1. ¿Por hanja rꞌabu̱ di tsuhu̱?

 GATꞌHO nuju̱ rꞌabu̱ di tsuhu̱. Mäjuäni ge ko rä mfatsꞌi rä Mäkä Tꞌofo bi za dä täpäbihu̱ ndunthi de nuꞌu̱ yä ntsu ndi pe̱ꞌtsihu̱ mä mꞌe̱tꞌo. Por ejemplo, ya hindi tsuhu̱ nuꞌu̱ yä jäꞌi xä du, nixi yä tsꞌo espiritu o yä u̱xjua, nixi di tsuhu̱ te ma dä thogi xudi ndämäni. Pe ha nuya yä pa di ꞌmu̱ihu̱, ja ndunthi yä tsꞌo tꞌo̱tꞌe nuꞌu̱ ungä rä ntsu ja ngu yä gerra, yä ntsꞌomꞌu̱i, ꞌne yä ñheni (Luc. 21:11). ꞌNehe di tsuhu̱ yä jäꞌi, ngu yä gobiernu nuꞌu̱ yä tsꞌomꞌu̱i, o mä familiahu̱ nuꞌu̱ u̱tsagihu̱ ngeꞌä di pe̱päbihu̱ rä Zi Dada Jeoba. Rꞌa yä ku di senti ge ya hindä za dä ze̱ti nuya yä xuñha thogi.

2. ¿Te bi senti David nuꞌmu̱ bi tso̱ni ha rä hnini Gat, ꞌne por hanja?

² Mäyaꞌmu̱, rꞌa de nuꞌu̱ yä amigo rä Zi Dada Jeoba ꞌnehe bi ntsu. Nꞌa rä pa, rä rey Saúl mi ne dä hyo David, hänge nuni xa bi ntsu ne bi desidi bi ꞌmatꞌi ꞌne bi ma ha nꞌa rä hnini mrä thuhu Gat. Nunä hnini mi kohi ha rä hai yä filisteo. Akís —näꞌä rä rey— bi yꞌo̱de ge David xki tso̱ni ha rä hnini Gat. Näꞌä rey bi bädi ge David mrä israelita ꞌne xki hyo yä mꞌotho yä filisteo. Koꞌmu̱ ya bi fädi, ¡David xa bi ntsu! (1 Sam. 21:​10-12). David xa bi durämu̱i ngeꞌä nubye̱ himi pädi te ma xä tꞌo̱tꞌpäbi. ¿Te bi me̱fi David pa bi däpäbi näꞌä rä ntsu?

3. Ja ngu di handihu̱ ha Salmo 56:​1-3, 11, ¿te bi matsꞌi David pa bi däpäbi rä ntsu?

³ Ha rä Salmo 56, dä za gä handihu̱ te bi senti David nuꞌmu̱ mi yꞌo ha rä hnini Gat. David mää ge xa mi tsu, pe ꞌnehe mää ge ora mi senti njabu̱ mi huxä rä komfiansa ha rä Zi Dada Jeoba ꞌne geꞌä bi matsꞌi pa bi däpäbi rä ntsu (hñeti Salmo 56:​1-3, 11). Koꞌmu̱ David bi me̱fi njabu̱, rä Zi Dada Jeoba himbi  fayabi. Ko rä mfatsꞌi rä Zi Dada Jeoba, David bi me̱fi nꞌa rä tꞌo̱tꞌe pa bi ñäni rä bida: ¡Chake bi ꞌme̱ rä mfeni pa njabu̱ himbi fädi toꞌoꞌä! Hänge ora bri ju̱ David ꞌne bi tsꞌitsꞌi ante rä rey Akís, nuni bi nkue̱ ngeꞌä bi hñurämu̱i ge xki tsꞌispäbi “nꞌa rä ꞌme̱ mfeni” ꞌne himbi da ngue̱nda ge mi geꞌä David. Njabu̱, David bi kꞌotꞌi de yä yꞌe̱ näꞌä rey ꞌne bi ma de gehni (1 Sam. 21:13–22:1).

4. ¿Hanja dä za gi tede ri komfiansa po rä Zi Dada Jeoba? Mää nꞌa rä kꞌoi.

⁴ Mu̱ nuꞌi gi pe̱ꞌspäbi ndunthi rä komfiansa rä Zi Dada Jeoba, geꞌä ꞌnehe ma dä maxꞌäꞌi pa gi täpäbi rä ntsu. Pe, ¿te dä za gi pe̱fi pa njabu̱ gi tede näꞌä ri komfiansa po rä Zi Dada Jeoba mänꞌa ora gi thogi yä mbidi o yä ntsu? Ma gä hutsꞌihu̱ nꞌa rä kꞌoi: Mu̱ rä mediko dä xiꞌi ge gi pe̱ꞌtsi nꞌa rä tsꞌo ñheni, zäi ge xa mä gi ntsu ꞌne ma gi turimu̱i. Pe mientra gi o̱de te xiꞌi rä mediko, zäi ge yꞌo ri tsaya näꞌä rä ntsu ꞌne rä dumu̱i gi pe̱ꞌtsi. ¿Por hanja? Ngeꞌä gi pädi ge gi o ha rä yꞌe̱ nꞌa rä mediko näꞌä xä yꞌo̱the ndunthi yä jäꞌi. Pe hingä ho̱nse̱ꞌä, ko ndunthi rä ñhojäꞌi näꞌä mediko hubꞌäꞌi ri mu̱i ꞌne eñꞌäꞌi: «Ogi turimu̱i. Nuga ma gä o̱theꞌi». Njabu̱ ꞌnehe ko rä Zi Dada Jeoba. Mu̱ gi hñudi gi ntso̱ꞌmi ꞌne gi beni gatꞌho näꞌä xä me̱fi rä Zi Dada Jeoba po geꞌi, geꞌä ma dä maxꞌäꞌi gi tede ri komfiansa po geꞌä ja ngu bi ja David. Nubye̱ mientra ma gä handihu̱ rꞌa yä testo de rä Salmo 56, hyandi hanja dä za gi tede ri komfiansa po rä Zi Dada Jeoba pa dä za gi täpäbi rä ntsu.

¿TE BI ME̱FI JEOBA MÄYAꞌMU̱?

5. ¿Te bi yꞌe̱ntꞌi ha rä mfeni David pa bi däpäbi rä ntsu? (Salmo 56:​12, 13).

⁵ Mäske David mi thogi yä xuñha ꞌne rä bida mi ꞌmu̱i en peligro, näꞌä xa bi yꞌe̱ntꞌi ha rä mfeni gatꞌho nuꞌu̱ yä tꞌo̱tꞌe xki me̱fi rä Zi Dada Jeoba (hñeti Salmo 56:​12, 13). Geꞌä bi matsꞌi David durante rä bida. Ndunthi yä mꞌiki David mi ho dä hyandi yä tꞌo̱ho̱, rä ndehe, ꞌne gatꞌho nuꞌu̱ märꞌa yä tꞌo̱tꞌe xä hyoki rä Zi Dada Jeoba, ꞌne geꞌä mi fatsꞌi pa mi beni hängu rä tsꞌe̱di pe̱ꞌtsi ꞌne hängu mädi yä jäꞌi (Sal. 65:​6-9). ꞌNehe mi beni gatꞌho näꞌä xki me̱fi rä Zi Dada Jeoba po märꞌaa (Sal. 31:19; 37:​25, 26). Nzäntho bi ꞌueke rä tiempo pa bi beni gatꞌho näꞌä xki me̱fi rä Zi Dada Jeoba po geꞌä. Näꞌä bi beni hängu xki matsꞌi ꞌne xki su dende nuꞌmu̱ mrä zi ꞌue̱ne  (Sal. 22:​9, 10). Geꞌä bi matsꞌi David pa njabu̱ bi me̱ꞌspäbi rä komfiansa rä Zi Dada Jeoba ko ngatꞌho rä koraso.

6. Ora gi tsu, ¿te dä hogi gi pe̱fi pa gi pe̱ꞌspäbi rä komfiansa rä Zi Dada Jeoba ge ma dä maxꞌäꞌi?

⁶ Ora gi senti rä ntsu, beni gatꞌho näꞌä xä me̱fi rä Zi Dada Jeoba ꞌne hyandi gatꞌho näꞌä xä hyoki. Ora di handihu̱ hanja rä Zi Dada Jeoba di jamäsu yä zi tsꞌintsꞌu̱ ꞌne yä do̱ni —mäske nuyu̱ hingi ja yä te pa dä xo̱kämbenibi— geꞌä jakägihu̱ gä pe̱ꞌspäbihu̱ ndunthi rä komfiansa ge ma dä sugägihu̱ ꞌne ma dä maxkägihu̱ (Mat. 6:​25-32). Dä hogi gi beni ꞌne gi hyandi te xä me̱fi rä Zi Dada Jeoba po yä amigo. Pa geꞌä dä za gi hñeti ha rä Mäkä Tꞌofo hanja rä Zi Dada Jeoba bi matsꞌi mäyaꞌmu̱ yä amigo, dä za gi hñeti yä esperiensia hanja xä matsꞌi yä ku mäpaya, a ꞌne dä hogi gi beni te xä me̱fi rä Zi Dada Jeoba pa xä suꞌi ꞌne xä maxꞌäꞌi. ¿Hanja bi maxꞌäꞌi pa gä pädi de Geꞌä ꞌne de rä Mäkä Tꞌofo? (Juan 6:44). ¿Hanja xä dädi ri sadi? (1 Juan 5:14). ¿Te mä benefisio gi häni hyaxtho po näꞌä rä bida bi uni rä Tꞌu̱? (Efes. 1:7; Heb. 4:​14-16).

7. ¿Te bi thogi Vanessa ꞌne te bi matsꞌi pa bi däpäbi rä ntsu?

⁷ Vanessa b —nꞌa rä zi nju de rä dähni Haití— bi ñhandui nꞌa rä däta xuñha: nꞌa rä ñꞌo̱ho̱ hyaxtho mi nzofo ꞌne mi xaxi ꞌne mi embäbi ge mi ne dä yꞌo̱tꞌe rä nobia. Pe Vanessa bi rechaza ꞌne bi ꞌñembäbi ge hinä. Näꞌä ñꞌo̱ho̱ꞌä xa bi nkue̱ ꞌne asta bi amenäsa. Hänge Vanessa xa mi tsu. ¿Te bi me̱fi pa bi däpäbi näꞌä rä ntsu? Bi yꞌapäbi rä mfädi rä Zi Dada Jeoba ꞌne bi xipäbi yä anciano te mi thogi. Nuyu̱ yä ku bi kompañä rä zi nju pa bä ngaxte ha yä autorida. ꞌNehe Vanessa himbi hñäki de ha rä mfeni näꞌä xki me̱fi rä Zi Dada Jeoba po yä amigo mäyaꞌmu̱. Nunä zi nju enä: «Bä ehe ha mä mfeni hanja rä Zi Dada Jeoba xki matsꞌi rä profeta Daniel. Nuni profeta bi tꞌe̱ntꞌi ha yä nguu yä lion mäske hinte xki yꞌo̱tꞌe. Pe rä Zi Dada Jeoba bi su. Hänge dä apäbi rä Zi Dada Jeoba ge dä sugägi ꞌnehe. Dä handi hanja bi maxkägi pa dä mbaliente ꞌne dä täpäbi rä ntsu» (Dan. 6:​12-22).

¿TE PE̱FI JEOBA MÄPAYA?

8. ¿De te mi ꞌmu̱i kombensido David? (Salmo 56:8).

⁸ Mäske rä bida David mi ꞌmu̱i en peligro nuꞌmu̱ bi tso̱ni ha rä hnini Gat, himbi hyopäbi ge go xä dominä rä ntsu. ¿Te bi me̱fi? Bi yꞌe̱ntꞌi ha rä mfeni näꞌä mi pe̱fi rä Zi Dada Jeoba näꞌä oraꞌä. Bi hyandi xä ñho hanja rä Zi Dada Jeoba mi gu̱hni, mi su ꞌne mi komprendebi näꞌä mi senti (hñeti Salmo 56:8). ꞌNehe mi pe̱ꞌtsi yä amigo nuꞌu̱ mi ꞌmu̱i pa dä matsꞌi ngu Jonatán ꞌne Ahimélec (1 Sam. 20:​41, 42; 21:​6, 8, 9). Mäske rä rey Saúl mi ne dä hyo David, David mi ꞌmu̱i kombensido ge rä Zi Dada Jeoba mi handi näꞌä mi thogi ꞌne ge mi komprendebi näꞌä mi senti.

9. ¿Te di nupkägihu̱ mä mfenihu̱ ora di tsuhu̱?

⁹ Mu̱ nuꞌi ꞌnehe gi thogi nꞌa rä xuñha näꞌä piꞌäꞌi, beni ge rä Zi Dada Jeoba handi gatꞌho näꞌä gi thogi ꞌne pädi xä ñho te gi senti. Di pädihu̱ njabu̱ ngeꞌä rä Mäkä Tꞌofo pede ge nuꞌmu̱ rä hnini Israel bi tsitsꞌi de gä esclavo ha Egipto, rä Zi Dada Jeoba bi hyandi nuꞌu̱ yä u̱gi ꞌne yä sufrimiento mi thogi (Éx. 3:7). Ha nꞌa de nuꞌu̱ yä thuhu bi yꞌofo David, bi ꞌñembäbi rä Zi Dada Jeoba: «Nuꞌi gi handi gatꞌho näꞌä di sufri, ꞌne nzäntho gi handi nuꞌu̱ mä dumu̱i» (Sal. 31:7). Rä Zi Dada Jeoba ꞌnehe bi sufri ꞌne «bi durämu̱i» asta nuꞌmu̱ rä hnini Israel bi hyonse̱ yä xuñha ngeꞌä xki ꞌuengi de näꞌä rä ꞌñuu xki ꞌñuti (Is. 63:9). Hängu nupkägihu̱ mä mfenihu̱ ora di pädihu̱ ge nuꞌmu̱ di tsuhu̱, rä Zi Dada Jeoba  di komprendegihu̱, ꞌne ꞌmu̱i dispuesto dä maxkägihu̱ pa gä täpäbihu̱ rä ntsu.

10. Xi nuꞌi, ¿te di kombenseꞌi ge rä Zi Dada Jeoba handi näꞌä gi thogi ꞌne ꞌmu̱i pa dä maxꞌäꞌi?

¹⁰ Mu̱ di thogihu̱ yä xuñha, zäi ge rꞌabu̱ di jakägihu̱ xä ñhei gä handihu̱ hanja rä Zi Dada Jeoba rꞌakägihu̱ rä mfatsꞌi. ¿Te dä za gä pe̱fihu̱ ora di sentihu̱ njabu̱? Dä hogi gä xatuäbihu̱ rä Zi Dada Jeoba ꞌne gä apäbihu̱ ge dä maxkägihu̱ pa gä handihu̱ hanja rꞌakägihu̱ rä mfatsꞌi (2 Rey. 6:​15-17). Rꞌabu̱ rä Zi Dada Jeoba dä za dä usa yä ku pa dä uni nꞌa rä discurso o nꞌa rä komentario ha rä mhuntsꞌi näꞌä ma dä nupkägihu̱ mä mfenihu̱. Jeoba di usa näꞌä rä imformäsio rꞌakägihu̱ po mäde de rä hnini: ngu yä bideo, yä jähñä, yä thuhu o mä nꞌa rä he̱ꞌmi. ꞌNehe dä za dä usa nꞌa rä ku pa dä ꞌñutkägihu̱ nꞌa rä testo näꞌä dä hubgä mä mu̱ihu̱. Ko nuꞌu̱ yä xuñha di thogihu̱, rꞌabu̱ di jakägihu̱ xä ñhei gä handihu̱ nuꞌu̱ yä mfatsꞌi bi ehe de rä Zi Dada Jeoba pa gä täpäbihu̱ yä xuñha ꞌne yä ntsu (Is. 65:13; Mar. 10:​29, 30). Ko nuya yä mfatsꞌi rꞌakägihu̱ rä Zi Dada Jeoba utkägihu̱ ge xa turämu̱i po gekhu̱ ꞌne ge ri ꞌñepäbi gä pe̱ꞌspäbihu̱ ndunthi rä komfiansa (Is. 49:​14-16).

11. ¿Te bi matsꞌi rä zi nju Aida pa bi däpäbi yä dumu̱i ꞌne rä ntsu?

¹¹ Nꞌa rä zi nju rä thuhu Aida näꞌä bi ꞌmu̱i ha rä dähni Senegal, pede hanja rä Zi Dada Jeoba bi matsꞌi nuꞌmu̱ bi ñhandui yä xuñha. Koꞌmu̱ Aida mi mädä de gatꞌho nuꞌu̱ märꞌa yä ku, nuꞌu̱ yä dada mi apäbi dä mpe̱fi pa go dä mäntene. Pe rä zi nju Aida bi desidi bi hyoni nꞌa rä ꞌme̱fi näꞌä ma xä hyopäbi xä me̱päbi rä Zi Dada Jeoba de gä precursora regular. Nuꞌu̱ yä dada ꞌne rä familia xa bi kritika ꞌne bi u̱tsa. Nunä zi nju enä: «Xa dä ntsu ꞌne xa dä tumämu̱i ora dä handi ge gatꞌho mi u̱tsagi ꞌne himi tsa gä mäntene nuꞌu̱ mä dada. Asta go dä ho̱xä rä thai rä Zi Dada Jeoba po gatꞌho näꞌä ndi thogi. Pe nꞌa rä pa, ha rä mhuntsꞌi dä o̱de nꞌa rä discurso habu̱ näꞌä ku bi ꞌñenä: “Rä Zi Dada Jeoba pädi xä ñho gatꞌho näꞌä gi thogi ꞌne ma dä maxꞌäꞌi”. Gehnä bi nupkägi mä mfeni, ꞌne dä handi hanja rä Zi Dada Jeoba bi usa yä anciano ꞌne märꞌa yä ku pa bi ꞌñutkägi hängu di mäkägi. Dä xatuäbi rä Zi Dada Jeoba ꞌne dä apäbi ge dä maxkägi pa gä pe̱ꞌspäbi rä komfiansa ꞌne dä handi hanja bi maxkägi ꞌne bi dädi mä sadi». Mꞌe̱fa rä zi nju Aida bi dini nꞌa rä ꞌme̱fi pa bi za bi mäntene yä  dada ꞌne pa bi sigi de gä precursora regular. Nunä zi nju enä: «Dä handi ge mu̱ gä huxä gatꞌho mä komfiansa ha rä Zi Dada Jeoba, näꞌä hindi fayagi. Ora di xatuäbi, mä dumu̱i di mꞌe̱di ꞌne di pe̱ꞌtsi nꞌa rä tsaya ha mä mfeni».

¿TE MA DÄ ME̱FI JEOBA?

12. Ja ngu di handihu̱ ha Salmo 56:​9, ¿te mi pädi xä ñho David?

¹² (Hñeti Salmo 56:9). Nunä versículo utkägihu̱ te mä nꞌa bi me̱fi David pa bi däpäbi rä ntsu: mäske rä bida mi ꞌmu̱i en peligro näꞌä bi beni näꞌä ma xä sigi xä me̱fi rä Zi Dada Jeoba po geꞌä. Mi pe̱ꞌtsi rä komfiansa ge rä Zi Dada Jeoba ya mi pädi te mä ora ma xä ñäni. Mi pädi njabu̱ ngeꞌä rä Zi Dada Jeoba ya xki mää ge David go geꞌä ma xä thutsꞌi de gä rey ha rä hnini Israel (1 Sam. 16:​1, 13). David mi pädi xä ñho ge rä Zi Dada Jeoba mi kumpli näꞌä mi promete.

13. ¿Te di pädihu̱ ge ma dä me̱fi rä Zi Dada Jeoba mänꞌitꞌho?

¹³ ¿Te xä promete rä Zi Dada Jeoba dä me̱fi po gekhu̱? Mäske mäpaya hindi prometegihu̱ dä hñäki gatꞌho yä xuñha, c rä Zi Dada Jeoba hää di promete ge ma dä hä nꞌa rä rꞌayꞌo xiꞌmhai habu̱ ya hingä ma dä nja yä sufrimiento (Is. 25:​7-9). Rä Zi Dada Jeoba pe̱ꞌtsi rä tsꞌe̱di pa dä gu̱tsꞌi nuꞌu̱ xä du, pa dä hñäki yä ñheni, ꞌne pa dä hñäki gatꞌho näꞌä di jakägihu̱ gä sufrihu̱ mäpaya (1 Juan 4:4).

14. ¿Te dä hogi gä imäjinähu̱ dende nubye̱?

¹⁴ Ora gi tsu ꞌne gi turimu̱i, beni te mä mꞌu̱i ma gä pe̱ꞌtsihu̱ ha rä rꞌayꞌo xiꞌmhai habu̱ ya hingä ma dä mꞌu̱i rä Zithu nixi yä tsꞌomꞌu̱i jäꞌi ꞌne ho̱nse̱ ma dä mꞌu̱hni yä hojäꞌi. Imäjinä hanja ha rä Paraiso —ngu ri thogi yä pa— rꞌamätsꞌu̱u̱ ma gä kꞌotꞌihu̱ de rä pekado. Ha näꞌä rä däta mhuntsꞌi regional bi nja ha rä je̱ya 2014, dä handihu̱ hanja nꞌa rä ku bi matsꞌi rä familia dä imäjinä ge 2 Timoteo 3:​1-5 mää ge xä ꞌñepu̱ ho̱nse̱ yä hogä tꞌo̱tꞌe en lugar de yä tsꞌo tꞌo̱tꞌe. Nuꞌu̱ yä ku bi imäjinä ge nuya yä testo enä njauabye̱: “Ha rä rꞌayꞌo xiꞌmhai ma dä ꞌñepu̱ yä pa de gä johya, yä jäꞌi ma dä mädi rä mikꞌei, ma dä hyoni Äjuä ꞌne ma dä me̱ꞌtsi nꞌa rä hogä ntsitsꞌi Kongeꞌä. Hingä dyä ꞌñexmänsu, ma dä me̱ꞌspäbi rä tꞌekꞌei Äjuä, ma dä yꞌo̱te yä dada, ma di pädi dä ungä njamädi, ma dä mädi yä familia, ma dä mꞌu̱i dispuesto dä ñä pa dä gohi nꞌa rä acuerdo, ma dä ñä xä ñho de märꞌaa, ma dä dominä yä mfeni, gatꞌho ma dyä mänxo jäꞌi ꞌne dyä yꞌo̱de, ma dä mädi näꞌä xä ñho, ma dä za drä me̱ꞌspäbi rä komfiansa, ma dä bädi dä ntiende, hingä dyä orgulloso, ma dä mädi Äjuä en lugar de nuꞌu̱ yä tsꞌo nkꞌatꞌi, ꞌne gatꞌho yä jäꞌi ma dä xo̱kämbeni Äjuä ko ngatꞌho yä koraso. Hänge ogi ꞌuege de nuyu̱ yä jäꞌi”. Xi nuꞌi, ¿gi nzäi gi ñä ko ri familia, ko ri amigo ꞌne ko yä ku de rä mhuntsꞌi de te mä bida ma gä pe̱ꞌtsihu̱ ha rä rꞌayꞌo xiꞌmhai?

15. ¿Te bi matsꞌi rä zi nju Tanja pa bi däpäbi rä ntsu?

¹⁵ Nꞌa rä zi nju rä thuhu Tanja de rä dähni Macedonia, mää ge dä imäjinä näꞌä ma dä me̱fi rä Zi Dada Jeoba ha rä rꞌayꞌo xiꞌmhai, geꞌä xä matsꞌi pa xä däpäbi rä ntsu. Nunä zi nju enä: «Nuꞌmu̱ dä fu̱di dä nxadi rä Mäkä Tꞌofo, mä dada ꞌne mä nänä xa bi nkue̱. Mä nänä mi fe̱tꞌigi ora ndi pengi de yä mhuntsꞌi. Tanto mä dada ngu mä nänä mi amenäsagi ko dä hyogägi mu̱ gä ntestigo rä Jeoba». Nunä zi nju sigi enä: «Nuꞌmu̱ bi tꞌe̱ngägi de mä nguu, nzäntho ndi beni ge mu̱ gä pe̱päbi ꞌne gä o̱te rä Zi Dada Jeoba, ma xtä tini rä johya tanto nubye̱ ꞌne pa nzäntho ha rä rꞌayꞌo xiꞌmhai. Nuga ndi ense̱: “Mäske gä ꞌme̱di gatꞌho, ha rä rꞌayꞌo xiꞌmhai rä Zi Dada Jeoba ma dä rꞌakägi ndunthi yä jäpi ꞌne ma dä maxkägi gä pumfri gatꞌho näꞌä di thogibye̱”». Nunä zi nju bi me̱päbi rä Zi Dada Jeoba ko ndunthi rä balo ꞌne bi dini habu̱ dä mꞌu̱i.  Mꞌe̱fa bi nthäti ꞌne mähye̱gi ko rä däme umbäbi gatꞌho de yä tiempo rä Zi Dada Jeoba pa pe̱päbi.

DENDE NUBYE̱, JAPI DÄ ZE̱DI RI KOMFIANSA PO RÄ ZI DADA JEOBA

16. ¿Te ma dä maxkägihu̱ pa gä täpäbihu̱ rä ntsu xti zo̱ho̱ näꞌä rä mbidi no̱ni ha Lucas 21:​26-28?

¹⁶ Rä Mäkä Tꞌofo mää ge xä ꞌñepu̱ nꞌa rä däta mbidi ꞌne ge yä jäꞌi asta ma dä desmäya ko rä ntsu. Mäske yä gobiernu ma dä ne te dä yꞌo̱tkägihu̱, nuju̱ hingä ma gä ntsuhu̱ ꞌne ma gä ju̱hu̱ rä balo pa hingä ꞌuegehu̱ de rä ꞌñuu rä Zi Dada Jeoba (hñeti Lucas 21:​26-28). ¿Por hanja hinte ma gä tsuhu̱? Ngeꞌä dende nubye̱ di pe̱ꞌspäbihu̱ rä komfiansa rä Zi Dada Jeoba ꞌne di pädihu̱ ge näꞌä ma dä maxkägihu̱. Tanja, näꞌä rä zi nju ya dä no̱nihu̱ enä: «Gatꞌho näꞌä xtä thogi xä maxkägi pa xtä ñhantꞌmee nuꞌu̱ märꞌa yä xuñha xä ꞌñekägi. Xtä handi ge hindi mporta te di thogihu̱, rä Zi Dada Jeoba ꞌmu̱i pa dä maxkägihu̱ ꞌne dä rꞌakägihu̱ rä jäpi. Rꞌabu̱ dä za gä sentihu̱ ge rꞌa yä jäꞌi go geꞌu̱ pe̱ꞌtsi rä autorida ꞌne di dominä, pe rä Zi Dada Jeoba mänꞌa go pe̱ꞌtsi rä tsꞌe̱di ke geꞌu̱. Hängu di nupkägi mä mfeni gä beni ge ma dä zo̱ho̱ rä pa habu̱ ma dä uadi gatꞌho nuꞌu̱ yä xuñha di thogihu̱».

17. ¿Hanja ma dä maxkägihu̱ näꞌä rä testo bi thahni pa rä je̱ya 2024? (Hyandi rä kꞌoi de rä mu̱di nxii).

¹⁷ Mäpaya thogi ndunthi yä tꞌo̱tꞌe nuꞌu̱ pikägihu̱. Pe ja ngu David hindi hopäbihu̱ ge dä dominägihu̱ rä ntsu. Näꞌä rä testo bi thahni pa rä je̱ya 2024, geꞌu̱ yä noya bi mää David ora mi xatuäbi rä Zi Dada Jeoba ꞌne bi ꞌñenä: «Ora di tsu, ¡mä komfiansa ꞌmu̱i Kongeꞌi!» (Sal. 56:3). Nunä testo utkägihu̱ ge David, himi e̱ntꞌä ha rä mfeni nuꞌu̱ yä xuñha mi pe̱ꞌtsi o nuꞌu̱ yä tꞌo̱tꞌe mi japäbi dä ntsu, sino ke mi e̱ntꞌä ha rä mfeni Näꞌä toꞌo pe̱ꞌtsä rä tsꞌe̱di pa dä matsꞌi ꞌne dä ñäni. Hänge xa dä yꞌe̱ntꞌä ha ri mfeni nunä testo bi thahni pa rä je̱ya 2024 ꞌne mänꞌa ora gi thogi yä xuñha. ꞌUeke rä tiempo pa gi hñudi gi ntsꞌoꞌmi ꞌne gi hyandi näꞌä xä me̱fi rä Zi Dada Jeoba, näꞌä pe̱fi mäpaya ꞌne näꞌä xä promete dä me̱fi mänꞌitꞌho. Njabu̱, ja ngu David ma dä za gi ꞌñenä ꞌnehe: «Ha Äjuä [ . . . ] ja gehni di huxä gatꞌho mä komfiansa ꞌne geꞌä faxkägi pa hingä ntsu» (Sal. 56:4).