1. Ligongo chichi ndaŵi sine tukusatendaga woga?

 JWALIJOSE ndaŵi sine akusatendaga woga. Yili yisyene kuti Baibulo jikusatukamuchisya kuti tukajogopaga yindu yamsogolo, misimu jakusakala soni ŵandu ŵawe. Nambope mundaŵi jatukutamaji tukusimana ni “yindu yakutesya woga” mpela ngondo, yachiwawa soni yilwele. (Luk. 21:11) Nambosoni mpaka twajogopeje ŵandu kupwatikapo achakulungwa ŵa boma kapena ŵachibale ŵetu ŵampaka atusisyeje ligongo lyakumtumichila Mlungu. Ŵandu ŵane mpaka adandawuleje kuti nganaŵa akombwele kupilila yakusawusya yakusimana nayo apano kapena yachachisimana nayo kusogolo.

2. Asale muyaŵelele yindu paumi wa Daudi paŵaliji ku Gati.

² Daudi ndaŵi sine jwatendaga woga. Mwachisyasyo, Mwenye Sauli paŵasakaga kumwulaga Daudi, jwalakwe jwatilile kwa Afilisiti mu msinda wa Gati. Mwangakaŵilisya mwenye jwa ku Gati, Akishi jwayikopochele kuti Daudi jwaliji msilikali jwamachili jwamŵamlapililaga munyimbo kuti jwawuleje Afilisiti “masawusande makumimakumi gangaŵalanjika.” Myoyo Daudi ali ayikopochele yeleyi “ŵatandite kumjogopa Mwenye Akishi.” (1 Sam. 21:​10-12) Jwalakwe jwajogopaga yampaka amtende Akishi. Ana Daudi jwamasisye chamtuli wogawu?

3. Mwakamulana ni Salimo 56:​1-3, 11, ana Daudi jwamalene chamtuli ni woga?

³ Buku ja Masalimo chaputala 56, jikusalondesya mwaŵapikanilaga Daudi paŵaliji ku Gati. Salimoji jikusalondesya woga waŵakwete Daudi soni yaŵatite pakuwumasya. Pandaŵiji Daudi jwamasisye wogawu mwakumdalila mnope Yehofa. (Aŵalanje Salimo 56:​1-3, 11.) Yeleyi yamkamuchisye mnope. Ni chikamuchisyo cha Yehofa Daudi jwalinganyisye pulani jinejakwe jajaliji jakamuchisya  mnope. Jwalakwe jwalitendekasisye kuŵa mpela jwamasoka. Myoyo, mmalo mwakuti Mwenye Akishi amwone Daudi mpela msilikali jwakogoya ŵatandite kumwona kuti ali jwamsyungulile mtwe mwamti ŵamtopwele. Yeleyi yamkamuchisye Daudi kuti atile.—1 Sam. 21:13–22:1.

4. Ana mpaka tumdalile mnope Yehofa chamtuli? Alondesye.

⁴ M’wejisoni mpaka tumalane ni woga mwakumdalila Yehofa ndaŵi syosope. Nambo, ana mpaka tumdalile chamtuli Yehofa pandaŵi jatukutenda woga? Aganichisye ayi: Tuwanichisye kuti amanyilile kuti akwete ulwele winewakwe, pandanda mpaka atendeje woga. Nambope mpaka amalane ni wogawo naga akumdalila mnope dokotala. Yeleyi mpaka yikomboleche naga dokotalajo akwete mbili jakuti pakwete piŵakamuchisye ŵandu ŵane pa ulwelewo. Nambosoni naga jwalakwe akwapikanila chenene pakulondesya mwakupikanila mumtima. Nambosoni naga akwasalila kuti chiŵape mtela wawakamuchisye ŵandu ŵane. Mwakulandanamo mpaka tumdalileje Yehofa patukuganichisya yatesile kala, yakutenda apano soni yachachitutendela kusogolo. Yeleyi ni yaŵatendaga Daudi. Patukukambilana maloŵe gane gagakusimanikwa mu Salimo 56, tuganichisyeje yampaka tutende kuti tumdalileje mnope Yehofa soni kumasya woga.

YINDU YATESILE KALA YEHOFA

5. Ana Daudi jwaganichisyaga chichi kuti amalane ni woga wakwe? (Salimo 56:​12, 13)

⁵ Pandaŵi jele Daudi jwasimanaga ni yindu yakogoya paumi wakwe, jwalakwe jwaganichisyaga yindu yatesile kala Yehofa. (Aŵalanje Salimo 56:​12, 13.) Mwelemu ni muŵatendelaga Daudi paumi wakwe wosope. Mwachisyasyo, jwalakwe ndaŵi syejinji jwaganichisyaga ya chilengedwe cha Yehofa yayamkumbusyaga machili gakwete Yehofajo soni chinonyelo chakwe kwa ŵandu. (Sal. 65:​6-9) Daudi jwaganichisyagasoni yaŵatendele Yehofa ŵandu ŵane. (Sal. 31:19; 37:​25, 26) Nambosoni jwaganichisyaga mnope yaŵamtendele Yehofa jwalakwejo pajika. Yehofa jwaŵele ali mkumkamuchisya jwalakwe kutandila ali mwanache. (Sal. 22:​9, 10) Kuganichisya yeleyi kwamkamuchisye Daudi kuti amdalileje mnope Yehofa.

6. Ana ni chichi champaka chitukamuchisye kuti tumdalileje Yehofa patukutenda woga?

⁶ Pandaŵi jakutenda woga, aliwusyeje kuti, ‘Ana Yehofa atesile kala yamtuli?’ Apateje ndaŵi jakuganichisya ya chilengedwe chakwe. Mwachisyasyo, ‘pakulolechesya’ yakusati Yehofa  pakuyisamalila yijuni soni maluŵa, yindu yele nganayipanganya mu chiwanichisyo chakwe nambosoni yanganiyikola upile wakumtumichila, yakamuchisyeje kumanyilila kuti jwalakwe chiŵasamalileje. (Mat. 6:​25-32) Aganichisyejesoni yatesile Yehofa kwa ŵakutumichila ŵakwe. Atende yakuti aŵalanje m’Baibulo ya jwakutumichila jwine juŵakwete chikulupi chakulimba kapena aŵalanje ya jwakutumichila jwa Yehofa jwa masiku agano kutyochela m’mabuku getu. a Konjechesya pelepa, aganichisyejesoni yindu yaŵele ali mkwatendela Yehofa. Ana jwalakwe ŵakamuchisye chamtuli wawojo kuti atande kulijiganya yisyesyene? (Yoh. 6:44) Ana aŵele ali mkwanga chamtuli mapopelo gawo? (1 Yoh. 5:14) Ana mbopesi jakutuwombola ja Mwanache jwakwe jwapamtima jikwakamuchisya chamtuli wawojo lisiku lililyose?—Aef. 1:7; Aheb. 4:​14-16.

7. Ana yaŵasimene nayo jwakulochesya Daniele yamkamuchisye chamtuli Mlongo Vanessa kuti amalane ni woga?

⁷ Mlongo jwine jwa ku Haiti, lina lyakwe Vanessa, b jwasimene ni yindu yakutesya woga paumi wakwe. Jwamlume jwine jwatamilaga kumlagasyaga lisiku lililyose. Ndaŵi syejinji ŵamŵilangaga soni kumlembela utenga wakuti agone najo. Mlongoju jwamjangaga mwangapita mumbali kuti ngakusaka. Nambo jwamlumeju ni pajwapitilisya kumjogoya soni kumkanganichisya kuti akunde yajwasakagayo. Mwamti mlongoju jwaŵechete kuti, “Wangamwile mnope woga.” Ana Mlongo Vanessa jwamalene chamtuli ni wogawu? Jwalakwe jwatesile yakuti alichenjele kuti akatenda yakusakalayi. Jwamkulungwa jwa mumpingo jwamsalile kuti akasale ya nganiji ku polisi. Nambosoni mlongoju jwaganichisyaga yaŵatite Yehofa pakwachenjela ŵakutumichila ŵakwe ŵakala. Mwamti jwalakwe jwatite, “Mundu jwandanda kumganichisya ali jwakulochesya Daniele. Jwalakwe ŵamponyisye mu lisimbo lya masimba gasala atamose kuti nganalemwa chilichose. Nambope, Yehofa ŵamkamuchisye. Mwamti namŵendile Yehofa kuti angamuchisye pa chakusawusya changuchi. Panyuma pakutenda yeleyi woga wangu wamasile.”—Dan. 6:​12-22.

YAKUTENDA YEHOFA APANO

8. Ana Daudi jwasimichisye kutenda chichi? (Salimo 56:8)

⁸ Atamose kuti Daudi wamkamwile mnope woga ali ku Gati, jwalakwe jwatesile yakomboleka kuti amalane ni wogawo. Jwalakwe jwaganichisyaga yaŵatiga Yehofa pakumkamuchisya pandaŵiji. Jwamanyilile kuti Yehofa akumlongolela soni kumchenjela nambosoni kuti akumanyilila mwakupikanila mumtima. (Aŵalanje Salimo 56:8.) Nambosoni Daudi jwakwete achimjakwe ŵakulupichika ŵaŵamkamuchisyaga, mpela Yonatani soni Jwamkulungwa jwa Ŵakutaga Mbopesi, Ahimeleki. (1 Sam. 20:​41, 42; 21:​6, 8, 9) Jwalakwe jwakulupwichesoni mmyala mwa Mwenye Sauli juŵasakaga kumwulaga. Mwamti yeleyi yamkamuchisye kukulupilila kuti Yehofa akumanyilila chenene ndamo jakogoya jiŵaliji soni muŵapikanilaga mumtima.

9. Ana Yehofa akusalola chichi mwa jwalijose jwetuwe?

⁹ M’wejisoni patusimene ni yindu yakutesya woga tumanyilileje kuti Yehofa akumanyilila yeleyi soni mwatukupikanila mumtima. Mwachisyasyo, Yehofa nganagambaga kuyiwona yindu yangali chilungamo yiyatendechelaga Ayisalayeli ali ku Iguputo, nambosoni jwayiwonaga “yakupweteka [yaŵasimanaga] nayo.” (Eks. 3:7) Daudi jwajimbile kuti Yehofa jwayiweni “yisawusyo” yakwe soni jwamanyilile kuti yili “yekulungwa.” (Sal. 31:7) Atamose ŵandu ŵa Mlungu ali mkulaga ligongo lyakusagula yindu mwakulemwecheka, Yehofa akusalaga “pakuyiwona yisawusyo yawo.” (Yes. 63:9) Patukutenda woga Yehofa akusatupikanichisya mwatukupikanila soni ali jwakoseka kutukamuchisya kuti tumalane ni wogawo.

10. Ana chichi chachikwasimichisya kuti Yehofa akusasamala ya wawojo soni kuti mpaka ŵakamuchisye kumalana ni yakusawusya yakusimana nayo?

 ¹⁰ Mwine mpaka alepeleje kumanyilila yakutenda Yehofa pakwakamuchisya pasimene ni yakusawusya yekulungwa. Myoyo akusosekwa kumŵenda jwalakwe kuti jwakamuchisye kumanyilila yakuti pakwakamuchisya wawojo. (2 Ayi. 6:​15-17) Aganichisye yiwusyo yakuyichisyayi: Ana ngani kapena ndemanga jajipelechedwe kumpingo jalimbikasisye wawojo? Ana buku, fidiyo kapena nyimbo syetu yalimbikasiye wawojo? Ana mundu jwine jwasalile mfundo kapena lilemba lyalyalimbikasisye wawojo? Mpaka yiŵe yangasawusya kuyiwona mwakupepuka yayikuti pakwakamuchisya yindu yeleyi. Nambotu yeleyi yili yindu yambone mnope yakwapa Yehofa. (Yes. 65:13; Maliko 10:​29, 30) Sonitu yikusalosya kuti jwalakwe akusasamala ya wawojo. (Yes. 49:​14-16) Mwamti uli umboni wakuti akusosekwa kumdalilaga mnope.

11. Ana chichi chachamkamuchisye Mlongo Aida kumalana ni woga?

¹¹ Mlongo Aida jwa ku Senegal jwayiweni yaŵatite Yehofa pakumkamuchisya pandaŵi jaŵasimene ni chakusawusya. Jwalakwe ali jwamkulungwa mwa ŵanache wosope muliŵasa lyawo, mwamti achinangolo ŵakwe ŵajembecheyaga kuti chiŵakamuchisyeje. Nambo jwalakwe jwatandite kutama umi wangasaka yejinji kuti atendeje upayiniya. Yeleyi yatendekasisye kuti akapataga mbiya syakwanila. Mwamti yeleyi yatumbilikasisye mnope ŵandu ŵamwiŵasa mwakwe. Jwalakwe jwatite, “Najogopaga kuti ngingombolaga kwakamuchisya achinangolo ŵangu soni kuti jwalijose chambenjeje. Mwamti natandite kumjimba magambo Yehofa ligongo lya yeleyi.” Kaneko ali apikanile ngani pamsongano jwatite, “Jwakuŵecheta ngani pamsonganowo jwatukumbwisye kuti Yehofa akusamanyililaga yakusawusya yiliyose yatukusasimana nayo. Malangiso ganapochele kwa achakulungwa soni ŵandu ŵane gatandite kungamuchisya kumanyilila kuti Yehofa akusanonyela. Panapopelaga kwa Yehofa naŵaga jwakusimichisya kuti jwalakwe changamuchisye mwamti mtima wangu waŵaga mmalo panayiwonaga kuti Yehofa akwanga mapopelo gangu.” Mkupita kwa ndaŵi Mlongo Aida jwapatile masengo. Masengoga gamkamuchisyaga kupata mbiya syakulikamuchisya msyene pajwatendaga upayiniya soni kwakamuchisya achinangolo ŵakwe ni achalongo achimjakwe. Jwalakwe jwasasilesoni kuti, “Yeleyi  yingamuchisye kuti namdalileje mnope Yehofa. Mwamti pambopesile woga wangu ukusamalaga.”

YACHACHITENDA YEHOFA KUSOGOLOKU

12. Mwakamulana ni Salimo 56:​9, ana Daudi jwakulupililaga chichi?

¹² Aŵalanje Salimo 56:9. Lilembali likulosya yindu yine yaŵatesile Daudi yayamkamuchisye kumalana ni woga. Atamose kuti umi wakwe waliji pangosi, nambope jwalakwe jwaganichisyaga yindu yachachimtendela Yehofa. Daudi jwamanyililaga kuti Yehofa chachimkamuchisya pandaŵi jakwe. Panyuma payakusawusya yosopeyi Yehofa jwasasile kuti Daudi chachiŵa mwenye jwa Isalayeli. (1 Sam. 16:​1, 13) Daudi jwamanyililaga kuti yiliyose yaŵaŵechete Yehofa yichikwanilichikwa.

13. Ana mpaka tuŵe ŵakusimichisya kuti Yehofa chachitutendela chichi?

¹³ Ana Yehofa ŵasasile kuti chachatendela chichi wawojo? Ngatukusosekwa kwembecheya kuti jwalakwe chatuchenjeleje payakusawusya yetu yosope. c Yehofa chachimasya yakusawusya yatukusimana nayoyi m’chilambo chasambano. (Yes. 25:​7-9) Mlungu ali jwamachili mnope mwamti chachajimusya ŵawe, chachaposya ŵakulwala soni chachajonanga ŵandu wosope ŵakusisya.—1 Yoh. 4:4.

14. Ana tukusosekwa kuganichisyaga mnope ya chichi?

¹⁴ Pakutenda woga aganichisyeje mnope yachachitenda Yehofa kusogoloku. Aganichisye mwachachipikanila mumtima wawojo Satana ali amtyosisye, ŵandu ŵakusakala ali ŵajonasile ni kusigala ŵandu ŵakulungama nambosoni ungali umlama uli mkumala mwapanandipanandi. Pamsongano wa chigawo wa 2014 papali chisyasyo chakulosya yampaka tutende kuti tuganichisyeje ya chembecheyo chetu. Mtati jwa mu chisyasyochi jwakambilanaga ni liŵasa lyakwe mwakuchenga yayikusimanikwa pa 2 Timoteyo 3:​1-5 kuŵa yindu yambone yayichitendekwa m’Paladaiso. Jwalakwe jwaliŵalangaga lilembali chamti myi, “Mchilambo chasambano jichiŵa ndaŵi jakusangalasya. Ŵandu chachiŵa ŵakwanonyela ŵane, ŵakunonyela yisyesyene, ŵakulinandiya, ŵakulitulusya, ŵakumchimbichisya Mlungu, ŵakwapikanila achinangolo, ŵakuyamichila, ŵakulupichika, ŵakwanonyela ŵandu ŵamwiŵasa mwawo, ŵakamulana ni ŵane, ŵakuŵecheta yindu yambone yakwamba ŵane, ŵakulilekasya, ŵakufasa, ŵakunonyela yambone, ŵakudalilichika, ŵakundilila, ŵanganyada, ŵakumnonyela Mlungu mmalo mwakunonyela yindu yakusangalasya, ŵakulipeleka yisyesyene kwa Mlungu, soni ŵandu ŵeleŵa mŵe nawo paunasi wakulimba mnope.” Ana akusakambilana ni liŵasa lyawo kapena ŵakulupilila achimjawo mwawuchiŵela umi m’chilambo chasambano?

15. Ana chichi chachamkamuchisye Mlongo Tanja kumalana ni wogawo?

¹⁵ Mlongo jwine jwa ku North Macedonia, lina lyakwe Tanja jwamalene ni woga wajwakwete mwakuganichisya yindu yambone yachachipata kusogolo. Achinangolo ŵakwe ŵamlagasyaga mnope ligongo lyakuti jwalijiganyaga Baibulo. Jwalakwe jwatite, “Yindu yanatendaga nayo woga kuti chiyindendechele yandendechele. Mama ŵangu ŵambutaga ulendo uliwose pambusile ku misongano ja mpingo. Achinangolo ŵangu ŵayikene pakunjogoya kuti chambulaje naga nguŵa jwa Mboni sya Yehofa.” Pambesi pakwe Mlongo Tanja ŵamtopwele pamlangopo. Ana jwalakwe jwatesile chichi? Jwalakwe jwatite, “Naganichisyaga mnope yachisangalalo champaka mbate kwa umi wangu wosope ligongo lyakusagula kuŵa jwakulupichika. Naganichisyagasoni yindu yambone yachachimba Yehofa m’chilambo chasambano yayichindendekasya kuliŵalila yindu yanayilesile soni yakusakala yangusimana nayo apano.” Mlongo Tanja jwapitilisye kuŵa jwakulupichika. Ni chikamuchisyo cha Yehofa jwalakwe jwapatile malo gakutama. Apano Mlongoju jwalombedwe ni m’bale jwakulupichika mwamti akutumichila yalumo mwakusangalala mu utumiki wandaŵi syosope.

 AMDALILEJE MNOPE YEHOFA

16. Ana ni chichi champaka chitukamuchisye kuŵa ŵakulimba patukukuwona kukwanilichikwa kwa yakulochesya yayili pa Luka 21:​26-28?

¹⁶ Mundaŵi ja yakusawusya yekulungwa ŵandu ŵajinji “chachikomoka ligongo lya woga.” Nambo ŵandu ŵa Mlungu ngasatenganyika soni chachiŵa ŵakulimba. (Aŵalanje Luka 21:​26-28.) Ligongo chichi tuchisosekwa kuŵa ŵakulimba mtima? Ligongo tuchiŵa tuli tulijiganyisye kala kumdalila Yehofa. Tanja jwatumkolasile jula, jwasasile kuti yajwasimene nayo paumi wakwe yikumkamuchisya kupilila yakusawusya yine yakusimana nayo. Jwalakwe jwatite, “Nalijiganyisye kuti Yehofa mpaka atukamuchisye kupilila yakusawusya yiliyose yampaka tusimane nayo soni kutupa upile.” Jwalakwe jwasasilesoni kuti, “Ndaŵi sine mpaka tuyiwoneje kuti ŵandu ŵane akwete machili ganegakwe gakulamulila, nambo yisyesyene yakwe ni yakuti Yehofa ni jwakwete machili gakulamulila kwapunda jemanjaji. Atamose yakulingwa mpaka yiwonecheje kuti yili yakusawusya mnope nambo yichimala.”

17. Ana lilemba lya chaka cha 2024 mpaka litukamuchisye chamtuli? (Alole chiwulili chapachikuto.)

¹⁷ Kutenda woga kuli kwachipago. Nambo mwakulandana ni Daudi mpaka tukombole kumalana ni woga. Lilemba lyetu lya chaka cha 2024 lili lipopelo liŵapopesile Daudi kwa Yehofa. Lilembali likusati, “Pingutenda woga; ngusinakulupilila ŵalakwe.” (Sal. 56:3) Pakwamba ya lilembali buku jine jakulondesya Baibulo jatite, “Daudi nganagambaga kuganichisya ya yindu yayamtendekasyaga woga kapena yakusawusya yajwasimanaga nayo. Mmalomwakwe jwalakwe jwamdalilaga Mkulupusyo jwakwe.” Myesi jajikwisaji aganichisyeje ya lilembali, mnopemnope pasimene ni yindu yakutesya woga. Apateje ndaŵi jaganichisya yatesile Yehofa munyumamu, yakutenda apano soni yachachitenda kusogoloku. Kaneko mwakulandana ni Daudi chachiŵecheta kuti, “Ngusinamkulupilila Mlungu mwangali woga.”—Sal. 56:4.