1. Kwa nini huenda wakati mwingine tukahisi woga?

 KILA mmoja wetu huhisi woga pindi fulani. Bila shaka kwa sababu tunajua mambo ambayo Biblia inafundisha, hatuogopi wafu, roho waovu, au mambo yatakayotukia wakati ujao. Lakini bado tunaishi katika nyakati zenye “mambo yenye kuogopesha,” kama vile vita, uhalifu, na magonjwa. (Luka 21:11) Huenda pia tukawaogopa wanadamu, kutia ndani serikali zinazotukandamiza, au hata watu wa familia wanaopinga ibada ya kweli. Baadhi ya watu wanaogopa kwamba hawataweza kuvumilia jaribu wanalokabili sasa, au ambalo watakabili wakati ujao.

2. Fafanua hali aliyokabili Daudi alipokuwa Gathi.

² Kuna nyakati ambazo Daudi alihisi woga. Kwa mfano, Mfalme Sauli alipokuwa akimwinda, Daudi aliamua kukimbilia kwenye jiji la Wafilisti la Gathi. Baada ya muda mfupi, Akishi, mfalme wa Gathi, alijua kwamba Daudi ndiye yule shujaa ambaye aliimbiwa wimbo kwamba ameua “makumi ya maelfu” ya Wafilisti. Daudi ‘akaogopa sana.’ (1 Sam. 21:10-12) Aliogopa mambo ambayo Akishi angemtendea. Daudi alishindaje woga wake?

3. Kulingana na Zaburi 56:1-3, 11, Daudi alishindaje woga wake?

³ Kwenye Zaburi ya 56, Daudi anaeleza hisia zake alipokuwa Gathi. Zaburi hiyo inataja waziwazi jinsi Daudi alivyoogopa, na pia jinsi alivyoshinda woga huo. Alipoogopa, Daudi alimtumaini Yehova. (Soma Zaburi 56:1-3, 11.) Daudi alikuwa na sababu nzuri za kumtumaini Yehova. Kwa msaada wa Yehova, Daudi alitumia mbinu isiyo ya kawaida lakini yenye matokeo mazuri. Alijifanya mwenda wazimu! Badala ya kumwona kuwa tishio, Akishi alimwona Daudi kuwa kero, hivyo Daudi aliweza kutoroka.—1 Sam. 21:13–22:1.

4. Tunawezaje kumtumaini zaidi Yehova? Toa mfano.

⁴ Sisi pia tunaweza kushinda woga kwa kumtumaini Yehova. Lakini tunaweza kumtumaini zaidi Yehova jinsi gani, hasa tunapoogopa? Fikiria mfano ufuatao. Ukigundua kwamba una ugonjwa fulani, huenda mwanzoni ukaogopa. Hata hivyo, unaweza kupunguza woga wako ikiwa unamtumaini daktari wako. Huenda amewasaidia kwa njia nzuri watu wengi wenye ugonjwa kama huo. Anakusikiliza kwa makini unapoeleza hisia zako na hivyo unasadiki kwamba anakujali. Na anaweza kupendekeza matibabu ambayo yamewasaidia wengine. Vivyo hivyo, tunamtumaini zaidi Yehova tunapofikiria mambo ambayo tayari ametufanyia, mambo anayotufanyia sasa, na mambo atakayotufanyia wakati ujao. Hivyo ndivyo alivyofanya Daudi. Unapochunguza baadhi ya maneno yake yaliyoongozwa na roho yanayopatikana kwenye Zaburi ya 56, fikiria kuhusu jinsi wewe pia unavyoweza kumtumaini zaidi Yehova na kushinda woga wako.

MAMBO AMBAYO TAYARI YEHOVA AMEFANYA

5. Daudi alitafakari mambo gani ili kushinda woga wake? (Zaburi 56:12, 13)

⁵ Uhai wa Daudi ulipokuwa hatarini, alikazia fikira mambo ambayo tayari Yehova alikuwa amemfanyia. (Soma Zaburi 56:12, 13.) Hiyo ilikuwa njia ya kufikiri ya Daudi katika maisha yake yote. Kwa mfano, nyakati nyingine alitafakari kuhusu uumbaji wa Yehova, ambao ulimkumbusha kwamba Yehova ana nguvu nyingi na anawapenda sana wanadamu. (Zab. 65:6-9) Pia, Daudi alitafakari mambo ambayo Yehova amewafanyia wengine. (Zab. 31:19; 37:25, 26) Na hasa alitafakari mambo ambayo tayari Yehova alikuwa amemfanyia yeye binafsi. Yehova alikuwa amemtegemeza na kumlinda Daudi tangu akiwa mtoto. (Zab. 22:9, 10) Bila shaka, kutafakari mambo hayo kulimsaidia sana Daudi kumtumaini zaidi Yehova!

6. Ni nini kitakachotusaidia kumtumaini Yehova tunapoogopa?

⁶ Unapoogopa, jiulize hivi, ‘Ni mambo gani ambayo tayari Yehova amenifanyia?’ Tafakari kuhusu vitu alivyoumba. Kwa mfano, ‘tunapoangalia kwa makini’ jinsi Yehova anavyowatunza ndege na maua—ambayo hakuyaumba kwa mfano wake na wala hayana uwezo wa kumwabudu—tunaweza kuimarisha uhakika wetu kwamba atatutunza sisi pia. (Mt. 6:25-32) Fikiria pia mambo ambayo Yehova amewafanyia waabudu wake. Unaweza kujifunza kuhusu mwabudu wake anayetajwa katika Biblia ambaye alionyesha imani ya pekee, au unaweza kusoma kuhusu simulizi la maisha la mtumishi wa Yehova katika siku zetu. a Zaidi ya hayo, tafakari kuhusu jinsi ambavyo Yehova tayari amekutunza. Alikuvutaje katika kweli? (Yoh. 6:44) Amejibuje sala zako? (1 Yoh. 5:14) Unanufaikaje kila siku kutokana na dhabihu ya Mwana wake mpendwa?—Efe. 1:7; Ebr. 4:14-16.

7. Simulizi la nabii Danieli lilimsaidiaje Vanessa kushinda woga wake?

⁷ Vanessa, b dada nchini Haiti, alikabili hali yenye kuogopesha. Mwanamume fulani katika eneo alilokuwa akiishi, alimpigia simu na kumtumia jumbe fupi kila siku, akimlazimisha wawe na uhusiano wa kimapenzi. Vanessa alikataa katakata. Lakini mwanamume huyo alizidi kumsumbua na hata alitishia kumdhuru. Vanessa anasema, “Niliogopa.” Vanessa alishindaje woga wake? Alifanya yote aliyoweza ili kujilinda. Mzee wa kutaniko alimsaidia kuwasiliana na wenye mamlaka. Lakini pia alitafakari jinsi Yehova alivyokuwa amewalinda watumishi wake wa zamani. Vanessa anaeleza hivi: “Mtu wa kwanza niliyemfikiria alikuwa nabii Danieli. Ingawa hakuwa na hatia, alitupwa ndani ya shimo la simba waliokuwa na njaa. Hata hivyo, Yehova alimtunza. Nami niliacha mambo yote mikononi mwa Yehova. Na baada ya hapo sikuogopa tena.”—Dan. 6:12-22.

MAMBO AMBAYO YEHOVA ANAFANYA SASA

8. Daudi alikuwa na uhakika gani? (Zaburi 56:8)

⁸ Ingawa uhai wa Daudi ulikuwa hatarini alipokuwa Gathi, hakukazia fikira mambo yaliyomwogopesha. Badala yake, alichagua kufikiria mambo ambayo Yehova alikuwa akimfanyia wakati huo. Daudi angeweza kutambua kwamba Yehova alikuwa akimwongoza na kumlinda na kwamba alielewa hisia zake. (Soma Zaburi 56:8.) Pia, Daudi alikuwa na marafiki kama vile, Yonathani na kuhani mkuu Ahimeleki ambao walimtegemeza kwa uaminifu na kumpa msaada unaofaa. (1 Sam. 20:41, 42; 21:6, 8, 9) Na ingawa Mfalme Sauli alitaka kumuua, Daudi aliweza kutoroka na kuokoa uhai wake. Alikuwa na uhakika kwamba Yehova alilijua vizuri jaribu lake na jinsi lilivyokuwa likimwathiri kihisia.

9. Yehova anajua nini kuhusu kila mmoja wetu?

⁹ Unapokabili jaribu linalokufanya uogope, kumbuka kwamba Yehova anajua jaribu unalokabili na jinsi linavyokufanya uhisi. Kwa mfano, Yehova aliona jinsi Waisraeli walivyotendewa isivyo haki nchini Misri na pia ‘alijua maumivu yao.’ (Kut. 3:7) Daudi aliimba kwamba Yehova aliona “dhiki” zake na “mateso makali yaliyo ndani” yake. (Zab. 31:7) Na watu wa Mungu walipoteseka—hata kwa sababu ya maamuzi yao wenyewe ya kipumbavu—Yehova “alitaabika.” (Isa. 63:9) Unapoogopa, Yehova anaelewa jinsi unavyohisi na yuko tayari kukusaidia kushinda woga wako.

10. Ni nini kinachokuhakikishia kwamba Yehova anakujali na kwamba atakusaidia kukabiliana na jaribu lolote?

¹⁰ Hata hivyo, huenda usitambue jinsi Yehova anavyokusaidia unapokabili jaribu linalokuogopesha. Basi, unaweza kufanya nini? Mwombe Yehova akusaidie uone jinsi anavyokutegemeza. (2 Fal. 6:15-17) Kisha fikiria maswali haya: Je, kuna hotuba yoyote au maelezo katika mkutano wa kutaniko yaliyokuimarisha? Je, kuna chapisho lolote, video, au wimbo uliotungwa ambao umekutia moyo? Je, kuna mtu yeyote ambaye amekueleza jambo au kukusomea andiko lililokutia moyo? Inaweza kuwa rahisi kusahau jinsi ndugu na dada wanavyotupenda na jinsi chakula cha kiroho kinavyotunufaisha. Hata hivyo, hizo ni zawadi za pekee kutoka kwa Yehova. (Isa. 65:13; Marko 10:29, 30) Zinathibitisha kwamba Yehova anakujali. (Isa. 49:14-16) Na zinathibitisha kwamba anastahili kutumainiwa. 

11. Ni nini kilichomsaidia Aida kukabiliana na woga wake?

¹¹ Aida, anayeishi nchini Senegal, alitambua jinsi Yehova alivyomtegemeza wakati wa jaribu. Kwa kuwa yeye ndiye mtoto wa kwanza, wazazi wake walitarajia apate pesa za kutosha kujitunza yeye mwenyewe na kuwatunza wao. Lakini Aida aliporahisisha maisha yake ili awe painia, alikabili matatizo ya kiuchumi. Watu wa familia yake walimkasirikia na kumsema vibaya. Aida anasema hivi: “Niliogopa kwamba nisingeweza kuwasaidia wazazi wangu na watu wote wangenitenga. Na hata nilimlaumu Yehova kwa kuruhusu mambo yawe mabaya sana.” Kisha alisikiliza hotuba kwenye mkutano. Anaendelea kusema hivi: “Ndugu aliyetoa hotuba alitukumbusha kwamba Yehova anajua mambo yanayotusababishia mahangaiko au woga. Kupitia ushauri wa wazee na wa watu wengine, hatua kwa hatua nilijihakikishia upendo wa Yehova. Nilianza kusali kwa Yehova nikiwa na uhakika zaidi, na nilipata amani nyingi nilipoona akijibu sala zangu.” Baada ya muda, Aida alipata kazi iliyomsaidia kujitegemeza akiwa painia na kuwapa msaada wa kifedha wazazi wake na watu wengine. Anasema hivi: “Nimejifunza kumtumaini kikamili Yehova. Sasa, mara nyingi woga wangu unaondoka baada tu ya kusali.”

MAMBO AMBAYO YEHOVA ATAFANYA WAKATI UJAO

12. Kulingana na Zaburi 56:9, Daudi alikuwa na uhakika gani?

¹² Soma Zaburi 56:9. Mstari huo unafunua njia nyingine iliyomsaidia Daudi kushinda woga wake. Ingawa uhai wake ulikuwa hatarini, alitafakari mambo ambayo Yehova angemfanyia wakati ujao. Daudi alijua kwamba Yehova angemwokoa kwa wakati unaofaa. Isitoshe, Yehova alikuwa ametangaza kwamba Daudi angekuwa mfalme anayefuata wa Israeli. (1 Sam. 16:1, 13) Daudi alikuwa na uhakika kwamba jambo lolote ambalo Yehova aliahidi lingetimia.

13. Tunaweza kuwa na uhakika gani katika Yehova?

¹³ Yehova ameahidi atakufanyia nini? Hatutarajii kwamba atukinge kutokana na matatizo yote. c Lakini kumbuka kwamba majaribu yoyote ambayo huenda ukakabili katika mfumo huu wa mambo, Yehova atayaondoa katika dunia mpya inayokuja. (Isa. 25:7-9) Bila shaka Muumba wetu ana nguvu za kufufua wafu, kutuponya, na kuondoa wapinzani wote.—1 Yoh. 4:4.

14. Tunaweza kutafakari kuhusu nini?

¹⁴ Unapoogopa, tafakari mambo ambayo Yehova atafanya wakati ujao. Fikiria jinsi utakavyohisi Shetani atakapoondolewa, waovu watakapoangamizwa, na dunia itakapokuwa na watu waadilifu tu, na kutokamilika kutakavyoisha hatua kwa hatua kila siku. Onyesho lililotolewa kwenye programu ya kusanyiko la eneo la mwaka wa 2014, lilionyesha jinsi tunavyoweza kutafakari kuhusu tumaini letu. Baba alizungumza na familia yake kuhusu jinsi ambavyo maneno ya 2 Timotheo 3:1-5 yangesomwa tofauti ikiwa mistari hiyo iliyotabiriwa ingezungumzia hali zitakavyokuwa katika Paradiso. Alisema hivi: “Katika ulimwengu mpya, kutakuwa na nyakati zenye furaha sana. Maana watu watakuwa wenye kupendana, wenye kupenda mambo ya kiroho, wenye kiasi, wanyenyekevu, wenye kumsifu Mungu, wanaotii wazazi, wenye shukrani, washikamanifu, walio na upendo wa asili, wanaotaka makubaliano, wanaosema mema kuhusu wengine sikuzote, wanaojizuia, wapole, wanaopenda wema, wanaotumainika, wenye kutii, wanyenyekevu katika akili, wanaompenda Mungu badala ya kupenda raha, wakichochewa na upendo wa kweli kwa Mungu; nawe shikamana na watu hao.” Je, wewe huzungumza na watu wa familia yako au waabudu wenzako kuhusu jinsi maisha yatakavyokuwa katika ulimwengu mpya?

15. Ingawa Tanja aliogopa, ni nini kilichomsaidia kushinda woga wake?

¹⁵ Dada anayeitwa Tanja, kutoka nchini Makedonia Kaskazini alishinda woga wake kwa kutafakari kuhusu baraka za wakati ujao. Alipoanza kujifunza Biblia, wazazi wake walimpinga vikali. Anasema hivi: “Baadhi ya mambo niliyoogopa kwamba yangetukia, yalitukia. Mama yangu alinipiga kila niliporudi kutoka kwenye mikutano. Wazazi wangu walitishia wangeniua ikiwa ningekuwa Shahidi wa Yehova.” Mwishowe, Tanja alifukuzwa kutoka nyumbani kwao. Alitendaje? Anasema hivi: “Nilikazia fikira jinsi ambavyo ningekuwa na furaha milele ikiwa ningechagua kudumisha utimilifu wangu. Pia, nilifikiria kuhusu jinsi Yehova atakavyonibariki katika ulimwengu mpya, kwa kunipatia kitu chochote ambacho huenda ningepoteza katika mfumo huu na jinsi mambo yote mabaya yatakavyosahaulika.” Tanja alidumisha utimilifu wake. Na kwa msaada wa Yehova alipata mahali pa kuishi. Leo, Tanja amefunga ndoa na ndugu mwaminifu na wanatumikia pamoja kwa shangwe katika utumishi wa wakati wote.

MTUMAINI ZAIDI YEHOVA

16. Ni nini kitakachotusaidia kuendelea kuwa jasiri tutakapoona matukio yaliyotabiriwa kwenye Luka 21:26-28? 

¹⁶ Wakati wa dhiki kuu, watu kwa ujumla “watazimia kwa woga.” Lakini watu wa Mungu wataendelea kuwa jasiri na kusimama imara. (Soma Luka 21:26-28.) Kwa nini hatutakubali kushindwa na woga? Kwa sababu tayari tutakuwa tumejifunza kumtumaini Yehova. Tanja, aliyenukuliwa awali, anasema kwamba mambo aliyopitia zamani yanamsaidia kukabiliana na hali ngumu nyingine anazokabili. Anaeleza hivi: “Nimetambua kwamba Yehova anaweza kutusaidia kuvumilia hali yoyote na kutubariki. Wakati mwingine huenda ikaonekana kana kwamba watu wengine wanadhibiti mambo, lakini ukweli ni kwamba Yehova ana nguvu nyingi kuliko watu hao. Na ingawa jaribu linaweza kuonekana kuwa gumu, litakwisha.”

17. Andiko letu la mwaka wa 2024 litatusaidiaje? (Tazama picha kwenye jalada.)

¹⁷ Leo, kuna mambo mengi yanayotufanya tuhisi woga. Lakini kama Daudi, tunaweza kukataa kushindwa na woga. Andiko letu la mwaka wa 2024 ni sala ya Daudi kwa Yehova, anasema hivi: “Ninapoogopa, ninakutumaini wewe.” (Zab. 56:3) Msomi mmoja wa Biblia alisema hivi kuhusu mstari huo, Daudi “hakuendelea kufikiria kuhusu mambo yaliyomwogopesha au matatizo yake, badala yake alimtegemea Mkombozi wake ambaye angemwokoa.” Lifikirie andiko letu la mwaka katika miezi inayokuja, hasa unapokabili hali zinazokuogopesha. Tenga wakati wa kutafakari mambo ambayo Yehova alifanya zamani, anayofanya sasa, na atakayofanya wakati ujao. Kisha, kama Daudi, utaweza kutangaza hivi: “Katika Mungu ninaweka tumaini langu; siogopi.”—Zab. 56:4.