1. Соске понекогаш шај те дара?

 СЕКОВА јекх амендар понекогаш дарала. Џанѓола пе, адалеске со проучинаја и Библија амен на дараја таро муле, таро демонија или таро адава со ка случинел пе е манушенцар ки иднина. Ама, амен панда живинаја ко бут пхаре времија хем адалеске шај те даравен амен бут буќа, сар сој о војне, о криминал хем о насвалипа (Лука 21:11). Исто аѓаар, шај дараја таро мануша, сар на пример таро властија кола со прогонинена амен, или некастар тари амари фамилија кова со противинела пе е чачипаске. Несаве секиринена пе башо адава дали ка шај те икљовен ко крајо несаве проблемеа со иси лен акана, или несаве проблемеа со шај ка овел лен ки иднина.

2. Сар осетинѓа пе о Давид кеда сине ки диз Гат?

² О Давид да понекогаш дарала сине. На пример, кеда о цари о Саул мангља те мударел ле, о Давид одлучинѓа те нашел ки јекх филистејско диз, ко Гат. О Ахис, о цари тари акаја диз, сигате дознајнѓа кај о Давид сине адава моќно војнико колеске со сине пишими гили колате со фалинена ле сине кај мударѓа „бут милја“ Филистејцон. Адалеске о Давид „бут дарандило“ (1. Сам. 21:10-12). Дарандило со ка керел леске о Ахис. Со поможинѓа е Давидеске те побединел пли дар?

3. Спрема Псалм 56:1-3, 11, сар о Давид побединѓа пли дар?

³ Ко 56-то Псалм, о Давид пишинѓа сар осетинела пе сине џикоте сине ко Гат. Ко адава псалм ов јасно објаснинѓа соске дарала сине, ама исто аѓаар објаснинѓа со поможинѓа леске те на дарал више. Кеда дарала сине, сине ле доверба ко Јехова. (Читин Псалм 56:1-3, 11.) Адава со сикавѓа доверба на сине џабе. Адалеске со поможинѓа леске о Јехова, о Давид анѓа јекх необично одлука — керѓа пе делино! Хем адава плани  успејнѓа леске. О Ахис на дикхела сине више ко Давид сар јекх опасно мануш, него сар делино колестар со мангела сине те ослободинел пе. Хем аѓаар о Давид шај сине те нашел (1. Сам. 21:13—22:1).

4. Сар шај те бајрара амари доверба ко Јехова? Вакер пример.

⁴ Амен да шај те победина и дар аѓаар со ка овел амен доверба ко Јехова. Ама, сар шај те бајрара амари доверба ко Јехова, посебно кеда дараја? Размислин башо акава пример: Ако дознајнеа кај иси тут несаво насвалипа, ко почеток шај бут ка секирине тут. Ама ако иси тут доверба ко тло доктори, тегани адава ка смиринел тут хари. Ов шај поможинѓа више буте џененге колен со сине лен слична насвалипа. Ов шукар шунела тут џикоте објаснинеа леске тле секирацие хем уверинела тут кај хаљовела сар осетинеа тут. Исто аѓаар, ов шај ка предложинел туке несави терапија која со поможинѓа буте џененге. Слично, амен бајрараја амари доверба ко Јехова аѓаар со размислинаја башо адава со више керѓа аменге, со керела аменге акана хем со ка керел аменге ки иднина. Баш адава керѓа хем о Давид. Џикоте дикхаја несаве таро лафија сој пишиме ко 56-то Псалм, размислин башо адава сар шај ту да те бајраре тли доверба ко Јехова хем те победине тли дар.

СО ВИШЕ КЕРЃА О ЈЕХОВА?

5. Башо со размислинела сине о Давид кеда дарала сине? (Псалм 56:12, 13).

⁵ Иако е Давидескоро живото сине панда ки опасност, ов понадари размислинела сине башо адава со о Јехова више керѓа леске англедер. (Читин Псалм 56:12, 13.) Ов цело пло живото размислинела сине ко асавко начин. На пример, понекогаш размислинела сине башо створиме буќа. Адава сетинкерела ле сине кај о Јехова тано бут моќно хем кај бут мангела е манушен (Пс. 65:6-9). Исто аѓаар, размислинела сине башо адава со керѓа о Јехова е јаверенге (Пс. 31:19; 37:25, 26). Ама најангле, размислинела сине башо адава со о Јехова керѓа више леске лично. О Јехова поможинѓа хем заштитинѓа е Давиде панда кеда сине бебе (Пс. 22:9, 10). Сигурно адалеске со о Давид размислинела сине башо акала буќа, поможинѓа леске те бајрарел пли доверба ко Јехова!

6. Кеда дараја, со ка поможинел аменге те овел амен доверба ко Јехова?

 ⁶ Кеда дараја, пуч тут: „Со о Јехова више керѓа?“ Размислин башо буќа со створинѓа. На пример, кеда внимателно дикхаја сар о Јехова грижинела пе башо чирикља хем башо лулуѓа — кола со нане створиме спрема лескоро лико хем нане лен способност те обожавинен ле — тегани кобор повише ка грижинел пе аменге. Адава со ка размислина башо акала буќа, ка бајрарел панда повише амари доверба ки лесте (Мат. 6:25-32). Исто аѓаар, размислин со керѓа о Јехова башо пле слуге. Шај те проучине баши несави личност тари Библија која со сикавѓа бари вера, или шај те читине несаво искуство таро амаро време. a Освен адава размислин сар о Јехова више грижинѓа пе туке. Сар поможинѓа туке те запознајне ле? (Јован 6:44). Сар одговоринѓа ко тле молитве? (1. Јов. 5:14). Сави корист иси тут секова диве тари жртва лескере мангле Чхавескири? (Еф. 1:7; Евр. 4:14-16).

7. Сар адава со доживинѓа о пророко о Даниел поможинѓа е Ванесаке те побединел пли дар?

⁷ И Ванеса b‚ јекх пхен таро Хаити, аракхлили ки јекх бут опасно ситуација. Јекх мурш таро лакоро тхан јавинела пе сине лаке секова диве хем пишинела лаке сине пораке, керела лаке сине притисок те совел леа. И Ванеса јасно вакерѓа леске кај на мангела те керел адава. Ама, о мануш уло поагресивно хем чак заканинѓа пе кај ка керел лаке нешто. Ој вакерела: „Бут дарандиљум“. Со керѓа и Ванеса те шај те побединел и дар? Ој керѓа са со шај те шај те заштитинел пе. Јекх старешина охрабринѓа ла те пријавинел ле ки полиција. Ама, ој исто аѓаар размислинела сине башо адава сар о Јехова заштитинѓа пле слуген ко пурано време. И Ванеса вакерела: „И прво библиско личност со пели манге ки годи сине о пророко о Даниел. Иако на сине криво, ов сине фрдимо ки јекх дупка коте со сине бут бокхале лавија. Сепак, о Јехова на мукхља ле. Адалеске молинѓум е Јехова ов те лел ко пле васта акава проблеми. Пало адава на дарава сине више“ (Дан. 6:12-22).

СО КЕРЕЛА О ЈЕХОВА АКАНА?

8. Ко со сине уверимо о Давид? (Псалм 56:8).

⁸ Иако о Давид сине ки бари опасност џикоте сине ки диз Гат, ов на мукхља и дар те побединел ле. Наместо адава, ов размислинела сине башо адава со о Јехова ко адава време керѓа леске. Ов шај сине те дикхел сар о Јехова водинела ле хем аракхела ле хем кај хаљовела лескере чувствија. (Читин Псалм 56:8.) Ле исто аѓаар сине ле верна амала, сар со сине о Јонатан хем о првосвештенико о Ахимелех, кола со охрабринѓе ле хем поможинѓе ле (1. Сам. 20:41, 42; 21:6, 8, 9). Хем иако о цари о Саул мангља те мударел ле, о Давид успејнѓа те нашел. Ов сине сигурно кај о Јехова џанела таро со накхела хем сар осетинела пе.

9. Со дикхела о Јехова ко секова јекх амендар?

⁹ Кеда иси тут несаво проблеми колестар со дараја, ма бистре кај о Јехова на само сој свесно башо адава проблеми, него ов исто аѓаар џанела сар осетинеа тут. На пример, о Јехова на само со дикхља кај о Израелција сине мучиме ко Египет, него ов исто аѓаар дикхља „ленгере дукха“ (2. Мој. 3:7). О Давид ки јекх гили вакерѓа кај о Јехова дикхља хем лескири „неволја“ хем о „муке лескере душакере“ (Пс. 31:7). А кеда е Девлескоро народо мучинела пе сине — чак те овел адава  таро ленгере погрешна одлуке — ле дукхала ле сине (Иса. 63:9). Кеда дараја, о Јехова хаљовела сар осетинеа тут хем ов едвај аџикерела те поможинел туке те победине и дар.

10. Соске сиан уверимо кај о Јехова грижинела пе туке хем кај ка поможинел тут те икљове ко крајо било саве проблемеа?

¹⁰ Понекогаш несаво проблеми добором бут даравела амен со нашти те дикха сар о Јехова поможинела амен. Тегани, со шај те кере? Молин ле те поможинел туке те дикхе сар поддржинела тут (2. Цар. 6:15-17). Пало адава размислин: Дали ко состанок зајакнинѓа тут несаво говор или коментари? Дали несави публикација, видеоклипи или несави таро амаре гиља охрабринѓа тут? Дали некој вакерѓа туке несави мисла или читинѓа туке стихо колеа со утешинѓа тут? Локхе шај те мислина аменге кај о мангипе е пхраленгоро хем и духовно храна тано нешто нормално со ваљани те добина. Ама ма те бистра ола тане баре поклонија таро Јехова (Иса. 65:13; Мар. 10:29, 30). Ола тане доказ кај ов грижинела пе аменге (Иса. 49:14-16). Исто аѓаар, ола тане доказ кај о Јехова заслужинела тли доверба.

11. Со поможинѓа е Аидаке те побединел пли дар?

¹¹ И Аида таро Сенегал дикхља сар о Јехова поможинела ла џикоте сине ла проблеми. Адалеске сој тани и најбари таро чхаве, лакере родителија очекујнена сине те заработинел доволно паре те шај те грижинел пе хем песке хем ленге. Ама откеда поедноставинѓа пло живото те шај те овел пионерка, е Аида на сине ла доволно паре. Лакири фамилија сине лаке бут хољами хем критикујнена ла сине башо адава. Ој вакерела: „Дарава сине кај ка нашти те поможинав мле родителенге хем кај сарине ка отфрлинен ман. Чак керѓум е Јехова криво со дозволинѓа те случинен пе манге асавке лошна буќа“. Ама тегани шунѓа јекх говор ко состанок. Ој вакерела: „О говорнико сетинкерѓа амен кај бизи разлика саве ране иси амен ко вило, о Јехова тано свесно баши ленде. Хари похари о советија таро старешине хем таро јавера, поможинѓе манге палем те уверинав ман ко е Јеховаскоро мангипе. Почминѓум те сикавав побари доверба ко мле молитве кај о Јехова ка поможинел манге, хем осетинѓум андруно мир кеда дикхљум сар одговоринѓа ко  мле молитве“. Пало несаво време, и Аида аракхља бути колаја со шај сине те ачхол пионерка хем те поможинел пле родителенге. Ој вакерела: „Сиклиљум те овел ман целосно доверба ко Јехова. Акана откеда молинава ман, бут пути и дар со иси ман нашавѓола“.

СО КА КЕРЕЛ О ЈЕХОВА ПАНДА ХАРИ?

12. Спрема Псалм 56:9, ко со сине уверимо Давид?

¹² Читин Псалм 56:9. Акава стихо откринела со јавер поможинѓа е Давидеске те побединел пли дар. Иако лескоро живото сине панда ки опасност, ов размислинела сине башо адава со о Јехова панда хари ка керел леске. О Давид џанља кај о Јехова ка спасинел ле ко право време. Уствари, о Јехова вакерѓа кај о Давид ка овел о следно цари ко Израел (1. Сам. 16:1, 13). Ко секова ветување таро Јехова, о Давид дикхела сине сар ка пхене више исполнинѓа пе.

13. Сави доверба шај те овел амен ко Јехова?

¹³ Со ветинѓа о Јехова туке те керел? Џанѓола пе, амен на очекујнаја о Јехова те цидел са амаре проблемија. c Сепак, бизи разлика саве проблемеа соочинаја амен ко акава свето, о Јехова ка цидел са адава ко нево свето (Иса. 25:7-9). Амаро Створители тано добором силно со шај те воскреснинел е мулен, те сасљарел амен хем те цидел са амаре душманен (1. Јов. 4:4).

14. Башо со шај те размислина?

¹⁴ Кеда дараја, размислин башо адава со о Јехова ка керел ки иднина. Размислин сар ка осетине тут кеда о Сатана нане више те постојнел, кеда наместо лошна ка живинен само праведна мануша хем кеда и несовршеност секова диве хари по хари ка нашавѓовел. Ко регионално конгрес со икерѓа пе ко 2014 берш, сине сикавдо сар шај те размислина баши амари надеж. Адатхе јекх дад керела лафи пле фамилијаја башо 2. Тимотеј 3:1-5 хем кобор поразлично би овена сине о лафија ако ки ленде сине пророкујмо саво ка овел о живото ко рај. Ов вакерѓа: „Ко нево свето ка овел бут шужо време. Соске о мануша ка манген е јаверен, ка манген о чачипе, ка овен скромна, понизна, ка фалинен е Девле, ка шунен пумаре родителен, ка овен благодарна, верна, ка манген пумаре фамилија, ка овен спремна башо договор, секогаш ка керен шукар лафи башо јавера, ка овел лен самоконтрола, ка овен кротка, ка манген о шукарипа, ка овен доверлива, нане те овен иначие, ка овен понизна, ка манген е Девле а на о задоволствија, ленгере постапке ка сикавен кај дарана таро Девел; хем асавке манушенцар ов паше“. Дали те фамилијаја или те пхраленцар кереа лафи башо адава саво ка овел о живото ко нево свето?

15. Иако и Тања дарала сине, со поможинѓа лаке те побединел пли дар?

¹⁵ Размислин башо искуство јекхе пхењакоро тари Северно Македонија со викинела пе Тања. Лакере родителија бут противинѓе пе лаке кеда почминѓа те проучинел и Библија. Ој вакерела: „Случинѓа пе баш адава со дарава сине кај ка случинел пе. Пало секова состанок ми дај марела ман сине. Ме родителија заканинѓе пе манге кај ка мударен ман ако овава е Јеховаскоро сведоко“. Ко крајо бркинѓе ла кхералдан. Со керѓа и Тања? Ој вакерела: „Размислинава сине башо адава кобор ка овав среќно ки цели вечност ако ачховава верно е Јеховаске. Исто аѓаар размислинава сине башо адава сар о Јехова ка наградинел ман ко нево свето башо са адава со шај ка нашавав ко акава свето. Хем кај са о лошна буќа со случинѓе пе манге ка бистрав лен“. И Тања ачхили верно. Хем о Јехова поможинѓа лаке те аракхел тхан живибаске. Авдиве, и Тања тани женими јекхе верно  пхралеа хем ола радосно служинена ки полновремено служба.

БАЈРАР ТЛИ ДОВЕРБА КО ЈЕХОВА ПАНДА АКАНА

16. Со ка поможинел аменге те ачхова храбра кеда дикхаја о настанија сој пророкујме ко Лука 21:26-28?

¹⁶ Ки бари неволја, бут мануша „ка перен ко несвест тари дар“. Ама е Девлескоро народо ка ачхол цврсто хем храбро. (Читин Лука 21:26-28.) Соске амен нане те дара? Адалеске со ка сикљова те овел амен доверба ко Јехова. И Тања, кола со спомнинѓем ла англедер, вакерела кај адава со доживинѓа англедер поможинѓа лаке те икљовел ко крајо јавере пхаре ситуациенцар. Ој вакерела: „Халиљум кај о Јехова шај те поможинел аменге ки било која ситуација хем чак те керел те овел ки амари корист. Понекогаш шај те дикхјол кај о јавера контролиринена о буќа, ама и реалност тани кај лен иси лен добором контрола кобор со о Јехова дозволинела ленге. Хем кобор те овел пхаро несаво проблеми, ка авел леске крајо“.

17. Сар ка поможинел аменге е бершескоро стихо башо 2024 берш? (Дикх и слика тари насловно страна.)

¹⁷ Авдиве иси бут буќа кола со шај те даравен амен. Ама слично сар о Давид, амен шај те на мукха и дар те контролиринел амен. Е бершескоро стихо башо 2024 берш тано дело тари е Давидескири молитва џи ко Јехова: „Кеда дарава, ки туте иси ман доверба!“ (Пс. 56:3). Јекх библиско изучувачи башо акава стихо вакерѓа: „О Давид на размислинела сине само башо буќа со даравена ле сине или башо пле проблемија, наместо адава ле сине ле доверба околесте со шај те спасинел ле“. Ко следна масекија размислин башо е бершескоро стихо, посебно кеда ка аракхљове ко пхаре ситуацие кола со ка даравен тут. Одвојн туке време те размислине башо адава со керѓа о Јехова англедер, со керела акана хем со ка керел ки иднина. Тегани, слично сар о Давид ту да шај те вакере: „Ко Девел иси ман доверба, нане те дарав“ (Пс. 56:4).