1. Ntakhara heeni ikwaha ikina ninnakhala awoova?

 IKWAHA ikina achu oothene annakhala awoova. Ti yawooneya wi yoohuserya ahu ya Piipiliya yoonitaphula mu owoova alipa ookhwa, onamulosiwe ni woova yeeyo enahaala weereya ni achu oothene omwaahiyu. Nyenya ninleelo nnakhala mu elukuluku ya “ichu sawoopiha,” ntoko ikhoco, wiiphana ni ireca. (Luka 21:11) Nnanwerya tho owoova achu, ophitaanyerya alamuleli yaawo ahinanikhaliha phaama naari aveemusini vahu yaawo anaakaaha malapelo eeparipari. Akina annoova wi hewerya ovilela soohooxa sa hiihaano naari ikina inahaala okhumelela omwaahiyu.

2. Mutharihe yaweereya ya Tavite vaavaa aareiye o Kaati.

² Tavite aahihoolela woova. Ntoko yootakiherya, vaavaa Mwene Sawuli eereryeiye omwaaxaaxa, Tavite aahilakelela ochawela epooma ya Afilisti o Kaati. Moohilekela, mwene o Kaati aahisuwela wi Tavite aari nakhoco oowerya yoowo iipeliwe macipo wanthowa na owiipha wawe “masana masaneene,” a Afilisti. Tavite ‘aahoovaxa.’ (1 Sam. 21:10-12, TNM; 21:11-13, PMM) Owo aanuukhuwa vooloca sa yeeyo Akisi aahaaleiye omweerela. Ti mwawiihai Tavite aavoontheiye woova wawe?

3. Mwawiiwanana ni Salmu 56:1-3, 11 ti mwawiihai Tavite aavoontheiye woova wawe?

³ Mu Salmu 56, Tavite onnaloca mukhalelo iisooneiye vaavaa aareiye o Kaati. Salmu yoola onnaloca woova wa Tavite, nyenya tho onnathariha mukhalelo aavoontheiye woova yoowo. Vaavaa aareiye a woova, Tavite aahimuroromela Yehova (Mwaalakhanye Salmu 56:1-3, 11.) Tavite aakhalano mathowa aphaama a omuroromela Yehova. Ni mareeliho a Yehova, Tavite aahipharihela mavyakelo yahaari awunlaana nave yaari aphaama: Aahiiseera okhala ntoko naanepa! Akisi vano aamoona Tavite ntoko muchu oonyeenyeiha ohiya mwiicani,  mwawiihiiha, Tavite aahiwerya okophola.—1 Sam. 21:13–22:1.

4. Ti mwawiihai nneeraahu nlipihe omuroromela wahu Yehova? Mutharihe.

⁴ Hiyaano tho nnanwerya ovootha woova moorweela wa omuroromela Yehova. Nave ti mwawiihai nneeraahu nlipihe omuroromela wahu Yehova, xaxaxa vaavaa nnakhalaahu awoova? Muthokororye niphwanaphwaniho nimoha. Wakhala wi munnasuwela wi mookhalano ereca, woopaceryani akhweya munanwerya okhala awoova. Nyenya munanwerya ovukula woova wanyu wakhala wi moochekula ni meetiku oororomeleya. Akhweya owo ohaaloola achu ancipale yaarino ereca emohamoha. Owo onanwerya woowiriyanaani phaama, nave onnoororomelihaani wi onniiwexexa mukhalelo muniisoonaanyu. Owo akhweya onanwerya woovahaani oloola yoowo ophanre muteko wa achu akina. Mmukhalelo mmohamoha, ninnalipiha omuroromela wahu Yehova moorweela wa othokororya yeeyo opankeiye, onapakeiye hiihaano ni onahaaleiye opaka wa hiyaano omwaahiyu. Ti yeeyo Tavite aapankeiye. Vaavaa nnathokororyaahu masu awe makina ooveereliwa anaphwanyeya mu Salmu 56, muupuwele vooloca sa mukhalelo munahaalaanyu olipiha omuroromela wanyu Yehova ni ovootha woova wanyu.

ECHU TAANI YEHOVA OPANKEIYE?

5. Ichu taani Tavite uupuweleleiye wi avoothe woova wawe? (Salmu 56:12, 13)

⁵ Naamwi ekumi ya Tavite yaari va yawoopiha, owo aahitikitheryeya mu ichu saphaama seiho Yehova aapankeiye khalai. (Mwaalakhanye Salmu 56:12, 13.) Ola waari muupuwelo wa vasulu wa Tavite variyari va okumi awe woothene. Ntoko yootakiherya, mu ikwaha ikina, owo aanuupuwelela soopatuxiwa sa Yehova, seiho saamuupuxerya wi Yehova ta ikuru soothene nave onnaapwacha achu oothene. (Sal. 65:6-9) Tavite tho aanuupuwelela yeeyo Yehova aapankeiye ntakhara achu akina. (Sal. 31:19; 37:25, 26) Nave owo aanuupuwelela xaxaxa yeeyo Yehova aapankeiye ntakhara yene mwaneene. Yehova aahimukhaviherya ni omukhapelela Tavite ovinyerya ari mwaana. (Sal. 22:9, 10) Mwaanyiherye ti mwawiihai mukhalelo yoola wa wuupuwela waalipinhaaya nroromelo na Tavite mwa Yehova!

6. Vaavaa nnakhalaahu awoova, tiheeni enahaala onikhaviherya omuroromela Yehova?

 ⁶ Vaavaa munakhalaanyu awoova, mwiikohe: ‘Tiheeni Yehova opankeiye wa miyo?’ Muupuwele ichu seiho owo opatunxeiye. Ntoko yootakiherya, vaavaa “munavareryaanyu phaameene” mukhalelo Yehova onakhapeleleiye ipalame ni ithutu, seiho ihipatuxiwe moophwanaphwana ni yoowo nave ihinawerya omulapela, ninnannuwiha nroromelo nahu nawi owo onahaala tho onikhapelela. (Mat. 6:25-32) Muthokororye tho yeeyo Yehova opankeiye wa alapeli awe. Munanwerya ohuserya yaweereya ya muchu onalociwa Mpiipiliyani yoowo oonihenrye nroromelo neeparipari, naari munanwerya waalakhanya saweereya sa alapeli a Yehova a mmahiku ahu. a Ohiya yeeyoru, muupuwele mukhalelo Yehova ookhapelenleiyeeni. Mmukhalelo taani owo ookerinheiyeeni mu eparipari? (Yoh. 6:44) Ti mwawiihai aakhunleiye mavekelo anyu? (1 Yoh. 5:14) Mmukhalelo taani munaphuraanyu mahiku oothene orweela wa mukucho wa Mwanawe oosiveliwa?—Aef. 1:7; Ahe. 4:14-16.

7. Ti mwawiihai yaweereya ya mulipa a miririmu Taniyeli emukhavihenryaaya Vanesa ovootha woova wawe?

⁷ Vanesa, b murokora mmoha o Aiti, oohoolela nikacamiho nimoha nawoopiha. Mulopwana mmoha a mukuma awe aanamulikaarela ni omvonyerya michaka mahiku oothene, amukhinyereryaka wi apakeno ompwana. Vanesa aahimukhooca moomalela. Nyenya mulopwana ole aanamukhinyererya ni omoopopiha. Owo ooloca: “Kaakhala awoova.” Mmukhalelo taani owo aavoontheiye woova? Owo aahilakelela weera ichu soophara muteko wi iikhapelele. Mutokweene mmoha a muloko aahimukhaviherya wi owo aaphwanela oloca ni alamuleli. Nave owo tho aahitikitheryeya mmukhalelo Yehova aakhapelenleiye alapeli awe khalai. Vanesa ooloca: “Muchu mmoha kaamuupuwenlaaka aari mulipa a miririmu Taniyeli. Owo aahivonyeryiwa mu nlici na amwaco oovoliwa, naamwi aahirino nthowa. Nto Yehova aahimukhapelela yoowo. Nave kaahimveka Yehova wi avarerye makacamiho aka oothene. Kimanle weerano yeela, nkaari tho awoova.”—Tan. 6:12-22.

TIHEENI YEHOVA ONAPAKEIYE HIIHAANO?

8. Olekecheya taani Tavite aareiyeno? (Salmu 56:8)

⁸ Naamwi Tavite aari va yawoopiha ya okhwa elukuluku aareiye o Kaati, owo haatikitheryen’ye mu ichu seiho saamweeriha woova. Ohiya yeeyo, owo aahithanla wuupuwelela yeeyo Yehova aapakeiye ntakhara yoowo mu elukuluku yeele. Tavite aanwerya ororomela wi Yehova aanamuhoolela ni omukhapelela nave wi Owo aaniiwexexa miyoonelo sawe. (Mwaalakhanye Salmu 56:8.) Tavite aahikhalano asinthamwene awe, ntoko Yonata vamoha ni Mulipa a Mukucho Ahimeleki yaawo yamvaha nikhaviheryo noophara muteko. (1 Sam. 20:41, 42; 21:6, 8, 9) Nave moohipwacha waaxaaxiwa ni Mwene Sawuli, Tavite aahikophola. Owo aahilekecheya wi Yehova aaniiwexexa phaameene wi owo aanahoolela nikacamiho noovila ni mukhalelo nikacamiho nno naamvolowelaaya mmuupuweloni.

9. Tiheeni Yehova onavareryeiye wa mmoha ti mmoha a hiyo?

⁹ Vaavaa munahoolelaanyu yaweeha enaweerihaani okhala awuukhuwa, muupuwele wi Yehova onnoona yaweeha eyo ni mukhalelo eyo enoovolowelaayani. Ntoko yootakiherya, Yehova aahivarerya ohiya pahiru mukhalelo woovila wa Aisarayeli o Yikuputu, Owo tho aanoona ‘ohooxeya waya.’ (Muk. 3:7, PMM) Tavite aahimwiipela Yehova wi owo aanoona “ohaawa” ni “wuukhuwa” wawe. (Sal. 31:7, PMM) Vaavaa achu a Muluku yaahooxeyaaya, naamwi eri nthowa na sookhumelela sa soolakelela saya  soonanara, Yehova tho ‘aanahooxeya.’ (Yes. 63:9, PMM) Vaavaa munakhalaanyu a woova, Yehova onniiwexexa mukhalelo muniisoonaanyu nave owo onnachuna wookhaviheryaani ovootha woova wanyu.

10. Ntakhara heeni moolekecheya wi Yehova onnawiiwexexaani nave wi onahaala wookhaviheryaani ovilela ni saweeha sanyu?

¹⁰ Apwanne munniikoha mukhalelo Yehova onookhaviheryeiyeni vaavaa munahoolelaanyu yaweeha etokweene? Mwawiihiiha, mumveke wi owo ookhaviheryeeni woona nikhaviheryo nawe. (2 Mam. 6:15-17) Voocharela, muupuwele: Apwanne wookhala mwaha naari naakhulo mmithukumano noolipinheeni? Apwanne yookhala yoolaleeryiwa, exilema naari ncipo navameekhaaya noohakaranryeeni? Ookhala okawanne muupuwelo naari yoorepa ni nyuwo yeeyo yoolipinheni? Nnanwerya othamalela onthamwene wa onna wa elapo yoothene nryaahuno ni yoolya yoomunepani nnaakhelaahu. Mwawiihiiha, iho soovaha sootikhiniha sa Yehova. (Yes. 65:13; Mar. 10:29, 30) Iho sinnooniherya wi owo onnookhapelelaani. (Yes. 49:14-16) Nave iho sinnooniherya wi owo toophwanelela omuroromela.

11. Tiheeni emukhavihenrye Aita ovootha woova wawe?

¹¹ Aita, yoowo onakhala o Senekali, aahoona mukhalelo Yehova aamukhavihenryeiye variyari va yaweeha. Woona wi owo aari mwaana oopacerya, asitiithi awe yaanaweherya wi owo alapeke wi akhaleno ikhorowa sincipale wi iikhapeleleke vamoha ni yaawo. Nyenya amanle okhweiha okumi awe wi akhale piyoneera, Aita aahikhalano nikacamiho na othoiwa ikhorowa. Emusi awe yaanamukhupanya ni omuthoriha. Owo ooloca: “Miyaano kaari awoova nthowa na ohiwerya waakhaviherya asitiithi aka ni wi oothene yaahaala okinyanyala. Ophiyerya wi kaahimukhupanya Yehova wanthowa na ohiya ichu mmukhalelo yoola woonanara.” Voocharela, aahiwiriyana mwaha mmulokoni. “Namaloca a mwaha aahinuupuxerya wi moohiphwacha makhwaca nryaahuno mmurimani mwahu, Yehova onnasuwela. Vakhaani-vakhaani, moorweela wa ikano sa atokweene ni achu akina, kaahilipiheya mu osivela wa Yehova. Vaavaa kaavekelaaka wa Yehova, kaahipacerya ororomela vancipale wi owo aahaala okikhaviherya.” Moovira wa elukuluku, Aita aahiphwanya muteko  yoowo waamukhavihenrye ohiya pahiru yene mukhateiye ntoko piyoneera, nyenya tho ovaha nikhaviheryo na ikhorowa wa asitiithi awe ni achu akina. Owo ooloca: “Kaahihuserya omuroromela Muluku moomalela. Vano, kimanle ovekela, woova waka onnakimalela.”

TIHEENI YEHOVA ONAHAALEIYE OPAKA?

12. Mwawiiwanana ni Salmu 56:9, echu taani Tavite aaroromeleiye?

¹² Mwaalakhanye Salmu 56:9. Iversikulu seiha sinnaloca mikhalelo mikina seiho saamweerinhe Tavite ovootha woova wawe: Naamwi okumi awe waari va yawoopiha, owo aanuupuwela vooloca sa yeeyo Yehova aahaaleiye opaka ntakhara yene. Tavite aahisuwela wi Yehova aahaala omoopola mu elukuluku yoophwanelela. Opwaha soothene, Yehova aahiloca wi Tavite ahaala okhala mwene oocharela o Isarayeli. (1 Sam. 16:1, 13) Wa Tavite, soothene Yehova aaroromelinheiye saahaakhwanela phaameene.

13. Nroromelo taani nnaphwanelaahu okhalano wa Yehova?

¹³ Tiheeni Yehova ororomelinheiye opaka wa nyuwo? Hannaweherya wi owo anikhapelele mmakacamiho ahu oothene. c Naamwiihiiha, moohipwacha saweeha taani munahoolelaanyu mu elapo yeela, Yehova onahaala omaliha seiho mu elapo evyaani enoorwa. (Yes. 25:7-9) Mweeparipari, Mpatuxa ahu ookhalano ikuru sawaakhwanela wi aaviihe ookhwa, anipenuxe wa sawiicela ni waatoloxa alipa awaakaaha oothene.—1 Yoh. 4:4.

14. Mu ichu taani nnaphwanelaahu wuupuwelela?

¹⁴ Vaavaa munakhalaanyu awoova, muupuwelele yeeyo Yehova onahaaleiye weera omwaahiyu. Muupuwele mukhalelo munahaalaanyu wiisoona vaavaa Satana onahaaleiye otoloxiwa ni vaavaa alipa oonanara anahaalaaya oraceelihiwa ni achu awookololowa ni vaavaa ohiphaameya onahaalaaya ocakanelaka vakhaani-vakhaani nihiku ti nihiku. Yawooniherya emoha yaapakiwe mmuthukumano wa muceche wa 2014 yaahooniherya mukhalelo naahaalaahu wuupuwelela sa ewehereryo ahu. Tiithi mmoha aahivaanela ni echoko awe vooloca sa mukhalelo 2 Timotiyu 3:1-5 yaahaalaaya okhala yoohiyana waakhanle wi iversikulu seiha inaloca sa Parataiso: “Mu elapo evyaani ilukuluku soohakalala inamphiya. Nyenya, achu anahaala okhala oosivelana mukina ni mukhwaawe, oosivela muhakhu woomunepani, oophimelela, awiiyeviha, oomulapela Muluku, oowiiwelela asitiithi aya, oothamalela, eekhaikhai, awaathokororya phaama amusi aya, ootikitherya murecele, awaaloca phaama akhwaaya ilukuluku soothene, awiivareryela, oomaaleleya, anasivela yeeyo eri yaphaama, oororomeleya, ooleva, awiiyeviha omunepani, oomusivela Muluku, anapaka ichu mwawiiwanana ni omulapela Muluku; nave achu yaawo ekhaleke vakhiviru vaa.” Apwanne munnaloca ni amusi vamoha ni anna ni arokora vooloca sa mukhalelo elapo evyaani enahaalaaya okhala?

15. Naamwi Tanxa aari awoova, tiheeni yaamukhavihenrye ovootha woova wawe?

¹⁵ Murokora mmoha awiichaniwa Tanxa o Maketoniya Oomoko, aahivootha woova wawe moorweela wa wuupuwelela mareeliho oomwaahiyu. Asitiithi awe yaanamuwatiiha mwakuru omuhuserya Piipiliya. Owo ooloca: “Ichu ikina koovaaka wi saahaala weereya, saaheereya chiri. Amama aka yaanakimana kimanle woorowa mmithukumano soothene koonelaaka. Asitiithi aka yaahikoopopiha wi yaahaala okiipha waakhanle wi koolakelela okhala Namoona a Yehova.” Wookuchulani, Tanxa aahiikariwa vaate. Ti mwawiihai owo aakhulenleiye? Owo ooloca: “Kaahiitikitherya mmukhalelo kaahaalaaka okhala oohakalala okhala wookhala nthowa na othanla okhala oororomeleya. Nave kaahuupuwela mukhalelo Yehova aahaaleiye okireeliha mu elapo evyaani nthowa na echu vyakala kaahaalaaka oyeleela mu elapo yeela yoonanara nave mmukhalelo ichu  soothene soonanara inahaalaaya ocuwaliwa.” Tanxa aahititelela okhala oororomeleya. Nnikhaviheryo na Yehova, owo aahiphwanya nipuro na okhalavo. Olelo, Tanxa ootheliwa ni munna oororomeleya nave eri oohakalala erumeelaka mmuteko wa elukuluku yoothene.

MULIPIHE HIIHAANO OMUROROMELA WANYU YEHOVA

16. Tiheeni enahaala onikhaviherya okhala oolipa murima vaavaa nnoonaahu saweereya siloheryiwe mu Luka 21:26-28?

¹⁶ Variyari va yoohooxa etokotoko, achu a elapo yoothene enarwa ekhala “ookhweene nthowa na woova.” Nyenya achu a Muluku enahaala okhala oolipa murima ni oohoova. (Mwaalakhanye Luka 21:26-28.) Ntakhara heeni nihinahaalaahu okhala awoova? Nthowa nawi noohuserya omuroromela Yehova. Tanxa, yoowo olociwe mu eparakrafo evirale, ooloca wi saweereya sawe sakhalai sinnamukhaviherya ohoolela saweereya sikina sinamuukhula. Avareryaka muculi, owo onnaloca: “Koohuserya wi hiwaavo mukhalelo vyakala, yoowo Yehova ohinahaaleiye orehererya ntakhara ophaama wahu. Mu ilukuluku ikina onamukhala ntoko wi akina annavareryela ichu soothene, nyenya eparipari ti yawi awo annavareryela seiho wakhala wi pahiru Yehova onneemererya. Naamwi yaweeha ekhanle yoovila, eyo enahaala omala.”

17. Ti mwawiihai yoorepa ahu ya eyaakha ya 2024 enahaalaaya onikhaviherya? (Moone eruku ya ekaapa.)

¹⁷ Woova echu yawunlaana mmahiku ahu. Nyenya, hiihaa ntoko Tavite, nnanwerya okhooca ophariwa ni woova. Yoorepa ahu ya eyaakha ya 2024 ti nivekelo na Tavite wa Yehova: “Vaavaa kinakhalaaka awoova, kinnatikitherya nroromelo naka mwa nyuwo.” (Sal. 56:3) Ntoko enalocaaya ereferensiya emoha ya Mpiipiliyani vooloca sa eversikulu yeela, Tavite “haaceererya woova wawe naari otikitheryeya wa makacamiho awe, nyenya aanatikitheryeya wa moopoli awe, yoowo aahaala omvuluxa.” Muupuwelele yoorepa ya eyaakha yeela mu miyeeri inacharela, xaxaxa vaavaa munahoolelaanyu mikhalelo sootutuxa. Mpharihele elukuluku anyu wi muupuwelele vooloca sa yeeyo Yehova opankeiye khalai, onapakeiye hiihaano ni onahaaleiye opaka omwaahiyu. Mwawiihiiha, ntoko Tavite, munanwerya oloca: “Kinnamuroromela Muluku, nave kinnacicimiha masu awe. Koororomela mwa Muluku, nkoovaru.”—Sal. 56:4, PMM.