1. Itthu heeni sinrowa oneeriha okhala oowoova?

 OOTHEENE a hiyo ikwaha ikina ninnoova. Ekhaikhai weera yoosomaahu ya Biblya yoonikhavihera ohoova okhwa, ohoova irisa sa ephattu naari itthu sinkela okhumelela muhoolo. Mene hiyo ninkhala etempu yeeyo siraaya itthu “soowoopiha” ntoko, ikhotto, owali ni iretta. (Luka 21:11) Nave hiyo tho pooti owoovaka atthu ntoko anamalamulela naari atthu a veemusini vahu yaawo ennikhoottihera omukokhorela Yehova. Atthu akina ennaxupeya yuupuwelaka weera khenrowa ovilela otthara-tthariwa enkumanaayano naari enrowaaya okumanano muhoolo.

2. Etthu heeni yaamukhumelenle Davidi emaara aaraawe oGadi?

² Mwene Davidi tho annoova. Mwa ntakihero, emaara aatthara-tthariwaawe ni Mwene Sawuli weera amwiive, owo aatthawa arowaka ecidade ya afilisti oGadi. Mwene oGadi eeriwa Akixi, aahoonelela weera Davidi aari nakhotto yoole oowera ni iipeliwa ni atthu yeeraka weera owo aawiiva ‘anakhotto afilisti antxipale,’ menento Davidi asuwelakaru eyo, owo ‘annoova vantxipale.’ (1 Sam. 21:11-13, [21:10-12, NM]) Owo aaxupeya vantxipale uupuwelelaka etthu heeni yaarowa omukhumelela. Menento etthu heeni Davidi aapankaawe weera awine woova iwe?

3. Moovarihana ni Nsalmu 56:2-4, 12, [56:1-3, 11, NM], etthu heeni Davidi aapankaawe weera awine woova wawe?

³ Va Nsalmu 56, Davidi onnahima moota iisoonelaawe emaara aaraawe oGadi. Mpuwa mwa yoolepa ela Davidi aahoonihera moota oovaawe, opwaha mwa yeeyo owo tho aahoonihera etthu aapankaawe weera awine woova iwe. Vaavo Davidi oovaawe owo annamuroromela Yehova. (Musome Nsalmu 56:2-4, 12 [56:1-3, 11, NM].) Akhaviheriwaka ni Yehova Davidi aawera oviriha maxupo ale. Owo aahiipaka namukhwaanepa, menento ohiya omwiiva Davidi Akixi aatthuna omwiiva namukhwaanepa ole aamunyakula, nto mwaha wa yeeyo,  Davidi aawera woopowa. — 1 Sam. 21:14–22:1 [21:13, NM].

4. Moota heeni ninrowaahu olipiha nroromelo nahu ni Yehova? Nvahe ntakihero.

⁴ Hiyo tho pooti owina woova wahu naamuroromelaka vale Yehova. Etthu heeni nintthuneyaahu opaka weera nlipihe nroromelo nahu ni Yehova vaavo nnoonaahu? Muupuwele ntakihero nna, apaale nyuwo munnoonelela weera mookhalano eretta, moohihovela nyuwo munnoova. Mene nyuwo pooti ovukula woova iwo mmuleelaka mediku mummuroromelaanyu, pooti weeraka mediku owo, ohinta waakosoopa atthu akina yaakhanleno eretta ene yeeyo mukhalannaanyu. Owo onoorowa owiiwelelani moomaaleleya nave nyuwo munoorowa osuwela weera owo onniiwexexa eretta munvirihaanyu, nave tho owo pooti wooleelani weera eretta eyo aakhala atthu elamme. Moolikana niiyo, nyuwo munoolipiha nroromelo nanyu wa Yehova vaavo munuupuwelelaanyu itthu Yehova opankaawe viinaano va ni onrowaawe woopakelani muhoolo, ni tiyeeyo Davidi aapankaawe. Vaavo ninsomaahu Nsalmu ekapiitulu 56, muupuwelele moota munrowaanyu olipiha nroromelo nanyu wa Yehova ni moota munrowaanyu owina woova.

ITTHU HEENI YEHOVA OPANKAAWE?

5. Itthu heeni Davidi uupuwelaawe weera awine woova wawe? (Nsalmu 56:13, 14, [56:12, 13, NM])

⁵ Nnaamweera avirihaka maxupo yaahela ekumi awe veerisani, Davidi annawehexexa itthu Yehova ampakenlaawe. (Musome Nsalmu 56:13, 14 [56:12, 13, NM].) Ola waari mukhalelo Davidi aaraaweno ekumi awe yootheene. Mwa ntakihero, ikwaha ikina owo anneemela weera uupuwelele itthu Yehova opattunxaawe, eyo yannamuupuxera weera Yehova ta ikuru ni onnasiveliwa vantxipale ni atthu a elapo ela ya vathi. (Nsal. 65:6-9) Nave-tho Davidi annaphimelela itthu Yehova aapakenlaawe atthu akina. (Nsal. 31:20 [31:19, NM]; 37:25, 26) Opwaha mwa yeeyo, owo annaphimelelaxa itthu Yehova ampakelaawe. Yehova aamukhavihera ni omukosoopa Davidi ovinyera enamwane awe. (Nsal. 22:10, 11 [22:9, 10, NM]) Moohihovela, ophimelela itthu iya, waamukhavihera Davidi olipiha nroromelo nawe wa Yehova!

6. Wakhala weera nyuwo munnoova, etthu heeni enrowa wookhaviherani omuroromela Yehova?

⁶ Wakhala weera nyuwo munnoova, mwiikoheke ha, ‘Eheeni Yehova apankaawe?’ Mweemele ni muupuwelele soopattuxiwa. Mwa ntakihero, ‘nwehexexeke moomaaleleya’ moota Yehova  ankosoopaawe ifilore ni ipalame, nnaamweera ehipakinweene ni ethoni ya Muluku naari omukokhorela mootepaxa wene Yehova onrowa onikosoopaka hiyo. Wuupuwelela etthu ela, enoonikhavihera waatxeerera nroromelo nahu. (Math. 6:25-32) Muupuweleke tho itthu Yehova aapakenlaawe arumeyi awe. Nyuwo pooti osoma yooweereya ya mutthu mmoha a mBiblyani, yoowo aarinono nroromelo noolipa naari nyuwo pooti osomaka sooweereya sa mweekumini sa Anamoona a Yehova, a mahiku ahu ala. a Muupuweleke tho moota Yehova anookosoopaaweni nyuwo. Etthu heeni aapankaawe weera nyuwo musuwele ekhaikhai? (Yoh. 6:44) Moota heeni owo aakhunlaawe mavekelo anyu? (1 Yoh. 5:14) Itthu heeni sooreera sineereya mweekumini mwanyu nyuwo munoonaanyu weera paahi Yehova tonkhavihera mwaha wa mukuttho wa Yesu? — Aef. 1:7; Aheb. 4:14-16.

7. Yooweereya ya Daniyeli, emukhavihenre moota heeni Vanessa owina woova wawe?

⁷ Vanessa, b murokora mmoha onkhala oHaiti ooviriha itthu sootepa oxupa. Mulopwana mmoha akhala muttetthe yoowo aakhala murokora ola, annamulikarela ni ommandarela emensagem mahiku mootheene. Mulopwana owo annamunyeserera Vanessa weera enamorariki ni Vanessa aamuleela weera khaarowa opaka eyo. Menento mulopwana ole aanyoonyiwa mpaka ophiyera omoopopiha. Vanessa onhima weera “annoova vantxipale.” Moota heeni Vanessa owinnaawe woova wawe? Owo aahipaka etthu aaweraawe weera iikosoope. Mutokweene mmoha a mmulokoni aamukhavihera weera uulume ni anamalamulela, opwaha mwa yeeyo, owo annawehexexa moota Yehova aakosonpaawe arumeyi awe khalayi. Vanessa onnavirelela ariki, “Mutthu oopatxera kaamuupuwelaka aari Daniyeli, owo aari mutthu axariya mene aaviriha maxupo. Owo aavonyeriwa mulittini mwemmo yaarimomo akharamu, nnaamweera vareene hiiho Yehova aamukosoopa. Miyo kaahinvekela Yehova weera akikhavihere wa maxupo yaale kaavirihaaka, ni miyo kivekelakaru nkoova etthu.” — Dan. 6:13-23 [6:12-22, NM].

EHEENI YEHOVA OMPAKAAWE VIINAANO VA?

8. Etthu heeni Davidi aaroromelaawe? (Nsalmu 56:9, [56:8, NM])

⁸ Nnaamweera ekumi ya Davidi yaari veerisani, owo khaahiñye woova wawe omukhulumulaka. Ohiya okhulumuwa, Davidi anniihiyera etempu weera uupuwelele itthu Yehova ampakelaawe etempu ene yeele. Davidi annatthara miruku aavahiwaawe ni Yehova, ni annoonelela moota Yehova aamukosoopaawe ni owo annaroromela weera Yehova annasuwela miyuupuwelo sawe. (Musome Nsalmu 56:9 [56:8, NM].) Davidi tho, annakhaviheriwa ni asinthamwene awe Yonathani ni namakeya Ahimeleki. (1 Sam. 20:41, 42; 21:7, 9, 10 [21:6, 8, 9, NM]) Nnaamweera aattharatthariwa ni mwene Sawuli, Davidi aawera otthawa weera akosoope ekumi awe. Davidi annaroromela moomalela weera Yehova annasuwela maxupo aavirihaawe ni moota maxupo awo yamuvolenlaaya mmuupuweloni.

9. Etthu heeni Yehova asuwenlaawe wa mutthu ori poothe a hiyo?

⁹ Mwaavirihaka maxupo yaawo enweerihani nyuwo woova, muupuweleke weera Yehova oosuwela maxupo awo munvirihaanyu. Mwa ntakihero, ntoko ana Israeli wExipitu, ohiya waasa owehexexa maxupo yaavirihaaya, Yehova aahima weera ‘annoona maxupo yaavirihaaya.’ (Ott. 3:7) Mwa etxipo awe emoha, Davidi aahima weera Yehova annoona ‘ohaawa wawe ni soovalaveliha sawe.’ (Nsal. 31:8, [31:7, NM]) Vaavo atthu a Yehova yaahaawaaya mwaha wa  soothanla saya soonanara, ‘Yehova tho annaxupeya.’ (Yes. 63:9) Wakhala weera nyuwo munnoova, muroromeleke weera Yehova oosuwela moota muniisoonelaanyu ni musuweleke weera Yehova ookhalano ntthuno noowookhaviherani weera nwine woova wanyu.

10. Mwaha wa heeni nyuwo muntthuneyaanyu ororomelaka weera Yehova oosuwela itthu munvirihaanyu ni onoorowa wookhaviherani?

¹⁰ Apaale ikwaha ikina nyuwo munniikoha moota Yehova onookhaviheraaweni owina maxupo anyu. Munoonela hayi onvekela owo weera ookhavihereni woona moota onookosoopaaweni. (2 Mam. 6:15-17) Muupuwele ha: Neereke mwaha wa vanlakani naari ekomentaariyu ya munna naari murokora yoohoolipihani? Naari apaale yookhala erevista, eviidiyu naari etxipo yoomaalinheni? Ookhala mutthu uulumme masu naari yoolepa ya mBiblyani yoolipinheni nyuwo? Ikwaha ikina hiyo pooti ottiwala moota nsivelo na asinna naari masu yuulummaaya ennilipahaaya. Menento itthu iya soovaha sootepa oreera sinkhuma wa Yehova. (Yes. 65:13; Mar. 10:29, 30) Sinnoonihera weera Yehova onnaapwattha atthu. (Yes. 49:14-16) Ni eyo ennoonihera weera Yehova onnatthuneya omuroromela.

11. Eheeni yaamukhavihenre Aida owina woova wawe?

¹¹ Murokora mmoha oniitthaniwa Aida onkhala oSenegal, owo aahoonelela moota Yehova aamukhavihenraawe emaara aavirihaawe maxupo. Okhala weera owo aari mwaana oopatxeriwa oyariwa, asitiithi awe yannaweherera weera owo aamukhalano musurukhu mwintxipale. Mene etempu owo aalakenlaawe okuxa ekumi yookhweya weera awere ovara muteko wa opiyoneiru, owo aapatxera ohikhalano musurukhu ni amusi awe yaanyoonyiwa nuuwo ni yaapatxera omuthoriha. Owo ohimme ha: “Miyo kannoova weera nkaarowa owera waakosoopa asitiithi aka ni ohittittimihiwa ni atthu akina, mpakana miyo kaamuthoriha Yehova mwaha wa itthu soohireera saakikhumelela.” Menento muhoolo mwaya Aida aahiiwa mwaha waapakinwe mmulokoni ni owo onnavirelela eeraka, “Nto munna aapaka mwaha, aamuupuxera weera Yehova oosuwela itthu sootheene siri va mmurimani vawe ni vakhaani-vakhaani mwaha wa miruku kaakhenlaaka wa asitokweene a mmulokoni ni asinna akina, miyo kaapatxeriha woonelela nsivelo na Yehova veeli. Ni miyo kaapatxeriha ovekela wa Yehova ni emaara yeeyo koonelenlaaka weera Yehova annakaakhula, miyo khannakhalano murettele.” Moovira etempu,  Aida aaphwanya muteko mukina ni muteko owo waamukhavihera waakhavihera asitiithi awe ni ovirelela ovara muteko wa opiyoneira. Owo onnamaliha eeraka: “Miyo kaaxuttera omuroromela Yehova moomalela, nto viinaano va, emaara yeeyo miyo kinvekelaaka woova waka onnamala.”

ETTHU HEENI EKINA YEHOVA ONROWAAWE OPAKA?

12. Moovarihana ni Nsalmu 56:10, [56:9, NM], Davidi aamuroromela taani?

¹² Musome Nsalmu 56:10 [56:9, NM]. Eversu ela ennoonihera etthu ekina yaamukhavihenre Davidi emaara yeeyo oovaawe: Nnaamweera Davidi aari veerisani, owo annuupuwela etthu Yehova eeraawe ampakele owo. Moohihovela, Davidi annasuwela weera Yehova ammukhavihera etempu yoophwanelela. Nto Yehova aahihima weera Davidi aamurowa okhala mwene a wIsraeli. (1 Sam. 16:1, 13) Vamaithoni va Davidi, itthu sootheene Yehova aamuleihenraawe saakhala ntoko sookwanela.

13. Nroromelo heeni nintthuneyaahu okhalano ni Yehova?

¹³ Etthu heeni Yehova olaihenraawe woopakelani nyuwo? Hiyo ninnaweherera weera Yehova onoorowa onikosoopa wa maxupo mootheene ninkumanaahuno. c Mwaha wa yeeyo, nroromeleke weera maxupo mootheene ninkumanaahuno elapo ela, Yehova onoorowa omaliha elapo enyowani. (Yes. 25:7-9) Nave mpattuxa ahu ookhalano owera woowaavinyereriha alipa ookhwa, woomaliha iretta sinnikhumelela ni woowaamaliha amwiittani ahu. — 1 Yoh. 4:4.

14. Eheeni nintthuneyaahu ophimelelaka?

¹⁴ Vaavo nyuwo munoovaanyu, muupuweleleke itthu Yehova onrowaawe opaka muhoolo. Muupuwelele moota munrowaanyu wiisoonela vaavo Satana onrowaawe onyaanyiwa, vaavo atthu oonanara murima ehinrowaaya okhala, ekhalaka atthu axariya paahi ni vaavo mahiku mootheene munrowaanyu okhalaka atthu oomalela. Yoowoonihera emoha yaapakinwe okongresuni a 2014, yaahoonihera moota hiyo ninrowaahu ophimelelaka yooweherera ahu. Emusi emoha yannuupuwelela moota yaarowaaya okhala oparaisu. Nave awo yaahuupuwela moota eliivuru ya 2 Timotheyo 3:1-5 araaweno masu oovirikana vaavo onuulumaawe sa eparaisu eeraka: ‘Vano osuwele ela wi, elapo enyowani eneekhale ehuhu yooreera. Veekhaikhai, atthu khenrowa okhala oowiitthuna, oosiveliwa muhakhu, oowiikuxa, oowiisoona, ooruwana, eneereke owiiwelela asinamuyari aya, enrowa okhala ooxukura, khenrowa okhala ootakhala, oowuuma murima, enrowa okhala oomoriwa ikharari, khenrowa okhala anamasomela, enrowa okhala oowiisuumaaliha, khenrowa othamaliwaka, khenrowa oveeha sooreera, khenrowa okhala oowoka, alolo, khenrowa osareya mwiixi, khenrowa osiveliwa soopuha sa erutthu opwaha omutthuna Muluku, khenrowa wooneihaka ekhalelo aya ya elapelo, khenrowa okhoottaka owera waya: aani atthu ala owaattamele.’ Neereke nyuwo munnatthekula ni amusi anyu naari ni asinna woohima sa ekumi ninrowaahu okhalano elapo enyowani?

15. Eheeni yaamukhavihenre Tânia owina woova?

¹⁵ Murokora mmoha ooMacedónia oNorte, owo aawera owina woova wawe mwaha woophimelela mareeliho ninrowaahu waakhela muhoolo. Asitiithi awe khayaatthuna weera owo amusomeke Biblya, ni yannamutthara-tthara vantxipale. Owo ohimme ha: “Itthu miyo kaatepaaka woova saaheereya. Ikwaha sootheene miyo koonelaaka mithukumano ameyaka yannakimana. Asitiithi aka yaahikileela weera yaamukiiva wakhala weera kaamukhala Namoona a Yehova.” Muhoolo mwaya, Tânia aahoomoliwa owannyawe. Owo iisoonenle hayi? Owo annavirelela eeraka: “Miyo kannawehexexa moota kaarowaaka okhala oohakalala mahiku  ootheene wakhala weera kanvirelela okhala oororomeleya. Miyo-tho kannuupuwelela itthu Yehova aarowaawe okitthuvela muhoolo seiyo kaarowaaka ohiya viinaano va. Miyo-tho kannuupuwelela moota itthu soonanara sinrowaaya ottuwaliwa.” Tânia aavirelela okhala oororomeleya. Akhaviheriwaka ni Yehova, owo aawera ophwanya nipuro nookhala. Ni olelo va, Tânia ootheliwa ni munna mmoha oororomeleya, ni vamoha awosa ennavara muteko wa ehuhu yootheene.

MULIPIHE NROROMELO NANYU NI YEHOVA VIINAANO VA

16. Eheeni enrowa onikhavihera olipa murima vaavo nnoonaahu ekwanelaka masu eri va Luka 21:26-28?

¹⁶ Mpuwa mwa maxupo matokweene, atthu enoorowa ‘okomoka mwaha woowoova.’ Mene atthu a Muluku enoorowa okhala oolipa murima. (Mmusome Luka 21:26-28.) Mwaha wa heeni nihinrowaahu woova? Mwaha wooweera nnooxuttera omuroromela Yehova. Tânia ohimmwale woopatxerani, onnahima weera itthu ovirinhaawe, soomukhavihera owina maxupo aakumanaaweno. “Khiyaavo maxupo Yehova ohinrowaawe onikhavihera naari onireeliha.” “Ikwaha ikina pooti weeraka atthu ennasuwela itthu ninvirihaahu, mweekhaikhai pooti weeraka atthu awo aakhalano osuwela Yehova aavanhaawe. Nto nnaamweera itthu ninvirihaahu sireene sootepa oxupa, Yehova onoomaliha.”

17. Yoolepa ya eyaakha ya 2024 enrowa onikhavihera hayi? (Nwehe efootu ya vakaapani.)

¹⁷ Olelo va, sookhala itthu sintxipale sinneeriha woova. Hiihaale ntoko Davidi, hiyo khanintthuneya ohiya woova onikhulumulaka. Yoolepa ya eyaakha ya 2024, ti nivekelo Davidi aapankaawe: “Nihiku kinòvaka, miyo kinnatthawela wa nyuwo.” (Nsal. 56:4 [56:3, NM]) Woohima sa eversu ela, ereferensiya emoha ya Biblya ehimme ha, Davidi “khaamakela paahi wuupuwela itthu saamoopopiha naari maxupo awe, opwaha mwa yeeyo, owo annamuroromela ole aarowa onvuluxa.” Mpuwa mwa miyeeri sinttharelana, muupuwele woohima sa yoolepa ya eyaakha, otepaxa wene mwaavirihaka itthu sinrowa owoopopihani. Mwiihiyereke etempu weera muupuwele itthu Yehova oopakenlaaweni khalayi, onoopakelaaweni viinaano ni onrowaawe woopakelani muhoolo. Hiihaale ntoko Davidi, nyuwo munoorowa weera; “Wa Muluku miyo kinnatthawela, siso nkinòva etthu.” — Nsal. 56:5 [56:4, NM].