NKHANI YOPHUNZILA 1
NYIMBO 38 Mulungu Akupase Mphamvu
Mukogonjesa Wowa Mwa Kudalila Yehova
LEMBA YA CAKA CA 2024: “Neo nikodalila mweo siku iliyonse yaningacite wowa.”—SAL. 56:3.
ZATI TIPHUNZILE
Tiphunzile mwatingatang’ishile cidalilo casu pa Yehova nogonjesa wowa.
1. Ndaŵa yanji tingacite wowa nthawi ziyakine?
TONSE tucita wowa nthawi ziyakine. Koma cifukwa cakuti tuziŵa zayuphunzisa Baibo, tuyopa lini ŵanthu akufwa, viŵanda olo zinthu zingaticitikile msogolo. Olo n’tetyo, tunkhala m’nthawi zovuta, ndipo tingacite wowa na zinthu monga nkhondo, zaciwawa na matenda. (Luka 21:11) Payakine tingoyopa soti ŵanthu kuyangizhyilapo maboma na abanja ŵasu amene osusha kulambila kwacendi. Ayakine ocita nkhaŵa poganiza kuti angakwanishe lini kupilila ciyeso cakukumana naco pali lomba olo cangayokumana naco msogolo.
2. Fotokozani zecitikila Davide peenze ku Gati.
2 Nthawi ziyakine Davide enzocita wowa. Mwacisanzo, Mfumu Sauli peenzofuna kumupaya, Davide eutukila ku Gati, mzinda wa Afilisiti. Pakaliyopita nthawi itali, Akisi mfumu ya ku Gati eziŵa kuti Davide enze msoja wamphamvu wamene epaya Afilisiti ‘masausande anyinji.’ Cifukwa ca izi, Davide “ecita wowa ngako.” (1 Sam. 21:10-12) Ecita nkhaŵa poganiza zaangamucite Akisi. Kansi Davide egonjesa tyani wowa wake?
3. Molingana na Salimo 56:1-3, 11, kansi Davide egonjesa tyani wowa wake?
3 Mu Salimo 56, Davide ofotokoza mweenzomvwila peenze ku Gati. Caputa ici cufotokoza lini tyala cifukwa cake Davide ecita wowa, koma cufotokoza soti zemuyavya kuti agonjese wowa wake. Pecicita wowa, Davide edalila Yehova. (Ŵelengani Salimo 56:1-3, 11.) Yove enze na vifukwa vomvwika vomucitisha kudalila Yehova. Moyavyiwa na Yehova, eganiza zocita cinthu ciyakine cosiyanako. Ezipanga monga ni wofuntha. Izi zecitisha kuti Akisi amulole kuti alute, m’malo momupaya. Tetyo, Davide epulumuka.—1 Sam. 21:13–22:1.
4. Kansi tingatang’ishe tyani cidalilo casu pa Yehova? Fotokozani cisanzo.
4 Nase tingagonjese wowa mwa kudalila Yehova. Koma kansi tingatang’ishe tyani cidalilo casu pa Yehova makamaka ngati tacita wowa? Ganizilani cisanzo ici. Ngati mwazindikila kuti muli na matenda ayakine, poyamba mungacite wowa. Koma wowa wanu ungacepeko ngati mudalila dokota. Dokota uyu angankhale kuti eyavyako ŵanthu anyinji amene enze na matenda olingana na ŵanu. Angakumvwishileni mosamala nokusimikizhyilani kuti omvwisha mwamumvwila. Ndipo angakulembeleni mankhwala amene eyavya ŵanthu ayakine. Molingana na izi, nase tingatang’ishe cidalilo casu pa Yehova mwa kuganizila zinthu zawacitako kale, zakucita pali lomba na zati akaticitile msogolo. Izi niye zecicita Davide. Patulaŵizhyana ayakine mwa mau ŵake ouzhyiliwa opezeka mu Salimo 56, ganizilani mwamene namwe mungatang’ishile cidalilo canu pa Yehova nogonjesa wowa wanu.
ZAWACITAKO KALE YEHOVA
5. Kuti agonjese wowa wake, kansi Davide enzoganizila pa cinji? (Salimo 56:12, 13)
5 Olo pa nthawi pamene umoyo wake wenze pangozi, Davide enzoganizila pa zinthu zecicitako kale Yehova. (Ŵelengani Salimo 56:12, 13.) Izi niye zeenzocita Davide mu umoyo wake wonse. Mwacisanzo, enzosinkhasinkha pa zinthu zecilenga Yehova. Kucita izi kwenzomukumbusha za mphamvu zikulu zaali nazo Yehova na cikondi cake pa ŵanthu. (Sal. 65:6-9) Enzosinkhasinkha soti pa mwamene Yehova eyavyila ŵanthu ayakine. (Sal. 31:19; 37:25, 26) Kuyangizhyila apo, enzosinkhasinkha pa zinthu zecimucitila yove payeka. Yehova eyavya Davide nomuteteza kufumila peenze lucece. (Sal. 22:9, 10) Ganizilani tyala mwamene kusinkhasinkha pa zinthu izi kwetang’ishila cidalilo cake pa Yehova.
Davide etang’isha cidalilo cake pa Yehova mwa kuika maganizo ŵake pa zinthu zeenze ecitako kale Yehova, zeenzocita pa nthawi iyi na zeenze kuzocita msogolo (Onani ndime 5, 8, 12) d
6. Ngati tacita wowa, kansi n’cinji cingatiyavye kudalila Yehova?
6 Mukacita wowa, mukozikonsha kuti: ‘Kansi Yehova wacitako kale zinthu zotyani?’ Mukoganizila zinthu zecilenga. Mwacisanzo, ‘tikaloleshesha’ mwamene Yehova osamalilila tunyoni na maluŵa, tingatang’ishe cidalilo casu cakuti akotisamalila. Vinthu ivi viliyolengewe m’cifanizilo cake koma soti vukwanisha lini kum’lambila. Olo n’tetyo, yove ovisamalila. (Mat. 6:25-32) Mukoganizila soti zinthu zamene Yehova wacitila atumiki ŵake. Mungaphunzile nkhani ya m’Baibo ya munthu wamene eonesha cikhulupililo cotang’a olo mungaŵelenge cokumana naco ca mtumiki wa Yehova wa masiku ŵano. a Kuyangizhyila apo, mukoganizila pa mwawakusamalililani Yehova. Kansi ekuyavyani tyani kuti muphunzile cendi? (Yoh. 6:44) Kansi wayankha tyani mapemphelo ŵanu? (1 Yoh. 5:14) Kansi mupindula tyani siku iliyonse na nsembe ya Mwana wake wokondeka?—Aef. 1:7; Aheb. 4:14-16.
Tutang’isha cidalilo casu pa Yehova mwa kuika maganizo ŵasu pa zinthu zecicitako kale, zakucita pali lomba na zati akacite msogolo (Onani ndime 6, 9-10, 13-14) e
7. Kansi zecitikila mneneli Danieli zeyavya tyani kalongosi Vanessa kugonjesa wowa?
7 Kalongosi Vanessa, b wa ku Haiti ekumana na vuto yocitisha wowa. Munalume muyakine wa ku dela kwao, enzomutumila foni nomulembela mameseji siku iliyonse pofuna kumukakamizhya kuti ankhale naye pa cisumbali. Koma kalongosi Vanessa ekana. Cifukwa ca izi, munalume uyu ekalipa ngako ndipo emuyofya kuti amucite cinthu ciipa. Kalongosi Vanessa elaŵila kuti: “Necita wowa.” Kansi n’cinji cemuyavya kugonjesa wowa uyu? Ecitapo kanthu kuti aziteteze. Mkulu muyakine wa mumpingo mwao emuyavya kuti auzhye olamulila. Koma eganizila soti pa mwamene Yehova etetezela atumiki ŵake a m’nthawi zakuvuli. Kalongosi Vanessa elaŵila kuti: “Munthu woyamba weneganizila enze mneneli Danieli. Yove eponyewa m’cisengu ca nkhalamu zamene zenze na njala olo kuti enze wosalakwa. Koma Yehova emupulumusa mwa kuvala pakamwa pa nkhalamu. Tetyo, neika nkhani yonse m’manja mwa Yehova. Pavuli pake, niliyocite soti wowa.”—Dan. 6:12-22.
ZAKUCITA YEHOVA PALI LOMBA
8. Kansi Davide enze wosimikizhya za cinji? (Salimo 56:8)
8 Olo kuti umoyo wa Davide wenze pangozi ikulu peenze ku Gati, yove aliyoike ngako maganizo pa vinthu venzomucitisha wowa. M’malo mwake, eika maganizo ŵake pa zeenzocita Yehova pa nthawi yamene ila. Davide enzoziŵa kuti Yehova enzomusogolela nomuteteza na kuti enzomvwisha mweenzomvwila. (Ŵelengani Salimo 56:8.) Kuyangizhyila apo, enze na ayake monga Yonatani na Mkulu wa Ansembe Ahimeleki amene enzomuyavya nomulimbikisha. (1 Sam. 20:41, 42; 21:6, 8, 9) Ndipo olo kuti Mfumu Sauli enzofuna kumupaya, Davide epulumuka. Yove enze wosimikizhya kuti Yehova enzoziŵa mayeselo yonse yeenzokumana nayo na mweenzomvwila.
9. Kansi Yehova oziŵanji zokhuza aliyense wa seo?
9 Ngati mwakumana na ciyeso camene cukucitishani wowa, mukokumbukila kuti Yehova oziŵa ciyeso camukumana naco koma soti mwamumvwila. Mwacisanzo, Yehova eona osati tyala mwamene Aisiraeli enzovutishiwila ku Iguputo, koma na “voŵaŵa” veenzopitamo. (Eks. 3:7) Davide eimba kuti Yehova eona “kusaushika” kwake na “zoŵaŵa zemuponela.” (Sal. 31:7) Ndipo atumiki a Mulungu peenzovutika cifukwa ca zosankha zao zolakwika, “naye enzovutika.” (Yes. 63:9) Tetyo, ngati mwacita wowa, Yehova omvwisha mwamumvwila ndipo ni wofunishisha kukuyavyani kuti mugonjese wowa wanu.
10. Ndaŵa yanji nimwe osimikizhya kuti Yehova osamala za mweo na kuti akuyavyeni kupilila ciyeso ciliconse?
10 Ngati mukumana na ciyeso cikulu, payakine mungaone lini mwakukuyavyilani Yehova. Ngati n’tetyo, kansi mufunika kucitanji? Mukomusenga kuti akuyavyeni kuona thandizo yake. (2 Maf. 6:15-17) Pavuli pake, mukoganizila izi: Kansi paliko nkhani olo ndemanga yepelekewa pa msonkhano wa mpingo yamene yekutang’ishani? Kansi paliko cofalisa, vidyo olo nyimbo ya m’gulu iyakine yamene yekulimbikishani? Kansi paliko munthu muyakine wamene ekuuzhyani mau olo kukuŵelengelani lemba yolimbikisha? Nthawi ziyakine tingaleke kuona mwamene cikondi ca akwasu na azilongosi koma soti cilimbikiso catupeza m’Mau a Mulungu zutiyavyila. Koma zinthu izi ni mphaso yamtengo wapatali yofumila kuli Yehova. (Yes. 65:13; Mko. 10:29, 30) Mphaso izi zutisimikizhyila kuti Yehova otisamalila. (Yes. 49:14-16) Zutisimikizhyila soti kuti tufunika kumudalila.
11. N’cinji ceyavya kalongosi Aida kugonjesa wowa wake?
11 Kalongosi Aida wamene onkhala ku Senegal, eona mwamene Yehova emucilikizila pa nthawi yecikumana na ciyeso. Cifukwa cakuti yove niye mwana mkulu, makolo ŵake enzoyembekezela kuti akopeza ndalama zokwanila zakuti akozisamalila yeka koma soti kuŵasamalila. Koma pavuli pakuti wasankha kunkhala na umoyo wosalila zinyinji na colinga cakuti ayambe upainiya, kalongosi Aida eyamba kunkhala na ndalama zitontho. Cifukwa ca izi, banja yake yekalipa noyamba kumunyoza. Kalongosi Aida elaŵila kuti: “Nenzoyopa kuti nikokwanisha lini kuyavya makolo ŵangu na kuti aliyense anikane. Nefwika mpaka poimba mlandu Yehova cifukwa colola kuti vinthu vifwike paipa teti.” Pavuli pake, emvwishila nkhani pa msonkhano. Elaŵila kuti: “Wolaŵila nkhani etikumbusha kuti Yehova oziŵa zucitisha aliyense wa seo nkhaŵa olo wowa. Tetyo, patontho-patontho kupitila m’malangizo ŵa akulu na ayakine, nenkhala wosimikizhya kuti Yehova onikonda. Neyamba kupemphela kwa Yehova nili na cidalilo cakuti akoniyavya. Ndipo peneona kuti mapemphelo ŵangu ayankhiwa, nenkhala na mtendele wa mu mtima.” M’kuluta kwa nthawi, Aida epeza nchito yamene yenzomuyavya kupeza ndalama zokwanila kuti apitilizhye kucita upainiya noyavya banja yake. Elaŵila kuti: “Naphunzila kudalila Yehova na mtima wangu wonse. Lomba, nikapemphela kwa Yehova, wowa wangu usila.”
ZATI AKACITE YEHOVA MSOGOLO
12. Molingana na Salimo 56:9, kansi Davide enze wosimikizhya za cinji?
12 Ŵelengani Salimo 56:9. Vesi iyi yuonesha cinthu ciyakine camene ceyavya Davide kugonjesa wowa wake: Olo kuti umoyo wake wenze ukali pangozi, enzosinkhasinkha pa vinthu veenze kuzomucitila Yehova msogolo. Yove enzoziŵa kuti Yehova enze kuzomupulumusa pa nthawi yoyenela. Ndipo Yehova enze elengeza kale kuti Davide enze kuzonkhala mfumu ya Isiraeli yokonkhapo. (1 Sam. 16:1, 13) Tetyo, Davide enze wosimikizhya kuti Yehova akwanilishe malonjezo ŵake.
13. Kansi tingankhale osimikizhya kuti Yehova akacite cinji?
13 Kansi Yehova wakulonjezani cinji? Tuyembekezela lini kuti Yehova akotipewesha m’mavuto onse. c Koma mukokumbukila kuti mavuto yonse yamungakumane nayo m’calo cino, Yehova akayasilizhye m’calo calomba. (Yes. 25:7-9) Nyamalenga wasu ali na mphamvu zokwanisha kuukisha akufwa, kutipolesha nocosapo ŵanthu onse osusha.—1 Yoh. 4:4.
14. Kansi tingasinkhesinkhe pa cinji?
14 Ngati mwacita wowa, mukosinkhasinkha pa zati akacite Yehova msogolo. Mukoganizila mwati mukamvwile, Satana akayocosewapo, ŵanthu aipa akayoonongewa nosala tyala ŵanthu olungama koma soti pamene kusoŵa ungwilo kwasu kukosila patontho-patontho siku iliyonse. Cisanzo ciyakine pa msonkhano wacigao wa mu 2014, ceonesha mwatingaganizilile pa ciyembekezo casu. M’cisanzo ici, atata elaŵizhyana na banja yao mwamene lemba ya 2 Timoteyo 3:1-5 ingamvwikile mosiyanako kuti mavesi aŵa elosela zati zikacitike m’Paladaiso. Elaŵila kuti: “M’calo calomba, ikankhale nthawi yapadela koma soti yosangalasa. Pakuti ŵanthu akankhale okonda ayao, okonda zinthu zauzimu, olicefya, otamanda Mulungu, omvwila makolo, oyamikila, okhulupilika, okonda abanja ŵao, ofuna kukatizhyana na ayao, olaŵila zabwino zokhuza ayao, ozilesha, ofasa, okonda zabwino, odalilika, ololela, osameka, okonda Mulungu m’malo mokonda zosangulusha koma soti ozipeleka kwa Mulungu. Ŵanthu oteti ukokatizhyana nao.” Kansi mulaŵizhyana na banja yanu olo okhulupilila ayanu zokhuza mwati ukankhalile umoyo m’calo calomba?
15. Olo kuti Tanja enze ecita wowa, kansi n’cinji cemuyavya kugonjesa wowa wake?
15 Ganizilani zecitikila kalongosi Tanja wa ku North Macedonia. Makolo ŵake enzomulesha kuphunzila Baibo. Koma kusinkhasinkha pa zati akacite Yehova msogolo kwemuyavya kuti apitilizhye kunkhala wokhulupilika olo kuti enze ecita wowa. Elaŵila kuti: “Viyakine mwa vinthu venenzoyopa kuti vinganicitikile, venicitikila cendi. Amama enzoniniata nthawi zonse nikaluta ku misonkhano. Makolo ŵangu eniyofya kuti anipaye ngati ningankhale wa Mboni za Yehova.” Posilizhyila pake, makolo ŵake emupisha pa ng’anda pao. Kansi kalongosi Tanja ecitanji? Elaŵila kuti: “Neika maganizo ŵangu pa mwati nikasangalalile mpaka kale-kale cifukwa copitilizhya kunkhala wokhulupilika. Neganizila soti pa mwati akanidalisile Yehova m’calo calomba pa vinthu vonse vaningataye m’calo cino na mwati tikaluŵile vinthu vonse viipa.” Kalongosi Tanja epitilizhya kunkhala wokhulupilika ndipo moyavyiwa na Yehova, epeza malo onkhala. Lomba, elunguliwa na mkwasu wokhulupilika ndipo otumikila pamozi mwacimwemwe mu utumiki wanthawi zonse.
TANG’ISHANI CIDALILO CANU PA YEHOVA PALI LOMBA
16. N’cinji cati cikatiyavye kuti tikakwanishe kunkhala otang’a mtima tikayoona zocitika zeloselewa pa Luka 21:26-28?
16 Pa cisauso cikulu, “ŵanthu akakomoke cifukwa ca wowa.” Koma atumiki a Mulungu akapitilizhye kunkhala otang’a mtima. (Ŵelengani Luka 21:26-28.) Ndaŵa yanji seo tikacite lini wowa? Cifukwa pa nthawi iyi tikankhale kuti tephunzila kale kudalila Yehova. Kalongosi Tanja watatomola lombapano elaŵila kuti zecikumana nazo m’nthawi zakuvuli zumuyavya kunkhala wotang’a mtima akakumana na mavuto. Elaŵila kuti: “Naphunzila kuti Yehova angatiyavye kupilila vuto iliyonse notidalisa. Nthawi ziyakine zingaoneke monga kuti ŵanthu ayakine niye ali na mphamvu pa vinthu vonse. Koma cendi n’cakuti Yehova ali na mphamvu kupambana ŵanthu amene ao. Ndipo olo kuti ciyeso cingankhale covuta kucipilila, cikasile pa nthawi iyakine.”
17. Kansi lemba yasu ya caka ca 2024 itiyavye tyani? (Onani cithunzithunzi ca pacikuto.)
17 Masiku ŵano, pali vinthu vinyinji vamene vuticitisha wowa. Koma molingana na Davide, tingagonjese wowa uyu. Lemba yasu ya caka ca 2024, ni pemphelo ya Davide yakuti: “Neo nikodalila mweo siku iliyonse yaningacite wowa.” (Sal. 56:3) Kaswili muyakine wa Baibo, elaŵila za vesi iyi kuti: “Davide enzoika lini maganizo pa vinthu venzomucitisha wowa olo pa mavuto ŵake. M’malo mwake, enzodalila Womuombola.” M’miyezi ikuza, mukoganizila pa lemba yasu ya caka makamaka ngati mwakumana na mavuto ocitisha wowa. Mukosinkhasinkha pa nchito za Yehova zamphamvu zecicita m’nthawi zakuvuli, zakucita pali lomba na zati akacite msogolo. Mukacita izi, namwe mungalaŵile monga ni mwecilaŵilila Davide kuti: “Neo nudalila Mulungu, niyope lini.”—Sal. 56:4.
Pa nthawi ya soka ya cilengedwe, kalongosi oganizila pa lemba ya caka (Onani ndime 17)
KANSI MUNGAGONJESE TYANI WOWA MWA KUGANIZILA PA . . .
-
zecicita Yehova kuvuli?
-
zakucita Yehova pali lomba?
-
zati akacite Yehova msogolo?
NYIMBO 33 Tulila Yehova Nkhaŵa Zako
a Mungapeze nkhani zotang’isha cikhulupililo pa jw.org m’Chichewa mwa kulemba mau akuti “tsanzirani chikhulupiriro chawo” olo “zochitika pa moyo wa a Mboni za Yehova” m’kabokosi kofufuzila. Pa JW Library® pansi pa nkhani zosiyanasiyana, mungalute polemba kuti “Tsanzirani Chikhulupiriro Chawo” olo “Zokumana Nazo.”
b Mazina ayakine acinjiwa.
c Onani buku ya m’Chichewa yakuti Yandikirani kwa Yehova mutu 7, ndime 13-22.
d MAU OFOTOKOZA VITHUNZITHUNZI: Davide oganizila pa mwamene Yehova emupasila mphamvu kuti akwanishe kupaya cimbalangondo, mweenzomuyavyila kupitila muli Ahimeleki na mweenze kuzomuyavyila kuti ankhale mfumu.
e MAU OFOTOKOZA CITHUNZITHUNZI: Mkwasu wamene ali m’jele cifukwa ca cikhulupililo cake, osinkhasinkha pa mwamene Yehova emuyavyila kuti aleke kupepa fwaka, omuyavyila kupitila m’makalata ofumila kuli okondeka ŵake na mwati akamupasile moyo wosasila m’Paladaiso.
