1. Manino tsika ro mety hatahotsy kindraiky?

 MAHATIARO matahotsy tsika iaby kindraiky. Mazava ho azy fa tsy matahotsy ty olo maty tsika satria haintsika ty raha ampianarin’ny Baiboly. Tsy matahotsy ty demonia, na ty raha hiseho amy hoavy koa tsika. Fe miay amy fotoa sarotsy tsika ka mety hampatahotsy antsika ty aly, vonoan’olo, noho ty arety. (Lioka 21:11) Mety hatahotsy olo koa tsika, anisani-zay ty manam-pahefà manerisery antsika. Ndre ty fianakaviantsika aza mety hatahorantsika mihintsy lafa manohitsy ty fivavaha marina. Miasa loha amy zay ty olo sisany satria mieritseritsy ie fa tsy ho vitany ty hiatriky ty raha mahazo azy amy zao, handraky moa ty raha mety hiseho amy hoavy.

2. Resadresaho hoe ino ty raha nahazo an’i Davida tamy ie ta Gata tany.

² Fa nisy fotoa Davida natahotsy. Lafa niezaky nanea azy mbaombao, ohatsy, Saoly Mpanjaka satria ta hamono azy, le nilay ta Gata, amy Filistinina reo any ie. Lafa tany Davida, le nihain’i Akisy, mpanjakan’ny Gata fa ie azy mpialy mahery nataon’olo an-kira hoe “nahafaty an’alinaliny” tamy Filistinina reo iny. Lasa “navaka biby” amy zay Davida. (1 Sam. 21:10-12) Natahotsy ie amy ty raha hataon’i Akisy aminy. Fe ino ty nanampy an’i Davida tsy hatahotsy?

3. Laha hentea ty Salamo 56:1-3, 11, ino ty nanampy an’i Davida tsy hatahotsy?

³ Niresahin’i Davida amy Salamo faha-56 ao ty raha tsapany tamy ie ta Gata tany iny. Resahiny ao hoe manino ie ro natahotsy, fe hazavaniny ao koa ty raha nanampy azy mba tsy hatahotsy. Lafa navaka Davida, le niantehitsy tamy Jehovah. (Vakio Salamo 56:1-3, 11.) Tsy diso Davida laha natoky an’i Jehovah.  Nampean’i Jehovah ie ka nahita hevitsy. Nisy raha somary mahatseriky zay nataony. Nanao kisary adala ie! Marina fa tena ta hamono an’i Davida Akisy, fe lafa nahita azy ie le nangaroharo ka nampialany teo. Afaky nilay amy zay Davida.​—1 Sam. 21:13–22:1.

4. Akory ty hanatanjahantsika ty fatokisantsika an’i Jehovah? Manomeza ohatsy.

⁴ Afaky tsy hatahotsy koa tsika laha matoky an’i Jehovah. Fe ino ty hataontsika mba hahavy antsika vomaiky hatòky an’i Jehovah, sirtò lafa tsika matahotsy? Toy misy ohatsy. Lafa hainao hoe misy arety mahazo anao, le mety hatahotsy tse iha amy voalohany. Fe tsy hatahotsy iha laha matoky ty dokoteranao. Mety fa nitsabo olo maro, niazon’arety manahaky mahazo anao iny ie. Tsy zay avao fa mijanjy soa ie lafa iha manazava aminy ty raha mampatahotsy anao, le tsapanao koa hoe midary anao ie. Mety hovolaniny koa ty raha fa nataony mba hitsaboa olo narary manahaky anao, le zay koa ty hataony aminao. Manahaky ani-zay koa fa vomaiky hatòky an’i Jehovah tsika laha mandiniky ty raha fa nataony taloha tany, ty raha ataony amy zao, noho ty raha mbo hataony amy hoavy. Zay mihintsy moa ty nataon’i Davida. Lafa tsika mandiniky ty raha sisany nisoratiny amy Salamo 56 ao, le diniho hoe ino koa ty azonao atao mba hahavy anao vomaiky hatòky an’i Jehovah noho tsy hatahotsy.

INO TY RAHA FA NATAON’I JEHOVAH?

5. Lafa natahotsy Davida, ino ty raha nivetsevetseny? (Salamo 56:12, 13)

⁵ Ndre niatriky raha mety hahafaty azy aza Davida, le mbo nametsivetsy ty raha soa fa nataon’i Jehovah avao ie. (Vakio Salamo 56:12, 13.) Zay avao ty raha nataon’i Davida tamy androm-piainany. Nisy fotoa, ohatsy, ie nandiniky ty raha niforonin’i Jehovah. Nampitiaro azy raha zay fa tena mahery Jehovah sady tena tea ty olombelo. (Sal. 65:6-9) Tsy zay avao fa nivetsevetseny koa ty raha fa nataon’i Jehovah mba hanampea ty olo hafa. (Sal. 31:19; 37:25, 26) Fa ty tena nanampy azy, nivetsevetseny ty raha fa nataon’i Jehovah ho azy. Nanampy azy noho nikarakara azy avao Jehovah liany nahakely azy. (Sal. 22:9, 10) Azo antoky fa vomaiky natoky an’i Jehovah Davida lafa nametsivetsy ani-raha reo!

6. Ino ty hanampy antsika hatòky an’i Jehovah lafa tsika matahotsy?

 ⁶ Lafa iha matahotsy, le eritsereto zao: ‘Ino ty raha fa nataon’i Jehovah?’ Diniho ty raha niforoniny. “Henteo soa”, ohatsy, ty fomba ikarakaran’i Jehovah ty voro noho ty folera. Tsy niforony hitovy endriky aminy reo sady tsy afaky hanahaky ty toetsiny noho hanompo azy, fe karakarany soa. Handraky moa tsika! Tena hikarakara antsika ie. Vomaiky tena hatòky azy tsika laha mametsivetsy raha manahaky ani-zay. (Mat. 6:25-32) Diniho koa ty raha fa nataon’i Jehovah mba hanampea ty mpanompony. Lafa nianatsy Baiboly iha le mety fa nahita tantaran’olo tena nino an’i Jehovah, na koa fa namaky tantaram-piainan’ny mpanompon’i Jehovah amy zao. a Ankoatsy zay, vetsevetseo ty raha fa nataon’i Jehovah mba hikarakarà anao. Akory ty nanampeany anao hahay ty fahamarina? (Jaona 6:44) Akory ty namaleany ty vavaky nataonao? (1 Jaona 5:14) Ino ty soa azonao sanandro baka amy soro nataon’ny Anakilahiny tena teany iny?​—Efes. 1:7; Heb. 4:14-16.

7. Manino ty tantaran’i Daniela mpaminany ro nanampy an’i Vanessa tsy hatahotsy?

⁷ Niatriky raha tena mampatahotsy ranabavy Vanessa b, mipetraky a Haïti any. Nikaiky noho nandefa mesazy taminy avao sanandro lahilahy nipetraky mbamin-drozy eny zay, sady niforosè azy mba hiaraky aminy. Nihazavanin’i Vanessa mazava soa taminy fa tsy hanao ani-zay ie. Fe niromotsy lahilahy iny ka nangorohoro azy fa hamango azy. Hoy Vanessa: “Navaka biby aho.” Fe ino ty nataony? Nanao ze azony natao ie mba hiarova ty vatany. Nisy anti-panahy zay koa nanampy azy hikaiky ty manam-pahefà. Ankoatsy zay, nivetsevetseny koa ty fomba nanampean’i Jehovah ty mpanompony taloha tany. Hoy Vanessa: “Daniela mpaminany ro olo niavy tan-tsaiko ao voalohany. Natoraky tan-davakin’ny liona any ie, ndre tsy nanao raha raty aza. Mosarè amin’io liona rey. Fe nanampy azy Jehovah ka tsy nihina azy liona rey. Farany, nivavaky tamy Jehovah aho mba hataony ze hahavy an’ny lahilahy iny tsy hieritseritsy ahy. Nivavaky taminy koa aho mba hamaha an’ny problemo iny, satria tsy hitako ty hatao. Tsy natahotsy sasy aho tafarani-zay.”​—Dan. 6:12-22.

INO TY ATAON’ I JEHOVAH HENANIZAO?

8. Ino ty raha natokisan’i Davida? (Salamo 56:8)

⁸ Ndre fa ho nisy namono aza Davida tamy ie ta Gata tany iny, le tsy nifantoky tamy raha nampatahotsy azy rey ie. Naleony nandiniky ty raha nataon’i Jehovah ho azy tamy fotoa iny. Lasa nahatsapa amy zay Davida fa mitariky azy noho manampy azy Jehovah sady mahatakatsy ty fihetseham-pony. (Vakio Salamo 56:8.) Nana nama soa koa Davida. Anisani-zay Jonatana noho Ahimeleka Mpisorobe. Nampahery azy rozy sady nanampy azy. (1 Sam. 20:41, 42; 21:6, 8, 9) Ndre ta ho namono azy aza Saoly Mpanjaka, le tsy nimaty ie. Natoky ie fa tena hain’i Jehovah ty raha nahazo azy noho ty raha tsapany.

9. Ino ty raha hitan’i Jehovah amintsika kiraidraiky?

⁹ Lafa iha miatriky raha sarotsy mampatahotsy anao, le tiarovo fa hitan’i Jehovah raha iny sady hainy ty raha tsapanao. Lafa nampijalijalin’ny Ejipsianina, ohatsy, Israelita rey, le tsy hoe nihitan’i Jehovah avao raha nahazo an-drozy iny, fa ‘nihainy soa koa ty fijalean-drozy.’ (Eks. 3:7) Nihira Davida fa samby hitan’i Jehovah ndre ty raha sarotsy nahazo azy ndre  ty raha tsapany. (Sal. 31:7) Lafa nijaly koa vahoakiny rey, le “nalahelo biby” ie, ndre baka amin-drozy avao aza ro nahavy an-drozy nijaly. (Isaia 63:9) Lafa matahotsy iha, le hain’i Jehovah ty raha tsapanao sady parè hanampy anao ie amy zay iha tsy hatahotsy sasy.

10. Manino iha ro matoky fa midary anao Jehovah sady hanampy anao hiatriky raha sarotsy?

¹⁰ Lafa miatriky raha tena mampatahotsy iha, le mety tsy ho ambinao hoe manampy anao Jehovah. Laha zay tsy tsapanao, ino ty azonao atao? Angataho ie hanampy anao mba hahita an’ny fanampeany anao rey. (2 Mpanj. 6:15-17) Bakeo eritsereto zao: Nisy lahateny na valin-teny nampahery anao va tam-pivoria any? Sa nisy raha naboakin’ny fandamina, ohatsy hoe video, na hira nampahery anao? Nisy olo va niresaky hevitsy na andinin-teny nampahery anao? Mety ho halinontsika hoe tena tea antsika rahalahy noho anabavintsika reo sady nisy raha nampahery antsika baka amy Safà-Ndranahary ao. Fa laha ty marina, fanomeza tena miavaky baka amy Jehovah raha rey. (Isaia 65:13; Mar. 10:29, 30) Hita baka amy raha rey fa midary anao ie. (Isaia 49:14-16) Hita baka amy raha rey koa fa tokony hatòky azy iha.

11. Ino ty nanampy an’i Aida tsy hatahotsy?

¹¹ Tsapan’i Aida, ranabavy mipetraky a Senegaly any fa nanampy azy Jehovah lafa ie niatriky raha sarotsy. Ie ro anaky voalohany, le nitamà ray aman-dreniny rey fa hiasa ie le hahazo drala be mba hikarakaràny ty vatany noho rozy trano raiky. Fe tsy zay moa ty nataony fa nanatsotra fiaina ie amy zay afaky hanao mpisava lala. Farany tsy nanan-drala ie. Neloky azy ty fianakaviany sady nikinokino azy. Hoy Aida: “Natahotsy aho tsy no tsy ho afaky hanampy ty ray aman-dreniko ka tsy hidary ahy rozy. Nanome tsiny an’i Jehovah mihintsy aza aho satria tsy nisakanany raha iny ka vomaiky niharaty.” Tafarani-zay ie naharè lahateny tam-pivoria any. Hoy Aida: “Nampitiaro anay mpandahateny iny hoe ndre ino ino raha mamparary ty fontsika, le hain’i Jehovah raha rey. Nisy anti-panahy noho olo hafa koa nanoro hevitsy ahy. Nanomboky tsapako amy zay hoe tea ahy Jehovah. Lafa nivavaky tamy Jehovah aho, le vomaiky aho natoky fa hanampy ahy ie. Vomaiky nilamin-tsay koa aho  lafa nihitako hoe namaly ty vavaky nataoko ie.” Lafa nandeha ty fotoa, le nahita asa Aida ka afaky nanohy nanao mpisava lala avao ie sady nanampy ty ray aman-dreniny noho ty olo hafa. Hoy ty asany: “Nianatsy hatòky tanteraky an’i Jehovah aho. Lafa baka nivavaky aho, le nirava any tahotsiko iny.”

INO TY HATAON’ I JEHOVAH AMY HOAVY?

12. Ino ty raha natokisan’i Davida laha hentea ty Salamo 56:9?

¹² Vakio Salamo 56:9. Misy raha hafa koa resahin’ny andininy io nanampy an’i Davida tsy hatahotsy. Marina fa mbo natahora avao ty ainy, fe ndre zay le nifantoky amy ty raha mbo hataon’i Jehovah ho azy amy hoavy ie. Hainy fa hanavotsy azy Jehovah amy fotoa mety. Ankoatsy zay, fa nivola koa Jehovah hoe Davida ro ho mpanjakan’Israely manaraky eo. (1 Sam. 16:1, 13) Natoky Davida fa tsy maintsy ho tanteraky ze raha iaby nampitamanin’i Jehovah.

13. Ino ty raha azontsika antoky fa hataon’i Jehovah?

¹³ Ino ty raha nampitamanin’i Jehovah anao? Tsy mitamà tsika hoe hiaro antsika amy ze problemo bakeo Jehovah. c Fe tiarovo fa ndre ino ino raha sarotsy mety hatrehinao amy tontolo toy eto, le hafahin’i Jehovah raha rey lafa amy tontolo vaovao ao. (Isaia 25:7-9) Mahery azy Mpamoro antsika iny ka vitany ty mamelo ty maty, mitaha antsika, noho mandripaky ze olo manohitsy antsika.​—1 Jaona 4:4.

14. Ino ty raha azontsika vetsevetse?

¹⁴ Lafa iha matahotsy, le vetsevetseo ty raha hataon’i Jehovah amy hoavy. Eritsereto hoe ino ty ho tsapanao lafa tsy ho eo sasy Satana. Mety hanao akory koa iha lafa haripaky ty olo raty fanahy fa olo soa avao ro ho hitanao, sady mihalavorary tsikelikely iha sanandro. Nisy fampisehoa zay tamy fivoriamben’ny vondrom-paritsy tamy 2014, le natoro tamy raha io hoe manao akory mametsivetsy ty raha tamanintsika zao. Nisy loham-pianakavia niaraky nidiniky tamy fianakaviany ty 2 Timoty 3:1-5. Fe novàny ty raha voaresaky ao le nisoloany ty raha hiseho amy Paradisa ao. Ho zao ty nanaovany azy: “Amy tontolo vaovao ao, le ho soasoa biby ty fiaina. Fa ty olo ho tea ty mpiara-belo aminy, ho tea manompo an’i Jehovah, tsy hirengirengy, tsy hanambony tena, hidera a-Ndranahary, hankatò ray aman-dreny, hahay hisaotsy, tsy hivaliky amy ty raha nivolaniny, ho tea ty fianakaviany, ho mora ifanaraha, hivola raha soa mikasiky ty olo hafa avao, hahafehy tena, halemy fanahy, ho tea ty soa, ho azo atokisa, handefitsy, hiambany, ho tea a-Ndranahary fa tsy ho tea fahafinareta, ho hita amy ty fiainany hoe tena mpivavaky ie. Miaraha avao amy ty olo manahaky ani-rey.” Miaraky miresadresaky amy ty fianakavianao na ty mpiara-manompo va iha hoe hanao akory ty fiaina amy tontolo vaovao ao?

15. Ino ty nanampy an’i Tania tsy hivaliky avao ndre nisy raha nampatahotsy azy aza?

¹⁵ Eritsereto ty raha niainan’i Tania, ranabavy mipetraky a Macédoine Avaratsy any. Tena nanohitsy azy ty ray aman-dreniny lafa ie nianatsy Baiboly, farany ie natahotsy. Hoy ty asany: “Raha natahorako iny mihintsy ro niseho. Nivangoan’ny mamako avao aho saky baka nivory. Nivola koa babako noho mamako fa hovonoan-drozy aho laha lasa Vavolombelon’i Jehovah.” Tsiela tafarani-zay, le niroasin-drozy Tania. Ino ty nanampy azy? Nametsivetsy ty raha hataon’i Jehovah amy hoavy ie. Hoy ty asany: “Haiko hoe laha tsy mivaliky avao aho le ho falifaly biby avao mandrakizay. Zay avao ro nifantohako. Nivetsevetseko koa ty raha soa hamean’i Jehovah ahy lafa amy tontolo vaovao ao, ndre nisy  raha nafoiko aza amy tontolo toy eto. Tsy ho tiaroko sasy raha raty iaby nahazo ahy rey lafa any.” Tsy nivaliky mihintsy Tania. Nampean’i Jehovah ie ka nahita trano hipetraha. Manambaly mpanompon’i Jehovah tsy mivaliky Tania henanizao, le falifaly rozy miaraky manompo manontolo andro.

MIEZAHA HATÒKY KOKOA AN’ I JEHOVAH

16. Ino ty hanampy antsika ho be herim-po avao lafa miseho ty faminania resahin’ny Lioka 21:26-28?

¹⁶ Amy fijalea bevata, le ho maro ty olo ‘ho toira satria hatahotsy.’ Fe tsy hanahaky ani-zay tsika satria vahoaki-Ndranahary. Tsy ho voahozonkozo tsika sady tsy hatahotsy. (Vakio Lioka 21:26-28.) Fa manino? Satria fa nianatsy hatòky an’i Jehovah tsika. Nivola Tania, azy niresahintsika taloha eroy iny fa nanampy azy hiatriky raha sarotsy raha niainany taloha tany rey. Hoy ty asany: “Haiko fa afaky manampy antsika hiaritsy Jehovah ndre ino ino ty raha mahazo antsika, sady afaky mitahy antsika koa ie. Mieritseritsy tena kindraiky hoe misy olo atao raha mahavita miatriky ty raha mahazo azy. Fe laha ty marina Jehovah ro nanampy an-drozy hahavita ani-zay. Ndre mafy manao akory aza ty fitsapà mahazo antsika, le tsy maintsy ho tampitsy avao.”

17. Manino ro manampy antsika ty andinin-teny ho an’ny tao 2024? (Henteo sary amy fonon’ny gazety toy.)

¹⁷ Maro biby ty raha mety hampatahotsy antsika henanizao. Fe manahaky an’i Davida, le afaky mandresy ani-raha zay tsika. Nivavaky tamy Jehovah Davida hoe: “Lafa matahotsy aho, le miantehitsy aminao.” (Sal. 56:3) Io ro andinin-teny ho an’ny tao 2024 toy. Henteo moa ty raha nivolanin’ny manam-pahaiza raiky mikasiky Baiboly, mikasiky an’ny andinin-teny io: “Tsy nifantoky tamy raha nampatahotsy azy na tamy raha sarotsy nahazo azy Davida. Naleony niantehitsy tamy Azy mahavita manavotsy azy iny.” Vetsevetseo avao andinin-teny ho an’ny tao 2024 toy, amy vola ho avy reo, sirtò moa lafa iha miatriky raha mampatahotsy. Manokàna fotoa hametsivetsea ty raha fa nataon’i Jehovah taloha tany, ty raha ataony amy zao, noho ty raha mbo hataony amy hoavy. Ho afaky hivola manahaky an’i Davida koa iha amy zay hoe: “Ndranahary ro atokisako, ka tsy matahotsy aho.”​—Sal. 56:4.