1. Tanbasá mak dala ruma ita sente taʼuk?

 EMA hotu dala ruma sente taʼuk. Maibé tanba ita hatene saida mak Bíblia hanorin, neʼe halo ita la taʼuk ba mate, anju aat sira, ka kona-ba futuru. Maski nuneʼe ita nafatin hela iha tempu neʼebé susar, tan neʼe karik ita taʼuk kona-ba funu, krime, no moras. (Lc 21:11) Karik ita mós taʼuk ba ema, inklui governu sira neʼebé fó susar ba ita ka ita-nia família neʼebé kontra adorasaun loos. Ema balu hanoin barak katak sira labele tahan hasoru susar agora ka iha futuru.

2. Esplika toʼok David nia situasaun bainhira nia iha sidade Gat.

² David mós sente taʼuk. Porezemplu, bainhira Liurai Saul duni no hakarak oho nia, David deside atu halai ba ema Filístia nia sidade Gat. Lakleur deʼit Liurai Aquis husi Gat hatene katak David mak asuwaʼin boot neʼebé oho ona ema Filístia “naʼin-rihun sanulu”. David “sai taʼuk tebetebes”. (1 Sam 21:​10-12) Nia taʼuk kona-ba buat neʼebé Aquis sei halo ba nia. Saida mak David halo atu manán ninia sentimentu taʼuk?

3. Tuir Salmo 56:​1-3, 11, oinsá David manán ninia sentimentu taʼuk?

³ Iha Salmo 56, David fó sai ninia sentimentu bainhira nia iha Gat. Iha eskritura neʼe, David koʼalia kona-ba tanbasá nia taʼuk no oinsá nia manán hasoru sentimentu neʼe. Bainhira David sente taʼuk, nia tau fiar ba Jeová. (Lee Salmo 56:​1-3, 11.) David iha razaun neʼebé diʼak atu tau fiar ba Jeová. Ho Jeová nia ajuda, David deside atu halo buat ruma neʼebé oin-seluk tebes: Nia finje sai bulak! Aquis la haree tan David nuʼudar ema neʼebé lori perigu, tan neʼe nia husik David atu bá.—1 Sam 21:13–22:1.

4. Oinsá ita bele hametin ita-nia fiar ba Jeová? Fó toʼok ezemplu.

 ⁴ Ita mós bele manán sentimentu taʼuk hodi tau fiar ba Jeová. Maibé oinsá mak ita bele hametin ita-nia fiar ba Jeová, liuliu bainhira ita sente taʼuk? Haree toʼok ezemplu tuirmai. Se Ita hatene katak Ita iha moras ruma, karik foufoun Ita sente taʼuk. Maibé Ita bele hamenus sentimentu neʼe se Ita tau fiar ba doutór. Karik doutór iha ona esperiénsia atu tau matan ba pasiente neʼebé iha moras hanesan neʼe. Karik nia rona didiʼak ba Ita no halo Ita fiar katak nia komprende Ita-nia sentimentu. No karik nia mós husu Ita atu halo tratamentu neʼebé ajuda ona ema seluk. Nuneʼe mós, ita bele hametin ita-nia fiar ba Jeová hodi hanoin kona-ba saida mak nia halo ona iha tempu uluk, agora, no iha futuru. Neʼe mak buat neʼebé David halo. Nuʼudar ita haree ninia liafuan balu iha Salmo 56, hanoin kona-ba oinsá mak Ita mós bele hametin Ita-nia fiar ba Jeová no manán Ita-nia sentimentu taʼuk.

SAIDA MAK JEOVÁ HALO ONA IHA TEMPU ULUK?

5. Bainhira David sente taʼuk, nia medita kona-ba saida? (Salmo 56:​12, 13)

⁵ Bainhira David nia moris iha perigu laran, nia fokus ba buat neʼebé Jeová halo ona iha tempu uluk. (Lee Salmo 56:​12, 13.) David halo hanesan neʼe durante ninia moris tomak. Porezemplu, dala ruma nia medita kona-ba Jeová nia kriasaun sira, no neʼe fó-hanoin nia kona-ba Jeová nia forsa neʼebé boot no oinsá Jeová hadomi tebes ema. (Sal 65:​6-9) David mós medita kona-ba saida mak Jeová halo ona ba ema seluk. (Sal 31:19; 37:​25, 26) No liuliu nia mós medita kona-ba saida mak Jeová halo ona ba nia an rasik. Jeová apoia no proteje ona David husi tempu neʼebé nia sei bebé. (Sal 22:​9, 10) Imajina toʼok oinsá hodi medita kona-ba buat sira-neʼe hametin duni David nia fiar ba Jeová!

6. Bainhira ita sente taʼuk, saida mak bele ajuda ita atu tau fiar ba Jeová?

⁶ Bainhira Ita sente taʼuk, husu Ita-nia  an: ‘Saida mak Jeová halo ona?’ Medita kona-ba Jeová nia kriasaun. Porezemplu, bainhira ita “haree didiʼak” oinsá Jeová tau matan ba manu no ai-funan sira neʼebé nia kria laʼós tuir ninia ilas, no mós labele adora nia, neʼe sei hametin ita-nia fiar katak nia mós sei tau matan ba ita. (Mt 6:​25-32) Hanoin mós kona-ba saida mak Jeová halo ona ba ninia atan sira. Karik Ita bele estuda kona-ba ema iha Bíblia neʼebé hatudu fiar metin, ka karik Ita bele lee kona-ba Jeová nia atan nia esperiénsia iha tempu modernu. a Ita mós bele hanoin kleʼan kona-ba oinsá Jeová tau matan ona ba Ita. Porezemplu, oinsá mak nia dada Ita tama ba lia-loos? (João 6:44) Oinsá mak nia hatán ba Ita-nia orasaun? (1 João 5:14) No oinsá mak Ita hetan benefísiu loroloron husi ninia Oan-Mane nia sakrifísiu?—Éf 1:7; Ebr 4:​14-16.

7. Oinsá mak profeta Daniel nia esperiénsia ajuda Vanessa atu manán ninia sentimentu taʼuk?

⁷ Irmán ida husi rai-Haití naran Vanessa b hasoru situasaun neʼebé halo nia taʼuk. Mane ida iha ninia bairru loroloron telefone no mensajen nia no husu nia atu namora. Vanessa hatán ho klaru katak nia lakohi. Maibé mane neʼe sai hirus no ameasa nia. Vanessa hatete: “Haʼu taʼuk tebes.” Oinsá mak Vanessa manán ninia sentimentu taʼuk? Nia halo buat ruma atu proteje ninia an. Katuas kongregasaun ida ajuda nia atu kontaktu autoridade lokál. Maibé Vanessa mós kontinua fokus kona-ba oinsá Jeová proteje ona ninia atan sira iha tempu uluk. Vanessa hatete: “Ema primeiru neʼebé haʼu hanoin mak profeta Daniel. Ema soe nia ba leaun nia kuak maski nia la halo sala ida. Maibé Jeová proteje nia. Haʼu husu Jeová atu ajuda rezolve haʼu-nia problema neʼe. Tuirmai haʼu la sente taʼuk tan.”—Dan 6:​12-22.

SAIDA MAK JEOVÁ HALO AGORA DAUDAUN?

8. David fiar metin kona-ba saida? (Salmo 56:8)

⁸ Maski David nia moris iha perigu laran bainhira nia iha Gat, maibé nia la fokus ba buat neʼebé halo nia taʼuk. Nia hili atu hanoin kona-ba saida mak Jeová halo daudaun iha tempu neʼebá. David bele sente duni katak Jeová dirije no proteje nia no mós komprende ninia sentimentu. (Lee Salmo 56:8.) David mós iha belun sira neʼebé laran-metin, hanesan Jonatan no Amlulik Boot Ahimelec neʼebé anima no ajuda nia. (1 Sam 20:​41, 42; 21:​6, 8, 9) Maski Liurai Saul buka atu oho David, maibé David bele halai subar. Nia fiar metin katak Jeová hatene kona-ba susar neʼebé nia hasoru no oinsá ida-neʼe kona ninia emosaun.

9. Saida mak Jeová hatene kona-ba ita ida-idak?

⁹ Bainhira Ita hasoru susar neʼebé halo Ita taʼuk, hanoin-hetan katak Jeová hatene kona-ba buat neʼebé Ita hasoru no oinsá susar neʼe afeta Ita-nia sentimentu. Porezemplu, Jeová laʼós deʼit haree oinsá ema Ejitu trata aat ema Izraél, maibé mós nia hatene didiʼak kona-ba “terus neʼebé sira hasoru”. (Éx 3:7) David dehan katak Jeová hatene kona-ba ninia “terus” no mós “susar boot sira”. (Sal 31:7) No bainhira Maromak nia povu hasoru susar maski neʼe tanba sira-nia desizaun rasik, “nia mós sente neon-susar”.  (Isa 63:9) Bainhira Ita sente taʼuk, Jeová komprende buat neʼebé Ita sente no nia hakarak tebes atu ajuda Ita manán Ita-nia sentimentu taʼuk.

10. Tanbasá Ita fiar katak Jeová haree Ita-nia susar no nia sei ajuda Ita tahan susar naran deʼit?

¹⁰ Se Ita hasoru daudaun susar neʼebé halo Ita taʼuk, karik susar atu haree oinsá Jeová apoia Ita. Saida mak Ita bele halo? Husu nia atu ajuda Ita haree oinsá nia apoia ona Ita. (2 Reis 6:​15-17) Tuirmai husu Ita-nia an: Iha ka lae diskursu ruma ka komentáriu iha reuniaun neʼebé hametin ona haʼu? Iha ka lae publikasaun, vídeo, ka knananuk husi Broadcasting neʼebé anima ona haʼu? Iha ka lae ema ruma neʼebé fahe eskritura neʼebé fó kmaan ba haʼu? Dala ruma fasil atu haluha oinsá mak irmaun-irmán sira hadomi ita no oinsá mak Maromak hametin ita liuhusi ninia Liafuan. Maibé buat sira-neʼe mak prezente husi Jeová. (Isa 65:13; Mc 10:​29, 30) Neʼe fó prova katak Jeová hanoin Ita. (Isa 49:​14-16) No mós hatudu katak Ita bele tau fiar ba nia.

11. Saida mak ajuda Aida atu manán ninia sentimentu taʼuk?

¹¹ Irmán Aida neʼebé hela iha rai-Senegál haree oinsá Jeová apoia nia durante ninia susar. Tanba nia mak oan primeiru, ninia inan-aman hakarak nia atu manán osan hodi bele tau matan ba sira no mós ninia an. Maibé bainhira nia halaʼo moris neʼebé simples atu bele serbí nuʼudar pioneiru, nia iha osan uitoan deʼit. Ninia família hirus no kritika nia. Nia hatete: “Haʼu sente taʼuk katak haʼu labele ajuda haʼu-nia inan-aman no ema sei koʼalia aat haʼu. Haʼu fó-sala ba Jeová tanba situasaun neʼebé haʼu hasoru.” Tuirmai Aida rona diskursu ida iha reuniaun, no nia hatete: “Oradór neʼe fó-hanoin haʼu katak Jeová hatene ita-nia laran-susar hotu. Neineik-neineik liuhusi katuas no irmaun-irmán sira-nia ajuda, haʼu bele sente duni katak Jeová hadomi haʼu. Bainhira haʼu halo orasaun ba Jeová, haʼu komesa fiar liután katak nia sei ajuda haʼu, no haʼu sente dame kuandu haree nia hatán haʼu-nia orasaun.”  Tuirmai Aida hetan serbisu neʼebé bele apoia ninia knaar nuʼudar pioneiru no mós bele ajuda ninia inan-aman. Nia hatete: “Haʼu aprende atu tau fiar tomak ba Jeová. No agora kuandu halo tiha orasaun, baibain haʼu-nia sentimentu taʼuk lakon.”

SAIDA MAK JEOVÁ SEI HALO IHA FUTURU?

12. Tuir Salmo 56:​9, David fiar metin kona-ba saida?

¹² Lee Salmo 56:9. Eskritura neʼe fó sai dalan seluk tan oinsá David manán ninia sentimentu taʼuk. Maski nia nafatin iha perigu laran, nia medita kona-ba saida mak Jeová sei halo ba nia iha futuru. David hatene katak Jeová sei salva nia iha tempu neʼebé loos. Liután neʼe, Jeová mós dehan ona katak David sei sai Izraél nia liurai tuirmai. (1 Sam 16:​1, 13) Ba David, Jeová nia promesa hotu mak diʼak no sei kumpre duni.

13. Ita bele fiar metin katak Jeová sei halo saida?

¹³ Saida mak Jeová promete atu halo ba Ita? Ita hatene katak Jeová sei la proteje ita husi problema hotu neʼebé ita hasoru agora. c Maibé iha mundu paraízu, nia sei halakon susar naran deʼit neʼebé ita hasoru ohin loron. (Isa 25:​7-9) Ita-nia Kriadór iha duni kbiit boot atu fó moris-hiʼas ba ema mate, kura ita, no halakon kontradór hotu.—1 João 4:4.

14. Ita bele medita kona-ba saida?

¹⁴ Bainhira Ita sente taʼuk, medita kona-ba saida mak Jeová sei halo iha futuru. Hanoin kona-ba Ita sei sente oinsá kuandu Satanás la iha ona, ema aat sira la iha tan no iha deʼit ema neʼebé laran-loos, no ema sai perfeitu loron ba loron. Drama iha reuniaun boot tinan 2014 hatudu oinsá ita bele medita kona-ba ita-nia esperansa. Iha drama neʼe, aman ida koʼalia ho ninia família kona-ba oinsá eskritura iha 2 Timóteo 3:​1-5 sei haree diferente tebes se koʼalia kona-ba moris iha Paraízu: “Iha mundu foun ema sei kontente tebes. Hadomi ema seluk, hadomi lia-loos, haraik an, fó hahiʼi ba Maromak, halo tuir inan-aman, hatene fó agradese, hatudu laran-metin, hadomi malu, rona malu, sempre koʼalia diʼak kona-ba ema seluk, kontrola an, laran-maus, hadomi buat neʼebé diʼak, ema bele tau fiar, la ulun-toos, la foti an, hadomi Maromak duké hadomi ksolok, hamtaʼuk Maromak ho laran-moos. Hakbesik ba ema sira hanesan neʼe.” Ita toman atu koʼalia hamutuk ho Ita-nia família ka irmaun-irmán sira kona-ba moris iha mundu foun ka lae?

15. Maski Tanja sente taʼuk, saida mak ajuda nia atu laran-metin nafatin?

¹⁵ Irmán ida naran Tanja husi rai-Masedónia Norte manán ninia sentimentu taʼuk hodi medita kona-ba bensaun sira iha futuru. Ninia inan-aman kontra makaʼas bainhira nia estuda Bíblia. Nia hatete: “Buat barak neʼebé haʼu taʼuk akontese duni. Kuandu fila husi reuniaun amá sempre baku haʼu. Haʼu-nia inan-aman ameasa atu oho haʼu se haʼu sai Testemuña ba Jeová.” Ikusmai Tanja nia inan-aman duni nia sai husi uma. Saida mak Tanja halo? Nia hatete: “Haʼu fokus ba oinsá haʼu sei moris ho kontente ba nafatin iha mundu foun tanba hatudu laran-metin. Haʼu mós hanoin kona-ba oinsá Jeová sei fó bensaun ba haʼu iha mundu foun hodi troka fali buat neʼebé karik haʼu lakon iha mundu neʼe, no oinsá haʼu sei la  hanoin-hetan tan buat aat hotu.” Tanja kontinua laran-metin. No ho Jeová nia ajuda, nia hetan hela-fatin. Agora Tanja kaben ho irmaun neʼebé laran-metin no sira naʼin-rua serbí tempu-tomak hamutuk ho kontente.

HAMETIN ITA-NIA FIAR BA JEOVÁ

16. Saida mak bele ajuda ita atu nafatin aten-brani bainhira haree akontesimentu sira iha Lucas 21:​26-28 sai loos?

¹⁶ Durante terus boot, ema barak sei sente taʼuk. Maibé Maromak nia povu sei hamriik metin ho aten-brani. (Lee Lucas 21:​26-28.) Tanbasá ita sei hatudu aten-brani? Tanba ita aprende ona atu tau fiar ba Jeová. Tanja neʼebé temi ona hatete katak ninia esperiénsia uluk nian ajuda nia atu tahan hasoru susar seluk tan. Nia hatete: “Haʼu aprende katak Jeová bele ajuda ita iha situasaun naran deʼit no haraik bensaun ba ita. Dala ruma ita sente katak ema seluk mak kontrola situasaun neʼe, maibé loloos Jeová iha kbiit boot liu fali sira. No maski iha problema neʼebé susar tebes atu tahan, maibé problema neʼe sei remata.”

17. Oinsá mak eskritura tinan nian ba tinan 2024 sei ajuda ita? (Haree dezeñu iha livru oin.)

¹⁷ Ohin loron iha buat barak neʼebé bele halo ita sente taʼuk. Maibé hanesan David, ita bele manán sentimentu taʼuk. Ita-nia eskritura tinan nian ba tinan 2024 mak David nia orasaun ba Jeová: “Bainhira haʼu taʼuk, haʼu tau fiar ba Ita.” (Sal 56:3) Matenek-naʼin ida kona-ba Bíblia esplika versíkulu neʼe hodi hatete katak David “la kontinua hanoin kona-ba buat neʼebé halo nia taʼuk ka ninia problema sira, maibé nia sadere ba Ida neʼebé sei salva nia”. Diʼak atu hanoin beibeik kona-ba eskritura tinan nian, liuliu kuandu ita hasoru situasaun neʼebé susar. No mós uza tempu atu hanoin kona-ba saida mak Jeová halo iha tempu uluk, agora, no iha futuru. Tuirmai hanesan David, ita bele dehan: “Haʼu tau fiar ba Maromak; haʼu la taʼuk.”—Sal 56:4.