1. Sose šaj podijekh puti te dara?

 SVAKO amendar podijekh puti darala. Naravno, sebepi so đanaja so i Biblija sikavi, amen na daraja ando mule, ando demonija ja ando odova so ađićeri amen ki budućnost. Ama, amen živinaja ko pharo vreme hem odolese šaj te dara ando maribe, ando kriminal hem ando nabormipa (Luka 21:11). Isto ađahar, šaj te dara ando manuša, sar soj tane o vlastija ja amare ćherutne kola protivinena pe amenđe. Šaj te brinina amen da li ka istrajina ko problemi kova isi amen akana ja kova ka ovel amen ki budućnost.

2. Savi hine e Davidesi situacija ki diz Gat?

² O kralj David isto osetinđa dar. Na primer, ked o kralj Saul manglja te mudari le, ov odlučinđa te našel ki diz Gat. Sigate palo odova, o Ahis, kova hine kralj ki odija diz, šunđa soj tano o David moćno ratniko kova mudarđa „desetine hiljada“ Filistejcen. Odolese, o David „but darandilo“ (1. Sam. 21:10-12). Ov brininđa pe so o kralj Ahis akana ka ćerel lese. So pomožinđa e Davidese te pobedini pi dar? Akana ka dikha.

3. Premalo Psalam 56:1-3, 11, sar o David pobedinđa pi dar?

³ O 56. psalam mothovi sar osetinđa pe o David đi hine ko Gat. Amen dikhaja so darandilo, ama isto ađahar hem sar pobedinđa pi dar. Ked darandilo, ov uzdajinđa pe ko Jehova. (Čitin Psalam 56:1-3, 11.) Ov hine le šukar razlog te uzdajini pe ko Jehova. Ki akija situacija, o David  ćerđa diso neobično. Ov ćerđa pe soj tano dilino hem uzi Jehovasi pomoć oleso plan uspinđa. Sebepi odova, o kralj Ahis umesto te mudari le, ov mukhlja le te đal hem ađahar ov našlja (1. Sam. 21:13–22:1).

4. Sar šaj te zorjaćera amaro poverenje ko Jehova? Vaćer jekh primer.

⁴ Amen šaj te pobedina amari dar ako isi amen poverenje ko Jehova. Ama, sar šaj te zorjaćera amaro poverenje ko Jehova, posebno ked daraja? Aće jekh primer. Šaj ozbiljno naborsaljan hem odolese daraja. Ama, ako isi tut poverenje upro to doktori na ka dara odobor. Šaj šunđan so butenđe pomožinđa. Ked vaćereja oleja, ov pažljivo šunela tut hem uverini tut so haljola sar osetineja tut. Šaj dela tut disavi terapija koja već butenđe pomožinđa. Isto ađahar, hem amen šaj te zorjaćera amaro poverenje ko Jehova ako razmislinaja ando odova so ćerđa amenđe, so ćerela akana hem so ka ćerel ki budućnost. Odova isto ćerđa hem o David. Đi razmotrinaja o 56. psalam, razmislin ando odova sar šaj te zorjaćere to poverenje ko Jehova hem te pobedine ti dar.

SO O JEHOVA VEĆ ĆERĐA TUĆE?

5. Sostar o David razmislinđa te šaj te pobedini pi dar? (Psalam 56:12, 13)

⁵ Ked o David hine ki opasnost, ov razmislinđa ando odova so o Jehova već ćerđa lese. (Čitin Psalam 56:12, 13.) Ov uvek trudinđa pe te razmislini odolestar. Podijekh puti razmislinđa ando buća kola o Jehova stvorinđa. Odova setinćerđa le kobor tano o Jehova moćno hem kobor mangela e manušen (Ps. 65:6-9). Isto ađahar, razmislinđa odolestar so o Jehova već ćerđa averenđe (Ps. 31:19; 37:25, 26). A posebno razmislinđa ando odova sar o Jehova olese lično pomožinđa. O Jehova brininđa pe olestar pana ando dive ked bijandilo (Ps. 22:9, 10). Odova so o David razmislinđa ando akala buća, but zorjaćerđa oleso poverenje ko Jehova.

6. So ka pomožini amen te ovel amen poverenje ko Jehova ked daraja?

 ⁶ Ked daraja, puć kokri tut: „So o Jehova već ćerđa maje?“ Razmislin ando odova so stvorinđa. Zapazin sar o Jehova brinini pe ando ćiriklja hem luluđa kola nane stvorime pali olesi slika hem našti te služinen lese. Šaj samo te zamislina kobor pobuter ka brinini pe amendar. Ked razmislinaja odolestar amaro poverenje koro leste ka ovel pana pobaro (Mat. 6:25-32). Isto ađahar, razmislin odolestar sar o Jehova već pomožinđa pe slugenđe. Šaj te proučine disavo primer andi Biblija ja šaj te čitine disavo iskustvo ando Jehovase sluge kotar amaro vreme. a Uzo odova, razmislin sar o Jehova već mothovđa so brinini pe tutar. Sar pomožinđa tuće te penđare o ćaćipe? (Jov. 6:44). Sar odgovorinđa ko te molitve? (1. Jov. 5:14). Sar svako dive pomožini tut odova so dinđa pe Ćhave tuće? (Ef. 1:7; Jevr. 4:14-16).

7. Sar e Daniloso primer pomožinđa e Vanesaće te pobedini pi dar?

⁷ Amari phen, i Vanesa, b kotar Haiti hine la jekh baro problemi. Jekh manuš svako dive vićinđa la ko telefoni, pisinđa laće poruke hem zorjeja manglja olaja te ovel ki veza. I Vanesa jasno phenđa lese so na mangela te ovel ki veza oleja. Sebepi odova, ov but holjanđa hem čak pretinđa laće. Oj phenela: „Tegani but darandiljum.“ Sar uspinđa te pobedini pi dar? Ćerđa sa so šaj te zaštitini pe. Jekh starešina podstakninđa la te vićini i policija. Isto ađahar, razmislinđa sar o Jehova pomožinđa pe slugenđe ko purano vreme. I Vanesa phenela: „I prvo osoba koja ali maje ki godi hine o prorok Danilo. Iako na ćerđa ništa lošno, ov hine fordimo ki lavovsko jama. Ama, o Jehova spasinđa le ađahar so phanlja e lavengo muj. Me ništa aver našti hine te ćerav, osim te molinav man e Jehovase odova manuš više te na mislini mandar. Palo odova, više na darandiljum“ (Dan. 6:12-22).

SO O JEHOVA AKANA ĆERELA TUĆE?

8. Ko so o David hine uverimo? (Psalam 56:8)

⁸ Iako o David hine ki opasno situacija đi hine ki diz Gat, ov na mislinđa ki pi dar. Umesto odova, razmislinđa sar o Jehova pomožini lese ki odija situacija. Tegani o David dikhlja sar o Jehova arakhi le hem so haljola sar osetini pe. (Čitin Psalam 56:8.) Isto ađahar, o Jonatan hem o prvosveštenik Ahimeleh but ohrabrinđe le hem pomožinđe lese (1. Sam. 20:41, 42; 21:6, 8, 9). Iako o kralj Saul manglja te mudari le, ov našlja. O David hine uverimo so o Jehova dikhela kotar sa so nakhela hem sar osetini pe.

9. So o Jehova đanela?

⁹ Ked isi tut disavi kušnja andi koja ukljela tut i dar, ma bistri so o Jehova đanela sova borineja tut hem sar osetineja tut. Na primer, o Jehova na samo so dikhlja sar tane o Izraelcija maltretirime ko Egipat, već dikhlja hem olengi dukh (Iz. 3:7). O David phenđa so o Jehova na dikhlja samo olese pharipa, već hem kobor hine lese pharo (Ps. 31:7). Ked e Devleso narodo patinđa sebepi o lošna odluke kola anđe, ole dukhandilo (Is. 63:9). Ked tu daraja, šaj te ove sigurno so o Jehova haljola sar osetineja tut  hem mangela te pomožini tut te pobedine ti dar.

10. Sose hijan sigurno so o Jehova brinini pe tutar hem so ka pomožini tut te istrajine ko pharipa?

¹⁰ Ked isi amen disavo pharipe, šaj tano amenđe pharo te dikha sar o Jehova pomožini amen. Odolese, molin tut e Jehovase te dikhe sar pomožini tut (2. Kralj. 6:15-17). Palo odova, razmislin ando akala pućiba: „Da li disavo govor ja komentari ko sastanko ohrabrinđa man? Da li disavi publikacija, video ja disavi savremeno đili ohrabrinđa man? Da li neko phenđa maje disavi utešno misao ja stih?“ But tano lokho te bistra sar pomožinđe amen amare phralja hem phenja hem i duhovno hrana. Ama, on tane baro poklon ando Jehova (Is. 65:13; Mar. 10:29, 30). On mothovena so o Jehova brinini pe amendar hem so o Jehova zaslužini te ovel amen poverenje upro leste (Is. 49:14-16).

11. So pomožinđa e Aidaće te pobedini pi dar?

¹¹ I Aida, koja živini ko Senegal, dikhlja sar o Jehova pomožinđa laće ked hine la jekh kušnja. Sebepi soj tani najphureder, olake roditeljija ađićerde olatar te ćerel buti hem te brinini pe pestar hem olendar. Ama, ked odlučinđa te služini sar pionir, morandilji te živini poskromno. Odolese na hine laće lokho te platini sa o troškija. Olaki porodica but holjanđa upro late. Oj phenela: „Darandiljum so na ka šaj te pomožinav me roditeljenđe hem so sare ka vaćeren lošno mandar. Čak, krivinđum e Jehova sebepi odija lošno situacija.“ Ama, palo odova šunđa jekh govor ki dvorana. Oj phenela: „O phral setinćerđa amen so o Jehova đanela sa amare pharipa. Hari pohari, o savetija kola o starešine hem avera dinđe man, pomožinđe maje te haljovav so o Jehova mangela man. Ked molinđum man e Jehovase, hine man pobaro poverenje ko odova so ka pomožini man. Osetinđum mir hem dikhljum sar odgovorini ko me molitve.“ Sar đelo o vreme, i Aida arakhlja buti koja pomožinđa laće hem ponodri te služini sar pioniri hem te pomožini pe porodicaće. Oj pana phenela:  „Sikljiljum te ovel man potpuno pouzdanje ko Jehova. Akana, palo odova so molinava man, više na darava.“

SO O JEHOVA KA ĆEREL KI BUDUĆNOST?

12. Premalo Psalam 56:9, ko so o David hine uverimo?

¹² Čitin Psalam 56:9. Akava stih mothovi so pana pomožinđa e Davidese te pobedini pi dar. Iako o David pana hine ki opasno situacija, ov razmislinđa so o Jehova ka ćerel lese. O David đanđa so o Jehova ko pravo vreme ka spasini le hem so phenđa lese so ov ka ovel kralj ko Izrael (1 Sam. 16:1, 13). O David hine uverimo so o Jehova ka ispunini pe obećanja.

13. Ko so šaj te ova sigurna?

¹³ So o Jehova obećinđa tuće? Našti te očekujina o Jehova te zaštitini amen ando sa amare problemija. c Ama, save god problemija akana isi amen, o Jehova ka cidel len ko nevo sveto (Is. 25:7-9). Amaro Stvoritelj isi le moć te vazdel e mulen, te saćari amen, te cidel amari dukh hem sa okolen kola protivinena pe amenđe (1. Jov. 4:4).

14. Sostar šaj te razmislina?

¹⁴ Ked daraja, hor razmislin ando odova so o Jehova ka ćerel ki budućnost. Razmislin sar ka osetine tut ked o Satana više na ka ovel, ked o lošna manuša ka oven uništime hem ked amari nesavršenost hari pohari ka cidel pe. Ko Regionalno kongres aso 2014. berš hine mothovdo sar šaj te razmislina andi amari nada. Jekh dad pe porodicaja vaćerđa so bi pisini ki 2. Timoteju 3:1-5 ako bi odola stihija vaćerena odolestar save ka oven o manuša ko nevo sveto. Ov phenđa: „Ko nevo sveto ka ovel but šukar vreme. O manuša ka mangen jekh jekhe, ka mangen o ćaćipe, ka oven skromna, ponizna, ka hvalinen e Devle, ka šunen pe roditeljen, ka oven zahvalna, verna, ka oven saosećajna, spremna aso dogovor, uvek ka vaćeren šukar averendar, ka ovel len samokontrola, ka oven blaga, ka mangen o šukaripe, ka oven pouzdana, ka oven razumna, ka mangen e Devle pobuter ando pe želje. Sa odova ka ćeren odolese so mangena e Devle. Ov paše odole manušencar.“ Da li vaćereja te porodicaja hem te phralencar savo ka ovel o životi ko nevo sveto?

15. So pomožinđa e Tanjaće te pobedini pi dar?

¹⁵ Amari phen i Tanja, koja živini ki Severno Makedonija, pobedinđa pi dar ađahar so razmislinđa ando blagoslovija kola ađićerena la ki budućnost. Olake roditeljija but protivinđe pe laće ked počminđa te proučini. Oj phenela: „Disave buća ando kola darandiljum so ka oven, desinđe pe. Palo svako sastanko, mi daj marđa man. Me roditeljija pretinđe maje so ka mudaren man, ako ovava e Jehovaso svedoko.“ Ko krajo, e Tanjake roditeljija fordinđe la ando ćher. So i Tanja ćerđa? Oj phenela: „Razmislinđum odolestar savi budućnost ađićeri amen ako akana aćhovava verno e Jehovase. Isto ađahar, razmislinđum sar o Jehova ka blagoslovini man ko nevo sveto iako akana but buća našalđum hem so ka bistrav sa o lošna buća kola akana desinđe pe maje.“ I Tanja aćhilji verno e Jehovase hem uzi olesi pomoć arakhlja kaj šaj te živini. Avdije, i Tanja tani ko brako jekhe verno phraleja hem zajedno služinena ki punovremeno služba.

 ZORJAĆER TO POVERENJE KO JEHOVA AVDIJE

16. So ka pomožini amenđe te aćhova hrabra ked ka dikha sar ispuninena pe o događaja ando Luka 21:26-28?

¹⁶ Đi ka trajini i bari nevolja, o manuša „but ka daran.“ Ama, e Devleso narodo ka aćhol verno hem hrabro. (Čitin Luka 21:26-28.) Sose na ka dara? Odolese so već akana sikljiljam te ovel amen poverenje ko Jehova. I Tanja, phenela so odova so nakhlja pomožini laće akana ked isi la pharipa. Oj phenela: „Haljiljum so o Jehova šaj te pomožini amen te istrajina ko svako pharipe hem so ka blagoslovini amen. Disavo puti šaj te dićhol amenđe so avera isi len kontrola, ama u stvari on isi len kontrola odobor kobor o Jehova dozvolini lenđe. Kobor god i kušnja te ovel phari, oj isi la krajo.“

17. Sar ka pomožini amen e beršeso stiho? (Dikh i slika ki naslovno strana.)

¹⁷ Svako amendar podijekh puti darala. Ama, sar o David, ni amen na valjani te mukha i dar te kontrolišini amen. Ko beršeso stih aso 2024. berš, o David molinđa e Jehova: „Ked ukljela man i dar, me uzdajinava man upro tute“ (Ps. 56:3). Zapazin so jekh biblijako izučavalac vaćerđa ando akava stih: „O David na razmislinđa uvek ando buća kola ćerena le te daral, ni ando pe problemija. Umesto odova, osloninđa pe upro Jehova kova pomožinđa lese ked hine le problemija.“ Razmislin ando amare beršeso stiho ko masekija kola avena, posebno ked ka ove ki disavi phari situacija. Odvojin vreme te razmisline ando odova so o Jehova ćerđa angleder, so ćerela akana hem so ka ćerel ki budućnost. Tegani hem tu sar o David ka phene: „Uzdajinava man ko Devel, na darava“ (Ps. 56:4).