1. ¿Tuku xlakata max min kilhtamaku pekuanaw?

 PUTUM akinin min kilhtamaku pekuanaw. Xlikana, Biblia kinkamasiyaniyan pi ni kilipekuanitkan tiku ninita, demonios chu nipara kilhtamaku nema aku mima. Maski chuna, lamaw kʼakgtum kakilhtamaku nema litsama «tuku makgapekuanan», chuna la guerras, tuku nitlan tlawakgo latamanin chu tajatat (Luc. 21:11). Nachuna, max kapekuaniyaw mapakgsinanin, tiku xalak kifamiliajkan chu atanu latamanin tiku lisitsikgo tuku kanajlayaw. Chu na wilakgo tiku pekuankgo xlakata lakpuwankgo pi ni katitayanikgolh tuku tuwa titaxtumakgo la uku o tuku tuwa natitaxtukgo kkilhtamaku nema aku mima.

2. ¿Tuku lalh akxni David chalh kʼGat?

² Kalilakpuwaw David, chatum kskujni Dios tiku milh kilhtamaku pekualh. Akxni mapakgsina Saúl xputsastalanima xlakata namakgni, David tsalalh kʼakgtum kachikin nema xkatapakgsini filisteos, nema xwanikan Gat. Akxni makatsinika mapakgsina xalak Gat, Akís, pi David chatum tliwakga soldado xlitaxtu chu xkamakgninit lhuwa mil filisteos, David lu pekualh (1 Sam. 21:​10-12). Xlilakgaputsa akxni xlilakpuwan tuku max nitlan xʼama tlawani uma mapakgsina. ¿Tuku tlawalh David xlakata nialh xpekualh?

3. Chuna la wan Salmo 56:​1-3, 11, ¿tuku makgtayalh David xlakata nialh xpekualh?

³ Anta kSalmo 56, David lichuwinan la xmakgkatsi akxni xlama kʼGat. Kʼuma salmo liwana wan tuku xlakata xpekuama chu tuku makgtayalh nialh napekuan: lipawa Jehová (kalikgalhtawakga Salmo 56:​1-3, 11). Chu lu tlan kitaxtunilh xlakata lipawa Jehová. Jehová makgtayalh xlakata xtlawalh tuku amakgapitsin nipara tsinu xlakpuwankgonit. Tsukulh tlawa tuku tlawa chatum akgwiti. ¡Chu lu tlan kitaxtulh! Maski xapulana, mapakgsina  Akís xtlawaniputun tuku nitlan David xlakata lipekuanit xliʼakxilha, alistalh nialh chuna lakpuwa. Wa xlakata David tlan tsalalh (1 Sam. 21:13–22:1).

4. ¿Tuku tlan natlawayaw xlakata tlakg nalipawanaw Jehová? Kawili akgtum liʼakxilhtit.

⁴ Na nialh katipekuaw komo nalipawanaw Jehová. Pero ¿la tlakg nalipawanaw Jehová, liwaka akxni pekuamaw? Kalichuwinaw akgtum liʼakxilhtit. Komo xkinkawanikan pi kgalhiyaw akgtum tajatat, max xapulana xpekuaw. Pero akxni xkatsiw pi lu tlan makuchina tiku kinkakuchiman, tlakg tlan xmakgkatsiw. Max makgasa kamakgtayanit amakgapitsin latamanin tiku na xkgalhikgo watiya tajatat nema akinin kgalhiyaw. Chu la uku max kaks kinkakgaxmatniman chu akxilhaw pi xlikana akgatekgsa tuku makgkatsimaw. Chu max kinkawaniyan pi nakinkamaxkiyan likuchun nema kamakgtayanit amakgapitsin latamanin. Xtachuna la uma, tlakg nalipawanaw Jehová komo nalilakpuwanaw tuku tlawanit, tuku tlawama la uku chu tuku natlawa kkilhtamaku nema aku mima. Wa uma tuku tlawalh David chuna la lichuwinan Salmo 56. Nalichuwinanaw makgapitsi versículos xla uma capítulo, chu chuna la nalichuwinantilhayaw kalilakpuwaw tuku tlan natlawayaw xlakata tlakg nalipawanaw Jehová chu nialh napekuanaw.

¿TUKU TLAWALH JEHOVÁ MAKGASA?

5. ¿Tuku lilakpuwa David xlakata nialh xpekualh? (Salmo 56:​12, 13).

⁵ Maski xlatamat David kalipekua xwi, xla tlakg kuenta tlawalh tuku tlan xtlawanit Jehová makgasa (kalikgalhtawakga Salmo 56:​12, 13). David chuna tlawalh putuminika kxlatamat. Akgtum liʼakxilhtit, xmin kilhtamaku xlilakpuwan xtamalakatsukin Jehová, chu uma xmalakapastaka pi Jehová lu tliwakga chu lu kapaxki latamanin (Sal. 65:​6-9). Na xlilakpuwan tuku xtlawanit Jehová xpalakatakan amakgapitsin (Sal. 31:19; 37:​25, 26). Pero tlakg limaxtulh kilhtamaku xlakata nalilakpuwan tuku xtlawanit Jehová xpalakata. Xmakgtayanit chu xkuentajtlawanit lata akxni skgataku xwanit (Sal. 22:​9, 10). Putum uma makgtayalh David nalipawan Jehová xliputum xnaku.

6. ¿Tuku nakinkamakgtayayan nalipawanaw Jehová akxni pekuanaw?

⁶ Akxni napekuana, kalakpuwanti: «¿Tuku  tlawalh Jehová makgasa?». Kalilakpuwanti tuku xla malakatsukinit. Akgtum liʼakxilhtit, komo nalilakpuwana la kakuentajtlawa Jehová laktsu tsiktsi chu xanat, maski umakgolh nila limasiyakgo xtayat chu nila kakninanikgo, tlakg nalipawana pi xla nakuentajtlawayan (Mat. 6:​25-32). Nachuna, kalilakpuwanti tuku tlawanit Jehová xpalakatakan kskujnin. Max tlan xlilakpuwanti xliʼakxilhtit chatum tiku lichuwinankan kBiblia o xlikgalhtawakga tuku titaxtunit chatum kskujni xala uku. a Nachuna, kalilakpuwanti la makgtayanitan Jehová asta la uku. ¿La makgtayan nalakgapasa xaxlikana? (Juan 6:44). ¿La kgalhtinit miʼoraciones? (1 Juan 5:14). ¿La litamakgtayaya chali chali xtamakamastan xKgawasa? (Efes. 1:7; Heb. 4:​14-16).

7. ¿La makgtayalh Vanessa tuku titaxtulh palakachuwina Daniel?

⁷ Chatum tala puskat xalak Haití tiku wanikan Vanessa b titaxtulh tuku tuwa nema lu xmakgapekuan. Chatum chixku tiku xtachiki xwanit, chali chali xmarcarlini chu xmalakgachani mensajes, chu xmafuerzajliniputun xlakata xtaskin o xliʼit xlitaxtulh. Vanessa liwana wanilh pi xla ni xlakaskin, pero chixku lu sitsilh chu asta wanilh pi xʼama tlawani tuku nitlan. ¿Tuku makgtayalh Vanessa nialh napekuan? Tlawalh putum tuku xmatlani xlakata nitu xʼakgspulalh, chu chatum kgolotsin xalak congregación makgtayalh nakaskini tamakgtay mapakgsinanin. Pero na lilakpuwa la Jehová kakuentajtlawalh kskujnin xalamakgasa. Xla wan: «Tiku pulana klakapastakli wa palakachuwina Daniel. Maski xla ni xtlawanit tuku nitlan, mujuka niku xtajumakgo leones, pero Jehová lakgmaxtulh. Kwanilh Jehová pi akit xaktlawanit putum tuku xtalakaskin xlakata nitu xkiʼakgspulalh chu kskinilh pi xkimakgtayalh, chu alistalh, nialh kpekualh» (Dan. 6:​12-22).

¿TUKU TLAWAMA JEHOVÁ LA UKU?

8. ¿Tuku liwana xkatsi David? (Salmo 56:8).

⁸ Maski xlatamat David kalipekua xwi akxni xlama kʼGat, ni mastalh talakaskin pi xmakgatlajalh tapekua. Wata wa lilakpuwa tuku Jehová xtlawama uma kilhtamaku xpalakata. David xʼakxilha pi Jehová xpulalima chu xkuentajtlawama, chu xkatsi pi xʼakgatekgsa la xmakgkatsi (kalikgalhtawakga Salmo 56:8). Na xkgalhi xtamakgtaykan xʼamigos tiku ni xmakgxtakgkgo, chuna la Jonatán chu sacerdote tiku tlakg xkgalhi limapakgsin, Ahimélec (1 Sam. 20:​41, 42; 21:​6, 8, 9). Chu maski mapakgsina Saúl xmakgniputun, David tlan tsalalh. Xla liwana xkatsi pi Jehová xʼakgatekgsa tuku xla xtitaxtuma chu tuku xmakgkatsima.

9. ¿Tuku liwana katsi Jehová kimpalakatakan?

⁹ Komo wix titaxtupat tuku tuwa chu pekuana, kalakapastakti pi Jehová ni kajwatiya katsi tuku titaxtupat, wata na katsi la makgkatsipat. Akgtum liʼakxilhtit, akxni xkachikin skujnin xlitaxtukgo kʼEgipto, Jehová liwana xlakgapasa xtakatsanajwatkan chu xtapatinkan (Éx. 3:7). Kʼakgtum takilhtlin David wanilh Jehová pi xla xʼakxilhnit «xtapatin» chu la xlilhuwa “xlakgaputsama” (Sal. 31:7). Chu asta akxni xkachikin xlipatinankgo tuku nitlan xtlawakgonit, Jehová na xpatinan (Is. 63:9). Lu tlan limakgkatsiyaw pi Jehová kinkaʼakgatekgsniyan chu kinkamakgtayayan xlakata nialh napekuanaw.

10. ¿Tuku makanajliyan pi Jehová lilakgaputsayan chu ankgalhin namakgtayayan?

¹⁰ Akxni titaxtumaw tuku lu tuwa nema kinkamakgapekuanan, max nila akxilhaw la Jehová kinkamakgtayaman. ¿Tuku tlan natlawayaw? Kaskiniw pi kakinkamakgtayan naʼakxilhaw  tuku xla tlawama kimpalakatakan (2 Rey. 6:​15-17). Alistalh kalilakpuwaw: ¿Kinkamatliwakglhnitan akgtum taʼakgchuwin o xtakgalhtin chatum tala nema mastalh ktamakxtumit? ¿Kinkamakgpuwantininitan maktum likgalhtawakga, akgtum video o akgtum takilhtlin? ¿Tlan kinkamamakgkatsinin chatum tala xlakata kinkalitachuwinan akgtum texto o wi tuku kinkawanin? Min kilhtamaku nialh lakapastakaw pi tapaxkit nema kinkalimasiyanikgoyan kinatalankan chu tuku matliwakglha kintakanajlakan, akgtum xtamaskiwin Jehová (Is. 65:13; Mar. 10:​29, 30). Umakgolh tamaskiwin limasiyakgo pi xla kinkalilakgaputsayan chu limasiya pi tlan nalipawanaw (Is. 49:​14-16).

11. ¿Tuku makgtayalh Aida nialh napekuan?

¹¹ Chatum tala puskat xalak Senegal, tiku wanikan Aida, titaxtulh tuku lu tuwa chu akxilhli la Jehová xmakgtayama. Xnatlatni xlakaskinkgo pi tlakg lhuwa tumin xtlajalh xlakata xkamakgtayalh chu xkakuentajtlawalh, xlakata wa tlakg xalanka o xapipiʼ xtsumatkan xwanit. Pero Aida laksakli ni lhuwa tuku nakgalhi xlakata precursora xlitaxtulh, wa xlakata ni lhuwa tumin xtlaja. Xfamilia lu sitsinilh chu nitlan tsukukgolh lichuwinankgo. Aida wan la xmakgkatsi: «Lu xakpekuan xlakata xaklakpuwan pi nila xakkama kamakgtaya kinatlatni chu pi putum latamanin xʼamakgo kilakgmakgankgo. Milh kilhtamaku asta klimawakalh kuenta Jehová xlakata xmastama talakaskin pi xaktitaxtulh tuku tuwa». Pero akgtum kilhtamaku kgaxmatli akgtum taʼakgchuwin nema lu makgtayalh. Xla wan: «Tala kinkamalakapastakan pi Jehová liwana katsi tuku makgalipuwan kinakujkan. Nachuna, lakgkgolotsin chu amakgapitsi natalan kiwanikgolh tuku kimakgtayalh nakakxilha pi Jehová kimpaxki, chu tsinu tsinu tlakg tlan kmakgkatsilh. Ktsukulh tlawani oración Jehová chu chuna la xtitaxtu kilhtamaku tlakg xaklipawan, chu akxni kakxilhli pi xla xkgalhti kiʼoraciones, lu tlan kmakgkatsilh». Titaxtulh kilhtamaku, Aida tekgsli akgtum taskujut nema makgtayalh chuntiya precursora xwa chu na tlan xkalimakgtayalh tumin xnatlatni chu amakgapitsi latamanin. Xla wan: «Kkatsininit naklipawan Jehová xliputum kinaku. Oración kimakgtaya nialhtu naklipekuan».

 ¿TUKU NATLAWA JEHOVÁ KKILHTAMAKU NEMA AKU MIMA?

12. Chuna la wan Salmo 56:​9, ¿tuku liwana xkatsi David?

¹² (Kalikgalhtawakga Salmo 56:9). Uma versículo kinkamasiyaniyan atanu tuku tlawalh David xlakata nialh xpekualh akxni kalipekua xwi xlatamat: lilakpuwa tuku Jehová xʼama tlawa xpalakata kkilhtamaku nema aku xmima. Xkatsi pi Dios xʼama lakgmaxtu akxni xla xlakpuwa pi tlakg tlan. David xkatsi pi Jehová xmalaknuninit pi xla xlichatiy mapakgsina xalak Israel xʼama litaxtu (1 Sam. 16:​1, 13). Chu na xkatsi pi komo wa Jehová tiku xmalaknuninit uma, xlikana xʼama kgantaxtu.

13. ¿Tuku katsiyaw pi natlawa Jehová kkilhtamaku nema aku mima?

¹³ ¿Chu akinin? ¿Tuku kinkamalaknuninitan Dios? Jehová ni kinkamalaknuninitan pi ni katikgalhiw taʼakglhuwit la uku. c Pero maski tuwa tuku natitaxtuyaw kʼuma kakilhtamaku, Jehová kinkamalaknuninitan pi kxasasti kakilhtamaku namasputu putum taʼakglhuwit (Is. 25:​7-9). Liwana katsiyaw pi xla kgalhi litliwakga xlakata nakamalakastakwani tiku nikgonita, xlakata nakinkamapaksayan chu xlakata nakamasputu putum kintalamakgasitsinkan (1 Juan 4:4).

14. ¿Tuku tlan nalilakpuwanaw?

¹⁴ Akxni makgkatsiya pi pekuana, kalilakpuwanti tuku Jehová natlawa kkilhtamaku nema aku mima. Kalilakpuwanti la nawan latamat akxni namalakgsputukan Satanás, akxni nialhti katiʼanankgolh latamanin tiku nitlan likatsikgo chu kajwatiya nalatamakgo tiku tlan likatsikgo, chu akxni talakgalhin tsinu tsinu nalakgsputa. Kʼasamblea regional nema kgalhiw kkata 2014 matitaxtika akgtum liʼakxilhtit nema kinkamakgtayayan nalilakpuwanaw tuku kgalhkgalhimaw. Kʼuma liʼakxilhtit, chatum tala xkalitachuwinama xfamilia tuku xwa 2 Timoteo 3:​1-5 komo xlichuwinalh xlakata la nawan latamat kParaíso: «Kxasasti kakilhtamaku naʼanan lhuwa tapaxuwan, xlakata lakchixkuwin lu nalapaxkikgo, lu napaxkikgo tuku xla xtakanajlakan, nipara tsinu katilakpuwankgolh pi xlakaskinka litaxtukgo, nataktujukgo, tlan nalichuwinankgo Dios chu latamanin, nakakgalhakgaxmatkgo xnatlatnikan, napaxtikatsininankgo, ni katikamakgxtakgkgolh amakgapitsin, nakapaxkikgo xfamiliajkan, tlan nakatalakkaxlakan, ni katilimawakanankgolh tuku nitlan, namachokgokgo tuku tlawaputunkgo, ni xalakluku katiwankgolh, napaxkikgo tuku tlan, ni katikatlawanikgolh tuku nitlan xʼamigos, ni xalaktsakatni katiwankgolh, ni lanka katikamakgkatsika, kajwatiya napaxkikgo Dios chu ni wa tuku nalipaxuwakgo, nakakninanikgo Dios chu nalilatamakgo xtakakninkan; chu wix ni kakatamakgatlini». ¿Lismaninitaw kalitachuwinanaw kifamiliajkan o natalan xlakata la nawan latamat kxasasti kakilhtamaku?

15. ¿Tuku makgtayalh Tanye nialh napekuan?

¹⁵ Chatum tala puskat xalak Macedonia del Norte tiku wanikan Tanye, nialh pekualh akxni lilakpuwa tuku Jehová malaknu. Xla wan pi akxni tsukulh likgalhtawakga Biblia, xnatlatni lu sitsikgolh. Xla wan: «Lalh tuku lu xakpekuani. Kintse xkiwilini makgatanu xakkitaspita ktamakxtumit. Xla chu kintlat kiwanikgolh pi xʼamakgo kimakgnikgo komo akit xtatayana Jehová xaklitaxtulh». Alistalh xnatlatni Tanye tlakgaxtukgolh kxchikkan. ¿Tuku tlawalh uma tsumat? Xla wan: «Wa klilakpuwa pi komo ni xakmakgxtakgli Jehová, xakkama paxuwa putum kilhtamaku. Xaklakapastaka pi maski wi tuku xakmakgatsankgalh kʼuma kakilhtamaku, kxasasti kakilhtamaku Jehová xʼama kimaxki kintatlaja chu xʼama kimakgtaya xlakata nialh xaklakapastakli tuku nitlan xaktitaxtunit». Tanye ni makgxtakgli Jehová chu xlakata Jehová makgtayalh, tekgsli niku tlan xtawi.  La uku tamakgaxtokga chatum tala tiku na lu paxki Jehová chu akxtum xatapaxuwan skujnanimakgo putum kilhtamaku.

KALISKUJWI LA UKU XLAKATA TLAKG NALIPAWANAW JEHOVÁ

16. ¿Tuku nakinkamakgtayayan ni napekuanaw akxni nakgantaxtu tuku wan Lucas 21:​26-28?

¹⁶ Akxni lama nawan lhuwa tapatin, lhuwa latamanin «nalitakatalakgo kaj xlakata xtapekuakan». Pero kskujnin Dios ni katipekuaw chu ni katimakgxtakgwi (kalikgalhtawakga Lucas 21:​26-28). ¿Tuku xlakata? Xlakata lismaninitawa nawan nalipawanaw Jehová. Tanye wan pi tuku titaxtulh makgasa makgtaya la uku natayani tuku tlakg tuwa. Xla wan: «Kkatsininit pi ni anan tuku lu tuwa nema natitaxtuyaw niku Jehová nila nakinkamakgtayayan chu nakinkasikulunatlawayan. Min kilhtamaku tasiya pi amakgapitsin latamanin kgalhikgo lhuwa limapakgsin chu litliwakga, pero Jehová tlakg tliwakga nixawa umakgolh latamanin. Maski tasiya pi ni katitayaniw pulaktum tuku tuwa titaxtumaw, namin kilhtamaku nasputa uma tuku nitlan».

17. ¿La nakinkamakgtayayan texto xla kata 2024? (Kaʼakxilhti xmakni revista).

¹⁷ Maski lamaw kkakilhtamaku niku anan tuku makgapekuanan, akinin tlawayaw chuna la David chu ni mastayaw talakaskin pi tuku kinkamakgapekuanan nakinkamakgatlajayan. Texto xla kata 2024, wa tuku David wanilh Jehová: «Akxni kpekuan, wix klipawanan» (Sal. 56:3). Maktum libro nema lakputsanani tuku wan Biblia lichuwinan xlakata uma versículo: «David ni wa xlilakpuwantawila tuku xpekuani chu nipara wa taʼakglhuwit nema xkgalhi, wata kajwatiya xlipawan tiku tlan xlakgmaxtulh». Chuna la natitaxtu papaʼ kalilakpuwanti tuku wan texto xla uma kata, liwaka komo natitaxtuya tuku tuwa nema namakgapekuanan. Kalimaxtu kilhtamaku nalilakpuwana tuku Jehová tlawanit makgasa, tuku tlawama la uku chu tuku natlawa kkilhtamaku nema aku mima. Komo chuna natlawaya, tlan nawana chuna la David: «Dios klipawan; ni kpekuan» (Sal. 56:4).