1. Mambu mbi matutulanga boma khumbu zinkaka?

 BEFU boso tumbanga boma mu mambu mawombo. Dedi bawombo badi boma bu bafua, bu ziphevi zimbi ayi mu mambu mankuiza kuntuala. Vayi, bo banlonguka Kibibila, bannunganga boma beni. ‘Mambu mankaka matutulanga boma’ madi, mimvita, buphunya ayi bimbefu. (Luka 21:11) Mvandi tulenda ba boma bu batu, bu mintinu ayi bu basi dikanda bo ba tukandimina kubuongimina Yave. Bankaka badi boma bu kuyindula ti balendi nunga ko zikhuamusu bamviokila bubu voti zio balenda viokila kuntuala.

2. Tubila buidi Davidi kabela bo katinina ku divula di Ngaza.

² Davidi mvandi wuba boma. Dedi, bo Ntinu Sauli kaba tomba kumvonda, nandi wubaka makani ma kutinina ku Ngaza, divula di basi Filisteia. Ayi ‘boma buandi bubuelama’ bo kabakula ti ntinu wu Ngaza, Akisi wuzaba ti nandi wuba disodi dipisuka mu kunuana mvita ayi baba kunyayisa kuidi basi Isaeli ti nandi wuvonda ‘kumi di bivevi na bivevi’ di basi Filisteia. (1 Samu. 21:​10-12) Diawu kaba kuazukila, matedi mbi ntinu Akisi kankuiza mvangila. Vayi Buidi Davidi kanungina boma kaba?

3. Dedi bummonisina Minkunga 56:​1-3, 11, buidi Davidi kanungina boma?

³ Davidi wutubila mabanza kaba ayi buidi kanungina mawu, mu mambu kasonika mu Minkunga 56. Mu thangu kaba banga boma, nandi waba fiatilanga Yave. (Tanga Minkunga  56:​1-3, 11.) Mu lusalusu lu Yave, nandi wuvuna kulawuka ayi mawu mamonikina buka ti masi ko tsundu, vayi mawu mamvukisa. Kibila, Ntinu Akisi kasa bue ntadilako buka mbeni.—1 Samu. 21:13–22:1.

4. Buidi tulenda kindisila lufiatu luitu mu Yave? Vana kifuani.

⁴ Befu mvitu tulenda nunga boma mu kufiatila mu Yave. Vayi buidi tulenda kindisila lufiatu luitu mu Yave, bulutidi bo tuidi mu boma? Tala kifuani: Ngie kubakula ti widi mu kimbevu kingolo, va thonono wulenda ba mu boma. Vayi boma buaku bulenda dekuka ngie kufiatila dotolu. Nandi kalenda vumbika mabanza maku, na kukuzabikisa ti mana buka batu baba mbela ayoyo. Nandi kalenda vua nkinza, mambu wunkoluka ayi mabanza maku. Ayi nandi kalenda kuzabikisa mbukulu yisadisa batu bankaka. Bobuawu mvandi tunkindisanga lufiatu luitu mu Yave, mu kuyindula mambu kamana vanga, kadi mu kuvanga ayi kala vanga mu befu. Mawu Davidi kavanga. Bo tuenlonguka mambu kasonika mu Mingunga 56, yindula buidi wulenda kindisila lufiatu luaku mu Yave ayi buidi wulenda nungina boma buaku.

MBI YAVE KAMANA VANGA?

5. Mbi Davidi kavanga muingi kununga boma? (Minkunga 56:​12, 13)

⁵ Bo luzingu lu Davidi luba va kingela, nandi wutsikika thalu mu mambu Yave kamana vanga. (Tanga Minkunga 56:​12, 13.) Davidi waba yindudilanga abobo mu luzingu luandi loso. Dedi, nandi waba yindulanga mu bivangu bi Yave bintebula moyo ti Yave widi nkua ngolo zioso ayi wumvuanga nkinza batu va ntoto. (Minku. 65:​6-9) Davidi mvandi waba yindulanga mambu Yave kavangila kuidi bankaka. (Minku. 31:19; 37:​25, 26) Ayi bulutidi nandi waba yindulanga mambu Yave kamana mvangila. Yave wunsadisa ayi wunkieba tona mu bumuana. (Minku. 22:​9, 10) Bukiedika, kuyindudila mu phila ayoyo kusadisa Davidi kufiatila mu Yave.

6. Bo tuidi mu boma, mbi biala tusadisa kufiatila mu Yave?

⁶ Ngie kuba mu boma wukiyuvusa: Mbi Yave kamana vanga? Yindula mu bivangu  biandi. Dedi, bo wunyindula mu phila Yave kankiebilanga zinuni ayi biteka bikhambu vangulu mu kifuani kiandi, bikhambu kumbuongiminanga, mawu mambuelanga lufiatu luitu ti nandi wala tukieba. (Matai 6:​25-32) Yindula mvandi mambu Yave kamana vangila kuidi bisadi biandi. Ngie wulenda longuka mu kisadi ki Yave, kimonisa kiminu bantubila mu Kibibila ove mu kifuani ki kisadi ki Yave bantubila mu bilumbu bitu. a Mvandi yindula mu phila Yave kamana kukiebila. Buidi ngie wuzabila kiedika? (Yoa. 6:44) Buidi nandi katambudila minsambu miaku? (1 Yoa. 5:14) Buidi ngie wumbakilanga ndandu mu khudulu yi Muan’andi?—Efe. 1:7; Ebe. 4:​14-16.

7. Buidi kifuani ki mbikudi Danieli kisadisila yaya Vanessa kununga boma?

⁷ Yaya Vanessa  bwunkalanga ku Haiti, wuviokila mu diambu diphasi. Dibakala dimueka wunkalanga va kizunga kiandi, waba kuntelanga ayi waba kumfilanga zimensagi kadika kilumbu, muingi kaba yandi bumasi. Yaya Vanessa, wumanga vayi dibakala adiodio waba kunkuika ayi waba kana kumvanga bubi. Nandi wutuba: Yiba mu boma. Mbi bisadisa yaya Vanessa kununga boma? Nandi wuvanga mambu malenda kunsadisa. Dedi, nkulutu mueka wu kimvuka wunsadisa kukoluka na zimfumu zi luyalu. Vayi nandi mvandi wuyindula mu phila Yave kakiebila bisadi biandi mu thangu yikhulu. Nandi wutuba, “mutu wutheti yiyindula, wuba mbikudi Danieli. Bantula mu dibulu di zikhosi ziba mu nzala, kheti nandi kasa vanga ko ni diambu, vayi Yave wunkieba. Minu yidinda kuidi Yave muingi katadila mambu amomo. Bosi, buviokila thangu minu yisa bue ba ko boma.”—Dani. 6:​12-22.

MBI YAVE KADI MU KUVANGA BUBU?

8. Lufiatu mbi Davidi kaba? (Minkunga 56:8)

⁸ Kheti luzingu lu Davidi luba va kingela bo kaba ku Ngaza, vayi kasa bika ko boma bunnunga. Nandi wusikika thalu mu mambu Yave kaba kumvangila mu thangu beni. Davidi wumona ti Yave waba kuntuadisa, kunkieba ayi waba visa mabanza mandi. (Tanga Minkunga 56:8.) Davidi mvandi wubaka lusalusu kuidi bakundi bandi bakuikama, dedi Yonatani ayi mfumu zinganga Nzambi Elimeleki. (1 Samu. 20:​41, 42; 21:​6, 8, 9) Ayi kheti Sauli waba tomba kumvonda, Davidi wuvuka. Nandi wuba lufiatu ti Yave waba mona mambu kaba viokila ayi wuzaba buidi kaba kuyimuena.

9. Buidi Yave kambelanga bo tumviokila mu ziphasi?

⁹ Bo ngie wumviokila mu mambu ma kutula boma, tebuka moyo ti Yave wummonanga mambu widi mu kuviokila ayi phila widi mu kumuena. Dedi, Yave kasa mona ko to ziphasi basi Isaeli baviokila ku Ngipiti, vayi mvandi wuzaba ziphasi baba viokila. (Esodu 3:7) Davidi wuyimbila kuidi Yave ti: ‘Yave wumona ziphasi ziami ayi kiunda kiama kingolo.’ (Minku. 31:7) Ayi bo dikabu diaba tovuka mu kibila ki makani mambi babaka, ‘nandi mvandi wumona ziphasi.’ (Yesa. 63:9) Bo ngie widi mu boma, Yave widi phuila yi kukusadisa kununga kiunda kiaku.

10. Mbi bi kuvana lufiatu ti Yave wu kuvisanga ayi ti wala kusadisa kununga zioso kua ziphasi wulenda viokila?

¹⁰ Bo widi mu kuviokila mu diambu diphasi, ḿba ngie wulenda mona buka ti Yave kasinkuiza kusadisa ko. Mbi wulenda vanga? (2 Minti. 6:​15-17) Tala biuvu abibi: Ngie mana baka khindusulu mu dilongi voti mu  mvutu khomba kavana mu lukutukunu? Vadi kilongulu, video voti nkunga wumana kukindisa? Vadi mutu mana kutangila matangu ma Kibibila ma kukindisa? Tulendi zimbakana ko luzolo lu kikhomba ayi bidia bi kiphevi tuntambulanga. Tebuka moyo ti mambu tuma tubila, midi minkhailu mi Yave. (Yesa. 65:13; Malaku 10:​29, 30) Minkhailu amiomio, mimmonisa ti Yave wu kuvuanga nkinza. (Yesa. 49:​14-16) Ayi mvandi mimmonisa ti nandi widi mutu wu lufiatu.

11. Mbi bisadisa yaya Aida kununga boma?

¹¹ Yaya Aida wunkalanga ku Senegal, wumona bivisa mu phila Yave kankiebila, mu mambu maphasi kaba viokila. Mu kuba muana wunkulutu, matata mandi baba tomba muingi nandi kabaka zimbongo zifuana, muingi kaba kieba ayi ka yikieba. Vayi nandi wubaka makani ma kuba ntuami ntuala ayi kunata luzingu lukhambu kikhafi. Dikanda diandi bamfuemina ayi bantubila bubi. Nandi wutuba: “Yiba mu boma kibila yisa baka ko bu kukiebila matata mami ayi baboso bamfuemina. Minu yivana Yave fotu mu kubika mambu mambi kumbonikina. Vayi dilongi dimueka yilandakana mu lukutukunu, ntuadisi wu tutebula moyo ti boso kua bubela kiunda tuidi mu ntima Yave zebi. Buviokila thangu malongi ma bakulutu ayi ma batu bankaka, maphana lufiatu luzolo Yave kadi kuidi minu. Yitona kusambila mu lufiatu ayi yimona ndembama mu ntima, mu kumona mimvutu mi minsambu miama. “ Buviokila thangu, yaya Aida wubaka kisalu kinsadisa kutatamana mu kisalu ki ntuami ntuala, kusadisa matata mandi ayi batu bankaka. Nandi wutuba “yilonguka kufiatila Yave mu ntima woso. Buabu, bo yinsambila boma buama bummananga.

MBI YAVE KALA VANGA?

12. Dedi bummonisina Minkunga 56:​9, lufiatu mbi Davidi kaba?

¹² Tanga Minkunga 56:9. Matangu amomo, mammonisa phila yinkaka Davidi kanungina boma. Kheti luzingu luandi lutatamana kuba va kingela, nandi waba yindulanga mbi Yave kela kumvangila kuntuala. Davidi wuzaba ti Yave wunkuiza nsadisa mu thangu  yifuana, kibila Yave wutuba ti nandi wala ba ntinu ku Isaeli. (1 Samu. 16:​1, 13) Davidi wuzaba ti boso kuandi bubela, Yave Nzambi wala dukisa mambu kakanikisa.

13. Lufiatu mbi tulenda ba kuidi Yave?

¹³ Mbi Yave kakanikisa kuvanga mu ngiewu? Tulendi vingila ko Yave ka tukieba mu mambu moso maphasi. c Vayi tebuka moyo ti zioso kua ziphasi wulenda viokila mu nza ayiyi, Yave wala manisa ziawu mu nza yimona yinkuiza. (Yesa. 25:​7-9) Tulenda ba lufiatu ti Mvang’itu widi lulendu lu kuvulubusa bafua, kumanisa bimbevu ayi kutulula zimbeni zioso.—1 Yoa. 4:4.

14. Mu mambu mbi tulenda yindula?

¹⁴ Ngie kuba mu boma, yindula mbi Yave kala vanga mu bilumbu binkuiza. Yindula buidi wala bela bo Satana kala bungua, bo bala bunga bankua mambi ayi kubika to batu basonga ayi bo nkadu nkadu tuala kue banga bavedila. Thuadusulu yi Lukutukunu lu Mavula lu mvu 2014, yimmonisa buidi tulenda yindudila matedi kivuvu kitu. Tata mueka wunyindula na dikanda diandi buidi mambu madi mu 2 Timoti 3:​1-5 mala bela disuasana ku paladizu. Ku nza yimona kuala ba beni mayangi ayi mambu mala bela abubu: “Batu bela luta zola bankaka, bala zola kiedika, bala zaba zindilu ziawu, bala kikululanga, bala zitisa Nzambi, bala zitisa matata, bala tondanga, bala ba bakuikama, bala monisa luzolo kuidi basi dikanda diawu, bala ba bakubama muingi kudedikisa mambu, bala kolukanga buboti na bankaka, bala zaba kukiyala, bala ba bavumbama, bala zola mamboti, bala ba batu ba lufiatu, bala ba mayindu mamboti, bala ba bakuikama, bala luta zola Nzambi kena minyengu, bala sadila Nzambi ayi batu abobo bala ba va kimueka.” Ngie wunsolulanga na dikanda diaku voti na bakundi baku matedi buidi luzingu luela bela ku nza yimona?

15. Kheti yaya Tanja wuba mu boma, mbi binsadisa kununga boma?

¹⁵ Khomba mueka bantedilanga Tanja wunkalanga ku Macedonia wununga boma mu kuyindula lusakumunu tuala tambula kuntuala. Nandi wuviokila mu zithotolo ziwombu kuidi matata mandi mu kibila ki kulonguka kibibila. Nandi wutuba: “Mu mambu yaba mona boma ti malenda monika, mawu monika. Mam’ami waba kumbulanga kadika khumbu yimba mu lukutukunu, matata mami batuba ti bala kuphonda minu kuba Mbangi yi Yave.” Buviokila thangu Tanja bankuka ku nzo, mbi nandi kavanga? Nandi wubue tuba, “Minu yitsikika thalu mu phila yala bakila mayangi ma mvu ka mvu mu kusola kutatamana wukuikama. Mvandi yi yindula buidi Yave kala kutsakumunina mu nza yimona mu kusola kunsadila ayi buidi mambu moso mambi mala manina.” Tanja wutatamana wukuikama ayi mu lusalusu lu Yave wubaka vama va kukala. Bubu, nandi widi wukuela na khomba mueka wukuikama ayi bansala mu mayangi va kimueka mu kisalu ki thangu ka thangu.

KINDISA LUFIATU LUAKU BUBU

16. Mbi bilenda kutusadisa kutatamana kuba kibakala bo tummona mambu madi mu mbikudulu yi Luka 21:​26-28 kusalama?

¹⁶ Mu thangu ziphasi zingolo, nduka batu boso bala titumuka mu boma vayi dikabu di Nzambi bala tatamana bakuikama ayi bala ba kibakala. (Tanga Luka 21:​26-28.) Kibila mbi tualasa bela ko mu boma? Kibila tuidi mu kulonguka kufiatila mu Yave. Yaya Tanja tuma tubila, wutuba ti mambu kaviokila kumbusa madi mu kunsadisa kukindama mu  mambu mankaka maphasi kadi mu kuviokila. “Yilonguka ti vasi ko ni diambu Yave kalenda lembakana kumanisa. Thangu zinkaka tulenda yindula ti batu bankaka badi mu kutadila mambu madi mu kumonika. Vayi Yave to wulenda manisa mambu moso. Ayi kheti bo diambu dimmonikina ti didi diphasi, nandi kalenda manisa diawu.”

17. Buidi lutangu lu mvu luala tusadisila? (Tala foto yidi va thonono.)

¹⁷ Disi ko diambu dimbi kuba mu boma, vayi dedi ntinu Davidi tulendi bika ko boma bu tununga. Mu matangu ma mvu 2024 mantubila, nsambu Davidi kavanga kuidi Yave: ‘Bo yidi mu boma yintulanga lufiatu luama kuidi ngiewu.’ (Minku. 56:3) Buku yimueka yisudikisa matedi lutangu alolo ti Davidi kabasa sikikanga ko thalu mu mambu kaba viokila vayi waba sikikanga thalu kuidi mutu wulenda kumvukisa. Yindula mu matangu ma mvu mu zingonda zinkuiza, bulutidi ngie kuviokila mu mambu maphasi. Botula thangu muingi kuyindula mu mambu Yave kavanga mu thangu yikhulu, kadi mu kuvanga bubu ayi kala vanga kuntuala. Diawu dedi Davidi ngie wulenda tuba: ‘Yintulanga lufiatu luama mu Nzambi ayi yisi ko boma.’—Minku. 56:4.