1. Ahabw’enki obumwe nitutiina?

 OBUMWE twena nitutiina. Kwonka, okwega Baibuli kutuhweraire kutatiina abafu, amaani agatarikwetegyerezibwa, nari ekiraabeho omu biro by’omumaisho. Kwonka tukiri omu bwire oburimu “ebirikutiinisa,” nk’entaro, okuhenda ebiragiro, n’endwara. (Luk. 21:11) Nitubaasa n’okutiina abantu, otwariiremu gavumenti nari ab’eka yaitu abarikuhakanisa okuramya okw’amazima. Abamwe nibatiina ngu tibaraabaase kugumisiriza okugyezibwa oku barikurabamu nari okuraabahikyeho nyentsye.

2. Shoboorora embeera ei Daudi yaabaire arimu obu yaabaire ari omuri Gaasi.

² Obumwe Daudi akaba naatiina. Nk’eky’okureeberaho, obu Omugabe Saulo yaabaire naamuhiiga arikwenda kumwita, Daudi akacwamu kuhungira Gaasi omu rurembo rw’Abafilistia. Omugabe wa Gaasi, Akishi, ahonaaho akamanya ngu Daudi akaba ari omurwani rugambwa owaahimbisiibwe omu kyeshongoro ahabw’okwita “obukumi” bwa Abafilistia. Daudi ‘akatiina munonga’ ahabw’eki Akishi yaabaire naija kumukora. (1 Sam. 21:​10-12) Daudi akasingura ata okutiina?

3. Kurugiirira ahari Zaaburi 56:​1-3, 11, Daudi akasingura ata okutiina?

³ Omu Zaaburi eya 56, Daudi akooreka enyehurira ezi yaabaire aine ari Gaasi. Zaaburi egyo neeyoreka ahabw’enki yaatiinire, n’oku yaasingwire okutiina okwo. Daudi ku yaatiniire,  akeesiga Yehova. (Shoma Zaaburi 56:​1-3, 11.) Akaba aine enshonga nungi ezaamureetaire kumwesiga. Ahabw’okuhwerwa Yehova, Daudi akakora ekintu kitari kya butoosha, kwonka ekyamugasiire, akeegwitsa eiraro. Akishi akamureeba nk’omugwiraro otarikubaasa kubahitsyaho akabi, ekyo kikabaasisa Daudi kuhunga.—1 Sam. 21:13–22:1.

4. Nitubaasa kwongyera tuta kwesiga Yehova? Ha eky’okureeberaho.

⁴ Naitwe nitubaasa kusingura okutiina twayesiga Yehova. Kwonka nitubaasa kwongyera tuta kwesiga Yehova, na munonga twaba tutiniire? Teekateeka aha ky’okureeberaho eki. Waarwara, noobanza kutiina. Kwonka, okutiina okwo nikutuuba waayesiga omushaho waawe. Naabaasa kuba atwire naajanjaba abarwaire baingi abaine endwara nk’eyaawe. Naabaasa kukuhurikiza gye, akuhamize ngu naayetegyereza oku orikwehurira. Kandi akugambire obujanjabi obuhweraire baingi. Nikyo kimwe, nitwongyera kwesiga Yehova twateekateeka aha bi yaakozire, ebi arikukora, n’ebi araatukorere. Ekyo nikyo Daudi yaakozire. Twaba nitushwijuma bimwe aha bi yaahandiikire omu Zaaburi ya 56, teekateeka aha ku orikubaasa kwongyera kwesiga Yehova kandi okasingura okutiina.

YEHOVA YAAHERIZE KUKORA KI?

5. Daudi akateekateeka ahari ki kubaasa kusingura okutiina? (Zaaburi 56:​12, 13)

⁵ Obu Daudi yaabaire ari omu kabi, akateekateeka munonga aha bi Yehova yaabaire amukoraire. (Shoma Zaaburi 56:​12, 13.) Daudi akaba naakira kukora ekyo. Nk’eky’okureeberaho, obumwe akaba ateekateeka aha bi Yehova yaahangire, bimwijutsya amaani ga Yehova agarikukirayo n’oku arikufayo munonga aha bantu. (Zab. 65:​6-9) Daudi akaba naateekateeka n’aha ku Yehova yaahweraire abandi. (Zab. 31:19; 37:​25, 26) Kandi okukira munonga, akateekateeka aha ku Yehova yaabaire amuhweraire. Akaba atwire naamushagika kandi arikumurinda kuruga omu buto. (Zab. 22:​9, 10) Teebeereza oku okuteekateeka ahari ebyo kyahweraire Daudi kwongyera kwesiga Yehova!

6. Niki ekirikubaasa kutuhwera kwesiga Yehova twatiina

 ⁶ Waatiina yebuuze oti: ‘Ni bintu ki ebi Yehova yaaherize kukora?’ Teekateeka aha bi yaahangire. Nk’eky’okureeberaho, ‘twayetegyereza’ gye oku Yehova arikureeberera ebinyonyi n’ebirabyo ebitarahangirwe mu kishushani kye, kandi ebitarikubaasa kumuramya, nitwija kwongyera kugira obwesigye ngu naitwe naija kutureeberera. (Mat. 6:​25-32) Teekateeka n’aha ki Yehova akooraire abaheereza be. Noobaasa kwega aha muntu orikugambwaho omu Baibuli owaayorekire okwikiriza kw’omutaano, nari oshome aha muheereza wa Yehova ow’obunaku obu. a Kandi teekateeka aha ku Yehova akureeberaire. Akakuhwera ata kumanya amazima? (Yoh. 6:44) Agarukiremu ata okushaba kwawe? (1 Yoh. 5:14) Noogasirwa ota buri izooba omu kitambo ky’Omwana we omukundwa?—Efe. 1:7; Heb. 4:​14-16.

7. Ebi nabi Daniel yaarabiremu bikahwera bita Vanessa kusingura okutiina?

⁷ Vanessa, b munyaanyazi-itwe omuri Haiti, akahikwaho embeera erikutiinisa munonga. Omushaija omu kicweka kyabo akaba naamuteerera esimu buri izooba, kandi arikumwoherereza obutumwa arikumugyemesereza kugira omukago nawe. Vanessa akamugambira butunu ngu tarikwenda. Kwonka omushaija ogwo akatandika kumutwariza kubi n’okumutiinatiinisa. Vanessa naagira ati: “Nkatiina munonga.” Akasingura ata okutiina? Akateeraho kwerinda. Omureeberezi akamuhiga kumanyisa ab’obushoboorozi. Kandi akata omutima aha ku Yehova yaarinzire abaheereza be ira. Vanessa naagira ati: “Nkabanza kuteekateeka ahari nabi Danieli. Akanagwa omu kiina ky’entare ataine rubanja. Yehova akamurinda. Embeera yangye nkagita omu mikono ya Yehova. Kuruga obwo tindagarukire kutiina.”—Dan. 6:​12-22.

NIKI EKI YEHOVA ARIKUKORA?

8. Daudi akaba aine buhame ki? (Zaaburi 56:8)

⁸ N’obu Daudi yaabaire naabaasa kwitirwa omuri Gaasi, tarataire mutima aha byabaire nibimureetera kutiina. Omu mwanya gw’ekyo, akacwamu kuteekateeka aha ki Yehova yaabaire naamukorera omu bwire obwo. Daudi akaba naabaasa kureeba ngu Yehova naamwebembera, naamurinda, kandi naayetegyereza enyehurira ze. (Shoma Zaaburi 56:8.) Daudi akaba aine abanywani nka Yonasaani, n’Omunyamurwa Omukuru Ahimeleki, abaamuhamiireho kandi bakamushagika. (1 Sam. 20:​41, 42; 21:​6, 8, 9) Kandi akabaasa kuhunga n’obu Omugabe Saulo yaabaire naayenda kumwita. Buzima akaba naahamiza kimwe ngu Yehova naayetegyereza embeera ei arikurabamu n’oku yaabaire neekwata aha nyehurira ze.

9. Niki eki Yehova arikwetegyereza yaareeba buri omwe ahariitwe?

⁹ Waagyezibwa kandi okatiina, ijuka ngu Yehova naayetegyereza okugyezibwa oku orikurabamu n’oku kurikukureetera kwehurira. Nk’eky’okureeberaho, Yehova akeetegyereza ngu Abaisraeli bakaba nibatwarizibwa kubi omuri Misri, kandi akaba ‘naamanya n’obusaasi bwabo.’ (Kur. 3:7) Daudi akeeshongora ngu Yehova, akamanya ‘obusaasi bwe, n’enaku ye.’ (Zab. 31:7) Kandi abaheereza ba Ruhanga ku baabonaboine ahabw’okucwamu kubi ‘akabagirira esaasi.’ (Isa. 63:9) Waatiina, Yehova naayetegyereza oku orikwehurira kandi  naaba aine ekihika ky’okukuhwera kusingura okutiina.

10. Ahabw’enki noohamya ngu Yehova naakufaho, kandi ngu naija kukuhwera kwemera okugyezibwa kwa buri muringo?

¹⁰ Kwonka noobaasa kuba nooyebuuza oku Yehova arikukushagika waahikwaho okugyezibwa okurikutiinisa. Noobaasa kumushaba kukuhwera kureeba oku arikukikora. (2 Bag. 6:​15-17) Yebuuze oti: Orubazo nari eby’okugarukamu omu ruteerane byangumya? Ebiri omu kitabo eki, vidiyo nari ekyeshongoro ekihimbirwe byangumya? Haine okugambiire ekyahandiikirwe ekirikugumya? Nitubaasa kutasiima ab’eishe-emwe bagyenzi baitu nari eby’okurya by’omwoyo ebi turikutunga. Kwonka, ebi n’ebiconco by’omuhendo kuruga ahari Yehova. (Isa. 65:13; Mak. 10:​29, 30) Nibihamya ngu naatureeberera. (Isa. 49:​14-16) Kandi nibyoreka ngu tushemereire kumwesiga.

11. Niki ekyahweraire Aida kusingura okutiina?

¹¹ Aida, orikutuura omuri Senegal, akeetegyereza oku Yehova yaamuhweraire omu kugyezibwa. Ahabw’okugira ngu n’omujigaijo omu ka, abazaire be bakaba nibamanya ngu naija kukora esente zirikumara kubareeberera n’okwereeberera. Kwonka Aida ku yaayorobize omu mbeera ze kugira ngu abe payoniya akatunga obureemezi omu by’entaasya. Ab’eka ye bakamucwera orubanja kandi baamugirira ekiniga. Naagira ati: “Nkatiina ngu tindabaase kuhwera abazaire bangye kandi ngu buri omwe naija kunyanga. Nangwa nkacwera Yehova orubanja ahabw’okundeka nkahikwaho embeera mbi nk’egyo.” Bwanyima akahurira orubazo omu ruteerane. Naagira ati: “Omugambi akatwijutsya ngu n’obu twakuba twine busaasi ki omu mutima, Yehova naabumanya. Mpora mpora, ahabw’obuhabuzi bw’abareeberezi n’abandi, nkahamiza kimwe ngu Yehova naankunda. Nkatandika kushaba Yehova nyine obwesigye, n’obusingye bw’omu mutima ahabw’okureeba naagarukamu okushaba kwangye.” Bwanyima, Aida akatunga omurimo ogwamubaasiise kwebaisaho ari payoniya kandi akareeberera n’abazaire  be. Naayongyeraho ati: “Nyegire kwesigira kimwe Yehova, kandi hati ku ndikumushaba tindikugaruka kutiina.”

YEHOVA NAIJA KUKORA KI?

12. Kurugiirira ahari Zaaburi 56:​9, Daudi akaba aine bwesigye ki?

¹² Shoma Zaaburi 56:9. Omushororongo ogu nigworeka omuringo ogundi oku Daudi yaasingwire okutiina. N’obu yaabaire ari omu kabi akateekateeka aha bi Yehova yaabaire naija kumukorera. Daudi akaba naamanya ngu Yehova naija kumujuna omu bwire obuhikire. Kandi, Yehova akaba yaamugizire ngu niwe araabe omugabe wa Israeli. (1 Sam. 16:​1, 13) Daudi akaba naahamiza kimwe ngu Yehova naija kuhikiriza ebi yaamuraganiise.

13. Nitubaasa kugira bwesigye ki omuri Yehova?

¹³ Yehova araganiise kukukorera ki? Toine kuteekateeka ngu Yehova naija kukurinda kutahikwaho oburemeezi bwona. c Kwonka, n’obu waakuhikwaho okugyezibwa kwa muringo ki, Yehova naija kukwihaho omu nsi ensya. (Isa. 25:​7-9) Omuhangi waitu aine amaani g’okuzoora abaafiire, kutukiza, n’okwihaho boona abarikutuhakanisa.—1 Yoh. 4:4.

14. Nitubaasa kuteekateeka ahari ki?

¹⁴ Waatiina, teekateeka aha ki Yehova araakore omu biro by’omumaisho. Teera akashushani oku oraayehurire Sitaane obu araabe atakiriho, abantu ababi batakiriho hariho abahikiriire, n’okutahikiirira kurikwongyera kuhwaho buri izooba. Aha ruteerane oruhango orw’ebiro bishatu 2014, tukareeba omu ky’okureeberaho oku turikubaasa kuteekateeka aha matsiko gaitu. Nyineeka akaba naahikaanisa ebiteekateeko n’eka ye aha ku ebiri omu 2 Timoseo 3:​1-5 birikubaasa kugambwa waaba noogamba ahari Paradiso. Akagira ati: “Kwonka omanye eki ngu, omu nsi ensya, nihaija kubayo okushemererwa. Ahakuba abantu nibaija kuba abarikukunda abandi, abarikukunda eby’omwoyo, abarikutwaza gye, abacureezi, abarikuhimbisa Ruhanga, abarikworobera abazaire baabo, abarikusiima, abarikwera, abarikukunda abaabo, abeesigwa, abatarikubeiherera abandi, abarikweyangisa, abarikukunda ebirungi, abatarikureebyana, abarikuhurira, abatarikwekuza, abarikukunda Ruhanga okukira okweshemeza bonka, abarikuhamira ahari Ruhanga bakaikiriza obushoboorozi bwe; abantu nk’abo obe nibo waayehitsya.” Noogaaniira n’ab’eka yaawe nari ab’eishe-emwe bagyenzi baawe oku embeera ziraabe ziri omu nsi ensya?

15. N’obu Tanja yaabaire atiinire, niki ekyamuhweraire kuguma ari omwesigwa?

¹⁵ Munyaanyazi-itwe Tanja owa North Macedonia akasingura okutiina arikuteekateeka aha migisha y’ebiro by’omumaisho. Abazaire be bakamuhakaanisa munonga obu yaabaire naayega Baibuli. Naagira ati: “Bimwe aha bintu ebi naabaire ntiinire ngu nibibaasa kubaho bikabaho. Maawe akaba anteera buri kuruga omu nteerane. Kandi tata akantiinatiinisa ngu naaba Omujurizi wa Yehova naija kunyita.” Empereruka, Tanja akabingwa omu ka. Akatwaza ata? Naagira ati: “Nkata omutima aha ku naabaire niinyija kushemererwa ebiro byona naacwamu kuguma ndi omwesigwa. Kandi nkateekateeka aha ku Yehova yaabaire naija kushumbusha omu nsi ensya ahabwa byona ebi nyefeerereize omu ntebeekanisa y’obusingye obu, n’oku ebintu bibi byona byabaire nibiija kuba bitakiriho.” Tanja akabaasa kuguma ari omwesigwa. Kandi arikuhwerwa Yehova akabaasa kutunga omwanya gw’okutuuramu. Tanja,  hati ari omu bushwere n’ow’eishe-emwe omwesigwa, kandi nibaheereza hamwe omu buheereza bw’obutwire bashemereirwe.

YONGYERA KWESIGA YEHOVA

16. Niki ekiraatuhwere kuguma twine obumanzi twareeba obunabi oburi omuri Luka 21:​26-28 burikuhikiirira?

¹⁶ Omu kubonabona kwingi, abantu boona nibaija kutiina munonga. Kwonka abaheereza ba Ruhanga nibaija kuguma baine obumanzi kandi batatengyetsiibwe. (Shoma Luka 21:​26-28.) Ahabw’enki? Ahabw’okuba nituza kuba twayegire kwesiga Yehova. Tanja owaaba yaagambirweho, naagira ngu embeera ezi yaarabiremu, zimuhweraire kuraba omu mbeera ezindi ezigumire. Naagira ati: “Nyetegyereize ngu Yehova naabaasa kutuhwera kwemera buri mbeera kandi atuhe emigisha.” Obumwe nooshusha ngu abandi baine obushoboorozi ahari buri kimwe, kwonka amazima gari ngu nibabaasa kukora ebyo byonka ebi Yehova arikubaikiriza kukora. Kandi n’obu okugyezibwa kurikuba nikutiinisa nikuhwaho.”

17. Ekyahandiikirwe ky’omwaka 2024 nikiija kutuhwera kita? (Reeba ekishushani ekiri aha kipampagare.)

¹⁷ Na hati hariho ebirikutureetera kutiina. Kwonka, nka Daudi nitubaasa kusiingura okutiina. Ekyahandiikirwe ky’omwaka 2024, kirimu ebigambo ebi Daudi yaakoreise arikushaba Yehova ati: “Ku ndaagume naatiina, ninkwesiga.” (Zab. 56:3) Ekitabo kimwe ekirikushoboorora ahari Baibuli nikigira ngu, Daudi “akaba atarikuta omutima aha kutiina nari obureemezi, kureka ahari Ogwo owaabaire naija kumujuna.” Teekateeka aha kyahandiikirwe ky’omwaka ogu omu meezi agarikukurataho, na munonga waahikwaho embeera ezirikutiinisa. Teekateeka aha bi Yehova yaakozire ira, ebi arikukora hati, n’ebi araije kukora omu biro by’omumaisho. Reero nka Daudi, noobaasa kugira oti: “Ruhanga niwe ndikwesiga, tinditiina.”—Zab. 56:4.