1. Ndíjkha jngóo nguáná ma̱ndoo mamiñúlúʼ rá.

 XÚGIÁANʼ namíñulú nguáná. Gajkhun má dí náa Biblia nijmañulúʼ dí ragíʼmaa mamiñulúʼ eni̱ bi̱ nikháñún, xa̱bu̱ wéñiiʼ ni má dí gáʼkha̱ nda̱wa̱á. Maski ajndu xúʼko̱ kuwáánʼ náa mbá numbaaʼ dí rígá guerra, xkujndu ga̱jma̱a̱ nandii rí naʼni dí ‹xa̱bu̱ mamiñún ga̱jma̱a̱ xúgíʼ dí rígá› (Luc. 21:11). Mbáa ma̱ngaa namíñulú eni̱ xa̱bu̱ ñajunʼ, bi̱ kúwíin náa guʼwúlú o eʼwíinʼ bi̱ tsénigu̱u̱nʼ xóo nduʼyamajkuíí Dios. Eʼwíinʼ namíñún dí xáʼngu̱u̱n gúni ga̱jma̱a̱ mbá xkujndu dí guáʼdáá o mbáa dí ma̱ndoo muraʼníí nda̱wa̱á.

2. Aratá xú káʼnii nikumu̱u̱ David índo̱ nixtáa náa Gat.

² Gundxaʼwamíjna̱ ga̱jma̱a̱ numuu mbáa xa̱bi̱i̱ Dios bi̱ nguáná nimíñuu. Ikhaa nindxu̱u̱ David. Índo̱ Rey Saúl nixkoo mu maxíyáa, nigáyúu ni̱jkha̱ náa xuajin Gat, náa xuajñún filisteos. Índo̱ nitháán Akís rey bi̱ xtáa náa Gat, rí David nindxu̱u̱ mbáa Soldado mixkujiiʼ ga̱jma̱a̱ nigudíin “mbaʼin” filisteos, ikhú David “nimíñuu wéñuuʼ” (1 Sam. 21:​10-12). Ra̱ʼkhá tháán nixmiéjuunʼ, numuu dí tséʼyoo ndiéjuunʼ gáʼniuu rey. Ndiéjunʼ niʼni David mu nánguá mamiñúu rá.

3. Xó má naʼthí náa Salmo 56:​1-3, 11, ndiéjuunʼ niʼni David mu nánguá mamiñúu rá.

³ Náa Salmo 56 na̱ʼkha̱ raʼthí xú káʼnii niku̱mu̱u̱ David índo̱ nixtáa náa xuajin Gat. Náa Salmo má rúʼko̱ naʼthí, náá numuu rí namíñuu ga̱jma̱a̱ ndiéjuunʼ nimbáyúu mu nánguá mamiñúu: Rí maku̱mu̱u̱ kaʼyoo Jeobá (atraxnuu Salmo 56:​1-3, a 11). b Dí  niraʼwíí maʼni ninindxu̱u̱ májánʼ. Jeobá nimbáyúu David, numuu rí ndiyáʼ xóo maʼni: Niʼníí rí xóo nakágu̱u̱nʼ. ¡Ga̱jma̱a̱ nigájnuu májánʼ rígi̱! Ikha jngóo rey Akís, na̱nguá ndiʼyoo xóo mbáa xa̱bu̱ gamíi, ndiʼyoo xóo mbáa bi̱ naʼni xkájkiu̱u̱n. Xúʼko̱ káʼnii niʼni rí David niʼngo̱o̱ nigáyúu (1 Sam. 21:​13–22:1).

4. Xú káʼnii gándoo matani̱ mu maʼni mba̱a̱ rí nakumaaʼ xtayáá Jeobá rá. Aratá mbá xkri̱da.

⁴ Rí makumulú kuʼyáá Jeobá, rúʼko̱ gámbáyulú mu nánguá mamiñulúʼ. Mú, xú káʼnii gándoo mu̱ʼni̱ mba̱a̱ rí nakumulú kuʼyáá Jeobá, itháán índo̱ namíñulú rá. Guʼgíʼ mbá xkri̱da. Á mu nutulúʼ dí kuaʼdáá mbá nandii, mbáa nákha muthulú mamiñúlúʼ. Mu rí makumulú dí xtáa raʼni thanulú mbáa médico bi̱ najmañuu, rúʼko̱ gámbáyulú mu xáxmiéjunlú wéñuuʼ. Mbáa médico buʼko̱, niʼni thanún má xa̱bu̱ bi̱ niguáʼdáá ikháá má nandii. Ga̱jma̱a̱ rí xúgi̱, naʼdxawúnlú ga̱jma̱a̱ nduʼyáá májánʼ dí ikhaa nakro̱ʼo̱o̱ kaʼyulú. Mbáa asndu maʼthúlú dí maxnúlú mbá thana rí nimbáñún mbaʼin xa̱bu̱. Xúʼko̱ kayuuʼ nindxu̱u̱ Jeobá: Makumulú itháán kuʼyáá á mu nundxa̱ʼwa̱míjna̱ rí niʼni, dí xtáa raʼni ga̱jma̱a̱ rí maʼni nda̱wa̱á. Rúʼko̱ nindxu̱u̱ rí niʼni David, dí na̱ʼkha̱ raʼthí náa Salmo 56. Índo̱ guraxnuu tikhuu versículo, gundxaʼwamíjna̱ mangáánʼ xú káʼnii gúʼni mu makumulú kuʼyáá itháán Jeobá ga̱jma̱a̱ rí nánguá mamiñulúʼ.

NDIÉJUUNʼ NIʼNI JEOBÁ NÁKHA WAJYÚUʼ RÁ.

5. Ndiéjuunʼ nindxa̱ʼwáminaʼ David, mu nánguá mamiñúu rá. (Salmo 56:​12, 13)

⁵ Maski ajndu gamíi makhañúu David, mú ikhaa ndiʼyoo náa rí májánʼ dí niʼni Jeobá nákha wajyúuʼ (atraxnuu Salmo 56:​12, 13). c Náa mbá xúgíʼ mbiʼi rí nixtáa David, niʼni rígi̱. Mbá xkri̱da, nandxa̱ʼwáminaʼ náa rí niʼniwíi Jeobá ga̱jma̱a̱ rúʼko̱ nimbáyúu mbaʼyoo dí Ikhaa gíʼdoo tsiaki̱i̱ ga̱jma̱a̱ nandoo kaʼñúún wéñuuʼ xa̱bu̱ (Sal. 65:​6-9). Ga̱jma̱a̱ nandxa̱ʼwáminaʼ rí niʼni Jeobá ga̱jma̱a̱ numún eʼwíinʼ (Sal. 31:19; 37:​25, 26). Niríyaʼ mbiʼi mu mandxaʼwáminaʼ rí Jeobá niʼni ga̱jma̱a̱ numuu ikhaa. Ikhaa niñe̱wu̱u̱n asndu nákha kaʼníí  chíʼgíiʼ (Sal. 22:​9, 10). Rí mandxaʼwáminaʼ rígi̱, David niʼni rí maku̱mu̱u̱ kaʼyoo Jeobá ga̱jma̱a̱ xúgíʼ a̱jkiu̱u̱n.

6. Índo̱ namíñulú, xú káʼnii gámbáyulú rí nakumulú kuʼyáá Jeobá rá.

⁶ Índo̱ gámíñáaʼ, atrajximínaʼ: “Ndiéjuunʼ niʼni Jeobá nákha wajyúuʼ rá.” Ma̱ngaa atatsaʼwáminaʼ náa dí ikhaa niʼniwíi. Mbá xkri̱da, índo̱ nduʼyáá xú káʼnii Jeobá nañe̱wu̱u̱n ñu̱ʼu̱ ga̱jma̱a̱ ri̱ʼi̱, dí na̱nguá niguma xó má kaʼnii ikhaa ga̱jma̱a̱ rí xándoo mbuyamajkuíí, rígi̱ naʼni makumulú kuʼyáá itháán (Mat. 6:​25-32). Ma̱ngaa atatsaʼwáminaʼ ga̱jma̱a̱ numuu rí niʼni Jeobá ga̱jma̱a̱ numún xa̱bi̱i̱. Mbáa ma̱ndoo matanigajma̱a̱ xkridoo mbáa xa̱bu̱ bi̱ nigiʼdoo fe bi̱ naʼthí náa Biblia o matraxnuu mbá experiencia ndrígóo mbáa xa̱bi̱i̱ Dios rí mbiʼi xúgi̱. d Ga̱jma̱a̱ atatsaʼwáminaʼ xú káʼnii Jeobá nimbáyáaʼ mangáánʼ. Xú káʼnii nimbáyáaʼ rí nitatsinuuʼ rí gajkhun rá. (Juan 6:44.) Xú káʼnii niri̱ʼña̱a̱ʼ dí niratájkáan xá. (1 Juan 5:14.) Xú káʼnii eguma tsajkurámáánʼ xúgíʼ mbiʼi ga̱jma̱a̱ numuu tsigijñaʼ dí niʼni A̱ʼdióo bi̱ nandoo kaʼyoo rá. (Efes. 1:7; Heb. 4:​14-16.)

7. Xú káʼnii nimbáyúu Vanessa xkridoo Daniel, mu xámíñuu rá.

⁷ Mbáa ndxájulú bi̱ xtáa náa Haití bi̱ mbiʼyuu Vanessa e niraʼnuu mbá xkujndu dí niʼni mamiñúu. Mbáa xa̱bu̱ bi̱ xtáa náa xuajin rúʼko̱, naʼtároʼoo ga̱jma̱a̱ nakuʼma xúgíʼ mbiʼi mensaje inuu, rí asndu natsudaa mu manindxu̱u̱ novia ndrígóo. Vanessa niʼthúu̱n mbájmbu rí na̱nguá, mú xa̱bu̱ nikiʼnáa rí asndu niʼthúu̱n dí maxíyáa. Xú káʼnii niʼni Vanessa mu xámiñúu kaʼyoo xá. Ikha ndiyáʼ xó maʼni mu mañewumínaʼ ga̱jma̱a̱ mbáa anciano nimbáyúu mu maʼthúún xa̱bu̱ ñajunʼ bi̱ kúwá ikhí. Ma̱ngaa nigíminaʼ mandxaʼwáminaʼ xú káʼnii Jeobá nimbáñún xa̱bi̱i̱ nákha wajyúuʼ. Vanessa naʼthí: “Timbáa xa̱bu̱ bi̱ ni̱ʼkha̱ náa edxu̱ʼ ninindxu̱u̱ Daniel. Maski ajndu táʼni nimbá dí ra̱májánʼ, mú nixu̱ma̱a̱ʼ náa gajchún león bi̱ naxkidxu̱u̱n, ga̱jma̱a̱ Jeobá niʼni kríya̱a̱ʼ. Ni̱thu̱u̱n Jeobá rí ikhúún nini má xúgíʼ ga̱jma̱a̱ rí ikhaa mambáyuʼ. Ikhú niʼniñúuʼ ramíñúʼ” (Dan. 6:​12-22).

NDIÉJUUNʼ DÍ XTÁA RAʼNI JEOBÁ XÚGI̱ RÁ.

8. Ndiéjuunʼ rí ndiʼyoo gajkhun David rá. (Salmo 56:8.)

⁸ Maski ajndu gamíi muxíyáa David nákha nixtáa náa Gat, mú tániñaminaʼ dí rúʼko̱ marikhoo. Rí niʼni, ikhaa ndiʼyoo itháán náa dí Jeobá xtáa rambáyúu mbiʼi rúʼko̱. Ndiʼyoo dí Jeobá xtáa raxnúu ikha ga̱jma̱a̱ nañewu̱u̱n ga̱jma̱a̱ dí nakro̱ʼo̱o̱ kaʼyoo (atraxnuu Salmo 56:8). f Ma̱ngaa nimbayíí ga̱jma̱a̱ nixnáá tsiaki̱i̱ mígiu̱u̱, xó Jonatán ga̱jma̱a̱ Ahimélec bi̱ kayá edxu̱u̱ náa ndxajkun (1 Sam. 20:​41, 42; 21:​6, 8, 9). Maski ajndu rey Saúl nindoo maxíyáa, mú David niʼngo̱o̱ niʼni kríyamínáʼ. Ndiʼyoo gajkhun dí Jeobá ndaʼyoo dí xtáa ragíʼnuu ga̱jma̱a̱ xóo naku̱mu̱u̱.

9. Ndiéjuunʼ rí ndaʼyoo Jeobá náa ikháánʼlú rá.

⁹ Á mu xtáa natraʼníí mbá xkujndu gakhi̱i̱ ga̱jma̱a̱ namíñáaʼ, garmáʼáan a̱jkia̱a̱nʼ dí Jeobá raʼkháa i̱ndó ndaʼyoo dí xtáa ratagíʼníí, ma̱ngaa xú káʼnii ku̱ma̱a̱ʼ. Mbá xkri̱da nákha ninindxu̱ún ñumbáá xa̱bi̱i̱ náa Egipto, Jeobá ndaʼyoo májánʼ ‹rí nimíníiʼ› (Éx. 3:7). Mbá miʼtsú David niʼthí rí Jeobá ndiʼyoo ‹xóo nimínuuʼ› ga̱jma̱a̱ ‹dí niʼni maxmiéjuunʼ› (Sal. 31:7). Asndu índo̱ xuajñuu Dios namínuuʼ ga̱jma̱a̱ numuu dí raʼkhí niraʼwíí maʼni “Jeobá ma̱ngaa nagáwíi̱n a̱jkiu̱u̱n” (Is. 63:9). Ra̱ʼkhá tháán naʼni̱i̱  a̱jkiu̱lú índo̱ nduʼyáá rí Jeobá nakro̱ʼo̱o̱ kaʼyulú índo̱ namíñulú ga̱jma̱a̱ ikhaa nandoo mambáyulú mu xúʼko̱, nánguá mamiñúlúʼ.

10. Xú káʼnii tayáá gajkhun dí Jeobá naxmiéjuunʼ kaʼyaaʼ ga̱jma̱a̱ rí ikhaa gámbáyáaʼ xá.

¹⁰ Á mu kuwáanʼ náa xkujndu rí naʼni mamiñulúʼ, mbáa maʼniulú gakhi̱i̱ mbuʼyáá dí Jeobá xtáa nambáyulú. Ndiéjuunʼ ma̱ndoo mu̱ʼni̱ rá. Guʼtákáñíí mu mambáyulú mbuʼyáá dí xtáa raʼni ga̱jma̱á nindxu̱lú (2 Rey. 6:​15-17). Nda̱wa̱á gundxaʼwáá edxu̱lúʼ: Lá nixnulú tsiaki̱i̱ mbá comentario o mbá discurso rí niʼdxawíín náa reunión ráʼ. Lá nixnulú tsiaki̱i̱ mbá i̱yi̱ʼ, video o mbá ajmúú ráʼ. Lá niguxnuu mbá texto ndrígóo Biblia dí nixnulú tsiaki̱i̱ mbáa ndxájulú ráʼ. Nguáná itháán má ragákhi̱i̱ rí mambumulú rí xóo nandún kuyulú a̱ngiu̱lú ga̱jma̱a̱ xúgíʼ rí gíʼdoo numuu rí naxnulúʼ Jeobá (Is. 65:13; Mar. 10:​29, 30). Rúʼko̱ nasngájma rí ikhaa naxmiéjuunʼ kaʼyulú ga̱jma̱a̱ rí ikháanʼ makumulúʼ kuʼyáá (Is. 49:​14-16).

11. Ndiéjunʼ nimbáyúu Aida mu maniñuuʼ rí namíñuu rá.

¹¹ Aida mbáa ndxájulú a̱ʼgu̱ bi̱ xtáa náa Senegal niraʼnuu mbá xkujndu, mú ikhaa ndiʼyoo xú káʼnii Jeobá xtáa rambáyúu. Numuu rí ikhaa nindxu̱u̱ a̱ʼdá giʼnii, anu̱u̱ ga̱jma̱a̱ ru̱dúu̱ niguáʼthi̱i̱n dí ikhaa magiʼdoo mbá ñajunʼ náa madaaʼ mba̱a̱ mbújkha̱a̱, mu mambáyuminaʼ ikhaa ga̱jma̱a̱ mambáñún ikhiin. Mú ndxájulú niraʼwíi dí xágiʼdoo wéñuuʼ mu maʼngo̱o̱ mani̱ndxu̱u̱ precursora, ikha jngóo na̱nguá edaaʼ mba̱a̱ mbújkha̱a̱. Ikhú bi̱ kúwá náa goʼwóo nikiʼníin kuyáá ga̱jma̱a̱ nitanumáá. Aida eʼthí xóo nikumu̱u̱: “Nimíñúʼ dí xáʼngo̱o̱ gámbáyúu anu̱ʼ ga̱jma̱a̱ ru̱dúʼ ma̱ngaa rí xúgíinʼ mawiñu̱u̱nʼ kuyoʼ. Nijkhánú niku̱mu̱ʼ rí aʼkhúun Jeobá, numuu rí naniñuuʼ dí maʼni mba̱a̱ gamiéjunʼ rígi̱”. Mú mbá miʼtsu náa mbá discurso nidxawuun mbá rí nimbáyúu wéñuuʼ: “Ndxájulú niʼni marmáʼáan a̱jkiu̱nʼ rí Jeobá naʼninuuʼ ndiéjunʼ rí naʼni maxmiéjuunʼ o maxtáa ngíná mbáa. Ma̱ngaa bi̱ kuya̱ edxu̱u̱ ga̱jma̱a̱ eʼwíinʼ a̱ngiu̱lú, nithu̱nʼ tikhuu rí mambáyuʼ mba̱yo̱o̱ rí Jeobá nandoo kaʼyoʼ, rígi̱ nimbáyuʼ mu mañu mañúú maʼni a̱jkiu̱nʼ. Índo̱ nitajkáan náa Jeobá nigíʼdu̱u̱ niku̱mu̱ʼ ka̱yo̱o̱ dí ikhaa ma gámbáyúʼ ga̱jma̱a̱ niʼni maxtáá tsímáá”. Nda̱wa̱á nixkamaa mbá ñajunʼ náa niniñuuʼ mani̱ndxu̱u̱ precursora mú ma̱ngaa niʼngo̱o̱ nimbáyúu anu̱ʼ ga̱jma̱a̱ ru̱dúʼ ma̱ngaa nimbáñún eʼwíinʼ. Ikhaa eʼthí:  “Nijmañuu maku̱mu̱ʼ ka̱yo̱o̱ kájxi̱ Jeobá. Rí matajkáanʼ nambáyúʼ mu maniʼñúuʼ rí namíñúʼ”.

NDIÉJUNʼ GÁʼNI JEOBÁ NDA̱WA̱Á RÁ.

12. Xó má eʼthí Salmo 56:​9, ndiéjunʼ ndiʼyoo gajkhun David rá.

¹² (Atraxnuu Salmo 56:9). g Versículo rígi̱ naʼni mbuʼyáá imbo̱o̱ rí niʼni David mu maniñuuʼ mamiñúu: Nindxa̱ʼwáminaʼ dí gáʼni Jeobá ga̱jma̱a̱ numuu nda̱wa̱á. Ndiʼyoo rí Dios maʼni kríyaaʼ mbiʼi rí kaʼyoo. Numuu rí Jeobá niʼthí dí David mani̱ndxu̱u̱ rey ndrígóo Israel (1 Sam. 16:​1, 13). David ndiʼyoo gajkhun dí á mu Jeobá nikudaminaʼ maʼni, ikhaa ma gáʼnimbánuu dí niʼthí.

13. Ndiéjunʼ nduʼyáálú gajkhun rí maʼni Jeobá rá.

¹³ Ndiéjunʼ nikudaminaʼ Jeobá maʼni ga̱jma̱á ni̱ndxu̱lú rá. Gajkhun ma dí tsékudaminaʼ dí xúgi̱ xúguaʼdáá xkujndu. h Mú, tséʼniuu dí gúraʼníí náa numbaaʼ rígi̱, Jeobá nikudaminaʼ dí náa numbaaʼ nuxi̱ʼ maʼni gámbáa xúgíʼ xkujndu dí rígá (Is. 25:​7-9). Ikhaa gíʼdoo tsiakii mu makujxi̱ín bi̱ nikháñún, mu maʼni thanulú ma̱ngaa maʼnijngudi̱i̱ rí naʼni gawúnlú ga̱jma̱a̱ maʼni gámbíin xa̱bu̱ sia̱nʼ ndrígulú (1 Juan 4:4).

14. Ndiéjunʼ ma̱ndoo mundxaʼwamíjnalú rá.

¹⁴ Índo̱ gámiñaaʼ, atatsaʼwáminaʼ rí gáʼni Jeobá nda̱wa̱á. Atatsaʼwáminaʼ xú káʼni gákuwáanʼ índo̱ Gixa̱a̱ ni xáxtáa, índo̱ xa̱bu̱ ramíjíin ni xákúwi̱i̱n, i̱ndó xa̱bu̱ bi̱ míjíinʼ makuwíin ga̱jma̱a̱ índo̱ mañu mañúú mambáa aʼkhá ndrígulú. Náa asamblea regional dí nirígá tsiguʼ 2014 ni̱ʼkha̱ mbá demostración dí ma̱ndoo mambáyulúʼ mundxaʼwamíjna̱ ga̱jma̱a̱ numuu dí kuaʼti̱i̱nlú. Ikhí ndiʼyáá xú káʼnii mbáa ndxájulú xa̱biya̱ naʼtáminaʼ gajmíi̱n bi̱ kúwíin náa goʼwóo, ga̱jma̱a̱ numuu xú káʼnii gáʼthí rí na̱ʼkha̱ náa 2 Timoteo 3:​1-5 á mu nindxu̱u̱ mbá profecía náa naʼthí ga̱jma̱a̱ numuu Ku̱ba̱ʼ mitsaanʼ: “Náa numbaaʼ nuxi̱ʼ makuwáanʼ gagi. Numuu rí xa̱bu̱ maʼndún kuñúún a̱ngiu̱ún; maʼndún kuyáá Dios, xúni̱ mbaʼumíjna̱, mani̱ndxu̱ún xa̱bu̱ guabaaʼ, mbuyamajkuíí Dios, munimbu̱ún kuñún anu̱ún, muxnáa núma̱aʼ ga̱jma̱a̱ musngajma ngajua rí tsétumuu, maʼndún kuñún familia ndrígu̱ún, mambanún mu makuwá tsímáá, muthi rí májánʼ ga̱jma̱a̱ numún eʼwíinʼ, muñewa̱a̱n rí muni̱, mani̱ndxu̱u̱n xa̱bu̱ guabaaʼ, maʼndún kuyáá rí májánʼ, matatsimbaaʼ xtañún ga̱jma̱a̱ awa̱án gúyáá, xúni̱ mbaʼumíjna̱, maʼndún kuyáá Dios ki xóo rí nanigu̱u̱nʼ ikhiin ga̱jma̱a̱ gajkhun musngajma rí phú nduyamajkuíí Dios. Ayuʼ kanuu náa ikhiin”. Naguʼwúnlú muʼtámíjná gajmiúlú bi̱ kúwíin náa guʼwúlú o bi̱ nambájxulú gajmiúlú xú káʼni gákuwáanʼ náa numbaaʼ nuxi̱ʼ ráʼ.

15. Ndiéjunʼ nimbáyúu Tanja mu maniñuuʼ ramíñuu rá.

¹⁵ Tanja nindxu̱u̱ mbáa ndxájulú a̱ʼgu̱ bi̱ xtáa náa Macedonia del Norte, niʼngo̱o̱ niniñuuʼ dí namíñuu numuu rí nindxa̱ʼwáminaʼ dí nikudaminaʼ maʼni Jeobá. Ikhaa eʼthí rí índo̱ nigíʼdu̱u̱ niʼnigajmaa Biblia, anu̱u̱ ga̱jma̱a̱ ru̱dúu̱ nikiʼníin kuyáá: “Nirígá rí phú niʼni nimíñuu. Ru̱dúu̱ naxnúu mámbá rí na̱ʼkha̱a̱ náa reunión. Ikhaa ga̱jma̱a̱ anu̱ʼ nithu̱nʼ dí muxiñún á mu nanindxu̱ʼ Testigo”. Nixkriyaaʼ náa goʼwóo. Dí niʼni ikhaa xá. Ikhaa eʼthí: “Nindxa̱ʼwáminaʼ rí á mu nagújún jmbu náa Jeobá, maxtáá gagi kámuu mbiʼi. Ma̱ngaa nindxa̱ʼwáminaʼ xú káʼnii Jeobá gáʼni tsajkurámúún náa numbaaʼ nuxi̱ʼ, á mu nandáti̱go̱ʼ náa numbaaʼ rígi̱ ga̱jma̱a̱ mambumuʼ xúgíʼ dí naʼni maxtáá ngíná”. Tanja niwi̱ji̱ jmbu náa Jeobá ga̱jma̱a̱ ikhaa nimbáyúu maxkamaa náa maxtáa. Rí mbiʼi xúgi̱ ninújunʼ ga̱jma̱a̱ mbá ndxájulú bi̱ naʼni májánʼ ñajuunʼ Dios, mbá najmiin nuni̱ kájxi̱ ñajuunʼ Jeobá.

 ASNDU NÁKHA XÚGI̱ GAKUMULÚ KUʼYÁÁ ITHÁAN JEOBÁ

16. Ndiéjunʼ gámbáyulú mu xámíñulú índo̱ gambánuu dí naʼthí náa Lucas 21:​26-28 rá.

¹⁶ Índo̱ gákuwáanʼ náa ga̱ʼkhu̱ rí majphú mba̱a̱, mbaʼin xa̱bu̱ “makámindúún ga̱jma̱a̱ gamíi”. Mú xa̱bi̱i̱ Dios xámiñulúʼ ga̱jma̱a̱ muguajún jmbu (atraxnuu Lucas 21:​26-28). Náá numuu rá. Numuu dí naguʼwúnlú nakumulú kuʼyáá Jeobá. Tanja eʼthí, xkujndu dí niraʼnuu rúʼko̱ nambáyúu maraʼnuu i̱ʼwáʼ xkujndu gakhi̱i̱: “Nijmañuu rí nda̱a̱ nimbá dí xáʼngo̱o̱ mambáyulú Jeobá ga̱jma̱a̱ ikhaa gáʼni tsajkurámulú. Nguáná ma̱ndoo makujmaa dí eʼwíinʼ ma̱ndoo muni̱ xó má ikhiin nandún, mú raʼkháa xúʼko̱ numuu rí Jeobá nindxu̱u̱ bi̱ itháán gíʼdoo tsiaki̱i̱. Tséʼniuu má nguáthá mba̱a̱ gamiéjunʼ dí nuraʼníí, maʼga̱nú mbóo mbiʼi dí mambáa”.

17. Xú káʼni gámbáyulú texto rí kaʼyoo tsiguʼ 2024 rá. (Atayáá xtiʼkhuu rí na̱ʼkha̱ náa timbá ináa.)

¹⁷ Maski ajndu náa numbaaʼ rígá mbaʼa dí maʼni mamiñulúʼ, ikháanʼ nindxu̱lú xóo David ga̱jma̱a̱ tséniʼñááʼ dí gamíi maʼngo̱o̱. Texto rí kaʼyoo tsiguʼ 2024 nindxu̱u̱ ajngáa ndrígóo David dí niʼthúu̱n Jeobá: “Índo̱ namíñuʼ, nakumuʼ kayaaʼ” (Sal. 56:3). Mbá i̱yi̱i̱ʼ dí na̱ʼkha̱ raʼthí ga̱jma̱a̱ numuu versículo rígi̱, eʼthí: “David tséndxaʼwáminaʼ ga̱jma̱a̱ numuu rí naʼni mamiñúu o ga̱jma̱a̱ numuu xkujndu ndrígóo, ikhaa naku̱mu̱u̱ eʼni i̱ndó bi̱ ma̱ndoo maʼni kríyaaʼ”. Náa gu̱nʼ dí na̱ʼkha̱ garmáʼáan a̱jkia̱a̱nʼ eʼni má xúʼko̱ texto rí kaʼyoo tsiguʼ rígi̱, iwáá índo̱ matraʼníí mbá gamiéjunʼ gakhi̱i̱. Atríya̱ʼ mbiʼi mu matatsaʼwamínáʼ rí niʼni Jeobá nákha wajyúuʼ, rí naʼni xúgi̱ ga̱jma̱a̱ rí maʼni nda̱wa̱á. Mú xúʼko̱ ma̱ndoo marata xóo niʼthí David: “Nakumu̱ʼ ka̱yo̱o̱ Dios; na̱nguá míñuʼ” (Sal. 56:4).