1. Pabia ku utrora no pudi tene medu?

 TUDU jintis ta medi utrora. Suma no sibi ke ku Biblia fala, no ka ta medi mortu, dimonius o ke ku na bin kontisi ku pekaduris na futuru. Ma no sta na vivi na un tempu nunde ki ten “kusas meduñu”, suma gera, krimi ku duensas. (Luk 21:11) No pudi tambi tene medu di pekaduris, nkluindu di guvernus ku ta punu sufri o te mesmu di no familia ku sta kontra adorason di bardadi. Alguns ta sta preokupadu di kuma e ka na pudi nguenta purblema ke tene gosi, o purblema ke pudi bin tene na futuru.

2. Splika kal ku seduba situason di Davi oca i staba na Gati.

² I tenba mumentus ku Davi tene medu. Pur isemplu, oca rei Saul na buska matal, Davi disidi kuri pa sidadi di filisteus, ku sedu Gati. Rei di Gati Akis, bin diskubri di kuma Davi i ki gereru garandi ku ngabadu na un kantiga ku fala di kuma i mata “des milyaris” di filisteus. Davi “fika ku garandi medu”. (1 Sam 21:​10-12) I staba preokupadu ku ke ku Akis na bin fasil. Kuma ku Davi vensi si medu?

3. Di akordu ku Salmu 56:​1-3, 11, kuma ku Davi vensi si medu?

³ Na Salmu 56, Davi fala di kuma ki sinti oca i staba na Gati. Nes Salmu, Davi konta di manera klaru pabia ki  tene medu, tambi i konta kuma ki vensil. Davi konfia na Jeova oca i staba ku medu. (Lei Salmu 56:​1-3, 11.) Davi teneba bon motivus di konfia na Jeova. Ku ajuda di Jeova, Davi disidi fasi un kusa strañu. I finji di kuma i dudu, i si planu sai ben. Gosi en ves di Akis oja Davi suma ameasa, i paña raiba, asin Davi konsigi kapli. — 1 Sam 21:13–22:1.

4. Kuma ku no pudi aumenta no konfiansa na Jeova? Bu pudi da un isemplu.

⁴ Anos tambi no pudi vensi no medu ora ku no konfia na Jeova. Ma kuma ku no pudi aumenta no konfiansa na Jeova, prinsipalmenti ora ku no tene medu? Jubi un isemplu. Si bu sibi di kuma bu tene un duensa, na kumsada bu pudi medi. Ma, bu pudi rapati bu medu si bu konfia na bu mediku. I pudi sedu di kuma i kura ja manga di jintis ku tene mesmu duensa. I sukutau oca ku bu na splika bu situason, i bu sinti di kuma i preokupa ku bo. Talves i falau di un tratamentu ku tene bon rusultadu na utrus. Di mesmu manera, no ta aumenta no konfiansa na Jeova ora ku no pensa na ke ki fasiba ja, na ke ki sta na fasi gosi i na ke ki na bin fasi pa nos. I es ku Davi fasiba. Nkuantu bu na jubi palabras nspiradu ku sta na Salmu 56, pensa na kuma ku bu pudi tambi aumenta bu konfiansa na Jeova i vensi bu medu.

KE KU JEOVA FASIBA JA?

5. Ke ku Davi pensaba nel pa pudi vensi si medu? (Salmu 56:​12, 13)

⁵ Kontra vida di Davi staba na pirigu, i kontinua pensa na ke ku Jeova fasiba ja. (Lei Salmu 56:​12, 13.) I asin ku Davi ta pensaba duranti tudu si vida. Pur isemplu, utrora i ta pensa fundu na kusas ku Jeova kumpu. Es ta lembrantal di kuma Jeova tene puder garandi, i ama pekaduris ciu dimas. (Sal 65:​6-9) Tambi Davi ta pensa fundu na ke ku Jeova fasiba ja pa utrus. (Sal 31:19; 37:​25, 26) Prinsipalmenti i ta pensa fundu na ke ku Jeova fasi pa rel propi. Jeova  juda Davi i proteẑil disna di ocal pikininu. (Sal 22:​9, 10) Imaẑina kuma ku pensa fundu nes kusas juda Davi aumenta si konfiansa na Jeova!

6. Ora ku bu tene medu, ke ku na judau konfia na Jeova?

⁶ Ora ku bu sta ku medu, fasi bu kabesa es purgunta: ‘Ke ku Jeova fasiba ja pa mi?’ Pensa na kusas ku Jeova kumpu. Pur isemplu, ora ku no “jubi” kuma ku Jeova ta kuida di kacus ku floris ku ka kumpudu pa parsil i ku ka pudi adoral, no pudi aumenta no konfiansa di kuma i na kuida di nos tambi. (Mat 6:​25-32) Pensa tambi na ke ku Jeova fasi pa kilis ku ta adoral. Bu pudi studa isemplu di un algin ku Biblia fala del ku mostra fe garandi, o bu pudi lei spiriensia di un servu di Jeova di no tempu. a Tambi bu pudi pensa fundu na kuma ku Jeova kuidaba ja di bo. Kuma ki judau kunsil? (Jon 6:44) Kuma ki ruspundi bu orasons? (1 Jon 5:14) Kuma ku bu ta benefisia kada dia di sakrifisiu di si Fiju ki ama? — Ef 1:7; Eb 4:​14-16.

7. Kuma ku spiriensia di profeta Daniel juda Vanessa vensi si medu?

⁷ Un irma na Aiti comadu Vanessa b pasaba un situason ku pul i fika ku medu. Un omi na si bairu ta ligal i mandal mensaẑen tudu dia, i ta presional pa i tene relason seksual ku el. Vanessa nega far. Ma ki omi paña raiba mal i te mesmu i ameasa fasil mal. Vanessa fala sin: “N staba ku medu”. Kuma ki vensi si medu? I fasi ke ki pudi pa proteẑi si kabesa. Un ansion nkoraẑal pa i papia ku polisia. Tambi i pensa na kuma ku Jeova proteẑi si servus na pasadu. Vanessa fala sin: “Purmeru algin ku N pensa nel i profeta Daniel. I seduba inosenti, ma mesmu asin i botadu na koba di lions ku teneba fomi. Ma Jeova kuida del. N pidi Jeova pa i pui pa ki omi para pensa na mi i pa i resolvi ki purblema. Dipus di kila, N ka tene mas medu.” — Dan 6:​12-22.

KE KU JEOVA STA NA FASI GOSI?

8. Ke ku Davi staba konvensidu del? (Salmu 56:8)

⁸ Davi staba na un situason pirigosu oca i staba na Gati, ma mesmu asin, i ka konsentra na kusas ku na pul i fika ku medu. En ves di kila, i disidi pensa na ke ku Jeova staba na fasi na ki mumentu. Davi notaba di kuma Jeova staba na gial i proteẑil, tambi i ntindi si sentimentus. (Lei Salmu 56:8.) Alen di kila, Davi teneba amigus, suma Jonatan ku Ŝef di Saserdotis Aimeleki ku apoial di manera fiel i ku judal. (1 Sam 20:​41, 42; 21:​6, 8, 9) Rei Saul mistiba matal, ma Davi fusi pa pudi salva si vida. I staba konvensidu di kuma Jeova sibi diritu ke ku na pasa ku el i kuma ki staba na sinti.

9. Ke ku Jeova ta jubi na kada un di nos?

⁹ Ora ku bu sta na pasa un situason difisil ku ta pou fika ku medu, lembra di kuma Jeova ta oja ki situason i kuma ku ki situason ta fasiu sinti. Pur isemplu Jeova ka nota so kuma ku israelitas ta maltratadu na Ejitu, ma tambi i “pui sintidu pa se dur.” (Sai 3:7) Davi kanta di kuma Jeova oja si “sufrimentu” ku si “kasabi.” (Sal 31:7) Tambi oca povu  di Deus na sufri, mesmu pabia di se mau disisons, Jeova “sufri”. (Isa 63:9) Ora ku bu sta ku medu, Jeova ta ntindi kuma ku bu na sinti, i tene vontadi garandi di judau vensi bu medu.

10. Pabia ku bu sta konvensidu di kuma Jeova ta preokupa ku bo, tambi i na judau lida ku kualker purblema?

¹⁰ Talves bu pudi punta kuma ku Jeova sta na judau nkuantu bu sta na pasa un situason difisil. Pa kila, pidil pa i judau nota kuma ki sta na judau. (2 Re 6:​15-17) Dipus pensa nes: Sera ki un diskursu o kumentariu na runion nkoraẑau? Sera ki un publikason, un video o un klips di musika nkoraẑau? Sera ki un algin falau un kusa o mostrau un testu ku animau? No pudi ka da balur pa amor ku no ermons ku irmas mostra pa nos, i tambi ka da balur pa nkoraẑamentu ku no risibi di Palabra di Deus. Ma es kusas i prenda garandi ku bin di Jeova. (Isa 65:13; Mar 10:​29, 30) E ta mostra di kuma Jeova ta preokupa ku bo. (Isa 49:​14-16) Tambi e ta mostra di kuma i mersi pa bu konfia nel.

11. Ke ku juda Aida vensi si medu?

¹¹ Aida, ku mora na Senegal nota kuma ku Jeova judal na un situason difisil. Suma el i fiju mas garandi, si papes staba na spera pa i tisi diñeru ku na ciga, pa i kuida di si kabesa i kuida delis. Ma suma i simplifika si vida pa sedu pioneru, Aida ka tene manga di diñeru. Pa kila, si familia paña raiba del i e kritikal. I fala sin: “N staba ku medu di kuma N ka na konsigi juda ña papes, i tudu jintis na papia mal di mi. Te mesmu N kulpa Jeova pa manera ki disa pa kusas piora.” Dipus i obi diskursu na un runion. I fala sin: “Orador lembrantanu di kuma Jeova sibi ke ku ta punu sta preokupadu. Puku puku ku konsijus di ansions i di utrus, N kumsa ku sinti amor di Jeova. N kumsa ku ora Jeova ku mas konfiansa, i N sinti pas garandi oca ku N nota di kuma i ruspundi ña orasons.” Ku tempu, Aida  oca tarbaju ku judal sustenta si kabesa suma pioneru i kuida di si papes. I fala sin: “N aprindi pui tudu ña konfiansa na Jeova. Gosi, manga di bias ña medu ta disparsi dipus di N ora.”

KE KU JEOVA NA BIN FASI?

12. Di akordu ku Salmu 56:​9, kal konfiansa ku Davi teneba?

¹² Lei Salmu 56:9. Es versikulu fala di utru kusa ku juda Davi vensi si medu. Mesmu oca si vida staba na pirigu, i pensa fundu na ke ku Jeova na bin fasi pa rel. Davi sibi di kuma Jeova na libral na tempu sertu. Mas importanti, Jeova falaba ja di kuma Davi na sedu prosimu rei di Israel. (1 Sam 16:​1, 13) Pa Davi, tudu ke ku Jeova purmiti na bin kumpri.

13. Kal konfiansa ku no pudi tene na Jeova?

¹³ Ke ku Jeova purmiti fasi pa bo? No ka ta spera pa i libranu di tudu purblemas. c Ma kualker purblema ku bu sta na pasa nes mundu, Jeova na bin kaba ku el na nobu mundu. (Isa 25:​7-9) No Kriadur tene puder garandi di lantanda kilis ku muri, di kuranu i kaba ku tudu no inimigus. — 1 Jon 4:4.

14. Na ke ku no pudi pensa fundu nel?

¹⁴ Ora ku bu tene medu, pensa fundu na ke ku Jeova na bin fasi na futuru. Pensa na kuma ku bu na sinti ora ku Satanas kabadu ku el, ora ku jintis mau kabadu ku el i sobra so jintis bon i ora ku imperfeison na kabadu ku el un bokadu un bokadu kada dia. Un dimostrason na kongresu reẑional di 2014 mostra kuma ku no pudi pensa fundu na no speransa. Un pape papia ku si familia di kuma ku 2 Timótiu 3:​1-5 pudi sedu diferenti si kontra es versikulus na fala di Paraísu. I fala sin: “Na nobu mundu i na ten tempu filis. Pabia jintis na ama n̈utru, e na ama kusas spiritual, e na rikuñisi se limiti, e na sedu umildi, e na ngaba Deus, e na obdisi se papes, e ka na sedu ingratu, e na sedu fiel, e na ama se familia dimas, e na sta dispostu pa akordu, e na papia sempri ben di utrus, e na sibi kontrola se kabesa, e na sedu mansu, e na gosta di bondadi, e na sedu jintis di konfiansa, e na sedu jintis ku ka ta nsisti na se ideia, e na baŝa se kabesa, e na ama Deus en ves di ama sabura, e na motivadu pa adora Deus ku fidelidadi. Pertusi des tipu di jintis.” Sera ki bu papia ku bu familia o ku un ermon na fe aserka di kuma ku vida na sedu na nobu mundu?

15. Tanja ta staba ku medu, ma ke ku judal vensi si medu?

¹⁵ Un irma na Norti di Masedonia comadu Tanja vensi si medu manera ki ta pensa fundu na bensons ku na bin ten na futuru. Si papes staba kontra si studu di Biblia. I fala sin: “Kusa ku N mediba di kuma i na kontisi, kila ku bin kontisi. Dipus di kada runion, ña mame ta sutanba. Ña papes ameasa di kuma e na matan si N sedu Tustumuña di Jeova.” Ku tempu, Tanja serkadu di kasa. Kuma ki reaẑi? I fala sin: “N konsentra na kuma ku N na sedu filis pa tudu tempu si N disidi manti ña fidelidadi. Tambi N pensa na kuma ku Jeova na pagan na nobu mundu pa kualker kusa ku N pudi pirdi nes mundu, i kuma ku tudu mau kusas na diskisidu.” Tanja  kontinua sedu fiel. Ku ajuda di Jeova i konsigi oja kau di mora. Gosi, Tanja kasa ku un ermon fiel, e sta na sirbi juntu ku kontentamentu na sirvisu di tempu kompletu.

AUMENTA BU KONFIANSA NA JEOVA

16. Ke ku na judanu kontinua sedu koraẑosu ora ku no oja kusas ku faladu del na Lukas 21:​26-28?

¹⁶ Duranti garandi tribulason manga di jintis na bin “dismaja ku medu.” Ma povu di Deus na kontinua firmi i sedu koraẑosu. (Lei Lukas 21:​26-28.) Pabia ku no ka na tene medu? Pabia no na aprindiba ja konfia na Jeova. Tanja ku faladuba ja del, fala di kuma spiriensias ki pasa judal nfrenta utru situasons difisil. I fala sin: “N aprindi di kuma Jeova pudi judanu nguenta kualker situason, tambi i ta bensuanu. Utrora i ta parsi di kuma utrus sta na kontrola kusas, ma Jeova mas elis tene puder. Un situason pudi sedu difisil, ma i na kaba.”

17. Kuma ku no testu di anu di 2024 na judanu? (Jubi foto ku sta na kapa.)

¹⁷ Aos, i normal tene medu. Ma suma Davi, no pudi nega pa medu kontrolanu. No testu di anu di 2024 i un orason ku Davi fasi pa Jeova: Ora ku N tene medu, N ta pui ña fiansa na bo. (Sal 56:3) Nota ke ku un piskisadur di Biblia fala aserka des versikulu: “Davi ka kontinua pensa na kusas ku na pul medu o pensa na si purblemas. En ves di kila, i konfia na kin ku na salval.” Na misis ku na bin, pensa na testu di anu, prinsipalmenti ora ku bu sta na pasa situasons ku na pou sinti medu. Ranja tempu pa pensa na ke ku Jeova fasiba ja na pasadu, ke ki sta na fasi gosi i ke ki na bin fasi na futuru. Dipus, suma Davi, bu pudi fala sin: “N fiansa na Deus, N ka na medi”. — Sal 56:4.