1. Молан южгунам ме лӱдын кертына?

 КАЖНЕ еҥ южгунам иктаж-мо деч лӱдеш. Мутат уке, Библийым шымлымылан кӧра ме колышо-влак деч да демон-влак деч она лӱд. Тыгак она тургыжлане, могай ончыкылык чыла еҥым вуча. Но ме неле жапыште илена, сандене сар, преступлений да эпидемий мемнам лӱдыктен кертеш (Лук. 21:11). Тыгак Юмылан кумалме верч вуйлатыше-влак мемнам поктылаш тӱҥалыт але еш шыгыремдаш тӱҥалеш манын лӱдын кертына. А южышт кызыт эртыме але ончыкыжым лийын кертше нелылыкым чытен огыт лек манын тургыжланен кертыт.

2. Гат олаште Давид могай ситуацийыш логалын?

² Южгунам Давидым лӱдмаш авалтен. Мутлан, кунам тудым Саул кугыжа пушташлан поктылын, тудо филистимысе Гат олаш куржын. Вашке Ахиш, Гат олан кугыжаже, пален налын: Давид — тиде лачак ту куатле сарзе, кудыж нерген израильтян-влак мурым шонен луктыныт. Давид лу тӱжем дене филистимым пуштын манын, нуно муреныт. Давид чот лӱдын (1 Сам. 21:10—12). Ахиш тудым пуштеш манын, Давид тургыжланен. Лӱдмашым сеҥаш Давидлан мо полшен?

3. Псалом 55:2—4, 12 дене келшышын, Давидлан лӱдмашыжым сеҥаш мо полшен?

³ 55-ше Псаломышто Давид возен, могай тудын шижмашыже Гат олаште лийын. Тиде Псаломышто тудо умылтара, молан тудо лӱдын да кузе лӱдмыжым сеҥен. Лӱдмӧ годым  тудо Иеговалан ӱшаным пыштен. (Псалом 55:2—4, 12 лудын лекса.) Иеговалан ӱшанымыже арам лийын огыл. Иегован полшымыж дене Давид тыгайым ыштен, мом иктат вучен огыл — тудо шкенжым ушдымыла кучаш тӱҥалын! Тиде сай лектышым конден: Давидым пуштмо олмеш Ахиш тудым ола гыч поктен колташ кӱштен. Тыге Давид утаралтын (1 Сам. 21:13—22:1).

4. Иеговалан эше чотрак ӱшанаш мыланна мо полшен кертеш? Примерым кондыза.

⁴ Иеговалан ӱшанена гын, тиде мыланна лӱдмӧ годым полша. Иеговалан эше чотрак ӱшанаш мыланна мо полша? Примерым ончалына. Мутлан, те кугу чер дене черланышда. Эн ончыч тиде увер тендам лӱдыкта. Но вара тендам пеш сай врач эмлаш тӱҥалеш манын пален налыда. Тиде черым эмлымаште тудын кугу опытшо уло, да тудо шуко пациентлан паремаш полшен. Тыгак тендан врачда пеш тӱткӧ да поро, тудо тендам чытышын колыштеш, да те ужыда: тудо тендам чынжымак умыла. Тудо тыланда сай эмлымаш планым темла, да те умыледа: тендан дене чыла сай лиеш да тургыжланаш огеш кӱл. Тидын семынак мемнан Иеговалан ӱшанымына шуэш. А Иеговалан ӱшанашлан мыланна шонаш кӱлеш, мом Иегова уже ыштен, мом тудо кызыт ышта да мом ончыкыжым ышташ тӱҥалеш. Лач тыге Давид ыштен. Айста 55-ше Псалом гыч тудын мутшым ончалына да шоналтена, Иеговалан эше чотрак ӱшанаш да лӱдмашым сеҥаш мо полша.

МОМ ИЕГОВА УЖЕ ЫШТЕН?

5. Лӱдмашым сеҥашлан Давид мо нерген шонкален? (Псалом 55:13, 14).

⁵ Кунам Давид лӱдыкшӧ ситуацийыште лийын, тудо шонкален, мом Иегова тудлан уже ыштен. (Псалом 55:13, 14 лудын лекса.) Юмо нерген шонкалаш тудын привычкышкыже пурен. Мутлан, Давид Юмын пӱртӱс ыштымашыже-влак нерген шонкален. Нуно тудлан шарныктеныт: Иегова пеш чот виян да еҥ-влакым йӧрата (Пс. 64:7—10). Эше Давид шонкален, мом Иегова чыла служитлышыж-влаклан ыштен (Пс. 30:20; 36:25, 26). Но поснак Давид шонкален, мом Иегова лач тудлан ыштен. Юмо Давидлан  аза лиймыж годсек полшен да тудым утарен шоген (Пс. 21:10, 11). Мутат уке, Давидлан тыгай шонкалымаш Иеговалан эше чотрак ӱшанаш полшен!

6. Лӱдмӧ годым мыланна Иеговалан ӱшанаш мо полшен кертеш?

⁶ Лӱдмӧ годым шке деч йодса: «Мом Иегова уже ыштен?» Тудын пӱртӱс ыштымашыже-влак нерген шоналтыза. Мутлан, эскераш лиеш, кузе Иегова кайык-влакым да пеледыш-влакым онча, кудышт тудын тӱсыжӧ почеш ыштыме огытыл да тудлан служитлен огыт керт. Тудо нунын верч тырша гын, тендан верчат тыршаш тӱҥалеш (Матф. 6:25—32). Тидын нерген шонкалымаш Иеговалан эше чотрак ӱшанаш полша. Тыгак шоналтыза, кузе Иегова служитлышыже-влаклан полша. Те библий жапыште але кызыт илыше пӧръеҥ ден ӱдырамаш-влак дене сайрак палыме лийын кертыда a. Эше шкаланда шарныктыза, мом Иегова лач тыланда ыштен. Кузе тудо тендам шке декше ӱжын конден? (Иоан. 6:44). Кузе тудо кумалмыланда вашмутым пуа? (1 Иоан. 5:14). Христосын надырже тыланда кажне кечын могай пайдам конда? (Еф. 1:7; Евр. 4:14—16).

7. Даниил пророк дене лийше случай Ванессалан лӱдмашыжым сеҥаш кузе полшен?

⁷ Гаити гыч Ванесса b лӱман ака шучко ситуаций дене тӱкнен. Воктенже илыше пӧръеҥын тудын дене яжарланымыже шуын. Тидлан тудо Ванессалан кажне кечын йыҥгыртен да сообщений-влакым колтен. Коклаштына нимогай кыл лийын огеш керт манын, Ванесса тудлан раш каласен. Но пӧръеҥ эше чотрак торжа лийын да эсогыл тудым лӱдыкташ тӱҥалын. «Мый лӱдынам», — манеш Ванесса. Лӱдмыжым тудо кузе сеҥен? Шкем аралашлан тудо мом ыштен кертын, чылажымат ыштен. Погынымаш гыч кугурак иза тудлан полиций деч полышым йодаш полшен. Тыгак тудо шонкален, кузе Иегова ожно шке служитлышыже-влакым арален. «Эн ончыч мый Даниил пророк нерген шоналтышым, — ойла Ванесса. — Тудо титакан лийын огыл, а тудым шужышо лев-влак деке вынемыш шуэныт. Но эсогыл тыгай ситуацийыште Юмо тудын верч тыршен. Мый Иеговам тиде ситуацийым кидышкыже налаш йодынам. Тидын деч вара мый уже лӱдын омыл» (Дан. 6:12—22).

МОМ ИЕГОВА КЫЗЫТ ЫШТА?

8. Мо́лан Давид пеҥгыдын ӱшанен? (Псалом 55:9).

⁸ Давид Гат олаште пуштмо лийын кертын гынат, тудо лӱдмашыжлан шкем авалташ пуэн огыл. Тидын олмеш тудо уло вийын шонкален, кузе Иегова тудым кызыт арала. Тудо ужын: Иегова тудым виктара, арала да шижмашыжым умыла. (Псалом 55:9 лудын лекса.) Тыгак Давидын ӱшанле йолташыже-влак лийыныт. Мутлан, Ионафан да первосвященник Ахимелех. Нуно тудым кумылаҥденыт да тудлан полшен шогеныт (1 Сам. 20:41, 42; 21:6, 8, 9). Саул кугыжа Давидым пушташ тӧчен гынат, Давид утаралт кертын. Чыла тиде тудым ӱшандарен: Иегова ужеш, могай нелылыкым тудо эрта да мом тудо шижеш.

9. Мом Иегова кажнына нерген пала?

⁹ Кунам те нелылык дене тӱкнеда, кудыжо тендам лӱдыкта, шарныза: Иегова ужеш, мом тыланда чыташ логалеш да могай шижмашдам тиде шочыкта. Мутлан, Юмо ужын, могай торжалык дене Египетыште израильтян-влак тӱкненыт да кузе нуно орланеныт (Исх. 3:7). Давид пеҥгыдын ӱшанен: Иегова ойгыжо нерген пала да ужеш, мыняр чот  тудлан йӧсӧ лийын (Пс. 30:8). Кунам тудын калыкше орланен — кеч ыштыме йоҥылышыжо верч, — тиде Юмылан чон корштымашым конден (Ис. 63:9). Кунам те лӱдыда, Иегова умыла, мом те шижыда. Тудо тыланда лӱдмашдам сеҥаш полшынеже.

10. Иегова тендан верч тырша да тыланда кеч-могай нелылыкым сеҥен лекташ полша манын, молан те пеҥгыдын ӱшанеда?

¹⁰ Кугу нелылык годым лӱдмаш мыланна ужаш мешаен кертеш, кузе Иегова мемнан верч тырша. Мом тунам ыштыман? Юмо деч тудын полшымыжым ужаш йодса (2 Цар. 6:15—17). Можыч, тендам шукерте огыл погынымаште ойлымаш але иктаж-кӧн комментарийже пеҥгыдемден? Але иктаж-могай статья, видеоролик але сайтна гыч муро тендам кумылаҥден? А можыч, иктаж-кӧ тыланда лыпландарыше шонымашым каласен але библийысе почеламутым ончыктен? Южгунам ме монден кертына, кузе иза-ака-влакын йӧратымашышт да духовный кочкыш мыланна полшеныт. Но тиде Иегова деч шергакан пӧлек-влак (Ис. 65:13; Мар. 10:29, 30). Нуно ончыктат: Иегова тендам йӧрата да тудын полшымыжлан эре ӱшанаш лиеш (Ис. 49:14—16).

11. Аидалан лӱдмашыжым сеҥаш мо полшен?

¹¹ Сенегалыште илыше Аида ужаш тыршен, кузе Иегова тудлан неле жапыште полша. Ешыштыже тудо эн кугу йоча, сандене ача-аваже нунын верч материальный шотышто тыршымыжым вученыт. Но Аида пионер семын служитлынеже ыле, сандене тудо шагалрак пашам ышташ тӱҥалын. Тидлан кӧра пашадаржат кугу лийын огыл. Ешыжлан тиде чотак келшен огыл. Нуно тудым критиковатленыт. «Ача-авамлан полшен ом керт да уло ешем мый дечем савырна манын лӱдынам, — манеш Аида. — Тыге лиймылан мый эсогыл Иеговам титакленам». Вара вашлиймаште тудо ик ойлымашым колын. Аида ойла: «Иза мыланна шарныктен: кеч-могай шӱм-чон корштымашна лиеш гынат, Иегова чыла пала. Кугурак иза-влак да йолташ-влак Иегова мыйым йӧрата манын ӱшандареныт. Эркын-эркын Иеговалан ӱшанымем пеҥгыдемын. Иегова мыланем чынжымак полшен кертеш ӱшанымаш дене кумалаш тӱҥалынам. Кунам мый ужынам,  кузе Иегова вашмутым пуа, тунам мый чон тынысым шижынам». Жап эртымеке, Аида тыгай пашам муын, кудыжлан кӧра тудо пионер семын служитлен кертын да материальный шотышто ача-аважлан полшен кертын. «Мый Иеговалан тӱрыснек ӱшанаш тунемынам, — ойла Аида. — Ындыжым мый кумаламат, чыла лӱдмашем пыта».

МОМ ИЕГОВА ОНЧЫКЫЖЫМ ЫШТА?

12. Псалом 55:10 дене келшышын, Давид мо́лан пеҥгыдын ӱшанен?

¹² Псалом 55:10 лудын лекса. Тиде почеламутышто ме ужына, Давидлан лӱдмашыжым сеҥаш мо эше полшен. Пеш лӱдыкшӧ ситуацийыште лийын гынат, тудо шонкален, мом Иегова тудлан ончыкыжым ышта. Давид пален: кӱлеш жапыште Иегова тудым утара. Вет Давид Израильын кугыжаже лиеш манын, Юмо уже увертарен (1 Сам. 16:1, 13). Давид пеҥгыдын ӱшанен: мом Иегова сӧрен, тидым шукта.

13. Мом Иегова мыланна ончыкыжым ышта?

¹³ Иегова мемнан гыч кажныжлан мом ышташ сӧра? Ме она вучо, пуйто тудо мемнам чыла нелылык деч аралаш тӱҥалеш c. Но ме палена: у тӱняште Иегова чыла проблемым кораҥда, кудыж дене ме кызыт тӱкнена (Ис. 25:7—9). Колышо-влакым ылыжташ, мемнам физический да эмоциональный чер деч паремдаш да чыла тушманым пытараш мемнан Ыштышынан вийже ситышын уло (1 Иоан. 4:4).

14. Мо нерген шонкален кертына?

¹⁴ Лӱдмӧ годым шонкалыза, мом Иегова ончыкыжым ышта. Шоналтыза, могай сылне илыш лиеш, кунам Сатана да осал еҥ-влак огыт лий. Чыла вере чыным йӧратыше-влак гына лийыт, да те эркын-эркын тыгай кече деке лишемыда, кунам тӱрыснек сулык деч утледа. 2014 ийысе регионысо конгрессыште ик инсценировко лийын, кудыштыжо ача ешыжлан райысе илыш нерген шонкалаш полшен. Тудо 2 Тимофейлан 3:1—5 почеламут-влакым тыге савырен лудын пуэн, пуйто тушто райысе илыш нерген возымо: «У тӱняште эн пиалан жап лиеш. Еҥ-влак весе-влакым йӧратыше, духовный поянлыкым йӧратыше, тыматле, ӱҥышӧ, Юмым чапландарыше, ача-авам колыштшо, тауштышо, ӱшанле, келшен моштышо, весе-влак нерген сайым ойлышо, шкем кучен моштышо, шыма, порым йӧратыше, лывырге, шке шерым темыме олмеш Юмым чотрак йӧратыше, Юмылан ӱшанле лийыт. Тыгай еҥ-влак дене йолташ лий». А те ешда але йолташ-влак дене пырля шонкаледа мо, могай илыш у тӱняште лиеш?

15. Танялан, лӱдмашым ончыде, Иеговалан ӱшанле кодаш мо полшен?

¹⁵ Йӱдвел Македоний гыч Таня акан примержым ончен лектына. Кунам тудо Библийым шымлаш тӱҥалын, ача-аважлан тиде келшен огыл. Нуно тудым чот шыгыремденыт. Но Таня шонкален, мом Иегова тудлан ончыкыжым ышта, да тиде тудлан лӱдмашыжым сеҥаш полшен. Тудо шарналтен ойла: «Мо деч лӱдынам, южыжо шукталтын. Авай мыйым кажне погынымаш деч вара кырен. А Иегован Таныкше лиям гын, ача-авам эсогыл мыйым пушташ сӧреныт». Вара Таням ача-аваже мӧҥгышт гыч поктен колтеныт. Могай тудын реакцийже лийын? Тудо ойла: «Мый шонкаленам: Иеговалан ӱшанле кодам гын, курым-курымеш могай мый пиалан лиям. Тыгак мый шоненам: кызыт иктаж-мо деч посна кодам гын, Иегова мыланем тидым у тӱняште тичмашын пӧртылта. А чыла удаже мондалтеш». Таня Иеговалан ӱшанле кодын да тудын полшымыжлан  кӧра илыме верым муын кертын. Тудо пеш сай изалан марлан лектын, нуно пиалан улыт да коктынат кечыгут служитлыше улыт.

ИЕГОВАН ПОЛШЫМЫЖЛАН ӰШАНЫМАШДАМ ПЕҤГЫДЕМДЫЗА

16. Лукан 21:26—28 гыч шомакын шукталтмыж годым мыланна лӱдмашым сеҥаш мо полша?

¹⁶ Кугу орлык годым «еҥ-влак лӱдын вучымышт дене колышаш гай лийыт». Но Юмын служитлышыже-влак пеҥгыдын шогышо да лӱддымӧ кодыт. (Лукан 21:26—28 лудын лекса.) Молан мемнам ту жапыште лӱдмаш огеш авалте? Молан манаш гын, ме Иегован полшымыжлан ӱшанена. Кодшо абзацыште палемдыме Танян ойлымыжо почеш чытен лекмыже тудлан у нелылыкым сеҥаш полша. Теве мом тудо ойла: «Мый илышыштем ужынам: Иегова мыланна кеч-могай нелылыкым чыташ полшен кертеш да суапландара». Эше тудо манеш: «Южгунам чучеш, пуйто тыйын илышет вес еҥ-влакын кидыштышт. Но тиде тыге огыл, вет Иегова кеч-могай айдеме деч виянрак. Эн кугу нелылыкынат мучашыже уло».

17. 2024 ийлан почеламут мыланна кузе полша? (Журнал комышто сӱретым ончыза.)

¹⁷ Таче ме шуко мо верч лӱдын кертына. Но Давид семынак лӱдмашлан шкенам авалташ она пу. 2024 ийлан почеламут Давидын Иеговалан кумалмыж гыч налме: «Лӱдмем годым мый полшыметлан ӱшанем» (Пс. 55:4). Ик справочникыште тиде почеламутлан тыгай комментарий уло: «Давид лӱдмашыже нерген шонкален огеш кошт. Тидын олмеш Давид тудым Утарышын полшымыжлан ӱшана». Тиде почеламут гыч шомакым уло ий мучко, поснак лӱдмӧ годым, шарныза. Шонкалаш тыршыза, мом Иегова ожно ыштен, мом тудо кызыт ышта да мом ончыкыжым ышташ тӱҥалеш. Тидын нерген шонкалашлан жапым ойырыза. Тунам Давид семын те каласен кертыда: «Юмылан ӱшанышым, ом лӱд» (Пс. 55:5).