1. ¿Tyiʼiga a veces takɨɨn̈taʼmpa?

 TANTUMPƗYTYAM oyba tanjaamtaʼm kɨɨn̈i. Pero jeʼm Biblia tan̈kejayñetaʼm iga odoy tan̈kɨɨn̈taʼmiñ jeʼm kaʼaneyajwɨʼɨp, jeʼm demonios y jempɨk naspa tannɨgɨyoʼoyijom. Yɨʼp jaama naspa tyidyin̈kej iga tatsɨgan̈jeʼkpa, juʼuts jeʼm guerras, jeʼm malwadoʼoyi y jeʼm mɨmneiyaj (Luc. 21:11). A veces tan̈kɨɨn̈ba jeʼm an̈jagoʼoyiyaj, jeʼm tanfamiliaryaj o tun̈gakyaj iga ijooyixyajpa jeʼm Testigojyaj. Ity jempɨk kɨɨn̈yajpa iga dyaʼ wɨap iyaʼachɨyyaj jeʼm kutɨʼɨchiyaj iñaskayajpaʼap sɨɨ y jeʼm iñɨgɨyoʼoyijom.

2. ¿Tyi nas jesɨgam David nuʼk jeʼm tɨgan̈juj Gat?

² Tuum Dios iyooxakɨʼɨwiñ iga iñɨɨyi David a veces kɨɨn̈tyim. Jesɨk jeʼm an̈jagoʼoyi Saúl ikkaʼatoʼoba idyɨk, David kɨɨn̈ y nɨk yaamiʼ jeʼm tɨgan̈juj filistea iñɨɨyipɨk Gat. Y jesɨgam jeʼm an̈jagoʼoyi Akís ijoodon̈a iga jeʼ tuum guerrero y ikkaʼaneʼ idyɨk jaʼyan̈ filisteos, David pɨɨmi kɨɨn̈ (1 Sam. 21:​10-12). An̈yaʼkpa idyɨk jesɨk ijɨɨspa tyi wɨap iniwat jeʼm an̈jagoʼoyi. ¿Tyi iyooxpaʼt iga odoy kɨʼɨn̈iñ?

3. Juʼuts nɨmpa Salmo 56:​1-3, 11, ¿tyi iyooxpaʼt David iga odoy kɨʼɨn̈iñ?

³ En jeʼm Salmo 56, David in̈mat juʼuts in̈jaam idyɨk jesɨgam  jaʼy ityi en Gat. En yɨʼp salmo iwɨan̈mat tyiʼiga kɨɨn̈neʼ idyɨk y tyi iyooxpaʼt iga odom kɨʼɨn̈iñ: jeʼm confianza iniidyaywɨʼɨp Jehová (maayɨʼ Salmo 56:​1-3, 11). a Y tsaam wɨɨ iga iwat jeempɨk. David ipɨk ijɨɨxi iga lukuj an̈tayaap y kun jeʼm Jehová iyooxpadoʼoyi iwɨpuday. Akís iaʼm juʼuts tuum lukuj y dyaʼ tyi iniwat. Jeʼyukmɨ David wɨa mu ipoy (1 Sam. 21:​13–22:1).

4. ¿Juutypɨk wɨap tanaidyay maaj confianza Jehová? An̈maatɨ tuum akwiñkejoʼoyi.

⁴ Jeʼm confianza tanaidyaywɨʼɨp Jehová wɨaptyim tayooxpaʼttaʼm taɨchtyam iga odoy takɨʼɨn̈iñ. ¿Tyi tayooxpaʼtpa iga majnam tanaidyaʼyiñ confianza Jehová jesɨk takɨɨn̈neʼ? Tanakkaʼmiñ tuum akwiñkejoʼoyi. Siiga tanɨʼmaytyaap iga tanaity tuum kaʼakuy wɨapsɨ iga wiñtyityim takɨɨn̈ba. Pero siiga tanjoodon̈ iga jeʼm doctor iwɨwatpa iyooxakuy, wɨapsɨ iga dyam jespɨy takɨɨn̈ba. Wɨapsɨ iga ichoʼyɨyñeum jempɨk oyñetyim iniityyaj yɨʼp kaʼakuy. Y wɨapsɨ iga sɨʼ iwɨkumaton̈ jempɨk sɨʼ tannɨʼmay y ikutɨʼɨyɨʼyba juʼuts tanan̈jaam. Y tanɨʼmaʼyba iga tachiʼiba tuum tratamiento iga iyooxpaʼtneʼ tun̈gakyaj. Jeempɨktyim naspa kun Jehová, majtyim tanaidyaʼyba confianza siiga tan̈kujɨɨspa ityumpɨy jempɨk iwatneum, jempɨk sɨʼ iwat y jempɨk iwatpanam por taɨchtyam. Jeʼam iwat David en jeʼm Salmo 56. Iganam tan̈kɨʼpin̈ba weeñi versículos, tan̈kujɨɨxiñ juutypɨk tayooxpaʼtpa iga tanaidyaʼyiñ maaj confianza Jehová y odoy takɨʼɨn̈iñ.

¿TYI IWATNEʼ JEHOVÁ WIÑƗK JAAMA?

5. ¿Tyi iyooxpaʼt David iga odom maaj kɨʼɨn̈iñ? (Salmo 56:​12, 13).

⁵ Mex iga David wɨap idyɨk imalnaskaʼ, jeʼ ityegueda jempɨk Jehová iwatneum idyɨk (maayɨʼ Salmo 56:​12, 13). b David juchixkej  iwat jeempɨk. Juʼuts akwiñkejoʼoyi ikujɨɨspa idyɨk ityumpɨy jempɨk Jehová iwatneʼ, yɨʼp ikjɨɨs iga tsaam pɨɨmiɨy y tsaam tatoytyaʼmpa (Sal. 65:​6-9). Ikujɨɨspatyim idyɨk tyi iwatneʼ por tun̈gakyaj (Sal. 31:19; 37:​25, 26). Ikujɨɨstyim tyi iwatneʼ idyɨk por jeʼ. Iyooxpaʼt y ikuix dende ipoñchɨɨxijom (Sal. 22:​9, 10). Ityumpɨy yɨʼp iyooxpaʼt iga majnam iniidyaʼyiñ confianza.

6. ¿Tyi tayooxpaʼtpa iga tanaidyaʼyiñ confianza Jehová jesɨk takɨɨn̈neʼ?

⁶ Jesɨk mikɨɨn̈ba, nakwaʼktaajɨ: «¿Tyi iwatneʼ Jehová wiñɨk jaama?». Kujɨɨsɨ ityumpɨy jempɨk jeʼ iwat. Juʼuts akwiñkejoʼoyi, jesɨk tanaʼmpa juutypɨk Jehová ikuixpa jeʼm jonyaj y jeʼm mooyayaj —mex iga dyaʼ wɨap ikoosteñayyaj—, majtyim tan̈kupɨkpa iga jeʼ juchixkej takuixpa (Mat. 6:​25-32). Kujɨɨsɨ tyi iwatneʼ por jeʼm iyooxakɨʼɨwiñyaj. Wɨap tan̈kuyujkaʼ tuum Dios iyooxakɨʼɨwiñ iakwiñkejoʼoyi wiñɨk jaamapɨk o yɨʼp jaamapɨk. c Kujɨɨsɨtyim juutypɨk Jehová mikuixñeʼ. ¿Juutypɨk miyooxpaʼt iga iñixpɨgaʼyiñ jeʼm In̈maatyi? (Juan 6:44). ¿Juutypɨk ikutson̈neʼ jeʼm inin̈wejpadoʼoyiyaj? (1 Juan 5:14). ¿Juutypɨk miwɨwadaʼyba tumtum jaama iga ikɨan̈kot iMaanɨk? (Efes. 1:7; Heb. 4:​14-16).

7. ¿Juutypɨk iyooxpaʼt Vanessa jeʼm profeta Daniel iakwiñkejoʼoyi?

⁷ Vanessa d tuum yoomtɨwɨ itywɨʼɨp Haití, kɨɨn̈neʼ idyɨk iga tuum pɨɨxiñ ijɨyñɨgaʼyba y juchixkej ikutsadaʼyba idyɨk mensaje iga inoviajatoʼoba. Jeʼ iñɨʼmay iga dyaʼ, pero jeʼ majtyim maloja y iotyɨʼmay. ¿Tyi iyooxpaʼt Vanessa iga odom kɨʼɨn̈iñ? Iwat tyityam nasunta iga wɨaiñ inikuixtya y tuum anciano iyooxpaʼt iga wɨaiñ ijɨyñɨgay jeʼm an̈jagoʼoyiyaj. Ikujɨɨstyim juutypɨk Jehová iyooxpaʼtneʼ jeʼm iyooxakɨʼɨwiñyaj wiñɨk jaama. Jeʼ nɨmpa: «Anjɨɨs jempɨk iñaskaʼ jeʼm profeta Daniel. Mex iga dyaʼ imalwatneʼ idyɨk, kukomta tuum josom juuty ityyaj jeʼm tenatyaj, pero Jehová ikupuj. Annɨʼmay Jehová iga an̈watneum juʼtspɨyam awɨap iga anakuixtyaap y an̈waʼgay iga ayooxpaʼdyiñ. Okmɨ dyam akɨɨn̈» (Dan. 6:​12-22).

¿TYI SƗʼ IWAT JEHOVÁ SƗƗ?

8. ¿Tyi iwɨkupɨkneʼ idyɨk David? (Salmo 56:8).

⁸ Mex iga David wɨap idyɨk imalnaskaʼ jesɨgam jaʼy ityi Gat, iwɨjɨɨs tyi iwatpa. Ijɨɨskupak juutypɨk Jehová sɨʼ idyɨk iyooxpaʼt. Iaʼmneʼ idyɨk juutypɨk jeʼ sɨʼ ikuix, sɨʼ ijɨɨxian̈chiʼ y ikutɨʼɨyɨʼyba idyɨk juʼuts in̈jaam (maayɨʼ Salmo 56:8). e Iyooxpaʼtyajtyim y ianmajan̈chiʼiyaj jeʼm iamigo Jonatán y jeʼm kobakpɨk panij Ahimélec (1 Sam. 20:​41, 42; 21:​6, 8, 9). Mex iga jeʼm an̈jagoʼoyi Saúl ikkaʼatoʼoba idyɨk, David wɨa mu inikɨakputta. Iwɨkupɨkneʼ idyɨk iga Jehová ijoodon̈ jempɨk sɨʼ iñaskaʼ y juʼuts in̈jaam.

9. ¿Tyi ijoodon̈ Jehová jesɨk tayaʼachaap tansɨʼ?

⁹ Siiga mich sɨʼ iññaskaʼ tuum yaʼachaaji y mikɨɨn̈neʼ, kujɨɨsɨ iga Jehová dyaʼ numaaj iixñeʼ jempɨk sɨʼ iññaskaʼ, ijoodon̈tyim juʼuts inin̈jaam. Juʼuts akwiñkejoʼoyi, jesɨgam ityyaj idyɨk juʼuts esclavos en Egipto, Jehová ijoodon̈ idyɨk juʼtspɨy yaʼachaap ixɨʼyaj jeʼm iyooxakɨʼɨwiñyaj (Éx. 3:7). En tuum waañi, David nɨm iga Jehová iaʼmneʼ idyɨk juʼtspɨy yaʼachaap ixɨʼ (Sal. 31:7). Y jesɨgam jeʼm Dios ikumun yaʼachaap idyɨk ixɨʼyaj iga dyaʼ kupɨgoyyaj, Jehová an̈yaʼkpa idyɨk (Is. 63:9).  Tsaam taanmajan̈chiʼiba iga Jehová takutɨʼɨyɨʼyba y tayooxpaʼttoʼoba iga odom takɨʼɨn̈iñ.

10. ¿Tyiʼiga in̈kupɨkpa iga Jehová mityeguet y juchixkej miyooxpaʼtpa?

¹⁰ Siiga sɨʼ tannaskaʼ tuum yaʼachaaji y takɨɨn̈neʼ, wɨapsɨ iga tan̈kaʼ tanaʼm juutypɨk Jehová sɨʼ tayooxpaʼt. ¿Tyi wɨap tan̈wat? Tan̈waʼgaʼyiñ iga tayooxpaʼdyiñ tanaʼm tyi sɨʼ iwat por taɨch (2 Rey. 6:​15-17). Okmɨ tanjɨɨxiñ: ¿Tapɨɨmchiñeʼ tuum najɨʼyoʼoyi o tuum kutson̈oʼoyi iga tan̈kumaton̈neʼ jeʼm an̈tuʼumaajijom? ¿Taanmajan̈chiñeʼ tuum totjaayi, tuum video o tuum waañi? ¿Wɨapsɨ iga tuum tɨɨwɨ takjɨɨsneʼ tuum texto o taanmajan̈chiñeʼ? A veces wɨap tan̈kujaʼamay iga Jehová tachiʼiñeʼ wɨtampɨk xaajayaj, juʼuts jeʼm toyoʼoyi takwiñkejayyajpaʼap jeʼm tɨwɨtam y jeʼm wiʼkkuy espiritual (Is. 65:13; 10:​29, 30). Yɨʼɨmpɨgam ikwiñkejpa iga jeʼ tsaam tatoyba y wɨap tanaidyay confianza (Is. 49:​14-16).

11. ¿Tyi iyooxpaʼt Aida iga odom maaj kɨʼɨn̈iñ?

¹¹ Aida tuum yoomtɨwɨ itywɨʼɨp Senegal iñaskaʼ tuum tan̈kapɨk nasɨyoʼoyi y iaʼm juutypɨk Jehová sɨʼ idyɨk iyooxpaʼt. Jeʼm ijaatun̈yaj ixunyajpa idyɨk iga ikooñwɨʼyiñ jaʼyan̈ tumiñ iga wɨaiñ imatspak ifamilia, iga jeʼam jeʼm tsɨɨtspɨk. Pero jeʼ ipɨk ijɨɨxi iga tsɨʼyba juʼuts precursora y dyaʼ juʼchan̈ tumiñ ikooñwɨʼyba idyɨk. Jeʼm ifamilia tsaam ijoʼykayaj y ikujɨyyajpa idyɨk. Aida in̈matpa juʼuts idyɨk in̈jaam: «Akɨɨn̈neʼ idyɨk iga dyaʼ wɨap ammatspak anfamilia y ajooyixtyaiñ. Anjɨɨs iga Jehová iniity jeʼm culpa iga sɨʼ annaskaʼ jeempɨk». Pero tuum jaama ikumaton̈ tuum najɨʼyoʼoyi iga ianmajan̈chiʼ: «Jeʼm tɨɨwɨ nɨm iga Jehová ijoodon̈ juʼuts tanan̈jaam jesɨk sɨʼ tanyaʼacha. Jeʼm ancianojyaj y tun̈gak tɨwɨtam akjɨɨsyaj iga Jehová tsaam atoyba, yɨʼp ayooxpaʼt iga odom pɨɨmi an̈yaʼguiñ. Majtyim anan̈wejpaʼt Jehová y jesɨk anaʼm juutypɨk akutson̈, ayooxpaʼt iga anaidyiñ paz». Maaj okmɨ ipaʼt tuum yooxakuy iga iaʼmchiʼ iga kuyooxaoʼyiñ juʼuts precursora, wɨaiñ iyooxpaʼt ifamilia y tun̈gakyaj. Jeʼ nɨmpa: «Sɨɨ majtyim anaidyay confianza Jehová. Iga juchixkej anan̈wejpaʼtpa ayooxpaʼtneʼ iga odom pɨɨmi akɨʼɨn̈iñ».

 ¿TYI IWATPA JEHOVÁ JEʼM TANNƗGƗYOʼOYIJOM?

12. Juʼuts nɨmpa Salmo 56:​9, ¿tyi iwɨkupɨkneʼ idyɨk David?

¹² (Maayɨʼ Salmo 56:9). f Yɨʼp versículo tan̈kejaytyaʼmpa tyiñam iwat David iga odoy kɨʼɨn̈iñ jesɨgam ity idyɨk en peligro, ikujɨɨs juutypɨk Jehová iyooxpaʼtpa idyɨk jeʼm iñɨgɨyoʼoyijom. Ijoodon̈ idyɨk iga jeʼ ikɨakputpa, y ijɨykamayñeʼ iga tsɨʼyba juʼuts an̈jagoʼoyi (1 Sam. 16:​1, 13). David ijoodon̈tyim idyɨk iga Jehová ikkupakpa jempɨk ijɨykamneʼ.

13. ¿Tyi iwatpa Jehová jeʼm tannɨgɨyoʼoyijom?

¹³ ¿Tyi tajɨykamayñeʼ Dios taɨchtyam? Dyaʼ tajɨykamayñeʼ iga yɨʼp jaama dyam tayaʼachaap. g Jeʼyukmɨ dyaʼ tyi ijoo tyityam tannaskaʼaba, Jehová ijɨykamneʼ iga jeʼm jomnaxyukmɨ iktogoyba jeʼm yaʼachaaji (Is. 25:​7-9). Jeʼ iniity jeʼm pɨɨmi iga iktsukumpa jeʼm kaʼaneyajwɨʼɨp, iktogoyba jeʼm mɨmneiyaj y jeʼm tanenemigojyaj (1 Juan 4:4).

14. ¿Tyi tan̈kujɨɨstaʼmiñ?

¹⁴ Jesɨk mikɨɨn̈ba, kujɨɨsɨ tyi iwatpa Jehová jeʼm tannɨgɨyoʼoyijom. Kujɨɨsɨ juʼutsam tañityityam jesɨk dyam i jeʼm Wookkɨʼɨwiñ y jeʼm imalwatyajpaʼap, numaaj ityyajpa jempɨk ikupɨkyajpa Dios y ustam ustam togoyba jeʼm tan̈kaʼ. En jeʼm mɨjpɨk an̈tuʼumaaji del 2014 aknasta tuum akwiñkejoʼoyi iga tayooxpaʼtpa tan̈kujɨɨs jeʼm tanan̈jogoʼoyi. Jeem, tuum tɨɨwɨ iñɨʼmay ifamilia iga ikujɨɨsyajiñ tyi idyɨk nɨmpa 2 Timoteo 3:​1-5 meʼega ijɨykiʼmpa juʼuts tañityi en jeʼm Paraíso: «Jeʼm jomnaxyukmɨ itypa jaʼyan̈ maymayaaji. Iga ityumpɨyyaj ityoyyajpa ityɨwɨtam, agui ikusuʼnɨyyajpa ikunuʼkyaj Dios, modestos y dyaʼ nan̈kejyajtaap, ikujiʼpyajpa Dios, ikupɨkyajpa ijaatun̈ y iaapa, iwɨwadaʼyba y ityoyba jeʼm iamigojyaj, ityoyba jeʼm ifamilia, wɨmuruyajpa, dyaʼ ikujɨyyajpa tun̈gakyaj, iwɨjɨɨsyajpa tyi iwatpa, dyaʼ najooyixyajtaap, ityoyyajpa jempɨk Dios ikusuʼnɨʼyba, iwɨwatyajpa, wɨjɨɨxiɨyyajpa, dyaʼ najɨɨsyajtaap iyaʼak, maaj ityoyyajpa Dios y ikupɨkyajpa. Juchixkej an̈pɨʼtsyaajɨ». ¿Oyba tanan̈mat kun tanfamilia o kun jeʼm tɨwɨtam juʼutsam tañityityam jeʼm jomnaxyukmɨ?

15. ¿Tyi iyooxpaʼt Tanja iga odom maaj kɨʼɨn̈iñ?

¹⁵ Tanja tuum yoomtɨwɨ itywɨʼɨp Macedonia del Norte ikujɨɨs jempɨk Jehová ijɨykamneʼ y iyooxpaʼt iga odom maaj kɨʼɨn̈iñ. Jeʼ nɨmpa iga jesɨk moj ikuyujkaʼ jeʼm Biblia, jeʼm ijaatun̈yaj pɨɨmi ijoʼykayaj: «Annaskaʼ jempɨk maaj an̈kɨɨn̈neʼ idyɨk. Anaapa akoʼtspa idyɨk jesɨk aseetpa iga aoy jeʼm an̈tuʼumaaji. Y kun anjaatun̈ aotyɨʼmayyaj iga akkaʼayajpa siiga atsɨʼyba juʼuts Testigo». Okmɨ kebaytya. ¿Tyi iwat? Jeʼ nɨmpa: «Moj an̈kujɨɨs iga siiga an̈kupɨkpa Jehová, juchixkej amaymayaap. Anjɨɨspa idyɨk iga dyaʼ tyi ijoo tyityam ampatstogoyba sɨɨ, Jehová akumayketpa jeʼm jomnaxyukmɨ y an̈kujaʼamaʼyba ityumpɨy jeʼm yaʼachaaji». Tanja ikupɨk Jehová, y ipaʼt tuum tɨk juuty itypa. Sɨɨ an̈koʼmɨyñeʼ kun tuum tɨɨwɨ y iwagakuyooxayajpa Dios a tiempo completo.

TYI TAYOOXPAʼTPA IGA MAJNAM TANAIDYAʼYIÑ CONFIANZA JEHOVÁ

16. ¿Tyi tayooxpaʼtpa iga odoy takɨʼɨn̈iñ jesɨk kupakpa Lucas 21:​26-28?

¹⁶ Jesɨk itypa jeʼm mɨjpɨk yaʼachaaji, jaʼyan̈yaj pɨɨmi «cɨ̱ŋyajpa». Pero dyaʼ jempɨk naspa kun taɨchtyam (maayɨʼ Lucas 21:​26-28). ¿Tyiʼiga? Iga tanaidyaytyaʼm confianza  Jehová. Tanja nɨmpa iga jempɨk iñaskaʼ iyooxpaʼtneʼ in̈an̈kamok tun̈gak kutɨʼɨchiyaj: «Anaʼmneʼ iga Jehová juchixkej tayooxpaʼtpa y takumayketpa. A veces wɨap tanjɨɨs iga tun̈gakyaj iwɨpudayyajpa ityumpɨy, pero numaaj wɨap iwatyaj jempɨk Jehová iaʼmchiʼiba iga iwatyajiñ. Mex iga pɨɨmi tayaʼachaap tansɨʼ, nuʼkpa jeʼm jaama jesɨk kuyajpa».

17. ¿Juutypɨk tayooxpaʼtpa jeʼm texto yɨʼppɨk amtyɨy 2024? (Aʼmɨ jeʼm foto itywɨʼɨp yɨʼp totjaayi iwiñjom).

¹⁷ Mex iga yɨʼp jaama naspa tyidyin̈kej iga tatsɨgan̈jeʼkpa, tan̈watpatyim juʼuts David y dyaʼ tanaʼmchiʼiba iga jeʼm kɨɨn̈i takkupoʼnaaʼyiñ. Jeʼm texto yɨʼppɨk amtyɨy 2024 iniity jeʼm an̈matyiyaj jempɨk David iñɨʼmay Jehová: «Jesɨk akɨɨn̈ba, manaidyaʼyba confianza» (Sal. 56:3). Tuum obra de consulta bíblica in̈matpa tyi nɨmtoʼoba yɨʼp versículo: «David dyaʼ iaʼmchiʼiba iga jeʼm kɨɨn̈i ikkupoʼnakedyiñ y dyaʼ pɨɨmi ityeguedaap jempɨk sɨʼ iñaskaʼ, iniidyay confianza jempɨk wɨap ikɨakput». Odoy kujaʼamaʼayɨ jeʼm texto yɨʼppɨk amtyɨy, y maaj jesɨk miyaʼachaap iñxɨʼ. Kujɨɨsɨ jempɨk Jehová iwatneum, sɨʼ iwat y iwatpa jeʼm tannɨgɨyoʼoyijom. Jesɨk, juʼutstyim David, wɨap iññɨm: «Dios jempɨk anaidyaʼyba confianza; dyaʼ akɨɨn̈ba» (Sal. 56:4).