1. Yini lengenta kutsi ngalesinye sikhatsi sesabe?

 SONKHE sihle sesaba. Kuliciniso kutsi kudadisha liBhayibheli kusikhulule ekwesabeni labafile, ekwesabeni emadimoni nelikusasa. Nobe kunjalo, siphila esikhatsini lapho ‘sibona tintfo letetfusako,’ letifaka ekhatsi timphi, bugebengu netifo. (Luk. 21:11) Singahle sesabe nebantfu, lokufaka ekhatsi bohulumende labasicindzetelako nobe emalunga emindeni yetfu lamelene nekukhonta kweliciniso. Labanye bakhatsateka ngekutsi ngeke bakhone kubeketelela tinkinga lababhekene nato nobe labatawubhekana nato esikhatsini lesitako.

2. Chaza simo saDavide ngesikhatsi aseGathi.

² Davide wake wesaba. Sibonelo nje, ngesikhatsi iNkhosi Sawula imfunisa kwenyalitsi, Davide wancuma kubalekela edolobheni lemaFilisti lokutsiwa yiGathi. Ngekushesha iNkhosi Akhishi yaseGathi yeva kutsi Davide ngulelichawe lebekuhlatjelwa ngalo kutsiwa libulele emaFilitsi ‘langemashumi etinkhulungwane.’ Davide ‘wesaba kakhulu.’ (1 Sam. 21:10-12) Bekakhatsateke ngaloko Akhishi bekatawukwenta kuye. Wakuncoba njani lokwesaba?

3. Ngekusho kweTihlabelelo 56:1-3, 11, Davide wakuncoba njani kwesaba?

³ KuTihlabelelo 56, Davide uveta indlela lebekativa ngayo ngesikhatsi aseGathi. Lesihlabelelo sikuchaza kahle kwesaba kwakhe, kodvwa siphindze sivete indlela lakuncoba ngayo. Ngesikhatsi Davide esaba, wetsembela kuJehova. (Fundza Tihlabelelo 56:1-3, 11.) Kwenta njalo akuzange kumdvumate. Ngekusitwa nguJehova, Davide wakha licebo lebelingakavami kodvwa lelamphumelelisa: Wenta ngatsi uyahlanya!  Kunekutsi Akhishi afune kumbulala, bekafuna kutsi asuke embikwakhe, ngako Davide wakhona kubaleka.​—1 Sam. 21:13–22:1.

4. Yini lesingayenta kuze simetsembe kakhulu Jehova? Fanekisa.

⁴ Natsi singakuncoba kwesaba ngekutsi setsembele kuJehova. Kodvwa yini lesingayenta kuze sikhulise indlela lesimetsemba ngayo Jehova, ikakhulukati nasesaba? Cabanga nganasi sibonelo. Nawutfola kutsi unekugula lokutsite, ekucaleni ungahle wesabe. Kodvwa lokwesaba kungancipha nangabe umetsemba dokotela wakho. Kungenteka udvume ngekutsi uyakwelapha lokugula. Angahle akulalelisise, akucinisekise ngekutsi uyicondza kahle indlela lotiva ngayo. Ngetulu kwaloko, angakutjela ngendlela yekwelapha lebasebentele labanye. Ngendlela lefanako, singametsemba kakhulu Jehova nangabe sicabanga ngaloko lakwentile, lakwentako nyalo naloko latawusentela kona. Nguloko Davide lakwenta. Njengobe sifundza lamanye emavi akhe laphefumulelwe lakuTihlabelelo 56, cabanga ngaloko longakwenta nawe kuze ukhulise indlela lometsemba ngayo Jehova futsi uncobe kwesaba.

YINI JEHOVA LAYENTILE?

5. Yini Davide lacabangasisa ngayo kuze ancobe kwesaba? (Tihlabelelo 56:12, 13)

⁵ Ngesikhatsi kuphila kwaDavide kusengotini, bekachubeka acabanga ngaloko Jehova lakwentile. (Fundza Tihlabelelo 56:12, 13.) Kuko konkhe kuphila kwakhe, Davide bekacabanga ngalendlela. Nasi sibonelo, ngaletinye tikhatsi bekacabangisisa ngendalo yaJehova, lokwamkhumbuta kutsi Jehova unemandla lamakhulu nekutsi unendzaba mbamba nebantfu. (Hla. 65:6-9) Waphindze wacabangisisa ngaloko Jehova lakwentele labanye. (Hla. 31:19; 37:25, 26) Ngetulu kwaloko, wacabanga kakhulu ngaloko Jehova lamentele kona. Jehova bekamsekele Davide futsi wamvikela kusukela aseluswane. (Hla. 22:9, 10) Cabanga nje kutsi kucabangisisa ngaloko kwamsita kangakanani Davide kutsi etsembele kuJehova!

6. Nasesaba, yini letasisita kutsi setsembe Jehova?

⁶ Nangabe wesaba, tibute: ‘Yini Jehova lasavele ayentile?’ Cabangisisa ngetintfo  latidalile. Sibonelo nje, ‘nasinakisisa’ indlela Jehova lanakekela ngayo tinyoni netimbali letingakadalwa ngemfanekiso wakhe futsi letingakhoni kumkhonta, loko kutasisita setsembe mbamba kutsi utasinakekela natsi. (Mat. 6:25-32) Cabanga futsi ngaloko Jehova lakwentele bantfu labamkhontako. Ungadadisha ngemuntfu lokukhulunywa ngaye eBhayibhelini lowakhombisa kukholwa lokucinile, nobe ungafundza ngesibonelo salamuhla sesikhonti saJehova. a Ngetulu kwaloko, cabangisisa ngendlela Jehova lakunakekele ngayo. Ukudvonsele njani ecinisweni? (Joh. 6:44) Uyiphendvule njani imithantazo yakho? (1 Joh. 5:14) Ikusita njani onkhe malanga inhlawulo yeNdvodzana yakhe layitsandzako?​—Ef. 1:7; Heb. 4:14-16.

7. Loko lokwenteka kumphrofethi Danyela kwamsita njani Vanessa kuze ancobe kwesaba?

⁷ Lomunye dzadze waseHaiti lokutsiwa nguVanessa, b wabhekana nesimo lesetfusako. Lenye indvodza yasendzaweni yangakubo beyimshayela futsi imtfumelela imilayeto onkhe malanga imcindzetela kutsi atsandzane nayo. Vanessa wala. Kodvwa lendvodza yaba neludlame futsi yaze yamsongela. Vanessa utsi: “Bengesaba kakhulu.” Yini layenta kuze ancobe lokwesaba? Wenta konkhe langakwenta kuze ativikele. Lomunye lomdzala welibandla wamsita kutsi achumane netiphatsimandla. Kodvwa waphindze wacabanga ngendlela Jehova bekavikele ngayo bantfu bakhe esikhatsini lesendlulile. Vanessa utsi: “Umuntfu wekucala lengacabanga ngaye ngumphrofethi Danyela. Wajikwa emgodzini wemabhubesi lalambile nanobe bekangakenti lutfo futsi Jehova wamnakekela. Ngacela Jehova kutsi angisite, ngemuva kwaloko kwesaba kwami kwaphela.”​—Dan. 6:12-22.

YINI JEHOVA LAYENTAKO NYALO?

8. Yini Davide bekaciniseka ngayo? (Tihlabelelo 56:8)

⁸ Ngisho nobe Davide bekasengotini lenkhulu eGathi, akazange avume kuncotjwa kwesaba. Kunaloko wakhetsa kucabanga ngaloko Jehova bekamentela kona ngaleso sikhatsi. Wabona kutsi Jehova bekamcondzisa, amvikela futsi ayicondza indlela bekativa ngayo. (Fundza Tihlabelelo 56:8.) Ngetulu kwaloko bekanebangani, lokufaka ekhatsi Jonathani na-Ahimeleki umPhristi Lophakeme, labamsekela futsi bamsita. (1 Sam. 20:41, 42; 21:6, 8, 9) Ngisho nobe iNkhosi Sawula beyifuna kubulala Davide, kodvwa waphunyula. Bekaciniseka kutsi Jehova bekayati inkinga labhekene nayo nekutsi beyimenta ative njani.

9. Yini Jehova layinakako ngemuntfu ngamunye?

⁹ Nawubhekene nenkinga lekwenta wesabe, khumbula kutsi Jehova uyayibona lenkinga nekutsi ikwenta utive njani. Sibonelo nje, Jehova akagcinanga ngekubona kuphatfwa kabi kwema-Israyeli ngesikhatsi aseGibhithe, kodvwa wabona ‘nebuhlungu lakubo.’ (Eks. 3:7) Davide wahlabela watsi Jehova wakubona “kuhlupheka” kwakhe nekutsi ‘bekacindzeteleke kakhulu.’ (Hla. 31:7) Nkulunkulu “bekacindzeteleka” ngesikhatsi bantfu bakhe bahlupheka, ngisho nobe loko bekungumphumela wetincumo tabo letimbi. (Isa. 63:9) Nawesaba, Jehova uyayicondza indlela lotiva ngayo futsi ufuna mbamba kukusita kutsi ukuncobe.

10. Yini lekwenta uciniseke kutsi Jehova uyakunaka nekutsi utakusita ubhekane nanobe nguyiphi inkinga?

 ¹⁰ Nobe kunjalo, kungenteka uyatibuta kutsi Jehova ukusita njani nawubhekene nenkinga lekwesabisako. Ngako mcele akusite ubone indlela lakusita ngayo. (2 Khos. 6:15-17) Ngemuva kwaloko, cabanga ngaloku: Ikhona yini inkhulumo loyive emihlanganweni yelibandla nobe imphendvulo yalotsite lekukhutsatile? Ikhona yini incwadzi, i-video nobe ingoma levela eMsakatweni we-JW lekukhutsatile? Ukhona yini lokukhutsate ngemavi latsite nobe lokukhutsate ngembhalo? Singasheshe silukhohlwe lutsandvo lwebazalwane betfu nabodzadze nesikhutsato lesisitfola eVini laNkulunkulu. Kodvwa leti tipho letinhle kakhulu letivela kuJehova. (Isa. 65:13; Mak. 10:29, 30) Tibufakazi bekutsi uyakukhatsalela. (Isa. 49:14-16) Tikhombisa nekutsi kuyamfanela kutsi umetsembe.

11. Yini leyasita Aida kutsi ancobe kwesaba?

¹¹ Aida, lohlala eSenegal, wanaka indlela Jehova lamsekela ngayo ngesikhatsi abhekene nenkinga. Njengobe awekucala, batali bakhe bebalindzele kutsi utawenta imali leyenele yekutsi atinakekele yena futsi anakekele nabo. Kodvwa ngemuva kwekwenta kuphila kwakhe kube melula kuze abe lihlahlandlela, besekadvonsa kamatima etimalini. Umndeni wakubo wamtfukutselela futsi wamsola. Utsi: “Bengesaba kutsi ngeke ngikhone kusita batali bami nekutsi bonkhe bebatangilahla. Ngaze ngasola Jehova ngekuvumela tintfo kutsi tibe timbi ngalendlela.” Ngemuva kwaloko weva inkhulumo emihlanganweni yelibandla. Aida utsi: “Lesikhulumi sasikhumbuta kutsi kunobe ngumaphi emanceba lasetinhlitiyweni tetfu, Jehova uyawati. Kancane kancane seluleko lengasinikwa ngulabadzala belibandla kanye nalabanye sangicinisekisa kutsi Jehova uyangitsandza. Nangithantaza kuJehova ngacala kuciniseka kakhulu kutsi utangisita futsi ngaba nekuthula njengobe ngibona aphendvula imithantazo yami.” Ngekuhamba kwesikhatsi Aida wawutfola umsebenti lowamsita kutsi akhone kutisekela njengobe alihlahlandlela futsi asekele batali bakhe kanye nalabanye. Utsi: “Ngifundze kwetsembela kuJehova ngalokuphelele. Nyalo nangicedza nje kuthantaza, kwesaba kwami kuyaphela.”

 YINI JEHOVA LASETAWUYENTA?

12. Ngekusho kweTihlabelelo 56:9, yini Davide lebekaciniseka ngayo?

¹² Fundza Tihlabelelo 56:9. Lelivesi lichaza lenye indlela Davide lakuncoba ngayo kwesaba kwakhe. Ngisho nobe kuphila kwakhe bekusolo kusengotini, wacabangisisa ngaloko Jehova bekasetawumentela kona. Davide bekati kutsi Jehova utamkhulula ngesikhatsi lesifanele. Ngetulu kwako konkhe, Jehova bekatsite Davide utawuba yinkhosi lelandzelako yaka-Israyeli. (1 Sam. 16:1, 13) KuDavide, nobe yini Jehova layetsembisile bekufana nekutsi seyentekile.

13. Yini lesingaciniseka ngayo ngaJehova?

¹³ Yini Jehova latsembise kukwentela yona? Asikalindzeli kutsi asivikele kuto tonkhe tinkinga. c Nobe kunjalo, nobe ngutiphi tinkinga longabhekana nato kulelive, Jehova utawuticedza emhlabeni lomusha. (Isa. 25:7-9) UMdali wetfu unemandla lamakhulu ekuvusa labafile, ekuselapha nekususa bonkhe labo labasiphikisako.​—1 Joh. 4:4.

14. Yini lesingacabangisisa ngayo?

¹⁴ Nawutiva wesaba, cabangisisa ngaloko Jehova latakwenta esikhatsini lesitako. Cabanga ngekutsi utawutiva njani nasekangekho Sathane, sekunebantfu labalungile esikhundleni salababi, futsi uba bete sono kancane kancane lilanga nelilanga. Emhlanganweni wesifundza wa-2014 kwaba nemboniso wendlela lesingacabangisisa ngayo ngelitsemba letfu. Kulomboniso, lomunye babe bekacoca nemndeni wakhe ngekutsi umbhalo wa-2 KuThimothi 3:1-5 bewungabekwa njani ngendlela leyehlukile kube lamavesi bekasho kutsi kutawuba njani kuphila ePharadisi, watsi: “Emhlabeni lomusha kutawuba netikhatsi letijabulisako. Ngobe bantfu batawutsandza labanye, batsandze liciniso, balinganisele, batfobeke, badvumise Nkulunkulu, balalele batali, babonge, betsembeke, batsandze imindeni yabo, bavume kwenta tivumelwane, bahlale bakhuluma kahle ngalabanye, batibambe, babe nemoya lophansi, batsandze lokuhle, bakhulume liciniso, batfobele labanye, bangatigcabhi, batsandze Nkulunkulu kunekutsandza injabulo, indlela labaphila ngayo ikhombise kutsi bamhlonipha mbamba Nkulunkulu; bantfu labanjalo ubonamatsela kubo.” Kuyenteka yini kutsi wena nemndeni wakho nobe nalabanye bazalwane nicoce ngekutsi kutawuba njani kuphila emhlabeni lomusha?

15. Nanobe Tanja bekesaba, yini leyamsita kutsi ancobe kwesaba?

¹⁵ Lomunye dzadze waseNorth Macedonia lokutsiwa nguTanja wakuncoba kwesaba ngekutsi acabange ngetibusiso latawutitfola esikhatsini lesitako. Batali bakhe bebangafuni mbamba kutsi adadishe liBhayibheli. Utsi: “Letinye tintfo lebengesaba kutsi titawenteka, tenteka. Make bekangishaya njalo nangibuya emihlanganweni yelibandla. Batali bami batsi batangibulala nangabe ngiba nguFakazi waJehova.” Ekugcineni, Tanja bamcosha ekhaya. Wenta njani? Utsi: “Nganaka kutsi kukhetsa kuhlala ngetsembekile kuJehova kutangenta ngijabule kuze kube phakadze. Ngaphindze ngacabangisisa ngendlela Jehova latangibusisa ngayo emhlabeni lomusha ngenca yanobe yini lokungenteka ingilahlekele kulelive, nangekutsi ngitatikhohlwa tonkhe tintfo letimbi.” Tanja wahlala etsembekile, futsi Jehova wamsita kutsi atfole indzawo yekuhlala. Lamuhla, Tanja ushade nemzalwane lowetsembekile futsi bajabulile njengobe basemsebentini wasikhatsi sonkhe.

 KHULISA INDLELA LOMETSEMBA NGAYO JEHOVA LAMUHLA

16. Yini letasisita kutsi sihlale sinesibindzi nasibona kwenteka tintfo lokwaphrofethwa ngato kuLukha 21:26-28?

¹⁶ Ngekuhlupheka lokukhulu, bantfu “batawesaba kakhulu.” Kodvwa bantfu baNkulunkulu batawuma bacine futsi babe nesibindzi. (Fundza Lukha 21:26-28.) Yini letawenta kutsi singesabi? Kungobe sitawube sesikufundzile kwetsemba Jehova. Tanja, lesikhulume ngaye utsi loko lokwenteke ekuphileni kwakhe kumsite kutsi akhone kubhekana naletinye tinkinga. Utsi: “Ngifundze kutsi Jehova angasisita sibeketelele nobe nguyiphi inkinga futsi asibusise. Ngaletinye tikhatsi kungabonakala ngatsi labanye balawula tintfo, kodvwa liciniso likutsi Jehova unemandla lamakhulu kunabo. Nanobe kungasimnandzi kuba nenkinga, kodvwa itawuphela.”

17. Sitasisita njani sihloko semnyaka wa-2024? (Buka sitfombe lesisekhasini lekucala.)

¹⁷ Lamuhla kugcwele kwesaba. Kodvwa njengaDavide, singakhetsa kungalawulwa kwesaba. Sihloko semnyaka wa-2024 singumthantazo waDavide loya kuJehova lotsi: “Nangesaba, ngivele ngetsembele kuwe.” (Hla. 56:3) Naku lokwashiwo ngulesinye sati seliBhayibheli ngalelivesi: Davide “bekangahlali acabanga ngetintfo lebetimesabisa nobe abuke tinkinga takhe, kunaloko bekabuka uMsindzisi wakhe lebekatamkhulula.” Cabanga ngalesihloko semnyaka etinyangeni letitako, ikakhulukati nangabe ubhekene netimo letikwesabisako. Tinike sikhatsi sekucabanga ngetintfo letentiwe nguJehova esikhatsini lesendlulile, latentako nyalo nalatawutenta esikhatsini lesitako. NjengaDavide, nawe ungasho utsi: “Ngetsembele kuNkulunkulu, ngiko ngingesabi.”​—Hla. 56:4.