1. ¿Chúsiá ti isini kaachi majaa níliporé?

 SINÉAMI ti majaa nili isini kaachi tákoré echoná Biblia ma ti bineli japi ta ke majásaré echi japi ma suwili, echi demonios alí japi ikimea pe aminana. Nalí, tamujé ko piré japoná ikí “wabé majajáriami namuti”, japi riká guerras, nawilí alí japoná echi pagótami we cha nokáami ju (Luc. 21:11). Ayénachó keʼré japi ta majaa nílipo echi gobiernos, tamujé téemala alí jarecho pagótami japi ke galé echi bichíwali. Alí jaré ko majaa nili jiti mayé japi ke omérima anachia echi namuti jilírami japi ikí alí japi ikimea pe aminana.

2. ¿Piri ikili japalí David nawali echoná Gat?

² Natabo bilé rijoi jitra japi Onorúami nijéwami nili alí japi ayénachó isini kaachi majaa nílili, echi ko ju David. Japalí echi silíami Saúl najatie echi, jiti miʼlimea, echi ko másili bilé ciudad filistea Gat riwéachi. Japalí echi silíami Akís, Gat nuláami, aneiru japi David bilé sontarsi we jiwérami nili alí japi miʼali wiká miles filisteos, David ko we majali (1 Sam. 21:10-12). David ko we natie piri isima echi silíami binoy yúa. Nalí, ¿piri isili jiti ma ke majaa nílima?

3. Japi riká aní Salmo 56:1-3, 11, ¿piri isili David jiti ma ke majaa nílima?

³ Echoná Salmo 56, David ko ruyé chu nílili japalí asali echoná ciudad Gat. Echoná ayénachó ruyé chúsiá majaa nílili alí piri iʼwírili jiti ma ke majama: echi ko we bichíwili Jeobá (leeri Salmo 56:1-3, 11). Alí we aʼlá nili japi riká isili. ¿Chúsiá? Jiti Jeobá iʼwírala jitra, David ko nátili isimia bilé namuti japi ke wiká pagótami nátili nokimea: isili japi riká ko lowíami ka. Alí jepuná japi isili we aʼlá nili jiti natárili Akís japi lowíami ju alí japi ke namú isima, jiti la riweli ku simíami alí David ko sapú ku másili (1 Sam. 21:13-22:1).

4. ¿Piri tamó iʼwírima aminabi we bichiwia Jeobá? Ruyé bilé ejemplo.

 ⁴ We bichiwia Jeobá ayénachó tamó iʼwírima jiti ta ke majaa nílipo. Nalí, ¿chúriká ti omeri aminabi we bichiwia Jeobá japalí ti majaa nili? Natabo jepuná ejemplo jitra: japi tamó aneri japi ta nayú bilé nayulí jitra. Kulí ko ati majaa nílimiré, nalí machiyá japi echi doctor japi tamó iʼwírima we aʼláala ju, a keʼré japi ta ma ku kilí nílipo. Ayénachó a keʼré japi chabé echi ko ma ku saʼweli wiká pagótami chopi iyiri nayúami. Jipi ko echi ko we aʼlá tamó kipúa atí alí tamujé ko nili japi echi ko a inami japi ta nili. Alí a keʼré japi echi ko tamujé ané japi tamó iyama bilé ówili japi ma iʼwírili wiká pagótami. Echi riká cho ikí Jeobá yúa, ati aminabi we bichíwipo echi, ati natásaká echi namuti japi ma isili, japi isiá atí jipi alí japi isima tamujé jitra pe aminana. Alí echoná Salmo 56 ruyé japi David echi riká isili. Japalí ti biné jaré echi versículos, natabo chúriká tamujé ayénachó omeri aminabi we bichiwia Jeobá alí echi riká ma ke majaa nílipo.

¿PIRI MA ISILI JEOBÁ CHABÉ?

5. ¿Piri namuti nátili David ma ke majaa nílimia? (Salmo 56:12, 13).

⁵ Tákoré David ikiyé namuti we jilírami, echi ko nátili echi namuti aʼláala japi Jeobá ma isili chabé (leeri Salmo 56:12, 13). Echi ko wisabé niraa echi riká isili japalí biteili. Japi riká, isini kaachi echi ko nátili echi namuti jitra japi Jeobá niwali, alí echi iʼwírili néwalayá japi Jeobá ko we omérami ju alí we galé echi pagótami (Sal. 65:6-9). Ayénachó nátili japi Jeobá ma isili chabé jarecho pagótami jitra (Sal. 31:19; 37:25, 26). Alí wabé natéami ko ju japi David ko nátili japi Jeobá isili echi jitra. Japi riká, echi ko nátili japi Jeobá echi iʼwírili alí tibuli japalí jonsa taa muchi nili (Sal. 22:9, 10). Natia suwaba jepuná namuti, iʼwírili David aminabi we bichiwia Jeobá.

6. Japalí ti majaa nili, ¿piri tamó iʼwírima aminabi we bichiwia Jeobá?

⁶ Japalí mi majaa nílisa, nárika isí: “¿Piri ma isili Jeobá chabé?”. Bilé namuti japi mi omeri isiá ko ju, natia echi namuti  japi echi niwali. Japi riká, japalí ti iné japi Jeobá tibú echi chuluwí alí siwáchili, tákoré ke niwárami nili japi riká echi alí jiti echi nijéwima, tamujé ko aminabi we bichiwi japi ayénachó tamujé tibuma (Mat. 6:25-32). Ayénachó natá japi Jeobá ma isili echi nijéwami jitra. Japi riká, ami omeri binea echi pagótami jitra japi uchuwi echoná Biblia alí japi we bichíyami nili o leeria bilé experiencia echi jitra japi Jeobá nijéwami ju jipi piréami. a Alí natá chúriká Jeobá mi tibú jipi chéami. ¿Chúriká mi iʼwírili jiti mi machimea echi bichíwali? (Juan 6:44). ¿Chúriká isili Jeobá mi iyayá japi mi tánili? (1 Juan 5:14). ¿Chúriká mi iʼwiri sinibí rawé japi Jeobá isili nijía binoy Nolá Jesús? (Efes. 1:7; Heb. 4:14-16).

7. ¿Chúriká iʼwírili Vanessa japi ikili echi profeta Daniel?

⁷ Bilé hermana Haití bitéami, Vanessa riwéami, b ikili bilé namuti we jilírami japi we majárili. Bilé rijoi japi biteili echoná mulipi, raʼichie teléfono néeka alí sinibí júulie mensajes, iʼwérili anéi japi echi nóviawala nima. Echi ko aʼlá ruyeli japi ke echi nóviawala nima, nalí echi rijoi ko aminabi we iyoli alí aneli japi cha olama. ¿Piri isili Vanessa jiti ke majama? Echi ko iʼwérili isili binoy tibumia alí bilé anciano ayénachó iʼwírili jiti raʼichama echi weli jáwami yúa. Vanessa ko ayénachó nátili chúriká chabé Jeobá tibuli japi echi nijéwami nili. Echi ko jéaní: “Bachá japi ni nátili ko ju echi profeta Daniel jitra. Tákoré ke cha isili, echi ko pátami nili japoná wiká mawiyá lochéami niruili, nalí Jeobá ko tibuli. Ani aneki Jeobá japi nijé ko ma isili suwaba japi ni omeri alí japi tamí iʼwírima. Miná ko ni ma ke majaa nilie” (Dan. 6:12-22).

¿PIRI ISIÁ ATÍ JEOBÁ JIPI?

8. ¿Piri namuti we aʼlá machiyé David? (Salmo 56:8).

⁸ Tákoré David cha ikimea riweili echoná Gat, japoná asali, echi ko ke we majali. Echi ko nalí nátili echi namuti japi Jeobá isimí echi jitra echalí japalí majaa nílili. David machili japi Jeobá echi iʼwiri, tibú alí inami japi echi inili (leeri Salmo 56:8). Echi ko ayénachó iʼwérili nareli alí iʼwíritami nili echi amigos we nijéwami jitra japi riká Jonatán alí echi sumo sacerdote Ahimélec (1 Sam. 20:41, 42; 21:6, 8, 9). Tákoré echi silíami Saúl miʼlinali David, echi ko ke miʼlirúami nili. Echi ko we aʼlá machiyé japi Jeobá we aʼlá machí japi echi ikí alí japi chu nílili.

9. ¿Piri namuti machí Jeobá ibili tamujé jitra?

⁹ Ami ikiyáaká namuti we jilírami alí mi majaa níliaká, newalá japi Jeobá ko ke bi machí japi mi ikí, nalí ayénachó machí japi mi chu nili. Japi riká, japalí echi israelitas risoa olárami nili japalí pioni nili echomí Egipto, Jeobá ko we aʼlá machili japi “chu nilia muchuwi” (Éx. 3:7). Ayénachó japalí David wikarali, echi ko anili japi Jeobá a iné echi karú ikiwáami japi olá alí japi nili (Sal. 31:7). Alí japalí echi puéblowala risoa nilie echi namuti jitra japi ke aʼlá nokali, Jeobá “ayénachó we risoa nílili” (Is. 63:9). We ti simá nili machiyá japi Jeobá ko a machí japi ta nili alí japi tamó iʼwírinali jiti ma ke majabo.

10. ¿Piri mi iʼwiri aminabi we bichiwia japi Jeobá ko we mi galé alí japi sinibí mi iʼwírinali?

 ¹⁰ Ati ikiyáaká namuti we jilírami japi tamó majari, a keʼré japi ta we jilí nirabo inea chúriká Jeobá tamó iʼwiri. Echi riká ti ikiyáaká, ¿piri ta nokisáré? Tánipo Jeobá japi tamó iʼwírima machiyá piri ju japi echi isimí tamó iʼwiria (2 Rey. 6:15-17). Miná ko natabo: ¿Achi echoná napawíliwachi ati kipuli bilé nawésali o bilé comentario japi tamó iʼwérili iyali? ¿Achi bilé publicación, video o bilé canción tamó iʼwérili iyali? ¿Achi bilé hermano tamó leérili bilé texto o anili jaré raʼíchali japi tamó ku kanílitili? Isini kaachi ke ti newalá japi suwaba echi namuti japi ta olá binemia Jeobá jitra alí japi echi hermanos we simárika noká tamujé yúa, bilé chiliwéliami ju japi Jeobá nijí (Is. 65:13; Mar. 10:29, 30). Suwaba echi namuti newariwéliti japi echi ko we tamujé galé alí japi tamujé ko bichíwisaré echi (Is. 49:14-16).

11. ¿Piri iʼwírili Aida jiti ma ke majama?

¹¹ Bilé hermana Senegal bitéami Aida riwéami, ikili bilé namuti jilírami alí echi ko ineli chúriká isimí Jeobá echi iʼwiria. Jiti echi walúala nili, echi wénwala ko nakili japi Aida mema wiká winomí alí echi riká omérima olayá japi newalé alí iʼwiria echi. Nalí, echi ko ke echi riká isili jiti we nóchinali Jeobá japi riká precursora, jiti la kuabi winomí meli. Echi téemala ko we naʼáwili echi yúa alí cha riká raʼíchili echi jitra. Aida ko aní chu nílili: “We ni majae jiti ni ke omérimia nili iʼwiria nijé wénwala alí japi sinéami cha riká raʼichama tamí jitra. Ani nátiki japi Jeobá iyiri ju jiti riweli japi ni ikimea namuti we jilírami”. Nalí siné kaachi Aida ko kipuli bilé nawésali japi we iʼwírili echi: “Echi hermano ko tamó newalárili japi Jeobá ko aʼlá machí suwaba japi tamó risoa níliti. Ayénachó echi ancianos alí jarecho hermanos tamí aneli namuti newalárimia japi Jeobá we tamí galé. Echi tamí iʼwírili jiti ni kilipi niraa ku kanílisima. Ani ku chotásiki we bichíwika raʼichia Jeobá yúa alí japalí ni ineli chúriká echi tamí iʼwiri, ani kilí nili”. Pe aminana, Aida ko riwali bilé nóchili japoná wiká pe winomí meli japi jitra  omérili iʼwiria binoy wénwala alí echi riká aminabi precursora niya. Aida ko jéaní: “Ani bineki we bichiwia Jeobá alí raʼichia echi yúa tamí iʼwiri jiti ni ma ke majama”.

¿PIRI ISIMA JEOBÁ PE AMINANA?

12. Japi riká aní Salmo 56:9, ¿piri aʼlá machiyé David?

¹² (Leeri Salmo 56:9). Jepuná versículo ruyé bilecho namuti japi isili David ma ke majamia japalí ikiyé namuti we jilírami: nátili japi Jeobá isima echi jitra pe aminana. Echi ko machiyé japi Onorúami echi tibuma japalí aʼlá ju, jiti Jeobá ma anili japi David nuláami nima riweili echoná Israel (1 Sam. 16:1, 13). David ayénachó aʼlá machiyé japi Jeobá a isima japi ma anili.

13. ¿Piri ti aʼlá machí japi isima Jeobá?

¹³ ¿Piri namuti tamó ané Jeobá? Echi ko ke tamó ané japi ta sinibí aʼlá pirélipo, ke olayá karú ikiwáami. c Tákoré mi ikiyé chuwé namuti jilírami, Jeobá ko ma anili japi echoná kulíwami Wichimóbachi ma ke risoa nílipo (Is. 25:7-9). Echi ko we omériami ju, jiti la omérima ku jawasia japi ma suwili, tamó ku saʼwea echi nawilí jitra japi ta olá alí suwabia sinéami echi japi tamó sayeri (1 Juan 4:4, TNM).

14. ¿Piri namuti jitra ati omeri natia?

¹⁴ Japalí mi majaa nílisa, natá japi Jeobá isima pe aminana. Natá chúriká pirélipo japalí Satanás ma ke itélisa, japalí echi pagótami cha nokáami suwábitami nisa alí japalí pirélisa bi echi pagótami japi aʼláala ju alí japalí ti kilipi niraa ma sébali aʼlá nokáami nílisipo. Bamíali 2014 echoná waʼlú napawíliwachi japi bikiá rawé rojorá, niruli bilé demostración japoná ruyeli chúriká ti omeri natia japi ikimea pe aminana. Echoná demostración, bilé onolá raʼíchili echi téemala yúa japi chúriká animeli 2 Timoteo 3:1-5 bilé profecía nísaká japi chúriká pirélipo echoná Wichimóbachi we baʼóachi: “Echoná Wichimóbachi we baʼóachi we kanila pirélipo. Jiti echi pagótami anakupi galema; we galema echi bichíwali, ke niráami nima, riwíwima Onorúami, nijéwami nima echi wénwala, matétara nijíami nima alí ke riwema galea echi japi we galé, we galema echi téemala, sinibí katúwika nokimea, sinibí aʼlárika raʼichama jarecho jitra, iʼwérili nokimea ke nokayá japi chati ju alí nokayá japi aʼlá ju, we kilí nima, galema echi namuti japi aʼláala ju, anakupi niraa we bichíwima alí simá nokáami nima, ke tasi niráami nima, we galema Onorúami ke ko echi namuti japi nirú jenaʼí alí ne sulachí jonsa nijéwima Onorúami. Sinibí napawí echi riká nokáami pagótami yúa”. ¿Achi ti raʼichi tamujé téemala yúa o echi hermanos yúa japi chúriká pirélipo echoná Wichimóbachi we baʼóachi?

15. ¿Piri iʼwírili Tanja jiti ma ke majama?

¹⁵ Tanja ju bilé hermana japi bité echomí Macedonia del Norte, echi ko aní japi natia japi Jeobá isima pe aminana, iʼwírili jiti ma ke majama. Japalí kulí chotásili binea echi Biblia, echi wénwala ko we naʼáwili echi yúa, Tanja ko jéaní: “Ikili echi namuti japi ni wabé majali japi ikimea. Nijé iyela ko sinibí tamí wipisoe japalí ni ku nawayé napawíliwachi jonsa. Nijé wénwala ko tamí aneki japi tamí miʼlimea ani testigo Jeobá nílisaká”. Tanja ko miná melárami nili echoná bitichí jonsa, jiti la ¿piri isili? Echi ko jéaní: “Ani nátiki japi ni ke riwésaká nijewia Jeobá, nijé ko sinibí we kaníliami nima. Ani natie, tákoré ni  jipi wikawie jaré namuti, echoná Wichimóbachi baʼóachi Jeobá tamí iyama rasía wiká namuti alí isima japi ni ma ke newalama echi chati namuti japi ni ikili”. Tanja ko sinibí nijéwili Jeobá, alí echi iʼwírili jiti riwimea japoná bitélima. Jipi ko niwika atí bilé hermano yúa japi we nijéwami ju alí okuaka we kanila nóchilia muchuwi Onorúami tiempo completo niraa.

IʼWÉRILI NOKIBOA JIPI AMINABI WE BICHIWIA JEOBÁ

16. ¿Piri tamó iʼwírima jiti ke majabo japalí ikisaa japi aní Lucas 21:26-28?

¹⁶ Japalí ma gran tribulación kaachi, wikabéala echi pagótami “ne wabé majaga, tarapé chiwikisáa nírama” o natajema. Nalí japi ta Onorúami nijéwami ju ko, ati ke majabo alí sinibí nijéwami nipo (leeri Lucas 21:26-28). ¿Chúsiá ti ke majabo? Jiti ta ma aʼlá binékami nibo we bichiwia Jeobá. Tanja, japi ta jitra ma raʼíchiki, aní japi echi namuti jilírami japi ikili, iʼwírili anachia jarecho namuti jilírami. Echi ko jéaní: “Ani bineki japi Jeobá ko a omeri tamó iʼwiria anachia chuwé namuti jilírami alí isiá japi ta aʼlá ikiboa. Isini kaachi ati níliporé japi echi pagótami we omériami ju nokayá suwaba namuti, nalí ke echi riká ju jiti Jeobá bilepi bi ju japi wabé omériami ju. Alí tákoré echi namuti japi ta ikí we jilí ju, siné kaachi ma ke nirúlima”.

17. ¿Chúriká tamó iʼwírima echi texto bamíali 2024? (Iné echi bachá foto japi chukú jena oselí).

¹⁷ Tákoré jenaʼí Wichimóbachi ikí wiká namuti japi tamó majáriti, tamujé ko ju japi riká David alí ti ke wabé majaa. Echi texto bamíali 2024 ju echi raʼíchili japi David aneli Jeobá: “Japalí ni majaa nili, nijé ko mi bichiwi” (Sal. 56:3). Bilé rijoi japi we machíami ju echi Biblia jitra, jériká ruyeli jepuná versículo jitra: “David ko ke we nati echi namuti japi we majari echi o echi namuti jilírami japi ikí, nalí echi ko we bichiwi echi bilepi japi a omeri echi niyubia”. Sinibí newalá echi texto bamíali 2024, nalí wabé japalí mi ikí namuti jilírami. Natá echi namuti japi Jeobá isili chabé, japi isimí jipi alí japi isima pe aminana. Ami echi riká isísaká, mujé ko animea japi riká David: “Ani we bichiwi Onorúami; ke ni majaa” (Sal. 56:4).