1. Wer mayse ga day maapo hẽẽne joŋ naa là?

 HẼẼNE caa naa ɓuy de ngar ngeel maa po wo. Sen go tinoo tu ga fruggi nen wããre Baa pog naa go jag hẽẽne húulí, jag hẽẽne manmbuyuuri wo, lan jag hẽẽne ngeel maa peel no. Amaa, naa wara ti wur maaga “fẽẽre maa joŋ hẽẽne” wo ni debaŋ doo durgi wo, fiɗgi siri, lan cege wo. (Lug 21:11) Maapo ga naa joŋ hẽẽne do jar téebeere wo, do jar kluuri maa peel sir wo ga joŋ wo bon naa, noga jar maa ɓi feele naa maaga kaŋ wo ne naa nen werga naa goŋ Baa mono. Jar maa po joŋ wo hẽẽne do re maaga saara nen ɓaara patala, noga maaga daɗ wo ra wo nen naw maa peeln mono.

2. Wãã ti re maaga Dafid hay nen ɓe de maaga á hay le Gad mo ɗa.

² Dafid hay da’ see ɓe nen ngeel sen lay. Sen hay joŋ de maaga waŋ Sawul hay niigi ɓe ga se ‘warn go mono. Dafid maŋ ga se mo daŋ wo go ɓi sir Filistẽẽ maa Gad no. Akis, waŋ Gad, laa ga Dafid diŋ jee durgi maaga de ẽgre ga à hay ‘waa siŋ ti ɓe ga á “ii [jar filistẽẽ wo] ndar hwal” mono. Dafid “caa hẽẽne go debaŋ.” (1 Sam. 21:​10-12) Á caa jiili go ga Akis joŋ ge se na joŋge la. Day, Dafid ɗii go ne hẽẽne sen ti na ɗiigi ne?

3. Doo maaga naa da’ ɓil Siŋ wora 56:​2-4, 12 mono, Dafid joŋ joŋge maa naa blum hẽẽnen là?

³ Ɓil Siŋ wora 56, Dafid wãã fẽn maaga hay ɗig se de maaga se hay Gad mono. Siŋ sen naa nen hẽẽne maaga hay joŋ Dafid go, amaa se ngaɓ ɗeŋ maaga á hay naa blum ɓe mo lay. De maaga hẽẽne hay joŋge ɓe mono, Dafid hay kaŋ ɗiggi ɓe ti Jeofa. (Jaŋ Siŋ 56:​2-4, 12.) Kaŋge ɗiggi ɓen hay ti ngeel ɓe.  Wer kayge maa ni Jeofan, Dafid da’ ɗeŋ maa tigriŋ sara, de woore lay: Se raw joŋ see ɓe go doo jee loɗge nono! Akis ko Dafid go doo jobo maaga a ge de re ne saara ti ga so nono, day Dafid da’ yããge go tu lay.—1 Sam. 21:13–22:1.

4. Naa joŋ joŋge maa ya’ wer kaŋ ɗiggi naa ti Jeofa là? Naa wer ɓe.

⁴ Naa lay, naa ɗii go ne hẽẽnen ti de kaŋ ɗiggi ti Jeofa. Day, naa joŋ joŋge maaga naa ya’ wer kaŋ ɗiggi ti Jeofa, debaŋ ɓen de maaga hẽẽne yaŋ joŋ naa là? Naa ko wee saɓlaŋ po ɗa. Hayga ndo laa we ga ndo de cege no, taŋgu ɗa hẽẽne joŋ ndo. Amaa, hayga ndo kaŋ ɗiggi we ti dogdor ɓon no, ndo ɗii go ne hẽẽnen ti. Maapo, á joŋ de saŋgu maa pẽẽ jar maaga cege sen de baa rage mono. Maapo ga se co’ sug laa moge de woore, hã bawge go mo jag jiili ti fẽn maaga de gay moge mono. Lan se yer saŋgu maaga hay pẽẽ jar go debaŋ ne ndo. Doo sen ne lay, naa ya’ wer kaŋ ɗiggi naa ti Jeofa ciŋ ni de ɗiggi ti fẽn maaga á go de joŋge ɓe ne naa, ga á de joŋge ɓe wara, lan maaga á joŋ ge yaŋ wo peel mono. Se diŋ fẽn maaga Dafid hay joŋ ne lay. De maaga naa ko wããre ɓe maaga naa da’ ɓil Siŋ wora 56 mono, naa ɗig ti ɗeŋ maaga naa ya’ wer kaŋ ɗiggi naa ti Jeofa, lan ɗii go ne hẽẽnen ti mono.

JEOFA GO DE JOŊ MAYSE NE NAA LÀ?

5. Maa naa blum hẽẽnen mono, Dafid ɗig ti mayse là? (Siŋ 56:​13, 14)

⁵ De maaga naw Dafid hay mbe nen gayri ɗa mono, á hay kaŋ ɗiggi ɓe diŋ ti fẽẽre maaga Jeofa hay go de joŋ rage mono. (Jaŋ Siŋ wora 56:​13, 14.) Nen naw ɓen ɓuy, Dafid hay ɗig ɗiggi maa doo sen neno. Ko ba ɗa, de ngar ngeel po ta’ se hay ɗiggi ti fẽẽre maaga Jeofa joŋ ra mono. Se diŋ fẽn maaga fer ɓo’ sug ɓe ti ẽgre Jeofa maaga daŋgo, lan ti de el ɓe maa se jar ɓuy no. (Siŋ. 65:​7-10) Dafid hay ɗiggi ti fẽẽre maaga Jeofa joŋ ne jar lan wo mo lay. (Siŋ. 31:20; 37:​25, 26) Lan se hay ɗiggi debaŋ ti fẽn maaga Jeofa joŋ ne hẽn ti see ɓe mo pa. Jeofa hay kay Dafid, lan se gor ti ɓe le hãã de maaga á hay klee mono. (Siŋ. 22:​10, 11) Sen go tinoo tu ga, ɗiggi ti fẽẽre sen wo mo deŋ kay Dafid maa kaŋ ɗiggi ti Jeofa de peel ni.

6. De maaga hẽẽne yaŋ joŋ naa no, mayse kay naa maa kaŋ ɗiggi ti Jeofa là?

 ⁶ De maaga hẽẽne yaŋ joŋ ndo no, ni ndo wii jag see ɓo ga: ‘Jeofa go de joŋ mayse là?’ Ɗig ba ti fẽẽre maaga á joŋ ra mo ɗa. Naa ngaɓ wee ne de saɓlaŋ po ɗa, de maaga naa “ko” ɗeŋ maaga Jeofa ko ngar dweere wo de fuɗgi saŋgu maa ti puuli—ga bay wo de joŋge de maŋge ɓe wa, lan ga bay wo goŋge ɓe wa—mo ɗa. Ɗiggi ti fẽẽre sen wo mo deŋ, ya’ hãge ɓil naa ciŋ ga Jeofa kiɗ ɓe fẽẽre maaga naa de sãy ɓaara ti ɓuy yaŋ ne naa lay. (Mat. 6:​25-32) Ɗig ti fẽn maaga Jeofa go de joŋge ɓe ne jar maa goŋge ɓen wo lay. Maapo ga ndo frug nen wããre maa ti jobo maa ɓil Bible ga hay naa nen hãge ɓil maaga tee ɓe bay wa go noga jaŋ wããre ti sedeewa Jeofa maa waran wo. a Ni pa, ɗig ti ɗeŋ maaga Jeofa ɗaw mo le do ɓe ɓaa ɓaa mono. Á joŋ joŋge maaga se jãã mo le see ɓe là? (Jaŋ 6:44) Á yiŋ jag ne ndo ti tosge ɓo wo na yiŋgi là? (1 Jaŋ 5:14) Húulí weel dage ɓe Yeso kay mo tum na kayge là?—Efe. 1:7; Heb. 4:​14-16.

7. Saɓlaŋ Danyel kay Vanessa na kayge maa naa blum hẽẽne là?

⁷ Vanessa, b mãygemanbe po wo Ayiti, hay nen re po maaga joŋ hẽẽne debaŋ. Blo po ga á wãã wo jag sen boŋ hay ɗege ɓe, hay ɓo’ message ne hẽn tum, kiɗ ne ga se suu de ɓe. Vanessa wãã go ne hẽn de woore tu ga se bay de sãy fẽn maa sen ti wa. Amaa, blo sen kol go see ɓe girgir debaŋ, day hay hoor nen ɓe de wããre. Vanessa wãã ga: “Hẽẽne hay joŋ se debaŋ”. Vanessa hay joŋ joŋge maa naa blum hẽẽne sen là? Á maŋ ɗiggi maa de woore maa koɗ see ɓe. Jee maa peel tayge po kay ne maaga á mo ɓo’ sug jar kluuri maa peel sir ɓaara wo. Ni pa, á kaŋ ɗiggi ɓe diŋ ti ɗeŋ maaga Jeofa hay koɗ jar maa wer ɓen wo le de ɓe ɓaa mo pa. Vanessa wãã ga: “Jee maaga ndi tĩĩ ɗiggi ti ɓe taŋgu tu diŋ profed Danyele’ ’. Á wãã pa ga :“à hay ɓo’n go ɓi tuu mingir maaga koŋne hay go de gay rage debaŋ, koh de maaga á hay bay ɓe de joŋ mopo maa de ɓlagge wa mo ɓuy’ ’. Amaa, Jeofa yãã Danyel go. Ndi wii Jeofa ga á mo ko re maa see ɓin wo ɓuy. Blam sen, hẽẽne joŋ ndi ga so.”—Dan. 6:​12-22.

ƊIG TI FẼẼRE MAAGA JEOFA DE JOŊ RAGE PATALA MONO.

8. Dafid hay go de bawge jag jiili ɓe ti may là? (Siŋ 56:8)

⁸ Koh de maaga Dafid hay mbe nen ngeel maa de gayri wo Gad laybla mono, amaa á men see ɓe go le’ge gesiŋ do hẽẽne ga. Á joŋ na joŋge ne? Á maŋ ga se mo ɗig ti fẽn maaga Jeofa de joŋge ne se de ngar ngeel sen mono. Dafid ɗig ga Jeofa de koɗ se ge, ɗaw se ge do, lan de ko ɗiggi se. (Jaŋ Siŋ. 56:9.) Dafid hay da’ kayge maa ti ngeel ɓen do bar ɓe wo. Do Jonataŋ, lan kayge maaga á hay de sãy ɓe ti, ga a le do Ahimeleg, jee sii jag maa kluun mono. (1 Sam. 20:​41, 42; 21:​6, 8, 9) De daŋ sen ɓuy pa so yaw mono, waŋ Sawul hay kiɗgi ga se ii Dafid go, amaa Dafid da’ yãã tenen ɓe go. Á hay go de bawge jag jiili ɓe ga Jeofa de ko re maaga daɗ wo se mono, lan maaga ɗig wo se mono.

9. Jeofa ko mayse see wosela ɓuy yoo naa là?

⁹ De maaga ndo yaŋ nen re maaga joŋ hẽẽne ne ndo no, ɗig ndo ga Jeofa de koge ɓe, lan ga á de ko maaga á de ɗig moge mo lay. Naa maŋ saɓlaŋ po ɗa: Jeofa hay taw diŋ de ko bon maaga à hay joŋ jar Israyel wo le de ɓe Ejipte mo tawa ga, amaa ko “bon maaga á hay wo joge” ɓe mo lay (Laa. 3:7). Dafid hay ‘waa siŋ ga Jeofa de ko “re” maa see ɓin, lan de ko  “lawge” maa see ɓin wo no (Siŋ. 31:8). Day de maaga jar maa ni Baan yaŋ wo ti bon—koh mo hay ba wer ɗiggi ɓaara maaga á maŋ wo de baywoore mo laybla no—“á hay lawge wer ɓaara.” (Esa. 63:9) De maaga hẽẽne yaŋ joŋ ndo no, Jeofa de ko fẽn maaga ndo de ɗiggi ɓe mono, day se de sãy kay ndo maa ɗiigi go ne hẽn ti.

10. Wer mayse ga ndo go de bawge jag jiili ɓo ga Jeofa de ko ndo, lan ga á kay ge ndo yaŋ maa ooge jag re maa hõnla ɓuy là?

¹⁰ Hayga ndo yaŋ nen re maa de gayri, ga ndo bay we ko do Jeofa kay ndo wa no, ndo joŋ joŋge là? Wii ne maaga á mo kay mo maa ko kayge maaga á kay mo mono. (2 Waŋ. 6:​15-17) Blam, ni ɗig ti wiigi jag maa glog wo la no: Siigi wããre noga ferge wããre ti taygeti hay hã ẽgre we mo yawlà? Kefder po, videyo po noga siŋ maa de wããre wer po hay jor glog ɓo we yawlà? Jobo hay wãã ɗiggi po, noga jaŋ wããre Baa po ga hã bawge go ne ndo jiili yawlà? De sen mo kay, maapo naa yõõ ti dage hẽẽre naa wo go, lan kayge maaga naa da’ ɓil wããre Baa go gus tu lay. Pa ga fẽẽre sen wo diŋ kado maaga daŋ wo go ga Jeofa hã ra ne naa mono. (Esa. 65:13; Mark 10:​29, 30) Fẽẽre sen ngaɓ wo go ga Jeofa ko decoo ɓo. (Esa. 49:​14-16) Lan, saara ngaɓ pa ga ndo mbo nen kaŋ ɗiggi ti Jeofa.

11. Mayse kay Ayda maa naa blum hẽẽne ɓen là?

¹¹ Ayda maaga wo ɓi sir Senegal, hay ko ɗeŋ maaga Jeofa hay kay se maa soɗ re mono. Werga á diŋ jag mbarga so mono, pããre ɓe hay wo gorge ga á mo da’ joŋre maa re see ɓe, lan maa saara lay. Amaa, blam maaga á kol naw ɓen go gus de tõõ wer joŋre piyoniyẽ mono, re suŋgu le’ da’ Ayda tu. Ɓil jar maa liŋ ni ɓaaran sõõ wo ne hẽn ti lan ɗar wo ne. Se wãã ga: “Hẽẽne hay joŋ ndi ti maaga ndi kãã maa kay pããre ɓi wo ga, lan jar ɓuy bay de sãy ɓi ti wa mono”. Á wãã pa ga: “Ɓil ɓi sõõ ne Jeofa ti ga á men fẽẽren wo go seege de baywoore doo sen ne lelà”. Blam, se laa siigi wããre ti taygeti. Jee sii wããren ɓo’ sug jar ga: “, koh ɓil naa mo sõõ ba sõõge la, Jeofa de koge ɓe. Go blam me’ mokay, wer yaŋ maaga jar maa peel tayge wo de hẽẽrebe baa wo me hã bawge go me jag jiili ga Jeofa da me. Ndi le’ tos Jeofa de kaŋ ɗiggi ti ɓe de woore, lan  ndi da’ jiili maa de suuli, ndi ko yiŋgi jag Jeofa ti tosge ɓin wo.” Ig go me’ blam mokay, Ayda da’ joŋre maaga se le’ da’ suŋgu maa ya’ re maa see ɓen wo go, lan maa kay jar maa liŋ ni ɓaara wo de jar maa tigriŋ wo pa. Ayda ɓo’ ti ɓe go de wããge so ga: “Ndi had kaŋ ɗiggi go ti Jeofa de jiili ɓi ɓuy”. “Patala, blam maaga ndi tos mo kay, hẽẽne joŋ me ga so.”

JEOFA JOŊ MAYSE YAŊ WO PEEL LÀ?

12. Doo maaga naa da’ ɓil Siŋ wora 56:10 ne mono, Dafid hay go de bawge jag jiili ɓe ti maylà?

¹² Jaŋ Siŋ wora 56:10. Ferse sen ngaɓ ɗeŋ maa tigriŋ ga kay Dafid maa naa blum hẽẽne ɓen mono. Koh de maaga á hay ba mbe nen re laybla’, á ɗig ti fẽn maaga Jeofa joŋ ge yaŋ ne se pa mono. Dafid hay de koge ga Jeofa yãã ge se go ti wur ɓe, werga Jeofa hay go de wããge ga Dafid diŋ jee maaga kol ge yaŋ ti waŋ Israyel mono. (1 Sam. 16:​1, 13) Dafid hay go de bawge jag jiili ɓe ga fẽẽre maaga Jeofa wãã ra bag ge wo jag go cwãy.

13. Kaŋge ɗiggi maa hõn ga naa kaŋ ti Jeofa là?

¹³ Jeofa wãã ga se joŋ mayse yaŋ ne ndo là? Naa bay ba gorge ga á mo yãã naa go jag ren wo ɓuy wa yawlà. c Amaa ɗig ga, koh hay ba re maa hõn ga naa yiŋ de ɓaara wara ɓuy laybla, Jeofa caa ge wer ɓaara go ɓuy ti sir maa defay no. (Esa. 25:​7-9) Sen go tinoo tu ga jee joŋ naan de ẽgre debaŋ maa bir húulí wo, maa pẽẽ cege, lan maa caa wer jar hee ɓen wo go ɓuy.—1 Jaŋ 4:4.

14. Naa hay nen ɗiggi ti mayse là?

¹⁴ De maaga hẽẽne yaŋ joŋ ndo no, ɗig ti fẽn maaga Jeofa joŋ ge yaŋ wo nen naw maa peeln mono. Ko ba see ɓo wo go ti wur maaga manhúulí yee nen go, ga jar maa de deele kolge wo go ti tu jar maa de ɓlaggen wo no, lan ga wosela ɓuy me’ me’ kol go bay ɓlagge see mo ɗa. Demonstration po ti taygeti maa kluu 2014 ngaɓ ɗeŋ maaga naa ɗig ti fẽẽre maaga wo de gor naa peel mono. Pããbe po ndal de jar maa liŋ ni ɓe wo ti maaga 2 Timote 3:​1-5 hay we wããge diŋ ti maaga fẽẽre joŋ wo ɓil paradis joŋge la mono, ga: “Ɓil sir maa defay, wur maa de fruygi ga daŋgo joŋ yaŋ wo ni. Werga jar joŋ da kããra, da fẽẽre maa ti nenterse wo, ko wo ngar hugli see ɓaara, fer wo ti see ɓaara gesiŋ, togoɗ wo Baa, hoo wo sug ti pããre ɓaara wo, kee wo jar debaŋ, hoo wo sug ti Baa, da wo jar maa liŋ ni ɓaara wo, yãã wo jage, wãã wo ti kããra de woore, ɗaw wo see ɓaara, wo desãy, da wo fẽẽre maa de el wo, joŋ wo re de woore, da wo Baa dedaŋ fẽẽre maaga sãy ɓe ti ɓaara, hã wo ɓil ti Baa. Sa’ see ɓo see fẽẽre sen wo mo deŋ no”. Ndo mbo de ndalge de jar ni ɓay wo noga de hẽẽre ɓo wo ti naw maaga joŋ wo ɓil sir maa defayn mo yawlà?

15. Á mbe ti ngeel ɓe ga hẽẽne hay joŋ Taniya, mayse kayn maa naa blum ɓe là?

¹⁵ Taniya, mãygemaabe po wo ɓaŋ gloŋhweede Masedwan naa blum hẽẽne maa ɓen de ɗiggi ti bosa’ maaga se da’n ge wo nen naw maa peeln mono. Pããre ɓe oo wo go ne hẽn nen graŋ ti hadge wããre Baa ɓe no. Á wãã ga: “Fẽẽre maa naa jiili me hay wo ngaɓa debaŋ. Man ɓi hay ma’ mege tum blam maaga ndi a le ti taygeti mono. Pããre ɓi wo ga saara ii me go, hayga ndi kol we go sedeewa Jeofa no.” Ɓo’ge ti ɓen so, pããre Taniya nii wo ne go see tiŋ. Taniya ɗig na ɗiggi ne? Á wãã ga: “Ndi kaŋ ɗiggi diŋ ti maaga ndi joŋ ge yaŋ de fruygi tum hayga ndi maŋ we ga ndi mo hay tum de deele no. Ndi ɗig ti bosa’ maaga Jeofa kaŋ ge me ti ɓil sir maa defayn wer fẽẽre maaga ndi bas ra go ti tamsir maa waran mo pa. Lan ndi ɗig ti ti maaga à yõõ ge ti go ti fẽẽre maa debaywoore maa patalan wo no”. Taniya oo de deele. Jeofa kay ne maaga á mo da’ ngeel  maaga se hay ni de woore mono. Wara, Taniya da hẽnbe po de deele, day saara ɓog ɓuy wo ti joŋre piyoniyẽ ne Jeofa de fruygi debaŋ.

YA’ WER KAŊ ƊIGGI ƁO TI JEOFA

16. Mayse kay ge naa yaŋ maa lagge de coɓge de maaga naa ko fẽẽre maaga wo de wããge ɓil Lug 21:​26-28 mo là?

¹⁶ Ti wur bon maa de hãã debaŋn mono, jar “huɗ gi wo yaŋ go de hẽẽne”. Amaa jar maa ni Baan lagge wo yaŋ ngiŋ, lan de coɓge. (Jaŋ Lug 21:​26-28.) Wer mayse ga naa men ge see naa go le’ge gesiŋ do hẽẽne ga là? Werga naa joŋ go de had kaŋ ɗiggi ti Jeofa. Taniya, maaga naa wãã le ti ɓe la, wãã ga re maaga hay daɗ se wo le ɓaa kay wo se maa ooge jag re maa de gayri maa waran wo no. Á wãã ga “Ndi da’ pa ga re po bay maaga Jeofa bay de kããge maa kay naa maa soɗge ɓe ga na wa. Day maapo, á ko mbe doo ga jar de wãã wããre fẽẽren nono, amaa pa ga Jeofa de daŋ rage. Lan ga bonn mo hay ba de gayri elaybla no, á tawn ge go”.

17. Ferse naa maa nen kiŋgi 2024 kay naa na kayge là? (Ko foto maa nen faale no.)

¹⁷ Wara, fẽẽre maaga joŋ wo hẽẽne raw wo ngaɓa. Amaa, doo Dafid no lay, naa mbe de kããge maa naa blum hẽẽne no. Ferse naa maa nen kiŋgi 2024 diŋ tosge Dafid ne Jeofa: “De. . .maaga hẽẽne yaŋ de caa ndi no, ndi kaŋ ɗiggi ɓi diŋ ti ɓo.” (Siŋ. 56:3) Doo maaga naa da’ ɓil kefder maa naa wer Bible wãã ti ferse sen ga Dafid “hay bay ɗiggi ti fẽẽre maaga joŋ wo hẽẽne ne hẽn mo wa, hay bay ko re maa see ɓen wo wa lay. Amaa, se kaŋ ɗiggi diŋ ti jee maaga yãã se yaŋ go mono”. Ɗig ti ferse naa maa nen kiŋgi maa tagla nen few maa peeln wo no, debaŋ ɓen de maaga ndo yaŋ nen re maa joŋ hẽẽne no. Kiɗ wur maa ɗiggi ti fẽẽre maaga Jeofa joŋ ra le ɓaa, de joŋ rage wara, lan ga joŋ ra yaŋ wo peel mono. Day, doo Dafid ne lay mono, ndo mbo de kããge maa wããge ga:“Ndi de kaŋ ɗiggi diŋ ti Baa; Ndi joŋ hẽẽne mopo gà hase.”—Siŋ. 56:5.