1. Eaa tatou ka mataku ei i tetai taime?

 KA MATAKU te katoatoa i tetai au taime. Inara kua kite mai tatou i ta te Pipiria e apii ra, e no reira kare tatou e mataku i te mate, te au temoni e te ka tupu ki te tangata a te tuatau ki mua. Noatu ra, te noo nei rai tatou i te tuatau “rikarika,” te tamaki, te takinokino anga, e te maki. (Luka 21:11) Ka mataku katoa tatou i te tangata, te kavamani e te kopu tangata me patoi mai ratou ia tatou. Ka manata tetai pae akapeea me akakoromaki i te timataanga i teianei e a te tuatau ki mua.

2. Akamārama i to Davida turanga iaia e noo ra i Gata.

² Kua mataku ana a Davida. Kua inangaro te Ariki ko Saula i te tamate iaia, no reira kua oro a Davida ki te oire o Gata i Philiseti. Kua kite te Ariki ko Akisa o Gata, e ko Davida te tumutoa tei tamate atu i te tai ngauru tauatini Philiseti. No reira, kua “mataku rava akera” a Davida. (1 Samu. 21:​10-12) Kua manata aia i ta Akisa ka rave kiaia. Eaa tei tauturu ia Davida kia ngakau toa?

3. Ia Salamo 56:​1-3, 11, akapeea a Davida te autu anga i tona tu mataku?

³ Ia Salamo 56, kua akakite a Davida i tei tupu kiaia i Gata. Akataka mai tera salamo i to Davida tu mataku, e akapeea aia i te autu anga i te reira. Te mataku anga aia,  kua irinaki aia kia Iehova. (E tatau ia Salamo 56:​1-3, 11.) Ma te tauturu a Iehova, kua rave a Davida i tetai ikianga karape: Kua akariro aia iaia uaorai ei tangata neneva! Kua taui a Akisa i tona manako no te tamate atu ia Davida, e kua ora mai a Davida.—1 Samu. 21:13–22:1.

4. Akapeea tatou me akaketaketa i to tatou irinaki ia Iehova? Akatutu mai.

⁴ Ka autu katoa tatou i te tu mataku me irinaki tatou ia Iehova. Inara akapeea tatou me akaketaketa i te reira? Akamanako ana i teia akatutuanga. Me kite koe e maki toou, ka tupu te mataku. Inara, me irinaki koe i toou taote ka marū mai koe. Penei e maata tana aronga maki i rapakau ana e kua ora mai. Kua akarongo meitaki aia kia koe e kua mārama i toou turanga. E oti ka akakite mai aia i tetai ravenga rapakau tei tauturu ana i tetai ke. Pera katoa, ka ketaketa to tatou irinaki ia Iehova na te akamanako anga i tana i rave i mua ana, i teianei, e a te tuatau ki mua. Ko ta Davida tera i rave. Ia tatou e uriuri ra i tana au tuatua ia Salamo 56, e akamanako akapeea koe me akaketaketa i toou irinaki ia Iehova e kia vai maru ua.

EAA TA IEHOVA I RAVE I MUA ANA?

5. Eaa ta Davida i akamanako kia kore aia e mataku? (Salamo 56:​12, 13)

⁵ Noatu te au tumatetenga, kua akamou a Davida ki runga i ta Iehova i rave i mua ana. (E tatau ia Salamo 56:​12, 13.) Kua rave ua rai a Davida i te reira i tona oraanga katoa. Ei akaraanga, kua akamanako aia i ta Iehova au mea i anga, e kua maara iaia to Iehova mana ririnui e tona aroa maata i te tangata. (Sala. 65:​6-9) Kua akamanako katoa a Davida i ta Iehova i rave no etai ke e nona uaorai. (Sala. 31:19; 37:​25, 26) Kua paruru e kua tauturu a Iehova ia Davida mei tona meangiti anga. (Sala. 22:​9, 10) Na te akamanako anga i teia au tupu anga, kua ketaketa roa atu to Davida irinaki ia Iehova!

6. Me mataku tatou, eaa te ka tauturu ia tatou kia irinaki ia Iehova?

 ⁶ Me mataku koe, e ui kia koe uaorai, ‘Eaa ta Iehova i rave ana i mua ana?’ Akamanako ana i tana au mea i anga. “Ka akara na” akapeea a Iehova me akono i te au manu rere e te tiare. Kare te reira i angaia i tona au tu e kare e rauka i te akamori Iaia. Me ka akonoia te reira e Iehova, eaa ka kore atu ei Aia e akono mai ia tatou! Na te akamanako anga i teia, ka ketaketa atu to tatou irinaki anga iaia. (Mata. 6:​25-32) E akamanako katoa i tana i rave no tona au tavini. Penei te apii ra koe no tetai tangata i roto i te Pipiria tei akaari i te akarongo ketaketa. Me kore ka tatau koe i tetai tupuanga no tetai taeake o teia tuatau. a E akamanako katoa i ta Iehova i rave noou i mua ana. Akapeea aia te akavaitata anga ia koe Kiaia? (Ioa. 6:44) Akapeea aia te pau anga i taau pure? (1 Ioa. 5:14) Akapeea koe te puapinga anga mei te atinga oko o tana Tamaiti akaperepere i te au rā ravarai?—Ephe. 1:7; Ebe. 4:​14-16.

7. Akapeea te akaraanga o Daniela te tauturu anga ia Vanessa kia kore e mataku?

⁷ Kua tupu tetai turanga mataku ki te tuaine ko Vanessa, b i Haiti. Kua māro tetai tangata i te akainangaro iaia na te ringi e te tuku karere kiaia i te au rā. Kua patoi pakari a Vanessa iaia. Tei tupu, kua riri tikai tera tangata e kua tamataku i te rave i te kino kiaia. Karanga a Vanessa: “Kua mataku tikai au.” Eaa tana i rave? Kua kimi aia i te au ravenga no te paruru iaia uaorai. Kua tauturu tetai tangata pakari iaia kia aravei i te aronga mana. Kua akamanako katoa aia akapeea a Iehova te paruru anga i tona au tavini i mua ana. Karanga aia, “Kua akamanako au i te peroveta ko Daniela. Kua tiriaia aia ki roto i te vaarua riona, noatu kare ona apa. Inara kua paruru a Iehova iaia. Pati katoa au e kia akono mai a Iehova iaku. E i muri mai, kare au i mataku akaou ana.”—Dani. 6:​12-22.

EAA TA IEHOVA E RAVE RA I TEIANEI?

8. Eaa ta Davida i irinaki papu? (Salamo 56:8)

⁸ Noatu to Davida turanga kino tikai i Gata, kare aia i mataku ana. Mari ra, kua akamanako aia i ta Iehova e rave ra nona i tera taime. Kua kite a Davida e te arataki ra e te paruru ra a Iehova iaia e kua mārama Aia i tona turanga. (E tatau ia Salamo 56:8.) E au oa tiratiratu tona tei tauturu iaia, ko Ionatana e te Taunga Maata ko Ahimeleka. (1 Samu. 20:​41, 42; 21:​6, 8, 9) E kua ora mai a Davida noatu kua tauta te Ariki ko Saula i te tamate iaia. Papu iaia te kite maira a Iehova i tona au tumatetenga.

9. Eaa ta Iehova e kite maira no tatou tataki tai?

⁹ Me ō koe ki roto i te tumatetenga e me tupu te mataku, e akamaara te kite maira a Iehova i toou turanga. Ei akaraanga, kua kite a Iehova i te takinokinoia anga te ngati Iseraela i Aiphiti e kua “mamae” ratou. (Exo. 3:7) Kua imene a Davida e te kite maira a Iehova i tona “tumatetenga” e tona turanga taitaia. (Sala. 31:7) E me mamae tona iti tangata, noatu e no ratou te apa, kua taitaia maata Aia. (Isa. 63:9) Me mataku  koe, te mārama maira a Iehova i toou turanga e ka tauturu Aia ia koe kia kore e mataku.

10. Eaa te akapapu anga te inangaro maira a Iehova ia koe e ka tauturu ia koe kia akakoromaki?

¹⁰ Me tupu te tumatetenga kia koe, penei ka manako koe kare a Iehova e tauturu mai ia koe. No reira, e pure kia kite koe i tana tauturu. (2 Ari. 6:​15-17) E kia ui kia koe uaorai: Kua akamaroiroi ainei tetai ako me kore pauanga iaku i ko i te uipaanga? Akapeea te au puka, te vitio me kore te imene ou? Kua akamaroiroi ainei tetai taeake ia koe? Kua tatau ainei aia i tetai irava akapumaana? Ka māmā ua i te ngaropoina i te aroa o te au taeake e te akamaroiroianga i roto i te Tuatua a te Atua. Inara, e au apinga aroa te reira no ko mai ia Iehova. (Isa. 65:13; Mare. 10:​29, 30) Te akapapu maira te reira i Tona inangaro noou. (Isa. 49:​14-16) E ka tau koe kia irinaki ua rai Iaia.

11. Eaa tei tauturu ia Aida kia kore e mataku?

¹¹ E akamanako akapeea a Iehova te tauturu anga ia Aida, e tuaine e noo ra i Senegal. No te mea koia te mataiapo, kua irinaki tona nga metua iaia kia akono ia raua i te pae moni e te pae kopapa. Inara te akamāmā anga aia i tona oraanga kia painia, kua iti mai tana moni. Kua riri e kua akakino tona ngutuare tangata iaia. Karanga aia, “Mataku tikai au e kare e rauka iaku i te akono i toku nga metua e ka patoi mai toku ngutuare iaku. No reira kua akaapa au ia Iehova no te kino i toku turanga.” I muri mai, kua akarongo aia i tetai ako i ko i te uipaanga. “Kua akamaara mai te taeake ki te katoatoa e noatu to tatou mamae ngakau, te kite maira a Iehova i te reira. Aere ua rai, kua akapumaanaia au e te aroa o Iehova na roto i te akamaroiroi anga a te aronga pakari e tetai ke. Kua pure au kia Iehova ma te irinaki papu e ka pau mai Aia i taku pure.” Tei tupu, kua rauka tetai ngai angaanga na Aida tei tauturu iaia kia painia e kia akono i tona nga metua e tetai ke. Karanga aia, “Apii mai au kia irinaki pu tikai ia  Iehova. I teianei me pure au, ka ngaro toku tu mataku.”

EAA TA IEHOVA KA RAVE A TE TUATAU KI MUA?

12. Ia Salamo 56:​9, eaa ta Davida i irinaki?

¹² E tatau ia Salamo 56:9. Te akaari maira teia irava i tetai ravenga ke tei tauturu ia Davida kia kore e mataku. Noatu te kino i tona turanga, kua akamanako aia i ta Iehova ka rave nona a te tuatau ki mua. Papu ia Davida e ka akaora a Iehova iaia i te tuatau tau tikai. Kua akakite a Iehova e ka riro mai a Davida ei ariki no Iseraela. (1 Samu. 16:​1, 13) Kua irinaki papu a Davida e ka akatupu rai a Iehova i tana i taputou.

13. Eaa tatou ka irinaki ei ia Iehova?

¹³ Eaa ta Iehova i taputou e ka rave Aia no tatou? Eiaa tatou e manako e ka paruru mai aia ia tatou mei te au manamanata pouroa. c E akamaara noatu te au timataanga ka tupu i teia tuatau, ka takore a Iehova i te reira a te tuatau ki mua. (Isa. 25:​7-9) E mana ririnui to Iehova no te akatu mai i tei mate, te akaora i te maki e te takore atu i te aronga kino.—1 Ioa. 4:4.

14. Eaa ta tatou ka akamanako atu?

¹⁴ Me mataku koe, e akamanako ana i ta Iehova ka rave a te tuatau ki mua. E akamanako ana mei teaa rai te oraanga me takoreia a Satani, me monoia te aronga kino ki te aronga tuatua tika, e me ngaro ke atu to tatou tu ara. I te mataiti 2014, kua akatutu mai te porokaramu o te uruoaanga tapere akapeea tatou me akamou ki runga i to tatou manakonakoanga. Kua uriuri tetai metua tane ki tona pamiri akapeea te irava ia 2 Timoteo 3:​1-5 me tauiia ki te turanga meitaki i roto i te Parataito. Karanga aia: “I roto i te ao ou ka tupu te mataora. Ka riro te tangata ei akaperepere i tetai ke, ei anoano i te au mea pae vaerua, ei tau, ei akaaka, ei akapaapaa i te Atua, ei akarongo ki te metua, ei mareka ua, ei tiratiratu, ei akaperepere i te ngutuare tangata, ei akono i te koreromotu, ei akapaapaa i te aronga memeitaki, te akono meitaki, te maru, ei anoano i te meitaki, ei irinakiia, ei kauraro marie, ei akaaka, ei akono i te Atua kare i te au mea navenave e ei aroa i te Atua; e ariu koe ki taua aronga ra.” E uriuri ana ainei koe ki toou pamiri me kore te au taeake mei teaa rai te tu o te oraanga i te ao ou?

15. Noatu kua mataku a Tanja, eaa tei tauturu iaia?

¹⁵ Akamanako ana i te akaraanga o te tuaine ko Tanja e noo ra i te tua tokerau o Makedonia. Kua patoi tikai tona nga metua iaia no te apii i te Pipiria. Inara na te akamanako anga i ta Iehova ka rave a te tuatau ki mua, kua tauturu te reira iaia kia vai tiratiratu noatu tona mataku. Karanga aia: “Kua tupu te au mea taku i mataku. Kua pāpāia au e toku mami me oki au ki te kainga mei te au uipaanga. Kua tamataku mai toku nga metua e ka tamate raua iaku me riro ake au ei Kite no Iehova.” I muri mai, kua tuaruia a Tanja mei tona kainga. Eaa tana i rave? Karanga aia: “Kua akamanako au i te mataora me vai tiratiratu au. Akamanako katoa au i ta Iehova tutaki i roto i te ao ou no taku ka ngere i teia tuatau. E pera katoa ka ngaropoina iaku te au  mea kino tei tupu kiaku.” Ma te tauturu a Iehova, kua rauka mai tetai ngai noo anga nona. I teia rā, kua akaipoipo aia i tetai taeake tiratiratu e te rave mataora nei raua i te angaanga tamou.

AKAKETAKETA I TOOU IRINAKI I TEIANEI

16. Eaa te ka tauturu ia tatou kia ngakau toa me tupu te totou ia Luka 21:​26-28?

¹⁶ Me tae mai te mate maata, ka mataku te tangata. Inara ka maroiroi e ka ngakau toa ua rai to te Atua iti tangata. (E tatau ia Luka 21:​26-28.) Eaa tatou ka kore ei e mataku? No te mea kua apii takere tatou i te irinaki ia Iehova. Kua karanga a Tanja tei taikuia i mua ana, kua tauturu tei tupu ana kiaia kia autu aia i te au turanga ngatā. “Kite mai au e ka tauturu a Iehova ia tatou me akakoromaki tatou i te au turanga tukeke, e ka akameitaki mai Aia ia tatou. Penei i tetai taime ka akaraanga e na tetai ke e akatere ra i te au mea, inara ko te tika e maata atu to Iehova ririnui i to ratou. E noatu ka ngatā te au timataanga, ka ope rai te reira.”

17. Akapeea te irava mataiti 2024 me tauturu ia tatou? (Akara i te tutu i te kapi mua.)

¹⁷ E mea natura ua kia mataku. Inara mei ia Davida, ka autu tatou i te tu mataku. Ta tatou irava mataiti 2024, ko te pure a Davida kia Iehova: “Kia rokoia au e te mataku ra, ka irinaki au ia koe ra.” (Sala. 56:3) Akakite tetai tangata tata Pipiria no runga i teia irava, “Kare a Davida i akamanako ana i te au mea tei tamataku iaia e tona au manamanata. Mari ra, kua akara aia kia Iehova kia akaora iaia.” E akamanako i teia irava mataiti i te au marama ka aereia mai, e me tupu te au turanga ngatā kia koe. E taporoporo i toou taime no te akamaara i ta Iehova i rave i mua ana, i teianei, e a te tuatau ki mua. E mei ia Davida rai, mea papu ka karanga koe: “Ka irinaki au i te Atua, kare e mataku.”—Sala. 56:4.