1. Dikon tin biaha nos tin miedu?

 MIEDU ta un kos ku nos tur sa tin. Ta klaru ku Beibel a yuda nos pa no tin miedu di morto, miedu di demoño i miedu di loke lo pasa ku nos den futuro. Pero nos ta bibando den tempunan hopi difísil, kaminda guera, krímen i malesa por duna nos miedu. (Luk. 21:11) Nos por tin miedu tambe di hende, por ehèmpel, gobièrnu ku ta oprimí nos òf asta nos famianan ku ta kontra adorashon berdadero. Anto algun di nos tin miedu ku nos lo no por soportá prueba aworakí ni esnan ku tin ku bini.

2. Kiko a pasa ku David na Gat?

² Bo tabata sa ku David tambe tabatin miedu? Por ehèmpel, ora Rei Saul tabata busk’é pa mata, David a hui bai e stat filisteo di Gat. No a tarda mashá ku Ákis, rei di Gat, a haña sa ku David tabata e guerero ku a mata “míles i míles” di filisteo. David “a haña hopi miedu.” (1 Sám. 21:10-12) E tabatin miedu di loke Ákis lo por a hasi kuné. Kiko a yuda David keda kalmu apesar ku e tabatin miedu?

3. Segun Salmo 56:1-3 i 11, kon David por a keda kalmu apesar ku e tabatin miedu?

³ Na Salmo 56, nos por lesa kon David a sintié tempu e tabata na Gat. El a splika dikon e tabatin miedu i tambe  kiko el a hasi pa keda kalmu. David a konfia den Yehova. (Lesa Salmo 56:1-3, 11.) Anto Yehova no a lag’é na kaya. Yehova a yuda David bini ku e idea pa fingi di ta loko; anto e plan a logra. Awor Ákis no tabata kier a mat’é mas, mas bien e tabata ke pa el a bai mas lihé posibel fo’i einan. Asina ei David a haña chèns di hui.—1 Sám. 21:13–22:1.

4. Kiko nos tin ku hasi pa nos haña mas konfiansa den Yehova? Duna un ehèmpel.

⁴ Si nos konfia den Yehova, nos tambe por keda kalmu i tuma bon desishon. Pero kiko nos tin ku hasi pa nos haña mas konfiansa den Yehova, foral ora nos tin miedu? Por ehèmpel, imaginá ku di un dia pa otro b’a haña sa ku bo tin un malesa. Sigur esei lo duna bo miedu. Pero si bo ta konfia bo dòkter, bo ta sinti bo trankil. Den pasado, el a yega di yuda hopi pashènt ku e mesun malesa. Ku pasenshi e ta skucha bo segun ku bo ta bis’é kiko bo tin miedu di dje i bo ta sinti ku di bèrdat e ta komprondé bo. Ademas, e ta sugerí un tratamentu ku a yuda otro pashènt masha bon mes. Di mes manera, pa nos konfia den Yehova mas tantu, nos tin ku analisá loke el a hasi kaba, loke e ta hasiendo awor i loke lo e hasi pa nos. Esei ta loke David a hasi. Segun ku nos ta pasa den Salmo 56, wak kon abo tambe por haña mas konfiansa den Yehova i keda kalmu ora bo tin miedu.

LOKE YEHOVA A HASI KABA

5. Kiko David tabata meditá riba dje ora e tabatin miedu? (Salmo 56:12, 13)

⁵ Aunke David su bida tabata na peliger, el a keda pensa riba loke Yehova a hasi kaba. (Lesa Salmo 56:12, 13.) Esei tabata un kustumber ku David tabatin. Por ehèmpel, tabatin biaha ku el a meditá riba Yehova su kreashon. Anto esei a kòrd’é ku Yehova ta hopi poderoso i ku e ta stima hende mashá. (Sal. 65:6-9) David a meditá tambe riba loke Yehova a hasi pa otro hende. (Sal. 31:19; 37:25, 26) I el a meditá foral riba loke  Yehova a hasi p’e. For di tempu David tabata yuchi, Yehova a yud’é i proteh’é. (Sal. 22:9, 10) Mirando tur loke David tabata meditá riba dje, no ta nada straño ku el a haña mas konfiansa den Yehova!

6. Kiko lo yuda nos konfia den Yehova ora nos tin miedu?

⁶ Ora bo tin miedu, puntra bo mes: ‘Kiko ta loke Yehova a hasi kaba?’ Pensa riba e kosnan ku el a krea. Por ehèmpel, aunke e no a krea para- i flornan den su imágen ni nan no por ador’é, opservá kon e ta kuida nan. Imaginá kuantu mas ainda lo e kuida nos! Ora bo meditá riba esei, bo konfiansa den dje lo bira mas fuerte. (Mat. 6:25-32) Analisá tambe loke Yehova a hasi pa su sirbidónan. Bo por studia tokante un personahe di Beibel ku a demostrá fe den Yehova òf lesa eksperensia di sirbidónan di Yehova di nos tempu. a Ademas, meditá riba kon Yehova a kuida bo. Por ehèmpel, kon el a hala bo na e bèrdat? (Huan 6:44) Kon el a kontestá bo orashonnan? (1 Huan 5:14) Kon e sakrifisio di su Yu stimá ta yuda bo tur dia?—Efe. 1:7; Heb. 4:14-16.

7. Kon e relato di Profeta Dánièl a yuda Vanessa?

⁷ Vanessa, b un ruman na Haiti, a hañ’é den un situashon ku a dun’é hopi miedu. Tur dia e tabata haña mensahe i yamada di un hòmber ku no tabata biba muchu leu for di dje. E tabata preshoná Vanessa pa tin algu kuné, pero nos ruman a nenga redondamente. E hòmber a bira mas agresivo i a asta menasa Vanessa. Vanessa a bisa: “M’a haña masha miedu mes.” Kiko el a hasi? El a hasi tur loke e tabata por pa protehá su mes. Un ansiano a anim’é pa tuma kontakto ku polis. Pero, el a keda pensa tambe riba kon Yehova a protehá su sirbidónan den pasado. Vanessa a konta: “Profeta Dánièl ta e promé ku a bini na mi mente. Aunke e no a hasi nada malu, nan a tir’é den kueba di leon ku tabatin yen di hamber. Pero Yehova a sera boka di e leonnan. Pues, m’a pidi Yehova pa e hòmber ei laga mi na pas i pa lag’é lubidá mi. Despues di esei, mi no tabatin miedu mas.”—Dán. 6:12-22.

LOKE YEHOVA TA HASIENDO AWOR

8. Di kiko David tabata konvensí? (Salmo 56:8)

⁸ Aunke David tabata kore peliger di pèrdè su bida ora e tabata na Gat, e no a keda pensa riba e kosnan ku a dun’é miedu. Mas bien, el a preferá di meditá riba loke Yehova tabata hasiendo p’e n’e momento ei. David por a mira kon Yehova tabata gui’é i proteh’é i ku E tabata komprondé su sintimentunan. (Lesa Salmo 56:8.) David tabatin bon amigu tambe, manera Yónatan i Sumo Saserdote Ahímelèk. Nan a anim’é i yud’é. (1 Sám. 20:41, 42; 21:6, 8, 9) Anto maske Rei Saul tabata busk’é pa mata, tur biaha David a skapa. David tabata konvensí ku Yehova tabata sa tur kos ku e tabata pasa aden i kon esei tabata afekt’é emoshonalmente.

9. Dikon nos ta konvensí ku Yehova sa kon nos ta sinti?

⁹ Ora bo haña bo ku un prueba i ta sinti miedu, kòrda ku Yehova sa di e prueba i kon e prueba ei ta laga bo sinti. Por ehèmpel, Yehova no a djis tuma nota di e maltrato ku e israelitanan tabata pasa  aden na Egipto, pero tambe ‘kuantu nan tabata sufri.’ (Éks. 3:7) David a kanta ku Yehova a mira su “sufrimentu” i “kon grandi [su] problemanan” tabata. (Sal. 31:7) Anto ora Dios su pueblo tabata sufri, asta debí na nan mes mal desishon, Yehova “tambe tabata sufri.” (Isa. 63:9) Ora bo tin miedu, Yehova ta komprondé kon bo ta sinti, i e ta kla pa yuda bo ya asina bo no sinti tantu miedu.

10. Dikon bo ta konvensí ku Yehova ta stima bo i ku lo e yuda bo trata ku kualke prueba?

¹⁰ Si bo ta pasa den un prueba ku ta duna bo hopi miedu, kisas bo no ta mira kon Yehova ta yudando bo. Kiko bo por hasi? Pidié yuda bo mira kon e ta yudando bo. (2 Rei. 6:15-17) Kaba, puntra bo mes: ‘Tabatin un diskurso òf un komentario na reunion ku a animá mi? Òf kisas tabata un publikashon, vidio òf kantika di Broadcasting? Un ruman a bisa mi algu òf a lesa un teksto pa mi ku a trankilisá mi?’ Realidat ta ku masha lihé mes nos por lubidá kon spesial tantu e amor di nos rumannan komo e animashon ku nos ta haña di Beibel ta. Tur ta regalo di Yehova. (Isa. 65:13; Mar. 10:29, 30) Nan ta mustra kuantu e ta stima bo. (Isa. 49:14-16) I nan ta mustra ku Yehova meresé pa bo konfia den dje.

11. Kiko a yuda Aida?

¹¹ Aida, ku ta biba na Senegal, a mira kon Yehova a yud’é durante un prueba. Komo yu mayó, su mayornan a stèns ku e tin ku gana sufisiente sèn pa kuida tantu nan komo su mes. Pero despues ku Aida a simplifiká su bida pa traha pionero, no semper sèn tabata yega. Su famia awor no tabata masha kontentu i tabata lag’é sa esei. Aida a bisa: “Mi tabatin miedu ku lo mi no por a yuda mi mayornan i ku tur hende lo papia malu di mi. M’a asta kulpa Yehova ku el a laga kosnan bira dje malu ei.” Pero na reunion Aida a skucha un diskurso. El a konta: “E diskursante a bisa ku Yehova sa kada doló di nos kurason. Tikitiki ansianonan i otro ruman a yuda mi bira konvensí ku  Yehova ta stima mi. M’a kuminsá resa na Yehova ku mas konfiansa i ora m’a mira ku e tabata kontestá mi orashonnan, m’a sinti mi na pas.” Ku tempu, Aida a haña un trabou ku a paga sufisiente i a yud’é sigui traha pionero i pèrkurá pa su mayornan. El a bisa: “M’a siña konfia den Yehova kompletamente. Awor ora mi resa, mayoria di biaha mi miedu ta disparsé.”

LOKE YEHOVA LO BAI HASI

12. Segun Salmo 56:9, di kiko David tabata konvensí?

¹² Lesa Salmo 56:9. E versíkulo akí ta laga nos mira algu mas ku David a hasi ora e tabatin miedu. Aunke ainda su bida tabata na peliger, el a meditá riba loke Yehova lo bai hasi p’e. David tabata sa sigur ku Yehova lo salb’é. Al fin i al kabo, Yehova a bisa ku David lo bira e siguiente rei di Israel. (1 Sám. 16:1, 13) Pa David, loke sea Yehova primintí lo kumpli sigur.

13. Kiko nos tin sigur ku Yehova lo bai hasi pa nos?

¹³ Kiko Yehova a primintí di hasi pa bo? Ta bèrdat ku nos no ta ferwagt ku lo e protehá nos di tur nos problemanan. c Pero, loke si nos ta konvensí di dje ta ku den e mundu nobo lo e kita delaster un di nos pruebanan. (Isa. 25:7-9) Nos Kreador tin tur e poder den universo pa lanta morto, kura nos i destruí nos enemigunan.—1 Huan 4:4.

14. Riba kiko nos por meditá?

¹⁴ Ora bo sinti miedu, meditá riba loke Yehova lo bai hasi den futuro. Pensa riba kon lo bo sinti ora Satanas no t’ei, ora hende malbado ser destruí i ku tin solamente bon hende i ora ku imperfekshon disparsé tikitiki. Un demostrashon den nos kongreso regional di 2014 a mustra kon nos por meditá riba nos speransa. Un tata tabata papia ku su famia i a bisa nan ku lo e lesa 2 Timoteo 3:1-5 manera e situashon lo ta den Paradeis: “Den e mundu nobo lo bini tempunan agradabel, fásil pa trata kuné. Pasobra hende lo stima otro, stima kosnan spiritual; nan lo ta modesto, humilde, sirbidó di Dios, obediente na mayornan, gradisidu, leal, hende ku tierno kariño, ku ta dispuesto pa yega na akuerdo, ku ta semper kla pa papia bon di otro hende; nan lo tin dominio propio, karakter suave, amor pa loke ta bon; nan lo ta hende konfiabel, rasonabel, ku no ta orguyoso, ku ta stima Dios i no plaser, ku ta realmente deboto na Dios i ku ta demostrá esaki den nan bida; nunka apartá boso mes for di e hendenan akí.” Bo sa kòmbersá ku bo famia òf otro ruman tokante kon bida lo ta den mundu nobo?

15. Kiko a yuda Tanja pa no entregá?

¹⁵ Wak loke a pasa ku Tanja, un ruman na Nort Masedonia. Su mayornan tabata masha kontra p’e studia Beibel. Pero, Tanja a meditá riba loke Yehova lo hasi den futuro i esei a yud’é keda leal ora e tabatin miedu. El a konta: “Nèt loke mi tabatin miedu di dje a pasa. Despues ku mi bini kas for di tur reunion, mi mama tabata bati mi. Tantu e komo mi tata a menasá di mata mi si mi bira Testigu di Yehova.” Dado momento, nan a kore ku Tanja fo’i kas. Kiko el a hasi? El a bisa: “M’a keda pensa riba kon felis lo mi ta den futuro i ku esei lo dura pa semper si mi skohe pa keda leal na Yehova. Tambe  m’a pensa kon den e mundu nobo Yehova lo rekompensá mi pa tur e kosnan ku m’a pèrdè i tambe kon lo e yuda mi lubidá tur kos malu ku m’a pasa aden.” Tanja a keda leal na Yehova i ku Su yudansa el a haña un lugá di biba. Awe, Tanja ta kasá ku un ruman ku stima Yehova i huntu nan ta sirbi felismente den sirbishi di tempu kompleto.

HAÑA MAS KONFIANSA DEN YEHOVA AWOR

16. Kiko lo yuda nos tin kurashi ora nos mira e susesonan ku Lukas 21:26-28 a profetisá?

¹⁶ Durante tribulashon grandi, hende lo “desmayá di miedu i di ansha.” Pero nos komo sirbidó di Yehova nò; ku kurashi nos lo keda sirbi Yehova. (Lesa Lukas 21:26-28.) Dikon nos lo tin kurashi? Pasó ya nos a krea e kustumber di konfia den Yehova. Tanja, menshoná den e paragraf anterior, a bisa ku tur e kosnan difísil ku el a pasa aden ta yud’é trata ku otro situashon difísil. El a bisa: “M’a siña ku no tin niun situashon ku Yehova no por yuda nos soportá i saka algu bon for di dje. Tin biaha por parse ku ta hende tin kontrol riba kos, pero realidat ta ku e kontrol ku nan tin ta Yehova ta permití nan tiné. Anto pa kon duru ku un prueba por ta, lo e yega su fin.”

17. Kon nos teksto di aña pa 2024 lo yuda nos? (Wak e plachi riba portada.)

¹⁷ Awendia, miedu a bira parti di nos bida. Pero meskos ku David, nos no mester laga miedu dominá nos bida. Nos teksto di aña pa 2024 ta loke David a bisa Yehova den orashon: “Ora mi tin miedu, mi ta pone mi konfiansa den bo.” (Sal. 56:3) Wak loke un eksperto riba tereno di Beibel a bisa tokante e versíkulo akí: “David no ta keda pensa riba e kosnan ku ta dun’é miedu ni riba su problemanan. Mas bien e ta konfia den Esun ku lo salb’é.” Keda pensa riba nos teksto di aña durante e siguiente lunanan, foral ora bo ta pasando den situashonnan ku ta duna bo miedu. Tuma tempu i meditá riba loke Yehova a hasi den pasado, loke e ta hasi aworakí i loke lo e hasi den futuro. Anto e ora ei meskos ku David, bo por bisa: “Mi ta pone mi konfiansa den Dios; mi no tin miedu.”—Sal. 56:4.