1. Thangwe ranyi nthawe zinango timbabva mantha?

 MUNTHU ali-wentse nthawe zinango ambabva mantha. Tsono pakuti timbadziwa bzomwe Bibliya limbalewa, timbacita lini mantha na anyakufa, na madimonyo ayai na bzomwe bzin’dzacitikira wanthu kutsogolo. Koma pakuti tikukhala mu ntsiku zakunesa tingacite mantha na “bzinthu bzakugopswa,” ninga nkhondo, ciwembo na matenda. (Luka 21:11) Ndipo tingacitembo mantha na wanthu ninga maboma ayai wanthu wa m’banja mwathu omwe ambayezera kutiletsa kunamata Yahova. Abale winango ambakumbuka kuti angakwanise lini kupirira mabvuto yomwe akugumana nayo tsapano ayai yomwe angadzagumane nayo kutsogolo.

2. Fotokozani bzomwe bzidacitika pomwe Davide akhali ku Gate.

² Nthawe zinango Davide adabvambo mantha. Mwa ciratizo, pomwe Mambo Sauli akhamutewera m’mbuyo kuti amuphe, iye adathawira ku mzinda wa Afilisteu, ku Gate. Mambo wa ku Gateko, Akisi, adadziwa kuti Davide akhali mcikunda omwe adapha acikunda wa Afilisteu wakukwana “10 000.” Davide “adacita mantha kwene-kwene.” (1 Samuyeli 21:10-12) Iye adakhala na thupo kuti Akisi angadamupha. N’ciyani comwe cidathandiza Davide kuti akhale wakukhwimika?

3. Mwakubverana na Salimo 56:1-3, 11, kodi n’ciyani comwe Davide adacita kuti akunde mantha?

³ Mu Salimo 56, Davide adafotokoza momwe akhabvera pomwe akhali ku Gate. Mu salimo limweri, iye adafotokoza cinthu comwe cikhamucitisa kubva mantha ndipo adafotokozambo bzomwe bzidamuthandiza kuti akunde manthayo. Pomwe akhacita mantha, Davide adathemba Yahova. (Werengani Salimo 56:1-3, 11.) Iye akhana mathangwe yakubveka yakukhulupira Yahova. Mwakuthandizidwa na Yahova, Davide adacita cinthu cinango cakudabwisa. Iye adayezezera kuti akhali nyamsala, ndipo bzimwebzi bzidacitisa kuti bzinthu bzimufambire bwino. Pomwe Akisi adawona bzimwebzi,  iye alibe kufuna kupha Davide, iye adandofuna kuti Davideyo acoke mu mzinda wawoyo. Tenepo, Davide adapulumuka. — 1 Samuyeli 21:13–22:1.

4. Kodi mungalimbise tani cikhulupiro canu kwa Yahova? Fotokozani.

⁴ Ifepanombo tingakhale wakugwa nfuwa na kucita bzinthu mwanzeru napo pomwe tina mantha. Tsono kodi tingakulise tani cikhulupiro cathu kwa Yahova, maka-maka tikakhala tina mantha? Mbatiwoneni ciratizo ici: Imwepo mukakhala mwadziwa kuti muna matenda, pakuyamba mungacite mantha. Tsono imwepo mungamalise mantha yanu mwa kuthemba dotolo. Dotoloyo angakhale adathandiza kale wanthu azinji omwe akhana matenda ninga yanuyo. Iye angakutetekereni mwatceru pomwe mukumufotokozera bzomwe bzikukucitisani mantha, ndipo mungakwanisembo kuwona kuti iye akucita namwe thupo. Iye angakuuzeni bza thandizo linango la ulapi lomwe lidathandizambo wanthu winango omwe akhana matenda ninga yanuyo. Mwakundendemerana na bzimwebzi, timbalimbisa cikhulupiro cathu kwa Yahova tikambawona bzomwe iye adacita kale, bzomwe iye akucita na bzomwe an’dzacita kutsogolo. Bzimwebzi ndibzo bzomwe Davide adacita. Pomwe tikucezerana bzomwe Davide adanemba m’bukhu la Salimo 56, kumbukirani momwe mungalimbisirembo cikhulupiro canu kwa Yahova na kupitiriza kukhala wakugwa mpfuwa mukakhala muna mantha.

KODI N’CIYANI COMWE YAHOVA ADACITA KALE?

5. Kodi n’ciyani comwe Davide adakumbukira kuti akwanise kukunda mantha yace? (Salimo 56:12, 13)

⁵ Napo kuti bzinthu bzikhali lini bwino pa moyo wa Davide, iye adapitiriza kukumbukira bzinthu bzabwino bzomwe Yahova akhadamucitira kale m’mbuyo. (Werengani Salimo 56:12, 13.) Davide adacita bzimwebzi kwa moyo wace wentse. Mwa ciratizo, iye akhakumbukira bzinthu bzomwe Yahova adalenga. Bzimwebzi bzidamukumbusa kuti Yahova ana mphanvu ndipo ambafuna kwene-kwene wanthu. (Salimo 65:6-9) Davide adakumbukirambo bzomwe Yahova adacitira wanthu winango. (Salimo 31:19; 37:25, 26) Ndipo iye adakumbukirambo bzomwe Yahova akhadamucitira kale payekha. Yahova adathandiza na kusamalira Davide kuyambira pomwe Davideyo akhali mwana. (Salimo 22:9, 10) Kukumbukira bzinthu bzimwebzi kudathandiza Davide kulimbisa cikhulupiro cace kwa Yahova!

6. Tikakhala na mantha, n’ciyani cingatithandize kuti tikhulupire Yahova?

 ⁶ Mukakhala muna mantha, bzibvunzeni kuti: ‘Kodi n’ciyani comwe Yahova adandicitira kale?’ Kumbukirani bzomwe iye adalenga. Mwa ciratizo, “nyang’anisisani” momwe Yahova ambasamalirira mbalame na maluwa, napo kuti alibe kubzipasa makhalidwe yace ndipo bzimbamunamata lini. Tsono tani ifepano? Bzikuwonekeratu kuti iye an’dzatisamalira. Kukumbukira bzimwebzi kun’dzatithandiza kuti timukhulupire kwene-kwene Yahova. (Mateu 6:25-32) Onanimbo bzomwe Yahova adacitira kale atumiki wace. Imwepo mungapfunze ciratizo ca m’Bibliya ca munthu omwe adalatiza cikhulupiro ayai mungawerenge nkhani ya mtumiki wa Yahova wa ntsiku zino. a Kuthumizira bzimwebzi, kumbukirani bzomwe Yahova adakucitirani kale m’mbuyomu. Kodi iye adakuthandizani tani kuti mumudziwe? (Juwau 6:44) Kodi iye adatawira tani mipembo yanu? (1 Juwau 5:14) Kodi ni phindu liponi lomwe imwepo munalo thangwe ra ntsembe ya Mwana wace wapamtima? — Aefezo 1:7; Ahebereu 4:14-16

7. Kodi nkhani ya mpolofeta Daniyeli idathandiza tani Vanessa kukunda mantha yace?

⁷ Mpfumakazi inango yakucemeredwa Vanessa, b yomwe imbakhala ku Haiti, idagumana na nkhani yakupasa mantha kwene-kwene. Mwamuna munango wa komwe iye ambakhala akhambamufonera na kumbamutumizira mensaje ntsiku zentse acimbamungingimiza kuti akhale naye pa umakhadzi. Tsono Vanessa adamuuza mwakubveka bwino kuti angadacita lini bzimwebzo. Mwamunayo adayamba kucita bzinthu mwa ukali ndipo adafika pa kumugopswa. Vanessa adalewa kuti: “Inepano ndidacita mantha kwene-kwene.” Kodi n’ciyani comwe Vanessa adacita? Iye adacita bzomwe angadakwanisa kuti abzikhotcerere. Mkulu munango adamuuza kuti auze mapolisiya. Ndipo iye adakumbukirambo momwe Yahova adathandizira kale atumiki wace m’mbuyomu. Vanessa adalewa kuti: “Munthu wakuyamba omwe inepano ndidamukumbukira ni mpolofeta Daniyeli. Iye adathusidwa m’dindi lomwe likhana mphondolo napo kuti akhalibe kuphonya cinthu. Napo bzikhali tenepo, Yahova adamusamalira. Ndidakumbira Yahova kuti aisamalire nkhani yentseneyo. Patsogolo pace, ndiribe kukhala pomwe na mantha.” — Daniyeli 6:12-22.

KODI N’CIYANI COMWE YAHOVA AKUKUCITIRANI?

8. Kodi ni citsimikizo ciponi comwe Davide akhanaco? (Salimo 56:8)

⁸ Napo kuti Davide akhali pa ngozi pomwe akhali ku Gate, iye alibe kukumbukira bzinthu bzomwe bzikhamucitisa mantha. M’mbuto mwace, iye akhakumbukira bzinthu bzomwe Yahova akhamucitira pa nthawe imweyo. Davide akhakwanisa kuwona kuti Yahova akhamutsogolera, akhamukhotcerera na kuti akhabvesesa momwe iye akhabvera. (Werengani Salimo 56:8.) Davide akhana axamwali, ninga Jonatani na Mkulu wa Antsembe Aimeleki, omwe adamulimbikisa na kumuthandiza. (1 Samuyeli 20:41, 42; 21:6, 8, 9) Ndipo napo kuti Mambo Sauli akhafuna kumupha, Davide adakwanisa kupulumuka. Iye akhana citsimikizo cakuti Yahova akhadziwa bzomwe bzikhamucitikira na kubvesesa momwe iye akhabvera.

9. N’ciyani comwe Yahova ambawona kwa m’bodzi na m’bodzi wa ifepano?

⁹ Imwepo mukakhala mukugumana na bvuto lomwe likukucitisani kubva mantha, kumbukirani kuti Yahova akuwona bvutolo ndipo akudziwa momwe imwepo mukubvera. Mwa ciratizo, Yahova alibe kundowona mabvuto yomwe Ajirayeri akhagumana nayo ku Edjipito, koma iye adadziwambo “mazunzo yawo.” (Ekisodo 3:7) Davide adaimba kuti Yahova adawona ‘mabvuto yace’ na ‘matsautso yace.’ (Salimo 31:7) Ndipo pomwe  wanthu wa Yahova akhabonera thangwe ra bzakusankhula bzawo bzakusaya nzeru ‘Yahovayo akhabonerambo.’ (Zaiya 63:9) Imwepo mukakhala mukubva mantha, Yahova ambabvesesa momwe mukubvera ndipo ambafunisisa kukuthandizani kumalisa mantha yanuyo.

10. N’ciyani comwe cimbakutsimikizirani kuti Yahova ambakuwonani ndipo an’dzakuthandizani kukunda mabvuto yali-yentse?

¹⁰ Tsono, pinango imwepo mungabzibvunze kuti Yahova akukuthandizani tani uko mukugumana na bvuto lakugopswa. Mukumbireni kuti akuthandizeni kuwona momwe akukuthandizirani. (2 Amambo 6:15-17) Mukamala kumbukirani momwe nkhani yomwe yafotokozedwa na mitawiro yomwe yaperekedwa pa mitsonkhano bzakulimbikisirani. Ndipo kumbukiranimbo momwe mabukhu yathu, mavidiyo ayai nyimbo za broadcasting zakulimbikisiranimbo. Kodi pana munthu omwe wakuwerengerani vesi lomwe lakucitisani kubzibva bwino? Tingayebwe momwe lufoyi lomwe abale na mpfumakazi zathu ambatilatiza na cilimbikiso comwe timbatambira kucokera m’Fala la Mulungu bzimbatithandizira. Zimwezi ni mphaso zabwino kwene-kwene zakucokera kwa Yahova. (Zaiya 65:13; Marko 10:29, 30) Bzinthu bzimwebzi bzikulatiza kuti Yahova ambacita namwe thupo. (Zaiya 49:14-16) Ndipo bzimbalatizambo kuti imwepo mun’funika kumukhulupira.

11. N’ciyani cidathandiza Aida kukunda mantha yace?

¹¹ Mpfumakazi inango yomwe imbakhala ku Senegal, yakucemeredwa Aida, idakwanisa kuwona momwe Yahova akhaithandizira pomwe ikhagumana na mabvuto. Pakuti mpfumakaziyi njakuyamba m’mimba mwawo, abereki wace akhafuna kuti iye akhale na kobiri zizinji kuti akwanise kuwasamalira. Tsono pomwe iye adacinja bzinthu pa moyo wace kuti akhale mpainiya, bzidakhala bzakumunesa kugumana kobiri. Famidya yace idakalipa kwene-kwene ndipo idayamba kumutsutsa. Iye adati: “Inepano ndikhana mantha kuti ningadakwanisa lini kuthandiza abereki wangu na kuti wanthu angadambandilewa. Ndidafika pakupasa mulandu Yahova kuti n’thangwe ranyi iye akhalekerera kuti bzinthu bzifike pakuipa kwene-kwene.” Tsono mpfumakaziyi idabva nkhani yomwe idafotokozedwa ku mitsonkhano. Iye adapitiriza kulewa kuti: “M’bale omwe akhafotokoza nkhaniyo adalewa kuti Yahova ambadziwa bzomwe bzimbaticitisa thupo na mantha. Na thandizo la akulu pabodzi na la  abale winango, pang’ono na pang’ono ndidayamba kukulisa lufoyi langu kwa Yahova. Pomwe ndidapemba kwa Yahova ndidakwanisa kukhala na citsimikizo cakuti iye angadandithandiza ndipo ndidakhalambo na mtendere wa mu mtima pomwe ndikhawona mipembo yangu ikutawiridwa.” Pomwe padapita nthawe, Aida adagumana basa lomwe lidamuthandiza kuti apitirize kucita upainiya na kupitirizambo kusamalira abereki wace. Iye adati: “Ndidapfunza kuthemba Yahova na mtima wangu wentse. Tsapano ndikapemba, mantha yangu yambamala.”

KODI N’CIYANI COMWE YAHOVA AN’DZACITA KUTSOGOLO?

12. Mwakubverana na Salimo 56:9, n’ciyani comwe Davide akhakhulupira?

¹² Werengani Salimo 56:9. Vesiri limbafotokoza cinthu cinango comwe cidathandiza Davide pomwe iye akhana mantha. Napo kuti moyo wace ukhali pa ngozi, Davide adakumbukira bzomwe Yahova an’dzamucitira kutsogolo. Davide akhakhulupira kuti Yahova angadamupulumusa pa nthawe yace. Yahova akhadalewa kale kuti Davide angadakhala mambo wa Ajirayeri. (1 Samuyeli 16:1, 13) Kwa Davide, bzentse bzomwe Yahova adalewa bzikhakhala ninga bzakwanisika kale.

13. Kodi ni citsimikizo ciponi comwe tingakhale naco kwa Yahova?

¹³ Kodi n’ciyani comwe Yahova adapicira kuti an’dzakucitirani? Ifepano timbadikhirira lini kuti iye an’tikhotcerera ku mabvuto yentse. c Tsono kumbukirani kuti bziribe basa bvuto lomwe tigumane nalo m’dziko lino, Yahova an’dzalicosa mu dziko lipsa lomwe likubwera. (Zaiya 25:7-9) Mulengi wathu ana mphanvu ya kulamusa anyakufa, kupoza anyakuduwala na kucosa wanthu wentse omwe ambatiboneresa. — 1 Juwau 4:4.

14. Kodi ni bzinthu bziponi bzomwe tin’funika kumbabzikumbukira?

¹⁴ Mukakhala muna mantha, mbakumbukirani bzomwe Yahova an’dzacita kutsogolo. Mbakumbukirani momwe imwepo mun’dzabvera Sathani akadzacosedwa, wanthu wakuipa akadzacosedwa ndipo kuperewera kukadzamala pang’ono na pang’ono ntsiku iri-yentse. Mtsonkhano wa cigawo wa 2014 udalatiza momwe tingambakumbukirire bza cidikhiro comwe tinaco. Pai munango adacezerana na banja lace momwe cinembo ca 2 Timotio 3:1-5 tingadaciwonera mu njira yakusiyana bzingadakhala kuti mavesi yamweya yambafotokoza momwe bzinthu bzin’dzakhalira m’Paraizo. Bzingadakhala tenepa: “Mu dziko lipsa ntsiku zentse zin’dzakhala zakudekeza. Pakuti wanthu an’dzakhala wakufuna anzawo, wakufuna bzinthu bzauzimu, wakuzindikira malire, wakubzicepesa, anamati wa Mulungu, wakubvera abereki, wakutenda, wakukhulupirika, wakufuna kwene-kwene wanthu wa m’banja mwawo, wakubverana na anzawo, wakusaya kulewa kuipa wanthu winango, wakubziphata, wakugwa mpfuwa, wakudeka mtima, wakubvera, wa mzimu wakubzicepesa, wakufuna Mulungu m’mbuto mwakubzikondwesa okha na wakubzipereka kwa Mulungu. Wanthu amwewa bverana nawo.” Kodi imwepo mumbaceza na wanthu wa m’banja mwanu ayai na wanthu winango bza momwe moyo un’dzakhalira mu dziko lipsa?

15. Napo kuti Tanja akhana mantha, n’ciyani cidamuthandiza kukunda mantha yaceyo?

¹⁵ Mpfumakazi inango yomwe imbakhala ku Macedónia do Norte yakucemeredwa Tanja idakunda mantha yace mwa kumbakumbukira bzisimbo bzomwe in’dzakhala nabzo kutsogolo. Abereki wace akhamuboneresa thangwe rakuti akhapfunza Bibliya. Iye adalewa kuti: “Bzinthu bzinango bzomwe bzikhandipasa mantha bzidacitikadi. Ndikakhala kuti ndacokera ku mitsonkhano, mai wangu akhandimenya nthawe zentse. Abereki wangu adandigopswa kuti angadandipha inepano ningadakhala Mboni ya Yahova.” Patsogolo pace Tanja adathothedwa pa mui. N’ciyani comwe iye adacita? Iye adati: “Ndidayamba kukumbukira momwe ningadzakhalire wakukondwa  mpaka kale-kale ndikasankhula kupitiriza kukhala wakukhulupirika. Ndipo ndidakumbukirambo momwe Yahova an’dzandisimbira mu dziko lipsa mwa kundipasa bzinthu bzentse bzomwe ningaluze mu dziko lino na momwe bzinthu bzentse bzakuipa bzin’dzayebwedwera.” Tanja adapitiriza kukhala wakukhulupirika. Ndipo na thandizo la Yahova, iye adagumana mbuto yakukhala. Tsapano Tanja adalowodwa na mwamuna wakukhulupirika ndipo iye na bayace ali wakukondwa pomwe akucita utumiki bwa nthawe zentse.

LIMBISANI CIKHULUPIRO CANU KWA YAHOVA

16. N’ciyani cin’dzatithandiza kupitiriza kukhala wakukhwimika tikadzawona bzinthu bzomwe bzimbafotokozedwa pa Luka 21:26-28 bzikucitika?

¹⁶ Pa citsautso cikulu, wanthu pa dziko lentse la pantsi “an’dzakomoka na mantha.” Tsono wanthu wa Mulungu an’dzapitiriza kukhala wakulimba na wakukhwimika. (Werengani Luka 21:26-28.) Thangwe ranyi tin’dzakhala wakukhwimika? Thangwe tin’dzakhala tapfunza kale kuthemba Yahova. Tanja, omwe afotokozedwa kale ule, adalewa kuti bzinthu bzomwe bzidamucitikira m’mbuyomu bzikumuthandiza kulimbana na mabvuto manango yakunesa. Iye adalewa kuti: “Ndidapfunza kuti Yahova angatithandize kupirira mabvuto yali-yentse na kutisimba. Nthawe zinango bzingawoneke ninga kuti wanthu winango ana mphanvu yakuticitira bzinthu bzakuipa, tsono Yahova ngwamphanvu kwene-kwene kuposa iwo. Ndipo napo ticikhala kuti tikugumana na bvuto lakunesa kwene-kwene, iro lin’dzamala.”

17. Kodi vesi la gole lathu la 2024 lin’dzatithandiza tani? (Onani cithunzi-thunzi pa tsamba lakuyamba.)

¹⁷ Ntsiku zino, pana bzinthu bzizinji bzomwe bzingaticitise kukhala na mantha. Tsono ninga Davide, tin’funika lini kubvuma kukundidwa na manthayo. Vesi lathu la gole la 2024 ni mpembo wa Davide kwa Yahova, wakuti: “Ndikakhala na mantha, nimbathemba imwepo.” (Salimo 56:3) Ninga momwe limbafotokozera bukhu linango lakulewa bza nkhani za m’Bibliya pakulewa bza vesi limweri, Davide “akhanyang’anisa lini mabvuto yace, koma akhanyang’anisa Ule omwe angamupulumuse.” Mukadzakhala mukugumana na mabvuto m’minyezi ikubwerayi, dzakumbukireni vesi lathu la gole lino. Mbakhalani na nthawe kuti mumbakumbukire bzomwe Yahova adacita kale m’mbuyomu, bzomwe akucita tsapano na bzomwe an’dzacita kutsogolo. Mukacita bzimwebzi, ninga Davide, imwepo mungalewembo kuti: “Ine nimbathemba Mulungu, ndipopa ndiribe mantha.” — Salimo 56:4.