1. ¿Imanirtan höraqa mantsapakushwan?

 HÖRA HÖRAQA llapantsikmi mantsapakuntsik. Bibliachö yachakushqa karmi wanushqakunata, demoniukunata o shamoq tiempuchö imakuna pasakunampaq kaqtaqa mantsantsiktsu. Tsënö kaptimpis, kë ushanan tiempukunachö ‘imëka espantëpaqkuna’ pasakuptin o guërrakuna, imëka mana allikuna kaptin y qeshyakuna kaptinmi höraqa mantsapakuntsik (Lüc. 21:11). Capazchi Diosnintsikta sirwinata michämaqnintsik gobiernukunata, familiantsikkunata y wakin nunakunata mantsashwan. Y wakinkunanam pasëkäyanqan pruëbata mana aguantayänampaq kaqta pensayan o wakinkunanam shamoq tiempuchö mana allikunapa pasarnin mana aguantayänampaq kaqta pensar mantsapakuyan.

2. ¿Imatan pasakurqan Gat markaman David chäriptin?

² Diospa sirweqnin Davidpis höraqa mantsapakurqanmi. Pëqa gobernanti Saul wanutsita munaptinmi, filisteukunapa Gat markanta qeshpir ëwakurqan. Y tsëchöqa Davidpaqmi gobernaq Akista willayarqan, pelyëta yachaq nuna kanqanta y ‘diez milpitapis’ mas filisteukunata wanutsishqa kanqanta. Tsënam Davidqa wanutsinanta pensar ‘alläpa mantsapakurqan’ (1 Sam. 21:10-12). Peru ¿imatataq rurarqan mana mantsapakunampaq?

3. Salmus 56:1 a 3 y 11 ninqannö, ¿piman confiakunqantan Davidta yanaparqan mana mantsapakunampaq?

³ Salmus librupa 56 kaq capïtulunchömi David willakun, Gat markachö këkar alläpa mantsapakunqanta, peru Jehoväman confiakunqan yanapanqanta (leyi Salmus 56:1-3, 11). Jehoväman confiakunqanqa allim karqan. Jehovä yanapaptinmi Davidqa pensarirqan löcu tukunampaq, tsëmi Akispa puntanchö löcunö portakurqan. Tsënam Akisqa chikeqnintanö Davidta  rikänampa rantin, löcu kanqanta pensar ëwakunampaq qarqurirqan, y Davidqa jinan höram qeshpir ëwakurqan (1 Sam. 21:13–22:1).

4. ¿Imatataq rurashwan Jehoväman maslla confiakunapaq? Juk igualatsikuywan willakaramuy.

⁴ Jehoväman confiakunqantsikqa noqantsiktapis mana mantsapakunapaqmi yanapamäshun. Peru ¿imatataq rurashwan Jehoväman maslla confiakunapaq? Këllaman pensarishun: juk doctor niramashwan alläpa grävi qeshyayoq kanqantsikta, tsëqa capazchi mantsakashwan. Peru juk alli doctor atiendimashqaqa mas tranquïlunam sientikushwan. Capazchi tsë doctorqa tsënö qeshyawan qeshyaqkunata yanapashqana. Y pacienciawan wiyamashqa y imanö sientikunqantsikta entiendimashqaqa, mas tranquïlunam sientikushwan. Capazchi nimashwan wakin nunakunata recetanqan jampikunata noqantsiktapis recetamänapaq kaqta. Tsënöllam Jehoväwampis pasan, pëqa unëpis y kanampis imëkatam noqantsikpaq ruramushqa y shamoq tiempuchöpis imëkatam ruramunqa, tsëta musyanqantsikmi mas tranquïlu sientikunapaq yanapamantsik. Tsënö David confiakunqantam Salmus 56 kaq capïtulunta leyirnin entiendintsik. Tsë capïtuluta yachakuykarnin pensashun Jehoväman maslla confiakunapaq y mana mantsapakunapaq imakunata ruranantsikpaq kaqta.

JEHOVÄ RURANQANKUNAMAN PENSASHUN

5. ¿Imakunaman pensanqantan Davidta yanaparqan mana mantsapakunampaq? (Salmus 56:12, 13).

⁵ Vïdan peligruchö këkaptimpis, Davidqa Jehovä Diosnintsik unë ruranqankunamanmi yarparaq (leyi Salmus 56:12, 13). Tsëmanmi Davidqa imëpis yarparaq. Këllaman pensarishun: Jehovä Diosnintsik llapan kamanqankunamanmi alli pensaq, y tsëkunam yarpätseq Jehoväqa poderösu kanqanta y nunakunata kuyanqanta (Sal. 65:6-9). Tsënöllam pensaq, wakin nunakunata imanö yanapashqa kanqanta (Sal. 31:19; 37:25, 26). Y masqa yarparaq pëpaq Jehovä ruranqankunamanmi, hasta llullu kanqampita imanö cuidanqanmanmi (Sal. 22:9, 10). Tsënö pensanqanmi yanaparqan llapan shonqunwan Jehoväman confiakunampaq.

6. Mantsapakunqantsik hörakuna, ¿imata ruranqantsikraq yanapamäshun Jehoväman maslla confiakunapaq?

 ⁶ Mantsapakurninqa, kënö tapukuy: “¿Imatataq Jehovä unë witsan rurashqa?”. Kamanqankunaman pensanqëkim yanapashunki. Këllaman pensarishun: Diosnintsikqa manam pishqukunata ni wëtakunatapis kikin niraqtatsu kamashqa, tsënö kaptimpis cuidanmi. Tsëqa, ¿manatsuraq noqantsiktanäqa masraq cuidamäshun? (Mat. 6:25-32). Tsënöllam pensanëki, sirweqninkunata Jehovä imanö yanapanqanman. Tsëpaqqa unë sirweqninkunata imanö yanapanqanta y kanan witsan sirweqninkunata yanapanqantam leyinëki. a Tsënöllam pensanëki kananyaq imanö cuidëkäshunqëkiman. ¿Imanötan Jehoväqa yanapashurqunki sirweqnin kanëkipaq? (Juan 6:44). ¿Imanötan mañakunqëkita contestamushqa? (1 Juan 5:14). ¿Imanötan cada junaq yanapashunki kuyë Tsurinta wanunanta permitinqan? (Efes. 1:7; Heb. 4:14-16).

7. ¿Imanötan panintsik Vanëssata yanaparqan Diospa willakoqnin Daniel pasanqan?

⁷ Haitï nacionpita Vanëssa b jutiyoq panintsikta pasanqanta rikärishun. Pëtaqa juk nunash pëwan patsäkuyta munar cada junaq qayaq y mensäjita mandaq. Panintsik “manam” niptinshi, tsë nunaqa masraq amenazaq y maqëta munaq. Panintsik Vanëssaqa mantsapakurqanmi, peru ¿imatataq rurarqan? Tsë nunapita cuidakunampaqmi imëkata rurarqan y juk anciänum yanaparqan autoridäkunaman ëwanampaq. Tsënöllam Vanëssaqa yarparqan Diospa sirweqninkuna imakunapa pasayanqanta. Vanëssam kënö nin: “Puntataqa yarpärirqä Danielta pasanqantam. Pëqa manam ima mana allitapis rurashqatsu karqan, tsënö kaptimpis, mallaqashqa leonkunamanmi jitarkuyarqan, peru Jehovämi salvarqan. Noqapis Jehovätam willarqä, cuidakunäpaq imëkata rurëkanqäta y yanapëkamänampaqmi mañakurqä. Y tsëpitaqa mananam mantsapakurqänatsu” (Dan. 6:12-22).

KANAN WITSAN JEHOVÄ RURËKANQANMAN PENSASHUN

8. ¿Imapitataq Davidqa següru këkarqan? (Salmus 56:8).

⁸ Gat markachö vïdan peligruchö këkaptimpis, Davidqa manam mantsapakurllatsu kakurqan. Tsëpa rantinqa, tsë tiempuchö Jehovä imanö yanapëkanqanmanmi pensarqan. Clärum rikarqan Jehovä yanapëkanqanta, cuidëkanqanta y imanö sientikunqanta cuentachö katsinqanta (leyi Salmus 56:8). Tsënöllam, kuyë amïgun Jonatan y sacerdötikunapa mandaqnin Ahimëlec yanapayarqan (1 Sam. 20:41, 42; 21:6, 8, 9). Gobernanti Saul wanutsita munëkaptimpis, Davidqa qeshpirmi ëwakurqan. Tsëmi Davidqa següru këkarqan llapan pasëkanqankunata Jehovä musyanqanta y imanö sientikunqanta cuentachö katsinqanta.

9. ¿Imakunapa pasanqantsiktataq Jehovä altantu këkan?

⁹ Mana allikunapa pasarnin mantsakashqa këkarqa, yarpänëkim pasëkanqëkita Jehovä musyanqanta y imanö sientikunqëkita cuentachö katsinqanta. Këllaman pensarishun: Egiptuchö sirweqninkuna imëka mana allikunapa pasayaptinmi, Jehoväqa “imanö sufrikäyanqanta” musyarqan (Ex. 3:7). Tsënöllam Davidpis nirqan sufrikanqanta Jehovä musyanqanta (Sal. 31:7). Y mana allita decidiyanqampita sirweqninkuna sufriyaptimpis Jehoväqa llakikurqanmi (Is. 63:9). ¿Manaku tsëta  musyanqantsikqa yanapamantsik mantsakunqantsik hörakuna Jehovä yanapamänapaq kaqman y imanö sientikunqantsikta musyanqanman confiakunapaq?

10. ¿Imanirtan següru këkanki qampaq Jehovä yarpachakunqanta y yanapashunëkipaq listu këkanqanta?

¹⁰ Mana allikunapa pasarnin yarpachakunqantsik hörakunaqa, capaz Jehovä yanapëkämanqantsikta cuentata qokushuntsu. Tsëqa, ¿imataraq rurashwan? Jehovätam mañakunantsik imanö yanapëkämanqantsikta musyanapaq (2 Rëy. 6:15-17). Tsëpitam kënö pensanantsik: “¿Ima discursutan o reunionchö imata parlakayämunqantan yanapamashqa? ¿Ima publicacionta leyinqä o ima videuta rikanqä o canciontan yanapamashqa? ¿Mëqan wawqillapis animamarnin juk textuta leyipämashqaku o shumaqku parlapäramashqa?”. Mana allikunapa pasanqantsik hörakunaqa, fäcil-llam qonqarishwan Jehovä kuyamanqantsikta y wawqi panikunawan kuyamarnintsik yanapëkämanqantsikta (Is. 65:13; Mar. 10:29, 30). Tsëkunawanmi Jehoväqa rikätsimantsik kuyamanqantsikta y pëman confiakunantsikta shuyaranqanta (Is. 49:14-16).

11. ¿Imatan panintsik Aidata yanaparqan mana mantsapakunampaq?

¹¹ Senegal nacionpita Aida jutiyoq panintsik pasanqanta rikärishun. Pëqa imëka mana allikunapam pasarqan y Jehovä imanö yanapëkanqantam cuentata qokurqan. Mayor wamra kaptinmi, teytankunaqa shuyaräyaq kikinta mantenikunanta y pëkunatapis manteninanta. Peru Aidaqa precursöra kanampaqmi decidirqan, tsëmi alläpa qellëtaqa ganëta puëdirqantsu. Tsënam familiankunaqa alläpa cölerakuyarqan y pëpaq mana allita parlayarqan. Aidam kënö nin: “Teytäkunata yanapëta mana puëdinäpaq kaqta musyarmi mana alli sientikurqä y wakinkunapis mana kuyayämänampaq kaqta pensarmi yarpachakurqä. Hasta mana allikunapa pasanäta Jehovä permitikanqanta pensarmi Jehoväta culpatsarqä”. Peru panintsik Aidataqa juk discursuchö wiyanqanmi yanaparqan, kënömi nin: “Yachatsikamoq turiqa yarpätsikamurqan, shonqükunachö imanö sientikuyanqäta Jehovä musyanqantam. Tsënöllam anciänukuna y wakin turikunapis entienditsiyämarqan Jehovä kuyamanqanta, tsëmi ichikllapa  ichikllapa alli sientikur qallëkurqä. Jehovämanmi llapan shonqüwan mañakurqä y imanö contestamanqanta rikarmi mas allina sientikurqä”. Panintsik Aidaqa, tiempuwanqa alli trabäjutam tarirqan, tsëmi yanaparqan precursöra kanampaq y teytankunatapis yanapanampaq. Kënömi nin: “Kananqa Jehoväman llapan shonqüwan confiakunäpaqmi yachakurqö. Imatapis yarpachakurqa, Jehovämanmi mañakü y mananam mantsapakünatsu”.

SHAMOQ TIEMPUCHÖ JEHOVÄ RURAMUNAMPAQ KAQMAN PENSASHUN

12. Salmus 56:9 ninqannö, ¿imapitataq Davidqa següru karqan?

¹² (Leyi Salmus 56:9). ¿Imatataq David rurarqan vïdan peligruchö kaptin? Kë versïculuchöqa willakun, Jehovä Diosnintsik pëpaq ruranampaq kaqman pensanqantam. Davidqa musyarqanmi Israelchö gobernanti kanampaq Jehovä akrashqa kanqanta, tsëmi següru këkarqan salvanampaq kaqta (1 Sam. 16:1, 13). Tsënöllam Davidqa següru karqan, parlanqantaqa Jehovä imëpis cumplinqanta.

13. ¿Shamoq tiempuchö Jehovä imata ruramunampaq kaqtataq musyantsik?

¹³ ¿Imatataq Jehovä änimarquntsik? Jehoväqa manam kanan tiempu manana sufrirnin kawanapaqtsu änimarquntsik. c Tsënö kaptimpis, imëka problëmantsikkunata shamoq tiempuchö ushakätsinampaq kaqtaqa änimarquntsikmi (Is. 25:7-9). Y segürum këkantsik wanushqakunata kawaritsimunampaq, qeshyëkaqkunata alliyätsinampaq y chikimaqnintsikkunata ushakätsinampaq poderyoq kanqanta (1 Juan 4:4).

14. ¿Imakunamantan pensashwan?

¹⁴ Imapitapis mantsapakurqa, shamoq tiempuchö Jehovä ruramunampaq kaqkunaman pensë. ¿Imanöraq vïda kanqa llapan nunakunapis allilla kayaptin, jutsasapa kënintsikpis ichikllapa ichikllapa ushakäriptin y Diablupis y mana alli nunakunapis manana kayaptin? 2014 watachö rurakaq jatun asamblëachömi rikarqantsik tsë tiempuchö vïda imanö kanampaq kaqta. Juk wawqim familianwan parlayarqan 2 Timoteu 3:1 a 5 versïculukuna tsë witsanchö imanö ninampaq kaqta. Kënömi niyarqan: “Shumaq Patsachöqa alläpa alli tiempukunam kanqa. Nunakunam kayanqa kuyakoq, mana allish tukoq, humildi, Diosta respetaq, papäninkunata cäsukoq, agradecikoq, mana dejakoq, acuerduman chëta yachaq, familiankunata kuyaq, wakinkunapaq allita parlaq, mana calumniakoq, controlakuyta yachaq, alli kaqta kuyaq, mana traicionakoq, mana orgullösu, Teyta Diosta kuyaq y adoraq. Pëkunapitaqa ama rakikëtsu”. ¿Shumaq Patsachö vïda imanö kanampaq kaqpita familiëkikunawan y amïguykikunawan parlë gustashunkiku?

15. ¿Imatan panintsik Tanjata yanaparqan mana mantsapakunampaq?

¹⁵ Macedonia del Norti nacionpita Tanja jutiyoq panintsikta pasanqanta rikärishun. Pëqa mantsapakuykarpis Jehovämanmi confiakurqan. Panintsik Tanjaqa cuentakun Bibliata estudiar qallëkuptin familian alläpa cölerakunqantam, kënömi nin: “Mas mantsanqä kaqran pasakurqan. Teytäkunaqa niyämarqan Jehoväpa testïgun kaptïqa wanutsiyämanampaq kaqtam y mamänïqa cada reunionpita chaptïmi maqamaq”. Panintsik Tanjataqa wayipitam qarquriyarqan. Peru ¿imatataq rurarqan? Panintsikmi kënö nin: “Jehoväta mana dejëpa sirwiptïqa, imëyaqpis kushishqa kanäpaq bendicimänampaq kaqmanmi pensaq kä. Kë vïdachö imëkata oqraptïpis, Shumaq Patsachöqa Jehovä bendicimänampaq kaqta y imëkapa pasanqäkunatapis qonqarinäpaq kaqtam seguïdu pensarqä”. Panintsik Tanjaqa Jehovätam mana  dejëpa sirwirqan, y pë bendiciptinmi täkunampaq wayin tarirqan. Kananqa Jehoväta kuyaq wawqiwanmi casakushqa y ishkankunam llapan tiempunkunawan yanapakuyan.

KANANLLAPITANA JEHOVÄMAN CONFIAKUYTA YACHAKUSHUN

16. Lücas 21:26 a 28 textukunachö ninqan pasakuptin, ¿imaraq yanapamäshun valienti kanapaq?

¹⁶ Alläpa sufrimientu witsanqa, mëtsikaq nunakunam “mantsakar [...] desmayayanqa”. Peru Jehoväpa sirweqninkunaqa valientim kashun y manam mantsakushuntsu (leyi Lücas 21:26-28). ¿Imanirtan mantsakushuntsu? Jehoväman confiakuyta yachakushqa karmi. Tsëmi panintsik Tanjatapis yanaparqan. Pëtaqa puntata alli tsarakunqanmi yanaparqan, mana allikunapa pasanqan hörakuna alli tsarakunampaq. Kënömi nin: “Clärum rikarqö mana allikunapa pasanqantsik hörakunapis Jehovä yanapëkämanqantsikta y mana dejamanqantsikta. Höraqa capaz pensashwan nunakuna mas puëdeq kayanqanta, peru tsëqa manam rasumpatsu. Pëkunaqa imatapis ruramënintsikta puëdiyan Jehovä permitinqanyaqllam. Y mana allikunapa pasanqantsikqa tiempuyoqllam y ushakärinllam”.

17. ¿Imanöraq yanapamäshun 2024 watapaq akrayämunqan textu? (Rikäri jana qaranchö këkaq fötuta).

¹⁷ Kë tiempuchö imëka mantsëpaqkuna pasakuptimpis, noqantsikqa Davidnömi mantsakänantsiktsu. 2024 watapaq textuchömi Jehovä Diosnintsikta David kënö nirqan: “Pëkunata mantsarmi qamman confiakamü Teyta Dios” (Sal. 56:3). Bibliapaq parlaq juk librum tsë versïculupaq kënö nin: “Davidqa manam mantsanqanman o problëmankunallaman yarparäkurtsu kakurqan, tsëpa rantinqa Salvaqninmanmi masqa confiakurqan”. Tsëmi qampis kë watapaq textuman shamoq killakunachö pensanëki. Y masqa mana allikunapa pasanqëki hörakunam yarpänëki unë witsanchö Jehovä ruranqankunaman, kanan witsan rurëkanqanman y shamoq tiempuchö ruranampaq kaqman. Tsënöpam gobernanti Davidnöpis kënö ninki: “Noqaqa Teyta Diosmanmi confiakü [...]. Manam pitapis mantsätsu” (Sal. 56:4).