1. Thangwi yanji midzidzi inango panango tinagopa?

 TONSENE tisagopa m’midzidzi inango. Ndimomwene kuti thangwi yakupfundza Bhibhlya, ife nee tisagopa kufa, madimonyo, peno pinthu pinafuna kucitika kuna anthu ntsogolo. Mbwenye ife tiri kukhala mu ndzidzi wakuti ‘tisaona pinthu pyakugopswa’ ninga nkhondo, uphanga na mautenda. (Luka 21:11) Panango ife tinagopa mautongi peno acibale athu akuti nee asafuna kuti tilambire Yahova. Anango asagopa kuti nee anakwanisa kupirira nyatwa zinathimbana na iwo peno zinafuna kuthimbana na iwo ntsogolo.

2. Longani pidacitikira Dhavidhi ku Gati.

² Midzidzi inango Dhavidhi akhagopambo. Mwacitsandzo, pikhasakwa iye na Mambo Sauli toera kumupha, Dhavidhi athawira ku Gati wakuti ukhali nzinda wa Afilisti. Akisi Mambo wa ku Gati adzindikira kuti Dhavidhi akhali nyankhondo wamphambvu adapha Afilisti “10.000.” Pidadziwa iye pyenepi, Dhavidhi ‘agopa kakamwe.’ (1 Sam. 21:10-12) Dhavidhi agopa thangwi akhanyerezera pikhafuna kuncita Akisi. Ninji pidaphedza Dhavidhi toera kukunda kugopa kwace?

3. Mwakubverana na Masalmo 56:1-3, 11, Dhavidhi akunda tani kugopa kwace?

³ Pa Masalmo 56, Dhavidhi alonga mabvero ace pikhali iye ku Gati. M’bukhu ineyi ya Masalmo, Dhavidhi alonga kuti thangwi yanji akhagopa, pontho alongambo pinthu pidamphedza toera akhonde kugopa. Pikhagopa iye, Dhavidhi anyindira Yahova. (Lerini Masalmo 56:1-3, 11.) Dhavidhi akhali na mathangwi adidi toera kunyindira Yahova. Na ciphedzo ca Yahova, Dhavidhi acita pinthu pyakukhonda dzolowereka. Iye asangazira kuti ndi nyansala, pontho pyenepi pyamphedza. M’mbuto mwakufuna kupha Dhavidhi, Akisi akhafuna kuti Dhavidhi abuluke pakhali  iye, natenepa Dhavidhi akwanisa kuthawa.—1 Sam. 21:13–22:1.

4. Tinathimizira tani cinyindiro cathu kuna Yahova? Perekani citsandzo.

⁴ Ife tinakwanisambo kukunda kugopa tinganyindira Yahova. Mphapo tinawangisa tani cinyindiro cathu kuna Yahova, makamaka mu ndzidzi unagopa ife? Onani citsandzo ici: Mungadzindikira kuti muli na utenda, pakutoma panango munagopa. Mbwenye munakwanisa kukhala wakukhurudzika munganyindira dotoro. Panango iye aphedza anthu azinji akuti akhali na utenda ubodzi ene. Iye asabvesera mwadidi mu ndzidzi unafokotoza imwe pinthu pinakugopesani, pontho imwe musaona kuti iye asakutsalakanani. Kusiyapo pyenepi, iye asakupasani maonero a ukondzi wakuti waphedzambo anango. Munjira ibodzi ene, ife tisawangisa cinyindiro cathu kuna Yahova, tinganyerezera pinthu pidacita iye nduli, pinacita iye cincino na pinafuna kuticitira iye ntsogolo. Ndi pyenepi pidacita Dhavidhi. Mu ndzidzi unaleri ife mafalace anagumanika pa Masalmo 56, nyerezerani kuti imwembo munakwanisa tani kuwangisa cinyindiro canu kuna Yahova mbamukunda kugopa.

NDI PINTHU PIPI PIDACITA YAHOVA?

5. Dhavidhi anyerezeranji toera kukunda kugopa kwace? (Masalmo 56:12, 13)

⁵ Ngakhale umaso wa Dhavidhi ukhali pangozwi, iye apitiriza kunyerezera pinthu pidacita Yahova nduli. (Lerini Masalmo 56:12, 13.) Pyenepi ndi pinthu pikhacita iye mu umaso wace onsene. Mwacitsandzo, midzidzi inango iye akhasaka ndzidzi toera kunyerezera pinthu pidacita Yahova. Pyenepi pikhamphedza toera kukumbuka kuti Yahova ndi wamphambvu kakamwe, pontho asafuna kakamwe anthu. (Mas. 65:6-9) Pontho Dhavidhi anyerezerambo pinthu pidacitira Yahova anthu anango. (Mas. 31:19; 37:25, 26) Kusiyapo pyenepi, iye anyerezera pinthu pidancitira Yahova. Yahova aphedza Dhavidhi, pontho antsidzikiza kutomera mu uwana wace. (Mas. 22:9, 10) Mwandimomwene, kunyerezera pinthu pyenepi kwaphedza Dhavidhi toera kunyindira Yahova!

6. Tingagopa, ninji pinafuna kutiphedza toera kunyindira Yahova?

⁶ Mungagopa, bvundzikani: ‘Ninji pidandicitira Yahova nduli?’ Nyerezerani pinthu pidacita iye. Mwacitsandzo, ‘tingayag’ana mwadidi’ njira inatsalakana Yahova mbalame na maluwa,  pinthu pyakuti nee apicita mwakulandana na iye, pontho nee pisakwanisa kumulambira, pyenepi pinawangisa cinyindiro cathu cakuti iye anatitsalakanambo. (Mat. 6:25-32) Nyerezeranimbo pinthu pidacita Yahova kuna atumiki ace. Imwe munakwanisa kupfundza pya munthu analongwa m’Bhibhlya wakuti akhali na cikhulupiro cakuwanga, peno munakwanisa kuleri pya mbiri ya ntumiki wa Yahova wa ntsiku zathu. a Kusiyapo pyenepi, nyerezerani njira idakutsalakanani Yahova nduli. Nyerezerani kuti iye akuphedzani tani toera kudziwa undimomwene. (Juw. 6:44) Kodi iye atawira tani maphembero anu? (1 Juw. 5:14) Musaphedzeka tani thangwi ya ntsembe yaciomboli ya Mwanace wakufunika?—Aef. 1:7; Aheb. 4:14-16.

7. Citsandzo ca mprofeta Dhanyeli caphedza tani Vanessa toera kukunda kugopa kwace?

⁷ Vanessa, b mulongo wa ku Haiti, athimbana na nyatwa yakugopswa kakamwe. Mamuna m’bodzi wa cisa cace akhamuligariri ntsiku zonsene, pontho akhantumizira mphangwa mbakankakamiza toera abanyirane naye. Vanessa ankhonda. Mamuna unoyu aipirwa mbampanga kuti mbadancita pyakuipa. Iye alonga: “Ine ndagopa.” Vanessa akunda tani kugopa kweneku? Acita pinthu toera atsidzikizike. Nkulu wa mpingo m’bodzi amphedza toera apite ncibverano na mautongi. Kusiyapo pyenepi, iye anyerezera njira idaphedza Yahova atumiki ace nduli. Vanessa alonga: “Munthu wakutoma adanyerezera ine ndi mprofeta Dhanyeli. Iye aponywa n’djendje ya nkhalamu zakuti zikhali na njala, maseze nee akhadacita pinthu pyakuipa. Mbwenye Yahova amphedza. Natenepa ndaphemba Yahova toera acitise mamuna unoyu akhonde kunyerezerabve pya ine. Pontho toera amalise nyatwa ineyi. Buluka penepo ine nee ndagopabve.”—Dhan. 6:12-22.

NDI PINTHU PIPI PINACITA YAHOVA CINCINO?

8. Ndi cinyindiro cipi cikhali na Dhavidhi? (Masalmo 56:8)

⁸ Maseze umaso wa Dhavidhi ukhali pangozwi ku Gati, mbwenye iye nee apitiriza kunyerezera pinthu pikhancitisa kugopa. Iye akhanyerezera pinthu pikhancitira Yahova mu ndzidzi unoyu. Dhavidhi akhaona kuti Yahova akhantsogolera na kuntsidzikiza, pontho akhaona kuti Yahova asabvesesa mabvero ace. (Lerini Masalmo 56:8.) Dhavidhi akhalimbo na axamwali adidi ninga Yonatani na Nyantsembe Wankulu Aimeleki adamphedza na kumuwangisa. (1 Sam. 20:41, 42; 21:6, 8, 9) Maseze Mambo Sauli akhafuna kumupha, Dhavidhi athawa. Iye akhali na cinyindiro cakuti Yahova akhadziwa mwadidi pinthu pikhancitikira na mabvero ace.

9. Ninji pinaona Yahova kuna m’bodzi na m’bodzi wa ife?

⁹ Mungathimbana na nyatwa zakuti zisakucitisani kugopa, kumbukani kuti Yahova nee asaona basi ene nyatwa zanu, mbwenye asabvesesa kuti zisakukhuyani tani. Mwacitsandzo, Yahova nee aona basi ene kutsalakanwa mwakuipa kwa Aizraeli ku Ejitu, mbwenye aonambo ‘nyatwa idatamba iwo.’ (Eks. 3:7) Dhavidhi aimba kuti Yahova aona “kuthabuka” kwace na “kunjipa kwa nyatwa” zace. (Mas. 31:7) Pontho pikhathabuka atumiki a Mulungu thangwi ya pisankhulo pyakuipa pikhacita iwo, “iye akhanentsekambo.” (Iza. 63:9) Mungagopa, Yahova asabvesesa mabvero anu, pontho ali dzololo toera kukuphedzani kuti mukunde kugopa kweneku.

10. Thangwi yanji muli na cinyindiro cakuti Yahova asakutsalakanani, pontho anakuphedzani toera kupirira nyatwa?

¹⁰ Khala muli kuthimbana na nyatwa, panango  nee munaona njira inakuphedzani Yahova. Mphapo musafunika kucitanji? Mphembeni toera akuphedzeni kuti muone ciphedzo cace. (2 Ama. 6:15-17) Buluka penepo bvundzikani: Kodi nkhani peno ntawiro udaperekwa pa misonkhano ya mpingo pyandiwangisa? Kodi pali na bukhu, vidhyu, peno ibodzi mwa nyimbo yakuti yandiwangisa? Kodi pali na munthu adandipanga mphangwa za m’Bhibhlya zakuti zandiwangisa? Panango tinaduwala kuti abale na alongo athu asatifuna kakamwe, mbatiduwalambo ciphedzo cinatipasa Yahova kubulukira m’Mafalace. Mwandimomwene, ineyi ndi miyoni mikulu inatipasa Yahova. (Iza. 65:13; Marko 10:29, 30) Miyoni ineyi isapangiza kuti Yahova asakutsalakanani. (Iza. 49:14-16) Pontho isapangiza kuti iye athema kunyindirwa na imwe.

11. Ninji pidaphedza Aida toera kukunda kugopa kwace?

¹¹ Aida anakhala ku Senegal, aona kuti Yahova amphedza tani pikhathimbana iye na nyatwa. Nakuti ndi mwana wakutoma, anyakubalace akhadikhira kuti iye akhale na kobiri izinji toera atsalakane anyakubalace na iye ene. Mbwenye pidamala iye kululupisa umaso wace toera akhale mpainiya, Aida nee akhalabve na kobiri izinji. Acibale ace aipirwa kakamwe mbatoma kumulonga mwakuipa. Iye alonga: “Ndikhagopa kuti nee mbandidakwanisa kuphedza anyakubalanga, pontho anthu onsene mbadandicalira. Ine ndapasa mulando Yahova thangwi ya pinthu pyenepi pyakuipa pikhacitika.” Buluka peno iye abva nkhani pa misonkhano ya mpingo. Aida athimiza: “M’bale akhacita nkhani atikumbusa kuti Yahova asadziwa pinthu pinaticitisa kukhala akudzudzumika na akugopa. Mwapang’ono na pang’ono, thangwi ya uphungu udandipasa akulu a mpingo na anthu anango, ine ndakhala na cinyindiro cakuti Yahova asandifuna. Pikhacita ine phembero kuna Yahova, ndatoma kukhala na cinyindiro kakamwe cakuti iye mbadandiphedza. Pontho ndatoma kukhala na ntendere pidaona ine kuti maphembero anga akhatawirwa.” Mukupita kwa ndzidzi, Aida adzagumana basa yakuti yamphedza toera apitirize kutumikira ninga mpainiya na kuphedza anyakubalace na anthu anango. Iye alonga: “Ine ndapfundza kunyindira Yahova na ntima onsene. Cincino ndingamala kucita phembero, kazinji kene nee ndisagopabve.”

 YAHOVA ANACITANJI NTSOGOLO?

12. Mwakubverana na Masalmo 56:9, ndi cinyindiro cipi cikhali na Dhavidhi?

¹² Lerini Masalmo 56:9. Vesi ineyi isapangiza cinthu cinango cidaphedza Dhavidhi mu ndzidzi ukhagopa iye. Maseze umaso wace ukhali pangozwi, iye anyerezera pinthu pikhafuna kuncitira Yahova ntsogolo. Dhavidhi akhadziwa kuti Yahova mbadampulumusa pa ndzidzi wakuthema. Thangwi Yahova akhadalonga kuti Dhavidhi mbadakhala mambo wa Izraeli. (1 Sam. 16:1, 13) Dhavidhi akhaona pinthu pidapikira Yahova ninga pyamala kale kukwanirisika.

13. Tinakwanisa kukhala na cinyindiro cakuti Yahova anadzacitanji?

¹³ Yahova apikira kucitanji kuna imwe? Ife nee tisadikhira kuti iye anatitsidzikiza mu nyatwa zathu zonsene. c Ngakhale tenepo, mwakukhonda tsalakana nyatwa zinathimbana na ife mu dziko ino, Yahova anadzazimalisa mu dziko ipswa. (Iza. 25:7-9) Nciti wathu ali na mphambvu yakulamusa anthu muli akufa, kuwangisa mautenda na kufudza anyamalwa athu.—1 Juw. 4:4.

14. Ndi pinthu pipi pyakuti tinakwanisa kupinyerezera tingagopa?

¹⁴ Mungagopa, nyerezerani pinthu pinafuna kucita Yahova ntsogolo. Nyerezerani kutsandzaya kunafuna kukhala na imwe Sathani pabodzi na anthu akuipa angafudzwa mbasala anthu adidi basi, pontho kusowa ungwiro mbukumala mwapang’ono na pang’ono. Citsandzo cidalongwa pa nsonkhano wa gawo wa 2014 capangiza kuti tinanyerezera tani pinthu pinadikhira ife ntsogolo. Baba m’bodzi acedza na banjace kuti lemba ya 2 Timoti 3:1-5 mbidalembwa tani mbidakhala kuti iri kulonga pya dziko ipswa. Iye alonga: “Mu dziko ipswa inadzaoneka midzidzi yadidi kakamwe thangwi anthu anadzafunana unango na ndzace, anadzafuna undimomwene, anadzakhala akukhonda gaya, akucepeseka, akusimba Mulungu, anadzabvera anyakubalawo, akupereka takhuta, akukhulupirika, akufuna anthu a pabanja pawo, akufuna kukhazikisa cibverano na anango, analonga pinthu pyadidi kuna anango, akuphata ntima peno akudzitonga, akupfulika, akufuna pinthu pyadidi, akunyindirika, akubva pinalonga andzawo, akufuna Mulungu mbakhonda kufuna pinakomerwa na iwo basi, anadzaperekeka na ntima onsene kuna Mulungu, pontho khala pabodzi na anthu anewa.” Kodi imwe musacedza na banja yanu peno na abale na alongo kuti umaso unadzakhala tani mu dziko ipswa?

15. Maseze Tanja akhagopa, ninji pidamphedza toera kukunda kugopa kwace?

¹⁵ Mulongo Tanja wa ku Macedónia do Norte akunda kugopa kwace pidanyerezera iye pinthu pyadidi pinafuna kucitika ntsogolo. Anyakubalace akhantcinga kakamwe pidatoma iye kupfundza Bhibhlya. Iye alonga: “Pinthu pinango pikhagopa ine kuti mbapidacitika, pyacitikadi. Mai wanga akhandimenya ntsiku zonsene ndingakotoka ku misonkhano. Anyakubalanga alonga kuti mbadandipha ndingakhala Mboni wa Yahova.” Mukupita kwa ndzidzi, anyakubala a Tanja anthamangisa panyumba. Mphapo iye acitanji? Iye alonga: “Ine ndanyerezera kuti ndinakhala wakutsandzaya kwenda na kwenda thangwi yakusankhula kukhala wakukhulupirika kuna Yahova. Kusiyapo pyenepi, ndanyerezera kuti Yahova anadzandipasa nkhombo mu dziko ipswa thangwi ya pinthu pinaluza ine mu dziko ino, pontho ndanyerezera kuti pinthu pyonsene pyakuipa pinadzaduwalika.” Tanja apitiriza kukhala wakukhulupirika. Na ciphedzo ca Yahova, iye agumana mbuto toera kukhala. Lero, Tanja amanga banja na m’bale  wakukhulupirika, pontho uwiri wawo asatumikira mwakutsandzaya m’basa ya ndzidzi onsene.

NDI PINTHU PIPI PINAFUNA KUCITA YAHOVA NTSOGOLO?

16. Ninji pinafuna kutiphedza toera tipitirize kukhala acipapo tingaona pinthu pidalembwa pa Luka 21:26-28?

¹⁶ Mu ndzidzi wa nyatwa ikulu, anthu “anadzakomoka thangwi ya kugopa.” Mbwenye atumiki a Mulungu anadzapitiriza kukhala dzololo na acipapo. (Lerini Luka 21:26-28.) Thangwi yanji nee tinadzagopa? Thangwi tinagumanika kuti tapfundza kale kunyindira Yahova. Tanja adalongwa mu ndima idamala, alonga kuti nyatwa zidatamba iye zisamphedza toera kuthimbana na nyatwa zinango zakunentsa. Iye alonga: “Ndadzindikira kuti Yahova anakwanisa kutiphedza mu nyatwa zonsene na kutipasa nkhombo. Midzidzi inango, anango panango anaoneka kuti ndi amphambvu kakamwe, mbwenye Yahova ndi wamphambvu kakamwe kupiringana iwo. Ngakhale nyatwa ioneke ninga ndi ikulu, iyo inadzamala.”

17. Lemba yathu ya caka ca 2024 inatiphedza tani? (Onani foto iri pa tsamba yakutoma.)

¹⁷ Lero pana pinthu pizinji pyakuti pinakwanisa kutigopesa. Mbwenye ninga Dhavidhi, nee tisafunika kutawirisa kuti kugopa kutikunde. Lemba yathu ya caka ca 2024 ndi phembero idacita Dhavidhi kuna Yahova. Iye alonga: “Ndingagopa ndisanyindira imwe.” (Mas. 56:3) Onani pidalonga nyakupfundza pya Bhibhlya m’bodzi thangwi ya vesi ineyi: “Dhavidhi nee apitiriza kunyerezera pinthu pikhancitisa kugopa peno thangwi ya nyatwa zace. Mbwenye iye anyindira Ule wakuti mbadampulumusa.” Miyezi inatowera, nyerezerani lemba yathu ya caka, makamaka mu ndzidzi unathimbana imwe na nyatwa. Khalani na ndzidzi toera kunyerezera mwadidi pinthu pidacita Yahova nduli, pinacita iye cincino na pinafuna kucita iye ntsogolo. Natenepa ninga Dhavidhi, imwe munakwanisa kulonga: “Nakuti ndisanyindira Mulungu, nee ndisagopa.”—Mas. 56:4.