1. Why nao maet iumi fraet samfala taem?

 IUMI evriwan savve fraet samfala taem. Bat from iumi savve lo wat Bible teachim, iumi no fraetem olketa wea dae finis, olketa demon, or wat bae happen lo future. Nomata olsem, iumi stap lo taem wea Bible sei bae iumi lukim ‘olketa samting wea mekem iumi barava fraet’ olsem war, crime, and olketa barava nogud sik. (Luke 21:11) And tu, maet iumi fraetem pipol olsem olketa gavman or olketa famili member wea againstim tru worship. Samfala wari if olketa bae fit for deal witim challenge wea olketa feisim distaem or lo future.

2. Storyim situation blo David taem hem lo Gath.

² Samfala taem David barava fraet. For example, taem King Saul lukaotem David for killim hem dae, David disaed for ranawe lo Gath, wanfala city blo Philistine. Then nomoa King Achish blo Gath faendaot hao David nao datfala maeti warrior wea olketa sing abaotem hem killim dae “ten thousand” blo olketa Philistine. Datwan mekem David ‘fraet tumas.’ (1 Sam. 21:​10-12) Hem warim wat nao bae King Achish duim lo hem. Wat nao helpem David for no fraet?

3. Olsem Psalm 56:​1-3, 11 storyim, wat nao helpem David for no fraet?

³ Lo Psalm 56, David storyim feeling blo hem taem hem lo Gath. Lo datfala Psalm, David explainim klia why hem fraet, and wat helpem hem for no fraet. Taem David fraet, hem trustim Jehovah. (Readim Psalm 56:​1-3, 11.) David garem gud reason for trustim Jehovah. Witim help blo Jehovah,  David plan for duim samting wea barava strange. Hem pretend for mentol and plan hia hem waka! Achish no laek for killim dae David, bat laekem hem for mas lusim datfala ples. So David escape nao.—1 Sam. 21:13–22:1.

4. Hao nao iumi savve strongim trust blo iumi lo Jehovah? Storyim example.

⁴ Taem iumi fraet, iumi tu savve duim wise samting if iumi trustim Jehovah. Bat hao nao iumi savve strongim trust blo iumi lo Jehovah, especially taem iumi barava fraet? Tingim example hia. If iu faendaot iu garem wanfala sik, maet lo firstaem iu fraet tumas. Bat, iu bae no fraet tumas if iu trustim doctor blo iu. Doctor hia maet helpem finis staka patient wea garem semkaen sik. Hem lisin gud taem iu explainim wat iu fraetem, and iu luksavve hem kea for iu. And maet hem talem wanfala treatment wea helpem olketa narawan finis. Lo sem wei tu, iumi savve strongim trust blo iumi lo Jehovah taem iumi ting abaotem olketa samting wea Jehovah duim finis, wat hem duim distaem, and wat bae hem duim for iumi lo future. Hem nao samting wea David duim. So taem iumi discussim samfala toktok blo David lo Psalm 56, ting abaotem hao iu tu savve strongim trust blo iu lo Jehovah and no panic taem iu fraet.

WAT JEHOVAH DUIM FINIS

5. Taem David fraet, wat nao hem meditate abaotem? (Psalm 56:​12, 13)

⁵ Nomata laef blo David stap lo danger, hem focus lo olketa gud samting wea Jehovah duim finis. (Readim Psalm 56:​12, 13.) David duim datwan lo full laef blo hem. For example, samfala taem hem meditate abaotem creation blo Jehovah, and datwan remindim hem abaotem bigfala paoa blo Jehovah and hao hem lovem iumi olketa man. (Ps. 65:​6-9) Hem ting abaotem tu wat Jehovah bin duim for olketa narawan. (Ps. 31:19; 37:​25, 26) And wat David barava ting abaotem nao hem wat Jehovah bin duim for hemseleva. Jehovah sapotim and protectim David from taem hem baby yet. (Ps. 22:​9, 10) For sure, taem David meditate abaotem olketa samting hia, datwan strongim trust blo hem lo Jehovah!

6. Taem iumi fraet, wat nao bae helpem iumi for trustim Jehovah?

 ⁶ Taem iu fraet, tingim diswan, ‘Wat nao olketa samting wea Jehovah duim finis?’ Ting abaotem creation blo hem. For example, “lukluk gud” lo hao Jehovah kea for olketa bird and flaoa nomata hem no creatim olketa for garem wei blo hem and no savve worshipim hem. So hao mas moa iumi, Jehovah bae barava kea for iumi. Taem iumi meditate abaotem datwan, hem bae barava strongim trust blo iumi lo Jehovah. (Matt. 6:​25-32) Tingim tu wat Jehovah duim finis for olketa wea worshipim hem. Maet iu studyim example blo samwan lo Bible wea garem strong faith, or maet iu readim experience blo samwan wea worshipim Jehovah distaem. a And tu, ting abaotem hao Jehovah bin kea for iu. Hao nao hem leadim iu for kam lo truth? (John 6:44) Hao nao hem ansarem olketa prea blo iu? (1 John 5:14) Hao nao iu kasem gud samting from ransom sakrifaes blo Son blo hem evriday?—Eph. 1:7; Heb. 4:​14-16.

7. Hao nao experience blo profet Daniel helpem Vanessa for no fraet?

⁷ Vanessa, b wanfala sista lo Haiti, feisim wanfala situation wea mekem hem fraet. Wanfala man lo community savve ringim and textim hem evriday, and putim pressure lo hem for tufala fren and for durong. Vanessa talem stret hao hem no interest. Bat datfala man barava kros and even threatenim hem tu. Vanessa sei: “Mi fraet tumas.” Wat nao Vanessa duim? Hem duim wat hem fit for duim for protectim hemseleva. Wanfala elder helpem hem for contactim police. Bat hem ting abaotem tu hao Jehovah protectim olketa servant blo hem lo bifor. Vanessa sei: “First person wea mi tingim nao hem profet Daniel. Nomata Daniel innocent, olketa torowem hem insaed hol blo olketa lion wea hangere. Bat, Jehovah satem mouth blo olketa lion. So mi askem Jehovah for mekem datfala man no tingim mi and for Jehovah solvem problem blo mi bikos mi no fit for duim eni samting moa. Bihaen datwan, mi no fraet nao.”—Dan. 6:​12-22.

TING ABAOTEM WAT JEHOVAH DUIM DISTAEM

8. Wat nao David sure lo hem? (Psalm 56:8)

⁸ Nomata hem barava danger for David taem hem lo Gath, hem no panic. Bat hem chus for ting abaotem wat Jehovah duim for hem lo datfala taem. David luksavve Jehovah gaedem and protectim hem and minim feeling blo hem. (Readim Psalm 56:8.) Jehovah givim David tu olketa fren olsem Jonathan and Hae Priest Ahimelech, wea loyal for sapotim hem and helpem hem. (1 Sam. 20:​41, 42; 21:​6, 8, 9) And nomata King Saul laek for killim hem, David hem escape. David sure Jehovah savve gud lo hard taem blo hem and hao hem feel.

9. Wat nao Jehovah lukim lo each wan lo iumi?

⁹ Taem iu feisim wanfala hard taem wea mekem iu fraet, tingim Jehovah lukim hard taem wea iu kasem and hao iu feel. For example, Jehovah savve lo nogud treatment wea olketa Israelite kasem lo Egypt and hem “minim pain wea kasem olketa” tu. (Ex. 3:7) David sei Jehovah lukim “olketa hard taem wea mi feisim” and savve abaotem wei wea mi “barava safa.” (Ps. 31:7) And nomata taem pipol blo God safa from olketa nogud disison  wea olketa mekem, “hem tu feel sorre lo datwan.” (Isa. 63:9) Taem iu fraet, Jehovah minim hao iu feel and hem barava laek for helpem iu mekem iu no fraet.

10. Why nao iu sure Jehovah kea for iu and bae helpem iu for deal witim eni hard taem?

¹⁰ If iu feisim wanfala hard taem wea mekem iu barava fraet, maet iu no lukim hao Jehovah helpem iu. Wat nao iu savve duim? Askem hem for helpem iu for lukim hao hem duim datwan. (2 Ki. 6:​15-17) Then tingim diswan: Hao, wanfala tok or koment lo kongregeson meeting hem strongim iu? Hao, eni pablikeson, video, or original song hem encouragem iu? Hao, eniwan talem toktok or showim scripture wea encouragem iu? Maet hem isi for iumi forgetim love wea olketa brata and sista showim lo iumi and encouragement wea iumi kasem from Bible wea helpem iumi. Bat olketa samting hia hem spesol present from Jehovah. (Isa. 65:13; Mark 10:​29, 30) Hem pruvim hao Jehovah kea for iu. (Isa. 49:​14-16) And olketa samting hia showim hem tinghae lo wei wea iu trustim hem.

11. Wat nao helpem Aida for no fraet?

¹¹ Aida, wea stap lo Senegal, luksavve hao Jehovah helpem hem taem hem kasem hard taem. From hem nao firstborn, parents blo hem expectim hem for waka for earnim inaf selen for helpem hemseleva and famili. Bat afta Aida mekem laef blo hem simpol for hem pioneer, hem garem lelebet selen nomoa. From datwan, famili blo hem kros and tok spoelem hem. Aida sei: “Mi barava fraet nogud mi no fit for helpem parents blo mi and olketa bae rejectim mi. Mi even blamem Jehovah for letem situation blo mi for kamap worse.” Then hem herem wanfala tok lo meeting. “Lo datfala tok, speaker storyim hao Jehovah savve lo samting wea mekem each wan lo iumi for wari or fraet. From advaes wea olketa elder and olketa narawan givim, hem mekem mi sure moa lo love blo Jehovah. Taem mi prea lo Jehovah, mi start for feel confident dat hem bae helpem mi, and mi garem peace taem mi lukim olketa prea blo mi kasem ansa.” Gogo, Aida faendem waka wea mekem hem for garem inaf  selen for gohed pioneer and tu for helpem parents blo hem. Hem sei: “Mi lane for barava trustim Jehovah. Distaem, staka taem bihaen mi prea, mi no savve fraet nao.”

WAT JEHOVAH BAE DUIM LO FUTURE

12. Olsem Psalm 56:9 talem, wat nao David sure lo hem?

¹² Readim Psalm 56:9. Disfala verse storyim nara samting wea helpem David for no fraet. Nomata laef blo hem stap lo danger, hem meditate abaotem wat Jehovah bae duim for hem lo future. David savve Jehovah bae rescuem hem lo raet taem. And Jehovah talem finis tu hao David nao bae next king blo Israel. (1 Sam. 16:​1, 13) David barava sure, nomata wat nao Jehovah promisim bae hem happen.

13. Wat nao iumi sure dat Jehovah bae duim?

¹³ Wat nao Jehovah promis for duim for iu? Iumi no expectim Jehovah for protectim iumi from evri problem wea iumi kasem. c Bat tingim, eni hard taem wea iu maet feisim distaem, Jehovah bae finisim lo niu world. (Isa. 25:​7-9) Creator blo iumi hem garem bigfala paoa for mekem olketa wea dae for laef bak, for healim olketa sik, and for finisim feeling for sorre.—1 John 4:4.

14. Wat nao iumi savve meditate abaotem?

¹⁴ Taem iu fraet, meditate abaotem wat Jehovah bae duim lo future. Ting abaotem hao bae iu feel taem God finisim Satan, taem wicked pipol bae distroe and only raeteous pipol bae stap, and each day bae iumi isisi kamap perfect. Lo wanfala demonstration lo 2014 regional convention program, hem showim hao iumi savve meditate abaotem hope blo iumi. Wanfala dadi discussim 2 Timothy 3:​1-5 witim famili blo hem. Hem sei bae hem readim lo difren wei olsem wanfala profesi abaotem laef lo Paradaes, hem read olsem: “Long datfala niu world evriwan bae hapi tumas. Pipol bae lovem olketa narawan, laekem tumas olketa spiritual samting, no ova tumas, hambol, praisem God, obeyim dadi and mami. Olketa bae tinghae, faithful, barava lovem famili, willing for agree. Olketa bae evritaem talem gud samting abaotem narawan, kontrolem seleva, no raf, laekem gud samting. Narawan bae fit for trustim olketa, olketa bae hambol and no praod. Olketa bae lovem God and no interest nomoa for enjoyim seleva. Olketa bae barava worshipim God, and iu mas fren gud witim olketa.” Waswe, iu discussim witim famili blo iu or olketa brata and sista abaotem hao nao laef lo niu world?

15. Nomata Tanja hem fraet, wat nao helpem hem for gohed faithful?

¹⁵ Tingim experience blo Sista Tanja wea stap lo North Macedonia. Parents blo hem barava againstim hem taem hem start for studyim Bible. Bat wei for meditate abaotem wat Jehovah bae duim lo future helpem hem for faithful taem hem fraet. Hem sei: “Samfala samting wea mi fraetem dat bae hem happen, hem happen. Afta evri meeting, mami blo mi savve whipim mi. Tufala threatenim for killim mi dae if mi kamap wanfala Jehovah’s Witness.” Gogo, parents blo Tanja raosem hem from haos. Wat nao hem duim? Hem sei: “Mi focus lo hapi wea mi bae kasem for olowe bikos mi chus for faithful lo Jehovah. Mi ting abaotem tu hao Jehovah bae rewardim mi lo niu world for eniting wea mi maet lusim distaem and hao evri nogud samting bae mi no tingim moa.” Tanja hem gohed for faithful. And witim help blo Jehovah, hem faendem ples for stap. Distaem, Tanja hem  maritim wanfala faithful brata and tufala hapi for duim full-taem ministry.

STRONGIM TRUST BLO IU LO JEHOVAH DISTAEM

16. Taem iumi lukim profesi lo Luke 21:​26-28 kamap tru, wat nao bae helpem iumi for no fraet?

¹⁶ During lo great tribulation, pipol bae barava “fraet fogud.” Bat pipol blo God bae gohed strong and no fraet. (Readim Luke 21:​26-28.) Why nao olsem? Bikos iumi bin lane for trustim Jehovah. Tanja wea iumi storyim, hem sei samting wea hem experiencem helpem hem for deal witim olketa nara hard situation. Hem sei: “Mi luksavve hao Jehovah savve helpem iumi for winim eni situation and blessim iumi. Samfala taem, hem luk olsem olketa narawan nao kontrolem olketa tings, bat really, Jehovah garem paoa winim olketa. And nomata wanfala test hem hard for deal witim, bae hem finis.”

17. Hao nao bae yeartext for 2024 helpem iumi? (Lukim piksa lo front page.)

¹⁷ Distaem staka samting savve mekem iumi for fraet. Bat olsem David, iumi no letem wei for fraet for kontrolem iumi. Yeartext blo iumi for 2024 hem prea blo David lo Jehovah, hem sei: “Lo taem wea mi fraet, mi trustim iu.” (Ps. 56:3) Wanfala Bible scholar sei olsem abaotem disfala verse: “David hem no gohed for tingim olketa samting wea mekem hem for fraet, or abaotem olketa problem blo hem. Bat hem depend lo Wan wea bae rescuem hem.” Lo olketa month wea bae kam, ting abaotem yeartext blo iumi, especially taem iu feisim eni situation wea mekem iu for fraet. Ting abaotem wat Jehovah duim lo bifor, distaem, and lo future. Then iu savve talem sem samting olsem David: “Lo God nao mi putim trust blo mi lo hem, and mi no fraet.”—Ps. 56:4.