1. ¿Tleka kemantika tomojtiaj?

 TINOCHIMEJ tomojtianij. San ika, Biblia yotechmachti ika xnoneki tikinmakasiskej akin yomijkej, demonios nion tlen uelis panos ika tlayekapan. Maski ijkon, tomojtiaj pampa “miyek tlajtlamach” tlen xkuajli nochiujtika, onka guerras, miyekej kichiuaj tlen xkuajli niman onka miyek kokolistli (Luc. 21:11). Kanaj noijki tikinmakasij tekiuajkej, tochanejkauan noso oksekimej akin xkuelitaj matomachtikan Biblia. Niman sekimej nomojtiaj pampa xkimatij tla uelis kixikoskej tlen kixnamiktokej aman noso tlen kixnamikiskej ika tlayekapan.

2. ¿Kenon onomachili David ijkuak oajsik Gat?

² Matontlanemilikan itech David, se itekipanojkauj toTajtsin akin kemantika noijki onomojti. Ijkuak tekiuaj Saúl kitlaueltokatinemiya pampa kinekiya kimiktis, yejua oyaj ipan se ueyi kalpan tlen itoka Gat. Ijkuak okijlikej Akís, akin tekiuajtitoya Gat, ika David melak kojtik katka niman ika yokinmiktijka melak miyekej filisteos, David “sanoyej onomojtij” (1 Sam. 21:​10-12). Yejua melak onomojti pampa xkimatiya tlenon ueliskia kichiuilis tekiuaj. ¿Tlenon okichiuj David niman ijkon xok nomojtis?

3. Ken kijtoua Salmo 56:​1-3, 11, ¿tlenon okipaleui David niman ijkon xok nomojtis?

³ Ipan Salmo 56, David okijto kenon onomachili ijkuak nemiya ipan ueyikalpan Gat. Ipan yejon salmo, David noijki okijto tleka melak nomojtiaya niman kenon pampa otlaneltokak itech Jehová, okipaleui maka manomojti (xpoua Salmo 56:​1-3, 11). Niman pampa otlaneltokak itech Jehová, yejua okipaleui makimati tlenon kichiuas. David okinemili kichiuas ken akin yotlamachilispolijkej, niman pampa ijkon okichiuj, tekiuaj  Akís xok okinek kimiktis, aman san kinekiya makikixtikan. Yejon okipaleui David oksekan mauiya (1 Sam. 21:​13–22:1).

4. ¿Kenon más uelis titlaneltokaskej itech Jehová? Xkijto se neskayotl.

⁴ Tla tejuamej noijki titlaneltokaj itech Jehová, techpaleuis maka matomojtikan. San ika ¿kenon uelis titlaneltokaskej itech Jehová ijkuak itlaj techmojtia? Matontlanemilikan itech yejuin. Tla techijliaj ika tikpiyaj se kokolistli, kanaj tomojtiskej, san ika, ijkuak tikitaj ika akin techpajtijtikaj melak ueltok, tiuajyolseuij. Kanaj yeuejkaui yokinpajtijka oksekimej akin noijki kipiayaj yejon kokolistli tlen tejuamej tikpiyaj. Noijki tikitaj ika kuajli techkaki niman techasikamati. Niman kanaj hasta techijlia ika techpajtis ijkon ken okinpajti oksekimej. Noijki ijkon, tejuamej uelis más titlaneltokaskej itech Jehová tla tiknemiliaj nochi tlen yokichiuj, tlen aman kichiujtika niman tlen kichiuas topampa. Yejon tlen okichiuj David ipan Salmo 56. Ijkuak tikimitstiaskej yejuin tlaxeloltin, matiknemilikan kenon tejuamej noijki uelis más titlaneltokaskej itech Jehová niman xok tomojtiskej.

¿TLENON OKICHIUJ JEHOVÁ YEUEJKAUI?

5. ¿Itech tlenon otlanemili David niman ijkon xnomojtis? (Salmo 56:​12, 13).

⁵ Maski David kimatstoya ika ueliskia kimiktiskej, yejua nochipa otlanemili itech nochi tlen Jehová yokichiujka ipampa (xpoua Salmo 56:​12, 13). Niman yejua nochipa ijkon kichiuaya. Kemantika tlanemiliaya itech tlen Jehová yokichijchiuj, yejon kipaleuiaya makilnamiki ika toTajtsin melak kojtik niman ika kintlasojtla tlaltikpakchanejkej (Sal. 65:​6-9). Noijki tlanemiliaya itech tlen Jehová yokichiujka inpampa oksekimej (Sal. 31:19; 37:​25, 26). Niman okixelo tiempo niman ijkon tlanemilis itech tlen Jehová yokichiujka ipampa. Jehová yokipaleuijka niman yokitlajpixka desde ijkuak konetsintli katka (Sal. 22:​9, 10). Kuajli tikmatstokej ika pampa David otlanemili itech nochi yejuin, okipaleui matlaneltoka itech Jehová ika nochi iyojlo.

6. ¿Tlenon techpaleuis matitlaneltokakan itech Jehová ijkuak tomojtiskej?

⁶ Ijkuak itlaj mitsmojtis, xmotlajtolti: “¿Tlenon yokichiuj Jehová yeuejkaui?”. Niman xkilnamiki nochi tlen yejua yokichijchiuj.  Xkonnemili kenon Jehová kintlajpiya totomej niman xochimej maski yejuamej xuelij kiueyichiuaj, yejuin techpaleuiya más matikneltokakan ika yejua techtlajpiyas (Mat. 6:​25-32). Noijki, xtlanemili itech tlen Jehová yokichiuj inpampa itekipanojkauan. Kanaj uelis timomachtis itech yakaj akin kiteneua Biblia noso itlaj tlen ipan yonochiuj se iteixpantijkauj Jehová. a Maka xkilkaua kenon Jehová yomitsuajtlajpixtia desde yeuejkaui niman hasta aman. ¿Kenon omitspaleui xkixmati tlen melauak? (Juan 6:44). ¿Kenon yokinnankili moteoyouan? (1 Juan 5:14). ¿Kenon mojmostla mitspaleuiya pampa okitemakak isenteKonetsin? (Efes. 1:7; Heb. 4:​14-16).

7. ¿Kenon tlen ipan onochiuj teotlajtoketl Daniel okipaleui Vanessa?

⁷ Se tokniuj siuatl akin chanti Haití niman itoka Vanessa b okixnamik itlaj tlen melak kimojtiaya. Se tlakatl akin chantiya kampa yejua chanti mojmostla konnotsaya niman kontitlaniliaya mensajes, yejua melak kichiualtiaya para manochiua inovia. Tokniuj Vanessa yokijlika yejon tlakatl ika xkinekiya iuan kistinemis, san ika, yejua melak okualan niman hasta okijli ika kichiuiliskia itlaj tlen xkuajli. ¿Tlenon okichiuj Vanessa niman ijkon xok nomojtis? Okichiuj nochi tlen noneki niman ijkon notlajpiyas, niman se tokniuj tlayekanketl okijli makinnotsa policías. San ika, Vanessa noijki onokojtili kilnamikis kenijki Jehová yokinpaleui itekipanojkauan akin yeuejkaui nemiyaj. Yejua kijtoua: “Kachtopa onikilnamik teotlajtoketl Daniel. Maski yejua xokichiuj itlaj tlen xkuajli, okontlajkalkej ijtik se pozo kampa nemiyaj miyekej leones, san ika, Jehová okimakixti. Onikijli Jehová ika nejua yonikchiujka nochi tlen niueliya niman ika niknekiya manechpaleui. Sakin xok oninomojti” (Dan. 6:​12-22).

¿TLENON KICHIUJTOK JEHOVÁ?

8. ¿Tlenon kuajli kimatstoya David? (Salmo 56:8).

⁸ Maski David kimatstoya ika ueliskia kimiktiskej ijkuak nemiya ne Gat, yejua xomojkamik, yej otlanemili itech tlen ijkuakon Jehová kichiujtoya ipampa. Kitstoya kenon Jehová kiyekantoya, kitlajpixtoya niman ika kasikamatiya tlen kimachiliaya (xpoua Salmo 56:8). Noijki, kimatstoya ika kipaleuiskiaj niman kiyolchikauaskiaj iamigos, ken Jonatán niman ueyi teopixki Ahimélec (1 Sam. 20:​41, 42; 21:​6, 8, 9). Niman maski tekiuaj Saúl kinekiya kimiktis, David ouel omakis. David kuajli kimatstoya ika Jehová kitstoya tlenon kixnamiktoya niman tlenon kimachiliaya.

9. ¿Tlenon kitstika Jehová?

⁹ Tla tejua tikixnamiktika itlaj tlen ouijtika niman timomojtia, xkilnamiki ika Jehová xsan kitstika tlen mopan nochiujtok, noijki kimatstika kenon timomachilia. ¿Kenon tikmatij yejon? Pampa Biblia kijtoua ika ijkuak israelitas nemiyaj ken esclavos ne Egipto, Jehová kimatstoya kenon noyolkokouayaj niman tlajyouiayaj (Éx. 3:7). Ipan se tlakuikajli, David okijto ika Jehová yokitaka kenon tlajyouiaya niman kenon melak noyolkokouaya (Sal. 31:7). ToTajtsin noijki melak najmanaya ijkuak kitaya kenon akin nemiyaj ipan ikalpan tlajyouiayaj ipampa tlen xkuajli kitlapejpeniayaj (Is. 63:9). Melak techyolchikaua tikmatiskej ika ijkuak tomojtiaj, Jehová techasikamati niman kineki techpaleuis niman ijkon maka sa matomojtikan.

10. ¿Tlenon kichiua xneltoka ika Jehová najmana mopampa niman ika nochipa mitspaleuis?

 ¹⁰ Tla tikixnamiktokej itlaj tlen ouijtika niman techmojtia, kanaj xueli tikitaj kenon Jehová techpaleuijtika. ¿Tlenon uelis tikchiuaskej? Matikijlikan matechpaleui matikitakan tlenon kichiujtika topampa (2 Rey. 6:​15-17). Sakin, matitlanemilikan itech yejuin: ¿Otechyolchikauj se tlamachtijli noso itlaj tlen onoijto ipan tlanechikojli? ¿Otechyolchikauj se amatlajkuilojli, se video noso se tlakuikajli? ¿Kanaj se tokniuj otechijli se texto noso itlaj tlen otechyolchikauj? Kemantika kanaj uelis tikilkauaskej ika tlen techmaka ikalpan Jehová niman tlen tokniuan kichiuaj topampa, ualeua itech Jehová (Is. 65:13; Mar. 10:​29, 30). Nochi yejuin kiteititia ika toTajtsin najmana topampa niman ika kineki nochipa itech matitlaneltokakan (Is. 49:​14-16).

11. ¿Tlenon okipaleui Aida maka manomojti?

¹¹ Se tokniuj siuatl de Senegal akin itoka Aida, okixnamik itlaj tlen ouijtika niman okitak kenon Jehová okipaleui. Pampa yejua akin más iueyi katka, itajuan kinekiyaj makitlani miyek tomin para kinpaleuis niman para kipiyas tlen noneki. San ika, xmás miyek tomin kitlaniya pampa yejua precursora katka. Ichanejkauan melak okualankej niman kitejteneuayaj. Aida techijlia kenon nomachiliaya, yejua kijtoua: “Melak nechmojtiaya niknemilis ika xniuelis nikinpaleuis notajuan niman ika oksekimej manechtejteneuakan. Hasta oniktlajtlakolti Jehová ipampa tlen nopan nochiujtoya”. San ika, se tonajli, tokniuj Aida okikak se tlamachtijli tlen melak okipaleui. Yejua kijtoua: “Tokniuj otechilnamikti ika Jehová kimatstika kenon melak toyolkokouaj. Noijki, tlayekankej niman oksekimej tokniuan onechpaleuijkej manikilnamiki ika Jehová nechtlasojtla, niman yejon onechpaleui más kuajli maninomachili. Opeuj más niknotsa Jehová pampa nikmatiya ika nechpaleuiskia. Niman pampa nikitaya kenon nechnankiliaya, melak oniyolseuj”. Sakin, tokniuj Aida okinexti se tekitl tlen kikauiliaya matlapaleui ken precursora niman noijki okinpaleui itajuan niman oksekimej. Yejua kijtoua: “Aman más nitlaneltoka itech Jehová. Ijkuak niknotsa, nechpaleuiya maka sa maninomojti”.

 ¿TLENON KICHIUAS JEHOVÁ IKA TLAYEKAPAN?

12. Ken kijtoua Salmo 56:​9, ¿tlenon kuajli kimatstoya David?

¹² (Xpoua Salmo 56:9). Yejuin tlaxelojli techititia tlenon más okichiuj David niman ijkon xnomojtis maski ueliskia kimiktiskiaj: yejua otlanemili itech tlen Jehová kichiuaskia ipampa ika tlayekapan. David kimatstoya ika toTajtsin kimakixtiskia ijkuak nonekiskia. Matikilnamikikan ika Jehová yokijtojka ika David tekiuajtiskia ne Israel (1 Sam. 16:​1, 13). Niman noijki, David kimatstoya ika Jehová yemelak kichiuaskia tlen yokijtojka.

13. ¿Tlenon kichiuas Jehová ika tlayekapan?

¹³ ¿Tlenon yokijto toTajtsin kichiuas topampa? Jehová xkijtoua tla aman xtikixnamikiskej tlen ouijtika. c San ika, kema kijtoua ika ipan yenkuik tlaltikpaktli kipopolos nochi tlen xkuajli tikixnamiktokej (Is. 25:​7-9). Kuajli tikmatstokej ika toTajtsin melak kojtik niman ika uelis kinyolitis akin yomijkej, uelis techpajtis niman uelis kinpopolos nochimej totlauelikniuan (1 Juan 4:4).

14. ¿Itech tlenon uelis titlanemiliskej?

¹⁴ Ijkuak timomojtis, xtlanemili itech tlen Jehová kichiuas ika tlayekapan. Xkonnemili kenon tinemiskej ijkuak kipopoloskej Satanás, ijkuak xok nemiskej akin xkuajkualtin, ijkuak san nemiskej akin kipiyaj kuajli inyojlo niman ijkuak ika yolik popoliujtias tlajtlakojli tlen tikpiyaj. Ipan se ueyi tlanechikojli yeyi tonajli tlen onopanolti ipan 2014, onoteititi itlaj tlen techpaleuiya más matitlaneltokakan itech tlen tikchiaj ika tlayekapan. Onopanolti se tlamauisojli kampa se tokniuj kimititijtoya ichanejkauan kenon kijtoskia 2 Timoteo 3:​1-5 tla yeskia se teotlajtojli itech ken tinemiskej ipan xochitlalpan. Ijkin okijto: “Ipan yenkuik tlaltikpaktli nochiuas tlen sanoyej kuajli. Pampa nochimej notlasojtlaskej; kinekiskej kichiuaskej tlen toTajtsin kineki, yolyemankej yeskej, kitlakaitaskej toTajtsin, kintlakamatiskej intajuan, tetlasojkamachiliskej niman yolmelajkanemiskej, kintlasojtlaskej inchanejkauan, notlajtolnamikiskej, nochipa kuajli tlajtoskej intech oksekimej, uelis inselti noteltiskej, yolyemankej yeskej, kitlasojtlaskej tlen kuajli, uelis intech titlaneltokaskej niman teasikamatiskej, yejuamej xnoueyimatiskej, kitlasojtlaskej toTajtsin niman xtlen yejuamej kinekij, niman ika nochi inyojlo kiueyichiuaskej toTajtsin. Nochipa imiuan xnemi”. ¿Tokojtiliaj titlajtoskej imiuan tofamilia niman tokniuan itech kenon tinemiskej ipan yenkuik tlaltikpaktli?

15. ¿Tlenon okipaleui Tanja makixiko tlen ouijtika kixnamiktoya?

¹⁵ Tanja, se tokniuj siuatl akin chanti Macedonia del Norte, ouel okixiko tlen ouijtika kixnamiktoya pampa otlanemili itech tlen Jehová yokijto techmakas. Itajuan melak okualankej ijkuak opeuj nomachtia Biblia. Yejua kijtoua: “Nonan nochipa nechmaaya ijkuak yoniajka tlanechikoltin. Niman onechijlikej ika nechmiktiskiaj tla nejua ninochiuaya iteixpantijkauj Jehová”. Tanja okikixtijkej de ichan. ¿Kenon onomachili? Yejua kijtoua: “Opeuj niknemilia ika tla nimelajkanemiya itech Jehová, nochipa niyolpakiskia. Niman maski aman nikpoloskia seki tlemach, ipan yenkuik tlaltikpaktli Jehová nechteochiuaskia niman kichiuaskia manikilkaua nochi tlen xkuajli nopan yonochiujka”. Tanja omelajkanen itech Jehová niman ouel okinexti kanon chantis. Ononamikti iuan se tokniuj akin yolmelajki, niman aman chikauak kitekichiuiliaj Jehová ika nochi inyojlo.

 MATOKOJTILIKAN MÁS MATITLANELTOKAKAN ITECH JEHOVÁ

16. ¿Tlenon techpaleuis maka matomojtikan ijkuak nochiuas tlen kijtoua Lucas 21:​26-28?

¹⁶ Ijkuak panotos ueyi tlajyouilistli, miyekej “yolpopoliuiskej ikan innemojtil”. San ika, akin tiktekichiuiliaj toTajtsin xtomojtiskej niman timelajkanemiskej (xpoua Lucas 21:​26-28). ¿Tleka xtomojtiskej? Pampa titlaneltokaskej itech Jehová. Tanja kijtoua ika nochi tlen okixnamik kipaleuiya makixiko tlen más ouijtika. Yejua kijtoua: “Yonikitak ika Jehová uelis techpaleuis niman techteochiuas maski san tlenon tikixnamikiskej. Kemantika kanaj tiknemiliskej ika oksekimej uelis texchiualtiskej itlaj matikchiuakan, san ika, Jehová más kojtik xijkon ken yejuamej. Maski tikixnamikiskej tlen melak ouijtika, san ontlamis”.

17. ¿Kenon techpaleuis texto del año 2024? (Xkita tlaixkopinajli tlen nesi ixpan yejuin revista).

¹⁷ Maski ipan yejuin tlaltikpaktli miyek onka tlen techmojtia, ijkon ken David, tejuamej xtokauiliaj ika nochi yejon matechtelti. Texto del año 2024 kisa ipan Salmo 56:​3, kampa David okijli Jehová: “Ijkuak ninomojtia, motech niktlalia noyojlo”. Se amatlajkuilojli tlen tlajtoua itech Biblia, yejuin okijto itech tlen kijtoua yejuin tlaxelojli: “David xsan tlanemilijtoya itech tlen kimojtiaya nion itech tlen kixnamiktoya, yejua tlaneltokaya itech akin ueliskia kimakixtiskia”. Nochipa xkilnamikto texto del año, niman más ijkuak tikixnamikis itlaj tlen ouijtika. Xxelo tiempo niman ijkon titlanemilis itech tlen Jehová yokichiuj, tlen kichiujtika niman tlen kichiuas. Ijkon, noijki uelis tikijtos tlen David okijto ipan Salmo 56:​4, kampa kijtoua: “Niktlalia noyojlo motech noDios niman xninomojtia”.