1. ¿Imaraykutaj wakin kutis manchachikusunman?

 TUKUYPIS wakin kutis manchachikunchejpuni. Pero Bibliapeqa yachakunchej mana manchachikunachu kasqanta ni wañusqasta, ni demoniosta, nitaj imachus aswan qhepaman kanantapis. Chaywanpis kay mundopeqa ‘mancharina imasʼ juntʼa kashan: guerras, suwas, onqoykuna ima (Luc. 21:11). Chantapis ichá manchachikullanchejtaj gobiernosta, familiaresninchejta, chayri waj runastapis testigosman churanakuwasqanchejrayku. Wakenqa yuyanku kunan rikukushanku chay pruebasta, aswan qhepaman jamoj pruebastapis mana aguantayta atinankuta.

2. ¿Imataj karqa David Gatman chayajtin?

² Davidpi piensarina. Payqa Diospa kamachin karqa, wakin kutitaj manchachikorqa. Rey Saúl wañuchinanpaj qhatiykachashajtin, payqa filisteospa llajtanku Gatman ayqekorqa. Gatpa reynin Akismantaj nerqanku Davidqa wapu soldado kasqanta, ‘chunka waranqastataj wañurachisqanta’. Chayta willasqankuta yachaspataj Davidqa “mayta manchachikorqa” (1 Sam. 21:10-12). Imatachus chay rey payta ruwananmanta manchachikorqa. ¿Imatá ruwarqa chay manchikuyninta atipananpaj?

3. Salmo 56:1-3, 11 nisqanman jina, ¿imatá David ruwarqa manchikuyninta atipananpaj?

³ Davidqa 56 Salmopi willan Gat llajtapi kashaspa imaynachus kashasqanta. Chay Salmopi sutʼimanta nishan imaraykuchus manchachikusqanta, Jehovapi atienekusqantaj chay manchachikuyninta atipananpaj yanapasqanta (Salmo 56:1-3, 11 leey). Chayta ruwasqanraykutaj payta may allin rerqa. Davidqa Jehovaj yanapayninwan yuyaychakorqa locomanta pasachikunanta. Ajinamanta Akisqa manaña Davidta wañuchiyta munarqachu, manaqa ripunallantaña munarqa. Chayrayku Davidqa ayqekuyta aterqa (1 Sam. 21:13–22:1).

4. ¿Imatá ruwasunman Jehovapi astawan atienekunapaj? Kikinchariy.

 ⁴ Jehovapi atienekoyqa noqanchejtapis yanapallawasunmantaj manchikuyninchejta atipanapaj. ¿Imatá ruwasunman Jehovapi astawan atienekunapaj, astawanraj manchikojtinchej? Kaypi piensarina: Uj onqoyniyoj kasqanchejta niwajtinchej, ichapis qallariypeqa manchachikusunman. Chaywanpis uj sumaj doctor atiendenawanchejta yachaspa, manaña anchata manchachikunchejchu. Ichapis chay doctorqa noqanchej jinallataj onqosqa kajkunata ashkhastaña ñaupajta atienderqa. Paywan parlarishaspa reparasunman sumajta uyarishawasqanchejta, imaynachus sientekusqanchejtapis sumajta entiendeshasqanta. Ichapis niwanchej uj tratamientota qonawanchejta, chay tratamientotaj ashkhastaña yanapasqanta. Jehová Diosninchejwanpis ajinallataj. Paypi astawan atienekunapajqa piensarinanchej tiyan imatachus noqanchejrayku ñaupajta ruwasqanpi, imatachus kunan ruwashasqanpi, imatachus qhepaman noqanchejrayku ruwananpipis. Salmo 56 niwanchej Davidpis chayta ruwasqanta. Chay Salmomanta wakin versiculosta ukhuncharishaspa, piensarina imatachus ruwasunman noqanchejpis Jehovapi astawan atienekunapaj, manchikuyninchejtapis atipanapaj.

¿IMATÁ JEHOVÁ ÑAUPAJTA RUWARQAÑA?

5. ¿Imapitaj David tʼukurerqa manchikuyninta atipananpaj? (Salmo 56:12, 13).

⁵ Davidqa peligropi rikukuspa, piensarerqa imatachus Jehová ñaupajta ruwasqanpi (Salmo 56:12, 13 leey). Chaytataj tukuy kausayninpi ruwarqa. Wakin kutisqa Jehovaj ruwasqasninpi tʼukurerqa. Chaytaj payta yuyarichej Jehová may atiyniyoj kasqanta, runastataj mayta munakusqanta (Sal. 65:6-9). Imatachus Jehová wajkunarayku ruwasqanpipis tʼukurillajtaj (Sal. 31:19; 37:25, 26). Astawanpis imatachus Jehová payrayku ruwasqanpi tʼukurej. Jehovaqa Davidta wawitamantapacha yanaparqa, cuidarqataj (Sal. 22:9, 10). Tukuy chaypi tʼukurisqanrayku, Davidqa Jehovapi tukuy sonqo atienekorqa.

6. Manchikojtinchej, ¿imataj yanapawasun Jehovapi atienekunapaj?

⁶ Manchachikunchej chayqa kay tapuypi piensarisunman: “¿Imatá Jehová ñaupajta ruwarqaña?” Ñaupajtaqa Jehovaj ruwasqasninpi piensarina. Piensarisunman imaynatachus Jehová  pʼisqetustapis tʼikitastapis cuidasqanpi, mana rijchʼayninman jinachu ruwasqa kajtinkupis, nitaj payta yupaychayta atejtinkupis. Chaypi piensarispaqa astawan atienekunchej noqanchejtapis cuidanawanchejpi (Mat. 6:25-32). Chantapis piensarinallataj imatachus Jehová kamachisninrayku ruwasqanpi. Ichapis Bibliapi ukhuncharisunman ñaupa tiempomanta Diospa kamachisninmanta, chayri kay tiemponchejmanta hermanosninchejpa experienciankuta leerisunman. a Chantapis piensarillasunmantaj imaynatachus Jehová kunankama noqanchejta cuidawasqanchejpi. ¿Imaynatá Jehová yanapawarqanchej payta rejsinapaj? (Juan 6:44). ¿Imaynatá mañakuykunasninchejman kutichiwarqanchej? (1 Juan 5:14). ¿Imaynatá sapa día yanapawanchej munasqa Wawanta noqanchejrayku qosqan? (Efe. 1:7; Heb. 4:14-16).

7. ¿Imaynatá Danielpa kausaynin Vanessata yanaparqa?

⁷ Haitimanta Vanessa sutiyoj uj hermana, may llakiypi rikukorqa. b Chayraykutaj may mancharisqa kasharqa. Chay lugarpi tiyakoj uj runa sapa día wajyaj, mensajestapis apachej, a la fuerzataj novian kananta munarqa. Payqa sutʼimanta nerqa mana munasqanta, chay runataj astawan phiñarikorqa, imatapis ruwarpanantataj nerqa. ¿Imatá Vanessa ruwarqa chay manchikuyninta atipananpaj? Tukuy atisqanta ruwarqa jarkʼakunanpaj, uj ancianotaj yanaparerqa autoridadeswan parlananpaj. Chantapis yuyarikullarqataj imaynatachus Jehová ñaupa tiempomanta kamachisninta jarkʼasqanta. Vanessa nin: “Ñaupajtaqa profeta Danielmanta yuyarikorqani. Danieltaqa mana juchayoj kashajtinpis, yarqhasqa leonespa tʼoqonkuman wijchʼuykorqanku, Jehovatajrí payta salvarqa. Jehovaman nerqani jarkʼakunaypaj tukuy atisqaytaña ruwasqayta, maytataj mañakorqani yanaparinawanta. Chaymantataj manaña manchachikorqanichu”, nispa (Dan. 6:12-22).

¿IMATÁ JEHOVÁ KUNAN RUWASHAN?

8. ¿Imatataj David sutʼita yacharqa? (Salmo 56:8).

⁸ Davidqa Gatpi kashaspa wañuy patapi rikukuspapis, mana manchikuyninwan atipachikorqachu. Payqa piensarerqa imatachus Jehová chay kutipi payrayku ruwashasqanpi. Repararqa Jehová payta yanapashasqanta, jarkʼashasqanta, imaynachus kashasqantapis entiendesqanta (Salmo 56:8 leey). Chantapis paytaqa yanaparqanku, kallpacharqankutaj sumaj amigosnin Jonatán, kuraj kaj sacerdote Ahimélec ima (1 Sam. 20:41, 42; 21:6, 8, 9). Rey Saúl wañuchiyta munajtinpis, Davidqa salvakorqa. Davidqa sutʼita yacharqa, imapichus rikukushasqanta, imaynachus kashasqantapis Jehovaqa sumajta qhawamushasqanta.

9. ¿Imatataj Jehová sapa ujninchejmanta yachan?

⁹ Ichá noqanchejpis uj llakiypi rikukushanchej, chayraykutaj mancharisqas kashanchej. Jina kajtenqa yuyarikuna Jehovaqa mana imapichus rikukushallasqanchejtachu qhawamushasqanta, manaqa imaynachus sonqonchej kashasqantapis yachasqanta. Ñaupa tiempomanta Diospa kamachisnin Egiptopi esclavos kashajtinku, Jehovaqa allinta yacharqa nanayninkuta, ‘mayta sufrishasqankutapis’ (Éxo. 3:7). Davidqa ujnin takiyninpi nerqa sufrisqanta, ‘sinchʼi phutisqa kashasqantapis’ Jehová qhawamushasqanta (Sal. 31:7). Waj kutipitaj Jehovaqa llajtan juchasninkurayku sufrishajtinkupis, “paypis llakisqallataj kasharqa” (Isa. 63:9). Jehovaqa mancharisqa kashajtinchej sumajta entiendewanchej, maytataj yanapayta munawanchej chay manchachikuyninchejta atipanapaj.

10. ¿Imaynatá yachanki Jehová qanmanta llakikusqanta, yanapasunanpajtaj chaypipuni kananta?

¹⁰ Ichapis uj llakiypi rikukushanchej, chaytaj  manchachiwanchej. Chayrayku mana reparayta atillasunmanchu imaynatachus Jehová yanapashawasqanchejta. Jina kajtin, ¿imatá ruwasunman? Jehovamanta mañakuna imatachus pay noqanchejrayku ruwashasqanta reparachinawanchejpaj (2 Rey. 6:15-17). Chaymantataj kaypi piensarina: ¿Kallpachawarqanchejchu tantakuypi uj discursota chayri uj comentariota uyarisqanchej? ¿Kallpachawarqanchejchu uj publicacionta leeriy, uj videota qhawariy, chayri uj takiyta uyariy? ¿Uj hermano sonqochariwarqanchejchu uj textowan chayri uj mashkha simita nispa? Hermanosninchej munakuwasqanchej, Diospa Palabran kallpachawasqanchejpis Jehovamanta may sumaj regalos kanku. Wakin kutitaj chaymanta qonqakusunman (Isa. 65:13; Mar. 10:29, 30). Chay regalosqa sutʼita rikuchiwanchej Jehová noqanchejmanta llakikusqanta, atienekunapaj jinataj kasqanta (Isa. 49:14-16).

11. ¿Imataj Aidata yanaparqa manchikuyninta atipananpaj?

¹¹ Senegalmanta Aida sutiyoj hermananchej may llakiypi rikukusharqa, repararqataj imaynatachus Jehová yanapashasqanta. Kuraj wawa kasqanrayku tatasnenqa munarqanku ashkha qolqeta ganananta, paykunata cuidananpajwan. Jinapis payqa precursora kayta munaspa, kapusqallanwanña kausakunanta nerqa. Chayraykutaj may pisi qolqellataña ganarqa. Chaynejta familianqa paywan phiñakorqanku, tukuy imatataj nej kanku. Aida nin imaynachus sientekusqanta: “Manchachikorqani tatasniyta mana yanapayta atinaymanta, tukuytaj qhesachanawankumanta. Jehovata juchacharqani ajinapi rikukushasqaymanta”, nispa. Jinapis uj pʼunchay uj discursota uyarerqa, chaytaj mayta yanaparqa. Pay nin: “Chay hermanoqa yuyarichiwarqayku, Jehovaqa sumajta yachasqanta ima llakiykunachus sonqonchejpi kashasqanta. Chantapis ancianos, waj hermanospis yuyarichiwarqanku Jehová mayta munakuwasqanta, pisimanta pisitaj niña ancha llakisqachu kasharqani. Jehovaman orakuspa astawan atienekorqani pay yanapanawanpi. Imaynatachus kutichiwasqanta reparaspataj sonqo tiyasqa karqani”, nispa. Tiempowanqa uj trabajota tarikorqa. Chaytaj mana precursora kanallanpajchu yanaparqa, manachayqa tatasninta, waj runastapis qolqesitunwan yanapananpaj. Pay nin: “Yachakuni Jehovapi tukuy  sonqo atienekuyta. Orakoyqa yanapawan manaña manchachikunaypaj”, nispa.

¿IMATÁ JEHOVÁ QHEPAMAN RUWANQA?

12. Salmo 56:9 nisqanman jina, ¿imatataj David sutʼita yacharqa?

¹² (Salmo 56:9 leey). Kay versiculoqa rikuchillawanchejtaj, imatawanchus David ruwasqanta wañuy patapi kashajtin manchikuyninta atipananpaj. Payqa imatachus Jehová aswan qhepaman ruwananpi tʼukurerqa. Yacharqa Jehová maychus tiemponpi salvananta. Jehovaqa Davidman nisqaña Israelpa reynin kananta (1 Sam. 16:1, 13). Davidqa yachallarqataj Jehovaqa chay nisqanta juntʼanantapuni, mana qhasitachu imatapis parlasqanrayku.

13. ¿Imatataj Jehová paraisopi ruwanqa?

¹³ Noqanchejmanrí, ¿imata ruwanantataj Dios niwanchej? Payqa mana niwanchejchu, kay tiempopi ni ima problemayoj kausakunanchejta. c Chaywanpis kay tiempopi ima pasawajtinchejpis, Jehovaqa niwanchejña paraisopi tukuy problemasninchejta chinkachinanta (Isa. 25:7-9). Chantapis Diosninchejqa may atiyniyoj wañusqasta kausarichinanpaj, jampinawanchejpaj, tukuy enemigosninchejtapis chinkachinanpaj (1 Juan 4:4).

14. ¿Imapitaj tʼukurisunman?

¹⁴ Manchachikunchej chayqa, imatachus Jehová aswan qhepaman ruwananpi tʼukurina. Piensarina imaynachus kausayninchej kananpi Satanás manaña kajtin, sajra runas chinkajtinku, kʼacha runasllaña kajtinku, pisimanta pisitaj mana pantaj runasman tukojtinchej. 2014 watapi kinsa pʼunchaypaj jatun tantakuypi uj rikuchiy karqa, chaytaj yanapawasunman suyakuyninchejpi tʼukurinapaj. Chay rikuchiypi uj hermano familianwan parlarerqa 2 Timoteo 3:1-5 versiculospi imatachus ninanmanta sichus paraisopaj uj profecía kanman chayqa. Chaypi ninman: “Paraisopeqa kausay may kusiy kanqa. Runasqa mana paykunallatachu munakonqanku, mana qolqeta munakonqankuchu, mana alaracoschu kanqanku, mana jatunchakonqankuchu, mana Diospa contranta, ni wajkunaj contrantapis sajrata rimanqankuchu, tatasninkuta kasukonqanku, agradecekuyta yachanqanku, mana wasanchajkunachu kanqanku, familiankuta mayta munakonqanku, uj yuyayllaman chayanqanku, wajkunamanta allintapuni parlanqanku, mana munayninkuwan atipachikonqankuchu, mana phiñakonqankuchu, allin kajta munakonqanku, mana amigosninkoj contranpi sayaykonqankuchu, kasukojkuna kanqanku, mana runaykachanqankuchu, munaynillankuta ruwanankumantataj Diospa munayninta ruwanqanku, Diosta tukuy sonqo yupaychanqanku. Paykunamantaqa amapuni karunchakuychu”. ¿Familiaresninchejwan, chayri hermanosninchejwan parlariyta yachanchejchu imaynachus paraisopi kausay kananmanta?

15. ¿Imataj Tanjata yanaparqa manchikuyninta atipananpaj?

¹⁵ Macedonia del Nortemanta Tanja sutiyoj uj hermanitanchej manchachikuyninta atiparqa Jehovaj nisqasninpi piensarisqanrayku. Bibliata estudiayta qallarejtin, tatasnenqa maytapuni phiñakorqanku. Pay nin: “Manchachikorqani mamay maqanawanmanta, ajinapunitaj karqa. Sapa reunionmanta kutejtiy maqawajpuni. Tatasneyqa niwarqanku Jehovaj testigonman tukojtiy wañuchinawankuta”, nispa. Hermananchejtaqa wasinmanta wijchʼorqanku. ¿Imatá pay ruwarqa? Pay nin: “Piensarerqani Jehovata tukuy sonqo kasukojteyqa, wiñay wiñaypaj kusisqa kausakunayta. Nikoj kani kay tiempopi imata pierdejtiypis, paraisopeqa Jehová may chhikatawanraj kutichipunawanta, tukuy llakiyniytataj qonqachinawanta”, nispa. Tanjaqa Jehovamanta manapuni karunchakorqachu, yanapayninwantaj uj wasisituta tarikorqa. Kunantaj  uj sumaj hermanowan casarasqa kashan, khuskataj tiempo juntʼasqata Jehovapaj llankʼashanku.

KUNANÑA YACHAKUNA JEHOVAPI ASTAWAN ATIENEKUYTA

16. Lucas 21:26-28 nisqan juntʼakojtin, ¿imataj yanapawasun mana manchachikunapaj?

¹⁶ Manchay ñakʼariy tiempopeqa casi tukuy runas “manchariywan wijchʼukonqanku”. Diospa kamachisnintajrí mana manchachikusunchu, sinchʼi sayasqallapunitaj kasunchej (Lucas 21:26-28 leey). ¿Imarayku? Jehovapi atienekuytaña yachakusqanchejrayku. Tanja nin ñaupa tiempopi imaspichus rikukusqanqa, waj imaspi rikukojtin yanapasqanta. Pay nin: “Yachakuni ima llakiypi rikukojtinchejpis Jehovaqa yanapawasqanchejtapuni, bendeciwasqanchejtataj. Wakin kuteqa yuyasunman runasqa tukuy imata ruwayta atisqankuta, chaywanpis imatachus Jehová ruwanankuta saqen chayllata ruwayta atinku. Uj prueba may jina sinchʼi kajtinpis, tukukonqapuni”, nispa.

17. ¿Imaynatá 2024 watapaj texto yanapawasun? (Tapapi fotota qhawariy).

¹⁷ Kay mundopi imaymana mancharinas kajtinpis, noqanchejqa David jina kanchej, manataj manchachikuyninchejwan atipachikunchejchu. 2024 watapaj textoqa imatachus David Jehovaman nisqan kashan. Pay nerqa: “Manchachikuspaqa, qanpi atienekuni Diosníy”, nispa (Sal. 56:3). Bibliamanta uj sutʼinchaj libro kay versiculomanta kayta nerqa: “Davidqa mana imaschus mancharichin chaykunasllapichu yuyashan chayri problemasnillanpichu. Astawanqa pichus salvayta atin chaypi atienekushan”, nispa. Kay qhepan killaspi kay watapaj textota yuyarikunallapuni, astawanraj llakiykunapi rikukuspa. Tiempocharikuna tʼukurinapaj imatachus Jehová ñaupajta ruwasqanpi, imatachus kunan ruwashasqanpi, imatachus qhepaman ruwananpipis. Ajinamanta David jina nisun: “Diospi atienekuni, mana manchachikunichu”, nispa (Sal. 56:4).