1. ¿Baʼaxten yaan kʼiineʼ k-sajaktal?

 KEX yaan kʼiin tuláakloʼon k-sajaktaleʼ le Bibliaoʼ tsʼoʼok u yáantkoʼon utiaʼal maʼ k-chʼaʼik saajkil tiʼ le kimenoʼoboʼ, tiʼ le demonioʼoboʼ yéetel tiʼ le baʼax ku taal u kʼiinoʼ. Pero u jaajileʼ bejlaʼeʼ le yóokʼol kaabaʼ chuup yéetel baʼaloʼob ku beetik «u sen jaʼakʼal u yóol máak» jeʼex le guerraʼoboʼ, le u sen beetaʼal looboʼ yéetel le kʼojaʼaniloʼoboʼ (Luc. 21:11). Maʼ xaaneʼ saajkoʼon tiʼ le gobiernoʼoboʼ, tiʼ k-láakʼtsiloʼob wa tiʼ jeʼel máaxak ku tsʼáaikuba tu contra le u jaajil religiónoʼ. Yanoʼob xaneʼ saajkoʼob tumen ku tuklikoʼobeʼ maʼ kun tsaʼayloʼob yéetel le problemas táan u aktáantkoʼob beoraaʼ wa yoʼolal le problemas jeʼel u yantaltiʼob maas táaniloʼ.

2. ¿Bix tu yuʼubiluba David le ka kʼuch tu kaajil Gatoʼ?

² Koʼox ilik baʼax úuch tiʼ David, letiʼeʼ juntéenjeakeʼ tu chʼaʼaj saajkil. Le táan u máan chʼaʼpachtil tumen Saúl utiaʼal u kíimsaʼaloʼ tu chʼaʼaj saajkileʼ ka púutsʼ tu kaajil Gat tu luʼumil Filistea. Le ka tu yojéeltaj David tsʼoʼok u yaʼalaʼal tiʼ Akís u reyil Gat de ke letiʼeʼ jach u yojel baʼateʼel yéetel tsʼoʼok u kíimsik «u decenasil u milesil» filisteoʼobeʼ ‹jach sajakchajiʼ› (1 Sam. 21:​10-12). Letiʼeʼ jach tu preocupartuba le ka joʼopʼ u máansik tu tuukul baʼax wal kun beetbiltiʼ tumen rey Akíseʼ. ¿Baʼax áant David utiaʼal u xuʼulul u sen sajaktal?

3. Jeʼex u yaʼalik Salmo 56:​1-3, 11, ¿baʼax áant David utiaʼal ka xuʼuluk u sajaktal?

³ Teʼ Salmo 56, Davideʼ ku yaʼalik baʼaxten sajakchaji yéetel baʼax áant utiaʼal u xuʼulul u sajaktal, letiʼeʼ tu yaʼaleʼ le baʼax áantoʼ letiʼe úuchik u confiar tiʼ Jéeobaoʼ (xok Salmo 56:​1-3, 11). Jach maʼalob úuchik u beetik beyoʼ. Yéetel u yáantaj Jéeobaeʼ Davideʼ tu chʼaʼtuklaj u beetik junpʼéel baʼal chan jelaʼan: tu beetaj bey chokochajaʼan u pooleʼ, le oʼolal rey Akíseʼ mix tu beetaj  u cuentail Davidiʼ, tu lugar u kíimskeʼ tu chaʼaj u bin. David túuneʼ tu aprovechartaj utiaʼal u púutsʼul. ¡Bin utsil tiʼ yéetel le baʼax tu beetoʼ! (1 Sam. 21:13–22:1).

4. ¿Baʼax jeʼel u yáantkoʼon utiaʼal ka maas confiarnakoʼon tiʼ Jéeobaeʼ? Aʼal junpʼéel ejemplo.

⁴ Le baʼax jeʼel u yáantkoʼon utiaʼal maʼ k-chʼaʼik saajkileʼ letiʼe confianza yaantoʼon tiʼ Jéeobaoʼ. Chéen baʼaleʼ, ¿bix jeʼel k-confiar tiʼ Jéeoba teʼ súutukiloʼob saajkoʼonoʼ? Koʼox ilik junpʼéel ejemplo. Koʼox aʼalikeʼ juntúul doctoreʼ ku yaʼalik yaantoʼon junpʼéel kʼojaʼanil, maʼ xaaneʼ tu káajbaleʼ chan saajkoʼon. Pero wa k-ojel táan k-atendertaʼal tumen juntúul maʼalob doctoreʼ leloʼ jeʼel u beetik k-uʼuyikba tranquiloeʼ tumen k-confiartiʼ. Maʼ xaaneʼ le doctoroʼ tsʼoʼok u atendertik yaʼab máakoʼob yaantiʼob xan le kʼojaʼanilaʼ. Le táan k-tsoliktiʼ bix k-uʼuyikbaoʼ k-ilkeʼ jach ku chʼenxikintikoʼon yéetel ku naʼatik bix k-uʼuyikba. Tsʼoʼoleʼ ku yaʼalik yaan u tsʼáaiktoʼon junpʼéel tratamiento tsʼoʼok u yáantik yaʼab máakoʼob. Bey xan u yúuchul yéetel Jéeobaoʼ yaan k-maas confiar tiʼ letiʼ wa k-tuukul tiʼ le baʼaxoʼob tsʼoʼok u beetik t-oʼolaloʼ, baʼax táan u beetik beoraaʼ yéetel baʼax ken u beet maas táanil. Salmo 56, ku yaʼalikeʼ bey tu beetil Davidoʼ. Mientras táan k-xakʼaltik jujunpʼéel tiʼ le versículoʼoboʼ koʼox tuukul tiʼ bix jeʼel u yáantkoʼon utiaʼal ka maas confiarnakoʼon tiʼ Jéeoba yéetel utiaʼal maʼ k-chʼaʼik saajkileʼ.

BAʼAX TU BEETAJ JÉEOBA ÚUCHJEAKIL

5. Le ka tu yuʼubaj saajkeʼ, ¿tiʼ baʼax tuukulnaj David? (Salmo 56:​12, 13).

⁵ Le tiaʼan David tu chiʼ kíimiloʼ maʼ chʼíik tuukul tiʼ le baʼax ku yúuchultiʼoʼ, baʼaxeʼ tuukulnaj tiʼ le baʼaloʼob tsʼoʼok u beetik Jéeoba tu yoʼolaloʼ (xok Salmo 56:​12, 13). Letiʼeʼ suuk u beetik kaʼach beyoʼ. Por ejemploeʼ suuk u jóoʼsik kaʼach tiempo utiaʼal u tuukul tiʼ le baʼaloʼob u beetmaj Jéeobaoʼ, leloʼ tu yáantaj u kʼaʼajseʼ Jéeobaeʼ jach yaan u poder yéetel jach u yaabiltmaj máak (Sal. 65:​6-9). Davideʼ ku tuukul xan kaʼach tiʼ le baʼax ku beetik Jéeoba yoʼolal u maasiloʼ (Sal. 31:19; 37:​25, 26). Pero maases tuukulnaj yoʼolal le baʼaxoʼob tu beetaj Jéeoba tu yoʼolaloʼ. Por ejemploeʼ tu kʼaʼajseʼ Jéeoba kanáant desde tu chichnil (Sal. 22:​9, 10).  Úuchik u tuukul tiʼ le baʼaloʼobaʼ le áant utiaʼal ka maas confiarnak tiʼ Jéeoba.

6. ¿Baʼax jeʼel u yáantkech confiar tiʼ Jéeoba le kéen a wuʼuy saajkecheʼ?

⁶ Le kéen a wuʼuy saajkecheʼ tukle: «¿Baʼax tsʼoʼok u sen beetik Jéeoba?». Tuukulnen tiʼ le baʼaloʼob u beetmoʼ. Por ejemploeʼ letiʼeʼ ku kanáantik le mejen chʼíichʼoʼob yéetel le looloʼob kex maʼatech u adorarkoʼob Diosoʼ, lelaʼ ku yáantkoʼon k-creerteʼ Jéeobaeʼ yaan xan u kanáantkoʼon (Mat. 6:​25-32). Tuukulnen xan yoʼolal le baʼaxoʼob tsʼoʼok u beetik Jéeoba yoʼolal le máaxoʼob meyajtikoʼ. Maʼ xaaneʼ jeʼel u páajtal a xakʼaltik u ejemplo juntúul tiʼ le máaxoʼob ku chʼaʼchiʼitaʼaloʼob teʼ Bibliaoʼ wa a xokik u experiencia juntúul tiʼ le máaxoʼob meyajtik Dios teʼ kʼiinoʼobaʼ. a Tukle: ¿Bix tsʼoʼok u kanáantken Jéeoba tak beoraaʼ? ¿Bix tu yáantilen in kʼaj óolt u jaajil? (Juan 6:44). ¿Bix tsʼoʼok u núukik in oraciónoʼob? (1 Juan 5:14). ¿Baʼax utsil ku taasikten sáamsamal le sacrificio tu beetaj u Hijooʼ? (Efe. 1:7; Heb. 4:​14-16).

7. ¿Bix áantaʼabik Vanessa tumen u ejemplo Daniel?

⁷ Vanessa, b juntúul kiik kajaʼan Haitíeʼ tu aktáantaj junpʼéel baʼal jach tu beetaj u sajaktal. Juntúul máakeʼ ku presionartik kaʼach utiaʼal ka u beetuba u novia, sáamsamal ku tʼanik yéetel ku túuxtik mensajeʼob tiʼ le kiikoʼ. Vanessaeʼ tu yaʼalajtiʼ maʼ u kʼáat mix baʼaliʼ, lelaʼ jach tu beetaj u pʼuʼujul le máakoʼ, hasta tu amenazartaj le kiikoʼ. ¿Baʼax áant Vanessa utiaʼal u xuʼulul u sajaktal? Letiʼeʼ tu yilaj u maas kanáantkuba yéetel áantaʼab xan tumen juntúul anciano utiaʼal u tʼaan yéetel le autoridadoʼoboʼ. Tsʼoʼoleʼ tu kʼaʼajsaj bix tu kanáantil Jéeoba le máaxoʼob meyajt úuchjeakiloʼ. Letiʼeʼ ku yaʼalik: «Le yáax máax tin kʼaʼajsoʼ profeta Daniel. Kex letiʼ maʼ tu beetaj mix baʼal kʼaaseʼ puʼul ichil u sajkab le leónoʼoboʼ, chéen baʼaleʼ kanáantaʼab tumen Jéeoba. Teen túuneʼ tin waʼalaj tiʼ Jéeoba yaan in pʼatik tuláakal tu kʼab yéetel ka u yáanten. Le ka tsʼoʼok in orareʼ tin wuʼuyaj maʼ saajkeniʼ» (Dan. 6:​12-22).

¿BAʼAX KU BEETIK JÉEOBA BEORAAʼ?

8. ¿Baʼax u yojel kaʼach David? (Salmo 56:8).

⁸ U kuxtal Davideʼ tiaʼan kaʼach tu chiʼ kíimil le tiaʼan tu kaajil Gatoʼ, kex beyoʼ letiʼeʼ maʼ píitmáan u sajaktaliʼ. Baʼaxeʼ tu chʼikaj u tuukul tiʼ bix táan u yáantaʼal tumen Jéeoba teʼ súutukiloʼ. Letiʼeʼ tu tsʼáaj cuentaeʼ Jéeobaeʼ táan kaʼach u nuʼuktik, u kanáantik yéetel ku naʼatik bix u yuʼubikuba (xok Salmo 56:8). Tsʼoʼoleʼ táan xan u yáantaʼal tumen u amigoʼob jeʼex Jonatán yéetel Aimélek u maas nojchil le sacerdoteʼoboʼ (1 Sam. 20:​41, 42; 21:​6, 8, 9). Kex taak kaʼach u kíimsaʼal tumen Saúleʼ, Davideʼ páajchaj u púutsʼul, letiʼeʼ seguro de ke Jéeobaeʼ u yojel baʼax táan u muʼyajtik yéetel bix u yuʼubikuba teʼ súutukiloʼ.

9. ¿Baʼax u yojel Jéeoba yoʼolal cada juntúul tiʼ toʼon?

⁹ Wa saajkech tumen táan a aktáantik junpʼéel baʼal jach yajeʼ kʼaʼajaktecheʼ Jéeobaeʼ u yojel baʼax táan u yúuchultech yéetel u yojel bix a wuʼuyikaba. Por ejemploeʼ le esclavizartaʼan le israelitaʼob Egiptooʼ Jéeobaeʼ tu yaʼaleʼ jach u yojel ‹baʼax ku muʼyajtikoʼob› (Éxo. 3:7). Tiʼ junpʼéel kʼaayeʼ Davideʼ tu yaʼaleʼ Jéeobaeʼ ku yilik «baʼax ku yúuchul[tiʼ]» yéetel «baʼax [ku] muʼyajtik» (Sal. 31:7). Tsʼoʼoleʼ le ka muʼyajnaj u kaajil Israel yoʼolal le baʼaloʼob maʼ maʼalobtak ku beetkoʼoboʼ Jéeobaeʼ «yaachaj u yóol ka tu yilaj baʼax ku yúuchultiʼob» (Isa. 63:9). Maʼ unaj u tuʼubultoʼoneʼ le kéen k-uʼuy  saajkoʼoneʼ Jéeobaeʼ jach u yojel bix k-uʼuyikba yéetel taak u yáantkoʼon utiaʼal u xuʼulul k-sajaktal.

10. ¿Baʼax eʼesiktech Jéeobaeʼ u yaabiltmech yéetel taak u yáantkech?

¹⁰ Yaan horaeʼ como táan k-aktáantik junpʼéel baʼal jach yajeʼ jach saajkoʼon, le oʼolal maʼ t-ilik bix u yáantkoʼon Jéeoba. ¿Baʼax túun jeʼel u páajtal k-beetkeʼ? Jeʼel u páajtal k-kʼáatik tiʼ Jéeoba ka u yáantoʼon k-il tuláakal le baʼax ku beetik t-oʼolaloʼ (2 Rey. 6:​15-17). Kéen tsʼoʼokkeʼ ka tuklik: ¿Bix tsʼoʼok u yáantken junpʼéel discurso wa junpʼéel comentario aʼalaʼab teʼ reuniónoʼ? ¿Tsʼoʼok wa u líiʼsik in wóol junpʼéel publicación, junpʼéel video wa junpʼéel kʼaay? ¿Tsʼoʼok wa u líiʼsik in wóol juntúul sukuʼun yéetel baʼax ku yaʼalik wa yéetel junpʼéel teksto? U jaajileʼ u siibal Jéeoba tuláakal le janal espiritual ku tsʼaʼabaltoʼonoʼ bey xan le yaabilaj ku yeʼesiktoʼon le sukuʼunoʼoboʼ (Isa. 65:13; Mar. 10:​29, 30). Tuláakal le baʼaloʼobaʼ ku yeʼesiktoʼoneʼ jach tu jaajil taak u yáantkoʼon Jéeoba, le oʼolal unaj k-confiartiʼ (Isa. 49:​14-16).

11. ¿Baʼax áant Aida utiaʼal u xuʼulul u sajaktal?

¹¹ Aida, juntúul kiik kajaʼan Senegaleʼ tu aktáantaj junpʼéel baʼal jach yaj pero tu yilaj xan bix u yáantaʼal tumen Jéeoba. Como letiʼ u maas nojchileʼ ku páaʼtaʼal ka u tsʼáa tiʼ u papáʼob le baʼax kʼaʼabéettiʼoboʼ yéetel ka u kanáantoʼob. Pero letiʼeʼ tu chʼaʼtuklaj u beetik u precursorail, le oʼolal maʼ yaʼab u náajaliʼ. U láakʼtsiloʼobeʼ jach kʼuuxilnajoʼob yéetel tu yaʼaloʼob baʼal tiʼ Aida. Letiʼeʼ ku yaʼalik bix tu yuʼubiluba: «Jach sajakchajen tumen maʼ tu páajtal in tsʼáaik baʼax kʼaʼabéet tiʼ in papáʼob, tsʼoʼoleʼ kin tuklikeʼ yoʼolal leloʼ mix máak u kʼáat u bisuba tin wéetel. Káaj in culpartik Dios yoʼolal tuláakal le baʼax ku yúuchultenoʼ». Junpʼéel kʼiineʼ Aidaeʼ áantaʼab tumen junpʼéel discurso tu yuʼubaj teʼ múuchʼuliloʼ. Letiʼeʼ ku yaʼalik: «Le sukuʼunoʼ tu kʼaʼajsajtoʼoneʼ Jéeobaeʼ u yojel tuláakal le baʼax k-aktáantikoʼ yéetel u yojel baʼax yaan ichil k-puksiʼikʼal. Tsʼoʼoleʼ le ancianoʼob yéetel le u maasil sukuʼunoʼoboʼ tu beetoʼob in wilkeʼ Jéeobaeʼ taak u yáantken yéetel u yaabiltmen, jujunpʼíitileʼ joʼopʼ in wuʼuyikinba maʼalobil tu kaʼatéen. Káaj in orar  tiʼ Jéeoba yéetel in confiartiʼ, tsʼoʼoleʼ como tin wilaj ku núukik in oraciónoʼobeʼ, xuʼul in jach chiʼichnaktal». Ka máan kʼiineʼ Aidaeʼ tu kaxtaj junpʼéel meyaj ku chaʼik u beetik u precursorail, u yáantik u papáʼob bey xan u yáantik uláakʼ máakoʼob. Ku yaʼalik: «Bejlaʼeʼ jach kin confiar tiʼ Jéeoba, kéen orarnakeneʼ ku xuʼulul in sajaktal».

¿BAʼAX KEN U BEET JÉEOBA MAAS TÁANIL?

12. Jeʼex u yaʼalik Salmo 56:​9, ¿baʼax u yojel kaʼach David?

¹² (Xok Salmo 56:9). Le tekstoaʼ ku yeʼesik baʼax uláakʼ tu beetaj David utiaʼal maʼ u sajaktal le tiaʼan tu chiʼ kíimiloʼ: tuukulnaj tiʼ le baʼax ken u beet Jéeoba maas táaniloʼ. Letiʼeʼ u yojel yaan u salvartaʼal, tumen Jéeobaeʼ u prometermaj letiʼ ken u beet u reyil Israel (1 Sam. 16:​1, 13). Tsʼoʼoleʼ u yojel Jéeobaeʼ le kéen u yaʼal junpʼéel baʼaleʼ yaan u béeykuntik.

13. ¿Baʼax ken u beet Jéeoba teʼ túumben luʼumoʼ?

¹³ ¿Baʼax u prometermajtoʼon Jéeoba? Jéeobaeʼ maʼ tu yaʼalik wa yaan u luʼsik tuláakal le problemas k-aktáantik teʼ kʼiinoʼobaʼ. c Baʼaxeʼ ku yaʼalikeʼ teʼ túumben luʼum ken u luʼs tuláakal le problemas k-muʼyajtikoʼ (Isa. 25:​7-9). K-ojleʼ Jéeobaeʼ jach yaʼab u poder, le oʼolal jeʼel u páajtal u kaʼa kuxkíintik le kimenoʼoboʼ, u tsʼáaik k-toj óolal yéetel u xuʼulsik k-enemigoʼob (1 Juan 4:4).

14. ¿Baʼax maʼalob ka k-máans t-tuukul?

¹⁴ Kéen sajakchajkecheʼ tuukulnen tiʼ le kuxtal kun antal teʼ Paraísooʼ. Tukult bix ken kuxlakoʼon kéen xuʼulsaʼak Satanás yéetel le kʼasaʼan máakoʼoboʼ. Yaan u kuxtal chéen utsul máakoʼob way Luʼumeʼ, tsʼoʼoleʼ yaan xan u pʼáatal perfectoil máak. Teʼ asamblea regional yanchaj 2014, máansaʼab junpʼéel demostración jeʼel u yáantkoʼon tuukul tiʼ le esperanza yaantoʼonoʼ. Teʼeloʼ eʼesaʼab bix juntúul sukuʼun yéetel u familiaeʼ táan u tsikbaltikoʼob baʼax jeʼel u yaʼalik 2 Timoteo 3:​1-5 wa ka tʼaanak tiʼ le kuxtal kun antal teʼ Paraísooʼ, tu yaʼaloʼob: «Teʼ túumben luʼumoʼ yaan u jach kiʼimaktal u yóol máak. Tumen le máakoʼoboʼ yaan u yaabiltikoʼob u maasil, yaan u yaabiltikoʼob le baʼaxoʼob ku taal tiʼ Diosoʼ, yaan u yeʼeskoʼob kabal óolal, maʼ kun kaʼantal u yichoʼob, yaan u meyajtikoʼob Dios, yaan u yuʼubikoʼob u tʼaan u taataʼob, yaan u tsʼáaikoʼob u diosboʼotikil tuláakal baʼal, maʼ kun náachtaloʼob tiʼ Dios, yaan u yaabiltik u láakʼtsiloʼob, yaan u yóotik u tsʼáaubaʼob de acuerdoil, yaan u tʼaanoʼob maʼalob tiʼ u maasil, yaan u controlarkubaʼob, maʼ kun tsʼíikiloʼob, yaan u yaabiltikoʼob baʼax uts, maʼ ken u traicionartoʼob máak, maʼ kun kʼuuxiloʼob, maʼ ken u taasubaʼob nojbaʼalil yéetel yaan u yaabiltikoʼob Dios maʼ le baʼaloʼob taasik kiʼimak óolal tiʼoboʼ; tsʼoʼoleʼ jach yaan u tsʼáaik u yóol u adorartoʼob Dios, teech túuneʼ maʼ unaj a náachkuntikabatiʼobiʼ». ¿Suuk wa a tsikbaltik yéetel a familia wa yéetel le sukuʼunoʼob bix le kuxtal kun antal teʼ túumben luʼumoʼ?

15. ¿Baʼax áant Tanja utiaʼal u xuʼulul u sajaktal?

¹⁵ Tanja, juntúul kiik kajaʼan Macedonia del Norteeʼ, xuʼul u sajaktal úuchik u tuukul tiʼ le promesaʼob u beetmaj Jéeobaoʼ. Letiʼeʼ ku yaʼalikeʼ le ka káaj u xokik le Bibliaoʼ jach pʼuʼuj u papáʼob. Ku yaʼalik: «Jach úuch le baʼax maʼ in kʼáat kaʼachoʼ. Cada ken suunaken teʼ reuniónoʼoboʼ in maamaeʼ ku laʼalajken. Letiʼ yéetel in papáeʼ tu yaʼaloʼobten yaan u kíimskenoʼob wa kin beetkinba u testigo Jéeoba». Tu tsʼookeʼ jóoʼsaʼab Tanja tu yotoch. ¿Baʼax tu beetaj? Ku yaʼalik: «Káaj in tuklikeʼ wa ku chúukpajal in wóol tiʼ Jéeobaeʼ yaan u kiʼimaktal in wóol mantatsʼ teʼ túumben luʼumoʼ, kin tuklik xaneʼ kex jeʼel baʼaxak ka in perdert teʼ kʼasaʼan yóokʼol kaabaʼ Jéeobaeʼ yaan u tsʼáaikten u maas  yaʼabil teʼ Paraísooʼ, tsʼoʼoleʼ yaan xan in tuʼubsik tuláakal le baʼaxoʼob kʼaastak ku yúuchultenoʼ». Tanjaeʼ chúukpaj u yóol tiʼ Jéeoba yéetel tu kaxtaj tuʼux u kajtal. Bejlaʼeʼ letiʼeʼ tsʼokaʼan u beel, letiʼ yéetel u yíichameʼ jach u tsʼaamaj u yóol u meyajtoʼob Jéeoba yéetel jach kiʼimak u yóoloʼob.

ILAWIL A MAAS CONFIAR TIʼ JÉEOBA

16. ¿Baʼax ken u yáantoʼon utiaʼal maʼ k-sajaktal kéen béeychajak Lucas 21:26 tak 28?

¹⁶ Le táan le nojoch muʼyajiloʼ u maas yaʼabil «le máakoʼoboʼ yaan u desmayaroʼob tumen jach saajkoʼob yoʼolal le baʼaloʼob» ku yúuchloʼoboʼ. Chéen baʼaleʼ le máaxoʼob meyajtik Jéeobaoʼ maʼ ken k-sajaktal (xok Lucas 21:​26-28). ¿Baʼaxten? Tumen k-confiar tiʼ Jéeoba. Tanjaeʼ ku yaʼalikeʼ le baʼaxoʼob sen úuchtiʼoʼ le áantik utiaʼal u aktáantik le problemasoʼ. Ku yaʼalik: «Tsʼoʼok in wilkeʼ kex táan k-muʼyajeʼ Jéeobaeʼ ku yáantkoʼon yéetel ku bendecirkoʼon. Yaan hora jeʼel k-tuklikeʼ le máakoʼoboʼ ku páajtal u beetkoʼob jeʼel baʼaxak u kʼáatoʼobeʼ pero u jaajileʼ chéen tumen ku chaʼik Jéeobaeʼ ku páajtal u beetkoʼob wa baʼax. Le oʼolaleʼ kex jeʼel bukaʼaj yajil le baʼax táan u yúuchultoʼonoʼ yaan u kʼuchul u kʼiinil u xuʼulul».

17. ¿Bix u yáantkoʼon u tekstoil le año 2024? (Ilawil le foto yaan tu yáax páginail le revistaaʼ).

¹⁷ Teʼ yóokʼol kaabaʼ jach yaʼab baʼal jeʼel u sajakkúuntkoʼoneʼ, chéen baʼaleʼ jeʼex Davideʼ maʼ unaj k-chaʼik k-sajaktaliʼ. Tiʼ u tekstoil le año 2024, ku chíikpajal le baʼax tu yaʼalaj David tiʼ Jéeobaoʼ: «Kéen in wuʼuy saajkeneʼ kin kʼubik in wóol tiʼ teech» (Sal. 56:3). Junpʼéel libro ku tsolil le baʼax ku yaʼalik le Bibliaoʼ ku yaʼalik yoʼolal le tekstoaʼ: «Davideʼ maʼ chʼíik tuukul tiʼ le baʼax sajakkúuntikoʼ mix tiʼ le problemas yaantiʼoʼ, baʼaxeʼ confiarnaj tiʼ le máax jeʼel u páajtal u salvarkoʼ». Tuukulnen mantatsʼ tiʼ u tekstoil le añoaʼ, maases wa táan a muʼyajtik wa baʼax. Jóoʼs tiempo utiaʼal a tuklik baʼax tsʼoʼok u beetik, baʼax ku beetik yéetel baʼax ken u beet Jéeoba ta woʼolal. Beyoʼ yaan u páajtal a waʼalik jeʼex Davideʼ: «Ku xuʼulul in sajaktal tumen kin confiar tiʼ Dios» (Sal. 56:4).