1. Ko e hā nai ʻoku tau ongoʻi manavahē ai ʻi he taimi ʻe niʻihi?

 ʻOKU ongoʻi manavahē ʻa e tokotaha kotoa ʻi he taimi ʻe niʻihi. Ko e moʻoni, ko ʻetau ako ʻa e Tohi Tapú kuó ne fakatauʻatāinaʻi kitautolu mei he manavahē ki he maté, manavahē ki he fanga tēmenioó, pea mo e manavahē ki he kahaʻú. Ka ʻoku tau kei moʻui ʻi ha taimi ʻoku fakaʻilongaʻiʻaki ʻa e “ngaahi meʻa fakamanavahē,” hangē ko e taú, faihiá, mo e mahakí. (Luke 21:11) ʻOku aʻu nai ʻo tau manavahē foki ʻi he tangatá, ʻo kau ai ʻa e ngaahi puleʻanga ʻoku nau lōmekina kitautolu pe naʻa mo e ngaahi mēmipa ʻo e fāmilí ʻoku nau fakafepakiʻi ʻa e lotu moʻoní. Ko e niʻihi ʻoku nau hohaʻa nai naʻa ʻikai ke nau malava ʻo kātekina ha ʻahiʻahi lolotonga pe ko ha ʻahiʻahi te nau fehangahangai nai mo ia ʻi he kahaʻú.

2. Fakamatalaʻi ʻa e tuʻunga ʻo Tēvitá lolotonga ʻene ʻi Katí.

² Ko Tēvita naʻá ne manavahē. Ko e fakatātaá, ʻi he taimi naʻe tuli holo ai ʻe Tuʻi Saula ʻa Tēvitá, naʻá ne hola ki he kolo Filisitia ko Katí. Ko e tuʻi ʻo Katí, ʻa ʻĀkisi, naʻe vave ʻene ʻiloʻi ko Tēvita ʻa e pāteʻi tau naʻe kātoangaʻi ʻaki ha hiva ʻi heʻene taaʻi ʻa e “ngaahi toko mano” ʻo e kau Filisitiá. Ko Tēvita naʻá ne “hoko ʻo ilifia lahi.” (1 Sām. 21:​10-12) Naʻá ne hohaʻa fekauʻaki mo e meʻa ʻe fai ʻe ʻĀkisi kiate iá. Naʻe anga-fēfē hono ikunaʻi ʻe Tēvita ʻene ngaahi manavaheé?

3. Fakatatau ki he Saame 56:​1-3, 11, naʻe anga-fēfē ikunaʻi ʻe Tēvita ʻene ngaahi manavaheé?

³ ʻI he Saame 56, ʻoku fakahaaʻi ai ʻe Tēvita ʻene ngaahi ongoʻí lolotonga ʻene ʻi Katí. ʻOku fakahaaʻi ʻi he saame ko iá ʻa e ngaahi manavahē ʻa Tēvitá, ka ʻoku toe fakaeʻa mai ai ʻa e founga naʻá ne ikunaʻi ai ʻa e ngaahi manavahē ko iá. ʻI he taimi naʻe ongoʻi manavahē ai ʻa Tēvitá, naʻá ne falala kia Sihova. (Lau ʻa e Saame 56:​1-3, 11.) Ko ʻene falalá naʻe ʻikai ke tōnoa. ʻI he tāpuaki ʻa Sihová, naʻe palani ʻa Tēvita ke ne fai ha meʻa ngali kehe ka naʻe ola lelei: Naʻá ne fakangalingali ʻokú ne fakasesele! Naʻe vakai ʻa ʻĀkisi ʻi he  taimi ko ení kia Tēvita ko ha tokotaha fakatupu ʻita kae ʻikai ko ha fakamanamana, ko ia naʻe malava ke hola ʻa Tēvita.—1 Sām. 21:13–22:1.

4. ʻE lava fēfē ke tau fakaivimālohiʻi ʻetau falala kia Sihová? Fakatātāʻi.

⁴ Ko kitautolu foki ʻe lava ke tau ikunaʻi ʻa e manavaheé ʻaki ʻa e falala kia Sihova. Ka ʻe anga-fēfē ʻetau fakaivimālohiʻi ʻetau falala kia Sihová, tautefito ʻi he taimi ʻoku tau manavahē aí? Fakakaukau ki ha fakatātā. Kapau ʻokú ke ʻiloʻi ʻoku maʻu koe ʻe ha mahaki, te ke ongoʻi manavahē nai ʻi he kamatá. Kae kehe, ʻe lava ke ke fakasiʻisiʻi hoʻo manavaheé kapau ʻokú ke falala ki he toketaá. ʻOkú ne maʻu nai ha lēkooti tuʻu-ki-muʻa hono faitoʻo ʻa e faʻahinga naʻa nau tofanga ʻi he mahaki ko iá. Te ne fanongo tokanga nai, ʻo fakapapauʻi atu kiate koe ʻokú ne mahinoʻi moʻoni hoʻo ngaahi ongoʻí. Pea te ne fakahaaʻi atu nai ha founga fakafaitoʻo kuo ola lelei ki he niʻihi kehé. ʻI he tuʻunga meimei tatau, ʻoku tau fakaivimālohiʻi ʻetau falala kia Sihová ʻaki ʻetau fakakaukau ki he meʻa kuó ne ʻosi faí, meʻa ʻokú ne lolotonga fai he taimi ní, pea mo e meʻa te ne fai maʻatautolu ʻi he kahaʻú. Ko e meʻa ia naʻe fai ʻe Tēvitá. ʻI heʻetau lāulea ki he niʻihi ʻo ʻene ngaahi lea fakamānavaʻi ʻoku maʻu ʻi he Saame 56, fakakaukau fekauʻaki mo e founga ʻe lava foki ai ke ke fakaivimālohiʻi hoʻo falala kia Sihová pea ikunaʻi hoʻo ngaahi manavaheé.

KO E HĀ KUO ʻOSI FAI ʻE SIHOVÁ?

5. Ko e hā naʻe fakakaukauloto ki ai ʻa Tēvita ke ikunaʻi ai ʻene ngaahi manavaheé? (Saame 56:​12, 13)

⁵ Neongo naʻe kei ʻi he tuʻunga fakatuʻutāmaki pē ʻa e moʻui ʻa Tēvitá, naʻá ne fakahangataha ʻene tokangá ki he meʻa kuo ʻosi fai ʻe Sihová. (Lau ʻa e Saame 56:​12, 13.) Ko e sīpinga fakaefakakaukau ia naʻe maʻu ʻe Tēvita ʻi he kotoa ʻene moʻuí. Ko e fakatātaá, ʻi he taimi ʻe niʻihi naʻá ne fakalaulauloto ki he ngāue fakaefakatupu ʻa Sihová, ʻa ia naʻe fakamanatu ange ai kiate ia ʻa e mālohi aoniu ʻo Sihová mo ʻene mahuʻingaʻia vēkeveke ʻi he faʻahinga ʻo e tangatá. (Saame 65:​6-9) Naʻe fakalaulauloto foki ʻa Tēvita ki he meʻa naʻe fai ʻe Sihova maʻá e niʻihi kehé. (Saame 31:19; 37:​25, 26) Pea naʻe tautefito ʻene fakalaulaulotó ki he meʻa kuo ʻosi fai ʻe Sihova kiate ia fakafoʻituituí. Naʻe poupouʻi mo maluʻi ʻe Sihova ʻa Tēvita talu mei heʻene kei valevalé. (Saame 22:​9, 10) Sioloto atu kuo pau pē naʻe fakalahi ʻe he fakalaulauloto peheé ʻa e falala ʻa Tēvita kia Sihová!

6. ʻI he taimi ʻoku tau ongoʻi manavahē aí, ko e hā te ne tokoniʻi kitautolu ke falala kia Sihová?

 ⁶ ʻI he taimi ʻokú ke ongoʻi manavahē aí, ʻeke hifo kiate koe, ‘Ko e hā kuo ʻosi fai ʻe Sihová?’ Fakakaukauloto ki he meʻa kuó ne fakatupú. Ko e fakatātaá, ʻi heʻetau “siofi fakalelei” ʻa e anga hono tokangaʻi ʻe Sihova ʻa e fanga manupuná mo e ngaahi matalaʻiʻakaú—ʻa ia naʻe ʻikai ke fakatupu ʻi hono ʻīmisí pea ʻikai ke nau malava ʻo lotu kiate iá—te tau langa hake ai ʻetau falala te ne tokangaʻi foki mo kitautolu. (Māt. 6:​25-32) Fakakaukau foki ki he meʻa kuo fai ʻe Sihova maʻa ʻene kau lotú. Te ke ako nai fekauʻaki mo ha tokotaha ʻi he Tohi Tapú naʻá ne fakahāhā ʻa e tui tuʻu-ki-muʻa, pe te ke lau nai ha hokosia fekauʻaki mo ha sevāniti ʻa Sihova ʻi onopooni. a ʻIkai ko ia pē, fakalaulauloto ki he founga kuo tokangaʻi ai koe ʻe Sihová. Naʻe anga-fēfē ʻene tohoaki mai koe ki he moʻoní? (Sione 6:44) Kuo anga-fēfē ʻene tali hoʻo ngaahi lotú? (1 Sio. 5:14) ʻOku anga-fēfē hoʻo maʻu ʻaonga ʻi he ʻaho taki taha mei he feilaulau ʻa hono ʻAlo ʻofeiná?—ʻEf. 1:7; Hep. 4:​14-16.

7. Naʻe anga-fēfē tokoni ʻa e hokosia ʻa e palōfita ko Tanielá kia Vanessa ke ikunaʻi ʻene manavaheé?

⁷ Ko Vanessa, b ko ha tuofefine i Haiti, naʻá ne fehangahangai mo ha tuʻunga fakamanavahē. Ko ha tangata ʻi hono feituʻú naʻá ne tā mo ʻave kiate ia ʻa e pōpoaki ʻi he ʻaho taki taha, ʻo tenge ia ke na kaumeʻa. Naʻe fakafisingaʻi mālohi ia ʻe Vanessa. Ka naʻe hoko ʻa e tangatá ʻo toe anga-fefeka ange pea aʻu ʻo ne fakamanamanaʻi ia. “Naʻá ku ilifia,” ko ʻene leá ia. Naʻe anga-fēfē hono ikunaʻi ʻe Vanessa ʻene manavaheé? Naʻá ne fou ʻi he ngaahi sitepu ʻaonga ke maluʻi ia. Naʻe tokoni ha mātuʻa kiate ia ke fetuʻutaki ki he kau maʻu mafaí. Ka naʻá ne toe tokangataha ki he founga naʻe maluʻi ai ʻe Sihova ʻene kau sevānití ʻi he kuohilí. “Ko e fuofua tokotaha naʻá ku fakakaukau fekauʻaki mo iá ko e palōfita ko Tanielá,” ko e fakamatala ia ʻa Vanessa. “Naʻe lī ia ki ha ʻana ʻo e fanga laione fekai neongo naʻá ne tonuhia. Neongo ia, naʻe tokangaʻi ia ʻe Sihova. Naʻá ku kole kia Sihova ke ne tokangaʻi ʻa e tuʻungá fakalūkufua. Hili iá, naʻe ʻikai ke u toe manavahē.”—Tan. 6:​12-22.

KO E HĀ ʻOKU LOLOTONGA FAI ʻE SIHOVA HE TAIMI NÍ?

8. Ko e hā naʻe tuipau ki ai ʻa Tēvitá? (Saame 56:8)

⁸ Neongo naʻe ʻi he tuʻunga mātuʻaki fakatuʻutāmaki ʻa e moʻui ʻa Tēvitá ʻi heʻene ʻi Katí, naʻá ne fakafisi ke tukulolo ki heʻene ngaahi manavaheé. ʻI hono kehé, naʻá ne fili ke fakakaukau ki he meʻa naʻe fai ʻe Sihova maʻana ʻi he taimi ko iá. Naʻe lava ke ongoʻi ʻe Tēvita ko Sihova naʻá ne tataki mo maluʻi iá pea naʻá Ne mahinoʻi ʻene ngaahi ongoʻí. (Lau ʻa e Saame 56:8.) Naʻe toe maʻu foki ʻe Tēvita ʻa e ngaahi kaumeʻa, hangē ko Sionatane mo e Taulaʻeiki Lahi ko ʻAhimelekí, ʻa ia naʻá na poupou mateaki kiate ia pea fai mo e tokoni ʻaonga. (1 Sām. 20:​41, 42; 21:​6, 8, 9) Pea neongo hono tuli tāmateʻi holo ʻe Tuʻi Saula ʻa Tēvitá, naʻá ne hao moʻui. Naʻá ne tuipau naʻe ʻafioʻi lelei ʻe Sihova hono ʻahiʻahí pea mo e anga hono uesia fakaeongo ia ʻe he ʻahiʻahi ko iá.

9. Ko e hā ʻoku ʻafioʻi ʻe Sihova fekauʻaki mo kitautolu taki tahá?

⁹ ʻI he taimi ʻokú ke fehangahangai ai mo ha ʻahiʻahi ʻokú ne ʻai koe ke ke ilifia, manatuʻi ʻoku ʻafioʻi ʻe Sihova ʻa e ʻahiʻahí pea mo e anga hoʻo ongoʻí koeʻuhi ko e ʻahiʻahi ko iá. Ko e fakatātaá, naʻe ʻikai ngata pē hono ʻiloʻi ʻe Sihova ʻa hono ngaohikovia ʻo e kau ʻIsilelí ʻi ʻIsipité kae pehē foki ki he “ngaahi mamahi [naʻa] nau fuesiá.” (ʻEki. 3:7) Naʻe hiva ʻa Tēvita ko Sihova naʻá ne ʻafioʻi fakatouʻosi ʻene “tuʻutāmakí” mo ʻene “fuʻu mamahí.” (Saame 31:7) Pea ʻi he taimi naʻe faingataʻaʻia ai ʻa e kakai ʻa e ʻOtuá—neongo  kapau ko e nunuʻa ia ʻenau ngaahi fili fakavalevalé—“naʻe fakalotomamahi ia kiate ia.” (ʻAi. 63:9) ʻI he taimi ʻokú ke ilifia aí, ʻoku mahinoʻi ʻe Sihova ʻa e anga hoʻo ongoʻí pea ʻokú ne vēkeveke ke tokoniʻi koe ke ikunaʻi hoʻo ngaahi manavaheé.

10. Ko e hā ʻokú ke tuipau ai ʻoku ʻafioʻi koe ʻe Sihová pea te ne tokoniʻi koe ke fekuki mo ha faʻahinga ʻahiʻahi pē?

¹⁰ Ka te ke fifili nai, pe ʻoku anga-fēfē hono poupouʻi koe ʻe Sihova lolotonga hoʻo fehangahangai mo ha ʻahiʻahi fakamanavahē. Ko ia kole kiate ia ke ne tokoniʻi koe ke vakai ki heʻene poupoú. (2 Tuʻi 6:​15-17) Pea fakakaukau leva: Kuo fakaivimālohiʻi koe ʻe ha malanga pe ko ha tali ʻi ha fakataha ʻa e fakatahaʻangá? Kuo fakalototoʻaʻi koe ʻe ha tohi, vitiō pe ko ha taha ʻo ʻetau hiva foʻoú? Kuo vahevahe atu ʻe ha taha ha fakakaukau pe ko ha veesi Tohi Tapu fakatupu tuipau? Te tau fakamaʻamaʻaʻi nai ʻa ʻetau fetokouaʻaki anga-ʻofá mo e meʻakai fakalaumālie ʻoku tau maʻú. Neongo ia, ko e ngaahi meʻaʻofa makehe ia meia Sihova. (ʻAi. 65:13; Mk. 10:​29, 30) ʻOku fakamoʻoniʻi mai ai ʻokú ne tokanga kiate koe. (ʻAi. 49:​14-16) Pea ʻoku fakamoʻoniʻi mai ai ʻokú ne tuha mo hoʻo falalá.

11. Ko e hā naʻá ne tokoniʻi ʻa Aida ke ikuʻi ʻene ngaahi manavaheé?

¹¹ Ko Aida, ʻoku nofo ʻi Senikolo, naʻá ne fakatokangaʻi ʻa e anga hono poupouʻi ia ʻe Sihova lolotonga ha ʻahiʻahi. Koeʻuhi ko ia naʻe lahi taha ʻi he fānaú, naʻe ʻamanekina ia ʻe heʻene ongo mātuʻá ke ne tokonaki ha paʻanga feʻunga ke tauhi ia mo kinautolu. Ka ʻi he hili hono fakafaingofuaʻi ʻe Aida ʻene moʻuí koeʻuhi ke tāimuʻá, naʻá ne fāinga fakapaʻanga. Naʻe ʻita heni hono fāmilí pea fakaangaʻi ia. “Naʻá ku ilifia naʻa ʻikai malava ke u tokoniʻi ʻeku ongo mātuʻá pea iku ke siʻaki au ʻe he tokotaha kotoa,” ko ʻene leá ia. “Naʻe aʻu ʻo u tukuakiʻi ʻa Sihova ki hono fakaʻatā ʻa e ngaahi meʻá ke hoko ʻo kovi ʻaupitó.” Pea naʻá ne fanongo ki ha malanga ʻi he fakatahá. “Naʻe fakamanatu mai ʻe he tokotaha-malangá neongo pe ko e hā ha ngaahi lavea ʻi hotau lotó, ʻoku ʻafioʻi ia ʻe Sihova. Faai atu pē, fakafou ʻi he faleʻi mei he kau mātuʻá mo e niʻihi kehé, naʻá ku fakapapauʻi ai ʻa e ʻofa ʻa Sihová. Naʻe kamata ke u lotu kia Sihova mo ha tuipau foʻou, pea naʻá ku ongoʻi ha nonga makehe ʻi heʻeku vakai ki hono tali ʻeku ngaahi lotú.” ʻI he faai atu ʻa e taimí, naʻe maʻu ʻe Aida ha ngāue naʻe ʻikai ngata pē ʻene tokoni fakapaʻanga kiate ia ʻi  heʻene tāimuʻá kae pehē foki ki heʻene ongo mātuʻá pea mo e niʻihi kehé. “Naʻá ku ako ke falala kakato kia Sihova,” ko ʻene leá ia. “ʻI he taimí ni, hili ʻeku lotú, ko ʻeku ngaahi manavaheé ʻoku faʻa mole atu.”

KO E HĀ ʻE FAI ʻE SIHOVA ʻI HE KAHAʻÚ?

12. Fakatatau ki he Saame 56:​9, ko e hā naʻe tuipau ki ai ʻa Tēvitá?

¹² Lau ʻa e Saame 56:9. ʻOku fakahaaʻi mai ʻi he veesi ko ení ha founga ʻe taha naʻe ikunaʻi ai ʻe Tēvita ʻene ngaahi manavaheé. Neongo naʻe ʻi he tuʻunga fakatuʻutāmaki ʻene moʻuí, naʻá ne fakalaulauloto ki he meʻa ʻe fai ʻe Sihova maʻana ʻi he kahaʻú. Naʻe ʻiloʻi ʻe Tēvita ʻe fakahaofi ia ʻe Sihova ʻi hono taimi totonu. He ko ē, naʻe fanongonongo ʻe Sihova ko Tēvita ʻa e tuʻi hoko ʻo ʻIsilelí. (1 Sām. 16:​1, 13) Kia Tēvita, neongo pe ko e hā ha meʻa naʻe talaʻofa ʻe Sihova naʻá ne fakapapauʻi kuo pau ke fakahoko.

13. Ko e hā ʻoku lava ke tau falala pau ai kia Sihová?

¹³ Ko e hā kuo talaʻofa ʻe Sihova ke fai maʻaú? ʻOku ʻikai ke tau ʻamanekina ia ke ne maluʻi kitautolu mei he ngaahi palopalema kotoa pē. c Neongo ia, tatau ai pē pe ko e hā ʻa e ngaahi ʻahiʻahi ʻokú ke fehangahangai nai mo ia ʻi he fokotuʻutuʻu ko ení, ʻe toʻo atu ia ʻe Sihova ʻi he māmani foʻou ka hoko maí. (ʻAi. 25:​7-9) Ko hono moʻoní ko hotau Tokotaha-Fakatupú ʻokú ne mālohi feʻunga ke fokotuʻu hake ʻa e maté, fakamoʻui kitautolu, pea toʻo atu ʻa e kau fakafepakí kotoa.—1 Sio. 4:4.

14. Ko e hā te tau fakalaulauloto nai ki aí?

¹⁴ ʻI he taimi ʻokú ke ongoʻi ilifia aí, fakalaulauloto ki he meʻa ʻe fai ʻe Sihova ʻi he kahaʻú. Fakakaukau atu ki he anga hoʻo ongoʻí ʻi he taimi ʻe puli atu ai ʻa Sētané, ʻi he taimi ʻe fetongi ai ʻa e kakai fulikivanú ʻaki ʻa e kakai māʻoniʻoní, pea ʻi he taimi ʻe mole māmālie atu ai ʻa e taʻehaohaoá ʻi he ʻaho taki taha. Ko ha fakahāhā ʻi he polokalama fakataha-lahi fakavahe ʻo e 2014 naʻe fakahaaʻi ai ʻa e founga te tau fakalaulauloto nai ai ki heʻetau ʻamanakí. Naʻe lāulea ha tamai mo hono fāmilí ki he founga ʻe fakalea kehe nai ai ʻa e 2 Tīmote 3:​1-5 kapau ko e ngaahi veesi ko iá ʻokú ne tomuʻa tala ʻa e meʻa ʻe hoko ʻi he Palataisí: “ʻI he māmani foʻoú ʻe ʻi ai ʻa e taimi fiefia tahá. He ko e tangatá te nau hoko ko e kau ʻofa ki he niʻihi kehé, ko e kau ʻofa ki he ngaahi koloa fakalaumālié, anga-fakanānā, anga-fakatōkilalo, kau fakahīkihikiʻi ʻo e ʻOtuá, talangofua ki he ngaahi mātuʻá, houngaʻia, mateaki, maʻu ʻa e ʻofa lahi ki honau ngaahi fāmilí, loto-tatau, lea lelei maʻu pē fekauʻaki mo e niʻihi kehé, mapuleʻi-kita, anga-malū, kau ʻofa ki he leleí, falalaʻanga, ʻulutukua, anga-vaivai, kau ʻofa ki he ʻOtuá kae ʻikai ko e kau ʻofa ki he mālié, ueʻi ʻe he anga-līʻoa fakaʻotua moʻoní; pea ko e kakai ko ení ke ke pipiki ofi ki ai.” ʻOkú ke lāulea mo ho fāmilí pe kaungātuí ki he tuʻunga ʻe ʻi ai ʻa e moʻuí ʻi he māmani foʻoú?

15. Neongo naʻe ongoʻi ilifia ʻa Tanja, ko e hā naʻá ne tokoniʻi ia ke ikunaʻi ʻene ngaahi manavaheé?

¹⁵ Ko ha tuofefine ʻi Masitōnia Tokelau ko Tanja naʻá ne ikunaʻi ʻene ngaahi manavaheé ʻaki ʻa e fakalaulauloto ki he ngaahi tāpuaki ʻi he kahaʻú. Ko ʻene ongo mātuʻá naʻá na fakafepakiʻi mālohi ia ʻi heʻene ako ʻa e Tohi Tapú. ʻOkú ne pehē: “Ko e ngaahi meʻa ʻe niʻihi naʻá ku manavahē naʻa hokó naʻe hoko ia. Naʻe tā au ʻe heʻeku faʻeé hili ʻa e fakataha kotoa pē. Naʻe fakamanamanaʻi ʻe heʻeku ongo mātuʻá ke tāmateʻi au kapau te u hoko ko e taha ʻo e Kau Fakamoʻoni ʻa Sihová.” Faai atu pē, naʻe tuli ʻa Tanja mei honau ʻapí. Naʻe anga-fēfē ʻene fakafeangaí? ʻOkú ne pehē: “Naʻá ku tokangataha ki he fiefia te u maʻu ʻi he kotoa ʻo ʻitānití ʻi he fili ke tauhi maʻu ʻeku anga-tonú. Naʻá ku toe fakakaukau fekauʻaki mo e founga ʻe fakapaleʻi ai au ʻe Sihova ʻi he māmani foʻoú ʻi ha faʻahinga meʻa pē ʻe mole nai meiate au ʻi he fokotuʻutuʻu ko ení pea mo e founga ʻe ngalo ai ʻa e ngaahi meʻa kovi kotoa pē.” Naʻe tauhi maʻu ʻe Tanja ʻene anga-tonú. Pea  ʻi he tokoni ʻa Sihová, naʻá ne maʻu ha feituʻu ke nofo ai. ʻI he ʻahó ni, ʻoku mali ʻa Tanja mo ha tokoua faitōnunga pea ʻokú na ngāue fiefia fakataha ʻi he ngāue fakafaifekau taimi-kakató.

FAKAIVIMĀLOHIʻI HOʻO FALALÁ ʻI HE ʻAHÓ NI

16. Ko e hā te ne tokoniʻi kitautolu ke nofoʻaki loto-toʻa ʻi he sio ki he ngaahi meʻa naʻe kikiteʻi ʻi he Luke 21:​26-28?

¹⁶ Lolotonga ʻa e fuʻu mamahi lahí, ko e kakaí fakalūkufua te nau “pongia . . . koeʻuhi ko e manavaheé.” Ka ko e kakai ʻa e ʻOtuá te nau nofoʻaki tuʻu maʻu mo loto-toʻa. (Lau ʻa e Luke 21:​26-28.) Ko e hā heʻikai ke tau tukulolo ai ki he manavaheé? Koeʻuhí te tau ʻosi ako ke falala kia Sihova. Ko Tanja, naʻe lave ki ai ki muʻá, ʻokú ne pehē ko ʻene ngaahi hokosia ʻi he kuohilí ʻokú ne tokoniʻi ia ke fehangahangai mo e ngaahi tuʻunga faingataʻa kehe. “Kuó u ako ʻoku ʻikai ke ʻi ai ha tuʻunga heʻikai taʻemalava ʻe Sihova ʻo fakaleleiʻi ki ha lelei maʻa kitautolu,” ko ʻene fakamatalá ia. “ʻI he taimi ʻe niʻihi ʻoku hā ngali ko e niʻihi kehé ʻoku nau puleʻi ʻa e ngaahi meʻá, ka ko hono moʻoní ʻoku fakangatangata pē ʻa e meʻa ʻoku nau puleʻí ʻo fakatatau ki he meʻa ʻoku fakaʻatā ʻe Sihová. Pea neongo ʻe faingataʻa nai ha ʻahiʻahi, ʻe ngata ia.”

17. ʻE anga-fēfē hono tokoniʻi kitautolu ʻe heʻetau konga tohi fakataʻu ki he 2024? (Sio ki he tā ʻi he takafí.)

¹⁷ Ko e manavaheé ʻoku anga-maheni ia ʻi he ʻahó ni. Kae hangē ko Tēvitá, ʻe lava ke tau fakaʻehiʻehi mei he fihia ʻi he tauhele ʻo e manavaheé. Ko ʻetau konga tohi fakataʻu ki he 2024 ko e lotu ʻa Tēvita kia Sihová: “ʻI heʻeku manavaheé, ʻoku tuku ʻeku falalá ʻiate koe.” (Saame 56:3) Hangē ko e lau ʻa e maʻuʻanga fakamatala Tohi Tapu ʻe taha fekauʻaki mo e veesi ko ení, ko Tēvita “ʻoku ʻikai ke ne fafanga ʻene manavaheé pea ʻoku ʻikai ke ne siofi ʻene ngaahi palopalemá ka ʻokú ne hanga ki hono Tokotaha Huhuʻí ʻa ia te ne fakahaofi iá.” Fakakaukau ki heʻetau konga tohi fakataʻú ʻi he ngaahi māhina ka hoko maí, tautefito ʻi he taimi ʻokú ke fehangahangai ai mo ha ngaahi tuʻunga fakamanavahē. Vaheʻi ʻa e taimi ke fakakaukauloto ki he ngaahi ngāue ʻa Sihova ʻi he kuohilí, ʻi he lolotonga ní, pea ʻi he kahaʻú. Pea ʻi he hangē leva ko Tēvitá, ʻe lava ke ke fakahaaʻi: “ʻI he ʻOtuá ʻoku tuku ai ʻeku falalá; ʻoku ʻikai te u manavahē.”—Saame 56:4.