1. Duzu ati a ɔyɛ a ɛzulolɛ ka yɛ a?

 ƆYƐ a ɛzulolɛ ka yɛ nuhua biala. Nɔhalɛ nu, Baebolo ne mɔɔ yɛzukoa la ɛmmaa mowuamra, sunsum ɛtane ne mɔ yɛɛ mɔɔ bazi kenle bie la ɛnga yɛ ɛzulolɛ. Noko yɛtɛte mekɛ mɔɔ “ninyɛne ɛzulolɛ” le kɛ konle konle, ɛtanelilɛ yɛɛ ewule ngakyile wɔ nu la anu. (Luku 21:11) Eza bie a menli, le kɛ arane nu mgbanyima mɔɔ tinlitinli yɛ anzɛɛ yɛ mbusuafoɔ bɔbɔ mɔɔ dwazo tia nɔhalɛ ɛzonlenlɛ la baha yɛ ɛzulolɛ. Menli bie mɔ noko sulo kɛ bie a bɛnrɛhola bɛnrɛgyinla sɔnea mɔɔ bɛlɛyia ye kɛkala anzɛɛ mɔɔ bɛbayia ye kenle bie la anloa.

2. Ka tɛnlabelɛ mɔɔ Devidi hɔle nu wɔ mekɛ mɔɔ ɔhɔle Gate la anwo edwɛkɛ.

² Ɛzulolɛ hanle Devidi noko. Kɛ neazo la, mekɛ mɔɔ ɛnee Belemgbunli Sɔɔlo ɛlɛkpondɛ Devidi ahu ye la, ɔnriandile ɔhɔle Filisitiama suakpole Gate azo. Yeangyɛ, Gate belemgbunli Ekehye dele kɛ Devidi a le kovolɛ katakyie ne mɔɔ bɛdole edwɛne bɛyeyɛle ye kɛ yehu Filisitiama “apenle apenle bulu bulu” la. Devidi ‘zulole.’ (1 Sa. 21:​10-12) Ɔdwenlenle mɔɔ Ekehye bava ayɛ ye la anwo. Kɛzi Devidi holale lile ye ɛzulolɛ zo ɛ?

3. Kɛ mɔɔ bɛha ye wɔ Edwɛne 56:​1-3, 11 la, kɛzi Devidi holale lile ye ɛzulolɛ zo ɛ?

³ Devidi hanle kɛzi ɔdele nganeɛ wɔ mekɛ mɔɔ ɔwɔ Gate la anwo edwɛkɛ wɔ Edwɛne 56. Edwɛne zɔhane ka deɛmɔti ɛzulolɛ hanle Devidi la wienyi, noko eza ɔda kɛzi ɔholale ɔlile zolɛ la ali. Mɔɔ ɛzulolɛ hanle ye la, ɔvale ɔ nwo ɔdole Gyihova anwo zo. (Kenga Edwɛne 56:​1-3, 11.) Ɛnee ɔze kɛ Gyihova ɛnrɛmaa ɔ sa ɛnrɛzi aze. Ɔlua Gyihova moalɛ zo, Devidi bɔle adwenle bie mɔɔ yɛ azibɛnwo noko ɔboale ye kpalɛ la: Ɔyɛle ɔ nwo kɛ yezɛ! Akee Ekehye ambu Devidi kɛ ɔle ngyegyelɛ bieko,  emomu ɔnwunle ye kɛ ɔle awie mɔɔ ɔ nwo yɛ ye ɛtane, ɔti Devidi holale nriandile.—1 Sa. 21:13–22:1.

4. Kɛ ɔkɛyɛ na wɔamia anwodozo mɔɔ ɛlɛ wɔ Gyihova anu la anu ɛ? Yɛ ndonwo.

⁴ Saa yɛdayɛ noko yɛfa yɛ nwo yɛto Gyihova anwo zo a, yɛbahola yɛali ɛzulolɛ zo. Noko kɛ ɔkɛyɛ na yɛamia anwodozo mɔɔ yɛlɛ wɔ Gyihova anu la anu, titili wɔ mekɛ mɔɔ ɛzulolɛ baha yɛ la ɛ? Maa yɛyɛ ndonwo bie. Saa ɛnwu kɛ wɔnyia ewule bie a, wɔannea a mɔlebɛbo ne wɔ ahonle badu. Noko saa ɛdie wɔ dɔketa ne ɛdi a, ɔbamaa wɔazie ɛ nwo dii. Bie a yeyɛ wuliravolɛma dɔɔnwo mɔɔ nyianle ewule zɔhane bie la ayile. Saa ɛlɛtendɛ a, bie a ɔbadie wɔ kpalɛ na yeamaa wɔanyia anwodozo kɛ ɔte wɔ tɛnlabelɛ ne abo kpalɛ. Na bie a ɔbaha ayileyɛlɛ mɔɔ yeboa awie mɔ yemaa bɛde kpɔkɛ la yeahile wɔ. Zɔhane ala a saa yɛsuzu mɔɔ Gyihova ɛyɛ ye dɛba, mɔɔ ɔlɛyɛ ye kɛkala nee mɔɔ ɔbayɛ yeamaa yɛ kenle bie la anwo a, ɔbamaa yɛamia anwodozo mɔɔ yɛlɛ wɔ ye nu la anu a. Zɔhane a Devidi yɛle a. Mekɛ mɔɔ yɛlɛsuzu edwɛkɛ mɔɔ sunsum ne hanle ye maanle ɔhɛlɛle ye wɔ Edwɛne 56 bie mɔ anwo la, dwenle kɛzi ɛdawɔ noko ɛbahola wɔamia anwodozo mɔɔ ɛlɛ wɔ Gyihova anu la anu na wɔali wɔ ɛzulolɛ zo la anwo.

DUZU A GYIHOVA ƐYƐ YE DƐBA A?

5. Amaa Devidi ali ye ɛzulolɛ zo la, duzu a ɔdwenledwenlenle nwolɛ a? (Edwɛne 56:​12, 13)

⁵ Mekɛ mɔɔ Devidi ngoane tɛda esiane nu la, ɔvale ye adwenle ɔziele mɔɔ Gyihova ɛyɛ ye dɛba la azo. (Kenga Edwɛne 56:​12, 13.) Mɔɔ Devidi yɛle wɔ ye ngoane mekɛ kɔsɔɔti anu la ɛne. Kɛ neazo la, ɔdwu mekɛ ne bie a ɔdwenledwenle ninyɛne mɔɔ Gyihova ɛbɔ la anwo, na yemɔ maa ɔkakye kɛ Gyihova lɛ tumi kpole yɛɛ ɔkulo alesama. (Edw. 65:​6-9) Eza Devidi dwenledwenlenle mɔɔ Gyihova ɛyɛ ɛmaa awie mɔ la anwo. (Edw. 31:19; 37:​25, 26) Akee ɔdwenledwenlenle mɔɔ Gyihova ɛyɛ ɛmaa ɔdaye mumua ne dɛba la anwo. Gyihova boale Devidi na ɔbɔle ɔ nwo bane ɔvi ye ngakula nu. (Edw. 22:​9, 10) Nea kɛzi ɔbayɛ kɛ ninyɛne ɛhye mɔ mɔɔ Devidi dwenledwenlenle nwolɛ la maanle anwodozo mɔɔ ɔlɛ wɔ Gyihova anu la yɛle kpole a!

6. Saa ɛzulolɛ ka yɛ a, duzu a baboa yɛ yeamaa yɛava yɛ nwo yɛado Gyihova anwo zo a?

 ⁶ Saa ɛzulolɛ ka wɔ a, biza ɛ nwo kɛ, ‘Duzu a Gyihova ɛyɛ ye dɛba a?’ Dwenledwenle ninyɛne mɔɔ yebɔ la anwo. Kɛ neazo la, saa ‘yɛnea’ kɛzi Gyihova nea nloma nee felawɔse ngakyile mɔɔ yeambɔ bɛ kɛ ye ɛsaso anzɛɛ bɛngola bɛnzonle ye la a, ɔmaa anwodozo mɔɔ yɛlɛ kɛ ɔbanlea yɛdayɛ noko la yɛ kpole. (Mat. 6:​25-32) Eza suzu mɔɔ Gyihova ɛyɛ ɛmaa ye azonvolɛ la anwo. Ɛbahola wɔazukoa Baebolo nu sonla bie mɔɔ lale diedi kpole ali la anwo debie, anzɛɛ ɛbahola wɔagenga ɛnɛ mekɛ ye azo Gyihova azonvolɛ ne mɔ bie anwubielɛ. a Bieko, dwenledwenle kɛzi Gyihova ɛnlea ɛdawɔ mumua ne dɛba la anwo. Kɛzi ɔboale wɔ ɔmaanle ɛnwunle nɔhalɛ ne ɛ? (Dwɔn 6:44) Kɛzi yebua wɔ asɔneyɛlɛ ɛ? (1 Dwɔn 5:14) Kɛzi ɛlɛnyia ye kulovolɛ Ralɛ ne afɔlebɔlɛ ne azo nvasoɛ kenle ko biala ɛ?—Ɛfɛ. 1:7; Hib. 4:​14-16.

7. Kɛzi ngapezonli Daneɛle edwɛkɛ ne boale Vanessa maanle ɔlile ye ɛzulolɛ zo ɛ?

⁷ Adiema raalɛ Vanessa b mɔɔ wɔ Haiti la yiale tɛnlabelɛ bie mɔɔ hanle ye ɛzulolɛ a. Nrenyia bie mɔɔ wɔ ɛleka mɔɔ ɔde la vɛlɛle ye hanle hilele ye kɛ ɔkulo ye, na ɔhɛlɛle edwɛkɛ ɔnwanle ye kenle ko biala na ɔtinlitinlinle ye kɛ ɔlie ɔdo nu. Vanessa hanle ye wienyi hilele ye kɛ ɔnrɛyɛ. Noko nrenyia ne anye bolole kpole na bɔbɔ ɔhanle ɔhilele ye kɛ saa yeanyɛ a ɔbayɛ ye ɛtane. Vanessa hanle kɛ: “Me ahonle dule kpalɛ.” Kɛzi Vanessa lile ye ɛzulolɛ zo ɛ? Ɔyɛle ninyɛne bie mɔ ɔvale ɔbɔle ɔ nwo bane. Asafo nu kpanyinli bie boale ye maanle ɔhɔhanle edwɛkɛ ne ɔhilele kpolisima. Noko eza ɔvale ye adwenle ɔziele kɛzi Gyihova bɔle ye azonvolɛ nwo bane wɔ tete ne la azo. Vanessa hanle kɛ: “Awie mɔɔ limoale rale me adwenle nu la a le ngapezonli Daneɛle. Ɛnee ɔtɛyɛle ɛtane biala, noko bɛvuandinle ye bɛdole awenade mɔɔ ɛhɔne ɛlɛku bɛ la tunli nu. Noko Gyihova liele ye. Menzɛlɛle Gyihova kɛ ɔli tɛnlabelɛ ne anwo gyima. Yemɔ anzi, ɛzulolɛ anga me bieko.”—Dan. 6:​12-22.

DUZU A GYIHOVA ƐLƐYƐ YE ƐNƐ A?

8. Duzu a ɛnee Devidi die di a? (Edwɛne 56:8)

⁸ Mɔɔ Devidi wɔ Gate la, ɛnee ye ngoane la esiane kpole nu ɛdeɛ, noko yeammaa ɛzulolɛ anvo ɔ nwo zo. Emomu, ɔkpale kɛ ɔbanlea mɔɔ Gyihova ɛlɛyɛ amaa ye wɔ zɔhane mekɛ ne la. Devidi nwunle ye wienyi kɛ Gyihova ɛlɛkile ye adenle yɛɛ ɔlɛbɔ ɔ nwo bane na ɔte mɔɔ ɔlɛkɔ nu la abo. (Kenga Edwɛne 56:8.) Eza Devidi nyianle agɔnwolɛma, mɔɔ bie a le Dwɔnatan nee Ɛsɔfo Kpanyinli Ahemɛlɛke mɔɔ boale ye na bɛvale ninyɛne mɔɔ ɔhyia nwo la bɛmaanle ye la. (1 Sa. 20:​41, 42; 21:​6, 8, 9) Na ɔnva nwo kɛ ɛnee Belemgbunli Sɔɔlo kulo kɛ ɔku Devidi la, ɔ sa anga ye. Ɛnee Devidi die di bɔkɔɔ kɛ, Gyihova ze sɔnea mɔɔ ɔlɛyia la nee kɛzi sɔnea ne maa ɔte nganeɛ la wienyi.

9. Duzu a Gyihova ze ye wɔ yɛ nuhua ko biala anwo a?

⁹ Saa ɛyia sɔnea bie mɔɔ ka wɔ ɛzulolɛ a, kakye kɛ Gyihova nwu ye yɛɛ ɔze kɛzi sɔnea zɔhane maa ɛte nganeɛ la. Kɛ neazo la, tɛ amumuyɛ mɔɔ bɛvale bɛyɛle Yizilayɛma wɔ Yigyibiti la ala a Gyihova nwunle ye a, eza ɔnwunle ‘nyane mɔɔ bɛlile la.’ (Ɛzɛ. 3:7) Devidi dole edwɛne kɛ Gyihova nwunle ye “nyanelilɛ” nee ye “ngyegyelɛ.” (Edw. 31:7) Yɛɛ mekɛ mɔɔ Nyamenle menli ne mumua ne sisile kpɔkɛ ɛtane na ɔmaanle bɛnwunle amaneɛ bɔbɔ la, “ɔlile nyane.” (Aye. 63:9) Saa ɛzulolɛ  ka wɔ a, Gyihova te kɛzi ɔmaa ɛte nganeɛ la abo, na ɔlɛ ɛhulolɛ kɛ ɔboa wɔ yeamaa wɔali wɔ ɛzulolɛ zo.

10. Duzu ati a ɛdie ɛdi bɔkɔɔ kɛ Gyihova nwu wɔ na ɔbaboa wɔ yeamaa wɔagyinla sɔnea biala anloa ɛ?

¹⁰ Noko saa ɛlɛyia sɔnea bie mɔɔ ka wɔ ɛzulolɛ a, bie a ɛnrɛnwu kɛzi Gyihova ɛlɛboa wɔ la. Ɔti sɛlɛ ye kɛ ɔmaa ɛnwu kɛzi ɔlɛboa wɔ la. (2 Arl. 6:​15-17) Akee suzu nwo nea: Asoo ɛdendɛlɛ bie anzɛɛ mualɛ bie mɔɔ bɛmaanle ye wɔ debiezukoalɛ bo la ɛmaa wɔ anwosesebɛ? Asoo buluku, vidio anzɛɛ edwɛne gyɛne bie ɛmaa wɔ anwosesebɛ? Asoo awie ɛha edwɛkɛ bie anzɛɛ ɛgenga ngɛlɛlera bie mɔɔ maa anwosesebɛ la ɛhile wɔ? Bie a yɛbabu ɛlɔlɛ mɔɔ yɛ mediema da ye ali kile yɛ nee sunsum nu aleɛ mɔɔ yɛnyia la debie ekyi. Noko bɛle ahyɛlɛdeɛ mɔɔ yɛ nwanwane mɔɔ vi Gyihova ɛkɛ a. (Aye. 65:13; Maake 10:​29, 30) Bɛmaa ɔda ali kɛ ɔdwenle ɛ nwo. (Aye. 49:​14-16) Eza bɛmaa ɔda ali kɛ ɛbahola wɔava ɛ nwo wɔado ɔ nwo zo.

11. Duzu a boale Aida maanle ɔlile ye ɛzulolɛ zo a?

¹¹ Adiema raalɛ Aida mɔɔ de Senegal la nwunle kɛzi Gyihova boale ye wɔ mekɛ mɔɔ ɔyiale sɔnea bie la. Kɛmɔ ɔdaye a ɔle ye awovolɛ ara kpanyinli la ati, ɛnee bɛ nye la kɛ ɔbayɛ gyima yeanyia ezukoa dɔɔnwo yeanlea ɔ nwo nee bɛdabɛ. Noko mɔɔ Aida tetele ninyɛne zo amaa yeahola yeayɛ adekpakyelɛnli la, ɔ nwo hyelele ye wɔ ezukoa afoa nu. Ye abusua ne vale ɔ nwo ɛya na bɛdendɛle bɛtiale ye. Ɔhanle kɛ: “Ɛnee mesulo kɛ menrɛhola menrɛboa me awovolɛ yɛɛ awie biala bakpo me. Membɔle Gyihova somolɛ bɔbɔ kɛ yemaa ninyɛne ɛzɛkye la.” Akee ɔdiele ɛdendɛlɛ bie mɔɔ bɛmaanle ye wɔ debiezukoalɛ bo la. Ɔhanle kɛ: “Tendɛvolɛ ne hakyele yɛ kɛ nyane biala mɔɔ wɔ yɛ ahonle nu la, Gyihova ze. Ngyikyi ngyikyi, mgbanyima ne mɔ nee awie mɔ folɛdulɛ boale me maanle menwunle kɛ Gyihova kulo me. Saa melɛyɛ asɔne a, menyia anwodozo kpole kɛ Gyihova banlea me, na mekɛ mɔɔ menwunle kɛ Gyihova ɛlɛbua me asɔneyɛlɛ ne mɔ la, menyianle anzodwolɛ.” Nzinlii, Aida nyianle gyima mɔɔ boale ye maanle ɔholale ɔyɛle adekpakyelɛ gyima ne na ɔboale ye awovolɛ nee awie mɔ wɔ ezukoa afoa nu a. Ɔhanle kɛ: “Menzukoale kɛ mebava me nwo meado Gyihova  anwo zo bɔkɔɔ. Kɛkala saa meyɛ asɔne a, fane dɔɔnwo ne ala, me ɛzulolɛ ne minli.”

DUZU A GYIHOVA BAYƐ YE KENLE BIE A?

12. Kɛ mɔɔ Edwɛne 56:9 kile la, anwodozo boni a Devidi nyianle a?

¹² Kenga Edwɛne 56:9. Ngyɛnu ɛhye maa yɛnwu adenle bieko mɔɔ Devidi luale zo lile ye ɛzulolɛ zo la. Ɛnee ye ngoane tɛda esiane nu bɔbɔ ɛdeɛ, noko ɔdwenledwenlenle mɔɔ Gyihova bayɛ amaa ye kenle bie la anwo. Ɛnee Devidi ze kɛ, Gyihova balie ye wɔ mekɛ kpalɛ nu. Ɔluakɛ ɛnee Gyihova ɛha kɛ saa Sɔɔlo fi ɛkɛ a, Devidi a bayɛ Yizilayɛ belemgbunli a. (1 Sa. 16:​1, 13) Ɛnee Devidi ze kɛ, debie biala mɔɔ Gyihova ɛbɔ nwolɛ ɛwɔkɛ la bara nu.

13. Anwodozo boni a yɛbahola yɛanyia wɔ Gyihova anu a?

¹³ Duzu a Gyihova ɛbɔ ɛwɔkɛ kɛ ɔbayɛ yeamaa wɔ a? Yɛ nye ɛnla kɛ ɔbazi ngyegyelɛ mɔɔ yɛbayia la kɔsɔɔti adenle. c Noko kakye kɛ, sɔnea biala mɔɔ ɛlɛyia wɔ ewiade ɛhye anu la, Gyihova baye avi ɛkɛ wɔ ewiade fofolɛ ne mɔɔ ɛlɛba la anu. (Aye. 25:​7-9) Yɛ Bɔvolɛ ne lɛ tumi kpole mɔɔ ɔbava yeadwazo mowuamra, yeayɛ yɛ ewule ngakyile ne mɔ ayile na yeaye dwazotiama kɔsɔɔti yeavi ɛkɛ a.—1 Dwɔn 4:4.

14. Duzu a yɛbahola yɛadwenledwenle nwo a?

¹⁴ Saa ɛzulolɛ ka wɔ a, dwenledwenle mɔɔ Gyihova bayɛ ye kenle bie la anwo. Dwenle kɛzi ɛbade nganeɛ wɔ mekɛ mɔɔ Seetan ɛvi ɛkɛ, bɛzɛkye amumuyɛma na tenlenema ala a de azɛlɛ ye azo, yɛɛ mekɛ mɔɔ alehyenlɛ ko biala ɛnee yɛ sinlidɔlɛ ne mɔ ɛlɛminli ngyikyi ngyikyi la anwo. Yɛkile bie mɔɔ bɛyɛle ye wɔ 2014 maanzinli nyianu ne abo la maa yɛnwu kɛzi yɛbahola yɛadwenledwenle yɛ anyelazo ne anwo la. Selɛ bie hilehilele nu hilele ye abusua ne kɛ, saa edwɛkɛ mɔɔ wɔ 2 Timote 3:​1-5 la fale ninyɛne mɔɔ basisi Paladaese la anwo a, anrɛɛ bɛbahɛlɛ ye zɛhae: “Mekpondɛ kɛ ɛnwu ye kɛ, wɔ ewiade fofolɛ ne anu mekɛ mɔɔ yɛ anyelielɛ kpalɛ la bara. Menli bahulo awie mɔ, bɛbahulo sunsum nu ninyɛne, bɛbabɛlɛ bɛ nwo aze, bɛbayeyɛ Nyamenle, bɛbadie bɛ awovolɛma, bɛbala anyezɔlɛ ali, bɛbali nɔhalɛ, bɛbanyia ɛlɔlɛ kpole bɛamaa bɛ mbusuafoɔ, bɛbali ngyekyeleɛ zo, bɛbaha awie mɔ anwo edwɛkɛ kpalɛ mekɛ biala, bɛbahomo bɛ nwo zo, bɛbayɛ bɛlɛvo, bɛbahulo kpalɛyɛlɛ, bɛbayɛ menli mɔɔ ɛkola ɛfa ɛ nwo ɛto bɛ nwo zo, bɛbagyakyi edwɛkɛ nu, bɛbanyia mɛlɛbɛnwoaze adwenle, bɛbahulo nyamenlezonlenlɛ bɛadɛla anyelielɛ, bɛbavi ahonle nu bɛazonle nyamenle kpalɛ; menli zɛhae mɔ yɛɛ bikye bɛ kpalɛ a.” Ɛ nee wɔ abusua ne anzɛɛ ɛ mediema diedima suzu kɛzi asetɛnla bayɛ wɔ ewiade fofolɛ ne anu la anwo ɔ?

15. Tanja ahonle dule ɛdeɛ, noko duzu a boale ye maanle ɔlile ye ɛzulolɛ zo a?

¹⁵ Adiema raalɛ Tanja mɔɔ wɔ North Macedonia la dwenledwenlenle nyilalɛ mɔɔ ɔbanyia ye kenle bie la anwo na yemɔ maanle ɔlile ye ɛzulolɛ zo. Mɔɔ ɔsukoa Baebolo ne la, ye awovolɛ dwazole tiale ye ɛsesebɛ. Ɔhanle kɛ: “Ninyɛne mɔɔ ɛnee mesulo kɛ ɔbado me la bie mɔ amgba zile. Mekɔ debiezukoalɛ meba biala a me mame bo me. Me awovolɛ nwunlonwunlanle me na bɛhanle kɛ saa meyɛ Gyihova Dasevolɛ a bɛbahu me.” Awieleɛ bɔkɔɔ ne, bɛvoanle Tanja bɛvile sua nu. Duzu a ɔyɛle a? Ɔhanle kɛ: “Menvale me adwenle menziele kɛzi mekɔ zo megyinla kpundii a me nye balie dahuu la azo. Eza mendwenlenle kɛzi Gyihova bamaa meanyia debie biala mɔɔ ɔbavi me sa wɔ ewiade ɛhye anu la anwo ahatualɛ wɔ ewiade fofolɛ ne anu na me rɛle avi ninyɛndane kɔsɔɔti la anwo.” Tanja gyinlanle kpundii. Na Gyihova boale ye maanle ɔnyianle ɛleka  ɔdɛnlanle. Kɛkala, adiema nrenyia nɔhavo bie ɛgya Tanja, na bɛlɛfa anyelielɛ bɛayɛ dahuu ɛzonlenlɛ gyima ne bie.

MIA ANWODOZO MƆƆ ƐLƐ LA ANU ƐNƐ

16. Saa yɛnwu kɛ ngapezo mɔɔ wɔ Luku 21:​26-28 la ɛlɛba nu a, duzu a baboa yɛ yeamaa yɛahɔ zo yɛala akɛnrasesebɛ ali a?

¹⁶ Wɔ anwongyelelɛ kpole ne anu, “ɛzulolɛ . . . bamaa menli nye zo abulu bɛ.” Noko Nyamenle menli ne bagyinla kpundii na bɛala akɛnrasesebɛ ali. (Kenga Luku 21:​26-28.) Duzu ati a yɛnrɛmaa ɛzulolɛ ɛnrɛha yɛ a? Ɔluakɛ yɛzukoa ye dɛba kɛ yɛbava yɛ nwo yɛado Gyihova anwo zo. Tanja mɔɔ yɛhanle ɔ nwo edwɛkɛ la hanle kɛ mɔɔ ɔvale nu dɛba la ɛlɛboa ye kɛkala yeamaa yeagyinla tɛnlabelɛ gyɛne mɔɔ anu yɛ se la anloa. Ɔhanle kɛ: “Tɛnlabelɛ biala ɛnle ɛkɛ mɔɔ Gyihova ɛnrɛhola ɛnrɛboa yɛ wɔ nu a. Ɔdwu mekɛ ne bie a, wɔannea a ɔbazɔho kɛ awie mɔ ɛmmaa yɛnnyia adenle yɛnyɛ mɔɔ ɔwɔ kɛ yɛyɛ la, noko nɔhalɛ ne a le kɛ Gyihova lɛ tumi tɛla bɛ. Na ɔnva nwo kɛzi sɔnea bie yɛ se la, ɔbara awieleɛ.”

17. Kɛzi yɛ 2024 ɛvolɛdwɛkɛ ne baboa yɛ ɛ? (Nea ɔ nyunlu nvoninli ne.)

¹⁷ Ninyɛne dɔɔnwo ka yɛ ɛzulolɛ ɛnɛ. Noko kɛ mɔɔ Devidi yɛle la, yɛbahola yɛazi kpɔkɛ kɛ yɛnrɛmaa ɛzulolɛ ɛnrɛvo yɛ nwo zo. Yɛ 2024 ɛvolɛdwɛkɛ ne le Devidi asɔneyɛlɛ mɔɔ ɔvale ɔdole Gyihova anyunlu la: “Saa ɛzulolɛ ka me a, mefa me nwo meto ɛ nwo zo.” (Edw. 56:3) Baebolo nwo abɔlɔba bie hanle ye wɔ ngyɛnu ɛhye anwo kɛ, Devidi “angɔ zo andwenle ninyɛne mɔɔ ka ye ɛzulolɛ anzɛɛ ye ngyegyelɛ ne mɔ anwo, emomu ɔvale ɔ nye ɔdole ye Dievolɛ ne anwo zo.” Dwenle yɛ ɛvolɛdwɛkɛ ne anwo wɔ siane ekyii mɔɔ la yɛ nyunlu la anu, titili saa ɛlɛyia tɛnlabelɛ mɔɔ ka wɔ ɛzulolɛ la a. Nyia mekɛ dwenledwenle mɔɔ Gyihova ɛyɛ ye dɛba, mɔɔ ɔlɛyɛ ye kɛkala nee mɔɔ ɔbayɛ ye kenle bie la anwo. Na ɛdawɔ noko ɛbahola wɔaha mɔɔ Devidi hanle la bie: “Mefa me nwo meto Nyamenle anwo zo; menzulo.”—Edw. 56:4.