1. Ndaŵa yanji nthawe ziyakine tingachite wowa?

 MUNTHU aliyense ochita wowa nthawe ziyakine. N’chendi kuti kuphunzila Baibolo kwatiyavya kuti osati tikoyopa akufwa, mizimu, komasoti vinthu vakusogolo. Koma sewo tikalinkhala munthawe yamene muchitika “vizindikilo voyofya” monga nkhondo, ukapondo, na matenda. (Luk. 21:11) Tingochita soti wowa na ŵanthu, kupamikijapo maboma amene otishusha olo achibale ŵasu amene oshusha kulambila kwachendi. Ayakine odela nkhaŵa kuti payakine angakwanishe lini kupilila mayeselo ŵakukumana nawo palipano olo ŵangezekumana nawo kusogolo.

2. Fotokozani mwevenzele vinthu pamoyo wa Davide penze ku Gati.

² Pa nthawe iyakine Davide echitapo wowa. Mwachisanzo, Mfumu Sauli penzemupitikisha kuti amupaye, Davide eganiza zothaŵila ku tauni ya Afilisiti ku Gati. Akisi mfumu yaku Gati ichimvwa kuti Davide enze mwanalume waluso pankhondo wamene epaya Afilisiti “masauzande mateni-mateni.” Davide “echita wowa ngako.” (1 Sam. 21:10-12) Yove enzedela nkhaŵa ponena za vangamuchite Akisi. Kansi Davide egonjesa tyani wowa wake?

3. Mokatijana na Salimo 56:1–3, 11, kansi Davide egonjesa tyani wowa wake?

³ Mu Salimo 56, Davide efotokoza mwenzemvwila muntima mwake pa nthawe yenze ku Gati. Mu Salimo yamene iyi Davide efotokoza momvwika luweme chifukwa chenzechitila wowa, koma yove efotokozasoti chimuyavya kuti ankhale wotang’a ntima. Pa nthawe yenzechita wowa, Davide edalila Yehova. (Ŵelengani Salimo 56:1-3, 11.) Davide enze na vifukwa viweme vodalila Yehova. Moyavyiwa na Yehova, Davide eganiza kuti achite chinthu chiyakine chachilwendo ngako: Yove eyopejela kunkhala silu ndipo pulani yake yamene iyi imuyendela luweme! Mmalo  mofuna kumupaya, Akisi emupitikisha Davide vamene vechitisha kuti Davide apulumuke.—1 Sam. 21:13–22:1.

4. Kansi tingatang’ishe tyani chikhulupililo chasu mwa Yehova? Pelekani chisanzo.

⁴ Sewo nase tingagonjese wowa wasu keno tudalila Yehova. Koma kansi tingachite tyani kuti tikomudalila ngako Yehova maka-maka pa nthawe yatili na wowa? Ganizilani fanizo iyi. Mukaziŵa kuti muli na matenda, payakine mungachite wowa poyamba. Koma olo n’tetyo, wowa wanu ungachepe keno mumudalila dokota wanu. Payakine yove ŵayavyapo kale ŵanthu anyinji amene enzelwala matenda amene awo. Yove okumvwishilani pamumufotokozela vukuchitishani wowa ndipo muwona kuti okuganizilani. Payakinesoti angakupaseni thandizo yamene iyavyapo kale ŵanthu ayakine. Molingana na vamene ivi, chikhulupililo chasu mwa Yehova chukula mwa kuganizila vinthu vawachita kale kuvuli, vakuchita lomba teti, komasoti vakuyembekezela kuchita kusogolo. Vamene ivi niye vechichita Davide. Patukambilana ayakine mwa mawu ŵake oujiliwa apa Salimo 56, namwe ganizilani mwamungatang’ishile chikhulupililo chanu mwa Yehova nogonjesa wowa wanu.

KANSI N’CHINJI CHAWACHITA KALE YEHOVA?

5. Kansi Davide echita chinji kuti agonjese wowa wake? (Salimo 56:12, 13)

⁵ Olo kuti moyo wa Davide wenze pa ngozi, yove epitilija kuganizila vinthu vechichita Yehova kuvuli. (Ŵelengani Salimo 56:12, 13.) Chamene ichi n’chimozi mwa vinthu venzechita Davide pamoyo wake wonse. Mwachisanzo, nthawe ziyakine yove enzeganizila vinthu vechilenga Yehova, vamene venzemukumbusha za mphamvu zikulu za Yehova komasoti chidwi chikulu chali nacho kuli ŵanthu. (Sal. 65:6-9) Davide enzeganizila vechichita Yehova kuli ŵanthu ayakine. (Masal. 31:19; 37:25, 26) Komasoti mwapadela, yove enzeganizila vinthu vechimuchitila Mulungu monga munthu payeka. Yehova enzemuyavya Davide komasoti kumuteteza kufumila ali ntontho. (Sal. 22:9, 10) Kulaŵila chendi, kuganizila vamene ivi kwemuyavya Davide kutang’isha chikhulupililo chake mwa Yehova!

6. Tikankhala na wowa, kansi n’chinji chingatiyavye kudalila Yehova?

⁶ Mukankhala na wowa mungachite luweme kulikonsha kuti, ‘Kansi nivinthu votyani vawanichitila kale Yehova?’ Ganizilani vinthu  vechilenga. Mwachisanzo, “lolesheshani” mwamene Yehova mwakusamalila tunyoni na maluŵa—vinthu vamene viliyelengewe m’chifanizilo chake komasoti vingakwanishelini kumulambila—mwakuchita vamene ivi, sewo tingatang’ishe chikhulupililo chasu chakuti nase azatisamalile. (Mat. 6:25-32) Mukoganizilanisoti vawachitila atumiki ŵake Yehova. Mungasankhe kuphunzila za munthu muyakine wa m’Baibolo wamene enze na chikhulupililo chotang’a, olo mungaŵelenge vechikumana navo ntumiki muyakine wa Yehova wa masiku ŵano. a Kuyangijila pamene apo, mukoganizila mwakukusamalilani kale Yehova. Kansi yove ekudonselani tyani m’chonadi? (Yoh. 6:44) Kansi yove oyankha tyani mapemphelo ŵanu? (1 Yoh. 5:14) Kansi mupindula tyani nsiku na nsiku chifukwa cha nsembe ya mwana wake wokondewa?—Aife. 1:7; Ahe. 4:14-16.

7. Kansi vechitikila mneneli Danieli vemuyavya tyani Vanessa kuti agonjese wowa wake?

⁷ Mulongo muyakine waku Haiti zina yake Vanessa, b enzekumana na vuto iyakine yochitisha wowa. Mwanalume muyakine wamudela yawo, enzemutumila foni komasoti kumulembela mamesedji nsiku iliyonse pomukakamija kuti ankhale naye pachibwenzi. Koma Vanessa emuuja momvwika luweme kuti ofunalini kuchita vamene ivo. Koma mwanalume wamene uyo enzemukakamija mwamphamvu ndipo efwika pomuyofyeja kuti amuchite chinthu chiyakine chiipa. Yove enena kuti: “Newo nechita wowa.” Kansi Vanessa echita tyani kuti agonjese wowa wake? Yove echitapo kanthu kuti aliteteze. Nkulu muyakine emuyavya kuti akumane na akulu-akulu aboma. Koma yove enzeganizilasoti mwamene Yehova mwechitetezela atumiki ŵake akuvuli. Vanessa enena kuti: “Munthu woyambilila weniganizila enze mneneli Danieli. Yove eponyewa m’chisengu champhondolo zanjala olo kuti enze wosaphoniya. Koma olo n’tetyo, Yehova emusamalila. Newo nemusenga Yehova kuti asamalile nkhani yonse yamene iyo. Pavuli pake, newo niliyechitesoti wowa.”—Dan. 6:12-22.

KANSI N’CHINJI CHAKUCHITA YEHOVA PALIPANO?

8. Kansi Davide enzewosimikijila za chinji? (Salimo 56:8)

⁸ Olo kuti Davide enze pangozi ikulu pa nthawe yenze ku Gati, yove enzeganizilalini ngako za vinthu venzemuchitisha wowa. Koma mmalo mwake, yove esankha kuganizila venzemuchitila Yehova panthawe yamene iyo. Davide enzeziŵa kuti Yehova omusogolela nomuteteza komasoti kuti enzemvwisha mwenzemvwila yove muntima mwake. (Ŵelengani Salimo 56:8.) Davide enzesoti na azishamwali monga Yonatani komasoti Nkulu wa ansembe Ahimeleki amene enzemutang’isha komasoti kumupasa vinthu venzefunikila. (1 Sam. 20:41, 42; 21:6, 8, 9) Olo kuti Mfumu Sauli yenzefuna kumupaya, Davide ekwanisha kuthaŵa ndipo epulumusha moyo wake. Yove enzekhulupilila kuti Yehova oziŵa luweme za mavuto ŵake komasoti mwenzemukhuzila.

9. Kansi Yehova owona chinji kuli aliyense wa sewo?

⁹ Mukakumana na mavuto amene okuchitishani wowa, mukokumbukila kuti Yehova owona mayeselo ŵanu komasoti omvwisha mwamumvwila. Mwachisanzo, sikuti Yehova ewona tyala mwenzetamanila Aisiraeli ku Iguputo, koma yove ewonasoti vinthu “voŵaŵa [venzekumana navo].” (Eks. 3:7) Davide eimba kuti Yehova enzewona “kutamana” komasoti ‘voŵaŵa vimuponela.’ (Sal. 31:7) Komasoti ŵanthu a Mulungu penzevutika—olo pachifukwa chosasankha luweme—“yove naye enzevutika.” (Yes. 63:9) Mukayamba kuchita wowa  Yehova omvwisha mwamumvwila ndipo ni wokonzeka kukuyavyani kugonjesa wowa wanu.

10. Kansi n’chinji chukusimikijilani kuti Yehova okuganizilani ndipo azakuyavyeni kupilila vuto iliyonse?

¹⁰ Keno mukumana na chiyeso choyofya, payakine mungakwanishelini kuwona mwakukuyavyilani Yehova. Chifukwa cha vamene ivi, mukomusenga kuti akuyavyeni kuwona mwakukuyavyilani. (2 Maf. 6:15-17) Pavuli pake, ganizilani vinthu ivi vokonkhapo: Kansi mwamvwa nkhani olo ndemanga iyakine yamene yakutang’ishani? Kansi pali chofalisa, vidiyo, kapena nyimbo iyakine ya Broadcasting® yamene yatang’isha chikhulupililo chanu? Kansi mwechimvwa mawu olo Lemba yotang’isha kufumila kuli munthu muyakine? Nthawe ziyakine tingaluŵe mwachutiyavyila chikondi chikulu cha abale na alongo ŵasu komasoti mawu otang’isha ŵatulondela kufumila m’Mawu a Mulungu. Koma olo n’tetyo, vinthu vamene ivi ni mphaso zapadela zofumila kwa Yehova. (Yes. 65:13; Mko. 10:29, 30) Mphaso zamene izi zuwonesha kuti yove okuganizilani. (Yes. 49:14-16) Komasoti zuwonesha kuti mwewo muwamila kumudalila.

11. Kansi n’chinji chimuyavya Aida kugonjesa wowa wake?

¹¹ Aida wamene onkhala ku Senegal, ewona mwechimuyavyila Yehova panthawe yenzekumana na mayeselo. Chifukwa chakuti yove niye mwana nkulu, makolo ŵake enzeyembekezela kuti akofwana ndalama zokwanila kuti akolisamalila yeka pamozi na ove. Koma pavuli pakuti wayamba moyo wosafuna vinthu vinyinji kuti akwanishe kuchita upainiya, yove eyamba kukumana na vuto ya zachuma. Achibale ŵake pali pano omukalipila ngako komasoti kumuzuzula. Yove enena kuti: “Nenzechita wowa kuti nikangiwe kusamalila makolo ŵangu komasoti kuti ŵanthu anikane. Newo nefwika poimba mulandu Yehova chifukwa cholola kuti vinthu viipe ngako tetyo.” Pavuli pake, mulongo wamene uyu emvwishila nkhani iyakine pa misonkhano. Yove enena kuti: “M’bale wolaŵila nkhani, etikumbusha kuti Yehova oziŵa vuchitisha aliyense wa sewo kunkhala na nkhaŵa payakine kuchita wowa. Mwa patontho na patontho, kupitila muli malangizo ŵechinipasa akulu komasoti ŵanthu ayakine, chikondi cha Yehova chenisisimula. Penipemphela kwa Yehova niyamba kunkhala na  chidalilo chikulu kuti yove aniyavye, ndipo nifwana ntendele ukulu peniziŵa kuti Mulungu enzeyankha mapemphelo ŵangu.” Pa nthawe imo na imo yamene iyo, Aida efwana ntchito yamene imuyavya kufwana ndalama zochitila upainiya komasoti zosamalila makolo ŵake na ŵanthu ayakine. Yove enena kuti: “Naphunzila kudalila Yehova na ntima wangu wonse. Palipano, nikangopemphela kwa Mulungu wowa wangu usililatu.”

KANSI N’CHINJI CHATI AZACHITE YEHOVA KUSOGOLO?

12. Mokatijana na Salimo 56:9, kansi Davide enzewosimikija ntima za chinji?

¹² Ŵelengani Salimo 56:9. Vesi yamene iyi yufotokoza njila iyakine yechigonjesela wowa wake Davide. Olo kuti moyo wake wenze pangozi, yove enzeganizila vangamuchitile Yehova. Davide enzeziŵa kuti Yehova azamupulumushe panthawe iweme. Ndipo kulaŵila chendi, Yehova enze enenelatu kuti Davide niye wati azankhale Mfumu yokonkhapo ya Isiraeli. (1 Sam. 16:1, 13) Davide enzeziŵa kuti vinthu vonse vechilonjeza Yehova vizachitike chendi.

13. Kansi tingankhale na chidalilo chakuti Yehova azachite chinji?

¹³ Kansi Yehova olonjeza kuti azakuchitileni chinji mwewo? Sewo tuyembekezelalini kuti yove akotiteteza ku mavuto onse. c Koma olo n’tetyo, vuto iliyonse yamungakumane nayo muli chino chalo chiipa, Yehova azaisilije mu chalo chanyowani chamene chikuza. (Yes. 25:7-9) Kulaŵila chendi, Nyamalenga wasu ali na mphamvu zokwanila kuusha akufwa, kupojeka olwala, komasoti kuchosa oshusha onse.—1 Yoh. 4:4.

14. Kansi tufunikila kuganizila za chinji?

¹⁴ Mukayamba kuchita wowa, mukoganizila vinthu vati azachite Yehova kusogolo. Ganizilani mwati muzamvwile Satana akezechosewa, ŵanthu aipa akezeloŵewa mmalo na ŵanthu olungama, komasoti uchimo ukezeyamba kusila nsiku na nsiku. Chisanzo chapa nsonkhano wachigawo wa 2014, chifotokoza vatingachite poganizila za chiyembekezo chasu. Tata wa mu chisanzo chamene icho, ekambilana na banja yake mwatingaipindamulile lemba ya 2 Timoteyo 3:1-5 ponena za vinthu vativizachitike m’Paladaiso ponena kuti: “Masiku am’chalo chanyowani izankhale nthawe yokodwelesha ngako. Pakuti ŵanthu azankhale okonda ayawo, okonda chuma chauzimu, olichefya, otamanda Mulungu, omvwila makolo, otembeja, okhulupilika, okonda achibale ŵawo, okatijana na ayawo, olaŵilila ayawo viweme, olilesha, ofasa, okonda viweme, odalilika, akumvwa va ayawo, osalitumba, osameka, okonda Mulungu mmalo mokonda vosangalasa, olipeleka kwa Mulungu na ntima wonse: Ŵanthu amene awo ankhale ayako apantima.” Kansi mwewo mukambilanako na ŵanthu am’banja mwanu olo okhulupilila ayanu vokhuza mwatiuzankhalile moyo mu chalo chanyowani?

15. Olo kuti Tanja enze na wowa, kansi chinji chimuyavya kugonjesa wowa wake?

¹⁵ Mulongo muyakine wamene onkhala kumpoto kwa Macedonia zina yake Tanja, egonjesa wowa wake mwakuganizila za madaliso akusogolo. Makolo ŵake enzemushusha mwamphamvu pechiyamba kuphunzila Baibolo. Yove enena kuti: “Viyakine mwa vinthu venenzeyopa kuti vinganichitikile, vechitika chendi. Amayi ŵangu nthawe zonse enzeniniyata nikafuma kumisonkhano. Makolo ŵangu eniuja kuti azanipaye nikankha wa Mboni za Yehova.” Posilijila pake, Tanja emuutukisha pang’anda makolo ŵake. Kansi yove echita tyani? Yove enena kuti: “Niganizila ngako zamwaningankhalile wosangalala mpaka kale-kale nikankhala munthu woyondoloka ntima. Neganizilasoti za mwanganidalisile Yehova mu chalo chanyowani pa chilichonse chaningaluze muli chino chalo  chiipa, komasoti mwaningezeluŵila vinthu vonse viipa.” Tanja epitilija kunkhala wokhulupilika. Ndipo moyavyiwa na Yehova, yove efwana malo onkhala. Palipano Tanja elunguliwa na m’bale wokhulupilika ndipo otumikila pamozi mosangalala muutumiki wanthawe zonse.

TANG’ISHANI CHIKHULUPILILO CHANU MWA YEHOVA

16. Kansi n’chinji chingatiyavye kunkhala otang’a ntima tikawona vinthu veloselewa pa Luka 21:26-28?

¹⁶ Pa chisauso chikulu, ŵanthu anyinji “azakomoke chifukwa cha wowa.” Koma ŵanthu a Mulungu azankhale mphela onkhazikika komasoti otang’a ntima. (Ŵelengani Luka 21:26-28.) Ndaŵa yanji tizachitelini wowa? Chifukwa chakuti taphunzililatu kudalila Yehova. Tanja watafotokoza poyamba, enena kuti vinthu vechikumana navo kuvuli, vumuyavya kulimbana na mavuto ŵakukumana nawo palipano. Yove enena kuti: “Naphunzila kuti Yehova angatiyavye kupilila vuto iliyonse komasoti kutidalisa. Nthawe ziyakine vingawoneke kuti ŵanthu ayakine niye oyambisha mavuto ŵasu, koma Yehova ni wamphamvu ngako kupambana ove.”

17. Kansi lemba yasu ya chaka cha 2024 ingatiyavye tyani? (Onani chithunzi chapachikuto.)

¹⁷ Masiku ŵano, pali vinthu vinyinji vamene vingatichitishe wowa. Koma molingana na Davide, sewo tingakwanishe kukana kuti wowa ukotilamulila. Lemba yasu yachaka cha 2024, ni pemphelo yechipeleka Davide kwa Yehova yamene yunena kuti: “Newo nizadalile mwewo, nsiku iliyonse yanikuti nizachite wowa.” (Sal. 56:3) Onani vechinena kaswili muyakine wa Baibolo pa vesi yamene iyi, yove enena kuti: “Davide enzengonkhalilalini kuganizila za vinthu venzemuchitisha wowa olo mavuto ŵake, mmalo mwake yove enzedalila wala wamene enze na mphamvu zomupulumusha.” Mukoganizila lemba yasu ya chaka cha 2024 myezi yokonkhapo, maka-maka mukezeyamba kukumana na vinthu vochitisha wowa. Mukopatula nthawe yoganizila vinthu vechichita Yehova kuvuli, vakuchita pali pano, komasoti vati azachite kusogolo. Mukachita vamene ivi, mwewo muzakatijane naye Davide wamene enena kuti: “Newo nudalila Mulungu; Nizachitelini wowa.”—Sal. 56:4.