1. Lamo okokaso ndjoka wɔma winá ɛmɔtshi?

 ONTO onkfumɔ ndjokaka wɔma lá winá ɛmɔtshi. Lá nsɔsɔlɔ, wekelo wɔso wɔ Bible w’ototshungolaka má wɔma wɔ nyɔyi, w’ɛdjɛngɛ la wɔ akambo wangotokomela l’etsho weyaye. Koko tokindjɛ ngo mbika l’etsho wembolola kfu la ‘akambo wa wɔma,’ ndjɔmbɔmba ambandji, akambo wa lopango l’elando. (Luka 21:11) Tokoka lonkina ndjoka anto wɔma, ndjɔmbɔmba ewandji wɛ lɛɛta wɛtɛnyɛ ndjolo, kana ase nkfumbo wananyɛ ɔtɛmwɛlɔ wɔ nsɔsɔlɔ. Amɔtshi walekɔ la wɔma ambɔ wapangokoka nkfulumeyɛ lonkina ohemba wopomana lawɔ kana wɔ yongopomana l’etsho weyaye.

2. Kɔkɔndɔla kɛnɛ kekomelisá Davidɛ winá wɔ ndakome lá Gatɛ.

² Kaanga Davidɛ okaka wɔma. Ndjɔmbɔmba, winá wɔ Nkfumi Saolo ndohonaka djɛ ndoyaka, Davidɛ ɔsaka nkano djɛ ndota tá Gatɛ, ngando kɛmɔtshi kɛ Filistiya. Lako ndjala ilá, Akishɛ, nkfumi kɛ Gatɛ ewaka ante Davidɛ ayalaki okowo wɔ yatshumbaka lá teembo ambɔ ayakaka ase Filistiya ‘nunu akumi la akumi.’ Davidɛ ‘okaka wɔma efula.’ (1 Sa. 21:10-12) Okaka wɔma lá kɛnɛ kɛ Akishɛ ndakoke ndoonangha. Wopo wɔkɔnge Davidɛ ndalonge wɔma wɔnde?

3. Lá nkilika Yeembo 56:1-3, 11, wopo wɔkɔnge Davidɛ ndafumboyɛ wɔma wɔnde?

³ Lá Yeembo 56, Davidɛ atepela wopo wɔ ndokaka winá wɔ ndakome lá Gatɛ. Yeembo yɛsɔ yɛnyɛ papoo wɔma wɔ Davidɛ, koko yɛnyɛ lonkina wopo wɔ ndafumboyɛ wɔma wɔkɔ. Winá wɔ ndoke wɔma, Davidɛ ayawakɛka le Yehova. (Wala Yeembo 56:1-3, 11.) Nde ayalaka la donga djɛ wɔlɔ efula djɛ ndáwɛkɛ le Yehova. Má okotshɔ wɔ Yehova, Davidɛ ananghaka nkambo mɔtshi djɛ ndotananghaka ntondo koko djɛ mayɛlɛ efula:  Ananghaka ngo ngete ambototɔ okadji! L’edjena kɛ Akishɛ ndjaka Davidɛ, nde alɔmbaka djɛ ndowangoyɛ otale la nde, ko Davidɛ awaka mbamba kɛ ndota.​—1 Sa. 21:13–22:1.

4. Wopo wɔkɔnge w’okokaso nkembɛ wɛkamo wɔso te Yehova? Pɛyɛ ndjɔmbɔmba.

⁴ Ole iso, tokoka nshiyɛ wɔma wɔso má ndáwɛkɛ le Yehova. Iya wopo wɔkɔnge w’okokaso nkembɛ wɛkamo wɔso te Yehova, pekapeka winá w’oyɛso la wɔma? Tokolenda ndjɔmbɔmba kɛmɔtshi. Ntsha ombewa ente olekɔ l’olando, ongoka wɔma má bango. Koko, ongokitshakitshɛ wɔma wɔko ntsha omboshimela dɔktɛrɛ djɛko. Nkoka ndjala nde ambosadjɛ́ anto efula watataki olando wɔ wopo wɔkɔ ɔmɔ. Akoka nkekameyɛ la nkɔmɛ nkfumɔ, la nkoshikikɛ ante nsɔsɔlɔ asipisoyɛ wɔlɔwɔlɔ wopo w’okɛ. Edjinge akoka nkoshimela djɛ nde nkɔpɛyɛ bɔki djɛ anto ankina yasale. Lá wopo wɔkɔ ɔmɔ, iso nkembɛka wɛkamo wɔso te Yehova má ntɔnɔla lá kɛnɛ kɛ ndombonanghá, kɛnɛ k’onanghande, la kɛnɛ kɛ ndongotonanghela. Kɛsɔ ndeke Davidɛ ndananghe. Winá wɔ sotashishima etepela wɛnde ɛmɔtshi wɛ ndafune má wolo wɔ nyuma k’ekina, w’otanaso lá Yeembo 56, tɔnɔla lá wopo w’okokɛ nkembɛ ole wɛ wɛkamo wɔko le Yehova la nshiyɛ wɔma wɔko.

KƐKƆNGE KƐ YEHOVA NDOMBOSHIYƐKA NANGHA?

5. Djɛ nshiyɛ wɔma wɔnde, Davidɛ ndatɔnɔla lá nkambo djɛkɔnge? (Yeembo 56:12, 13)

⁵ Winá wɔ lowiko lɔ Davidɛ yayalaka lá mbalaka, nde apikaki wiso lá kɛnɛ kɛ Yehova ndomboshiyɛka nangha. (Wala Yeembo 56:12, 13.) Kɛsɔ ndeke Davidɛ ndananghaka lowiko lɔnde l’otondo. Ndjɔmbɔmba, mbala imɔtshi atɔnɔlaki lá elemo w’etongelo wɛ Yehova, ko kɛsɔ k’ovungolaki nkfulu k’ipa wɔsɔdjɔmba kɛ Yehova la wopo w’oyapɛyɛnde l’oloko ɔmɔ te anto. (Yee. 65:6-9) Davidɛ atɔnɔlaki lonkina lá kɛnɛ kɛ Yehova ndombonanghela anto ankina. (Yee. 31:19; 37:25, 26) Atɔnɔlaki pekapeka lá kɛnɛ kɛ Yehova ndomboonanghelá. Yehova asukaka la alamaka Davidɛ ngo m’ɔlɛngɛ wɔnde. (Yee. 22:9, 10) Kokanela wopo wɔ ntɔnɔ djɛ nghɔsɔ yakembɛ wɛkamo wɔ Davidɛ te Yehova!

6. Winá w’oyɛso la wɔma, kɛkɔnge kengotokotshɛ djɛ ndáwɛkɛ te Yehova?

 ⁶ Winá w’ɔyalɛ lá wɔma, lokawopole ente: ‘Kɛkɔnge kɛ Yehova ndomboshiyɛka nangha?’ Tɔnɔla lá kɛnɛ kɛ ndatonge. Ndjɔmbɔmba, winá ‘w’oshishimaso la nkɔmɛ nkfumɔ’ wopo wɔ Yehova owakelande tofulu l’ansoso, nkete djɛ ndotatonga l’ɛfɔ kɛnde la mpakoke ndɔtɛmɔla, tongokembɛ wɛkamo wɔso ente angotowakela ole iso. (Mat. 6:25-32) Tɔnɔla lonkina lá kɛnɛ kɛ Yehova ndombonanghela enkambi wɛnde. Okoka ndjeka ndjɔmbɔmba k’onto ɔmɔtshi wɔ Bible w’oyalisá la djawo djɛ wolo, kana okoka mbala kɛnɛ k’ekomelisá onkambi ɔmɔtshi wɔ Yehova w’etsho wɛnɛ. a Lá djiko djɛ lasɔ, tɔnɔla lá wopo wɔ Yehova ndombokowakelá. Wopo wɔkɔnge ndakosepe lá nsɔsɔlɔ? (Dj. 6:44) Wopo wɔkɔnge ndakadjimola ndɔmbɔ yɛko? (1 Dj. 5:14) Wopo wɔkɔnge w’owɛ wapɔ mfu inkfumɔ m’olambo wɔ Wɔnande wɔ ngandji?​—Ɛfɛ. 1:7; Heb. 4:14-16.

7. Wopo wɔkɔnge kɛnɛ kekomelisá Danyɛlɛ yakotshɛ́ Vanessa djɛ mfumboyɛ wɔma wɔnde?

⁷ Vanessa, b nkaana kɛmɔtshi kelá Haïti apomanaka la nkambo mɔtshi djɛ wɔma efula. Mpame kɛmɔtshi lá mbandja kɛwɔ owetaki la otomelaki amesajɛ mfu inkfumɔ, djɛ ndotshinda la wolo djɛ ndjewana lande. Vanessa atawola kaanga ndambo daambi. Mpame kɛkɔ akomaka lopango efula te nde la atateyɛka ndowana. Nde atepela ante: “Ndjokaka wɔma efula.” Wopo wɔkɔnge Vanessa ndafumboyɛ wɔma wɔnde? Nde ananghaka kɛnɛ kɛ ndakoke nangha djɛ ndálama. Ikokolo imɔtshi okotshɛ́ka djɛ nde nsawola l’ewandji wɛ lɛɛta. Koko lonkina, atɔnɔlaka lá wopo wɔ Yehova ndalame enkambi wɛnde wɛ ntondo. Vanessa akɔndɔla ante: “Onto wɔ ntondo wɔ makanela nde ɔprɔfɛtɛ Danyɛlɛ. W’owokelaka lá mpeku dj’akimbwe iyalaki la ndjala efula kaanga ndotanangha nkambo. Koko Yehova owombaka. Ndɔmbaka Yehova djɛ nde ndɔsa odjito wɔ nkambo djɛmi. Masɔ, ntokaki wɔma lonkina.”​—Dan. 6:12-22.

KƐKƆNGE KƐ YEHOVA ONANGHANDE WINÁ WƆSƆ?

8. Davidɛ ndayalaka l’eshikikelo lá nkambo djɛkɔnge? (Yeembo 56:8)

⁸ Kaanga Davidɛ ndayalaka lá mbalaka kekokisá ndokomɛ lá nyɔyi winá wɔ ndakome lá Gatɛ, atila yimba l’akambo w’ɔpɛyɛki wɔma. Koko, atɔnɔlaka lá kɛnɛ kɛ Yehova ndonanghela lá winá wɔkɔ wɔsɔ. Davidɛ akokaka nyɛna ante Yehova ɔlɔndjɛ, olama la asipisoyɛ wɔlɔwɔlɔ wopo w’oyawokande. (Wala Yeembo 56:8.) Davidɛ awaka ole osukɔ wɔ tolongo tɔnde tɔ nkɔmano, ndjɔmbɔmba Yɔnata, la koko Nkfundji k’Ekekete Ahimɛlɛkɛ okotshɛ́ka lá wopo w’ɛnama. (1 Sa. 20:41, 42; 21:6, 8, 9) Kaanga Nkfumi Saolo ndahonaka djɛ ndooyaka, Davidɛ alotaka. Ayalaka l’eshikikelo ante Yehova ila yimba l’ohemba wɔnde la lá wopo w’ohemba wɔsɔ y’otshimbɛka yimba.

9. Yehova ndokaka ngete mo lá kɛnɛ kelendana l’ehemba wɛso?

⁹ Winá w’opomanɛ l’ohemba w’ɔkɔpɛyɛ wɔma, vungɔ ente Yehova ewa ohemba wɔko wɔlɔwɔlɔ la wopo w’oyawokɛ. Ndjɔmbɔmba, Yehova atewaki ngo lɔnyɔkɔ lɔ wana w’Isariyɛlɛ l’Edjipito toko, koko ewaki lonkina ‘efula kɛ ndjolo kɛ [yɛnaka].’ (Epo. 3:7) Davidɛ atshumbaka ante Yehova ɛnaka ‘ndjolo’ la ‘nkɛtshi’ yɛnde. (Yee. 31:7) La winá wɔ enkambi wɛ Ndjambe yɛnaka ndjolo, kaanga yayalaka nde m’ɔtɛ w’akano wawɔ wa nkesa, Nde ‘ɛnaka ndjolo esanga la wɔ.’ (Iza. 63:9) Winá w’oyalɛ la wɔma, Yehova asipisoyɛ wɔlɔwɔlɔ  wopo w’okɛ la alekɔ la mposɛ kɛ nkokotshɛ́ djɛ wɛ nshiyɛ wɔma wɔko.

10. Lamo oyɛ l’eshikikelo ente Yehova nkolamaka la angokokotshɛ́ djɛ nkfulumeyɛ okakasano onkfumɔ?

¹⁰ Koko okoka ndáwopola wopo wɔ Yehova okokande nkosuka winá w’opomanɛ l’ohemba wɔ wolo. Djɛkondeke lɔmbande akokotshɛ́ djɛ wɛ nyɛna osukɔ wɔnde. (2 Nk. 6:15-17) Ko masɔ shishima weepó wɛnɛ: Djamba kana kɔmantɛrɛ kɛmɔtshi lá losanghanyɛ l’otshumano kembokokembɛ? Onkanda, video, kana yeembo imɔtshi yɛ nyuma imbokokembɛ? Onto ɔmɔtshi ambokapana la wɛ vɛrse kana ikanyi imɔtshi ikɔpɛyɛ eshikikelo? Tokoka mvungɛ wopo wɔ ngandji k’efula kɛ wananyɔ l’ankaana la lokembo l’Otepela wɔ Ndjambe yatokotshɛ́. Koko, lá nsɔsɔlɔ, oyɛwɔ nde opapɛyɛ w’ipa wɔsɔdjɔmba w’ime Yehova. (Iza. 65:13; Mar. 10:29, 30) Ɔsɔ oyɛwɔ nde tolembetelo tɛnyɛ ente Yehova akolama. (Iza. 49:14-16) La kɛsɔ kɛnyɛ ente nde ɛdje wɛ ndowilela oloko.

11. Kɛkɔnge kekotshisá Aida djɛ mfumboyɛ wɔma wɔnde?

¹¹ Aida, kanga lowika lá Sénégal, ɛnaka wopo wɔ Yehova ndookotshɛ́ winá wɔ ndapomana l’ohemba ɔmɔtshi. Ladjikɛnde alekɔ wɔna wɔ ntondo, ambotshi wande wakongelaki ambɔ nde angowa mfalanga efula djɛ nde nshiyɛ ehomba wɛnde la w’ambotshi wande. Koko m’ɔkɔngɔ wɔ nde nkomɛ lowiko lɔnde onghanghunya djɛ nkoma yat’ekalo, Aida apomanaka l’ekakasano efula welendana la mfalanga. Nkfumbo kɛnde k’owomadjɛka la w’onanghaka efula. Nde atepela ante: “Ndjalaka la wɔma ente mpangoyala l’akoka wa nkotshɛ́ ambotshi wami la ente onto onkfumɔ angonkadjɛ. Mpɛlaka edjinge Yehova lá wopo wɔ ndatshike akambo nkoma lá lɛdji lɔ nyɛtshi nghɔsɔ.” Manyi, nde ekameyɛka djamba mɔtshi lá losanghanyɛ. Akindjɛ ante: “Kaanga lɔpɛyɛki djamba atovungolaka ante ayale mpota ilekɔ́ l’eloko wɛso, Yehova ndjewaka. Ndambo ndambo, má alako wa tokokolo la w’anto ankina, ndjalaka l’eshikikelo ente Yehova nkɔpaka. Mbangaka ndɔmba Yehova l’eshikikelo ente angonkotshɛ́ ko ndjokaka vu dj’efula ngo ngete mɔmɛna nde alɔmbɛlɔ wami wambokadjimolama.” L’etsho wɛkɔ wɛsɔ, Aida awaka olemo w’ókotshisá ape ngo  djɛ nshiyɛ ehomba wɛnde toko etengo oyɛnde yat’ekalo, koko ole djɛ nkotshɛ́ ambotshi wande l’itenyi yɛ nkfuta la nkotshɛ́ anto ankina. Atepela ante: “Lambeká djɛ ndawɛkɛ te Yehova l’akambo ankfumɔ. Winá wɔsɔ, wɔma wɔmi wongofumbɔke m’ɔkɔngɔ wɔ lemi ndɔmba.”

KƐKƆNGE KƐ YEHOVA NDONGONANGHA?

12. Lá nkilika Yeembo 56:9, lá nkambo djɛkɔnge Davidɛ ndayalaka l’eshikikelo?

¹² Wala Yeembo 56:9. Vɛrse djɛnɛ djɛnyɛ wopo onkina wɔ Davidɛ ndashiyɛ wɔma wɔnde. Kaanga lowiko lɔnde yayalaka lá mbalaka, nde atɔnɔlaka lá kɛnɛ kɛ Yehova ndongonanghela. Davidɛ ewaki ante Yehova angowikɛ lá winá w’ɛdje. Lá djiko djɛ lasɔ, Yehova atepelaka ante Davidɛ angoyala nkfumi k’Isariyɛlɛ. (1 Sa. 16:1, 13) Le Davidɛ, ayalaka ngo ngete kɛnɛ kɛ Yehova ndolake kembokotshama.

13. Okokaso ndjala l’eshikikelo kɛkɔnge le Yehova?

¹³ Kɛkɔnge kɛ Yehova ndombokolaka djɛ nkonanghela? Topakongela ente Yehova angoshimba dj’ekakasano ntokomela. c Koko, ayale ehemba wɛkɔnge wɛ nghongopomana lá nkfumbo dj’akambo djɛnɛ, Yehova angimɛ enkfumɔ wɛkɔ l’andja wa mbango wayaye. (Iza. 25:7-9) Ontongi wɔso alekɔ nsɔsɔlɔ la nkfulu kɛ nkfundola edjo, kɛ ntosadjɛ la kɛ nyimɛ antonyi ankfumɔ.​—1 Dj. 4:4.

14. Okokaso ntɔnɔla lá nkambo djɛkɔnge?

¹⁴ Winá w’okɛ wɔma, tɔnɔla lá kɛnɛ kɛ Yehova ndongonangha l’etsho weyaye. Kokanela wopo wɔ nghongoka winá wɔ Satana ndongima, anto wa wɔlɔ yongokita anto wa lopango, la ntshamba djɛ djɔ yongotashilaka ndambo ndambo. Etombo w’olakanyelo ɛmɔtshi wɛ losanghanyɛ lɔ rɛjɔ lɔ 2014 w’ɛnyɛka wopo w’okokaso ntɔnɔla lá nkongi djɛso. Papa kɛmɔtshi asawolaki la nkfumbo kɛnde lá wopo wɔ 2 Timɔte 3:1-5 yotakoka mfunama lá lɛdji lotshikitanyi ntsha avɛrse wanɛ yotewoyɛ nde wopo w’akambo yongoyala lá Paradiso: “L’andja wa bango deko dj’osasa ngoyala. Ladjikɛnde anto wangɔkɔpa anto ankina, wangɔkɔpa nsɔsɔlɔ, wangewa elelo wɛwɔ, wangoyala l’okitshakitshɛ, waalumɛ Ndjambe, waalɛmɛyɛ ambotshi, waalekɔ́ la djedjɛ, waalekɔ́ la nkɔmano, waalekɔ́ la ngandji k’efula lá nkfumbo, wookana, waatepelaka wɔlɔ djɛ anto ankina, waalekɔ́ la ndákota, waapalekɔ enkonda, waalekɔ́ la ngandji k’akambo wa wɔlɔ, wɛɛdje djɛ ndawilela oloko, waalekɔ́ entshupa djɛ ndjoka, waapasangɛ apɛka, waakɔpa Ndjambe l’edjena kɛ nkɔpa esasa, wangoyapɛyɛ lá wayi wa Ndjambe lá lɛdji lɔ nsɔsɔlɔ. Nyomaleme anto wasɔ.” Ongosawolake la nkfumbo kɛko kana la winako andjawodji wopo wɔ lowiko yongoyala l’andja wa bango?

15. Kaanga Tanja ndayale la wɔma, kɛkɔnge k’okotshisá djɛ mfumboyɛ wɔma wɔnde?

¹⁵ Nkaana kɛmɔtshi kemá Macédoine du Nord k’etawɔ Tanja afumboyɛka wɔma wɔnde má ntɔnɔla lá esako w’etsho weyaye. Ambotshi wande watakɔpaki kaanga ndambo daambi nde ndjeka Bible. Akɔndɔla ante: “Akambo wa malekaka ndjoka wɔma ente watankomelake ndeke lonkomelisá. Nyɛnghɛmi ankfusaki m’ɔkɔngɔ wɔ nsanghanyɛ inkfumɔ. Ambotshi wami wányanaki ambɔ wangondjaka ntsha lambokoma Owakɛ wɔ Yehova.” Ekomo ekomo, witaka Tanja. Ndananghe mo? Atepela ante: “Mpikaka wiso lá wopo wɔ mongoyala l’osasa lotshinda lotshinda má nsɔna djɛ ntshikala la nkɔmano. Nkanelaka lonkina lá lɛdji lɔ Yehova ndongomfuta l’andja wa bango m’ɔtɛ wɔ nkete nkfumɔ djɛ momotshutshɛ́ lá nkfumbo dj’akambo djɛnɛ la wopo wɔ songovungɛ akambo ankfumɔ wa nyɛtshi.”  Tanja alamaka nkɔmano djɛnde. La m’okotshɔ wɔ Yehova, nde awaka idjena yɛ ndjala. Lɔɔko kɛnɛ, Tanja ambɔpɛtshɛ́ nya wɔnanyɔ ɔmɔtshi wɔ nkɔmano efula edjinge wakamba yape kɛkɔ l’osasa l’olemo wɔ winá enkfumɔ.

KEMBƐ WƐKAMO WƆKO MÁ WINÁ WƆSƆ

16. Kɛkɔnge kengotokotshɛ́ djɛ ndjala l’oloko wolo winá wɔ sɔngɛna ekotshamelo k’akambo w’ewoyamisá lá Luka 21:26-28?

¹⁶ Lá ndjolo k’ekekete, anto ankfumɔ ‘wangovɔ la wɔma w’efula.’ Koko enkambi wɛ Ndjambe wangopikama ndii la wangoyala l’oloko wolo. (Wala Luka 21:26-28.) Lamo sopangoka wɔma? Ladjikɛnde tomboshiyɛka ndjeka djɛ ndáwɛkɛ te Yehova. Tanja, kanga sotepelisa má djiko, atepela ante akambo wapomanisá la nde ntondo, w’okotshɛ́ka djɛ mpikama lá ntondo k’ekakasano. Nde atepela ante: “Nyɛnaka ente Yehova nkoka ntosakola la ntokotshɛ́ lá okakasano onkfumɔ. Akoka nyɛnama winá ɛmɔtshi etengo anto ndeke lotalɔndjɛ akambo, koko kɛnɛ kelekɔ́ nsɔslɔ nde, ɔlɔndjɛwɔ ngo mande Yehova awola. Kaanga ohemba okokawɔ ndjala la wolo wɔkɔnge, w’ongoyala ngo l’ekomo.”

17. Wopo wɔkɔnge vɛrse djɛso dj’ɔnɔnyi wɔ 2024 yongotokotshɛ́? (Lenda ntshango djelá loposo.)

¹⁷ Akambo wakoká ntokɛ wɔma walekɔ efula lɔɔko kɛnɛ. Koko etengo Davidɛ, tokoka ndjewɔ dj’ipa ntala ilonga yɛ wɔma. Vɛrse djɛso dj’ɔnɔnyi wɔ 2024 oyɛwɔ nde lɔlɔmbɔ lɔ Davidɛ ndalɔmbɛ Yehova ante: ‘Winá w’oyɛmi la wɔma, lemi ndáwɛkɛka le wɛ.’ (Yee. 56:3) Etengo onkanda ɔmɔtshi w’osakisolá Bible otepalande djɛ vɛrse djɛnɛ, Davidɛ “atakindjɛki nkanela akambo wɔpɛyɛki wɔma, kana ekakasano wɛnde, koko ayawɛkɛki te Owiki wɔnde.” Kókanela wopo w’ongokokotshɛ́ vɛrse djɛso dj’ɔnɔnyi lá angɔndɔ iyaye, pekapeka winá wɔ nghongopomana l’ekakasano wɛ wolo. Ɔsa winá djɛ ntɔnɔla l’akambo wa Yehova ndananghe l’etsho w’embohetá, onanghande winá wɔsɔ, la wa ndongonangha l’etsho weyaye. Masɔ, okoka ntepela etengo Davidɛ ente: ‘Le Ndjambe ndeke oyawɛkɛmi, lemi mpakoke ndjoka wɔma.’​—Yee. 56:4.