1. Parché che dele volte ghemo paura?

 COME ghemo imparà la verità dela Bìblia, no ghemo mia paura de quei che i ze morti, dei demoni o de quel che ndarà suceder nel futuro. Magari, ancoi ghen’è tante “robe de spaurarse”, come guere, violensa e malatie. (Luc. 21:11) Pol esser che ghemo paura quando i governi o quei dela nostra fameia i ne vien contra parché adoremo a Geovà. E arquanti i resta preocupadi se i sarà boni de dàrghene fora cole dificoltà de adesso o del futuro.

2. Spiega cossa che ga sucedesto quando Davi l’era nela cità de Gate.

² Nel passà, anca Davi el ga bio paura dele volte. Varda cossa ga sucedesto quando lu l’era drio scampar del rè Saul, che el volea coparlo. Davi ghe ga tocà scampar via par una cità dei filistei de nome Gate. Achis, che l’era el rè dela cità, el ga savesto che l’era stà Davi copar tanti filistei e che le persone le seitea a lodarlo. Alora, Davi el ga bio tanta paura de quel che el rè Achis podaria far contra lu. (1 Sam. 21:10-12) Cossa galo fato?

3. De acordo con Salmo 56:1-3, 11, cossa che ga giutà Davi a dàrghene fora cola paura?

³ Nel Salmo 56, Davi el conta come el se ga sentio quando l’era in Gate. Lu el spiega parché el gavea paura e che l’è stà bon de dàrghene fora parché el se ga fidà in Geovà. (Ledi Salmo 56:1-3, a 11. b) Davi el savea che el podea fidarse in  lu. Alora, col aiuto de Geovà, lu el ga dessidio far una roba difarente. Lu el ga fato finta de esser mato. Cossita, invesse de proar copar Davi, Achis el ga volesto che quel omo mato el ndesse via de là, e Davi l’è stà bon de scampar. — 1 Sam. 21:13–22:1.

4. Cossa che ghemo de far par fidarse de pi in Geovà? Parla de un esémpio.

⁴ Anca noantri podemo dàrghene fora cola paura se se fidemo in Geovà. Ma cossa che ghemo de far par fidarse del tuto in Geovà, anca se semo spauradi? Proa pensar come te ndarissi sentirte dopo saver che te ghè una malatia. Fursi te restarissi spaurà. Ma metemo dir che te sì ndato al dotor e che lu el te ga scoltà e el ga capio quel che te sì drio sentir. Lu l’è stà bon de giutar tante persone cola stessa malatia e el te spiega el rimèdio che el ndarà darte. Cossita, te resti manco spaurà. Dela medèsima maniera, podemo fidarse del tuto in Geovà quando ghe pensemo sora quel che lu el ga belche fato, quel che l’è drio far e quel che lu ancora el farà par noantri. Davi el ga pensà cossita. Alora, intanto che ledemo quel che lu el ga scrito nel Salmo 56, pensa in quel che ti te pol far par fidarte de pi in Geovà e dàrghene fora cola to paura.

COSSA CHE GEOVÀ EL GA BELCHE FATO?

5. In cossa che Davi el pensea quando el gavea paura? (Salmo 56:12, 13)

⁵ Intanto che Davi l’era drio scampar via dei nemighi che i volea coparlo, lu el pensea sora quel che Geovà el gavea belche fato. (Ledi Salmo 56:12, 13. c) Davi sempre el pensea sora queste robe. Par esémpio, dele volte, lu el pensea sora tuto quel che Geovà el ga creà. Cossita, lu se ricordea del grando poder de Geovà e che el ama a tute le persone. (Sal. 65:6-9) Davi anca el pensea sora come Geovà el gavea belche giutà i altri. (Sal. 31:19; 37:25, 26) Lu anca el se sforsea de tegnerse in mente che Geovà lo gavea giutà ancora de picinin e par tuta la vita.  (Sal. 22:9, 10) Sicuro che pensar sora tute queste robe ga fato Davi fidarse ancora de pi in Geovà!

6. Come che te pol fidarte in Geovà quando te sì spaurà?

⁶ Quando te sì spaurà, domàndate: ‘Cossa che Geovà el ga belche fato?’ Pensa sora quel che lu el ga creà. Par esémpio, ancora che i oseleti e i fiori no i gàpia qualità compagno a lu e gnanca i lo adore, Geovà l’è drio tenderli. Alora, te pol fidarte che Geovà el ndarà tender ancora de pi de ti. (Mat. 6:25-32) Te pol studiar nela Bìblia sora le persone fedele del passà e anca imparar sora servi de Geovà dei nostri giorni. d E tégnete in mente quel che Geovà el ga belche fato par tender de ti. Cossa che lu el ga fato par giutarte a cognosserlo? (Gio. 6:44) Come che lu el ga rispondesto ale to orassion? (1 Gio. 5:14) Che benedission te ghè belche ricevesto par causa del sacrifìssio de Gesù? — Efe. 1:7; Ebr. 4:14-16.

7. Come quel che ga sucedesto col profeta Daniel ga giutà Vanessa a dàrghene fora cola so paura?

⁷ Vanessa, e una sorela del Haiti, la ga infrontà una bruta situassion. Intrà i so visini, ghen’era un omo che ga tacà a mandar messagi e ligarghe tuti i di parché el volea smorosarla. Come Vanessa la ghe ga dito de nò, lu l’è restà cada volta pi cativo e el ga fin dito che el ndaria farghe mal. Alora, Vanessa la ze restà pròpio spaurada. Cossa gala fato? Un ansiano ghe ga giutà a parlar cola polìssia. Dopo, ela la ga pensà sora come Geovà el gavea belche giutà so servi nel passà. Vanessa la ga dito: “La prima persona che go pensà la ze stata Daniel. Lu no’l gavea fato gnente de sbalià e el ga infrontà tante dificoltà, come esser metesto nte un buso con leoni. Ancora cossita, Geovà lo ga tendesto. Go domandà che Geovà el me giutesse. Dopo che go pregà, no go pi bio paura.” — Dan. 6:12-22.

COSSA CHE GEOVÀ L’È DRIO FAR?

8. De acordo con Salmo 56:8, Davi l’era sicuro de che?

⁸ Quando l’era in Gate, Davi l’era pròpio in perìcolo e el podaria esser copà. Ancora cossita, lu l’è stà bon de dàrghene fora cola paura parché el ga seità a pensarghe sora quel che Geovà l’era drio far. Lu savea che Geovà l’era drio protegerlo e capir quel che el sentia. (Ledi Salmo 56:8. f) Davi anca el gavea el aiuto de amighi come Gionatan e el Somo Sasserdote Aimeleche. (1 Sam. 20:41, 42; 21:6, 8, 9) E anca se el rè Saul el volesse coparlo, Davi l’è stà bon de scampar via. Cossita, Davi l’era sicuro che Geovà el savea tuto quel che lu l’era drio infrontar e come l’era drio sentirse.

9. Cossa che Geovà el sa sora cada un de noantri?

⁹ Quando te ghè una dificoltà che la te assa spaurà, ricòrdate che Geovà l’è atento al to problema e el capisse come te te senti. Par esémpio, quando i israeliti i era nel Egito, lu el savea dei so problemi e quel che i era drio sentir. (Éso. 3:7) Davi el ga dito che Geovà el vedea la so ‘aflission’ e el cognossea la so ‘granda tristessa’. (Sal. 31:7) E quando i israeliti i era drio sofrir par causa dei so sbali, anca lu el ga sofrio. (Isa. 63:9) Alora, quando te ghè paura, ricòrdate che Geovà el sa come te te senti e el vol pròpio giutarte a dàrghene fora cola to paura.

10. Parché che te pol esser sicuro che Geovà el te capisse e che el ndarà giutarte?

 ¹⁰ Pol esser che dele volte no te sì sicuro se Geovà el ndarà pròpio giutarte. Alora, domanda che Geovà el te fae veder come lu l’è drio giutarte. (2 Rè 6:15-17) Pol esser che se desmenteghemo come semo stati incoraiadi par meso dela Bìblia e del amor dei nostri fradei. Ma questi i ze presenti maraveiosi che Geovà el ne dà. (Isa. 65:13; Mar. 10:29, 30) Alora, proa domandarte: ‘Un discorso o un comentàrio nela riunion te ga belche incoraià? Sito restà pi contento dopo leder una publicassion, veder un vìdeo o scoltar una mùsica del jw.org? Sarà che qualchedun te ga incoraià par meso de un testo dela Bìblia o qualcossa che el te ga dito? Tute queste robe mostra che Geovà el se preocupa tanto con noantri e che podemo fidarse del tuto in lu. — Isa. 49:14-16.

11. Cossa che ga giutà Aida a dàrghene fora cola so paura?

¹¹ Aida, una sorela del Senegal, la ga visto come Geovà la ga giutada a dàrghene fora con una dificoltà. Come ela la ze la fiola pi vècia, so pare e so mare i volea che ela la ciapesse soldi che basta par tender anca de lori. Dopo un tempo, ela la ga cambià la so vita parché la volea esser pioniera. Ma quando ghe ga mancà soldi, la so fameia la ze restada cativa e la ga scominsià a dirghe su. Aida la ga dito: “Go bio paura che no saria pi bona de giutar me pare e me mare e che i altri i podaria pensar mal de mi. Go fin dato la colpa de quei problemi a Geovà.” Ma, dopo de scoltar un discorso nte una riunion, Aida la ga dito: “El fradel che el ga fato el discorso el ga spiegà che Geovà el sa quel che ne assa preocupadi e le paure che ghemo. Alora, i consili dei ansiani e dei altri fradei i me ga giutà a sentir el amor de Geovà nantra volta. Go scominsià a pregar a lu con confiansa che Geovà el ndaria risponder ale me orassion, e go bio tanta pace. Dopo un tempo, Aida la ga catà un laoro e la ze bona de seitar come pioniera, de giutar so pare e so mare e anca altre persone. Ela la ga dito: “Go imparà a fidarme del tuto in Geovà.  Alora, dopo che mi prego, no go pi paura de gnente.”

COSSA CHE GEOVÀ ANCORA EL NDARÀ FAR?

12. De acordo con Salmo 56:9, Davi l’era sicuro de che?

¹² Ledi Salmo 56:9. g Questo versìcolo el mostra nantra roba che la ga giutà Davi a dàrghene fora cola so paura. Quando lu l’era in perìcolo, lu el ghe pensea sora quel che Geovà ancora el ndaria far par giutarlo. Davi l’era sicuro che el gavaria el so aiuto nela ora giusta. Parché? Parché Geovà lo gavea scoliesto par esser el pròssimo rè de Israel. (1 Sam. 16:1, 13) Davi el se fidea tanto nele promesse de Geovà che l’era come se le fusse belche sucedeste.

13. Cossa che Geovà el ndarà far?

¹³ Cossa che Geovà ancora el ndarà far par ti? Noantri no spetemo che Geovà el finissa fora coi nostri problemi de ancoi. h Ma, semo sicuri che nel novo mondo, lu el ndarà finir fora con tute le dificoltà che ghemo. Geovà el ndarà ressussitar i morti, curar i maladi e finir fora con tuti i nostri nemighi. (Isa. 25:7-9) De cossa che semo sicuri che Geovà el ndarà far? — 1 Gio. 4:4.

14. Ghemo de pensarghe sora che?

¹⁴ Alora, quando te ghè paura, pensaghe sora quel che Geovà el ndarà far nel futuro. Te pol pensar come che te ndarè sentirte dopo che Sàtana el sarà finio fora, quando ghen sarà sol persone bone e quando tuti i sarà perfeti. Nel congresso de 2014, ghemo bio una dimostrassion che ne ga giutà a pensarghe sora la nostra speransa. Intanto che la fameia la parlea come saria la so vita in Paradiso, lori i ga pensà come el testo de 2 Timòteo 3:1-5 saria difarente nel novo mondo. Questo testo el saria cossita: “Ma te ghè de saver che nel novo mondo ghen sarà i tempi pi felici de tuti. Parché le persone le amarà i altri, le amarà la verità, le sarà ùmile, le ndarà adorar a Dio, le sarà obediente ai genitori, le darà valor a quel che i altri i fà, le sarà leai, le gavarà amor a quei dela so fameia, le sarà bonasse, sempre le ndarà parlar ben dei altri, le gavarà passiensa, le sarà manse e le amarà quel che l’è bon, le sarà de fidarse, le gavarà bon giudìssio, le pensarà de maniera ùmile, le amarà a Dio invesse dei piaseri. Le lodarà a Dio con tuto el cuor. Stà darente de lore.” Cossa pénsito de parlar cola to fameia e coi fradei sora la vita nel novo mondo?

15. Cossa che ga giutà Tanja a dàrghene fora cola paura?

¹⁵ Tanja, una sorela dela Macedònia del Nort, la ze stata bona de dàrghene fora cola so paura parché la ga pensà sora le benedission che la gavarà nel futuro. El so pare e la so mare no i volea che ela la studiesse la Bìblia e i ze ndati contra ela. Tanja la ga dito: “Tante dele brute robe che mi gavea paura che le sucedesse le ze vegneste fora. Dopo le riunion, la me mare sempre la me dea bote. Ela e me pare fin i me ga dito che i ndaria coparme se mi deventesse una Testimònia de Geovà.” Dopo un tempo, Tanja la ze stata parada via de casa. Cossa che ga sucedesto? Ela la ga dito: “Go proà sempre ricordarme che mi podaria esser felice par sempre se mi seitesse leal a Geovà. Anca go pensà come che lu el ndarà benedirme nel futuro. Geovà el ndarà darme tuto quel che go perso e no vao pi pensar nele brute robe che le me ga  sucedesto.” Tanja la ga catà un posto par ndar de star e la ga seità leal a Geovà. Ancoi, ela la ze maridada con un bravo fradel, e lori i due insieme i se sforsa par laorar tanto par Geovà.

FÀ PI FORTE LA TO CONFIANSA IN GEOVÀ ANCOI

16. Cossa che ndarà giutarne a gaver coraio dopo che scomìnsia a suceder quel che l’è scrito in Luca 21:26-28?

¹⁶ Nela granda tribolassion, “le persone le gavarà tanta paura e ghe parerà de morir”. Ma el pòpolo de Dio el seitarà firme con coraio. (Ledi Luca 21:26-28. i) Parché che no gavaremo paura? Parché saremo boni de fidarse del tuto in Geovà. Tanja, la sorela che ghemo pena parlà, la ga spiegà che le dificoltà che la ga infrontà la giuta a dàrghene fora con altri problemi. Ela la ga dito: “Go visto che Geovà sempre l’è bon de giutarne. Dele volte, ne par che le persone le ze drio far quel che le vol lore. Invesse, lore sol le pol far quel che Geovà le assa far. Stesso che una dificoltà la sìpia bruta, la ndarà finirse.”

17. Come che el testo del ano de 2024 el pol giutarne? (Varda el ritrato dela prima pàgina.)

¹⁷ Ancoi, ghen’è tante robe che pol assarne spauradi. Ma compagno a Davi, semo boni de dàrghene fora cola paura. El testo del ano de 2024 l’è una orassion che Davi el ga fato: “Quando go paura, mi me fido del tuto in ti.” (Sal. 56:3) Un libro che el parla sora la Bìblia el dise che Davi no’l seitea a pensar sol sora quel che lo assea spaurà o sora i so problemi. Invesse, lu el se fidea che Dio el ndaria giutarlo. Alora, seita a pensarghe sora el testo de questo ano, ancora de pi quando una dificoltà la te assa spaurà. Sfòrsate de torte el tempo par pensar in quel che Geovà el ga belche fato, l’è drio far e ancora el farà par ti. Cossita, compagno a Davi, anca ti te podarè dir: ‘Mi me fido del tuto in Dio. No go paura.’ — Sal. 56:4.