1. Dhithu baani dhaanithukulele woova?

 IYO aatene malabo mamodha nnofwanyiwa woova. Ebaribari wi mwaha omuhudhera Bibiliya kannova okwa, dhithu dha masenga obe woova dhithu dhinapadduwe osogolo. Mbwenye iyo nnakala mudhidhi dhinapadduwa “dhithu dhowopiha” ninga koddo, otimbwini ni oredda. (Luc. 21:11) Teto iyo podi wawovaga athu. Motajhiha, anamathonga enaniharahara obe amudhihu enanidda mwaha omwebedha Yehova. Athu amodhaya enothabwa othuwathuwa yubuwelaga wi kinadha yanda wagonjhiha makathamiho enaafwanya ni enaafwanye osogolo.

2. Ethu baani yampadduwele Davidi mudhidhi agaali oGati?

² Davidi oofwanyiwa woova. Motajhiha, mudhidhi mwene Sawuli amuharaharaga afunaga ompa, Davidi othoma othawela luwani ya mafilistewu yithaniwa Gati. Vano mwene ooGati, Akiji, wonelamo wihina Davidi aali munyakoddo akopolo iibeliwe mwaha waapa ‘makumi a matxikwi ni matxikwi’ a mafilistewu. Nuunona eyo, Davidi ‘obajha woova vanlubale.’ (1 Sam. 21:10-12) Davidi ahithuwathuwa vanlubale ubuwelaga ethu Akiji afuniye omwerela. Ethu baani Davidi eriliyena wihina agonjhihe woova wula?

3. Mowiwanana ni Salmo 56:1-3, 11, ethu baani Davidi eriliyena wihina agonjhihe woova waye?

³ Va Salmo 56, Davidi anowoga makalelo aaliye mudhidhi agaali oGati. Va kapitulu yela ya Salmo Davidi onowoga dhithu dhamuthukulela woova, teto onowoga ethu eriliyena wihina agonjhihe woova waye. Nubajha woova Davidi ahimuroromela Yehova. (Omwileri Salmo 56:1-3, 11.) Teto Davidi kaathukunle manyazo mwaha omuroromela Yehova. Nnikavihero na Yehova, Davidi ahanda wamariha makathamiho aye mwamakalelo ahajhehedhiye: Oliye wiisinjhihedha okala ninga taduwa! Vano, ohiya ofunaga ompa Davidi, Akiji ofunaga omusukuma taduwa ole  amunyonya. Nimakalelo yaala, Davidi wanda othawa. — 1 Sam. 21:13–22:1.

4. Nnande aavi olibiha nroromelo nehu ni Yehova? Owogemo olabihedhaga yoladdaniha.

⁴ Nihiyoya podi wanda ogonjhiha woova wehu namuroromela Yehova. Ethu baani nnahowelihu werana negi nlibihe nroromelo nehu ni Yehova, thabwathabwa naathusiwaga obe noovaga. Motajhiha, kubuwele oganna oredda wowopiha, mwebaribarene werege woova. Mbwenye we podi ovugula woova wawo mwaha othapanya ni mediku onamuroromeliwe. Podi wera oliye ohakavihera athu owinjhiva yanna oredda mmodhave. Oliye aneere wuvuruwana nupwaseya, teto we onere wonelamo wihina oliye ohunona pamadhene makalelo oliwe. Oliye podi wukavihera wihina ojhe murombwe wakavihenre athu owinjhiva ovulumuwa. Ni makalelo mamodhave iyo nnolibiha nroromelo nehu ni Yehova, nubuwelaga dhithu Oliye aneriyena ni anafuniye onerela osogolo. Siyeyo Davidi eriliyena. Nawilerigi madhu a Davidi enafwanyeya va Salmo 56, wubuwelege makalelo ni weya onafuniwe olibiha nroromelo nawo ni Yehova ni ogonjhiha woova wawo.

ETHU BAANI YEHOVA ERILIYENA?

5. Wihina agonjhihe woova waye dhithu baani Davidi ubuweliye? (Salmo 56:12, 13)

⁵ Naarive egumaye egaali vang’ovini, Davidi owubuwela dhithu Yehova aamwerenliye. (Omwileri Salmo 56:12, 13.) Ela yaali elemelelo Davidi anniyena egumaye yaatene. Motajhiha, malabo mamodha oliye oopatha mudhidhi wihina apendde dhopaddusa dha Yehova. Eyo yomukavihera woona wi Yehova Mulugu akopolo dhatedhene ni wihina Oliye onowadhivela vanlubale athu. (Sal. 65:6-9) Teto Davidi oopendda dhithu Yehova aawerenliye athu amodhaya. (Sal. 31:19; 37:25, 26) Yathimaya, oliye oopendda dhithu Yehova aamwerenliye mwigumini mwaye. Yehova ahimbarela Davidi ni ahimukavihera okuma ezombwe yaye. (Sal. 22:9, 10) Mohanganyedha, wubuwela dhithu dhatedhene dhendha dhahilibiha nroromelo na Davidi!

6. Wafwanyiwa woova, ethu baani enuukavihere omuroromela Yehova?

⁶ Wafwanyiwa woova we podi wikoha: ‘Ethu baani Yehova eriliyena?’ Karajhiha wubuwela dhopaddusa. Motajhiha, “opwasedhe osugwa” makalelo Yehova anasamaleliye folori  vamodha ni balame, naarive akala dhithu ndha kadhipaddusiwe moligana ni Mulugu newene kadhinamwebedha, Oliye anosamalela. Eyo enowoniha wihina Yehova anere onisamalela ni iyowa. Wubuwela ni makalelo yaala wineere onikavihera wenjhedhedha nroromelo nehu ni Yehova. (Mat. 6:25-32) Teto we podi wubuwela dhithu Yehova awereliye adharaaye, wodhela ohudhera yopadduwa ya mudhaari a Yehova enafwanyeya mBibiliyani anna nroromelo nooliba, obe wileri dhopadduwa dha mwigumini dha adhaari a Yehova a malabo yaala. a Ohiya eyo, wubuwele makalelo Yehova usamalenliye. Motajhiha, ethu baani Oliye eriliyena wihina we ohudhere ebaribari? (João 6:44) Nimakalelo baani Oliye awakunliye malobelo awo? (1 João 5:14) Dhithu baani dhapama dhinapadduwa mwigumini mwehu mwaha Yehova onivaha yowobola? — Efé. 1:7; Heb. 4:14-16.

7. Yopadduwa ya Daniyeli yamukavihere aavi Vanessa ogonjhiha woova waye?

⁷ Murogola dhaala anithaniwa Vanessa b anakala elabo yo Ayiti, ahifwanyiwa makathamiho oorusa. Mulobwana dhaala a murudda waye oomuligarela ni oomwinviyarela mensaje malabo aamatene, oliye oomuwaddihedha Vanessa wihina akale mwenddaye. Mbwenye murogola Vanessa ahimwaddela wihina oliye kaarumedhe werana ethu ninga yeele. Mwaha wa yeyo mulobwana ole othabwaga omuthusa. Vanessa owoga wihina ahithuwathuwa vanlubale ni oowoova. Oliye andile aavi ogonjhiha woova wula? Oliye aherana dhithu dhatedhene andiye wihina ibarele. Namaholela mulogo dhaala ahimukavihera oliye wanda owoga ni anamathonga. Teto ohiya eyo, Vanessa ahipwasedha wubuwela makalelo Yehova aabareliye adharaaye akale. Vanessa anowoga egi: “Muthu oobajha gamubuwelimi aali Daniyeli. Oliye ahivokedhiwa munikolani mwapoddogoma, naarive aherilena ethu yabure, mbwenye Yehova ahimusamalela. Miyo omuloba wihina Yehova amarihe makathamiho ale yagifwanya. Nuulobela miyo kagoova ethu.” — Dan. 6:12-22.

ETHU BAANI YEHOVA ANERIYENA OVANENE ?

8. Ebaribari baani Davidi anniyena? (Salmo 56:8)

⁸ Naarive egumi ya Davidi egaali vang’ovini mudhidhi agaali oGati, oliye kahile wihina woova omugonjhihe. Ohiya eyo, oliye opwasedha wubuwela makalelo Yehova amukaviheriye mudhidhi yole. Davidi owanda woona makalelo Yehova ambareliye ni amukaviheriye, teto oliye ahinona wihina Yehova owonelamo dhithu dhampadduwela. (Omwileri Salmo 56:8.) Davidi ahikanna akwaye ninga Jonata ni namakutha munlubale Ayimeleki yamukavihera nuroromeleya ni ele ahoweliye. (1 Sam. 20:41, 42; 21:6, 8, 9) Naarive aharahariwaga ni mwene Sawuli, Davidi ahanda othawa ni ovulusa egumaye. Davidi ahikanna ebaribari wihina Yehova ahinona wi oliye oofwanyiwa makathamiho oorusa, nimakalelo makathamiho ayo yavoloweliwa egumaye.

9. Ethu baani Yehova anonniye wa kadda muthu wa iyo?

⁹ Wafwanyiwaga makathamiho oorusa enuthukulela woova, kudduwale wihina Yehova onowawona makathamiho awo ni ohunona pamadhene makalelo oliwe. Motajhiha, mudhidhi amwaana Izarayeli egaali Wijipitu ninga adhaari, ohiya wawonave baahi makathamiho yafwanya amwana Izarayeli, Yehova owoga wi ‘ginowoona goyi enna nlogo naaga’. (Êxo. 3:7) Davidi ahiiba egi: Yehova onowona ‘osegedheya’ ni uhaanona ‘makathamiho a mwigumini mwaaga.’ (Sal. 31:7) Teto malabo mamodha amwana Izarayeli yonaga goyi mwaha dhothoma  dhewa, ‘Nuliyeya oosimwela.’ (Isa. 63:9) Bumwahaya wafwanyiwa woova, kudduwale wihina Yehova ohunona makalelo oliwe ni anofuna vanlubale wukavihera ogonjhiha woova wawo.

10. Ddiniyani enanivaha ebaribari wi Yehova ohunona dhithu dhinanipadduwela ni anere onikavihera wanda wagonjhiha makathamiho ehu?

¹⁰ Malabo mamodha, onowikohesa nimakalelo baani Yehova anukaviheriye wagonjhiha makathamiho awo? Ononamo aavi olobela wa Yehova omulobaga wihina ukavihere wonelamo makalelo anukaviheriye? (2 Reis 6:15-17) Karajhiha wikoha: Onovuruwanaga mwaha obe yowakula ya ddibila yulibihile? Obe ethu woniliwe mmalivuruni mwehu, nvidiyuni obe mujhiboni yuhagalanse? Ohukala muthu ulibihile alabihedhaga yolebela ya mBibiliyani? Malabo mamodha iyo podi odduwala makalelo addibilihu enanoonihiwa odhivela ni olibiha nakenlihu wodhela Bibiliya winanikaviheriwa. Mbwenye dhithu ndha, nvaho dhoriya Yehova ananivahiye. (Isa. 65:13; Mar. 10:29, 30) Mwaha dhinowoniha wihina Yehova anonithuwathuwela vanlubale. (Isa. 49:14-16) Teto dhinowoniha wihina Yehova muthu anafwanelela ororomeliwa.

11. Ddiniyani yamukavihere Aida ogonjhiha woova waye?

¹¹ Murogola dhaala anakala elabo yoSenegal anithaniwa Aida, ahanda wonelamo makalelo Yehova amukaviheriye mudhidhi afwanyiwaga makathamiho. Woona wihina oliye mwaana apogoya, makolo aye yajheha wihina oliye alabe ni aakelege korowa dhowinjhiva wihina isamalelena ni aakaviherena makolo aye. Mbwenye nuumala okweyiha egumaye wihina aavolowele mabasa oopiyonero, Aida obajha okanna makathamiho oofwanya korowa. Amudhaaye otakaleliwa vanlubale ni oliye ni obajha omuruwana. Aida anowoga egi: “Miyo obajha woova ohanda wakavihera makolo aaga ni wooniwa ninga muthu abure ahinaasamalela makolo aye. Gahifiyedha onvaha nibili Yehova mwaha dhithu dhagipadduwela.” Mbwenye vasogolova Aida ovuruwana mwaha omutugumanoni. Oliye anowoga egi: “Ddibila awoga mwahaya onubusedha wi naarive nifwanyiwaga makathamiho oohiyanahiyana, Yehova ohunona dhatedhene dhinanipadduwela. Vano vang’ono vang’ono nnikavihero na anamaholela  mulogo ni addibila amodhaya, miyo wambela woona makalelo Yehova anagidhiveliye. Teto obajha olobela wa Yehova ni nroromelo ni gihanganyedhaga teto goonaga Yehova aakulaga malobelo aaga gokanna murenddele.” Nuuvira mudhidhi, Aida wafwanya mabasa yamukavihera odhowagave aaparaga mabasa oopiyonero ni wakavihera makolo aye ni athu amodhaya. Oliye onowogave egi: “Miyo gahihudhera omuroromela Yehova ni murima waga wamutene. Vano galobelaga, woova waga waatene onorimela.”

ETHU BAANI YEHOVA ANAFUNIYE WERANA OSOGOLO?

12. Ethu baani Davidi aroromeliye? (Salmo 56:9)

¹² Omwileri Salmo 56:9. Versu ela enowoniha ethu emodhaya yamukavihere Davidi mudhidhi oovaga, naarive egumaye egaali vang’ovini, oliye owubuwela dhithu Yehova afuniye omwerela osogolo. Davidi ahinona wihina Yehova eere onvulusa mudhidhi wofwanelela. Mwaha wihina Yehova ahiwoga wihina Davidi aakale mwene ooharela owIzarayeli. (1 Sam. 16:1, 13) Vamentoni va Davidi dhithu Yehova aapaganyiye dhakala ninga dhahimala wakwanela.

13. Ethu baani nahinanganyedhihu wodhela Yehova?

¹³ Ethu baani Yehova apaganyiliye wuwerela osogolo? Iyo kannajheha wihina Yehova anibarele wa makathamiho aatene. c Mbwenye naarive nifwanyiwaga makathamiho bi makathamiho malabo yaala, nihikanna ebaribari wihina Yehova anere wamariha mwilaboni exa. (Isa. 25:7-9) Mpaddusi ehu mwebaribarene ohukanna kopolo wihina aavenyihe anookwa, omariha oredda watewene ni wagujhula amwiddani ehu aatene. — 1 João 4:4.

14. Ethu baani nnahowelihu opendda?

¹⁴ Wafwanyiwa woova, openddege dhithu Yehova anafuniye werana osogolo. Wubuwele makalelo nnaakalihu Saddana agujhuliwa, athu abure yahikalawo, mbwenye mwilaboni yavati yakalamo athu apamave baahi, teto nakala oologomana. Yowoniha dhaala nonilihu vamusonkanoni yaka ya 2014, yahoniha makalelo oopendda wodhela ejhehedhelo yehu. Emudhi dhaala yubuwela makalelo enakale egumi mparayizu. Aliwa yahubuwela makalelo madhu enafwanyeya va 2 Timóteo 3:1-5 yaakaliwa oohiyana wihina yoonihe makalelo enakale egumi yehu mwilaboni exa: “Nahuna, onone wihina mwilaboni exa, onaakale mudhidhi wohagalasa vanlubale wahinakalegewo. Mwaha athu enerege odhivelana mmodha ni mukwaye, enerege odhivela dhoviteya dhomuzimuni, amanddile, owiyeviha, enerege omuthithimiha Mulugu, enerege wawiwelela makolo ewa, ootamalela, oororomeleya, enerege othabwa wadhivela amudhiwa, enere okala owiwananeyana, enerege wawoga opama akwiwa, oopwaseya, owihiha, enerege odhiveliwa opama, oororomeleya, owiwelela, enakannege mubuwelo wowiyeviha, enerege omudhivela Mulugu ohiya dhohagalasa, enakanne efunelo yomulabela Mulugu; athu yaala owaddamele.” We onothapanya namudhawo obe ni addibila wodhela makalelo enakale egumi elabo exa?

15. Ethu baani yamukavihere Taniya ogonjhiha woova waye?

¹⁵ Murogola dhaala anakala elabo yoMasedoniya ooNorti anithaniwa Taniya, ahigonjhiha woova waye wodhela opendda mareeliho anafuniye wawakela osogolo. Makolo aye kiyafuna wi oliye amuhudhere Bibiliya, bumwahaya yahithabwa omwidda. Oliye onowoga egi: “Dhithu miyo gathabwimi woova dhahipadduwa. Kadda labo gaadhowimi woona mutugumano, gaweruwaga amama yogivadesa. Makolo aaga yahigithusa wihina yere ogipa gahere githoma okala Namoona a Yehova.” Omakuthulo, makolo aye omwigara vaade. Oliye  erile ddi? Taniya anowogave egi: “Miyo gaapwasendhe wubuwela makalelo gaakalimi oohagalala ni mukalakala gahathome okala oororomeleya. Teto gahubuwela makalelo Yehova aagirelihiye mwilaboni exa naarive ngayelele ethu-sithu ovanene ni nimakalelo nnafunihu odduwala dhithu dhatedhene dhabure dhinipadduwele.” Ofiyedha vano, Taniya anodhowave akalaga oororomeleya. Nnikavihero na Yehova Taniya ohufwanya mburo wokalawo. Peeno, Taniya ohuteliwa ni ddibila oororomeleya ni eli oohagalalene yaparaga mabasa a mudhidhi wamutene.

OLIBIHE NROROMELO NAWO NI YEHOVA OVANENE

16. Ethu baani enaanikavihere okala ooliba murima, madhu enafwanyeya Lucas 21:26-28 yabajha wakwanela?

¹⁶ Mudhidhi wa ohoseya winlubale, athu “enerege okomowavo mwaha woova”. Mbwenye nlogo na Mulugu nnakale txithi ni kinnoovege ethu. (Omwileri Lukaji 21:26-28.) Mwahaya bwaddi kannoovege ethu? Mwaha wihina iyo nnere ohudhera omuroromela Yehova. Taniya, asorihiwe mundduli, anowoga wihina dhithu dhipadduwile mwigumini mwaaye dhimukavihere wagonjhiha makathamiho aye oorusa. Oliye anowoga egi: “Miyo gihudhera wihina kawo makathamiho enamurusa Yehova onikavihera obe onireliha. Malabo mamodha podi okalaga ninga athu amodhaya binasugwera dhithudha, mbwenye ebaribariya sowihina Yehova ohukanna kopolo wapitha aliwa. Teto naarive makathamiho ethabwe orusa, enere omala.”

17. Yolebela ya yaka ya 2024 enanikavihera aavi? (Osugwe fotu yavakapani.)

¹⁷ Peeno dhihikalawo dhithu dhowinjhiva dhanithukulele woova. Mbwenye ndala ninga Davidi, iyo kannafuna wi woova onigonjhihe. Yolebela ya yaka ya 2024, nlobelo Davidi eriliyena egi: ‘Gabajha woova, ginuroromelani nyu.’ (Sal. 56:3) Livuru dhaala nnamutapulela Bibiliya nnotapulela versu ela mwamakalelo ala: Davidi “kubuwela wodhela dhithu dhamuthukulela woova newene kawubuwela makathamiho aye, ohiya eyo oliye amuroromela Ole aamobole.” Mweri dhinadha osogolo, wubuwelege yolebela ela ya yaka, thabwathabwa wafwanyiwa makathamiho enuthukulela woova. Opathege mudhidhi wihina wubuwele dhithu Yehova uwereliye kale, aneriyena ovanene ni anafuniye werana osogolo. Vano ndala ninga Davidi ni weya onere owoga wegi: ‘Gabajha woova, ginuroromelani nyu.’ — Sal. 56:4.