1. Kuyini okungenza sesabe?

 SONKE siyake sesabe. Lanxa iBhayibhili selisincede ukuthi singesabi abafileyo lamadimoni kanye lalokho okuzakwenzakala esikhathini esizayo, silokhu siphila emhlabeni ogcwele izinto “ezesabisayo.” Ngokwesibonelo, kulezimpi lezigebenga kanye lemikhuhlane. (Luk. 21:11) Kanti njalo kungenzeka ukuthi kulabantu esibesabayo, kungaba ngohulumende abasithwalisa nzima kumbe abemuli yethu abangafuni ukuthi sikhonze uJehova. Abanye bayakhathazeka ngokuthi ngeke benelise ukuqinisela ebunzimeni abaphakathi kwabo khathesi kumbe lobo obungabehlela ngesikhathi esizayo.

2. Kuyini okwenzakala kuDavida ngesikhathi eseGathi?

² UDavida laye wayeke esabe. Ngokwesibonelo, iNkosi uSawuli yathi imzingela ifuna ukumbulala, wabalekela edolobheni lamaFilisti okuthiwa yiGathi. Kodwa u-Akhishi inkosi yeGathi wezwa ukuthi uDavida yilo iqhawe abantu ababehlabela ngalo ezingomeni zabo besithi ubulele amaFilisti ‘angamatshumi ezinkulungwane.’ Ngenxa yalokho uDavida “wamesaba kakhulu u-Akhishi.” (1 Sam. 21:​10-12) Wayekhathazeke kakhulu ngalokho ayengamenza khona. Kuyini okwanceda uDavida ukuthi anqobe ukwesaba?

3. IHubo 56:​1-3, 11, lithi kuyini okwanceda uDavida ukuthi anqobe ukwesaba?

³ KuHubo 56 uDavida wachasisa ukuthi wayezizwa njani ngesikhathi eseGathi. Esahlukweni leso wakubeka kwacaca ukuthi kungani wayesesaba lokuthi kuyini okwamncedayo ukuthi anqobe ukwesaba. UDavida wathemba uJehova ngesikhathi esesaba.  (Bala iHubo 56:​1-3, 11.) Lakanye uJehova kazange amlahlise. Wamncedisa ukuthi athole icebo elalizamnceda aphunyuke. Wazitshaya umuntu ogula ingqondo. UDavida wenelisa ukuphunyuka ngoba u-Akhishi wayesesithi abantu bamlethele uhlanya.—1 Sam. 21:13–22:1.

4. Singenzani ukuze simthembe kakhulu uJehova? Nika umzekeliso.

⁴ Lathi singenelisa ukunqoba ukwesaba nxa singathemba uJehova. Kodwa kuyini okungasinceda ukuthi simthembe kakhulu uJehova, ikakhulu nxa sisesaba? Cabanga ngomzekeliso lo. Nxa udokotela angathi kulomkhuhlane olawo, ungaqalisa utshaywa luvalo futhi usesaba. Kodwa nxa umthemba ucina uhlaliseka futhi ungasesabi kakhulu. Mhlawumbe kuyaziwa ukuthi useyelaphe abantu abanengi ababelomkhuhlane owubanjiweyo futhi basila. Udokotela lo uyakulalelisisa nxa umtshela ngohlupho lwakho njalo lawe uyakubona ukuthi uyakuzwisisa. Uyakutshela langendlela engcono yokwelapha esincede abanye. Lathi okuzasinceda ukuthi simthembe kakhulu uJehova yikuhlola lokho asekwenzile, lakwenza khathesi, lalokho azakwenza ngesikhathi esizayo. Yikho kanye okwenziwa nguDavida. Sizaxoxa ngamazwi akhe aphefumulelweyo akuHubo 56. Ngesikhathi sixoxa ngawo, cabanga ngokuthi lawe ungenzani ukuze umthembe kakhulu uJehova futhi unqobe ukwesaba.

KUYINI UJEHOVA ASEKWENZILE?

5. Yiziphi izinto uDavida acabangisisa ngazo ezamnceda ukuthi anqobe ukwesaba? (IHubo 56:​12, 13)

⁵ Lanxa impilo kaDavida yayisengozini, wacabangisisa ngezinto ezinhle uJehova ayezenzile. (Bala iHubo 56:​12, 13.) Lokhu wakwenza okwempilo yakhe yonke. Ngokwesibonelo, kwezinye izikhathi wayecabangisisa ngezinto ezidalwe nguJehova futhi zazimnceda abone ukuthi uJehova ulamandla amakhulu lokuthi uyabathanda kakhulu abantu. (Hubo. 65:​6-9) Wayecabangisisa langezinto uJehova ayezenzele abanye. (Hubo. 31:19; 37:​25, 26) Kanti njalo wayecabangisisa kakhulu ngezinto uJehova ayemenzele zona. Kusukela uDavida elusane, uJehova wayemvikela futhi emncedisa. (Hubo. 22:​9, 10) Kumele ukuthi ukucabangisisa ngezinto lezi kwamnceda kakhulu ukuthi amthembe uJehova.

6. Kuyini okuzasinceda ukuthi simthembe kakhulu uJehova nxa sisesaba?

 ⁶ Nxa ungezwa usesaba, zibuze, ‘Kuyini uJehova asekwenzile?’ Cabangisisa ngezinto azidalileyo. Ngokwesibonelo, ‘khangelisisa’ indlela uJehova anakekela ngayo amaluba lenyoni lanxa kungadalwanga ngomfanekiso wakhe futhi kungenelisi ukumkhonza. Ukucabangisisa ngendlela uJehova anakekela ngayo izinto lezi, kuzasinceda singathandabuzi ukuthi lathi uzasinakekela. (Mat. 6:​25-32) Cabanga langezinto uJehova azenzele abantu abamkhonzayo. Ungabala ngomunye umuntu okukhulunywa ngaye eBhayibhilini owatshengisa ukuthi ulokholo oluqinileyo, kumbe ubale indaba yomunye umuntu okhonza uJehova khathesi. a Kanti njalo cabangisisa ngendlela uJehova akunakekele ngayo. Wakuncedisa njani ukuthi umazi lokuthi umkhonze? (Joh. 6:44) Uyiphendule njani imithandazo yakho? (1 Joh. 5:14) Umhlatshelo weNdodana yakhe ukunceda njani nsuku zonke?—Efe. 1:7; Heb. 4:​14-16.

7. Okwenzakala kuDanyeli kwamnceda njani uVanessa ukuthi anqobe ukwesaba?

⁷ Udadewethu okuthiwa nguVanessa b ohlala eHaiti wake wehlelwa yibunzima obamenza wesaba kakhulu. Kulenye indoda eyayihlala emphakathini wakibo eyayimfonela futhi imthumela amameseji nsuku zonke imkhombisa. UVanessa wayiphumela egcekeni wayitshela ukuthi kayifuni. Indoda le yazama ukumbamba ngamandla futhi yaqalisa lokumethusela. UVanessa uthi, “Ngasengisesaba.” Manje wenzani ukuze anqobe ukwesaba? Wenza konke ayengakwenza ukuze azivikele. Omunye umdala webandla wamncedisa ukuthi ayemangala indaba le. Waphinda wacabangisisa ngendlela uJehova ayevikela ngayo izinceku zakhe kudala. UVanessa uqhubeka esithi, “Umuntu wokuqala engacabanga ngaye ngumphrofethi uDanyeli. Phela waphoselwa emgodini owawulezilwane ezilambileyo lanxa yena wayengelacala kodwa uJehova wamvikela. Ngathandaza kuJehova ngasengitshiyela konke ezandleni zakhe. Sengenze njalo ngangingasesabi ngitsho.”—Dan. 6:​12-22.

KUYINI UJEHOVA AKWENZAYO KHATHESI?

8. Kuyini uDavida ayengakuthandabuzi? (IHubo 56:8)

⁸ Lanxa impilo kaDavida yayisengozini ngesikhathi eseGathi, kazange avumele ukuthi ukwesaba kumqede amandla. Kodwa wakhetha ukucabangisisa ngalokho uJehova ayemenzela khona ngalesosikhathi. UDavida wayekubona ukuthi uJehova wayemkhokhela futhi emvikela kanye lokuthi wayeyizwisisa indlela ayesizwa ngayo. (Bala iHubo 56:8.) Kanti njalo uDavida wayelabangane bakhe ayebathemba njengoJonathani loMphristi Omkhulu u-Ahimeleki. Babemkhuthaza njalo bemncedisa. (1 Sam. 20:​41, 42; 21:​6, 8, 9) Lanxa iNkosi uSawuli yayifuna ukumbulala, uDavida waphunyuka. Wayengathandabuzi ukuthi uJehova wayebubona ubunzima ayephakathi kwabo lokuthi ubunzima lobo babumphatha njani.

9. Kuyini uJehova akubonayo nxa usebunzimeni?

⁹ Nxa ungehlelwa yibunzima obukwenza wesabe, khumbula ukuthi uJehova uyabubona ubunzima lobo njalo uyabona lokuthi bukwenza uzizwe njani. Ngokwesibonelo, uJehova wayebona indlela ama-Israyeli ayehlukuluzwa ngayo eGibhithe futhi wayebubona ‘ubuhlungu ayebuzwa.’ (Eks. 3:7) UDavida wathi uJehova wayekubona ‘ukuhlupheka kwakhe‘ kanye lalokho ‘okwakumkhathaza enhliziyweni yakhe.’ (Hubo. 31:7) Langesikhathi abantu bakhe behlupheka, laye “waba losizi” lanxa kuyibo ababezithele emanyaleni. (Isaya. 63:9) Nxa usesaba,  uJehova uyayizwisisa indlela ozwa ngayo futhi uzimisele ukukuncedisa.

10. Kuyini okukwenza ungathandabuzi ukuthi uJehova ulendaba lawe lokuthi uzakuncedisa ulwisane laloba yibuphi ubunzima obungakwehlela?

¹⁰ Mhlawumbe uyazibuza ukuthi uJehova ukuncedisa njani ngesikhathi uphakathi kobunzima obukwenza wesabe. Nxa kunjalo, mcele akuncedise ubone indlela akusekela ngayo. (2 Amakho. 6:​15-17) Ngemva kwalokho, zibuze imibuzo elandelayo: Kulenkulumo kumbe impendulo engiyizwe emhlanganweni webandla engiqinisileyo yini? Kulebhuku kumbe ividiyo loba ingoma ye-Broadcasting engikhuthazileyo yini? Kulomuntu oke wangitshela umbhalo kumbe amazwi akhuthazayo yini? Abafowethu labodadewethu kanye leBhayibhili yizipho ezinhle ezivela kuJehova. Wena uyaziqakathekisa yini izipho lezi? (Isaya. 65:13; Mak. 10:​29, 30) Indlela uJehova ayisebenzisayo ukuze asikhuthaze itshengisa ukuthi ulendaba lathi. (Isaya. 49:​14-16) Iphinda itshengise lokuthi silezizatho zokumthemba.

11. Kuyini okwanceda u-Aida ukuthi anqobe ukwesaba?

¹¹ U-Aida ohlala eSenegal wabona indlela uJehova ayemncedisa ngayo ngesikhathi esebunzimeni. Udadewethu lo ulizibulo ngakibo, yikho abazali bakhe babekhangelele ukuthi asebenze ukuze abe lemali yokuthi azinakekele aphinde abancedise. Wathi esebone kungcono ukuthi asuthiseke ngokuncane ayelakho okokuziphilisa ukuze enelise ukuphayona, waqalisa ukuba lohlupho lwemali. Abangakibo baqalisa ukumzonda futhi babemchothoza. U-Aida wathi: “Ngangisesaba ukuthi kangisoze ngenelise ukunakekela abazali bami lokuthi wonke umuntu wayezangilahla. Ngasola uJehova ngokuthi kungani wayevumele ukuthi izinto zize zibe zimbi kangaka.” Kodwa ngemva kokuzwa enye inkulumo emhlanganweni webandla wathi: “Umfowethu owayelenkulumo wasikhumbuza ukuthi uJehova uyakwazi konke okusizwisa ubuhlungu. Kancane kancane, abadala kanye labanye bangincedisa ukuthi ngibone ukuthi uJehova uyangithanda sibili. Ngaqalisa ukukhuleka kuJehova ngingathandabuzi ukuthi uzangincedisa futhi ukubona indlela imithandazo yami eyayiphendulwa ngayo kwakungenza ngihlaliseke.” Ngokuhamba kwesikhathi u-Aida wathola umsebenzi owenza wenelisa ukuzinakekela ngapha ephayona lokuthi ancedise abazali bakhe kanye labanye. Uthi, “Sengimthemba kukho konke  uJehova. Khathesi nxa ngingathandaza ngisala ngingasesabi ngitsho.”

KUYINI UJEHOVA AZAKWENZA NGESIKHATHI ESIZAYO?

12. IHubo 56:9 lithi kuyini uDavida ayengakuthandabuzi?

¹² Bala iHubo 56:9. Ivesi le iveza okunye okwanceda uDavida ukuthi anqobe ukwesaba. Lanxa impilo yakhe yayilokhu isengozini, wacabangisisa ngalokho uJehova ayezamenzela khona. UDavida wayekwazi ukuthi uJehova wayezamsindisa ngesikhathi esifaneleyo. Phela uJehova wayethe uDavida wayezakuba yinkosi yako-Israyeli. (1 Sam. 16:​1, 13) Konke uJehova ayemthembisa khona, wayekuthatha angathi sekwanzakele.

13. Kuyini uJehova azakwenza?

¹³ Kuyini uJehova athembise ukukwenzela khona? Kasikhangelelanga ukuthi asivikele kuzo zonke inhlupho ezingasehlela. c Lanxa kunjalo, bonke ubunzima esihlangana labo khathesi uJehova uzabuqeda emhlabeni omutsha. (Isaya. 25:​7-9) UMdali wethu ulawo amandla okuvusa abantu abafileyo, lawokwelapha yonke imikhuhlane kanye lawokususa izitha zethu.—1 Joh. 4:4.

14. Kuyini esingacabangisisa ngakho?

¹⁴ Nxa ungezwa usesaba, cabangisisa ngalokho uJehova azakwenza esikhathini esizayo. Cabanga ngokuthi impilo izabe isinjani uSathane engasekho, labantu ababi sebengasekho, sekulabalungileyo kuphela njalo lesono silokhu sisuswa kancane kancane. Emhlanganweni wesabelo ka-2014 kwakulomboniso owasitshengisa ukuthi singenzani ukuze sicabangisise ngethemba lethu. Ubaba wayexoxa lemuli yakhe ngokuthi amazwi aku-2 Thimothi 3:​1-5 nxa engabhalwa ekhuluma ngokuthi impilo izabe isinjani ePharadayisi angabekwa njani. Wathi: “Emhlabeni omutsha kuzakuba lezikhathi zentokozo ngoba abantu bazabe bethandana, bethanda ukukhonza, bezithoba, bezehlisa, bedumisa uNkulunkulu, belalela abazali, bebonga, beqotho, bezithanda kakhulu imuli zabo, befuna isivumelwano, bekhuluma kuhle ngabanye, bezikhuza, bemnene, bethanda okuhle, bethembekile, bengelankani, bengazikhukhumezi, bethanda uNkulunkulu ukwedlula injabulo futhi bezinikele kuye. Woba lobudlelwano labantu abanjalo.” Uyake uxoxe yini labangakini kumbe labanye okhonza labo ngokuthi impilo izabe isinjani emhlabeni omutsha?

15. Lanxa uTanja wayesesaba, kuyini okwamncedayo?

¹⁵ Udadewethu okuthiwa nguTanja ohlala eNorth Macedonia wenelisa ukunqoba ukwesaba ngokucabangisisa ngezibusiso azazithola ngesikhathi esizayo. Abazali bakhe babengafuni ukumbona efunda iBhayibhili. Uthi, “Ezinye izinto engangisesaba ukuthi zizakwenzakala zenzakala sibili. Zikhathi zonke nxa ngangivela emhlanganweni, umama wayefika angitshaye. Abazali bami bathi babezangibulala nxa ngingaba nguFakazi kaJehova.” UTanja wacina esexotshiwe ngakibo. Manje wenzani? Uthi, “Ngacabangisisa ngokuthi ngizathokoza kuze kube nini lanini nxa ngingakhetha ukuqhubeka ngiqotho. Ngacabanga langokuthi lanxa ngingalahlekelwa ngokuthile khathesi, uJehova uzangipha umvuzo emhlabeni omutsha njalo ngizakhohlwa ngazo zonke izinto ezimbi.” UTanja waqhubeka eqotho njalo uJehova wamncedisa ukuthi athole indawo yokuhlala. Khathesi uTanja utshade lomzalwane othembekileyo futhi bobabili bayathokoza enkonzweni yesikhathi sonke.

QHUBEKA UMTHEMBA KAKHULU UJEHOVA

16. Kuyini okuzasinceda ukuthi sibe lesibindi nxa isiphrofetho esikuLukha 21:​26-28 sesigcwaliseka?

¹⁶ Ngesikhathi sokuhlupheka okukhulu, ‘abantu bazaphela amandla ngenxa yokwesaba.’ Kodwa  abantu bakaNkulunkulu bazakuma baqine babe lesibindi. (Bala uLukha 21:​26-28.) Kuyini okuzasenza singesabi? Yikuthi siyabe sivele sesifunde ukumthemba uJehova. UTanja esike saxoxa ngaye uthi lokho adlula kukho kuyamnceda ukuthi alwisane lobunzima ahlangana labo empilweni yakhe. Uthi, “Sengafunda ukuthi uJehova uyenelisa ukusincedisa kuloba yibuphi ubunzima esingahlangana labo. Ngezinye izikhathi abanye abantu bangakhanya angani balamandla phezu kwethu, kodwa uJehova ulamandla adlula awabo. Ngeke benze lutho engabavumelanga ukuthi balwenze. Kungelani ukuthi isilingo siyabe sinzima kangakanani siyabe sizadlula kuphela.”

17. Umbhalo womnyaka ka-2024 uzasinceda njani? (Khangela umfanekiso ongaphandle.)

¹⁷ Zinengi izinto ezingasenza sesabe. Kodwa kumele silingisele uDavida, singavumi ukukhulelwa yikwesaba. Umbhalo womnyaka ka-2024 ngumthandazo kaDavida othi: “Nxa ngisesaba ngithembela kuwe.” (Hubo. 56:3) Elinye ibhuku elichasisa amavesi eBhayibhili nxa likhuluma ngevesi le lithi, “UDavida kacabangi kakhulu ngezinto ezimesabisayo kumbe inhlupho zakhe kodwa ukhangela kulowo ozamkhulula.” Ezinyangeni ezilandelayo, cabangisisa ngombhalo womnyaka ikakhulu nxa kusenzakala izinto ezikwenza wesabe. Zinike isikhathi sokucabangisisa ngalokho uJehova asekwenzile, lakwenza khathesi kanye lalokho azakwenza ngesikhathi esizayo. Ungenza njalo, lawe uzakhuluma amazwi kaDavida athi: “Ngiyamthemba uNkulunkulu, angisoze ngesabe.”—Hubo. 56:4.