1. Habwaki obwire obumu tusobora kutiina?

 ITWENA haroho obututiina. Ky’amananu ngu kwega Baibuli kitukonyiire kuleka kutiina okufa, badaimoni, hamu n’ekiraabaho omu kasumi ak’omumaiso. Baitu tuli omu kasumi akarumu ebirukutiinisa “nebinyakukanga bingi,” nk’obulemu, obucwi bw’ebiragiro, n’endwaire. (Luk. 21:11) Ekindi, nitusobora kutiina abantu, otwaliremu abalemi ba gavumenti abatuhiiganiza, n’abanyabuzaale baitu abarukuhakaniza okuramya okw’amananu. Abamu beralikirra ngu tibarukwija kusobora kugumira ekirengo ekibarukurabamu hati, rundi ekibasobora kutunga omu kasumi ak’omumaiso.

2. Soborra enyikara Daudi ey’akaba arumu omu Gasi.

² Obwire obumu, Daudi nauwe yatiinaga. Ekyokurorraho, Omukama Saulo obwakaba namuserra kumwita, Daudi akatiina yairukira omu rubuga rw’Abafirisiti orwa Gasi. Akisi, omukama wa Gasi akakimanya ngu Daudi nuwe omurwani ow’amaani ow’akaba nabazibwaho omu kizina ngu aisire ‘obukumi n’obukumi’ bw’Abafirisiti. Daudi ‘akatiina muno.’ (1 Sam. 21:​10-12) Akatiina habwokuba akaba atamanyire Akisi ekiyakumukozere. Kiki ekyakonyiire Daudi kusingura okutiina?

3. Kusigikirra ha Zabuli 56:​1-3, 11, kiki ekyakonyiire Daudi kusingura okutiina?

³ Omu Zabuli 56, Daudi akabazaaho omulingo akaba nayehurramu obw’akaba ali Gasi. Omu zabuli egi, Daudi abazaaho ekyamuletiire kutiina, n’ekyamukonyiire kuleka kutiina. Daudi obuyahurraga atiinire, yayesigaga Yahwe. (Soma Zabuli 56:​1-3, 11.) Akaba nakigumya ngu Yahwe naija kumukonyera.  Yahwe akamukonyera kumanya ekyokukora. Akefoora nk’ow’agwire iraru. Omu kiikaro ky’okurora Daudi nk’omunyanzigwa, Akisi akamubinga. Nahabweki Daudi akakira kwitwa.—1 Sam. 21:13–22:1.

4. Nitusobora tuta kweyongera kwesiga Yahwe? Bazaaho ekyokurorraho.

⁴ Naitwe nitusobora kusingura okutiina kakuba twesiga Yahwe. Baitu nitusobora tuta kweyongera kwesiga Yahwe, kukira muno obuturukuba tutiinire? Ekyokurorraho. Kakuba okimanya ngu oine oburwaire obw’amaani, ha kubanza n’osobora kutiina. Baitu n’osobora kuleka kutiina kakuba oba noyesiga dakitaali waawe. N’osobora kuba okimanyire ngu ataaha najanjaba abantu abarwaire oburwaire obu nibakira. Obwogendayo, akuhuliiriza kurungi kandi oyehurra ngu mali nakufaaho. Hanyuma, akugambira omubazi ogwakirize abandi. Omulingo nugwo gumu, tweyongera kwesiga Yahwe, obututekerezaaho ebintu ebiyakozere, ebyaliyo nakora hati, n’ebyarukwija kutukorra omu kasumi ak’omumaiso. Eki nikyo Daudi yakozere. Obuturaaba nitubazaaho ebigambo bye ebiri omu Zabuli 56, tekerezaaho omulingo naiwe osobora kweyongera kwesiga Yahwe kandi okasingura okutiina.

BINTU KI YAHWE EBY’AKOZERE?

5. Daudi akecumiitirizaaho ki kusobora kusingura okutiina? (Zabuli 56:​12, 13)

⁵ N’obukiraaba ngu obwomeezi bwa Daudi bukaba buli omu kabi, akaikara natekerezaaho ebirungi Yahwe eby’akaba amukoliire. (Soma Zabuli 56:​12, 13.) Eki akakikora obwomeezi bwe bwona. Ekyokurorraho, Daudi yayecumiitirizaahoga ebyahangirwe, ekyamwijukyaga ngu Yahwe aine amaani maingi kandi agonza muno abantu. (Zab. 65:​6-9) Ekindi, Daudi yayecumiitirizaahoga ebintu Yahwe eby’akaba akoliire abandi. (Zab. 31:19; 37:​25, 26) Kandi yayecumiitirizaahoga ebintu Yahwe akaba amukoliire uwe nk’omuntu. Yahwe akaba amusagikire kandi amulinzire kuruga omu buto. (Zab. 22:​9, 10) Hataroho kugurukyagurukya, Daudi akeyongera kwesiga Yahwe habw’okwecumiitirizaaho ebintu nk’ebi.

6. Kiki ekiratukonyera kwesiga Yahwe kakuba tuba tutiinire?

 ⁶ Kakuba ohurra otiinire, wekaguze, ‘Bintu ki Yahwe ebyankoliire?’ Wecumiitirizeeho ebyahangirwe. Ekyokurorraho, obuturora omulingo Yahwe afaaho ebinyonyi n’ebyakyo ebitarahangirwe omu kisisani kye, tweyongera kukigumya ngu naitwe natufaaho muno. (Mat. 6:​25-32) Ekindi, wecumiitirizeeho omulingo Yahwe yakonyiire abaheereza be. N’osobora kwesomesaaho omuntu arukubazibwaho omu Baibuli ayayolekere okwikiriza rundi ebyokurorraho by’abaheereza ba Yahwe ab’omu kasumi kanu. a N’osobora n’okwecumiitirizaaho omulingo Yahwe akukonyiire. Akakukonyera ata kwega amananu? (Yoh. 6:44) Agarukiremu ata esaara zaawe? (1 Yoh. 5:14) Buli kiro nogasirwa ota omu kihongwa ky’Omwana we?—Bef. 1:7; Baheb. 4:​14-16.

7. Ekyokurorraho kya nabbi Danieri kikakonyera kita Vanessa?

⁷ Munyaanya itwe Vanessa, b kuruga Haiti, akahikwaho enyikara eyamuletiire kutiina muno. Omusaija ow’omu kicweka nambere yaikaraga akatandika kumuterra esimu n’okumusindikira obutumwa buli kiro namusaba ngu bagonzangane. Vanessa akanga. Baitu omusaija ogu akakwatwa ekiniga, yatandika kumutiinisiriza. Vanessa n’agamba ati: “Nkatiina muno.” Kiki ekyamukonyiire kusingura okutiina? Akalengaho kwerinda omusaija ogu. Omugurusi omu kitebe akamukonyera kubaza n’ab’obusobozi omu kicweka eki. Ekindi, akaikara nayecumiitirizaaho omulingo Yahwe yalinziremu abaheereza be abaakara. Vanessa n’agamba ati: “Omuntu ounabandize kutekerezaaho ni nabbi Danieri. Akanagwa omu kiina ekirumu entale eziine enjara n’obukiraaba ngu akaba ataine musango. Baitu Yahwe akamulinda tizamulya. Nkasaba Yahwe kundinda n’okuleetera omusaija ogu kuleka kuntekerezaaho. Hanyuma nkaleka kutiina.”—Dan. 6:​12-22.

BINTU KI YAHWE EBYARUKUKORA HATI?

8. Kiki Daudi eky’akaba nagumya? (Zabuli 56:8)

⁸ N’obukiraaba ngu obwomeezi bwa Daudi bukaba buli omu kabi obwakaba ali Gasi, atateeke omutima ha bintu ebirukutiinisa. Oihireho, akateeka omutima ha bintu Yahwe ebyakaba namukorra omu bwire obu. Daudi akakyetegereza ngu Yahwe akaba namwebembera, namulinda, kandi namanya omulingo arukwehurramu. (Soma Zabuli 56:8.) Daudi akaba aine abanywani, nka Yonasani na Nyakatagara Omukuru Ahimereki abaamukonyiire muno kandi baamusagika. (1 Sam. 20:​41, 42; 21:​6, 8, 9) N’obukiraaba ngu Omukama Saulo akaba nagonza kumwita, Daudi akasobora kwiruka. Akaba nakigumiza kimu ngu Yahwe namanya kurungi ebizibu ebyarukurabamu n’omulingo birukumuleetera kwehurra.

9. Kiki Yahwe ekyamanyire hali buli omu haliitwe?

⁹ Kakuba otunga ekizibu kandi okahurra otiinire, ijuka ngu Yahwe amanyire ekizibu eki, n’omulingo kirukukuleetera kwehurra. Ekyokurorraho, Yahwe atagarukire ha kurora omulingo Abaisaleri baali nibabonabona omu ihanga lya Misiri, baitu akarora ‘n’obujune’ bwabo. (Kurug. 3:7) Daudi akagamba ngu Yahwe akarora “omuhito” gwe hamu ‘n’obujune’ bwe. (Zab. 31:7) Kandi abantu ba Ruhanga obubaabonabonaga habw’encwamu ezitahikire ezibaabaga bakozere, “yasalirwaga.” (Is. 63:9) Obwoba otiinire, Yahwe aba amanyire  omulingo orukwehurramu, kandi ayetekaniize kukukonyera kuleka kutiina.

10. Habwaki nokigumya ngu Yahwe nakufaaho kandi ngu naija kukukonyera kuraba omu bizibu byona ebyoratunga?

¹⁰ Obwoba oli omu nyikara erukutiinisa, nikisobora kukugumira kukirora ngu Yahwe nakusagika. Nahabweki, musabe akukonyere kurora omulingo arukukusagika. (2 Bakam. 6:​15-17) Hanyuma otekerezeeho ebikaguzo binu: Ogarukirwemu amaani hanyuma y’okuhurra orubazo rundi eky’okugarukamu omu nsorrokano? Ogarukirwemu amaani hanyuma y’okusoma ekicweka ekiri omu bitabu byaitu, kurora vidiyo rundi kuhurra kimu ha bizina byaitu? Omuntu akugambiire ekintu rundi yakusomera ekyahandiikirwe kyakugarramu amaani? Nikisobora kutugumira kurora ngu Yahwe natukonyera kuraba omu b’oruganda na banyaanya itwe hamu n’ebyokulya eby’omwoyo ebitutunga. Baitu ebintu binu, biri bisembo eby’omuhendo kuruga hali Yahwe. (Is. 65:13; Mar. 10:​29, 30) Byoleka ngu natufaaho. (Is. 49:​14-16) Kandi byoleka ngu tusemeriire kumwesiga.

11. Kiki ekyakonyiire Aida kuleka kutiina?

¹¹ Munyaanya itwe Aida, kuruga Senegal, akarora omulingo Yahwe akaba namusagika obuyatungire ebizibu. Nk’oku nuwe akaba ali mwana ow’akuzire omu ka, bazaire be bakaba nibamunihirramu kukora akatunga sente ez’okubarolerra. Baitu hanyuma y’okworobyamu obwomeezi nukwo aheereze nka payoniya, Aida akaba atakyaine sente ez’okubaha. Ab’omu ka ye bakamukwatirwa ekiniga kandi baikara nibamujunana. Aida n’agamba ati: “Nkatiina ngu tindukwija kusobora kukonyera bazaire bange, kandi ngu buli omu naija kunnoba. Nkatandika n’okujunana Yahwe habw’okwikiriza enyikara enu kumpikaho.” Hanyuma akahurra orubazo omu nsorrokano. Ayongera agamba ati: “Arukuha orubazo akatwijukya ngu Yahwe amanyire kurungi obusaasi bwona obutwine ha mutima. Habw’obukonyezi bw’abagurusi hamu n’abantu abandi, mporampora nkatandika kukirora ngu mali Yahwe nangonza. Nkatandika kusaba Yahwe kuruga ha mutima, kandi nkeyongera kutunga obusinge, obunarozere omulingo arukugarukamu esaara zange.” Akasumi kakahika, Aida  yatunga omulimo ogwamukonyiire kuheereza nka payoniya n’okurolerra bazaire be hamu n’abandi. N’agamba ati: “Hati nyegere kwesigira kimu Yahwe. Obumba ntiinire, kandi nkasaba, ndeka kutiina.”

BINTU KI YAHWE EBYARUKWIJA KUKORA?

12. Kusigikirra ha Zabuli 56:​9, Daudi akaba nagumya ki?

¹² Soma Zabuli 56:9. Orukarra runu rwoleka ekintu ekindi ekyakonyiire Daudi kusingura okutiina. N’obukiraaba ngu obwomeezi bwe bukaba buli omu kabi, akecumiitirizaaho ebintu Yahwe eby’akaba naija kumukorra omu kasumi ak’omumaiso. Akaba akimanyire ngu Yahwe yakumujunire omu kasumi akahikire. Yahwe akaba agambire ngu Daudi nuwe yakufookere omukama wa Isaleri hanyuma ya Saulo. (1 Sam. 16:​1, 13) Kandi akaba akimanyire ngu byona Yahwe ebyaraganiza abihikiiriza.

13. Kiki ekiturukugumya ngu Yahwe naija kukora?

¹³ Bintu ki Yahwe ebyaraganiize kutukorra? Titunihira ngu Yahwe naija kutanga ebizibu kutuhikaho. c Baitu n’obutwakuhikwaho ebizibu bya mulingo ki kasumi kanu, Yahwe araganiize kubimaraho omu nsi empyaka. (Is. 25:​7-9) Omuhangi waitu aine amaani ag’okuhumbuura abafu, kutukiriza kimu, n’okwihiraho kimu abo boona abatuhakaniza.—1 Yoh. 4:4.

14. Bintu ki ebitusobora kwecumiitirizaaho?

¹⁴ Obwohurra otiinire, wecumiitirizeeho ebintu Yahwe arukwija kukora omu kasumi ak’omumaiso. Tekerezaaho omulingo olyehurramu hanyuma ya Sitaani n’abantu ababi kuhwerekerezebwa, omu nsi harumu abahikiriire bonka, kandi n’obutahikirra nibukuhwamu mporampora. Omu rusorrokano orukooto orw’omwaka 2014, hakabamu ekyokurorraho ekirukwoleka omulingo tusobora kwecumiitirizaaho ebintu ebiraabaho omu kasumi ak’omumaiso. Nyineeka akaba n’abazaaho n’eka ye omulingo ebiri omu 2 Timoseo 3:​1-5 byakubaire kakuba byali nibibazaaho ebiraaba omu nsi empyaka. Akagamba ati: “Omu nsi empyaka halibayo okusemererwa kwingi. Abantu baliba abarukugonzangana, abarukugonza ebintu eby’omwoyo, abaculeezi, abebundaazi, abarukukugiza Ruhanga, abarukworobera abazaire baabo, abesigwa, abarukugonza ab’omu maka gaabo, abarukwikiranganiza, ababazaaho kurungi abandi obwire bwona, abarukwetanga, abataine kiniga, abarukugonza oburungi, abarukwesigwa, abatarukulemeraho, abatarukwekuliiriza, abarukugonza Ruhanga hatali okugonza kwesemeza, abarukuheereza Ruhanga omu mananu, kandi abantu banu nubo oikalege nabo.” Okira kubazaaho n’ab’omu ka yaawe, rundi Abakristaayo bagenzi baawe, omulingo obwomeezi buraaba omu nsi empyaka?

15. N’obukiraaba ngu Tanja akaba atiinire, kiki ekyamukonyiire kuleka kutiina?

¹⁵ Kwecumiitirizaaho emigisa ey’omu kasumi ak’omumaiso kikakonyera munyaanya itwe Tanja kuruga omu matemba g’ihanga lya Macedonia. Obuyatandikire kwega Baibuli, bazaire be bakamuhakaniza. N’agamba ati: “Ebintu ebimu ebinkaba nintiina ngu nibiija kubaho nibyo byabaireho. Buli murundi nagendaga omu nsorrokano, nyina nyowe yanteeraga. Bazaire bange bakantiinisiriza ngu nibaija kunyita kakuba nfooka omu h’Abakaiso ba Yahwe.” Hanyuma, bakamubinga omu ka. Akakora ki? N’agamba ati: “Nkaikara nintekerezaaho okusemererwa okunditunga habw’ebiro n’ebiro, habwokuba nkaikara ndi mwesigwa hali Yahwe. Ekindi, nkatekerezaaho emigisa Yahwe eyarukwija kumpa omu nsi empyaka habw’ebintu byona ebinferiirwe,  n’omulingo ndiba ntakyaijuka ebintu byona ebibi ebimpikireho.” Tanja akaikara ali mwesigwa, kandi Yahwe akamukonyera yatunga ahokwikara. Kasumi kanu, ali omu buswere n’ow’oruganda omwesigwa kandi n’okusemererwa boona bali omu buheereza obw’akasumi koona.

WEYONGERE KWESIGA YAHWE

16. Kiki ekiratukonyera kwikara tutarukutiina obuturarora obunabbi obuli omu Luka 21:​26-28 nibuhikirra?

¹⁶ Omu kasumi ak’omuhito omwingi, abantu ‘baligwa ensazi obw’okutiina.’ Baitu abaheereza ba Yahwe baliikara batarukutiina, kandi baine obumanzi. (Soma Luka 21:​26-28.) Habwaki tutalitiina? Habwokuba nitwija kuba twikaire nitwesiga Yahwe. Tanja, outubalizeehoga n’agamba ngu ebizibu ebyamuhikireho bikamukonyera kugumiisiriza enyikara ezindi ezitanguhire. N’agamba ati: “Nkyetegeriize ngu, Yahwe n’asobora kutukonyera kuraba omu buli nyikara kandi natuha emigisa. Obwire obumu nikisobora kuzooka ngu abantu b’amaani, baitu Yahwe nabakira amaani. Kandi ekizibu n’obukyakuba ky’amaani kwingana nkaha, kihika kihwaho.”

17. Ekyahandiikirwe eky’omwaka 2024 nikiija kutukonyera kita? (Rora ekisisani ekya ha kyesweko.)

¹⁷ Kasumi kanu, haroho ebintu bingi ebituleetera kutiina. Baitu nka Daudi, nitusobora kukusingura. Ekyahandiikirwe kyaitu eky’omwaka 2024 eri saara ya Daudi ayagambiire Yahwe ati: “Obundatinaga bwona, ndayesigaga iwe.” (Zab. 56:3) Ekitabu kimu ekirukusoborra Baibuli kikabazaaho kiti orukarra runu: Daudi, “ataikale natekerezaaho ebintu ebikaba nibisobora kumuleetera kutiina rundi ebizibu bye. Oihireho, akaikara nayesiga Ogu ayakumujunire.” Omu myezi erukuhonderaho ikara notekerezaaho ekyahandiikirwe eky’omwaka, kukira muno obworahikwaho enyikara ezirukutiinisa. Tunga obwire oyecumiitirizeeho ebintu Yahwe ebiyakozere, ebyarukukora hati, hamu n’ebyarukwija kukora omu kasumi ak’omumaiso. Kandi nka Daudi naiwe noija kusobora kugamba ngu: “Ruhanga nuwe nyesigire, tinditina.”—Zab. 56:4.