1. Dahme kahrehda kitail kin ekei pak masepwehkada?

 KITAIL koaros kin ekei pak masepwehkada. Ei mehlel, atail onopki Paipel kahrehiong kitail en sohte masak me melahr kan, ngehn suwed kan, de dahme pahn wiawihong aramas ni ahnsou kohkohdo. Ahpw kitail kin mihmi erein ahnsou ehu me “soahng kamasepwehk kan” kin wiawi, duwehte mahwen, tiahk lemei, oh soumwahu lusulus. (Luk 21:11) Ele kitail pil kin masak aramas, iangahki palien koperment kan me kin kahpwalihkitailla de pil tohn atail peneinei me kin uhwong kaudok mehlel. Ekei kin pwunodki me re sohte pahn kak dadaur pahn arail kahpwal kan en ahnsou wet de me pil pahn wiawi ahnsou kan mwuhr.

2. Menlau kawehwehda irair me Depit lelohng nan Kahd.

² Depit pil kin masepwehkada. Karasepe, ni ahnsou me Nanmwarki Sohl pwakipwakih pwehn kemehla, Depit lemehda en tangala nan kahnimw en Kad nan Pilisdia. Nanmwarki en Kad, Akis, diarada me Depit iei sounpeio me kemehla mehn Pilisdia “nen.” Depit uhdahn “masakada” nanmwarkio. (1 Sam. 21:​10-12) E pwunodki dahme Akis pahn wiahiong ih. Ia duwen Depit eh powehdi eh masak?

3. Nin duwen me Melkahka 56:​1-3, 11 mahsanih, ia duwen Depit eh powehdi eh masak?

³ Nan Melkahka 56, Depit kasalehda eh pepehm nin doken e mihmi Kad. Nan melkahkao, Depit kawehwehda mwahu dahme kahrehda e masepwehkada, ahpw e pil kawehwehda dahme sewese ih en uhdihsang masepwehk. Ni eh kin masepwehkada, Depit kin likih Siohwa. (Wadek Melkahka 56:​1-3, 11.) Depit ahneki kahrepe mwahu en likih Siohwa. Pwehki sawas sang rehn Siohwa, Depit medewehda en wia mehkot kapwuriamwei; e mwomwehda mwomwen aramas iahk men! Akis sohla men kemehla  Depit, ahpw e uhd men Depit en kohkohla. Eri Depit pitla.—1 Sam. 21:13–22:1.

4. Ia duwen atail kak kakehlakahla atail likih Siohwa? Menlau kihda karasaras.

⁴ Kitail pil kak powehdi atail masak sang ni atail kin likih Siohwa. Ahpw ia duwen atail en kakehlakahda atail likih Siohwa, ahpw keieu ni atail kin masepwehkada? Medewehla karasaras wet. Ma ke esehda me ke ahneki soumwahu ehu, ele nin tapio ke masepwehkada. Ahpw ele ke pahn meleileidi ma ke kin likih omw toahkteo. Ele e sewesehier aramas tohto me ahneki soangen soumwahwo. E kin rong mwahu ni omw kawehwehiong dahme ke masak oh ke pehm me e uhdahn nsenohkin uhk. Oh mwein e ndaiong uhk duwen wiepen wini ehu me doadoahk mwahu rehn meteikan. Duwehte met, kitail kin kakehlakahla atail likih Siohwa sang ni atail kin medemedewe dahme e ketin wiadahr, dahme e kin ketin wiewia, oh dahme e pahn ketin wiahiong kitail ni ahnsou kohkohdo. Ih met me Depit wia. Ni atail koasoiapene ekei soahng kan me e koasoia nan Melkahka 56, medewehla ia duwen omw pil kak kakehlakahda omw likih Siohwa oh powehdi omw masak.

DAHME SIOHWA KETIN WIADAHR?

5. Pwehn powehdi eh masak, dahme Depit kin doudouloale? (Melkahka 56:​12, 13)

⁵ Mendahki Depit mihla nan irair keper ehu, e kin medemedewehte duwen soahng mwahu kan me Siohwa ketin wiadahr mahso. (Wadek Melkahka 56:​12, 13.) Erein eh mour, Depit kin wia met. Karasepe, mie ahnsou me e kin doudouloale duwen sapwellimen Siohwa kepikipik kan. Met kin katamankihong ih duwen sapwellimen Siohwa manaman laud oh eh kin ketin poakohng aramas. (Mel. 65:​6-9) Depit pil kin doudouloale dahme Siohwa ketin wiahda ong meteikan. (Mel. 31:19; 37:​25, 26) Oh e kin keieu doudouloale duwen dahme Siohwa ketin wiadahr ong pein ih. Siohwa ketin sewese oh pere Depit sangete eh seri pwelel. (Mel. 22:​9, 10) Depit eh medemedewe duwen soahng pwukat kin uhdahn kakehlakahda eh likih Siohwa!

6. Ni atail kin masepwehkada, dahme pahn sewese kitail en likih Siohwa?

⁶ Ni omw kin masepwehkada, pein idek rehmw, ‘Dahme Siohwa ketin wiadahr?’ Medemedewe dahme e ketin kapikadahr.  Karasepe, “tehk mwahu” ia duwen Siohwa eh kin ketin apwalih menpihr kan oh rohs kan, mendahki re sohte kapikipikda ahneki irair kaselel kan me e sapwellimanki oh sohte kak kaudokiong ih. Eri, ia uwen Siohwa eh pahn ketin apwalih kitail! Atail medemedewe met kak kalaudehla atail likih ih. (Mad. 6:​25-32) Pil medewehla dahme Siohwa ketin wiahda ong sapwellime tohnkaudok kan. Ke kak onopki duwen koasoipen emen nan Paipel me kasalehda pwoson laud, de ke kak wadek duwen dahme wiawihong sapwellimen Siohwa ladu kan nan atail ahnsou. a Patehng met, doudouloale duwen Siohwa eh kin ketin apwahpwalihiuk. Ia duwen eh ketin seweseiuk en esehla padahk mehlel? (Sohn 6:44) Ia duwen eh ketin sapengala omw kapakap kan? (1 Sohn 5:14) Ia duwen omw kin paiekihda ehuehu rahn sang meirong en sapwellime Ohlo?—Ep. 1:7; Ipru 4:​14-16.

7. Ia duwen dahme wiawihong soukohp Daniel eh sewese Vanessa en powehdi eh masak?

⁷ Vanessa, b sister men sang Haiti, lelohng irair kamasepwehk ehu. Ohl emen nan eh wasahn kousoano kin call oh text ih rahn koaros oh kin men ira en ehuda. Vanessa sohte dukiong douluhl. Ahpw ohlo kalaudehla eh ngihtehte oh kin kamasakihki lokaia lemei. Vanessa koasoia: “I uhdahn masepwehkada.” Ia duwen eh powehdi eh masak? E wia dahme e kak wia pwehn pere pein ih. Emen elder sewese en koasoiong palien polis. Ahpw e pil kin medemedewe ia duwen Siohwa eh ketin pere sapwellime ladu kan mahso. Vanessa koasoia: “Tepin aramas me I medewehda iei soukohp Daniel. E lekdekdiong nan pesen laion duhpek kei mendahki e sohte wiahda mehkot sapwung. Ahpw Siohwa ketin apwalih ih. Eri I peki rehn Siohwa en ketin apwalihala ei kahpwalo. Mwurin mwo, I sohla masepwehk.”—Dan. 6:​12-22.

DAHME SIOHWA KIN KETIN WIEWIA AHNSOU WET?

8. Dahme Depit uhdahn kamehlele? (Melkahka 56:8)

⁸ Mendahki Depit mi nan irair uhdahn keper ehu nan Kad, e sohte kin medemedewehte dahme e masak. Ahpw e pilada en medemedewe dahme Siohwa ketin wiewiahiong ih ni ahnsowo. Depit kak kehn me Siohwa kin ketin kaweid oh pere ih oh me E ketin mwahngih eh pepehm kan. (Wadek Melkahka 56:8.) Pil mie kompoakepahn Depit mwahu kan, duwehte Sonadan oh Samworo Lapalap Ahimelek, me kin loalopwoatohng oh sewese. (1 Sam. 20:​41, 42; 21:​6, 8, 9) Oh mendahki Nanmwarki Sohl men kemehla ih, Depit pitla. E uhdahn kamehlele me Siohwa ketin mwahngih duwen eh pepehm oh dahme wiewiawihong ih.

9. Dahme Siohwa kin ketin tehk duwen emenemen kitail?

⁹ Ni omw lelohng kahpwal ehu me kahrehda ken masepwehkada, tamataman me Siohwa kin ketin mwahngih duwen kahpwalo oh ia omw pepehm duwen kahpwalo. Karasepe, Siohwa sohte ketin mwahngihete duwen mehn Israel ko ar wiakaula pahn mehn Isip ko, ahpw e pil ketin mwahngih “uwen ar lokolok laud.” (Eks. 3:7) Depit koulki me Siohwa kin ketin tehk duwen eh “lokolok” oh “apwal.” (Mel. 31:7) Oh ni sapwellimen Koht aramas akan ar kin lelohng lokolok—pil mehnda ma pein arail pilipil pweipwei me kahrehda—“met kin kansensuwed ong ih.” (Ais. 63:​9, NW) Ni omw kin masepwehkada, Siohwa ketin wehwehki ia omw pepehm oh kin ketin kupwurki en seweseiuk powehdi omw masak.

10. Dahme kahrehda ke kak uhdahn kamehlele me Siohwa kin ketin nsenohkin uhk oh me e pahn ketin seweseiuk dadaur pahn kahpwal kan?

 ¹⁰ Ma ke lelohng irair kamasepwehk ehu, ele ke sohte kin kilang ia duwen Siohwa eh kin ketin sewesewese iuk. Dahme ke kak wia? Peki en ketin seweseiuk en kilang sapwellime sawas. (2 Nan. 6:​15-17) Kowe eri medewehla met: Mie padahk de pasapeng ehu nan mihting en mwomwohdiso me kakehlakaiukada? Mie pwuhk, kisin kasdo de koul ehu (original song) me kin kangoange iuk? Mie emen me ehukihong uhk ire kangoang ehu de iren Paipel ehu? Ele kitail kin manokehla duwen limpoak en riatail Kristian kan oh kangoang sang Mahsen en Koht eh kin sewese kitail. Soahng pwukat wia kisakis kaselel kei sang rehn Siohwa. (Ais. 65:13; Mark 10:​29, 30) Mepwukat kin kadehdehda me e kin ketin nsenohkin uhk. (Ais. 49:​14-16) Oh mepwukat pil kadehdehda me ke kak uhdahn likih ih.

11. Dahme sewese Aida en powehdi eh masak?

¹¹ Aida, me kin mi Senegal, kilang ia duwen Siohwa eh ketin sewese ih erein eh kahpwal ehu. Pwehki ih me mesenih en eh peneineio, eh pahpa oh nohno kin kasik me e pahn koadoahkihada mwohni me itar pwehn apwalih ih oh ira. Ahpw mwurin e kihsang soahng kan me sohte nohn kesempwal nan eh mour pwehn pioneer, e lelohng kahpwal en mwohni. Eh peneineio lingeringerda pah oh kin kauwe. Aida koasoia: “I perki me I sohla pahn kak sewese ei pahpa oh nohno oh koaros pahn kauwe ie. I pil kapwukoahki Siohwa eh ketin mweidohng irairo en uhdahn suwedla.” Ih eri rong padahk ehu nan mihting ehu. E koasoia: “Me wia padahko katamankihong kiht me Siohwa kin ketin mwahngih dahme kin kahrehiong emenemen kitail en pwunod oh masepwehkada. Pwehki kaweid sang rehn elder kan oh meteikan, I ekisekis kamehlelehla duwen sapwellimen Siohwa limpoak. Ni ei kin kapakap ong Siohwa, ei kamehlele me e pahn ketin sewese ie kin tepida lalaudla, oh I kin pehm meleilei laud ni ei kilang eh ketin sapengala ei kapakap kan.” Mwuhr, Aida diarada doadoahk ehu me kak sewese en pousehlahte pioneer oh pil itar en sewese eh peneineio. E koasoia: “I esehla en uhdahn likih Siohwa. Met, mwurin ei kin kapakap, I kin kalapw sohla masepwehk.”

 DAHME SIOHWA PAHN KETIN WIA NI AHNSOU KOHKOHDO?

12. Nin duwen me Melkahka 56:9 mahsanih, dahme Depit uhdahn kamehlele?

¹² Wadek Melkahka 56:9. Iren Paipel wet kasalehda pil ehu ahl me sewese Depit en powehdi eh masak. Mendahki eh mour mihte nan keper, e kin doudouloale dahme Siohwa pahn ketin wiahiong ih ni ahnsou kohkohdo. Depit ese me Siohwa pahn ketin doarehla ih ni ahnsou me konehng. Met pwehki Siohwa ketin mahsaniher me Depit pahn uhd wiahla nanmwarki en Israel. (1 Sam. 16:​1, 13) Ong Depit, sohte lipilipil dahme Siohwa ketin inoukihda, e pahn uhdahn pweida.

13. Dahme kitail kak uhdahn kamehlele me Siohwa pahn ketin wia?

¹³ Dahme Siohwa ketin inoukihda en wiahiong uhk? Kitail sohte kasik me e pahn ketin pere kitail sang kahpwal koaros. c Ahpw tamataman me sohte lipilipil soangen kahpwal dah ke ele ahneki erein koasoandi wet, Siohwa pahn ketikihsang kahpwal pwukat koaros nan sampah kapwo me kohkohdo. (Ais. 25:​7-9) Sounkapikpatailo sapwellimanki manaman laud en ketin kaiasada me melahr kan, kamwahwihala atail soumwahu kan, oh ketikihsang koaros me kin uhwong kitail.—1 Sohn 4:4.

14. Dahme kitail kak doudouloale?

¹⁴ Ni omw kin masepwehkada, doudouloale dahme Siohwa pahn ketin wia ni ahnsou kohkohdo. Medewehla omw pepehm ni ahnsou me Sehdan sohla pahn mie, aramas suwed kan pahn sohrala oh me pwung kante me luwehdi, oh atail soh unsek pahn ekisekis sohrasang kitail ehuehu rahn. Kamwomwada ehu me wiawi nan prokram en mihting tohrohro 2014 kasalehda ia duwen atail kak medemedewe duwen atail koapworopwor. Pahpa men koasoiong eh peneineio ia duwen lepin lokaia kan nan 2 Timoty 3:​1-5 eh kak wekila ma iretikitik ko uhd kohpada ia pahn mwomwen mour nan Paradais. E koasoia: “Nan sampah kapwo, e pahn mie ahnsou kaperen kan. Pwe aramas akan pahn poakohng meteikan, poakohng me mehlel, mpahi, aktikitik, pahn kin kapinga Koht, peikiong pahpa nohno kan, kin kalahnganki soahng kan, loalopwoat, uhdahn poakohng arail peneinei, men pwungki meteikan, ahnsou koaros koasoia soahng mwahu kan duwen meteikan, kak kaunda pein irail, opampap, poakohng me mwahu, likilik, uhpa meteikan, karakarahk, poakohng Koht a kaidehn en nsenohkihte nsenarail, arail poadidiong Koht kin kamwakid arail kaudok; oh ken kin patehngete soangen aramas pwukat.” Ia duwe, ke kin koasoiaiong omw peneinei de iengomw me pwoson kan ia pahn mwomwen mour nan sampah kapwo?

15. Mendahki Tanja masepwehkada, dahme sewese ih en powehdi eh masak?

¹⁵ Sister men sang Paliepeng en Macedonia me adaneki Tanja kin powehdi eh masak sang ni eh kin doudouloale kapai kan en ahnsou kohkohdo. E pahpa nohno kin uhdahn uhwong eh kin onopki Paipel. E koasoia: “Ekei soahng kan me I kin perki en wiawi uhdahn wiawi. Ei nohnou kin keme ie mwurin mihting koaros. Ei pahpa nohnou kin nda me ira pahn kemeiehla ma I wiahla emen Sounkadehdehn Siohwa.” Kedekedeo, ira kausasang Tanja nan imwarailo. Dahme e wia? E koasoia: “I kin medemedewehte uwen ei pahn peren kohkohlahte pwehki I pilada en lelepekte. I pil kin medewehla duwen nan sampah kapwo ni Siohwa eh pahn ketin katingiheki soahng koaros me I kakete luhssang nan koasoandi wet oh ia duwen soahng suwed koaros pahn manokonokla.”  Tanja kin kolokolete eh lelepek. Oh pwehki sawas sang rehn Siohwa, e diarada eh wasahn kousoan. Rahnwet, Tanja pwoudiki brother lelepek men oh ira koaros kin peren ni ara doadoahngki pali laud en ara ahnsou ong papah Koht.

KAKEHLAKAHDA OMW LIKIH SIOHWA RAHNWET

16. Dahme pahn sewese kitail en eimahte ni atail kilang dahme Luk 21:​26-28 kohpada eh wiawi?

¹⁶ Erein kahn kamakam kowahlapo, aramas akan pahn “lipwongmaskihla ar masak.” Ahpw sapwellimen Koht aramas akan pahn tengedihte oh eimah. (Wadek Luk 21:​26-28.) Dahme kahrehda kitail pahn kin eimahte? Pwehki kitail eselahr en likih Siohwa. Tanja, me kitail koasoiapenehr mwoweo, koasoia me dahme wiawihongehr ih kin sewese ih en dadaur pahn irair apwal teikan. E koasoia: “I sukuhlki me Siohwa kak ketin sewese kitail en dadaur pahn soangen irair koaros oh kapaikitailda. Ekei pak e mwomwen me meteikan me kin kakaun soahng kan, ahpw Siohwa uhdahn ketin kehlail sang irail. Oh mendahki kahpwal ehu ele kin uhdahn apwal, e pahn imwisekla.”

17. Ia duwen atail iren pahr en 2024 eh kak sewese kitail? (Menlau kilang kilel ni kilin Kahn Iroir wet.)

¹⁷ Rahnwet mie soahng tohto me kak kahrehiong kitail en masepwehkada. Ahpw duwehte Depit, kitail kak sohte mweidohng masak en kaunkitailda. Atail iren pahr en 2024 iei me Depit kapakapkihong Siohwa: “Ni ei kin masepwehkada, I kin patohwan likih komwi.” (Mel. 56:3) Tehk dahme emen me samanih Paipel koasoiahki iretikitik wet: “Depit sohte kin medewehte soahng kan me e masak, de duwen eh kahpwal kan. Ahpw e kin koapworopworki Mehmeno me pahn ketin doarehla ih.” Medemedewe atail iren pahr erein sounpwong kan me pahn kohdo, ahpw mehlel ni omw lelohng irair kamasepwehk kan. Kihong ahnsou en medewe dahme Siohwa ketin wiadahr mahso, ketin wiewia ahnsou wet, oh dahme e pahn ketin wia ni ahnsou kohkohdo. Eri, duwehte Depit, ke kak nda: “I kin likih Koht oh I sohte kin masak mehkot.”—Mel. 56:4.