1. Σόσκε μπέκιμ τι νταράς κάποιες φορές;

 ΣΑΡΕ νιωθίνασα νταρ κάποιες φορές. Σίγουρα, επειδή σικλιαράσα-αμέν κατά Γραφή, να νταράσα κατά μουλέ, κατά δαίμονες ή οντουλένταρ σο κα αβέν-πες κο μέλλον. Αλλά τζουβντιάσα ντιβεσέντε σο αβένα-πες πράγματα σο “ανένα νταρ”, σαρ ισί ο τζένγκια, ο εγκλήματα ντα ο νασφαλίματα. (Λουκ. 21:11) Μπορεί επίσης τι ανέν αμένγκε νταρ μερικά τζενέ, σαρ ισί ο τζενέ με εξουσία σο τζάνα αμέντζαρ κόντρα ή ο τζενέ αμαρέ φαμιλιάτε σο τζάνα κόντρα κι αληθινή λατρεία. Μερικοί νταρένα ότι να κα μπορίνεν τι νταϊντίνεν εκ δοκιμασία σο νακχένα ακανά ή εκ δοκιμασία σο κα νακχέν κο μέλλον.

2. Βακερέν σαρ ισινέ ο πράγματα ι Δαβιδίσκε κι Γαθ.

² Ο Δαβίδ νιωσάλοας νταρ μερικέ περιπτωσιέντε. Για παράδειγμας, κάνα ο βασιλιάς Σαούλ κουλαντίνελας-λες, ο Δαβίδ αποφασιντάς τι τζαλ κι Γαθ, κι πόλη κι Φιλισταιόνγκι. Ο βασιλιάς της Γαθ, ο Αγχούς, αμέσως λιντάς αμπέρι ότι ο Δαβίδ ισινέ οντουβά ζουρανό πολεμιστής σο μουνταρντάς «δεκάδες χιλιάδες» Φιλισταιόν. Ο Δαβίδ «νταρασάλο μπουτ». (1 Σαμ. 21:10-12) Νταρέλας οντουλένταρ σο κα κερέλας λέσκε ο Αγχούς. Σαρ νικιντάς ο Δαβίδ πι νταρ;

3. Σαρ νικιντάς ο Δαβίδ πι νταρ, σαρ βακερένα ο εδάφια Ψαλμός 56:1-3, 11;

³ Κο Ψαλμός 56, ο Δαβίδ βακερέλα σαρ νιωθίνελας κάνα ισινέ κι Γαθ. Ανταβά ψαλμός βακερέλα ξεκάθαρα καλά πράγματα νταραβένας ι Δαβιδίς. Βακερέλα επίσης σαρ νικιντάς ο Δαβίδ πι νταρ. Κάνα νταρασάλο, ντινάς μπέσα κο Ιεχωβά. (Διαβάνεν Ψαλμός  56:1-3, 11) Ντα τθερέλας δίκιος σο ντινάς Λέσκε μπέσα. Ι Ιεχωβάσκε ευλογιάσαρ, ο Δαβίδ κερντάς κάτι μπουτ παράξενος. Κερντάς-πες ντινιλό, ντα λέσκο σχέδιος γκιλό λατσσές! Ακανά, αντίς ο Αγχούς τι μανγκέλ τι μουνταρέλ ι Δαβιδίς, μανγκέλας τι πάλντελ-λες σόσκε ισινέ ενοχλητικός. Οτθάρ, ο Δαβίδ μπορισάλο τι νασέλ ντα τι γλιτώνελ.​—1 Σαμ. 21:13–22:1.

4. Σαρ μπορίνασα τι κεράς πο ζουρανί αμαρί μπέσα κο Ιεχωβά; Βακερέν εκ παράδειγμας.

⁴ Μπορίνασα αμέν-ντα τι νικίνας ι νταρ καζόμ ντάσα μπέσα κο Ιεχωβά. Αλλά σαρ κεράσα πο ζουρανί αμαρί μπέσα κο Ιεχωβά, ειδικά κάνα νταράσα; Σκεφτίνεν εκ παράδειγμας. Άμα κα σικλιόν ότι τθερένα εκ νασφαλιπέ, κι αρχή μπέκιμ κα νταρέν. Όμως, να κα νταρέν αζόμ μπουτ άμα ντένα μπέσα τουμαρέ γιατρόστε. Βοβ μπέκιμ βοηθιντάς μπουτέ τζενέν σο τθερένας ο ίδιος νασφαλιπέ. Μπέκιμ ασουνέλα-τουμέν προσεκτικά, ντα ισινέν σίγουροι ότι αγαβέλα τουμαρέ αισθήματα. Ντα μπορεί τι ντελ-τουμέν εκ θεραπεία σο βοηθιντάς γιαβερέν τι ντικχέν λατσσιπέ. Αντικάς αμέν-ντα, κεράσα πο ζουρανί αμαρί μπέσα κο Ιεχωβά άμα σκεφτίνασα σο κερντάς ήδη, σο κερέλα ακανά ντα σο γιαβέρ κα κερέλ αμένγκε. Ανταβά κερέλας ο Δαβίδ-ντα. Καζόμ ντικχάσα μερικά κατά λάφια σο βακερντάς κο Ψαλμός 56, σκεφτίνεν σαρ μπορίνενα τουμέν-ντα τι κερέν πο ζουρανί τουμαρί μπέσα κο Ιεχωβά, ντα τι νικίνεν τουμαρί νταρ.

ΣΟ ΚΕΡΝΤΑΣ ΗΔΗ Ο ΙΕΧΩΒΑ;

5. Σο σκεφτίνελας λατσσές ο Δαβίδ για τι νικίνελ πι νταρ; (Ψαλμός 56:12, 13)

⁵ Παρόλο σο η ζωή ι Δαβιδίσκι ισινέ ατζέ σε κίνδυνος, βοβ τθερέλας πο γιακχά οντουλέντε σο κερντάας ήδη ο Ιεχωβά. (Διαβάνεν Ψαλμός 56:12, 13) Ο Δαβίδ σκεφτίνελας ανταλέ τροπόσαρ σαρί πι ζωή. Για παράδειγμας, κάποιες φορές σκεφτίνελας λατσσές ο πράγματα σο δημιουργιντάς ο Ιεχωβά. Ανταβά ανέλας λέσκε γκοντιάτε καζόμ ζουρανό ισί ο Ιεχωβά ντα καζόμ μπουτ μανγκέλα ι τζενέν. (Ψαλμ. 65:6-9) Ο Δαβίδ σκεφτίνελας επίσης λατσσές οντουλά σο κερντάας ο Ιεχωβά ι γιαβερένγκε. (Ψαλμ. 31:19· 37:25, 26) Ντα πο μπουτ, σκεφτίνελας λατσσές οντουλά σο ήδη κερντάας ο Ιεχωβά λέσκε. Ο Ιεχωβά στηρίνελας ντα αρακχαβέλας ι Δαβιδίς χουρντιαρέλα μπερί. (Ψαλμ. 22:9, 10) Σίγουρα, επειδή ο Δαβίδ σκεφτίνελας ανταλά πράγματα, κερντάς πο ζουρανί πι μπέσα κο Ιεχωβά!

6. Κάνα νταράσα, σο κα βοηθίνελ-αμέν τι ντας μπέσα κο Ιεχωβά;

 ⁶ Κάνα νταρένα, τι πουτσέν-τουμέν: “Σο κερντάς ήδη ο Ιεχωβά;” Τι κερέν σκέψεις ι πραγματένγκε σο δημιουργιντάς. Για παράδειγμας, «τσσουβέν σημασία» σαρ φροντίνελα ο Ιεχωβά ι τσιρικλέν ντα σαρ φροντίνελα ο λουλούδια, σο νανέ κερντέ τι μοιάζεν λέστε ντα τι ντεν-λες λατρεία. Καζόμ πο μπουτ κα φροντίνελ ο Ιεχωβά αμέν! Κάνα σκεφτίνασα-λες ανταβά λατσσές, κα κεράς πο ζουρανί αμαρί μπέσα λέστε. (Ματθ. 6:25-32) Τι σκεφτίνεν επίσης σο κερντάς ο Ιεχωβά πι υπηρετόνγκε. Κα μπορίνενας τι σικλιόν μπουτ πράγματα εκχέ τζενέσταρ κατά Γραφή σο σικαντάς μπαρί πίστη ή τι διαβάνεν ι εμπειρία εκχέ πφραλέσκι αμαρέ ντιβεσένταρ. a Ντα τι σκεφτίνεν λατσσές σο κερντάς ήδη ο Ιεχωβά για τι φροντίνελ-τουμέν. Σαρ ταρτιντάς-τουμέν κι αλήθεια; (Ιωάν. 6:44) Σαρ απαντιντάς τουμαρέ προσευχιέντε; (1 Ιωάν. 5:14) Σαρ ντικχένα λατσσιπέ κάθε ντιβές κατά θυσία λέσκε αγαπημέ Τσσαβέσκι;​—Εφεσ. 1:7· Εβρ. 4:14-16.

7. Σαρ βοηθίντιλι η Βανέσα τι νικίνελ πι νταρ κατά εμπειρία του προφήτη Δανιήλ;

⁷ Η Βανέσα, b εκ πφεν κι Αϊτή, νακχλάς κάτι σο αντάς λάκε μπουτ νταρ. Εκ μουρς σο τζουβντιόλας κι ίδια πόλη λάσαρ λέλας-λα τηλέφωνος ντα μπουτσσαβέλας λάκε μηνύματα κάθε ντιβές, ντα ζορισκιαρέλας-λα τι τθερέλ-λεν λάσαρ. Η Βανέσα βακερντάς λέσκε ξεκάθαρα ότι να μανγκέλας τι τθερέλ λέσαρ σχέση. Αλλά βοβ αβιλό πο άγριος ντα απειλιντάς-λα ότι κα κερέλ λάκε κακός. «Νταρασάλομ», βακερέλα η Βανέσα. Σαρ νικιντάς πι νταρ; Κερντάς σο νακχέλας λάκε βαστέσταρ για τι αρακχαβέλ-πες. Εκ πρεσβύτερος βοηθιντάς-λα τι τζαλ κο ασκέρια. Αλλά η Βανέσα αντάς επίσης πι γκοντιάτε σαρ αρακχαντάς ο Ιεχωβά πι υπηρετόν κο πουρανέ μπρεσά. «Ο πρώτος τζενό σο σκεφτιντόμ ισινέ ο προφήτης Δανιήλ», βακερέλα βόι. «Φουρτιντέ-λες εκχέ γουρνάτε μποκχαλέ λιονταρίντζαρ, παρόλο σο ισινέ αθώος. Αλλά ο Ιεχωβά αρακχαντάς-λες. Οτθάρ, μανγκλόμ κατά Ιεχωβά τι κερέλ ανταλέ τζενές τι τσσιναβέλ τι σκεφτίνελ-μαν ντα τι νασκιαρέλ Βοβ ανταβά πρόβλημας. Σοράν ανταλέσταρ, τσσιναντόμ τι νταράβ».​—Δαν. 6:12-22.

ΣΟ ΚΕΡΕΛΑ Ο ΙΕΧΩΒΑ ΑΚΑΝΑ;

8. Καλέ πραγματένγκε ισινέ σίγουρος ο Δαβίδ; (Ψαλμός 56:8)

⁸ Παρόλο σο ο Δαβίδ ισινέ σε μπαρό κίνδυνος κάνα ισινέ κι Γαθ, να τθερέλας πο γιακχά κο πράγματα σο νταρασκιαρένας-λες. Οκιά μπάνταρ, τραμπιντάς τι σκεφτίνελ σο κερέλας ο Ιεχωβά λέσκε οντουβά βακίτι. Νιωθίνελας ότι ο Ιεχωβά οδηγίνελας-λες ντα αρακχαβέλας-λες, ντα ότι αγαβέλας λέσκε αισθήματα. (Διαβάνεν Ψαλμός 56:8) Επίσης, ο Δαβίδ τθερέλας αμαλέν σαρ ισινέ ο Ιωνάθαν ντα ο αρχιερέας Αχιμέλεχ, σο ντένας-λες ζορ ντα βοηθίνενας-λες. (1 Σαμ. 20:41, 42· 21:6, 8, 9) Ντα παρόλο σο ο βασιλιάς Σαούλ κουλαντίνελας-λες για τι μουνταρέλ-λες, ο Δαβίδ μπορισάλο τι σώνελ πι ζωή. Ισινέ σίγουρος ότι ο Ιεχωβά τζανέλας λατσσές σο δοκιμασία νακχέλας ντα σαρ ανταγιά δοκιμασία επηρεάνελας λέσκε αισθήματα.

9. Σο ντικχέλα ο Ιεχωβά κο κάθε εκ αμένταρ;

⁹ Κάνα νακχένα εκ δοκιμασία σο ανέλα τουμένγκε νταρ, ντεν-τουμέν γκοντί ότι ο Ιεχωβά ντικχέλα εμ ι δοκιμασία εμ σαρ κερέλα-τουμέν τι νιωθίνεν. Για παράδειγμας, ο Ιεχωβά ντικχλάς, όχι σάντε καζόμ μπέτι συμπεριφερίντιβενας ο Αιγύπτιοι κο Ισραηλίτες, αλλά “σο τσσίντενας-ντα” ιτιρί λένταρ. (Έξοδ. 3:7) Ο Δαβίδ γκιλιαντάς ότι ο Ιεχωβά ντικχλάς εμ λέσκι ταλαιπωρία εμ “καζόμ ντουκχ τθερέλας ντιπ αντρέ πέστε”. (Ψαλμ. 31:7) Ντα κάνα ο Ισραηλίτες τσσίντενας στεναχώριες​—ατζέ-ντα κάνα ανταβά αβέλας-πες  επειδή λένας αποφάσεις σο να ισινέ γκοντιαβέρ​—«βοβ στεναχωρίντιβελας». (Ησ. 63:9) Κάνα νταρένα, ο Ιεχωβά αγαβέλα σαρ νιωθίνενα ντα μανγκέλα μπουτ τι βοηθίνελ-τουμέν τι νικίνεν τουμαρί νταρ.

10. Σόσκε ισινέν σίγουροι ότι ο Ιεχωβά πφαμπόλα τουμένγκε ντα ότι κα βοηθίνελ-τουμέν τι νακχαβέν κάθε δοκιμασία;

¹⁰ Μπέκιμ όμως πουτσένα-τουμέν σαρ στηρίνελα-τουμέν ο Ιεχωβά κάνα νακχένα εκ δοκιμασία σο ανέλα τουμένγκε νταρ. Ανταλέ περιπτωσιάτε, μανγκέν λέσταρ τι βοηθίνελ-τουμέν τι ντικχέν σαρ στηρίνελα-τουμέν. (2 Βασ. 6:15-17) Σοράν σκεφτίνεν: Μήπως ντινάς-τουμέν ζορ εκ ομιλία ή εκ απάντηση εκχέ συναθροισιάτε; Ντινάς-τουμέν ζορ εκ έντυπος, εκ βίντεος ή εκ κατά γκιλιά αμαρέ; Μήπως κάποιος βακερντάς τουμένγκε εκ σκέψη ή εκ εδάφιος σο ηρεμιντάς-τουμέν; Δεν πρέπει τι αμντίνας ότι η αγάπη σο λάσα αμαρέ πφραλένταρ ντα ο πνευματικός χαμπέ ισί κάτι συνηθισμέ. Ισί μπουτ σουκάρ δώρα κατά Ιεχωβά. (Ησ. 65:13· Μάρκ. 10:29, 30) Ανταλά δώρα σικαβένα ότι βοβ πφαμπόλα αμένγκε. (Ησ. 49:14-16) Επίσης, ανταλά δώρα σικαβένα ότι μπορίνασα τι ντας λέσκε μπέσα.

11. Σο βοηθιντάς την Αΐντα τι νικίνελ πι νταρ;

¹¹ Η Αΐντα, σο τζουβντιόλα κι Σενεγάλη, ντικχλάς σαρ στηριντάς-λα ο Ιεχωβά κάνα νακχλάς εκ δοκιμασία. Επειδή ισί η πο μπαρί τσσάι ι φαμιλιάκι, λάκο ντατ ντα λάκι ντάι μπεκλεντίνενας λάταρ τι νικαβέλ μπερεκέτι λοβέ για τι τθερέν ο αναγκαία εμ βόι εμ βον. Αλλά κάνα κερντάς πι ζωή πο απλή για τι κερέλ σκαπανικός, η Αΐντα δυσκολίντιβελας ι λοβέντζαρ. Λάκι φαμιλί ισινέ χολιαμέ λάσαρ ντα κρίνενας-λα. «Νταράβας ότι να κα μπορίναβας τι βοηθίναβ μι νταντές ντα μι νταγιά ντα ότι σαρέ κα κερένας-μαν πέρα», βακερέλα βόι. «Ερεσλόμ κο σημείος τι τσσουβάβ ο βάρετα κο Ιεχωβά σο μουκχλάς ο πράγματα τι ερεσέν μέχρι ατθέ». Σοράν, ασουντάς εκ ομιλία κι συνάθροιση. Ντα συνεχίνελα: «Ο ομιλητής αντάς αμαρέ γκοντιάτε ότι, σο-ντα πληγές τι τθεράς αμαρέ γκίστε, ο Ιεχωβά τζανέλα-λεν. Χάνικ χάνικ, κατά συμβουλές σο ντένας-μαν ο πρεσβύτεροι ντα γιαβερά τζενέ, αβιλόμ πάλι σίγουρη ότι ο Ιεχωβά μανγκέλα-μαν. Κάνα προσευχίντιβαβας κο Ιεχωβά, αβάβας πο σίγουρη ότι κα βοηθίνελ-μαν, ντα νιωθίναβας μπαρί ειρήνη καζόμ ντικχάβας σαρ απαντίνελας μι προσευχιέντε». Τελικά, η Αΐντα αρακχλάς εκ μπουτί σο  ντέλας-λα ι ευκαιρία, όχι σάντε τι τθερέλ ο αναγκαία σαρ σκαπάνισσα, αλλά τι βοηθίνελ πι νταντές, πι νταγιά ντα γιαβερέν. «Σικλιλόμ τι νταβ σαρί μι μπέσα κο Ιεχωβά», βακερέλα η Αΐντα. «Ακανά, κάνα προσευχίντιβαβα, ο πο μπουτ φαρ μι νταρ νασέλα».

ΣΟ ΓΙΑΒΕΡ ΚΑ ΚΕΡΕΛ Ο ΙΕΧΩΒΑ;

12. Καλέ πραγμάσκε ισινέ σίγουρος ο Δαβίδ, σαρ σικαβέλα ο εδάφιος Ψαλμός 56:9;

¹² Διαβάνεν Ψαλμός 56:9. Ανταβά εδάφιος σικαβέλα αμένγκε ατζέκ εκ τρόπος σο ο Δαβίδ νικιντάς πι νταρ. Παρόλο σο λέσκι ζωή ισινέ ατζέ σε κίνδυνος, βοβ σκεφτίνελας λατσσές σο γιαβέρ κα κερέλας ο Ιεχωβά λέσκε. Ο Δαβίδ τζανέλας ότι ο Ιεχωβά κα σώνελας-λες κι σωστή στιγμή. Μα τι μπιστράς ότι ο Ιεχωβά βακερντάας ότι ο Δαβίδ κα αβέλας ο γιαβέρ βασιλιάς κο Ισραήλ. (1 Σαμ. 16:1, 13) Ι Δαβιδίσκε, κάθε υπόσχεση ι Ιεχωβάσκι ισινέ σαρ τι νικίστιλι μπαγιά.

13. Σο ισινάμ σίγουροι ότι κα κερέλ ο Ιεχωβά;

¹³ Σο ντινάς πο λάφι ο Ιεχωβά ότι κα κερέλ τουμένγκε; Να μπεκλεντίνασα τι αρακχαβέλ-αμέν σαρέ κατά προβλήματα. c Όμως, σο-ντα δοκιμασίες τι νακχέν ανταλέ ντουνιάστε, ο Ιεχωβά κα νασκιαρέλ-λεν κο νεβό ντουνιάς σο κα αβέλ. (Ησ. 25:7-9) Σίγουρα, αμαρό Δημιουργός ισί αζόμ ζουρανό σο κα τζουβντιαρέλ ι μουλέν, κα κερέλ-αμέν λατσσές ντα κα νασκιαρέλ σαρέ ι τζενέν σο τζάνα αμέντζαρ κόντρα.​—1 Ιωάν. 4:4.

14. Σο κα μπορίναας τι σκεφτίνας λατσσές;

¹⁴ Κάνα νταρένα, τι σκεφτίνεν λατσσές οντουλά σο κα κερέλ ο Ιεχωβά κο μέλλον. Τι σκεφτίνεν σαρ κα νιωθίνεν κάνα ο Σατανάς να κα υπαρχίντιβελ, κάνα ο πφιρνέ κα καταστραφίντιβεν ντα κα υπαρχίντιβεν σάντε δίκαια τζενέ, ντα κάνα η ατέλεια κα χασάρντιβελ χάνικ χάνικ κάθε ντιβές. Εκ επίδειξη κι περιφερειακή συνέλευση κο 2014, σικαντάς σαρ μπορίνασα τι σκεφτίνας λατσσές αμαρί ελπίδα. Εκ ντατ κερέλας λάφι πι φαμιλιάσαρ ι εδαφιόνγκε 2 Τιμόθεο 3:1-5 ντα σκεφτίνενας σο κα βακερένας ανταλά εδάφια άμα κερένας λάφι για τον Παράδεισο: «Κο νεβό ντουνιάς ο πράγματα κα αβέν αντικάς σο κα ανέν αμένγκε μπουτ χαρά. Σόσκε ο τζενέ κα μανγκέν ι γιαβερέν, κα μανγκέν ι αλήθεια, κα αγαβέν πουμαρέ όρια, να κα αβέν μπαρικανέ, κα δοξάνεν ι Ντεβλές, κα ντεν καν πουμαρέ νταντές ντα πουμαρέ νταγιά, κα σικαβέν εκτίμηση, κα αβέν αφοσιωμέ, κα μανγκέν μπουτ πουμαρί φαμιλί, κα ασουνέν ι γιαβερέν, πάντα κα κερέν λατσσό λάφι ι γιαβερένγκε, κα ατσσικιαρέν-πες, κα αβέν κοβλέ γκίσκε, κα μανγκέν ο λατσσιπέ, κα αβέν μπεσαλήδες, να κα μανγκέν τι νακχέλ σάντε λένγκο, κα αβέν ταπεινοί, κα αβέν τζενέ σο μανγκένα ι Ντεβλές ντα όχι ο απολαύσεις, ο σεβασμός σο κα τθερέν ι Ντεβλέσκε κα τσσίντελ-λεν τι κερέν λατσσέ πράγματα· ντα τι ατσσός πασέ λέντε». Τουμέν, συζητίνενα τουμαρέ φαμιλιάσαρ ή τουμαρέ πφραλέντζαρ σαρ κα αβέλ η ζωή κο νεβό ντουνιάς;

15. Παρόλο σο η Τάνια νταρέλας, σο βοηθιντάς-λα τι νικίνελ πι νταρ;

¹⁵ Εκ πφεν κι Βόρεια Μακεδονία, η Τάνια, νικιντάς πι νταρ επειδή σκεφτίνελας λατσσές ο ευλογίες σο κα αβέν. Κάνα αρχισάλι τι κερέλ μελέτη κατά Γραφή, λάκο ντατ ντα λάκι ντάι γκιλέ λάσαρ μπαρί κόντρα. Βόι βακερέλα: «Μερικά κατά πράγματα σο νταράβας ότι κα αβέν-πες, αβιλέ-πες μπαγιά. Μι ντάι νταπέλας-μαν σοράν κάθε συναθροισιάταρ. Μο ντατ ντα μι ντάι βακερντέ μάνγκε ότι κα μουνταρέν-μαν άμα κα αβάβ Μάρτυρας ι Ιεχωβάσκι». Τελικά, παλντιντέ-λα κατά κχερ. Σο κερντάς η Τάνια; Βόι βακερέλα: «Τθεράβας μι γκοντιάτε ότι κα αβάβ ευτυχισμέ για πάντα επειδή τραμπιντόμ τι ατσσικιαράβ σαστό μο γκι. Σκεφτίναβας επίσης ότι ο Ιεχωβά κα ευλογίνελας-μαν κο νεβό ντουνιάς σαρέ ι πραγματένγκε σο μπορεί τι χασαράβ ανταλέ ντουνιάστε, ντα ότι σαρέ ο μπέτι πράγματα κα μπιστάρντιβεν». Η Τάνια πράγματι ατσσικιαρντάς σαστό πο γκι. Ι Ιεχωβάσκε βοηθειάσαρ, αρακχλάς εκ τθαν τι μπεσέλ. Αντιβές,  ισί παντριμέ εκχέ πιστέ πφραλέσαρ ντα υπηρετίνενα ευτυχισμέ γιεκ κι ολοχρόνια υπηρεσία.

ΚΕΡΕΝ ΠΟ ΖΟΥΡΑΝΙ ΤΟΥΜΑΡΙ ΜΠΕΣΑ ΑΝΤΙΒΕΣ

16. Σο κα βοηθίνελ-αμέν μα τι νταράς κάνα κα ντικχάς τι αβέν-πες μπαγιά ο εδάφια Λουκάς 21:26-28;

¹⁶ Κι μπαρί στεναχώρια, ο πο μπουτ τζενέ «κα μπαϊλντίνεν πουμαρέ νταριάταρ». Αλλά ο λαός ι Ντεβλέσκο κα ατσσόλ σταθερός ντα να κα νταρέλ. (Διαβάνεν Λουκάς 21:26-28) Σόσκε να κα νιωθίνας νταρ; Επειδή σικλιλάμ τι ντας μπέσα κο Ιεχωβά. Η Τάνια βακερέλα ότι οντουλά σο νακχλάς ανγκλέ βοηθίνενα-λα τι νταϊντίνελ γιαβερά δυσκολίες. «Σικλιλόμ ότι, καβά-ντα τι αβέλ ο πρόβλημας, ο Ιεχωβά μπορίνελα τι κερέλ-λες τι ανέλ αμένγκε λατσσιπέ», βακερέλα. «Κάποιες φορές, μπέκιμ ντικχίντιβελα ότι ο γιαβερά κερένα κουμάντος, αλλά κι πραγματικότητα κερένα αζόμ κουμάντος καζόμ μουκχέλα-λεν ο Ιεχωβά. Ντα παρόλο σο εκ δοκιμασία μπορεί τι αβέλ δύσκολη, κάποια στιγμή κα νασέλ».

17. Σαρ κα βοηθίνελ-αμέν ο εδάφιος ι μπρεσέσκο για το 2024; (Ντικχέν ι φωτογραφία κι ανγκλαϊνί σελίδα)

¹⁷ Ισί λογικός τι νταράς αμαρέ ντιβεσέντε. Αλλά σαρ ο Δαβίδ, μπορίνασα αμέν-ντα μα τι μουκχάς ι νταρ τι κερέλ-αμέν κουμάντος. Ο εδάφιος ι μπρεσέσκο για το 2024 ισί ο λάφια σο βακερντάς ο Δαβίδ κάνα προσευχισάλο κο Ιεχωβά: «Κάνα νταράβα, τούτε ντάβα μι μπέσα». (Ψαλμ. 56:3) Ντικχέν σο βακερντάς ανταλέ εδαφιόσκε εκ βιβλίος σο κερέλα λάφι ι Γραφιάκε: «Ο Δαβίδ να συνεχίνελα τι σκεφτίνελ πι νταρ ούτε τθερέλα πο γιακχά πι προβληματέντε, αλλά στηρίντιβελα Οντουλέστε σο κα σώνελ-λες». Τι σκεφτίνεν ο εδάφιος ι μπρεσέσκο κο μασεκά σο κα αβέν, ειδικά κάνα νακχένα καταστάσεις σο ανένα τουμένγκε νταρ. Τι ντεν τουμαρέ σαατίσταρ για τι σκεφτίνεν σο κερντάς ο Ιεχωβά κο πουρανέ μπρεσά, σο κερέλα ακανά ντα σο κα κερέλ κο μέλλον. Αζομάν, σαρ ο Δαβίδ, κα μπορίνεν τουμέν-ντα τι βακερέν: «Κο Ντεβέλ ντάβα μι μπέσα· να νταράβα».​—Ψαλμ. 56:4.