1. Mukunda natshi matangua ako tuajiya guvua woma?

 MATANGUA ako muket’etu agasue tuana vua woma. Uvi luholo tuana jiya malongo a Biblia, tuanago guvuila athu a gufua woma nu bademo nga guvua woma mukunda nu malamba ajiya gutubuila mu masugu adi muza. Uvi sungi tudi mujinga idi yaguzala pha nu “ndaga jidi muhana woma,” gifua ita, ndaga jia khuta nga misongo. (Luka 21:11) Tuajiya nji guvuila athu ako woma, gifua mafumu a politike ana gutumonesa lamba nga enya fami yetu ana gutuna giamatshidia. Uvi athu ako ana gudisagesa egi, ajiyilego gukolesela mu malamba adi mutagana nawo mangino nga malamba ako ajiya guabuila mu masugu adi muza.

2. Kotelesa ndaga jiabuidile Davidi hakhalele muene gu Gate.

² Matangua ako, Davidi nji wakhalele muvua woma. Ha gufezegesa, tangua Fumu Saula wakhalele gumulandula ha gumushiya, Davidi walengele gu Gate dimbo dia enya Filistiya. Akishe fumu wa gu Gate, wavuile egi Davidi wakhalele suta dia ngolo, muene washiyile enya Filistiya ‘inunu makumi’. Hene Davidi “wavuile woma wavula.” (1 Sam. 21:10-12) Wavuile woma mukunda nu ndaga Akishe wakhalele naye gumutshita. Itshi yakuatesele Davidi ha gukhala nu gikhesa?

3. Ha gutadila Ngimbo 56:1-3, 11, itshi yakuatesele Davidi ha gutuna guvua luko woma?

³ Mu mukanda wa Ngimbo 56, Davidi udi muzuelela luholo luadivile muene tangua gakhalele gu Gate. Mu mukanda wene, Davidi wamonesele haphelo ndaga yamuhanele woma, uvi wamonesele nji gima giamukuatesele ha gubinga woma wene. Tangua diavile muene  woma, washile mutshima gudi Yehowa. (Tanga Ngimbo 56:1-3, 11.) Wakhalele nu ndaga jiakhalele gumutuma ha gushila Yehowa mutshima. Yehowa wamukuatesele ha gukalagala ndaga imoshi ya gushimana. Wabuile gifua muenya malui. Hene ha fundo dia gukamba ha gumushiya, Akishe watshiginyile egi Davidi akatuge mu dimbo dienji, ngenyi Davidi wahetele luholo lua gulenga.​—1 Sam. 21:13–22:1.

4. Luholo lutshi tuajiya gukolesa gutshigina guetu gudi Yehowa? Hana gifezegeselo.

⁴ Esue nji tuajiya gutuna guvua woma gula tudi mushila Yehowa mutshima. Uvi luholo lutshi tuajiya gukolesa gutshigina guetu gudi Yehowa gula tudi muvua woma? Tutadilenu gifezegeselo gimoshi. Gula munganga waguwambela egi udi nu misongo imoshi ngenyi, thomo wajiya guvua woma. Wajiya gukhala mu guhuima gula washila munganga muene mutshima. Yajiya gukhala egi munganga muene wasagele gale athu ako avula akhalele mukata misongo yene. Wajiya gugutegelela muabonga, wajiya nji gugutshiginyisa egi udi gugukotelesa muabonga. Wajiya nji guguwambela luholo lumoshi ngenyi luana saga muene athu lunu luakuatesele gale athu ako. Luholo lumoshi nji, tuana kolesa gutshigina guetu gudi Yehowa tangua tudi mutala ndaga jiakalegele gale muene, ndaga jidi muene mukalagala mangino nu jinyi mbajitukalegela muene mu masugu adi muza. Yene ndaga yakalegele Davidi. Tangua tudi mulonguga ndaga jiko jiasonegele muene mu mukanda wa Ngimbo 56 mu ukuateshi wa nyuma ya Nzambi, tangiza luholo wajiya gukolesa gutshigina guaye gudi Yehowa nu luholo wajiya gubemba guvua woma.

NDAGA JITSHI JIAKALEGELE GALE YEHOWA?

5. Ndaga jitshi Davidi wakhalele mutangigiza hakhalele muene muvua woma? (Ngimbo 56:12, 13)

⁵ Ikhale monyo wa Davidi wakhalele mu gingonza, uvi walanduile gutangigiza ndaga jiabonga Yehowa wakalegele gale. (Tanga Ngimbo 56:12, 13.) Davidi walanduile gutangiza ndaga jiene monyo wenji wagasue. Ha gufezegesa, matangua ako wakhalele mutangigiza ima yafugile Yehowa, ima yene yakhalele gumuwunguluisa egi Yehowa wana khala nu ngolo nu wana zumba athu muavula. (Ngi. 65:6-9) Davidi wakhalele mutangigiza ndaga Yehowa wakalegele mukunda nu athu ako. (Ngi. 31:19; 37:25, 26) Wakhalele nji mutangigiza muavula ndaga jinyi Yehowa wakalegele mukunda nu muene. Yehowa wakuatesele Davidi nu wamubambele sendese hakhalele muene mona wa zonda. (Ngi. 22:9, 10) Idi yadiago egi, gutangigiza  ndaga eji guakuatesele Davidi ha gushila Yehowa mutshima!

6. Itshi yajiya gutukuatesa ha gushila Yehowa mutshima gula tudi muvua woma?

⁶ Gula udi muvua woma, dihule egi: ‘Ndaga jitshi Yehowa wakalegele gale?’ Khala mutangigiza mu ima yafugile muene. Ha gufezegesa, Yehowa gafugilego tunjila nu iyaji mu gifuanesa gienji, ima yene yanago gukhala nu luendu lua gumukombelela uvi muene wana guyibamba nu wana guyidisa. Gutangigiza ndaga eji jiagasue muabonga mbagutukuatesa ha gumushila mutshima egi mbawutagenesa nzala jietu. (Mat. 6:25-32) Khala nji mutangigiza ndaga Yehowa wakalegele gale mukunda nu akombeledi enji. Wajiya gutanga mu Biblia mene jia akombeledi a Yehowa akhalele nu gutshigina guakola, nga ba eksperianse a akombeledi enji a mu masugu etu. a Khala nji mutangigiza luholo Yehowa wagukuatesele gale. Luholo lutshi wagukuatesele ha gujiya giamatshidia? (Yone 6:44) Luholo lutshi wana hana mvutu gu isambu yaye? (1 Yone 5:14) Gubonga gutshi wana heta lusugu nu lusugu mu mulambu wahanele Mun’enji munu wana zumba muene muavula?​—Ef. 1:7; Heb. 4:14-16.

7. Luholo lutshi lumene lua profete Danyele luakuatesele Vanessa ha gubemba guvua woma?

⁷ Phangi wa mukhetu Vanessa b wana khala gu Haïti, wataganele nu ndaga imoshi ya lamba. Yala mumoshi mu dimbo diawo, wakhalele gumutamega nu gumusonegela bamesaje lusugu nu lusugu, ha gumushinjiga hagula abungise n’enji muila. Vanessa wamuwambelele haphelo egi, gajiyilego gukalagala ndaga ya luholo elu. Uvi yala muene wabuile nu khuta yakola nu wakambele nji gumukalagala gubola. Phangi Vanessa udi muzuela egi: “Ngavuile woma wavula.” Uvi itshi yamukuatesele ha gubemba guvua woma? Watshitshile ndaga jiajiya gumukuatesa ha gudibamba. Mukulu mumoshi wamukuatesele ha gutamega mafumu. Uvi wakhalele nji mutangigiza luholo Yehowa wakuatesele akombeledi enji a mu tangua dikulu. Udi muzuela egi: “Muthu wa thomo watangijile muene, yakhalele profete Danyele. Gakalegelego nga ndaga imoshi yabola uvi amumbile mu wina dia khoshi. Uvi Yehowa wamubambele. Hene ngabembele milonga yami yagasue ha mago a Yehowa. Gungima ngakhalelego luko muvua woma.”​—Dan. 6:12-22.

NDAGA JITSHI JIDI MUKALAGALA YEHOWA MANGINO?

8. Mu ndaga jitshi Davidi wakhalele musha gutshigina? (Ngimbo 56:8)

⁸ Ikhale Davidi wakhalele mu gingonza mu dimbo dia Gate, gakhalelego mutangiza phamba mu ndaga jiakhalele gumuhana woma. Uvi wakhalele mutangigiza ndaga Yehowa wakhalele mukagala mukunda nu muene mu tangua diene. Davidi wakhalele mujiya egi Yehowa wakhalele gumutuameza, wakhalele gumubamba nu wakhalele nji gudisha ha fundo dienji. (Tanga Ngimbo 56:8.) Davidi wakhalele nji nu mafuta gifua, Yonatana nu Ahimeleke Nganga-nzambi Wakoma wamuhanele gikhesa nu wamukuatesele. (1 Sam. 20:41, 42; 21:6, 8, 9) Ikhale Fumu Saula wakambele ha gumushiya, uvi Davidi walengele ha gubamba monyo wenji. Wajiyile egi Yehowa wakhalele mujiya muabonga lamba dienji nu luholo luakhalele muene gudivua.

9. Ndaga itshi Yehowa wana jiya gudi muthu wagasue mukatshi dietu?

⁹ Gula udi mutagana nu ndaga imoshi idi guguhana woma, ujimbilago egi Yehowa wana jiya ndaga yene muabonga nu wana kotelesa nji luholo wana gudivua. Ha gufezegesa, Yehowa gakhalelego phamba mumona luholo enya gu Ejipitu akhalele mumonesa enya Isalele lamba uvi wakhalele nji ‘mujiya lamba diawo.’ (Guz. 3:7) Davidi wayimbile egi Yehowa wakhalele mumona ‘malamba enji’ nu wakhalele mukotelesa ‘luholo luakhalele muene gudivua.’ (Ngi. 31:7) Hene tangua akombeledi a Nzambi akhalele mutagana nu malamba, ikhale mukunda nu badesizio abola akhalele  muzula ‘yakhalele gumuhana gikenene.’ (Yesh. 63:9) Gula udi muvua woma, Yehowa wana kotelesa luholo udi gudivua nu wana khala hehi ha gugukuatesa ha gutuna guvua woma.

10. Mukunda natshi udi musha gutshigina egi Yehowa wana gudisagesa mukunda nu aye? Mukunda natshi udi musha gutshigina egi mbawugukuatesa ha gubinga lamba diagasue udi mutagana nadio?

¹⁰ Itshi wajiya gukalagala gula udi mutagana nu lamba nu udi mutangiza egi Yehowa gashigo gugukuatesa? Wajiya gumutoga a gukuatese ha gumona ukuateshi wenji. (2 Maf. 6:15-17) Gungima tadila mihu eyi: Gudi nu diskur nga komantere yahanele phangi mu hungu yakolesele gutshigina guaye ba? Gudi nu mukanda wetu umoshi nga video nga lungimbo luetu lumoshi lua guhanele gikhesa ba? Phangi mumoshi waguwambelele gale ndaga yabonga nga gugutangela verse yaguhanele gikhesa ba? Matangua ako tuajiya gubuita mutshima guzumba aphangi a mala nu a akhetu ana gutumonesela nu luholo ndaga tualongugile mu Mbimbi ya Nzambi jiatukuatesele. Uvi idi yadiago egi, ima eyi yagasue idi bakado a ndando ana gutuhana Yehowa. (Yesh. 65:13; Mako 10:29, 30) Yana monesa egi Yehowa wana gudisagesa mukunda nu aye. (Yesh. 49:14-16) Yana monesa nji egi Yehowa udi watagana ha gumushila mutshima.

11. Itshi yakuatesele phangi Aida ha gutuna gudisagesa muavula?

¹¹ Phangi Aida wana jinga gu Sénégal, wamonele luholo Yehowa wamukuatesele tangua diataganele muene nu lamba. Luholo ludi muene mona wa somi, mvuaji jienji jiakhalele gumushila mutshima egi muene wakhalele naye gukamba mbongo ha gudikuatesa nu ha guakuatesa nji ene. Uvi tangua dialebesele muene ndaga jia monyo wenji ha gubua muvundji wa njila, wakhalele nu mbongo phamba jiazonda. Gungima, enya fami yenji avuile khabu nu asendesele guzuela ndaga jiabola mukunda nu muene. Udi muzuela egi: “Mbangushigo muheta luholo lua gukuatesa mvuaji jiami, mukut’awo agasue nji mbaangutuna. Ngavuidile Yehowa khabu luholo gabembele egi ndaga jibole luko muavula mu monyo wami.” Gungima phangi Aida wategelele diskur dimoshi mu gudibungisa. “Mu diskur diene, muzuedi watuwunguluishile egi Yehowa wana jiya ndaga jiagasue jiana gutuhana gikenene nga woma. Mage-mage malongo anguhanele akulu nu aphangi ako, angukuatesele ha gutshigina egi Yehowa wana gunguzumba. Tangua ngakhalele mukalagala gisambu gudi Yehowa, ngasendesele diago gusha mutshima egi mbawungukuatesa. Luholo luakhalele muene muhana mvutu gu isambu  yami, ngahetele guhuima gua giamatshidia.” Gungima, Aida wahetele mudimo wamukuatesele ha gulandula gutshita mudimo wa muvundji wa njila nu gukuatesa mvuaji jienji nu athu ako. Udi muzuela egi: “Ndaga yene yangukuatesele diago ha gushila Yehowa mutshima. Henyaha gula ngatshita gisambu, nganago guvua luko woma.”

NDAGA ITSHI YEHOWA MBAWUKALAGALA MU MASUGU ADI MUZA?

12. Ha gutadila Ngimbo 56:9, mu ndaga jitshi Davidi wakhalele musha gutshigina?

¹² Tanga Ngimbo 56:9. Verse eyi idi mumonesa ndaga iko yakuatesele Davidi ha gutuna guvua woma: Ikhale monyo wenji wakhalele mu gingonza, uvi wakhalele mutangigiza ndaga jinyi Yehowa mbawumukalegela mu masugu adi muza. Davidi wakhalele mujiya egi, Yehowa mbawumuhuiluisa mu tangua diatagana. Handaga Yehowa wazuelele egi, Davidi wakhalele naye gubua fumu wa Isalele gungima. (1 Sam. 16:1, 13) Davidi wakhalele mujiya egi, ndaga jiagasue jiamulayele Yehowa jiakhalele naye gutagenesewa.

13. Ndaga jitshi Yehowa mbawutshita mu masugu adi muza?

¹³ Ndaga itshi Yehowa walayele ha gugukalegela? Tuanago gunengenena egi Yehowa atubambe mu malamba agasue tudi mutagana nawo. c Ikhale tudi mutagana nu malamba a luholo lutshi ha mavu awa, uvi tujimbilago egi Yehowa mbawumanesela malamba ene mu mavu ahe-ahe. (Yesh. 25:7-9) Mufugi wetu udi diago nu ngolo jia gufuzumuna athu a gufua, gutusaga gu misongo yetu nu gukatula ndaga jiana gutuhana gikenene nu enya khuta agasue.​—1 Yone 4:4.

14. Mu ndaga jitshi tuajiya gutangigiza?

¹⁴ Gula udi muvua woma, khala mutangigiza ndaga mbajitshita Yehowa mu masugu adi muza. Tangiza luholo mbawudivua tangua Satana nu athu abola mbaakhadigo luko, tangua mavu mbaazala nu athu abonga nu luholo mbatusendesa gubua athu atagana mage-mage. Asamble a masugu thathu a mu 2014, amonesele luholo tuajiya gutangigiza mu felela dietu. Tata mumoshi wakhalele muzuela nu enya fami yenji, luholo mukanda wa 2 Timote 3:1-5 wakhalele naye gubalumuiwa, gula nga verse jiene jiakhalele muzuelela ndaga mbajikalegewa mu Phaladiso. Wazuelele egi: “Mu mavu ahe-ahe matangua a gusuanguluga mbaakhala guene. Handaga athu mbaakhala muzumba athu ako, mbaazumba ndaga jia mu nyuma, mbaakhala athu agudibulumuisa, mbaakhala akombeledi a Nzambi, mbaakhala mutumagela mvuaji jiawo, mbaakhala muhana mersi, mbaakhala agujinginyina gudi athu ako, mbaakhala muzumba enya fami jiawo muavula, mbaakhala nu gudivua guabonga nu athu ako, tangua diagasue mbaakhala muzuela ndaga jiabonga mukunda nu athu ako, mbaakhala nu khadilo dia gudikanda, mbaakhala athu atuluga, mbaakhala muzumba ndaga jiabonga, mbaakhala athu a gushila mutshima, mbaakhala muvua malongo, mbaakhala athu a gudibulumuisa, mbaakhala muzumba Nzambi uvi ima yana guasuanguluisa ndo, makalegelo awo mbaamonesa diago egi ana kombelela Nzambi, khala yagujinginyina gudi athu a luholo elu.” Wana zuela nu enya fami yaye nga nu aphangi a Aklisto luholo lujingu mbalukhala mu mavu ahe-ahe ba?

15. Itshi yakuatesele phangi Tanja ha gutuna guvua woma?

¹⁵ Gutangigiza gubonga mbatuheta mu masugu adi muza, guakuatesele phangi wa mukhetu Tanja wana jinga gu Nord ya Macédoine ha gutuna guvua woma. Tangua diasendesele muene gulonguga Biblia, mvuaji jienji jiatunyile. Udi muzuela egi: “Ndaga jiko ngakhalele muvuila woma egi mbajingubuila, jiangubuidile. Lusugu luagasue ngakhalele muya mu gudibungisa gua mu hungu, gula ngavutuga mama wakhalele gungubeta. Mvuaji jiami jiakhalele gunguwambela egi gula ngabua Temue wa Yehowa mbaangushiya.” Gugisungishilo, mvuaji jienji jiamukayele gu inzo. Itshi Phangi Tanja watshitshile? Udi muzuela egi: “Ngakhalele mutangigiza gusuanguluga mbangukhala nago ivo nu ivo, luholo ngatomba ha gusala yagujinginyina gudi Yehowa. Ngakhalele nji mutangigiza luholo Yehowa mbawungushimbiga mu mavu ahe-ahe mukunda nu ima yagasue ngajiya gutotesa ha mavu awa nu luholo mbangubuita  mutshima gu ndaga jiagasue jiabola.” Phangi Tanja wasalele yagujinginyina gudi Yehowa. Yehowa wamukuatesele nji ha guheta fundo diagukhala. Mangino, Tanja wazudiwe gale mu ulo gudi phangi mumoshi wa gujinginyina gudi Yehowa, ana gumukalegela mudimo hamoshi nu gusuanguluga mu mudimo wa tangua diagasue.

KOLESA GUTSHIGINA GUAYE GUDI YEHOWA SENDESE MANGINO

16. Itshi mbayitukuatesa ha gukhala nu gikhesa gula tuamona gutagenesewa gua profesi idi mu Luka 21:26-28?

¹⁶ Mu tangua dia lamba diakola, athu avula “mbaalehuga mukunda nu woma.” Uvi akombeledi a Nzambi mbaashigo muvua woma nu mbaakhala nu gikhesa. (Tanga Luka 21:26-28.) Itshi mbayitukuatesa ha gutuna guvua woma? Mbatushigo muvua woma handaga mbatukhala tuana shila gale Yehowa mutshima. Phangi Tanja tuazuelela gu thunda, udi muzuela egi ndaga gatanele najio jiana gumukuatesa ha gubinga malamba ako ana tagana nawo muene. Udi muzuela egi: “Ndaga jiangubuidile jiangukuatesele ha gujiya egi Yehowa wajiya gutukuatesa ha gukolesela mu lamba diagasue diajiya gutubuila nu gutushimbiga. Matangua ako yajiya gumonega gifua athu ako adi nu ngolo jia gukalagala ndaga jiagasue atshigina, uvi mu guzuela guabonga Yehowa udi nu ngolo jiavula guabalega. Luko, ikhale malamba etu adivudisa luholo lutshi, mbaamuhua.”

17. Luholo lutshi mukhapho wetu wa givo 2024 wajiya gutukuatesa? (Tala gifuanesa holu dia gizula.)

¹⁷ Mangino gudi nu ndaga jiavula jiajiya gututuma ha guvua woma. Gifua Davidi, tuajiyilego guleba muila mukunda nu woma. Mu mukhapho wetu wa givo 2024, Davidi wakombelele Yehowa egi: ‘Gula ngavua woma, ngana gugushila mutshima.’ (Ngi. 56:3) Muenya ndunge mumoshi udi muzuela mukunda nu verse eyi egi: “Davidi galanduilego gutangiza ndaga jiakhalele gumuhana woma nga malamba enji, uvi washile mutshima gudi muthu wakhalele naye gumuhuluisa.” Mu mbeji jidi muza khala mutangigiza mukhapho wetu wa givo, uvi gula watagana nu malamba, landula nji gutangigiza mukhapho wene muavula gubalega. Khala muzula tangua dia gutangigiza ndaga Yehowa wakalegele mu masugu abalega nu jidi mukalagala muene mangino nu jinyi mbagakalagala mu masugu adi muza. Ngenyi wajiya guzuela gifua Davidi egi: ‘Ngana gushila Nzambi mutshima; nganago guvua woma.’​—Ngi. 56:4.