1. Why we de fear sometimes?

 ALL of us de fear sometimes. Na true say because we don study Bible, we no de fear people wey don die, demons, and wetin go happen for this earth for future. But for this time wey we de live, war, fight-fight and sickness fit make us fear. (Luke 21:11) Another thing be say, we fit de fear people like, government people wey de make things hard for us or family members wey dey against our worship. Some other people de worry if them go fit endure the problem wey them de face now, or the one wey fit come for future.

2. Wetin happen to David when e dey one city wey them de call Gath?

² Even though say David worship Jehovah well, e get time wey e fear. For example, when King Saul want kill-am, e run go Gath, wey be one city of Philistia people. The King of Gath wey im name na A′chish come know say, na David be the person wey kill plenty Philistia people, sotey Israel people sing song for-am. This one make David start to fear. (1 Sam. 21:​10-12) E fear because, e no know wetin the King fit do to-am. Wetin help David stop to de fear?

3. As e dey for Psalm 56:​1-3, 11, wetin help David stop to de fear?

³ For Psalm 56, David talk how e be de feel when e dey Gath. For there, David talk wetin make-am fear and wetin help-am stop to de fear. When e de fear, e trust say Jehovah go help-am. (Read Psalm 56:​1-3, 11.) David get better reason  why e trust Jehovah. With Jehovah help, David make one better plan wey really work, e pretend say e be craze man. So, instead make A′chish kill David, e tell im servants say make them carry David comot, and this one help David fit run comot from the city.—1 Sam. 21:13–22:1.

4. How we fit make our trust for Jehovah strong more-more? Give example.

⁴ When we de fear, we too fit dey calm and do the correct thing, if we trust Jehovah. But how we fit make our trust for Jehovah strong more-more, especially when we de fear? Make we use one example explain-am. If doctor tell person say e get one serious sickness, this one fit make the person fear. But, if e trust the doctor, e go dey calm. E fit be say the doctor don treat plenty people wey get this kind sickness before, so this one make the person trust the doctor. When e explain how e de feel, the doctor listen and e understand why the person de fear. So e advice the person to follow the same treatment wey don work for plenty other people. For the same way, we fit make our trust for Jehovah strong more-more when we think about wetin e don do before, wetin e de do now, and wetin e go do for future. This na wetin David do. As we de talk about wetin David write for Psalm 56, think about how this one fit help you trust Jehovah more-more and make you dey calm when you de fear.

THINK ABOUT WETIN JEHOVAH DON ALREADY DO

5. Wetin David think deep about wey help-am trust Jehovah more? (Psalm 56:​12, 13)

⁵ Even though say David life dey for danger, e continue to put mind for the things wey Jehovah don already do. (Read Psalm 56:​12, 13.) This na the way David de always do. For example, sometimes, e think deep about the things wey Jehovah make, this one always help-am remember say na Jehovah get power pass, and say e really love us. (Ps. 65:​6-9) Another thing be say, David think deep about the things wey Jehovah do for other people. (Ps. 31:19; 37:​25, 26) And the ones wey e think about pass na the things wey  Jehovah do for-am. Jehovah don help and protect David from when e be small pikin. (Ps. 22:​9, 10) True-true, all this things wey David think deep about, go don help-am trust Jehovah more.

6. When we de fear, wetin fit help us trust Jehovah?

⁶ When you de fear, you fit ask yourself say, ‘Which things Jehovah don already do?’ Think deep about the things wey e make. For example, when we take time think about how Jehovah de care for birds and flowers, wey no de worship-am and wey e no make for im image, e go help us fit trust Jehovah say e go care for us wey be im servants. (Matt. 6:​25-32) Still think deep about wetin Jehovah don do for im servants. You fit read about person for Bible wey show say e get strong faith, or you fit read about the things wey de happen to our brothers and sisters for this our time. a Another thing be say, make you think deep about the way Jehovah don care for you. You fit ask yourself say, how e help you learn the truth? (John 6:44) How Jehovah don take answer your prayer? (1 John 5:14) How you de gain everyday as im Son die for you?—Eph. 1:7; Heb. 4:​14-16.

7. How prophet Daniel story help Sister Vanessa stop to de fear?

⁷ One sister wey im name na Vanessa, b wey de stay for Haiti, face one serious problem. One man for im area want friend-am by force, so e come de call-am and send message to-am everyday. But Sister Vanessa no ever gree for-am, so the man vex and even threaten-am. This one really make Sister Vanessa fear well-well. Wetin help-am fit dey calm? E do wetin e fit do to protect imself. One elder help-am report the matter to police. And e still think deep about how Jehovah protect im servant for Bible time. E talk say: “The first person wey I think about na prophet Daniel. Them throw-am where plenty hungry lion dey, even though say e no do any bad thing. But Jehovah save-am. So I pray to Jehovah make e make the man stop to think about me. After this one, I no come de fear again.”—Dan. 6:​12-22.

THINK ABOUT WETIN JEHOVAH DE DO NOW

8. Wetin David dey sure of? (Psalm 56:8)

⁸ Even though say David dey for serious danger when e dey Gath, e no continue to think about wetin go make-am fear. Instead, e choose to think about the things wey Jehovah de do for-am that time. E dey clear to David say Jehovah de direct and protect-am and say Jehovah understand how e de feel. (Read Psalm 56:8.) Another thing be say, David get better friends like Jonathan and High Priest Ahimelech, wey encourage-am and help-am. (1 Sam. 20:​41, 42; 21:​6, 8, 9) And even though say King Saul be want kill David, e escape from im hand. David dey sure say Jehovah know all the problem wey e de face and how the problems de affect-am.

9. Wetin Jehovah de see and understand about each of im servants?

⁹ When you de face problem wey de make you fear, remember say Jehovah de see the problem and e understand how e de make you feel. For example, when Egypt people de suffer Israel people, Jehovah no only see-am, but e still understand how the suffer make them feel. (Ex. 3:7) For one song wey David sing, e talk say Jehovah de see im suffer and know how e de worry-am. (Ps. 31:7) Even  when Israel people de suffer because of wetin them do, Jehovah still “feel their pain.” (Isa. 63:9) When you de fear, Jehovah understand how you de feel, and e really want help you stop to de fear.

10. Why you dey sure say Jehovah care about you and say e go help you when you de face problem?

¹⁰ When you de face serious problem, you fit no see how Jehovah de help you. So wetin you fit do? Pray to-am make e help you see how e de support you. (2 Ki. 6:​15-17) Then think about this questions: You don listen to some talk or answer wey person give for meeting wey help you? You don read any of our book them, watch video, or listen to original song wey encourage you? Some brother or sister don share wetin e learn from im Bible reading or from our book them, with you? We fit quick forget say the love wey our brothers and sisters de show us, and the things wey we de learn from Bible and our book them, na ways wey Jehovah de use support us. But, the truth be say, all this one na wonderful gift from Jehovah. (Isa. 65:13; Mark 10:​29, 30) Them de show say e care for us. (Isa. 49:​14-16) And this one de show say you fit really trust-am.

11. Wetin help Sister Aida stop to de fear?

¹¹ Sister Aida wey de live for Senegal, see how Jehovah support-am when e face one serious problem. Because na im be first pikin for their family, im papa and mama hope say e go work plenty money to fit care for imself and for them. But e decide say e go live simple life so that e go fit pioneer. Because of this one, Sister Aida no come get plenty money. Im family start to vex for-am and talk bad about-am. E talk say: “I start to fear say I no go fit care for my papa and mama and say everybody go reject me. I even blame Jehovah say things no work for me as I plan.” Then Sister Aida hear one talk for meeting. E talk say: “The brother remind us say, Jehovah de see all the problem wey we de face and how e de make us feel. Small-small, the advice wey elders and other brothers and sisters give me, help me see say Jehovah really love me. And because of this one, when I pray to Jehovah, I dey sure more-more say e go help me. And when I see how Jehovah answer my  prayer, this one help me get peace of mind.” After sometime, Sister Aida come get work wey help-am fit care for imself, im papa and mama, and other people, and still de pioneer. E talk say: “I don learn to trust Jehovah with all my heart. Now, if I get problem and I pray, I no de fear again.”

THINK ABOUT WETIN JEHOVAH GO DO FOR FUTURE

12. As e dey for Psalm 56:​9, wetin David dey sure of?

¹² Read Psalm 56:9. This verse tell us another thing wey help David when e de fear. Even though say im life still dey for danger, e think about wetin Jehovah go do for-am for future. David know say Jehovah go save-am for the correct time. After all, Jehovah don talk say na David go be the next king for Israel. (1 Sam. 16:​1, 13) And David dey sure say anything wey Jehovah promise, must happen.

13. Wetin we dey sure of about Jehovah?

¹³ Wetin Jehovah don promise you? We no de expect say Jehovah go hide us make problem no affect us. c But no matter the problem wey we fit face for this Satan world, Jehovah go remove-am when im Kingdom come. (Isa. 25:​7-9) Jehovah get the power to bring people wey don die back to life, remove all our sickness, and remove all the people wey dey against us because we de worship-am.—1 John 4:4.

14. Wetin we fit think deep about?

¹⁴ When you de fear, think deep about wetin Jehovah go do for future. Think about how you go feel when Jehovah don kill Satan, when na only righteous people go dey this earth, and when the sin wey dey our body go de comot small-small every day. One demonstration wey them do for 2014 convention show how we fit think deep about our hope. For the demonstration, one brother discuss with im family about how wetin 2 Timothy 3:​1-5 talk, go dey different if e de talk about Paradise. E talk say: “For Paradise, people go really de happy. Because people go love each other, people go love the truth, no go de do pass where their power reach, no go de carry shoulder up, them go love God, go de obey their papa and mama, go de talk thank you, go hold their friends tight, them go get human feeling well-well, them go de follow agreement wey them make, de talk good things about people, control theirself, gentle for heart, love to do good things, them no go turn against their friends, them no go de strong head, them go de bring theirself down, them go love God pass enjoyment, them go de show-am for the way them de live their life say them de worship God well, and make you hold this kind people tight.” You de discuss with your family members or brothers and sisters how life go be like for Paradise?

15. Wetin help Sister Tanja continue to worship Jehovah?

¹⁵ One sister for North Macedonia wey im name na Tanja, stop to de fear when e think about the blessing wey de wait for-am for future. When e start to study Bible, im papa and mama try to stop-am. E talk say: “Some of the things wey I fear say fit happen, really happen. My mama beat me anytime wey I go meeting. Them talk say them go kill me if I become Jehovah Witness.” As time de go, them pursue Sister Tanja comot from house. Wetin e come do? E talk say: “I put mind for the way I go de happy forever as I choose to hold Jehovah tight. I think about how Jehovah  go bless me for Paradise, for anything wey I fit lose for this Satan world. And say we go forget all the bad things wey don happen to us.” This one help Sister Tanja continue to hold Jehovah tight. And Jehovah help-am get where e go de stay. Now, Sister Tanja don marry and e dey full-time service with im husband.

MAKE YOUR TRUST FOR JEHOVAH STRONG MORE-MORE

16. Wetin go help us dey calm when the things wey Luke 21:​26-28 talk about, start to happen?

¹⁶ For great tribulation, people go really fear. But Jehovah people go dey calm and get strong mind. (Read Luke 21:​26-28.) Why we go dey strong that time? Because we go don trust Jehovah. Sister Tanja wey we don talk about before, talk say the things wey e learn from the problem wey e don face, de help-am fit handle any problem now. E say: “I don learn say no matter wetin we de face, Jehovah go fit help us and bless us. Sometimes, e fit be like say na people wey dey around us de control how things go be, but the truth be say na only wetin Jehovah allow them to control, them fit control. So, Jehovah get power pass them. And no matter how the problem big reach, e go end.”

17. How our yeartext for 2024 fit help us? (Check picture for front cover.)

¹⁷ Today, plenty things de make people fear. Just like David, we fit choose say we no go allow our fear control how we de feel. Our yeartext for 2024 na prayer wey David pray to Jehovah, say: “Anytime wey I de fear, na you I de trust.” (Ps. 56:3) One book wey talk about this verse talk say David “no continue to think about wetin de make-am fear, or put mind for im problem, instead, e trust God wey go save-am.” Continue to think about our yeartext for this year, especially when you de face problem. Think deep about wetin Jehovah don do before, wetin e de do now, and wetin e go do for future. If you do like that, e go help you fit talk like David say: “Na God I trust; I no de fear.”—Ps. 56:4.