovaaka.”—Isaa. 56:4.