1. Ena anua i wee ɛrɛ bɔɔ pio sɔ̄ a?

 DƐ̄DƐƐ̄ nɛɛ wee ɛrɛ bɔɔ pio sɔ̄. Bu kaka, pya nu i nɔ aābu Baibol doo kɔ i aa ɛrɛna bɔɔ loo pya e’ua, loo pya gbo-yɔ, ale loo nu esira li deesī. Kerewo, i tɔɔ̄ sɔ̄ “gbɛnɛ aabɔɔ” doodoo benɔ̄, bag dogo, le dumɛloo le. (Luk 21:11) I dapnage ɛrɛ bɔɔ loo pya nɛɛ, gbaāloo pya bɛbɛɛ ale pya i butɔ lo ba gbanasī kaka taāŋabah. Pio nɛɛ ɛrɛ bɔɔ kɔ ba naale edabe tāma pya taāŋa ba gaa kpesī anyaawo ale lo ba ekpesī li deesī.

2. Naa baatɛ̄ kɛ̄tɔɔ̄ Devid bee le bu sɔ̄ a bee le Gat.

² A ɛrɛ sɔ̄ Devid bee ɛrɛ bɔɔ. Bu edoba, sɔ̄ Mɛnɛ Sɔɔl gaa bee gbī efɛ Devid, a bee teera kii Gat lo alu buɛ̄ pya Filistia. Sɔ̄ esaa, mɛnɛ Gat a kura Akish bee suā kɔ Devid na gbɛnɛ nɛɛ nɔ̄ lo ba bee uɛ yɔɔ nɛ sa leera kɔ a efɛa “booboo sɔ̄ lop sɔ̄ baɛ boo le lop tup” pya Filistia. Devid “bee ɛrɛ gbɛnɛ bɔɔ.” (1 Sam 21:​10-12) A bee ɛrɛ bɔɔ loo nu Akish edoo ye loo. Bu mɛ sīdee na Devid bee be eebah ye bɔɔ a?

3. Dookɛ̄ kpa Le-yɔɔ 56:​1-3, 11 kɔ doo, bu mɛ sīdee na Devid bee be eebah ye bɔɔ a?

³ Bu kpa Le-yɔɔ 56 ekobee, Devid bee kɔ kɛ̄ nu ye tɔɔ̄ loo doo sɔ̄ a bee le Gat. Bu lo yɔɔ, a bee baatɛ̄ nu anua a bee ɛrɛ bɔɔ, le nu a bee ye yerebah nɛ kɔ a be eebah lo bɔɔ. Sɔ̄ bɔɔ bee aa Devid, a bee dɛrɛ nyiɛ nyɔɔ Jɛhova. (Buū Le-yɔɔ 56:​1-3, 11.) Devid bee ɛrɛ kaāna nu anua a dɛrɛ nyiɛ nyɔɔ Jɛhova. Tɛ̄maloo yerebah Jɛhova, Devid  bee doo ziī nu alu keebee lokwa a naa lu efɛ ye. A bee sere loo doodoo nɛɛ daa! Akish bee ɛp Devid nua nɛɛ boro aa, ewo bee doo kɔ Devid a ɛrɛ dee lo eteera.—1 Sam 21:13–22:1.

4. Bu mɛ sīdee na i dap agɛrɛbah dɛrɛ nyiɛ nyɔɔ Jɛhova a? Naa nɛ edoba.

⁴ Ili dapnage be eebah i bɔɔ tɛ̄maloo edɛrɛ nyiɛ nyɔɔ Jɛhova. Kerewo, bu mɛ sīdee na i dap agɛrɛbah dɛrɛ nyiɛ nyɔɔ Jɛhova, eetɔɔ̄ sɔ̄ bɔɔ i aa a? Naa kɛɛrɛ edoba ama. Lo o suā kɔ a ɛrɛ ziī dumɛloo a a le loo, bɔɔ dap a aa tua sɔ̄. Kerewo, loo a dap sukɛ̄ lo o dɛrɛ nyiɛ nyɔɔ o dɔktɔ, nyɔɔbee edaba bo pya nɛɛ a ɛrɛ lo dua dumɛloo. Dap lu kɔ a gbaɛ̄ a tɔ̄loo kaāna sɔ̄ o gaa kɔ kɛ̄ nu a tɔɔ̄loo doo, ewo edoo kɔ o suā kɔ a dābeeloo kɛ̄ nu a tɔɔ̄loo doo. A dap kɔ eboe a bu sīdee a bee bo pya dɔɔ̄na nɛɛ sa doo kɔ loo wa a nwaɛ̄. Bu aba lo sīdee, i agɛrɛbah dɛrɛ nyiɛ nyɔɔ Jɛhova tɛ̄maloo ekɛɛrɛbu loo pya nu edoora, pya nu a gaa doo anyaawo, le pya nu edoo i nɛ li deesī. Taɛ nu Devid bee doo lo. Kuma sɔ̄ i gaa nɔ pio ue a le bu kpa Le-yɔɔ 56 ekobee a, kɛɛrɛbu loo kɛ̄ olo dapnage agɛrɛtɛ̄ kɛ̄ o dɛrɛ nyiɛ nyɔɔ Jɛhova sa be eebah o bɔɔ doo.

ENA JƐHOVA EDOORA A?

5. Lokwa Devid dap be eebah ye bɔɔ, ena a bee ɛrɛ ekɛɛrɛ nyɔɔ a? (Le-yɔɔ 56:​12, 13)

⁵ Sɔ̄ dum Devid bee le bu kɛ̄tɔɔ̄ alu gɛɛgɛɛloo, a bee sere ekɛɛrɛ nyɔɔ pya nu Jɛhova edoora. (Buū Le-yɔɔ 56:​12, 13.) Kɛ̄ Devid bee kɛɛrɛ nu doo lo bu dɛ̄dɛɛ̄ ye tɔɔ̄dum. Bu edoba, a bee ɛrɛ ekɛɛrɛ nyɔɔ pya dɛmnu Jɛhova, lo a bee ye nyɛŋiabu kɛ̄ Jɛhova ɛrɛ gbɛnɛ ekpo le kɛ̄ a ɛrɛ taɛ bu miɔŋɔ nɛɛ doo. (Yɔɔ 65:​6-9) Devid bee ɛrɛ ekɛɛrɛ nyɔɔ nu Jɛhova edora nɛ pya dɔɔ̄na nɛɛ. (Yɔɔ 31:19; 37:​25, 26) A bee ɛrɛnage ekɛɛrɛ nyɔɔ nu Jɛhova edoora nɛ taɛ alɛ. Jɛhova ebee yerekpotɛ̄ sa kpega Devid aā sɔ̄ a bee le nwīgbagbara nwiī. (Yɔɔ 22:​9, 10) Naa kɛɛrɛ kɛ̄ dua ɛrɛ ekɛɛrɛ nyɔɔ nu ama bee dap yere mɛm loo Devid kɔ a dɛrɛ nyiɛ nyɔɔ Jɛhova doo a!

6. Ena eyerebah i nɛ kɔ i dɛrɛ nyiɛ nyɔɔ Jɛhova sɔ̄ bɔɔ i aa a?

 ⁶ Sɔ̄ bɔɔ a aa, bip aba ɔɔ kɔ, ‘Ena Jɛhova edoora a?’ Ɛrɛ ekɛɛrɛ nyɔɔ pya nu a dɛm. Bu edoba, sɔ̄ i “kɛɛrɛbu” kɛ̄ Jɛhova kuūdɛɛ̄loo enuɛ̄ le ebie doo, lo a naa bee lu edɛm bu ye bera sa ba naa dap ye taāŋabah, a doo kɔ i agɛrɛbah ye dɛrɛ nyiɛ nyɔɔ kɔ a gaa le kuūnage dɛɛ̄ loo ili. (Mat 6:​25-32) Naa kɛɛrɛnage pya nu Jɛhova edora nɛ pya a ye taāŋabah. O dap nɔ nu akiiloo ziī nɛɛ a le bu Baibol lo a bee ɛrɛ yira, ale o dap buū nu a bee siraloo ziī zooro Jɛhova a le bu ilii dee ama. a Gbaāloo wo, ɛrɛnage ekɛɛrɛ nyɔɔ kɛ̄ Jɛhova ekuūnadɛɛ̄ loo olo doo. Bu mɛ sīdee na a bee a yerebah nɛ kɔ o suā ye loo a? (Jɔn 6:44) Bu mɛ sīdee na e’agara pya o kara a? (1 Jɔn 5:14) Bu mɛ sīdee na o gaa ɛrɛ biī aāloo waara zɔɔ ye wereloo Nwiīnɛɛdam ziī ziī biradee a?—Ɛfɛs 1:7; Hib 4:​14-16.

7. Bu mɛ sīdee na nu a bee siraloo nɛɛ mɔmanudɛɛ̄ Daniɛl bee yerebah nɛ Vanessa kɔ a be eebah ye bɔɔ a?

⁷ Ziī wuga nɛɛwa a kura Vanessa, b a le Haiti, bee kpesī ziī kɛ̄tɔɔ̄ a ye aarɛ bɔɔ. Ziī gbara a le wa buɛ̄ wee ye kuegi nyɔɔ fon sa ye yeregi ue ma dɛ̄dɛɛ̄ dee, ye zū kɔ a lue ye gā. Vanessa naa bee yiga. Mɛ bu lo gbara bee biira gbɛnɛ sa a bee ye yere bɔɔ bu sa kɔ edooe ye nu. A kɔ, “bɔɔ bee mɛ aa.” Bu mɛ sīdee na Vanessa bee be eebah ye bɔɔ a? A bee doo pya nu a dap doo lo ekpega aba ɛɛ. Ziī nɛɛ kanɛɛ bee ye yerebah nɛ kɔ a kɔ nɛ pya polis. E a bee kɛɛrɛnage bu loo kɛ̄ Jɛhova bee yerebah nɛ pya ye zooro sɔ̄ akii adumɛ doo. Vanessa kɔ: “Tuatua nɛɛ m bee dasī kɛɛrɛbu loo na nɛɛ mɔmanudɛɛ̄ Daniɛl. A bee lu etop ye tɛrɛ bu bana sasa-ekpo kere a naa bee doo lɔgɔ piya nu. Kerewo, Jɛhova bee ye kuūdɛɛ̄loo. M bee bara Jɛhova kɔ a doo kɔ lo gbara a lɛɛ mɛ nyiɛ nyɔɔ, le kɔ a lɛɛ lo taāŋa. Aā lo sɔ̄, bɔɔ naa bee mɛ aa na.”—Dan 6:​12-22.

ENA JƐHOVA AA DOO ANYAAWO A?

8. Ena Devid bee suā leere a? (Le-yɔɔ 56:8)

⁸ Kere Devid bee le bu gɛɛgɛɛloo kɛ̄tɔɔ̄ sɔ̄ a bee le Gat, a naa bee sere ekɛɛrɛ nyɔɔ pya nu a doo kɔ bɔɔ a aa ye. Taāwo, a bee biaɛfii lo esere ekɛɛrɛ nyɔɔ nu Jɛhova aa bee ye doo nɛ taɛ lo sɔ̄. Devid bee muɛ kɔ Jɛhova aa ye baɛeloo sa ye kpega le kɔ a suā kɛ̄ nu ye tɔɔ̄loo doo. (Buū Le-yɔɔ 56:8.) Devid bee ɛrɛnage pya gbo a bee ye yerekpotɛ̄ sa ye yerebah nɛ, doodoo Jonatan le Nɛɛ Tɛsī Ewɔp Ahimelɛk. (1 Sam 20:​41, 42; 21:​6, 8, 9) E kere Mɛnɛ Sɔɔl aa bee gbī efɛ ye, Devid bee teera lo ekpɔā ye dum. A bee suā leere kɔ Jɛhova dābeeloo pya taāŋa a gaa tɛɛ̄ bu le kɛ̄ nu ye tɔɔ̄loo doo.

9. Ena Jɛhova muɛ akiiloo ziī ziī ii a?

⁹ Sɔ̄ o kpesī ziī taāŋa a doo kɔ o ɛrɛ bɔɔ, nyɛŋiabu kɔ Jɛhova suā o taāŋa le kɛ̄ lo taāŋa a tɔɔ̄loo doo. Bu edoba, Jɛhova naa bee aadee muɛ taāŋa pya Izrɛl bee tɛɛ̄bu bie Ijipt, mɛ a bee muɛnage “muɛ pɔrɔ pya [ye] nɛɛ.” (A’aa 3:7) Devid bee uɛ kɔ Jɛhova muɛ dɛ̄dɛɛ̄ na “etɛɛrɛloo” le na “muɛ pɔrɔ.” (Yɔɔ 31:7) E sɔ̄ pya nɛɛ Bari bee tɔga nyɔɔ wa pɔrɔ biaɛfii, “alɛ bee muɛ pɔrɔ.” (Ais 63:9) Sɔ̄ bɔɔ a aa, Jɛhova dābeeloo kɛ̄ nu a tɔɔ̄loo  doo e a kpɛ̄naloo eyerebah a nɛ lokwa o be eebah o bɔɔ.

10. Ena anua o suā leere kɔ Jɛhova muɛ sɔ̄ o le bu taāŋa le kɔ a gaa le yerebah a nɛ a?

¹⁰ O dap bura sɛh Jɛhova gaa a yerege bah nɛ naa e sɔ̄ o kpesī taāŋa a a aarɛ bɔɔ. Nyɔɔwo bara ye kɔ a yerebah a nɛ lokwa o muɛ kɛ̄ a gaa a yerekpotɛ̄ doo. (2 Mɛnɛ 6:​15-17) Naa kɛɛrɛ: Ekɔ ekɔaue ale ebip alu e’agara bie enɔānu e’agɛrɛge a loo ni? Ekɔ ziī i kpa, i vidio, ale ziī yɛɛ pya i keebee yɔɔ eyerege a mɛm loo ni? Ziī nɛɛ ekɔage ziī ue agɛrɛloo ale buū ziī dɔ Baibol a nɛ ni? Wereloo pya i wuga bu yira i tɔgɛ kumaloo le nuede bu edɔɔ̄ i gaa ɛrɛ dap i nwaabah ibere. Kerewo, ba lu keebee dɔɔ̄nu a aabah Jɛhova. (Ais 65:13; Maak 10:​29, 30) Ba tɔgɛ kɔ a kuū i dɛɛ̄loo. (Ais 49:​14-16) E ba tɔgɛ kɔ a bɔloo kɔ i dɛrɛ ye nyiɛ nyɔɔ.

11. Ena a bee yerebah nɛ Aida kɔ a be eebah ye bɔɔ a?

¹¹ Ziī wuga nɛɛwa a kura Aida a tɔɔ̄ Senegal bee muɛ kɛ̄ Jɛhova bee ye yerebah nɛ doo sɔ̄ a bee le bu taāŋa. Kuma sɔ̄ alɛ na alu tua nwiī a, ye tɛ le ye ka bee ɛmadɛɛ̄ kɔ alɛ na egbī kpugi esu wa kuādɛɛ̄loo sa kuūnage dɛɛ̄ loo aba ɛɛ. Mɛ sɔ̄ a bee doo kɔ ye dum a waɛbah lokwa a dap si tam sɛmdee, Aida naa bee ɛrɛna gbɛnɛkpo kpugi. Bu pya ye butɔ bee ye biira loo sa ba bɔātɛ̄ ye gbɛ. A kɔ: “Bɔɔ bee mɛ aa kɔ mm le edapna yerebah nɛ na tɛ le na ka le kɔ dɛ̄dɛɛ̄ nɛɛ ekiī mɛ. “M bee begenage ue Jɛhova kɔ a lɛɛbahloo kɔ nu aa mɛ kiā leere loo.” Sɔ̄ esaa, a bee dā ziī ekɔāue bie enɔānu. A kɔ: “Nɛɛ aa bee nɛ lo ekɔaue bee i nyɛŋiabu kɔ Jɛhova suā dɛ̄dɛɛ̄ i taāŋa ale dɛ̄dɛɛ̄ pya nu anua lo taāŋa. Kinakina, tɛ̄maloo yerebah a aabah pya kanɛɛ le pya dɔɔ̄na, m bee muɛ wereloo Jɛhova. M bee yere kara nɛ Jɛhova kɔ a doo kɔ m agɛrɛbah ye dɛrɛ nyiɛ nyɔɔ, e m bee ɛrɛ efɛɛloo sɔ̄ m muɛ kɔ a agara pya na kara.” Sɔ̄ sɔ̄ aa kiisī, bee lu esu Aida loo tam, e lo tam bee ye yerebah nɛ kɔ a dap kuūdɛɛ̄loo aba ɛɛ kuma sɔ̄ a gaa si tam sɛmdee, sa dapnage nɛ nu a bɛɛ̄ ye tɛ le ye ka gbaāloo pya dɔɔ̄na. A kɔ, “M enɔā lo  edɛrɛ nyiɛ nyɔɔ Jɛhova bu mmɛɛ sīdee. Nyaawo ɛrɛgebah sɔ̄ m yere kara sah mm ɛrɛna bɔɔ.”

ENA JƐHOVA EDOO LI DEESĪ A?

12. Dookɛ̄ kpa Le-yɔɔ 56:9 kɔ doo, ena Devid bee suā leere a?

¹² Buū Le-yɔɔ 56:9. Dɔ ama tɔgɛ dɔɔ̄na sīdee Devid bee be eebah ye bɔɔ. Kere ye dum bee le bu kɛ̄tɔɔ̄ alu gɛɛgɛɛloo, a bee ɛrɛ ekɛɛrɛ nyɔɔ nu Jɛhova edoo ye nɛ li deesī. Devid bee suā kɔ Jɛhova e’agara ye taɛ sɔ̄ a bɔloo. Nyɔnɛbee Jɛhova ebee kɔ Devid na elu mɛnɛ esikɛ̄ bɛɛ Izrɛl a. (1 Sam 16:​1, 13) Devid bee suā leere kɔ Jɛhova ɛrɛge edoo gbɔ̄mɛɛ ɛrɛgeba nu a bee yira yii loo.

13. Ena i dɛrɛ nyiɛ nyɔɔ kɔ Jɛhova edoo a?

¹³ Ena Jɛhova eyira yii loo kɔ edooe a nɛ a? Ii ɛmadɛɛ̄ kɔ ekpega i lɛɛ bu dɛ̄dɛɛ̄ i taāŋa. c Mɛ nyɛŋiabu kɔ, ɛrɛgebah taāŋa o kpesī bu lo nyɔuwe ama, Jɛhova elɛɛ dɛ̄dɛɛ̄ ɛɛ bu aā nyɔuwe. (Ais 25:​7-9) Nɛɛ a bee i dɛm ɛrɛ ekpo lo elɛɛ pya e’ua kɛ̄ bu luh, i bo, sa lɛɛ dɛ̄dɛɛ̄ pya a i gbanasī.—1 Jɔn 4:4.

14. Ena i dap ɛrɛ ekɛɛrɛ nyɔɔ a?

¹⁴ Sɔ̄ bɔɔ a aa, ɛrɛ ekɛɛrɛ nyɔɔ pya nu Jɛhova edoo li deesī. Naa kɛɛrɛ kɛ̄ etɔɔ̄ a loo doo sɔ̄ Setan naale elena, sɔ̄ elua egbeesī pya bag dogo sa aba pya kaāna dogo na ele a, le sɔ̄ i mmana kinakina. Ziī tɔgɛ siā bu edoba a bee lu edoo bie kɔnvɛnsɔn a wee lu e’ɛrɛ ziī ziī barasī bu zua 2014 bee kɔ nu akiiloo kɛ̄ i dap ɛrɛ ekɛɛrɛ nyɔɔ i bɛābu doo. Ziī tɛ bee nyɔɔnɛ pya ye butɔ kɔnia kɛ̄ 2 Timɔti 3:​1-5 dap mɛā doo lo alu ekɔ ye nyaana doo kɔ a tɔgɛ kɛ̄ dum emɛā doo bu Paradais kɔ: “Bu aā nyɔuwe, gbɛnɛ ɛɛbu gaa le le. Nyɔnɛbee, pya nɛɛ ewereloo pya dɔɔ̄na, wereloo kaka ue, kuūnadɛɛ̄, kumalookɛ̄, pya a leera Bari, pya a gbaɛ̄tɔ̄loo tɛ le ka, pya a doo yaa, pya a tɔɔ̄ agara, pya a wereloo pya wa butɔ, pya a gbaaloo pya dɔɔ̄na, pya a kɔ lenu kumaloo pya dɔɔ̄na dɛ̄dɛɛ̄ sɔ̄, pya a aa wa loo, pya a kuma nyiɛ kɛ̄, pya a wereloo le dogo, pya a bɔloo edɛrɛ nyiɛ nyɔɔ, pya a naa agabah, pya a kumalookɛ̄ bu beenyiɛ, pya a wereloo Bari ee nu a kpe, pya a taāŋabah Bari aā taɛ bu wa beenyiɛ, tɔɔ̄ bialoo pya nɛɛ ama.” O wee nyɔɔnɛge pya o butɔ le pya o wuga bu yira kɔnia kɛ̄ dum bu aā nyɔuwe emɛā doo ni?

15. Kere bɔɔ bee aa Tanja, ena a bee ye yerebah nɛ kɔ a be eebah ye bɔɔ a?

¹⁵ Ziī wuga nɛɛwa a kura Tanja a tɔɔ̄ barasī North Macedonia bee be eebah ye bɔɔ tɛ̄maloo e’ɛrɛ ekɛɛrɛ nyɔɔ pya leelee ele li deesī. Ye tɛ le ye ka bee ye gbanasī bu e’agabah sɔ̄ a bee bɔātɛ̄ enɔ Baibol. A kɔ: “Pio nu bɔɔ bee mɛ aa loo kɔ edap sira, bee sira. Na ka wee mɛ zip dɛ̄dɛɛ̄ dee m aa enɔānu. Na tɛ le na ka bee kɔ ba efɛe mɛ lo m lu ziī Nɛɛ Ekeebee Jɛhova lo.” Bu kpɛdumɛ, bee lu ekpo Tanja lɛɛ tɔ. A bee doo dogo doodoo wa kuma loo ni? A kɔ: “M bee sere ekɛɛrɛ nyɔɔ kɛ̄ m ɛrɛ ɛɛbu mmɛ deedee doo lo m yira agɛrɛ. M bee kɛɛrɛnage bu loo kɛ̄ Jɛhova enɛ mɛ leelee doo bu aā nyɔuwe sɔ̄ mm le enyɛŋianabu ɛrɛgebah nu m peere le piya nu a mɛ siraloo bu nyɔuwe ama.” Tanja bee yira agara. E tɛ̄maloo yerebah Jɛhova, lo wuga nɛɛwa bee ɛrɛ kɛ̄ etɔɔ̄. Nii’ee, Tanja e’iya ziī wuga nɛɛdam a tɔɔ̄  agara nɛ Jɛhova sa baɛ aba aa gbaa si tam mmɛɛ sɔ̄ bu ɛɛbu.

AGƐRƐTƐ̄ KƐ̄ O DƐRƐ NYIƐ NYƆƆ JƐHOVA DOO AĀ ANYAAWO

16. Ena eyerebah i nɛ kɔ i kiisī lo e’ɛrɛ e’agaloo sɔ̄ i muɛ sɔ̄ pya nu a le bu kpa Luk 21:​26-28 gaa doo a?

¹⁶ Bu gbɛnɛ etɛɛrɛloo, pya nɛɛ “egbaa bu bɔɔ.” Mɛ pya nɛɛ Bari eyira agɛrɛ sa ɛrɛ e’agaloo. (Buū Luk 21:​26-28.) Ena anua ii le e’ɛrɛ bɔɔ a? Nyɔnɛbee i ebee nɔ lo edɛrɛ nyiɛ nyɔɔ Jɛhova. Tanja i bee kɔ ue kumaloo tua sɔ̄ a, kɔ pya nu a bee tɛɛ̄ bu sɔ̄ akii adumɛ bee ye yerebah nɛ kɔ a tāma pya taāŋa aa kpesī anyaawo. A kɔ: “M enɔā kɔ Jɛhova dap i yerebah nɛ kɔ i egerebu bu ɛrɛgebah kɛ̄tɔɔ̄ sa i nɛ leelee. Pio sɔ̄ a dap bee kɔ pya dɔɔ̄na na a gaa baɛbee pya nu a gaa sira a, mɛ Jɛhova ɛrɛ ekpo ee dɛ̄dɛɛ̄ nɛɛ. E kere a bee kɔ pya i taāŋa aga etāma, ba etah.”

17. Bu mɛ sīdee na ekobee ue zua 2024 eyerebah i nɛ a? (Ɛp foto a le nyɔɔ eko.)

¹⁷ A ɛrɛ pya nu a dap doo kɔ i ɛrɛ bɔɔ anii’ee. Mɛ doodoo Devid, ii le edoo kɔ bɔɔ a aa i. I ekobee ue zua 2024 na kara Devid bee yere nɛ Jɛhova kɔ: “Bu dee m ɛrɛ bɔɔ, mda mdaa loo gaa le ture a nyiɛ loo.” (Yɔɔ 56:3) Ziī kpa a kɔ nu akiiloo Baibol kɔ ue kumaloo dɔ ama kɔ, Devid naa bee bie nyiɛ nyɔɔ pya nu a ye aarɛ bɔɔ, ale bie ekɛɛrɛ nyɔɔ pya ye taāŋa mɛ a bee dɛrɛ nyiɛ nyɔɔ kɔ ye Nɛɛ Kpɔā e’agara ye.” Wee kɛɛrɛbu loo i ekobee ue zua a bu zua ama, eetɔɔ̄ na sɔ̄ o gaa kpesī e’aga kɛ̄tɔɔ̄. Su sɔ̄ ɛā ekɛɛrɛ nyɔɔ pya nu Jɛhova bee doo sɔ̄ akii adumɛ, pya nu a gaa doo anyaawo, le pya nu edoo li deesī. Lo sɔ̄, o le doodoo Devid lo a bee kɔ: “Bari na m ture nyiɛ loo a, bɔɔ naale e’aa mɛ.”—Yɔɔ 56:4.