1. Tae-i ǃaroma da ǀnî ǁaen ai ra ǃao?

 HOA DA ge ra ǃao. Xawe Elobmîs tae ra mîsa da a ǂan ama ga da ge ǁō hâ khoen, demongu tsî hānîǁaeb ǃnâ nî ī xūna ǃao tama. Nēsi da ge “buruburuxa tsî ǃhuriǃhurisa” ǁaegu ǃnâ ûihâ, torogu, ǂkhabadīb tsî ǀaen xa ǀoa hâba. (Luk. 21:11) Khoen tsîna da ge ra ǃao ǃgōsase, ǂhanugu ǂgaeǂgui-aon hîna ra ǁgaiǀādan, ama ǃoabasa ra mâǃoan tamas ka io sida omaris ǁanin tsîna. ǀNîn ge ra ǂâiǂhansen nēsin ra hōǃâ ǃgomsin ǃnân mâǀgaihō tidesa tamas ka io hānîǁaeb di ǃgomsigu ǃnâs tsîna.

2. Davidi mâsiba ǁguiǃā re Gats ǃnâb ge hâ i ǁaeb ǃnâ?

² Davidi tsîn ge gere ǃao. Aiǁgause, Gao-aob Sauli ge ǁîba gere ǃgam ǂgao, ob ge Davida Filisteǁîn ǃās Gats ti ǀon hâsa ǃoa ge ǃkhoe. Gao-aob ge kaise ǃhae ǁaeb ǃnâ ge ǂanǂûi “Davidi ge ǁîb disiǀoadisiga ge ǃgam” ti hâ ams ǃnâ ra ǁnae-amhe ǀgaisa ǃkham-aob a Davi ǃkhaisa. Davidi ge ge “ǃao” tsoatsoa. (1Sam. 21:​10-12) Davidi ge Akisi a tsûtsûbi ǁkhās xa gere ǂâiǂhânsen. Davida mati ǁnā ǃaoba dansa ge hōba ǁkhā i?

3. Psalmdi 56:​1-3, 11 ǃoagub ge Davida ǁîb ǃaoba mati dan?

³ Davidi ge Psalms 56 ǃnâ hâ mîde Gats ǃnâb hâ hîna ge mî. ǁNā Psalmdi ǃnâb ge Davida ra ǁguiǃā tae-i ǃaromab ra ǃaosa. Xawes tsînab ge ra ǁguiǃā tae-i ge ǁîba a huisa îb ǃao ǀû. Davidi ge ǃaob gere ǁaeb ai Jehovab ai ge ǂgomâiǂnui.  (Khomai re Psalmdi 56:​1-3, 11 sa.) ǁÎb ge ǃgâi ǃaromasa ge ūhâ i Jehovab ǃnâ ǂgomǃgâsa. Jehovab huib ǀkhab ge Davida hoaǁae ī tama xū-e ge ǀape, ǁîb ge ǃkhauhâ khoe-i khami ge tanisen tsoatsoa. Akisib ge nēsa ge mû, ob ge gere ǂhapa îb Davida ī. Nēs ge ge ǃaroma ǁkhā i Davidi ǁnā ǃāsa xu ǃnōrase nî īsa.—1Sam. 21:13–22:1.

4. Mati da sida ǂgomǃgâsiba Jehovab ǃnâ a ǀgaiǀgai ǁkhā? ǁGuiǃā re.

⁴ Sida tsîn ge ǃaoba a dan ǁkhā Jehovab ǃnâ ǂgomâiǂnuis ǃnâ-ū. Mati da sida di ǂgomǃgâsiba Jehovab ǃnâ a ǀgaiǀgai ǁkhā, ǃao da ga ǁaeb ai? Sao ra aiǁgausa ǃgaoǃgâ re, ǀae-e du ūhâsa du ga ǁnâu o du ge ǂgurose ǀnîsi ra ǃao. Xawe du ge ǀnîsi ǃnomsase ra tsâ ǀaeǃkhō-aoba du a ǂan amaga. ǁÎb ge ǀnîsi ǂgui khoen hîna ǁkhā ǀaeba ūhâna ge hui. ǀNîsib ge ǃgâise ǃgâ du tsî ra ǁgau sadu tsâsibab amabes ǃnâ ra ǁnâuǃā ǃkhaisa. ǀNîsib ge nau khoena ge hui ǀaeǃkhōǀgaub xa a mîba du ǁkhā. ǁKhā ǀgaub ǃnâ da ge sida ǂgomǃgâsiba Jehovab ǃnâ ra ǀgaiǀgai, ǀnaib ge dī hâ i xūn, nēsib ra dīn tsî hānîǁaeb ǃnâb noxoba nî dība da xūna ǃgaoǃgâs ǃnâ-ū. ǁNāsab ge Davida ge dī. Psalmdi 56 ǃnâ xoasa mîde da ra ǃhoaǃgao khami ǂâiǃgâ re mati du sadu tsîna sadu ǂgomǃgâsib Jehovab ǃnâ du ūhâba ǀgaiǀgai tsî ǃaoba dan ǁkhāsa.

JEHOVABA TAE-E ǀNAI DĪHÂ?

5. ǃAob gere ǁaeb aib ge Davida tae-e gere ǂâiǃgâ? (Psalmdi 56:​12, 13)

⁵ Davidi ûib ge ǁkhōǁkhōsa mâsib ǃnâ hâ i xaweb ge ǁîb di ǂâisa Jehovab ge tae-e ǀnâi dīhâ is xa gere ǂâiǃgâ. (Khomai re Psalmdi 56:​12, 13 sa.) ǁNāti i ǂâiǀgaubab ge Davida ǁîb di ûib hoab ǃnâ ge ūhâ i. Aiǁgauseb ge ǀnî ǁaegu ai Jehovab ge kuru xūn xa gere ǂâiǃgâ. Nēs ge ǁîba gere hōhōǃnâ matikōseb Jehovaba a ǀgaisa tsî khoena kaise a ǀnamsa. (Psa. 65:​6-9) Davidi ge Jehovab ge nau khoena a dība xūn xas tsînab gere ǂâiǃgâ. (Psa. 31:19; 37:​25, 26) Tsîb ge ǃgōsase Jehovab ge ǁîba tae-e dības ai gere ǂâiǃgâ. Jehovab  ge Davida ǂkhâǃnâ tsî gere ǁkhauba ǀgôarob asa xu. (Psa. 22:​9, 10) Amase i ge nēti ī xūn xa ǂâiǃgâsa Davidi ǂgomǃgâsib Jehovab ǃnâb ūhâba ge ǀgaiǀgai!

6. ǃAo da ga, o tae-e nî huida î da Jehovab ai ǂgomaiǂnûi?

⁶ ǃAo tsâsiba du ga hōǃâ o, dîsen re, ‘Jehovaba tae-e ǀnai ge dī?’ ǁÎb kurus xa ǂâiǃgâ re. Aiǁgause “ǃgaoǃgâ” re matikōseb Jehovaba anirodi tsî ǃkhādi tsîna, ǁîb īsib ǃnâ di kuruhe tama tsî ǁîba ǃoaba ǁoa xawe ǁîna ra kōǃgâsa, o matikō ǃnāsaseb sida ra tsâba. Nē xūn xa ǂâiǃgâs ge sida ǂgomǃgâsiba nî ǀgaiǀgai. (Mat. 6:​25-32) Jehovab ge ǁîb di ǃoaba-aona a dība xūn xas tsîna ǂâiǃgâ re. Elobmîs ǃnâ hâ khoe-i hîna ge ǀgaisa ǂgomsa a ǁgau i xa du ge a ǁkhāǁkhāsen ǁkhā. Tamas ka io du ge nētsē Jehovaba ra ǃoaba ǃgâsan ûib xa a khomai ǁkhā. a ǁNās ǂam-ai Jehovab ge ǀnai kōǃgâ du hâ i ǀgaub xa ǂâiǃgâ re. Matib ge huidu ǁîba ǂans ǀkha? (Jhn. 6:44) Matib ge sadu ǀgorede ǃeream? (1Jhn. 5:14) Mati du tsēs hoasa ǁîb ǀnamǀnamsa ǀgôab di ǁguibasa xu ǃgâiba ra ǀama?—Efe. 1:7; Heb. 4:​14-16.

7. Kēbo-aob Danieli aiǁgausa mati Vanessa sa ge hui îs ǃao ǀû?

⁷ Haitis ǃnâ ra hâ ǃgâsas, Vennesa,  b ti ǀon hâs ge ǃaoǃaosa mâsiba gere hōǃâ. ǁÎs ǀkha ǀguiǃās ǃnâ ra hâ aob ge tsēs hoasa ǁîsa sms na gere sîba tsî ǁîb ǀkha soregusa gere ǁgari. Vennesas ge ǃgāsase ge mîba bi ǂgao tamas hâ ǃkhaisa. Xaweb ge aoba gere ǃaoǃaosi tsî tsûtsûsib nî ti gere mî. “Kaise ta ge gere ǃao” tis ge ra mî. Vennesasa tae-e ge dī? ǁKhās a-i hoa-es ge ge dī îs ǁkhaubasen ǁkhā. ǀHaohâb ǃûi-aob ge ge huisi îs ǀapaǃnamga mîba. Xawes ge Jehovab ge mati ǁîb ǃoaba-aona ǃkharu ge ǁaeb ǃnâ gere ǁkhauba ǀgaub ai ǂâisa ge ǂnui. “ǂGuro khoe-i ǂâis ǃnâ ta ge ūhâ ī-i ge kēbo-aob Daniela” tis ge Vennesasa ra mî. “ǁÎb ge ǃâ hâ xamgu ǁaegub ǃnâ ge aoǂgāhe, xū-eb dī tama hîna tsîb ge Jehovaba xamgu di amǃnâde ge ǂgānam. ǁNā-amaga ta ge Jehovaba ge ǂgān, îb ǁnā khoeba hui tida xa ǂâiǀnûsa tsî tita tsîna hui dī ǁkhā ta a xū-i ge ǀkhai i amaga, ǁnās khaoǃgâ ta ge ge ǃao ǀû.”—Dan. 6:​12-22.

JEHOVABA NĒSI TAE-E RA DĪ?

8. Davida tae-i ǂgomǃgâsiba ge ūhâ i? (Psalmdi 56:8)

⁸ ǁKhōǁkhōsa mâsib ǃnâb ge Davida ge hâ i Gats ǃnâb ge hâ io. ǁÎb ǂâisab ge ǃao kaibi ra xūn ai ge ǂnui tama hâ i. Xaweb ge Jehovab ǁnā ǁaeb ai ra dība bi xūn ai ǁîb ǂâisa gere ǂnûi. Davidi ge gere hōǃâ Jehovab daoǁgau, ǁkhauba tsî ǁîb tsâsiga gere ǁnauǃā ǃkhaisa. (Khomai re Psalmdi 56:8 sa.) Davidi tsîn ge Jonatanni tsî ǀGapi pristeri Ahimelexi tsîna ǀhōsase ge ūhâ, ǂkhâǃnâ tsî a huibi kha. (1Sam. 20:​41, 42; 21:​6, 8, 9) Gao-aob Sauli xab gere ǃgamhe ǂgao xaweb ge ge ǃkhoenî. ǁÎb ge ǂgomǃgâsiba ge ūhâ i Jehovab ge ǂan isa tae-i ǁîb ǀkha gere īsa tsî matib gere tsâsa.

9. Jehovaba tae-e hoa da xa ra ǃgaoǃgâ?

⁹ ǃAo kai du ra ǃgomsi-e du ga hōǃâ o ǂâis ǃnâ ūhâ re. Jehovab ge sadu ra hōǃâ xū-e ra ǃgaoǃgâ ǁnā i mati sado ra tsâ kaisa. Aiǁgauseb ge Jehovaba Israelǁaes ge Egipteb ǃnâ gere hōǃâ xūna, mûs ǀguisa  ge hî tama hâ i. Xawe ǁîn gere ‘hōǃâ tsûb’ tsîna gere ǃgaoǃgâ. (Eks. 3:7) Davidi ge ge ǁnae Jehovab ge ǁîb ‘tsûb’ tsî ǃgomsin tsîna gere mûsa. (Psa. 31:7) ǁÎb “ǂōǂōsigu hoagu ǃnâb ge ǁîba ge ǂōǂōhe.” ǁÎn di gâre mîǁguigu xa ǃaromahe hâses tsîna. (Jes. 63:9) Jehovab ge ra ǁnâuǃā mati du ra tsâsa ǃao du ga o, mûǂûib ge ra hui dusa î du sadu ǃaoba dan.

10. Tae-e ra ǂgomǃgâ kai du Jehovab ra tsâba tsîb nî hui dusa î du sa du ǃgomsiga tani?

¹⁰ ǃAoǃaosa ǃgomsi-e du ga hōǃâ o du ge ǀnîsi mû tide Jehovab mati ra hui dusa. Tae-e du a dī ǁkhā? ǂGan re îb hui du, i du ǁîb ǂkhâǃnâsa mû. (2Gao. 6:​15-17) ǁNāpaxu dîsen re: ǀHaohâb tawa ra māhe ǃhoas tamas ka io ǃereamde ǂkhâǃnâdu tsâ hâ? ǂKhini-i, vidio-i tamas ka io ǁnae-amdi xa du ǂkhâǃnâ-e tsâ hâ? Khoe-e ǂkhâǃnâ ra xoasa sadu ǀkha ǀgoragu tsâ hâ? ǀNî ǁaega da ge sida ǃgâsan tsî Elobmîsa xu da ra hō huiba a ǀuru ǁkhā. Xawe ǁnān ge ǂoaǂamsa ǀkhaen Jehovaba xu ra hāna. (Jes. 65:13; Mrk. 10:​29, 30) ǁNān ge ra ǁgau ǁîb sadu ǀkha ǁae hâsa. (Jes. 49:​14-16) ǁÎb sida xa ǂgomǃgâhesa anuhâs tsîna i ge ra ǁgau.

11. Tae-e Aidasa ge hui is ǁîs ǃaoba dan?

¹¹ Aidas hîna Senegali ǃnâ ra hâs ge ge ǃgaoǃgâ, matib Jehovaba ǃgom ǁaegu ǃnâ gere ǂkhâǃnâsi ǀgausa. ǂGuro ǀgôas ge i ǃkhais ǃaroma ra ge ǁîs ǁgûra gere ǃâubasen îs ǃnāsa mari-e hoan ǃaroma kuru. Aimâba-ao kais nîs ǃaromas ge ǁîs ûiba ǀguiǃgupu kais khaoǃgâs ge ǀoro mari-e ge ūhâ i. ǁÎs omaris ge kaise ǁîs ǀkha ge ǁâixa hâ i tsî gere mîǁgaiǁgaisi. “Kaise ta ge gere ǃao ti ǁgû ra ta hui ǁoa amaga tsîn hoa khoena nî ǂhara te ǃkhaisa” tis ge ra mî. “Jehovab tsîna ta ge gere ǀhapimā, xūn ge a ǁgaiǂoa ǀgaub xa.” Xawes ge ǀhaos ai ǃhoasa ge ǁnâu, “ǃhoa-aob ge ge hōhōǃnâ da. Mâ-i ǀgui i ga sida ǂgaob di tsûaǂgao xaweb ge Jehovaba hoana a ǂan. ǁAeb ǀkha da ge ǀhaohâb ǃûi-aogu tsî nau ǃgâsan huib ǀkha. Jehovab ǀnammi xa ge hōhō ǃnâ-e. Nēsisa ta ge ǃnāsa  ǂgomǃgâsiba ūhâ huiteb nîsa. Tsî ta ge ǃnomsase ra tsâ ti ǀgoredi ra ǃereamhe ǀgausa ta ga mûo.” ǁAeba ǃkharu tsîs ge Aidasa sîsen-e ge hō, aimâba-aose aiǃgû tsî ǁîs ǁgûra tsî naun tsîna huis ǀkha. “ǁKhāǁkhāsen ta ge ge i ta Jehovab ǃnâ ǂgomǃgâsiba ūhâ” tis ge ra mî. “Nēsisa i ge ǀgore taras khaoǃgâ ti ǃaoba ra bē.”

JEHOVABA TAE-E HĀNÎǁAEB ǃNÂ NÎ DĪ?

12. Psalmdi 56:9 ǃoagub ge Davida tae-i ǃnâ ǂgomǃgâsiba ūhâ i?

¹² Khomai re Psalmdi 56:9 sa. ǃAob tsâsigab gere hōǃâ, o ge Davida a hui xū-i tsîn ge nē xoas ǃnâ noxoba ra ǂoaxa. ǁÎb ûib ge noxoba ǃaoǃaosa tamas ka io ǁkhōǁkhōsa mâsib ǃnâ hâ i xaweb ge Jehovab tae-e hānîǁaeb ǃnâ nî dība bis xa gere ǂâiǃgâ. Davidi ge ge ǂan i Jehovab ǂhanu ǁaeb ai nî ǁkhaubabi ǃkhaisa. Jehovab ge ge mîmâihâ i Davidi sao rase nî Israel di Gao-ao kai ǃkhaisa. (1Sam. 16:​1, 13) Davidi ge ge ǂan i Jehovab ra mîmâi xū-i hoa-i nî ama ī ǃkhaisa.

13. Tae-i ǂgomǃgâsiba da Jehovab ǃnâ ūhâ ǁkhā?

¹³ Jehovaba tae-e ge mîmâiba du dība dub nîse? Hoa ǃgomsina xub nî ǁkhauba da ǃkhaisa da ge ǃâubasen tama. c ǂÂis ǃnâ ūhâ re Jehovab ge nē ǃhūbaib ǃnâ da ra hōǃâ ǃgomsin hoana ǀasa ǃhūbaib ǃnâ nî ūbē. (Jes. 25:​7-9) Sida Kuru-aob ge ǀgaisa tsî ǁōhâna khâisa mā, ǂgauǂgauda tsî mâǃoa da ra khoen hoana nî hîkākā.—1Jhn. 4:4.

14. Tae-e da nî ǂâiǃgâ?

¹⁴ ǃAo du ga, o Jehovab hānîǁaeb ǃnâ nî dī xūn xa ǂâiǃgâ re. ǂÂi re mati du nî tsâsa, ǁGâuab tsî eloxoresa khoen ga hîkākāheo tsî i ga ǂhanu-ai khoen ǀguina ǃgau o hîna ǀoasasiba ǃoa tsēs hoasa ra ǀgūna. 2014ǁÎ kurib ǀkharib kai ǀhaos tawa i ge ǃâba ge hâ i, mati da sida ǃâubasens xa nî ǂâiǃgâsa gere ǁgauba. ǁGûb ge ǁîb omaris ǀkha mati i 2 Timoteub 3:​1-5 sa paradais ǃnâ nî ī ǀgaub xa ra ǃhoa. ǁÎb ge ra mî: “ǀAsa ǃhūbaib ǃnâ i ge ǂkhî ǁaega nî hâ. Khoen ge nauna ǀnam, gagasi xūna ǀnam, ǃgamǃgamsenxa, Eloba koa, ǁgûna ǁnauǀnam, ganganxa, ǂgomǂgomxa, ǃgôaǃgâsiba nau omaride ūhâba, ǃgâise ǁnâugu xa, naun xa ǃgâise ǃhoa, ǃkho-oasenxa, tsâmtsiǃnâxa, ǃgâiba ǀnam, ǂgomǂgomsa, nauna ais ai mâi, ǃgâiǂâixa, Eloba ǀnam ǃgâiǁaeba ūhâs xa, ama Elo ǃaoǃgâxasiba ūhâ. Nē xūna ra dīn ǀgūse hâ.” Sadu omaris tamas ka io du ǃgâsan ǀkha, matib ûiba ǀasa ǃhūbaib ǃnâ nî ī ǀgaub xa ra ǃhoaǃgao?

15. Tanjas gere ǃao xawe tae-e ge huisi is ǁîs ǃaoba dan?

¹⁵ Macedoniab Nordes ǃnâ ra hâ ǃgâsas Tanja ti ǀon hâs ge hōǃâ xū-e ǃgaoǃgâ re. ǁÎs ǁgûra ge Elobmîsas gere ǁkhāǁkhāsen amaga gere mâǃoasi. Jehovab hānîǁaeb ǃnâ nî dī xūn xa ǂâiǃgâs ge Tanjasa ge hui is ǁîs ǂhauǃnâsiba ǃkhōǀgara ǃaos ga o. ǁÎs ge ra mî: “ǃAos gere xūn ge ge ī. Ti mas ge mâ ǀhaos hoas khaoǃgâ gere ǂnaute. Jehovab ǃoaba-ao kai ta ga, o ra ge nî ǃgam te ti ra ge ti îra gere mî.” ǀAms ais ge Tanjasa ǁîs îraxa omsa xu ge ǃhaehe. Tae-es ge dī? “Ti ǂhauǃnâsiba ǁhûis ǃaroma ta ge ǀamosib kōse ǂkhîse hâs ai ti ǂâisa gere ǂnui. ǀAsa ǃhūbaib ǃnâb Jehovaba nē ǃhūbaib ǃnâ ta ge ǂoaǃnâ xūna nî mā-oate tsî ǁgai xūn nî ǀuruhes xa ta ge gere ǂâiǃgâ.” Tanjas ge ǁîs ǂhauǃnâsiba ge ǃkhōǀgara. Tsîs ge  Jehovab huib ǀkha, hâs nî ǃkhai-e ge hō. Nētsēs ge Tanjasa ǂgomǂgomsa ǃgâsaba ǃgamme hâ tsî ra ge ǀguiba aoǁnâ sîsen-e ǀoasa ǁaeba ra dī.

SADU ǂGOMǃGÂSIBA NĒTSĒ JEHOVAB ǃNÂ ǀGAIǀGAI

16. Tae-e nî huida î da ǁkhoaǂgaose hâ ǀgara Lukab 21:​26-28 ǃnâ hâ kēbode da ga mû o?

¹⁶ “Khoen ge ǃaob xa nî ǁō” kaiǁgâiǀāb ǁaeb ǃnâ, xawen ge Elob khoena ǁkhoaǂgaosib ǀkha nî mâǁapo. (Khomai re Lukab 21:​16-18 sa.) Tae-i ǃaroma da ǃao tide? Jehovab ǃnâ ǂgomǃgâsa da ǀnai ǁkhāǁkhāsen hâ amaga. Tanjas ǀgapiga da goro ǃhoaǃgaos ge ra mî, ǃkharu gere ǁaeb ǃnâs gere hōǃâ ǃgomsin ge ra huisi is nēsis ra hōǃâ ǃgomsina tanihō ǁkhā. “ǁKhāǁkhāsen ta ge ge Jehovab a huite ǁkhāsa i ta hoa ǃgomsina tani ǁkhā, tsîb ra ǀkhae tesa.” Hōǃâs ge ge “ǀnî ǁaega i ge khoen a ǀgaisa khami ra mûsen xaweb ge Jehovaba ǃnāsase ǁîn xa a ǀgaisa. Hōǃâ da ra ǁgâiǀāb ge ǃgomse a mûsen ǁkhā xawe i ge nî ǀam.”

17. 2024 Kurib xoasa mati nî huida? (Tsoatsoas ai hâ ai-īsiba kō re.)

¹⁷ Nētsē i ge ǂgui xūna ra ǃao kai da xawe da ge Davidi khami mā-am tide îb ǃaoba gaoǂam da. 2024ǁÎ kurib xoas ge Davidi ǀgores Jehovaba ǃoa hâsa: “ǃAo ta ga tsēs ai da ge sats ai nî ǂgomaiǂnûi.” (Psa. 56:3) ǃGaoǃgâ re tae-eb Elobmîs ǂansa ūhâ khoeba nē vers xa ra mîsa: “Davidi ge ǃao kaibi ra xūn tamas ka io ǁîb ǃgomsin xa ǂâiǃgâ tama,xaweb ge ǁnāb hîna ra ǁkhaubabib ai ra ǂgomaiǂnui.” Sao ra ǁkhâgu ǃnâ sada kurib xoas xa ǂâiǃgâ re ǃgōsase ǁkhōǁkhōsa mâsigu ǃnâ du ga hâ o. ǁAeba ū i ǂâiǃgâ, Jehovab ge tae-e ǃkharu gere ǁaeb, nēsis tsî hānîǁaeb ǃnâs tsîna nî dīsa. O du ge Davidi khami a mî ǁkhā: “Eloba da ge ra ǂgomǃgâ. Khoe-e tare-e nî dīte.”—Psa. 56:4.