1. Akin et natatakot tayo no maminsan?

 NORMAL labat so makaliknay takot, nasasali tayon amin itan. Siempre, natan ya amta tayo lay katuaan ed Biblia, agtayo la natatakot ed saray inatey, mauges ya espiritu, tan no antoy nagawad arapen. Pero natatakot tayo nin siansia lapud saray aliwliwan nagagawa natan, singa say guerra, krimen, tan nanduruman sakit. (Luc. 21:11) Ompan agtayo met naiwasan so ontakot ed too, lalo la no kontra iray kapamilya tayo o say gobierno ed pandadayew tayod si Jehova. Natatakot met so arum ya agagi ya ompan agda nasarag so dadalanen dan subok natan. Iisipen ingen na arum ya ag-ira makapanmatoor ed saray onsabin subok diad arapen.

2. Antoy situasyon nen David nen walad Gat?

² Asali met nen David so tinmakot. Aminsan, nen sikatoy tutugisen nen Arin Saul, sikatoy tinmakas ed Gat ya syudad na saray Filisteo tan uuleyan nen Arin Akis. Akasabi ed si Akis so balita ya wadman si David, amay amatey ed “samplon libolibo” ya Filisteo. Aburidoy David no antoy gawaen ed sikato nen Akis tan “tinmakot a maong.” (1 Sam. 21:10-12) Pero antoy ginawa to pian nalabanan toy takot to?

3. Base ed Salmo 56:1-3, 11, antoy ginawa nen David pian nalabanan toy takot to?

³ Nabasa tayod Salmo 56 no antoy alikna nen David nen sikatoy walad Gat. Diad satan ya salmo, imbaga to no akin ya natatakot tan no panon ton alabanan so takot to. Imbaga to ya nen natatakot, sikatoy nanmatalek ed si Jehova. (Basaen so Salmo 56:1-3, 11.) Diad tulong nen Jehova, akaisip si David na nikadkaduman paraan pian natakasan toy Akis. Sikatoy nankunkunwarin ambagel. Kanian imbes ya ipapatey nen Akis, pinaalis to laingen. Katon akatakas si David. Abendisyonan so plano to ta nanmatalek ed Dios to.​—1 Sam. 21:13–22:1.

4. Antoy gawaen tayo pian ombiskeg so tiwala tayod si Jehova? Mangiter na ilustrasyon.

 ⁴ Singa si David, nalabanan tayo met so takot tayo no manmatalek tayod si Jehova. Pero antoy gawaen tayo pian ombiskeg so tiwala tayo ed si Jehova, lalo la no natatakot tayo? Imanoen iyan ilustrasyon: No a-diagnose ka ya wala manayay sakit mo, ompan diad gapo et natatakot tan aburido ka. Pero no akalmo kay marunong ya doktor, anggan panon et onkalma ka. Walay tiwalam ed sikato ta dakel lay apaabig to. No manpapa-check up ka tan ibabagam ed sikato iray sintomas mo, dedengelen to ka tan sankaliknam ya walay malasakit to. Ompan resitaan to ka na tambal tan mangi-suggest na treatment ya akatulong lad saray pasyente to. Si Aman Jehova et singa satan ya doktor. Ombiskeg so talek tayod sikato no isipen tayo la ray ginawa to nensaman, no anto ray gagawaen to natan, tan no anto ni ray gawaen to diad arapen. Ontan so ginawa nen David, ya singa nabasa tayod Salmo 56. Legan tayon pantotongtongan so pigaran bersikulo ed satan ya salmo, isip mo no panon mo met ya napabiskeg so tiwalam ed si Jehova pian nalabanan moy takot mo.

ANTO LA RAY GINAWA NEN JEHOVA NENSAMAN?

5. Antoy inisip nen David pian nalabanan toy takot to? (Salmo 56:12, 13)

⁵ Nen napepeligroy bilay nen David, inisip to no anto la ray ginawa nen Jehova nensaman. (Basaen so Salmo 56:12, 13.) Diad tua, lanang ya ontan so gagawaen nen David. Singa bilang, dinalepdep to iray pinalsa nen Jehova. Aratan so mangipapanonot ed sikato ya makapanyari si Jehova tan inar-aro To ray totoo. (Sal. 65:6-9) Dinalepdep to met iray ginawa nen Jehova parad arum. (Sal. 31:19; 37:25, 26) Tan dinalepdep to iray ginawa la nen Jehova parad sikaton mismo. Sankanonot nen David no panon ya sikatoy inasikaso tan prinotektaan nen Jehova nen lukon ni labat nen ina to. (Sal. 22:9, 10) On, dinalepdep iratan ya amin nen David kanian mabisbiskeg so tiwala tod si Jehova!

6. No natatakot tayo, antoy gawaen tayo pian ombiskeg so tiwala tayod si Jehova?

⁶ No natatakot ka, isip mo no anto la ray  ginawa nen Jehova nensaman. Obserbaan tan dalepdep mo iray pinalsa to. Singa bilang, ‘imanom ya maong’ iray siwit tan rosas. No aasikasoen ira nen Jehova anta anggapoy abilidad dan mandayew ed sikato tan agto ra ginawa unong ed indengan to, di mas asikasoen to tayo ta manlilingkor tayod sikato! (Mat. 6:25-32) Isip mo met iray ginawa nen Jehova parad saray lingkor to. Maabig no i-personal study’m so sakey ya karakter ed Biblia ya mabisbiskeg so pananisia to. Odino basam so istoryay bilay na saray matoor ya lingkor nen Jehova natan. a Tan isip mo met no anto la ray ginawa nen Jehova parad sika. Singa bilang, anto ray ginawa to pian naamtaan moy katuaan? (Juan 6:44) Anto la ran pikakasim so inebatan to? (1 Juan 5:14) Panon kan minanabang ed dondon bagat na inad-aro ton Anak kada agew?​—Efe. 1:7; Heb. 4:14-16.

7. Panon ya akatulong ed si Vanessa so eksperiensya nen propetan Daniel?

⁷ Imanoen so eksperiensya nen Vanessa b ya taga Haiti. Natatakot ya maong ta walay kabandaan ton laki ya manggusto ed sikato. Lanang ya ontatawag tan manti-text iyan laki, tan pipiliten toy Vanessa ya mirelasyon ed sikato. Pero diniretsa nen Vanessa ya agto labay. Balet imbes ya ontunda, tinaktakot to ingen si Vanessa ya manggawan-manggawa kunoy paraan pian naala toy labay to. “Natatakot ak ya maong,” kuan nen Vanessa. Antoy ginawa to pian agnadaeg na takot? Sikatoy nampatulong ed sakey ya elder pian nai-report ed saray pulis so situasyon to. Pero aliwan saman labat so ginawa to. Dinalepdep to met kuno no panon ya prinotektaan nen Jehova iray lingkor to nensaman. Kuan to: “Si propetan Daniel so anonotan kon tampol. Anta anggapoy ginawa ton aliwa, imbantak dad ungib na leon, pero sikatoy prinotektaan nen Jehova. Kanian impikasik ed si Aman Jehova ya sikato lay akauley ed siak. Kayari to man, kinmalma ak tan agak la natatakot.”​—Dan. 6:12-22.

ANTO RAY GAGAWAEN NEN JEHOVA NATAN?

8. Kombinsido si David ed anto? (Salmo 56:8)

⁸ Anggano amta nen David ya napepeligroy bilay to diad Gat, aga nampadaeg ed takot to. Imanoen no antoy ginawa to ya nabasad Salmo 56:8. (Basaen.) Ninonot to no antoy gagawaen nen Jehova parad sikato diad saraman ya oras. Sankalikna nen David ya sikatoy susubaybayan, proprotektaan, tan natatalosan nen Aman Jehova. Wadtan met iray kakaaro to, ya singa si Jonatan tan say Atagey ya Saserdoten si Ahimelec, ya amaseseg tan tinmulong ed sikato. (1 Sam. 20:41, 42; 21:6, 8, 9) Sakey ni, anggano gagawaen la nen Arin Saul so amin, agto naere-erel si David. On, kombinsido si David ya amta nen Aman Jehova so amin ya dadalanen tan nalilikna to.

9. No ondadalan tayod subok, anto ray naiimano nen Jehova?

⁹ No ondadalan kad subok tan natatakot ka, tandaan mo ya amta nen Jehova so dadalanen mo tan natatalosan toy naliliknam. Singa bilang, nen naaripen iray Israelita diad Ehipto, anengneng nen Jehova so panmamaltrato ed sikara. Pero naimano to met so epekto na satan ed emosyon da. Kuan to: “Amtak so paniirap da.” (Exo. 3:7) Diad sakey ya salmo, inkansion nen David ya ‘nanenengneng nen Jehova so paniirap tan pinasyan pakakagonigon to.’ (Sal. 31:7) Nen inani na saray Israelita so resulta na impanrebelde ra, ‘agonigon’ si  Aman Jehova, anggano amta to ya kasalanan da kanian ontay agawad sikara. (Isa. 63:9) Kanian no natatakot ka, tandaan mo ya natatalosan nen Jehova so naliliknam tan labalabay to kan tulongan pian nalabanan moy takot mo.

10. Akin et kombinsido ka ya amta nen Jehova so dadalanen mo tan tulongan to ka pian nasarag mo itan?

¹⁰ No ondadalan kad subok, ompan no maminsan et agmon tampol nanengneng so tulong nen Jehova. Maabig sirin no ipikasim ya lukasan toy matam pian nanengneng mo no panon to kan tutulongan. (2 Ara. 6:15-17) Singa bilang, kasin apaseseg ka ed sakey ya paliwawa o komento diad aral? Kasin binmiskeg so liknaan mo lapud sakey ya publikasyon, video, odino original song? Kasin a-touch ka ed imbaga na sakey ya agi, odino ed sakey ya teksto ya in-share tod sika? On, saray maar-aron agagi tan say dakel ya espiritual ya naakan et regalo nen Jehova ed sikatayo. (Isa. 65:13; Mar. 10:29, 30) Agmo komon iratan ibabaliwala. Uusaren iratan nen Jehova pian ipalikna to ya imamalasakit to ka. (Isa. 49:14-16) Patunay iratan ya naasaan moy tulong to.

11. Antoy akatulong ed si Aida pian nabawasan so panaaburido to?

¹¹ Makaaral tayo ed eksperiensya nen Sister Aida ya taga Senegal. Lapud sikato so panguloan ya anak, iilaloan na saray atateng to ya sikatoy mantrabaho pian walay pansuporta tod sarili to tan ed sikara. Pero nen pinasimpli toy bilay to tan nampayunir, ngalngali anggapo lay naiderew tod pamilya to. Kanian mansyodot iran maong tan balbalawen da. Oniay kuan nen Aida: “Aburido ak ya maong ta ompan agko la nasuportaan iray atateng ko tan nababaingan ak ed ibaga na totoo. Sinmabi ingen ed punto ya tinetel koy Aman Jehova no akin ya pinaulyanan to ya oniay nagawa.” Pero ag-abayag, walay arengel to kunon paliwawa ed Kingdom Hall. Oniay kuan nen Aida: “Imbaga na espiker ya amta nen Jehova so kada sugat ed puso tayo. Tan lapud panamaseseg na saray elder tan arum nin agagi, aliknak ya talagan inar-aro ak nen Aman Jehova. Manlapu lad saman, kada no manpikasi ak, mabisbiskeg so tiwalak ya tulongan to ak. Tan ondedeen so nonot ko no nanengneng koy ebat tod pikakasik.” Ag-abayag, akalmon siansia na trabaho si  Aida ya makasuporta ed pampapayunir to tan ed saray atateng to. Kuan to: “Mas buo la natan so tiwalak ed si Jehova. Kayarik ya manpikasi, agak la masyadon aburido.”

ANTO NI RAY GAWAEN NEN JEHOVA DIAD ARAPEN?

12. Base ed Salmo 56:​9, matalek si David ed anto?

¹² Basaen so Salmo 56:9. Nabasa ed sayan bersikulo no anto ni ginawa nen David pian nalabanan toy takot to. Anggano napepeligroy bilay to, say sankanonot to et no anto ni ray gawaen nen Jehova parad sikato. Matalek si David ya sikatoy iligtas nen Jehova. Tutal, sikato so pinili nen Jehova ya onsublay ya ari ed Israel. (1 Sam. 16:1, 13) Baleg so tiwala nen David ya nagawan-nagawa no antoy im-promise nen Jehova.

13. Antoy seguradon gawaen nen Jehova diad arapen?

¹³ Anto ray im-promise nen Jehova ya gawaen to parad sika? Aga im-promise nen Jehova ya ipaliis to tayo ed amin ya problema. c Pero antokaman so subok ya aarapen mo natan, tandaan mo ya ekalen iratan ya amin nen Jehova diad balon mundo. (Isa. 25:7-9) Mantiwala ka ya sarasarag ton bilayen iray inatey, paabigen to iray sakit tayo, tan deralen to so amin ya onkokontra ed dugan panagdayew.​—1 Juan 4:4.

14. Anto ray balibalin dalepdepen tayo?

¹⁴ No natatakot ka, dalepdep mo iray gawaen nen Jehova diad arapen. Isip mo pay bilay no anggapo lay Satanas, no anggapo la ray mauges, no matunong ya totoo labat lay manaayam ed dalin, tan kada agew et kalkalna tayon magmamaliw ya perpekto. Nen 2014 ya regional a kombension, akaaral tayo ed sakey ya demonstrasyon no panon tayon dalepdepen so ilalo tayod arapen. Diad satan ya demonstrasyon, walay tatay ya diad family worship da et sinalatan to na balibali iran ugali imay nabasad 2 Timoteo 3:1-5 pian naimadyin na pamilya to so bilay ed Paraiso. Oniay impangibaga to: “Diad balon mundo et magmaliw lan maliket tan mainaway bilay. Ta saray totoo et magmaliw a maaro ed kapara dan too, maaro ed espiritual ya kayamanan, aliwa ran mapasirayew, mapaabeba ra, idadayew da so Dios, matulok ira ed atateng da, amta ray misalamat, matoor ira, inar-aro da ray kapamilya ra, mainomay iran katalosan, maabig so ibabaga ra tungkol ed arum, walay kontrol da ed sarili da, mahinahon ira, aaroen da so kamaongan, napantiwalaan ira, mapalugar ira, ipapasen dan mas atagey so arum, maaro ira ed Dios imbes ya maaro ed panliliket, matakot ira ed Dios. Mikaaro ka ed sikara.” No kaistoryaan mo ray kapamilyam o saray agagi, kasin napantotongtongan yo so bilay ed balon mundo?

15. Antoy akatulong ed si Tanya pian nalabanan toy takot to?

¹⁵ Imanoen so eksperiensya nen Sister Tanya ya tagad North Macedonia. Dinalepdep to iray bendisyon diad balon mundo kanian alabanan toy takot to. Kontran maong iray atateng to ed panaaral toy Biblia. Kuan to: “Agawa iramay tatakotan kon nagawa. Kada no miaral ak, sasakitan ak nen nanay ko kasempet kod abung. Binantaan ak ingen na atateng ko ya pateyen da ak no man-Tasi ak.” Sinmabi panaon et pinalayas day Tanya. Antoy akatulong ed sikato pian nasarag to yan subok? Kuan to: “Say inisip ko la, amay liket ya naliknak diad andi-anggaan no manmatoor ak. Anggano dakel so naandi ed siak diad sayan sistema, segurado ak ya salatan itan nen Aman Jehova diad balon mundo tan nalingwanan ko lanlamang so amin ya ampaipait ya agawad bilay ko.” Lapud dinalepdep iratan nen Tanya, sikatoy akapanmatoor. Tan diad  tulong nen Aman Jehova, akalmoy panayaman to. Natan et malikeliket ya manlilingkor si Tanya bilang payunir kaibay matottoor ya brother ya akaasawa ed sikato.

PABISKEG MO LAY TIWALAM ED SI JEHOVA NATAN

16. No nagawa la imay akapropesiya ed Lucas 21:​26-28, antoy makatulong pian ag-itayo nadaeg na takot?

¹⁶ No baleg a kairapan la, “onkapuy iray totoo lapud takot.” Balet saray lingkor na Dios et ag-ira nadaeg na takot kanian mansiansia ran makpel. (Basaen so Lucas 21:26-28.) Akin ey? On ta mabiskeg tan buo so tiwala da ed si Jehova. Imbaga nen Sister Tanya ya lapud saray dinalan ton subok nensaman, agla kuno natatakot anggan anto ni tay onsabin subok ed bilay to. Kuan to: “Apatunayan ko la ya anggan anto ni tay subok, walan-walay gawaen nen Jehova pian natulongan tan nabendisyonan to iray lingkor to. No maminsan, ompan isipen tayo ya singa anggapoy kalaban-laban tayo lapud gagawaen na arum ya too, pero diad tua, mas makapanyari si Aman Jehova nen say sikara. Tan anggano mair-irap so situasyon tayo, walan-walay sampot to.”

17. Akin et marakep no dalepdepen mon lanang so teksto ed taon 2024? (Nengnengen so litrato ed apis.)

¹⁷ Dakel so pakatatakotan tayo natan. Pero singa si David, agtayo ompapayag ya nadaeg itayo na takot. Dugaruga so teksto tayo ed taon 2024​—amay pikakasi nen David ed si Aman Jehova nen sikatoy walad Gat. Kuan to: “Sano natatakot ak, manmatalek ak ed sika.” (Sal. 56:3) Oniay imbaga na sakey ya Bible scholar tungkol ed sayan bersikulo: “No ondadalan ed subok si David, agto pinunuyan so takot to. Aga manpopokus ed problema ta baleg so tiwala to ya sikatoy tulongan na Manangiliktar to.” Diad ontutumbok iran agew, simba, tan bulan, komon ta lanang mon isipen so teksto tayo ed sayan taon, lalo la no natatakot ka. Dalepdep mo iray ginawa nen Jehova nensaman, saray gagawaen to natan, tan saray gawaen to ni diad arapen. No ontay gawaen mo, seguradon naibagam met imay imbaga nen David ya: “Say Dios so panmamatalekan ko; agak antakot.”​—Sal. 56:4.