1. ¿Nda̱chun yíʼvíyó sava yichi̱?

 NDIʼIVAYÓ yíʼví sava yichi̱. Biblia sánáʼa̱ña miíyó ña̱ kǒo xíniñúʼu yi̱ʼvíyó na̱ xa̱a̱ ni̱xi̱ʼi̱, na̱ ta̱chí ndi̱va̱ʼa á ña̱ kivi kundoʼoyó chí nu̱únínu. Soo, tiempo vitin xítoyó ku̱a̱ʼání ña̱ʼa ña̱ sáyi̱ʼvíní miíyó, tá kúú guerra, kue̱ʼe̱, xíʼin nu̱ú xáʼní-táʼan na̱ yiví (Luc. 21:11). Sanatu yíʼvíyó xíniyó na̱ chíñu, na̱ veʼeyó á inkaka na̱ yiví na̱ kǒo xíín taxi ña̱ ndasakáʼnuyó Ndióxi̱. Savatuna ndákanixi̱nína ña̱ kǒo kivi ya̱ʼana nu̱ú iin tu̱ndóʼo ña̱ ndóʼona tiempo vitin á ña̱ kixi nu̱úna chí nu̱únínu.

2. ¿Ndáaña ku̱u tá ni̱xa̱a̱ ta̱ David ñuu Gat?

² Ná ka̱ʼa̱nyó xa̱ʼa̱ iin ta̱a ta̱ ni̱yi̱ʼví ni xi̱ndasakáʼnura Ndióxi̱. Ta̱yóʼo xi̱kuu ta̱ David, tá xi̱kuni̱ ta̱ rey Saúl kaʼníra ta̱ David ta̱yóʼo xi̱nura ku̱a̱ʼa̱nra chí ñuu filistea ña̱ naní Gat. Soo tá ndíkaa̱ ta̱ David ñuu kán ki̱xáʼa yíʼvíníra saáchi ni̱ka̱ʼa̱nna xíʼin ta̱ Akís ta̱ xi̱kuu rey ña̱ Gat ña̱ ku̱a̱ʼání na̱ filisteo xa̱ʼní ta̱ David (1 Sam. 21:​10-12). Ta ni̱ndi̱ʼi̱ní-inira saáchi nda̱kanixi̱níra ña̱ ixandi̱va̱ʼa ta̱ rey kán xíʼinra. Ña̱kán, ¿ndáaña chi̱ndeétáʼan xíʼin ta̱ David ña̱ kǒo yi̱ʼvíkara?

3. Táki̱ʼva káchi Salmo 56:​1-3, 11, ¿ndáaña chi̱ndeétáʼan xíʼin ta̱ David ña̱ kǒo yi̱ʼvíkara?

³ Nu̱ú Salmo 56 ni̱ka̱ʼa̱n ta̱ David ndáaña ndo̱ʼora tá ni̱xa̱a̱ra ñuu Gat, nu̱ú Salmo kán ni̱ka̱ʼa̱nra nda̱chun ni̱yi̱ʼvíra ta saátu  ni̱ka̱ʼa̱nra ña̱ chi̱ndeétáʼan xíʼinra ña̱ kǒo yi̱ʼvíkara xi̱kuu ña̱ xi̱ndaaní-inira Jehová (kaʼvi Salmo 56:​1-3, a 11). b Soo, kǒo níxaʼnívínara xa̱ʼa̱ ña̱ nda̱kaxinra ke̱ʼéra. Jehová chi̱ndeétáʼan xíʼinra tasaá ke̱ʼéra iin ña̱ʼa ña̱ sana ndákanda̱-iniyó xíʼin, ki̱xáʼá kéʼéra nda̱a̱ táki̱ʼva kéʼé iin ta̱ sána ña̱ va̱ʼa sandáʼvirana. Tá xi̱ni ta̱ Akís ña̱ sána ta̱ David kǒo ní ixandi̱va̱ʼara xíʼinra, xa̱ʼa̱ ña̱yóʼo ni̱ka̱ku ta̱ David ta xi̱nura ku̱a̱ʼa̱nra (1 Sam. 21:​13–22:1).

4. ¿Ndáaña keʼéyó ña̱ va̱ʼa kandíxakayó Jehová? Ka̱ʼa̱n xa̱ʼa̱ iin ejemplo.

⁴ Ña̱ chindeétáʼan xíʼinyó ña̱ kǒo yi̱ʼvíyó kúú ña̱ kandíxaníyó Jehová. Soo tá xa̱a̱ yíʼvíyó, ¿ndáaña keʼéyó ña̱ va̱ʼa kandíxakayó Jehová? Ná ka̱ʼa̱nyó xa̱ʼa̱ iin ejemplo. Tá ná ka̱ʼa̱n na̱ doctor xíʼinyó ña̱ kúúmiíyó iin kue̱ʼe̱, sana kixáʼa yi̱ʼvíyó, soo saá kíxáʼá ndákanixi̱níyó ña̱ kǒo xíniñúʼu yi̱ʼvíviyó, chi ta̱ doctor ta̱ íxatátán miíyó xíni̱nívara. Sana tá ya̱chi̱ xa̱a̱ chi̱ndeétáʼanra xíʼin ku̱a̱ʼání na̱ yiví na̱ xi̱ndoʼo kue̱ʼe̱ táʼan ña̱ ndóʼo miíyó, ña̱kán viíní xíniso̱ʼora ña̱ káʼa̱nyó xíʼinra. Ta kíʼinyó kuenta ña̱ ndixa ndíʼi̱-inira xa̱ʼa̱yó ta káʼa̱nra xíʼinyó ña̱ taxira ta̱tán ña̱ chindeétáʼan xíʼinyó ta ña̱yóʼo xa̱a̱ va̱ʼaní chíndeétáʼanña xíʼin inka na̱ yiví. Ki̱ʼva saá íyo ña̱ kándíxayó Jehová, va̱ʼaníka kandíxayóra tá ná ndakanixi̱níyó xa̱ʼa̱ ña̱ ke̱ʼéra tá ya̱chi̱, ña̱ kéʼéra tiempo vitin ta saátu ña̱ keʼéra chí nu̱únínu. Ña̱yóʼo kúú ña̱ ni̱ka̱ʼa̱n ta̱ David nu̱ú Salmo 56. Nani káʼa̱nyó xa̱ʼa̱ sava versículo ña̱ va̱xi nu̱ú capítulo yóʼo, ná ndakanixi̱níyó ndáaña kivi keʼéyó ña̱ va̱ʼa kandíxakayó Jehová tasaá kǒo yi̱ʼvíyó.

¿NDÁAÑA KE̱ʼÉ JEHOVÁ TÁ YA̱CHI̱?

5. ¿Ndáaña nda̱kanixi̱ní ta̱ David xa̱ʼa̱ tasaá kǒo níyi̱ʼvíkara? (Salmo 56:​12, 13).

⁵ Ni xi̱ndikaa̱ ta̱ David nu̱ú tu̱ndóʼo, soo ña̱ nda̱kanixi̱níra xa̱ʼa̱ kúú ña̱ va̱ʼa ña̱ xa̱a̱ ke̱ʼé Jehová tá ya̱chi̱ (kaʼvi Salmo 56:​12, 13). c Ku̱a̱ʼání yichi̱ nda̱kanixi̱ní ta̱ David xa̱ʼa̱ ña̱  ke̱ʼé Jehová, tá kúú xi̱ndakanixi̱níra xa̱ʼa̱ ña̱ i̱xava̱ʼa Jehová tasaá xi̱ndakaʼánra ña̱ íyoníva ndee̱ Jehová ta kúʼvi̱ní-inira xínira na̱ yiví (Sal. 65:​6-9). Saátu xi̱ndakanixi̱níra xa̱ʼa̱ ña̱ ke̱ʼé Jehová xa̱ʼa̱ inkana (Sal. 31:19; 37:​25, 26). Soo, ta̱ David ta̱vára tiempo ña̱ nda̱kanixi̱níra xa̱ʼa̱ ña̱ ke̱ʼé Jehová xa̱ʼa̱ miíra. Nda̱a̱ tá loʼoví ta̱ David va̱ʼaní xi̱ndaa Jehová ta̱yóʼo (Sal. 22:​9, 10). Ña̱yóʼo chi̱ndeétáʼan xíʼin ta̱ David ña̱ kandíxaníkara Jehová xíʼin ndiʼi níma̱ra.

6. Tá xa̱a̱ yíʼvíyó ¿ndáaña chindeétáʼan xíʼinyó ña̱ kandíxakayó Jehová?

⁶ Tá kíxáʼá yíʼvíún, ndakanixi̱ní ndáaña xa̱a̱ ke̱ʼé Jehová tá ya̱chi̱, saátu ndakanixi̱ní xa̱ʼa̱ ña̱ʼa ña̱ i̱xava̱ʼara. Tá kúú tá xítoyó ña̱ viíní ndáa Jehová saa válí xíʼin yita ni kǒo ndásakáʼnuñara, saá va̱ʼaníka kándíxayó ña̱ kundaara miíyó (Mat. 6:​25-32). Saátu ndakanixi̱ní xa̱ʼa̱ ña̱ kéʼé Jehová xa̱ʼa̱ na̱ ndásakáʼnu miíra. Sana kivi kaʼviún xa̱ʼa̱ na̱ xi̱ndasakáʼnu Jehová tiempo tá ya̱chi̱ á na̱ ndásakáʼnu miíra tiempo vitin. d Saátu ndakanixi̱ní ndáa ki̱ʼva xa̱a̱ ndáa Jehová yóʼó, ndáa ki̱ʼva chi̱ndeétáʼanra xíʼún ña̱ ku̱nda̱a̱-iniún xa̱ʼa̱ ña̱ nda̱a̱ (Juan 6:44). ¿Ndáa ki̱ʼva xa̱a̱ ndákuiinra oración ña̱ káʼún xíʼinra? (1 Juan 5:14). ¿Ndáaña va̱ʼa ndákiʼún xa̱ʼa̱ ña̱ ta̱xira se̱ʼera ña̱ ni̱xi̱ʼi̱ra xa̱ʼún? (Efes. 1:7; Heb. 4:​14-16).

7. ¿Ndáa ki̱ʼva chi̱ndeétáʼan ña̱ ndo̱ʼo ta̱ profeta Daniel xíʼin ñá Vanessa?

⁷ Iin ñá hermana ñá naní Vanessa e ñá íyo ñuu Haití ni̱yi̱ʼvíníñá tá ni̱ya̱ʼañá nu̱ú tu̱ndóʼo. Iin ta̱a ta̱ ni̱xi̱yo ñuu nu̱ú íyoñá, ndiʼi ki̱vi̱ xi̱chindaʼára mensaje nu̱úñá ta xi̱kaʼa̱nra xíʼinñá xíʼin teléfono, xi̱ ixandúxaníra xíʼinñá ña̱ kakañá xíʼinra. Káxíní ni̱ka̱ʼa̱nñá xíʼinra ña̱ kǒo kakavíñá xíʼinra, soo saá ki̱xáʼa ndeéní sáa̱ra ta nda̱a̱ ni̱ka̱ʼa̱nra ña̱ keʼéra ña̱ va̱ása va̱ʼa xíʼinñá. ¿Ndáaña chi̱ndeétáʼan xíʼin ñá Vanessa ña̱ kǒo níyi̱ʼvíkañá? Xi̱kiʼinníñá kuenta nu̱ú xi̱xikañá ta iin ta̱ anciano chi̱ndeétáʼan xíʼinñá ña̱ ka̱ʼa̱nñá xíʼin na̱ chíñu xa̱ʼa̱ ña̱ ndóʼoñá. Soo, saátu nda̱kaʼánñá ndáa ki̱ʼva xi̱ndaa Jehová na̱ xi̱ndasakáʼnu miíra tá ya̱chi̱. Ñáyóʼo káchiñá: “Xa̱ʼa̱ ta̱ profeta Daniel nda̱kanixi̱níi̱, chi nina ña̱ va̱ʼa xi̱keʼéra soo ni saá chi̱kaa̱nara nu̱ú ñúʼu tí león, soo mií Jehová sa̱kǎkurara. Ni̱ka̱ʼi̱n xíʼin Jehová ña̱ chika̱i̱ ndee̱ ña̱ kundai̱ miíi̱ ta ni̱ka̱ʼa̱n ndáʼvíi̱ xíʼinra ña̱ ná chindeétáʼanra xíʼi̱n. Tándi̱ʼi ke̱ʼíi̱ ña̱yóʼo kǒo níyi̱ʼvíkai̱” (Dan. 6:​12-22).

¿NDÁAÑA KÉ’É JEHOVÁ TIEMPO VITIN?

8. ¿Ndáaña xi̱kandíxaní ta̱ David? (Salmo 56:8).

⁸ Sana kivi kaʼnína ta̱ David tá ni̱xi̱yora ñuu Gat, soo ña̱ chi̱ndeétáʼan xíʼinra kúú ña̱ nda̱kanixi̱níra xa̱ʼa̱ ña̱ kéʼé Jehová ña̱ va̱ʼa chindeétáʼanra xíʼinra mií tiempo kán. Ki̱ʼinra kuenta ña̱ mií Jehová xi̱ndaarara ta saátu xi̱kunda̱a̱-inira xíʼin ña̱ xi̱ndoʼora (kaʼvi Salmo 56:8). f Ta saátu ni̱xi̱yo na̱ migora na̱ va̱ʼaní xi̱chindeétáʼan xíʼinra na̱ nda̱kúní-ini, tá kúú ta̱ Jonatán xíʼin ta̱ su̱tu̱ káʼnu Ahimélec (1 Sam. 20:​41, 42; 21:​6, 8, 9). Ta̱ rey Saúl kǒo níkuchiñuvíra kaʼníra ta̱ David saáchi Jehová xi̱ndaarara.

9. ¿Ndáaña kíʼin Jehová kuenta xíʼin?

⁹ Tá yáʼún nu̱ú iin tu̱ndóʼo ña̱ yo̱ʼvi̱ní ta xa̱ʼa̱ ña̱kán yíʼvíníún, ndakaʼán chi Jehová kúnda̱a̱-inira xíʼin ña̱ ndóʼún. Tá kúú tá xi̱kuu na̱ ñuu Israel esclavo na̱ ñuu Egipto, xi̱kunda̱a̱va-ini Jehová ña̱ xi̱xoʼvi̱nína ta xi̱kusuchí-inina (Éx. 3:7). Nu̱ú iin yaa ña̱ xi̱ta ta̱ David ni̱ka̱ʼa̱nra xa̱ʼa̱ Jehová ña̱ xi̱kiʼinra kuenta xíʼin ndiʼi ña̱ xi̱xoʼvi̱ra ta saátu xíʼin ña̱ xi̱sakúsuchí-inira (Sal.  31:7). Sava yichi̱ xi̱xoʼvi̱ní na̱ ñuu Israel xa̱ʼa̱ ña̱ kǒo níxi̱kandíxana ña̱ xi̱kaʼa̱n Jehová xíʼinna ta nda̱a̱ miíra xi̱kusuchí-ini xíʼin ña̱ xi̱ndoʼona (Is. 63:9). Va̱ʼaní kúniyó ña̱ kúnda̱a̱-iniyó ña̱yóʼo saáchi tá yíʼvíyó Jehová kúnda̱a̱-inira xíʼin ña̱ ndóʼoyó ta kúni̱ra chindeétáʼanra xíʼinyó ña̱ va̱ása yi̱ʼvíkayó.

10. ¿Nda̱chun va̱ʼa xíni̱ún ña̱ ndíʼi̱-ini Jehová xa̱ʼún ta ndiʼi tiempo íyora ña̱ chindeétáʼanra xíʼún?

¹⁰ Tá yáʼayó nu̱ú iin tu̱ndóʼo ña̱ yo̱ʼvi̱ní ta xa̱ʼa̱ ña̱yóʼo yíʼvíníyó, sana íxayo̱ʼvi̱níña xíʼinyó kotoyó ndáa ki̱ʼva chíndeétáʼan Jehová xíʼinyó. Ña̱kán, ¿ndáaña xíniñúʼu keʼéyó? Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ va̱ʼa kunda̱a̱-iniyó ndáaña kéʼéra xa̱ʼa̱yó (2 Rey. 6:​15-17). Tándi̱ʼi, ná ndakanixi̱níyó xa̱ʼa̱ ña̱yóʼo: Discurso ña̱ xi̱niso̱ʼoyó reunión á iin comentario ña̱ ta̱xi iin na̱ hermano, ¿á chi̱kaa̱ña ndee̱ xíʼinyó? ¿Á íyo iin yaa, video á tutu ña̱ tává na̱ ñuu Ndióxi̱ ña̱ chi̱kaa̱ ndee̱ xíʼinyó? ¿Á iin na̱ hermano ka̱ʼvina iin texto nu̱úyó ña̱ va̱ʼaní chi̱ndeétáʼan xíʼinyó? Sava yichi̱ kivi nandósó-iniyó ña̱ iin regalo Jehová kúú ña̱ chíndeétáʼan iin na̱ hermano xíʼinyó ta saátu iin regalo ña̱ káʼnuní kúú ndiʼi ña̱ táxira ndaʼa̱yó ti̱xin ñuura ña̱ va̱ʼa sakúaʼakayó xa̱ʼa̱ra (Is. 65:13; Mar. 10:​29, 30). Ndiʼi ña̱ va̱ʼa ña̱ táxi Jehová ndaʼa̱yó náʼa̱ña ña̱ ndíʼi̱-inira xa̱ʼa̱yó, xa̱ʼa̱ ña̱kán xíniñúʼu kandíxaníyóra (Is. 49:​14-16).

11. ¿Ndáaña chi̱ndeétáʼan xíʼin ñá Aida ña̱ kǒo níyi̱ʼvíkañá?

¹¹ Iin ñá hermana ñá ñuu Senegal ñá naní Aida ni̱ya̱ʼañá nu̱ú iin tu̱ndóʼo ña̱ yo̱ʼvi̱ní ta ki̱ʼi̱nñá kuenta ndáa ki̱ʼva chi̱ndeétáʼan Jehová xíʼinñá. Na̱ yiváñá xi̱kuni̱na ña̱ kachíñuñá ña̱ va̱ʼa koo xu̱ʼúnñá ña̱ kuniñúʼuñá xíʼinna saáchi ñáyóʼo xi̱kuu se̱ʼena ñá nu̱ú, soo ñáyóʼo ndu̱kúñá iin chiñu nu̱ú loʼo tiempo xi̱kachíñuñá saáchi ki̱xáʼañá kúúñá precursora, ña̱kán loʼova xu̱ʼún xi̱kiʼinñá, xa̱ʼa̱ ña̱yóʼo ni̱sa̱a̱ní na̱ veʼeñá ta va̱ása va̱ʼa níxi̱kaʼa̱nna xa̱ʼa̱ñá. Ñá Aida káʼa̱nñá ndáaña xi̱ndoʼoñá: “Va̱ása va̱ʼa níxi̱kunii̱ saáchi kǒo níkivi chindeétáʼi̱n xíʼin na̱ yivái̱ ta ndiʼina xi̱kaʼa̱n ña̱ va̱ása va̱ʼa xa̱ʼíi̱, chi̱kai̱ ku̱a̱chi Jehová ña̱ ta̱xira ku̱u ndiʼi ña̱yóʼo ta kǒo níchindeétáʼanra xíʼi̱n”. Soo, iin ki̱vi̱ xi̱niso̱ʼoñá iin discurso ña̱ chi̱ndeétáʼanní xíʼinñá. Ñáyóʼo káchiñá: “Ta̱ hermano kán sa̱ndákaʼánra ndi̱ʼi̱ ña̱ kúnda̱a̱va-ini Jehová xíʼin ndiʼi ña̱ ndóʼoyó á ña̱ sáxo̱ʼvi̱ miíyó. Ta saátu na̱ anciano xíʼin na̱  hermano ni̱ka̱ʼa̱nna xíʼi̱n ña̱ kúʼvi̱va-ini Jehová xínira yi̱ʼi̱ tasaá ki̱xáʼa kúsi̱í-inii̱. Ta saátu ki̱xáʼíi̱ kéʼíi̱ ku̱a̱ʼáka oración nu̱úra. Tá ki̱ʼi̱n kuenta ña̱ xi̱ndakuiinra oración ña̱ xi̱keʼíi̱ va̱ʼaní xi̱kunii̱”. Tá ni̱ya̱ʼa tiempo nda̱ni̱ʼíñá iin chiñu ña̱ chi̱ndeétáʼan xíʼinñá ña̱ kivi kooñá precursora ta saátu ña̱ taxiñá ña̱ xíniñúʼu na̱ veʼeñá xíʼin ña̱ xíniñúʼu inkana. Ñáyóʼo káchiñá: “Vitin sa̱kúaʼi̱ ña̱ xíniñúʼu kandíxaníi̱ Jehová saáchi tá káʼi̱n xíʼinra chíndeétáʼanra xíʼi̱n ña̱ kǒo yi̱ʼvíkai̱”.

¿NDÁAÑA KE’É JEHOVÁ CHÍ NU̱ÚNÍNU?

12. Táki̱ʼva káchi Salmo 56:​9, ¿ndáaña xi̱kandíxaní ta̱ David?

¹² (Kaʼvi Salmo 56:9). g Versículo yóʼo káʼa̱nña xa̱ʼa̱ inka ña̱ ke̱ʼé ta̱ David ña̱ chi̱ndeétáʼan xíʼinra tasaá kǒo níyi̱ʼvíkara, nda̱kanixi̱níra xa̱ʼa̱ ña̱ keʼé Jehová xa̱ʼa̱ra chí nu̱únínu. Xi̱kunda̱a̱va-inira ña̱ kǒo taxiví Jehová ña̱ kuvira, saáchi mií Jehová ni̱ka̱ʼa̱n xíʼinra ña̱ koora rey ñuu Israel (1 Sam. 16:​1, 13). Ta saátu xi̱kandíxaníra ña̱ sáxi̱nu Jehová ña̱ ni̱ka̱ʼa̱nra.

13. ¿Ndáaña keʼé Jehová chí nu̱únínu?

¹³ Kǒo káʼa̱nví Jehová xíʼinyó ña̱ sáku̱taʼara ndiʼi tu̱ndóʼo ña̱ kúúmiíyó tiempo vitin, h soo ni̱ka̱ʼa̱nvara ña̱ chí nu̱únínu taxira ñuyǐví xa̱á nu̱ú kundooyó ta kán va̱ása xo̱ʼvi̱kayó (Is. 25:​7-9). Kúúmiíra ndee̱ ña̱ sandátakura na̱ ni̱xi̱ʼi̱, ña̱ sandáʼara miíyó ta saátu ña̱ sándíʼi-xa̱ʼa̱ra ndiʼi na̱ yiví na̱ kéʼé ña̱ va̱ása va̱ʼa (1 Juan 4:4).

14. ¿Ndáaña xíniñúʼu ndakanixi̱níyó xa̱ʼa̱?

¹⁴ Tá yíʼvíún, ndakanixi̱ní xa̱ʼa̱ ña̱ keʼé Jehová chí nu̱únínu. Ndakanixi̱ní ndáa ki̱ʼva kooyó tá ná va̱ása kooka ta̱ Ndi̱va̱ʼa, tá ná va̱ása kooka na̱ yiví na̱ kéʼé ña̱ kini, ta nina na̱ yiví na̱ kéʼé ña̱ va̱ʼa koo, ta kǒoka ku̱a̱chi kúúmiíyó. Nu̱ú asamblea regional ña̱ ni̱xi̱yo ku̱i̱ya̱ 2014 ni̱ya̱ʼa iin demostración ña̱ kivi chindeétáʼan xíʼinyó ña̱ ndakanixi̱níyó xa̱ʼa̱ ña̱ ndátuyó koo chí nu̱únínu. Nu̱ú ña̱kán iin ta̱ hermano ni̱ka̱ʼa̱nra xíʼin na̱ veʼera ndáa ki̱ʼva ka̱ʼa̱n 2 Timoteo 3:​1-5 tá iin profecía xa̱ʼa̱ ki̱ʼva ña̱ kooyó paraíso níxi̱yoña, ña̱yóʼo kachiña: “Xíniñúʼu kunda̱a̱-iniún ña̱ nu̱ú ñuyǐví xa̱á kusi̱íní-iniyó saáchi na̱ yiví kuʼvi̱-inina kunitáʼanna, kutóonína sakúaʼana xa̱ʼa̱ Ndióxi̱, vitá koo-inina, va̱ása ni̱nu kunina, kuni̱na sakúaʼana xa̱ʼa̱ Ndióxi̱, na̱ va̱lí kuniso̱ʼona ña̱ ka̱ʼa̱n na̱ yivána, nda̱kú koo-inina ta taxina tíxa̱ʼvi ndaʼa̱ inkana, kuʼvi̱-inina kunina na̱ veʼena, va̱ása ka̱ʼa̱nna tu̱ʼun síkí, ka̱ʼnu̱-inina, kuni̱na keʼéna ña̱ va̱ʼa, va̱ása xi̱kótáʼanna, kutóoníkana keʼéna ña̱ kúni̱ Ndióxi̱ nu̱úka ña̱ kúni̱ miína, xíʼin na̱yóʼo kutáʼún”. ¿Á xa̱a̱ káʼa̱nyó xíʼin na̱ veʼeyó ta saátu xíʼin na̱ hermano ña̱ si̱íní kooyó nu̱ú ñuyǐví xa̱á?

15. ¿Ndáaña chi̱ndeétáʼan xíʼin ñá Tanja ña̱ kǒo yi̱ʼvíkañá?

¹⁵ Ñá Tanja íyoñá chí Macedonia del Norte, ña̱ chíndeétáʼan xíʼinñá ña̱ kǒo yi̱ʼvíñá kúú ña̱ ndákanixi̱níñá xa̱ʼa̱ ña̱ káʼa̱n Jehová keʼéra chí nu̱únínu, ñáyóʼo káʼa̱nñá ña̱ tá ki̱xáʼañá káʼviñá Biblia na̱ yiváñá ni̱sa̱a̱nína xíʼinñá, káchiñá: “Tá xi̱ndikói̱ ña̱ xi̱xaʼi̱n reunión siʼíi̱ xi̱kaniñá yi̱ʼi̱. Siʼíi̱ xíʼin yivái̱ ni̱ka̱ʼa̱nna xíʼi̱n ña̱ kaʼnína yi̱ʼi̱ tá ná xa̱i̱ koi̱ testigo Jehová”. Tándi̱ʼi ta̱xína ñá hermana yóʼo veʼeñá, ¿ndáaña ke̱ʼéñá? Ñá Tanja káchiñá: “Nda̱kanixi̱níi̱ tá nda̱kú íyo inii̱ xíʼin Jehová ndiʼi tiempova kusi̱í-inii̱ ta saátu ni loʼoní ña̱ʼa kúúmií tiempo vitin, nu̱ú ñuyǐví xa̱á ku̱a̱ʼáníva ña̱ va̱ʼa taxi Jehová ndaʼíi̱, ta saátu chindeétáʼanra xíʼi̱n ña̱ nandóso-inii̱ xa̱ʼa̱ ndiʼi ña̱ va̱ása va̱ʼa ndo̱ʼi̱ tiempo vitin”. Ñá Tanja nda̱kú ni̱xi̱yo-iniñá xíʼin Jehová ta nda̱ni̱ʼíñá iin veʼe nu̱ú kooñá. Tiempo vitin ti̱ndaʼa̱ñá xíʼin iin ta̱ hermano ta̱ va̱ʼaní ndásakáʼnu Jehová ta u̱vi̱ saána kúsi̱íní-inina ndásakáʼnunara.

 NÁ KANDÍXANÍYÓ JEHOVÁ TIEMPO VITIN

16. ¿Ndáaña chindeétáʼan xíʼinyó ña̱ ndakú koo iniyó tá ná xi̱nu ña̱ káʼa̱n Lucas 21:​26-28?

¹⁶ Tá ná kundika̱a̱ ña̱ gran tribulación ku̱a̱ʼání na̱ yiví yi̱ʼvína ta xa̱ʼa̱ ña̱kán nda̱a̱ kuvi tóona á kivi yi̱ʼína. Soo, miíyó na̱ ndásakáʼnu Ndióxi̱ va̱ása yi̱ʼvíyó ta ndakúníva koo iniyó (kaʼvi Lucas 21:​26-28). ¿Nda̱chun kǒo yi̱ʼvíyó? Saáchi Jehová kúú ta̱ kándíxayó. Ñá Tanja káʼa̱nñá ña̱ ndiʼi ña̱ʼa ña̱ ndo̱ʼoñá tá ya̱chi̱ chíndeétáʼanña xíʼinñá ña̱ ya̱ʼañá nu̱ú inka tu̱ndóʼo ña̱ ndóʼoñá tiempo vitin, ñáyóʼo káchiñá: “Sa̱kúaʼi̱ ña̱ ni ku̱a̱ʼání tu̱ndóʼo yáʼayó nu̱ú, Jehová chíndeétáʼanvara xíʼinyó ta táxira bendición ndaʼa̱yó. Sava yichi̱ túviyó ña̱ kǒo kúchiñuyó ya̱ʼayó nu̱ú iin tu̱ndóʼo, soo ná ndakaʼányó chi mií Jehová kúú ta̱ táxi ndee̱ ndaʼa̱yó ña̱ kuchiñuyó ya̱ʼayó nu̱úña”.

17. ¿Ndáa ki̱ʼva chindeétáʼan texto ña̱ ku̱i̱ya̱ 2024 xíʼinyó? (Koto na̱ʼná ña̱ va̱xi chí nu̱ú kíxáʼa tutu yóʼo).

¹⁷ Ku̱a̱ʼání ña̱ʼa kúu nu̱ú ñuʼú yóʼo ta yíʼvíní na̱ yiví. Soo, miíyó íyoyó nda̱a̱ táki̱ʼva ni̱xi̱yo ta̱ David ta kǒo táxiyó ña̱ sayíʼvíña miíyó. Nu̱ú texto ña̱ ku̱i̱ya̱ 2024 va̱xi ña̱ ni̱ka̱ʼa̱n ta̱ David xíʼin Jehová: “Tá kíxáʼa yíʼvíi̱ kándíxai̱ yóʼó” (Sal. 56:3). Iin tutu ña̱ káʼa̱n xa̱ʼa̱ Biblia káʼa̱nña xa̱ʼa̱ versículo yóʼo: “Ta̱ David kǒo níndakanixi̱níra xa̱ʼa̱ ña̱ xi̱sayíʼví miíra ni kǒo níndi̱ʼi̱-inira xa̱ʼa̱ tu̱ndóʼo ña̱ xi̱kuumiíra, chi xi̱ndaaní-inira ta̱ kivi sáka̱ku miíra”. Ndakanixi̱níndó xa̱ʼa̱ texto ña̱ ku̱i̱ya̱ vitin, chi ña̱yóʼo kivi chindeétáʼanña xíʼinndó tá yáʼandó nu̱ú iin tu̱ndóʼo ña̱ yo̱ʼvi̱. Ndakanixi̱níndó xa̱ʼa̱ ña̱ ke̱ʼé Jehová tiempo tá ya̱chi̱, ña̱ kéʼéra vitin ta saátu ña̱ keʼéra chí nu̱únínu. Tasaá nda̱a̱ táki̱ʼva ni̱ka̱ʼa̱n ta̱ David, miíndó kivi ka̱ʼa̱nndó: “Ndióxi̱ kúú ta̱ kándíxai̱ va̱ása yíʼvíi̱” (Sal. 56:4).